Mu N’igin Gum’ercha’em Nge Tor Nga Daken E Llowan’

“I Jehovah e ma pi’ e gonop; ma tamilangan’ nge llowan’ e ma yib u l’ugun.”​—PROVERBS 2:6.

1. Uw rogon nrayog ni ngad n’igined gum’ercha’dad nge tor nga daken e llowan’?

JEHOVAH e ir e bin nib Baga’ e Sensey rodad. (Isaiah 30:20, 21) Ma mang e thingarda rin’ed me yib angin ngodad ko “tamilangan’ rok Got” ni bay ko Thin Rok? Thingarda ‘n’igined gumercha’dad nge tor nga daken e gonop’​—thingarda adaged ni nge yog e re felngin ney ngodad ma nge m’ug u pangidad. Ere thingarda sapgad ku Got ya arrogon ni yog facha’ nib gonop ni gaar: “I Jehovah e ma pi’ e gonop; ma tamilangan’ nge llowan’ e ma yib u l’ugun.” (Proverbs 2:1-6) Be mang e tamilangan’, nge gonop, nge llowan’?

2. (a) Be mang e tamilangan’? (b) Be mang e gonop? (c) Be mang e llowan’?

² Tamilangan’ e aram e kan nang boch ban’en ni bochan e tin ni kan rin’ faram, nge tin ni kan yaliy, nge tin ni kan fil. Gonop e aram rogon ni ngan maruweliy e tamilangan’ nrogon. (Matthew 11:19) I ngongol Solomon ni Pilung u fithik’ e gonop u nap’an ni i luag l’agruw e ppin bitir ni yow be yog nra bagayow me ir e fak e re tir nem me fanay e tamilangan’ u morngaagen rogon nib t’uf e bitir rok chitingin ni nge pithig fare magawon. (1 Kings 3:16-28) Llowan’ e “rogon ni ngan turguy ban’en nrogon.” Ku aram “gelngin lanin’uy ni nge nang e thil u thilin ban’en nge yugu reb e ban’en.” (Webster’s Universal Dictionary) Faanra gad ra n’igin gum’ercha’dad nge tor nga daken e llowan’, ma Jehovah e ra pi’ ngodad u daken Fak. (2 Timothy 2:1, 7) Ma uw rogon ma llowan’ e bay rogon ko urngin ban’en ko par?

Llowan’ nge Thin Rodad

3. Mu weliy fan fare thin ko Proverbs 11:12, 13 nge fan fare thin ni “dariy gum’ercha’en”?

³ Llowan’ e ma ayuwegdad nge tamilangan’dad ni bay “ngalan’ ni ngan th’ab gulungey nge ngalan’ ni ngan welthin.” (Eklesiastes 3:7) Re felngin ney e ku ma ayuwegdad ngad ayuwgad ko mang e gad ra yog. Proverbs 11:12, 13 e begaar: “En ndariy gum’ercha’en e ke dariy fannag e en ni migid ngak, machane en ni baga’ e llowan’ rok e aram e cha’ ni ma th’ab galungan. En ni ma t’ar e thin nga daken be’ e be tamilangnag ban’en nsusun ndabi yog, machane en ni ba yul’yul’ e ma uponguy ban’en.” Arrogon, ba moon ara ppin ni ma fanenikay yugu be’ e “dariy gum’ercha’en.” Wilhelm Gesenius ni ir e lexicographer e ke weliy ni be’ ni aram rogon e “de tamilangan’.” Ya dabiyog ni nge turguy ban’en nrogon, ma fare thin ni “gum’ercha’en” e be dag ni be’ ni aram rogon e dariy felngin. Faanra reb e Kristiano e ra non non ma ra pag rogon nge yan i mus ni ra t’ar e thin nga daken be’ fa ra yog e thin nib kireb ngak, ma piin piilal ko ulung e ra taleg e re ngongol nem u lan e ulung.​—Levitikus 19:16; Psalm 101:5; 1 Korinth 5:11.

4. Mang e ma rin’ e pi Kristiano nib llowan’ mab yul’yul’ ko thin ni kan weliy ngorad ni susun ni dabda weliyed ko girdi’?

⁴ Piin ni “baga’ e llowan’”rorad e gathi bod e piin ni “dariy gum’ercha’rad,” ya yad ma th’ab galungrad ko ngiyal’ nib puluw. Dabra weliyed ban’en nsusun dabni weliy. (Proverbs 20:19) Piin nib llowan’ e yad ba “yul’yul’” me ere yad manang ni rayog ni ngar kirebnaged be’ nfaanra yira non ndan ayuw riy. Yad ba yul’yul’ ngak e pi walag ma dabra weliyed ban’en nra kirebnagrad. Piin Kristiano ni yad ba llowan’ e dabra wereged e thin u morngaagen ban’en ni kan nog ngorad ndabni weliy ni fan ko ulung, ya yad ra son nge mada’ ko ngiyal’ ni ra turguy e ulung rok Jehovah ni ngan tamilangnag e re n’em u rogon ni ke turguy.

Llowan’ nge Ngongol Rodad

5. Uw rogon e ngongol nde yalen u wan’ e ‘piin nib manan’’ ma mang fan?

⁵ Pi proverb ko Bible e ma ayuwegdad ngad fanayed e llowan’ rodad ngad siyeged e ngongol nde puluw. Susun, be yog ko Proverbs 10:23 ni gaar: “En nib manan’ e ma lemnag ni ngongol nib kireb e bod e gosgos, machane en nib llowan’ e ba gonop.” Piin ni ma lemnag ni ngongol nib kireb e “bod e gosgos” e ba dake yad ba malmit ya dabra guyed fene kireb e kanawo’ rorad ma dar lemnaged ni thingara dum’gad ku Got. (Roma 14:12) Girdi’ nib ‘manan’’ e ba leplep e lem rorad mi yad lemnag ni der guy Got e ngongol nib kireb ni yad be rin’. Ngongol rorad e gowa begaar: “Dariy Jehovah.” (Psalm 14:1-3, NW; Isaiah 29:15, 16) Dar folgad ko motochiyel rok Got me ere dariy e llowan’ rorad ma dabiyog ni ngar turguyed ban’en nib puluw.​—Proverbs 28:5.

6. Mang fan ni ba manan’ e ngongol nde yalen, ma uw rogon u wan’dad e re n’en nfaanra gad ba llowan’?

⁶ “Ba moon nib llowan’” e manang u wan’ ni ngongol nde yalen e gathi ba “gosgos.” Ya manang ni dabun Got ma rayog ni nge kirebnag thilrow. Ngongol ni aram rogon e ba manan’ ya ra un e girdi’ ngay ma dabkur ted farad, ma ma kirebnag e mabgol, ma ma kirebnag fithik’ e dowey nge lanin’uy, ma ma n’igin nge war be’ ko tirok Got ban’en. Ere nguuda n’igined gum’ercha’dad nge tor ko llowan’ ma ngad siyeged e ngongol nde yalen nge urngin mit e ngongol ndarngal.​—Proverbs 5:1-23.

Llowan’ nge Gelngidad

7. Mang boch wenegan e damumuw?

⁷ Gad ra n’igin gumerchadad nge tor ko llowan’ ma ra ayuwegdad ngad gagiyegnaged gelngidad. Proverbs 14:29 e begaar, “Ani be sagaal ko damumuw e ir e ba llowan’, machane be’ ni der k’adan’ e be tay fan e tin nib aliliy ban’en.” Reb i fan ni ma athamgil be’ nib llowan’ ni nge siyeg i damumuw nib pag rogon ya ra kirebnag fithik’ i dow. Rayog ni nge yan e racha’ nga lang me n’gin e magawon ko pogofan. Ma yog e togta ni damumuw e ma k’aring boch e m’ar ni bod e asthma, nge m’ar ko biyach u dowey, nge magawon ko chew, nge ulcer.

8. Ra ngochngochan’ be’ ma rayog ni nge yibnag e mang, ma uw rogon nrayog ni ngan ayuweg e llowan’ rok be’?

⁸ Machane gathi ke mus ni bochan ni ngad siyeged e m’ar ma ar fan ni ngad llowan’gad ngad “sagaalgad ko damumuw.” Ya ngongol u fithik’ e ngochngochan’uy e rayog ni nge n’igin ni ngad rin’ed ban’en ni gad ra kal riy u tomur. Llowan’ e ma ayuwegdad ngad lemnaged ko mang wenegan e ra yib ko thin ni un nog ndan ayuw riy fa ngongol ni ngan rin’ ndan gonopiy ma aram ma ra ayuwegdad dabda “ted fan e tin nib aliliy ban’en” ngad rin’ed ban’en nde gonop. Llowan’ e ra ayuwegdad ngad nanged ni damumuw e ra kirebnag e tafinay rodad, ma aram e dabkiyog ni ngad turguyed ban’en nib puluw. Ma re n’ey e ra n’igin ndabiyog ni ngad rin’ed e tin nib m’agan’ Got ngay ma ngad pared nrogon e motochiyel rok Got. Arrogon, ra ngan damumuw nib pag rogon e ra kirebnagey ko tirok Got ban’en. Ma riyul’ ni “damumuw nib pag rogon” e aram bang ko fapi n’en ni “tin nib kireb ni yima ar’arnag” ni ra talegdad ndabda uned ko Gil’ilungun Got. (Galatia 5:19-21) Ere ngad pared ni gad e pi Kristiano nib llowan’, ma “ngad gurgad ko motoyil, machane dabda gurgad ngad welthingad, ma dabda gurgad ngad damumuwgad.”​—James 1:19.

9. Uw rogon nrayog ni nge ayuwegdad e llowan’ nge t’ufeg ko pi walag ni ngad pithiged e magawon u thildad e yugu girdi’?

⁹ Faanra yib e damumuw ngodad ma gad ra ngongol u fithik’ e llowan’ nfaanra gad ra th’ab galungdad ni nge dabi sum e magawon. Proverbs 17:27 e begaar: “Be’ ni be taleg e thin rok e ba tamilangan’ ma be’ nib llowan’ e ba gapas laniyan’.” Llowan’ nge t’ufeg e ra ayuwegdad ngad t’ared lanin’dad ndab dogned ban’en ni ra kirebnagan’ be’. Faanra kan puwan’ u fithik’ e damumuw ma t’ufeg nge sobutan’uy e ra k’aringdad ngad siro’gad ma gad wenig. Ma faan mang ke kirebnag be’ laniyan’dad. Ma aram ma ngad nonad ngak ni goo ir u fithik’ e sumunguy nge sobutan’uy ma gad guy rogon nge gapas thildad.​—Matthew 5:23, 24; 18:15-17.

Llowan’ nge Tabinaw Rodad

10. Uw rogon ni gonop nge llowan’ e bay rogon ko par ko tabinaw?

¹⁰ Girdien e tabinaw e ba t’uf ni ngar ngongolgad u fithik’ e gonop nge llowan’ ya aram rogon ran ubing e tabinaw. Proverbs 24:3, 4 e begaar: “Ngan ubing e tabinaw u daken e gonop ma ra par nib mudugil ni bochan e llowan’. Ma tamilangan’uy e ra suguy lan e pi singgil ko naun ko tin nib fel’ mab baga’ fan.” Gonop nge llowan’ e bod e def ko tabinaw nib fel’. Llowan’ e ma ayuweg e pi gallabthir ni Kristiano ni ngar pied e athamgil nga laniyan’ e pi bitir rorad nge puf e thin u thilrad. Be’ nib llowan’ e rayog ni nge un ko sabethin nib fel’ rogon, nge motoyil ko mang e be yog e ani mabgol rok, nge gonopiy ko uw rogon e tafinay rok.​—Proverbs 20:5.

11. Uw rogon nrayog ko be’ ni ppin ni ke mabgol mab llowan’ ni nge ‘ubing e tabinaw rok’?

¹¹ Gonop nge llowan’ e ri baga’ fan ni nge yog e falfalan’ ko tabinaw. Susun, Proverbs 14:1 e begaar: “Ba ppin ni ir e ba gonop e ke ubing e tabinaw rok, machane en nib aliliy e ma kirebnag e tabinaw rok u pa’.” Ba ppin nib mabgol ni ir ba gonop mab llowan’ ma ma tay tanggin e an figirngin e ra maruwel nib elmirin ni nge ayuweg e tabinaw rok ma aram me ubing e tabinaw rok. Ban’en ni ra ‘ubing e tabinaw rok’ e faanra gubin ngiyal’ ma ra weliy felngin e ani figirngin ma aram me tay e girdi’ fan. Ma ani leengiy nib fel’ mab gonop ni bay madgun Jehovah u wan’ e ran nog e sorok ngak.​—Proverbs 12:4; 31:28, 30.

Llowan’ nge Kanawo’ ko Yafas Rodad

12. Uw rogon e tin nib aliliy ban’en u wan’ e piin ni “dariy gumercharad” ma mang fan?

¹² Llowan’ e ra ayuwegdad nge fel’ e kanawo’ rodad u gubin ban’en ni gad ma rin’. Aram e n’en ni be yog ko Proverbs 15:21 ni gaar: “En ni dariy gum’ercha’en e ma felan’ ko tin nib aliliy ban’en, machane en ni ba llowan’ e ma yan nib k’iy e kanawo’ rok.” Mang fan e re thin ko proverb ney? Kanawoen e tin nib aliliy ban’en e ma felan’nag e piin pumoon nge piin ppin nge piin fel’ yangaren ni yad ba manan’. Ma “dariy gum’ercha’rad,” ya dariy fan ko tin ni yad be rin’ ma dariy e gonop rorad, ma aram mi yad falfalan’ ko tin nib aliliy ban’en.

13. Mang e ke yog Solomon u morngaagen e minmin nge tin ni dariy rogon ko par?

¹³ Ke tamilang u wan’ Solomon ni Pilung nu Israel ni dariy fan ni ngan lek e tin ndariy rogon ko par. Ke gaar: “Mus ni gag e ku gog u gum’ercha’eg ko tin yugu dariy fan: ‘Moy, nggu un boch ngom u fithik’ e falfalan’. Maku nggu guy e tin nib fel’ ban’en.’ Mu sap! Ku mm’ay fan e binem. Ku gu gaar ngak e minmin: ‘Aliliy!’ mu gaar ngak e falfalan’: ‘Be mang e be rin’ e re n’ey?’” (Eklesiastes 2:1, 2) Ba llowan’ Solomon me ere ke pirieg ni falfalan’ nge minmin ni kari mus rogon e dabi felan’nag be’, ya dabi sum e bin riyul’ e falfalan’ riy. Minmin e ra ayuwegdad ngad paged talin e pi magawon rodad nib ngoch nap’an, me taaboch ma ra gel e magawon. Ere bpuluw ni yog Solomon ni minmin e ba “aliliy.” Mang fan? Ya minmin ni yugu dariy fan e ma n’igin ndabiyog ni ngan turguy ban’en nib puluw. Rayog ni nge n’igin ngad dariy fannaged boch ban’en nib baga’ fan. Fa mit e falfalan’ ko thin nge ngongol ko en ni court jester ni maruwel rok e nge n’igin nge minmin e en ni pilung e dabi sum ban’en riy ni bay fan. Ere faanra ke tamilang u wan’dad e n’en ni yog Solomon u morngaagen e minmin nge falfalan’ ma ra ayuwegdad ngad siyeged i mang e piin ni ba “t’uf e fafel rorad me tomur Got u wan’rad.”​—2 Timothy 3:1, 4.

14. Uw rogon ni ma yan be’ ni moon nib llowan’ ko “kanawo’ nib k’iy”?

¹⁴ Uw rogon ni ma yan e en nib llowan’ nib “k’iy e kanawo’ rok”? Llowan’ ko tirok Got ban’en min fol riy e ma ayuweg e girdi’ ngar ranod ko kanawo’ nib k’iy mab puluw. Fare Bible ni Byington e begaar: “Ba moon ni der lemnag ban’en e ba adag e tin nib aliliy ban’en, machane en nib llowan’ e ra yan nib k’iy e kanawo’ rok.” “Fa en nib llowan’” e be yan u daken e kanawo’ nib k’iy ma rayog ni nge turguy ko be mang e tin nib mat’aw ma be mang e tin nib kireb ya ma fol ko Thin Rok Got.​—Hebrews 5:14; 12:12, 13.

Ngan Sap ku Jehovah u Gubin Ngiyal’ ni nge Pi’ e Llowan’

15. Mang e gad be fil ko Proverbs 2:6-9?

¹⁵ Ra ngad leked e kanawo’ nib mat’aw ko yafas rodad ma gad gubin e ba t’uf ni ngad nanged ni bay thibngidad ma thingarda sapgad ku Jehovah ni nge pi’ e llowan’ nib spiritual ngodad. Proverbs 2:6-9 e begaar: “I Jehovah e ma pi’ e gonop; ma tamilangan’ nge llowan’ e ma yib u l’ugun. Ma ma chaariy e gonop ni fan ko piin nib mat’aw; ma ma ayuweg e piin nib yul’yul’, ya ra fol ko kanawoen e pufthin, ma ra matanagiy e kanawo’ ko piin nib yul’yul’. Aram rogon ma ga ra nang fan e tin nib mat’aw ban’en nge rogon e pufthin nge rogon e par nib mat’aw, nge urngin ban’en nib fel’.”​—Mu taarebnag ko James 4:6.

16. Mang fan ndakuriy yugu reb e gonop, nge llowan’, nge fonow nib togopuluw ku Jehovah?

¹⁶ Thingarda nanged ni ba t’uf rodad e ayuw rok Jehovah, ma ngad fl’eged i gayiy ko mang e tin nib m’agan’ ngay ni bay ko Thin Rok. Ya urngin e gonop ma bay rok, ma gubin ngiyal’ mab fel’ e fonow ni ma pi’. (Isaiah 40:13; Roma 11:34) Ma bin riyul’ riy e urngin e fonow nib togopuluw ko fonow ni ma pi’ e goo dariy fan. Proverbs 21:30 e begaar: “Dariy e gonop, ma dariy e llowan’, ma dariy e fonow nib togopuluw ku Jehovah.” (Mu taarebnag ko Proverbs 19:21.) Ra nge yog e llowan’ nib spiritual, ma thingarni fil e Thin Rok Got nge yugu boch e babyor ni ma fl’eg “fare tapigpig nib yul’yul’ mab gonop,” ma aram e ra ayuwegdad ngad leked e kanawo’ nib puluw ko yafas rodad. (Matthew 24:45-47) Ere ngad puluwnaged kanawoen e yafas rodad ko fonow rok Jehovah, ma ngari mich u wan’dad ni dakuriy yugu reb e fonow ni kab fel’ ko bin ni bay ko Thin Rok, ni yugu demtrug ko uw fene fel’ ni be m’ug riy.

17. Mang wenegan e rayog ni nge yib ko fonow nde puluw ni un pi’?

¹⁷ Pi Kristiano ni yad ba llowan’ e goo yad manang ni nap’an ni ngar pied e fonow ma susun ni bay ko Thin Rok Got ma susun ni ngar filed e Bible mar fl’eged i lemnag u m’on ni ngar weliyed ban’en. (Proverbs 15:28) Faanra ran pi’ e fulweg nde puluw ko boch e deer ni baga’ fan, ma rayog ni nge sum e magawon nib baga’. Ere pi piilal ni Kristiano e ba t’uf rorad e llowan’ nib spiritual ma susun ni ngar yibilayed ku Jehovah ni nge pow’iyrad u nap’an ni yad be ayuweg e pi walag ko tirok Got ban’en.

Nge Yoor e Llowan’ nib Spiritual Rom

18. Faanra sum e magawon u lan e ulung, ma uw rogon ni ra ayuwegdad e llowan’ ni ngad pared nib thabthabel ko tirok Got ban’en?

¹⁸ Ni nge felan’ Jehovah ngodad ma ba t’uf rodad e “llowan’ ni ngad nanged fan urngin ban’en.” (2 Timothy 2:7) Gad ra pasig i fil e Bible ma ngad folgad ko kan ni thothup rok Got nge ulung rok ma ra ayuwegdad nge yog e llowan’ ngodad nrayog ni ngad gonopiyed ko mang e gad ra rin’ u nap’an ni gad ra mit ko magawon ni ra pow’iydad nga kanawo’ nde puluw. Susun, faanra bay e magawon u lan e ulung ma dan pithig nrogon nib puluw u wan’dad. Llowan’ nib spiritual e ra ayuwegdad ngad guyed ni gathi aram tapgin ni dabkuuda chaggad ko girdi’ rok Jehovah ma dabkuuda pigpiggad ku Got. Ya ngad lemnaged fene gad ba taw’ath ya rayog ni ngad pigpiggad ku Jehovah, ma ke puf rogodad ko tirok Got ban’en, ma rayog ni ngad falfalan’gad ko pigpig ni gad ma tay ni gad ma wereg e thin ko Gil’ilungun Got. Llowan’ nib spiritual e ma ayuwegdad ngad lemnaged boch ban’en nrogon ma ngad nanged fan ni kad ognaged gadad ku Got me ere susun ni ngad chaariyed rogon thildad Got, ndemtrug ko mang e ra rin’ yugu boch e girdi’. Faanra dariy ban’en nrayog ni ngad rin’ed rogon nib theocratic ni ngan pithig e magawon, ma ba t’uf ni ngad k’adedan’dad riy ngad sonnaged Jehovah ni nge yal’uweg fare magawon. Dabda talgad, ma dabda paged e magawon ni nge gel ngodad ya nge “l’agan’dad ku Got.”​—Psalm 42:5, 11.

19. (a) Mang kenggin e meybil ni tay Paul ni fan ko yu Filippi? (b) Uw rogon nrayog ni nge ayuwegdad e llowan’ nfaanra bay ban’en ni gathi ri gad manang fan?

¹⁹ Llowan’ nib spiritual e ma ayuwegdad ngad pared nib yul’yul’ ku Got nge girdi’ rok. Yog Paul ngak e pi Kristiano u Filippi: “Ere baaray e meybil rog ngak Got ni fan ngomed, gu be yibil ngak Got ni ngi i gel feni t’uf Got nge girdi’ romed i yan, mi gimed nang e bin riyul’ e tamilangan’ nge llowan’ nge yog ni ngam nanged e tin nib mat’aw ko tin nde mat’aw, nge yog ni ngam mel’eged e tin ni ir e ba th’abi fel’. Me yog ni um pired ni kam gilafgad nga orel ko urngin mit e kireb nge n’en ni yira yog e tagan riy ngomed ko Chirofen nra sul Kristus riy.” (Filippi 1:9, 10) Ni ngad gonopiyed ban’en nib puluw, ma ba t’uf e “tamilangan’ nge llowan’.” Fare bugithin nu Greek ni “llowan’” e ma sor fan ko “tamilangan’ ko gafarig.” Nap’an ni gad ma fil ban’en, ma susun ni ngad lemnaged ko uw rogon ni ma sor fan ku Got nge Kristus ma gad fl’eg i lemnag ko uw rogon ni ma tamilangnag rarogon Jehovah nge pi n’en ni pi’ ngodad. Re n’ey e ra ayuwegdad nge yog e llowan’ ngodad ma gad tay fan e pi n’en ni rin’ Jehovah Got nge Jesus Kristus ni fan ngodad. Faanra bay ban’en ni gathi ri gad manang fan, ma llowan’ e ra ayuwegdad ngad nanged ni thingar dabda n’aged e michan’ rodad ko urngin ban’en ni kad filed u morngaagen Got nge Kristus, nge tin nib m’agan Got ngay.

20. Uw rogon nrayog ni nge yoor e llowan’ nib spiritual rodad?

²⁰ Ra yoor e llowan’ nib spiritual rodad nfaanra gubin ngiyal’ ma gad ra puluwnag e lem rodad nge ngongol rodad ko Thin Rok Got. (2 Korinth 13:5) Gad ra yodor ma ra ayuwegdad ngad pared nib sobutan’, ma gathi tolangan’ ma gathi gad ra gay thibngin e girdi’. Llowan’ e ra ayuwegdad nge yib angin ngodad ko fonow ma gad ra tay fan e tin nib baga’ fan ban’en. (Proverbs 3:7) Ere ngad adaged ni ngad felan’naged Jehovah, ma ngad gayed rogon ni ngad suggad ko tamilangan’ ko Thin Rok. Re n’ey e ra ayuwegdad ngad nanged e tin nib mat’aw nge tin nib kireb, ma ngad turguyed ko be mang e pi n’en nib baga’ fan, ma ngad yul’yul’gad ku Jehovah. Rayog rodad urngin e pi n’ey nfaanra gad ra n’igin gumerchadad nge tor nga daken e llowan’. Machane, ka bay ban’en nib t’uf. Thingarda paged e llowan’ nge matanagiydad.

Uw Rogon ni Ga Ra Fulweg?

◻ Mang fan nsusun ni ngad n’igined gumerchadad nge tor nga daken e llowan’?

◻ Uw rogon nra ayuwegdad e llowan’ ko thin rodad nge ngongol rodad?

◻ Mang angin ni yib ngodad ko llowan’?

◻ Mang fan ni susun ni ngad sapgad ku Jehovah ni nge pi’ e llowan’ ngodad?

[Sasing ko page 21]

Llowan’ e ma ayuwegdad ngad gagiyegnaged gelngidad

[Sasing ko page 23]

Solomon ni Pilung nib llowan’ e ke nang u wan’ ni tin ni yugu dariy rogon ko par e dabi yibnag e falfalan’