Yaram Nib Theocratic U Nap’an E Ngiyal’ Ko Kristiano

“I rin’ riy e thin ni ke finey . . . ni aram e nge kunuy urngin e tin ni sunumeg ban’en nga taabang, ni urngin ban’en ni bay u tharmiy ngu but’, me par Kristus ni ir e llug riy.​—EFESUS 1:9, 10.

1, 2. (a) Uw rogon ni kan tabab i kunuy “urngin ban’en ni bay u tharmiy” ni ka nap’an e duw ni 33 C.E.? (b) Uw rogon ni dag e pi Kristiano ni kan dugliyrad ni yad bod Moses nge Elijah u nap’an e duw ni 1914?

NAP’AN e duw ni 33 C.E. ma kan tabab i kunuy “urngin ban’en ni bay u tharmiy” ya kan sunumeg “fare Israel rok Got.” (Galatia 6:16; Isaiah 43:10; 1 Peter 2:9, 10) Tomren e bin som’on e chibog C.E., ma daki kunuy e girdi’ ni boor ya ke yoor e pi apostate ni aram e “pan” ni ke wereg Satan u fithik’ e tin riyul’ e Kristiano (ni ke pining Jesus “wheat” ngorad). Machane nap’an ni ke chugur iyan ko “ngiyal’ ni tin tomren e rran,” ma ke gagiyel fa bin riyul’ e Israel rok Got ma nap’an e 1919 ma kan dugliyrad ni nge mil fan ngorad urngin e tirok Jesus ban’en.a​—Matthew 13:24-30, 36-43; 24:45-47; Daniel 12:4.

² Nap’an e bin som’on e mahl ko fayleng ma pi Kristiano ni kan duguliyrad e ur ngongliyed boch ban’en nib maluplup ni bod ni rin’ Moses nge Elijah.b (Revelation 11:5, 6) Ka nap’an e 1919 ma ur machibnaged fare thin nib fel’ u lan e fayleng nib kireb, ma kar rin’ed ni bod Elijah ni de rus. (Matthew 24:9-14) Ma ka nap’an e 1922 ma ur weliyed e thin ni morngaagen e pufthin ni ra tay Jehovah u daken e girdi’, ni bod rogon ni weliy Moses u morngaagen e gafgow ni pi’ Got ngak yu Egypt kakrom. (Revelation 15:1; 16:2-17) Ngiyal’ ney ma tin ni ka bay e Kristiano ni kan duguliyrad e yad owchen e ulung ni bin nib biech e fayleng ko Pi Mich Rok Jehovah.

Fare Governing Body ni be Maruwel

3. Mang boch ban’en ni be dag nrib yaram e ulung ko Kristiano nkakrom?

³ U tabolngin ma i par e pi gachalpen Jesus ni kan dugliyrad ni yad ba yaram. Rogon ni ke yoor iyan oren e pi gachalpen, ma kan duguliy e pi ulung nge piin piilal riy. (Titus 1:5) Ma tomren e 33 C.E., e kan tay fa 12 e apostal ni yad e governing body ni baga’ lungurad. Ma kar mon’ognaged e machib ni dar rusgad. (Acts 4:33, 35, 37; 5:18, 29) Ma kar yarmiyed rogon ni ngan wereg e ggan ko piin nib gafgow, mar l’oged Peter nge John nga Samaria ya ka nog ni bay e girdi’ ni ba adag e machib u rom. (Acts 6:1-6; 8:6-8, 14-17) Ke fek Barnabas Paul iyib ngorad ni ngan micheg ni ke mang reb e gachalpen Jesus ma gathi ta togopuluw. (Acts 9:27; Galatia 1:18, 19) Ma tomren ni i machibnag Peter Kornelius nge tabinaw rok, me sul nga Jerusalem me weliy ngak e pi apostal nge boch e walag nu Judea ko uw rogon ni tamilangnag e kan ni thothup e n’en nib m’agan’ Got ngay ngorad.​—Acts 11:1-18.

4. Uw rogon ni kan guy rogon ni ngan thang e fan rok Peter, machane uw rogon ni kan ayuweg?

⁴ Ma aram min gafgownag fare governing body nib elmirin. Kan nin’ Peter nga kalbus, ma reb e engel e ayuweg e yafas rok. (Acts 12:3-11) Ereray e yay nsom’on ni ke m’ug riy ni be’ ni gathi ir bagayad fa 12 i apostal e immoy ni baga’ lungun u Jerusalem. Ya nap’an ni kan pag Peter u kalbus me yog ko girdi’ ni bay u tafen chitingin John Mark ni gaar: “Mu weliyed e pi thin ney ngak James [ni walagen Jesus] nge tin ni ka bay i walagdad.”​—Acts 12:17.

5. Uw rogon ni ke thil e yaram ko fare governing body u tomren ni kan li’ James kem’?

⁵ Faram ma nap’an ni li’ Judas Iskariot ir ni ir fare apostal ni ke egnag Jesus, ma kan nog ni ba t’uf ni “nge yin’ be’ luwan nge maruwel” ko apostal ni be’ ni un ngak Jesus ko machib ma ke guy e yam’ ni tay nge ngiyal’ ni kan faseg ko yam’. Machane nap’an ni kan li’ James, ni walagen John, kem’ ma dan dugliy be’ nge yan nga lon ni ir reb fa 12 i apostal. (Acts 1:20-26; 12:1, 2) Danga’ ya yay ni migid ni weliy e Bible u morngaagen fare governing body ma be dag ni kan ga’nag. Ya nap’an ni kan luag u morgnaagen piyu Gentile ko susun ni ngar folgad ko Motochiyel ku Moses fa danga’ ma aram min turguy ni nga “ranod nga Jerusalem ngar guyed e pi apostal nge piin ni piilal u morngaagen e re bugithin ney.” (Acts 15:2, 6, 20, 22, 23; 16:4) Mang fan ni kan uneg e “piin piilal” ko fare governing body? De yog e Bible ko mang fan, machane bay ba tamilang ni ba’ angin riy. Ya faani yim’ James ma kun kalbusnag Peter e be dag ni sana ran kalbusnag e pi apostal ara ngan li’rad ngar m’ad. Ma faan mang ra buch ni aram rogon, ma ba t’uf e piin piilal ni manang e maruwel ko governing body ni aram e rayog ni ngii par fare ulung nib yaram.

6. Uw rogon ni ka be maruwel fare governing body u Jerusalem, ni yugu aram rogon ni daki par e tin som’on e girdi’ ko re ulung nem ko re mach nem?

⁶ Nap’an ni yib Paul nga Jerusalem ko duw ni 56 C.E., me weliy boch e thin ngak James ma be gaar e Bible ni, “urngin e piin ni piilal ko galesiya ni yad ba’.” (Acts 21:18) Mang fan ndan nog ni immoy e pi apostal ko re muulung nem? Der yog e Bible. Machane Eusebius ni be’ ni ma yoloy e chep e weliy ko ngiyal’ u m’on ko 66 C.E., ma “tin ni ka bay e apostal, e be par u fithik’ e riya’ ya goo yibe makathnag ni ngan li’rad ngar m’ad, me ere kar chuwgad u Judea. Machane kar milekaggad nga gubin e binaw ni ba’ gelngin Kristus rorad.” (Eusebius, Book III, V, v. 2) Rriyul’, n’en ni yog Eusebius’ e gathi ke thagthagnag Got nga laniyan’, machane ba puluw ko thin ko Bible. Susun, nap’an e 62 C.E., ma immoy Peter u Babylon​—nib palog nga orel u Jerusalem. (1 Peter 5:13) Machane nap’an e 56 C.E. nge mada’ ko 66 C.E., ma bay e governing body u Jerusalem ni yad be maruwel.

Yaram ko Ngiyal’ Ney

7. Uw rogon nib thil e Governing Body ko ngiyal’ ney ko fare governing body u nap’an e bin som’on e chibog?

⁷ Nap’an e 33 C.E. nge mada’ ko ngiyal’ ni yib fare gafgow nga Jerusalem, ma yigoo pi Kristiano ni Jew e yad fare governing body. Nap’an ni yan Paul ngaram ko duw ni 56 C.E., me guy ni boor e Kristiano ni Jew u Jerusalem, e yugu aram rogon ni yad be “ngongol ni nguur tiyed nrogon e ngongol rok e piin ni ke michan’rad ngak e Somol rodad i Jesus Kristus,” machane ka yad be “tiyan’rad ko fare Motochiyel [rok Moses].”c (James 2:1; Acts 21:20-25) Pi Jew nem e mo’maw ni ngar lemnaged ni ra un be’ ni Gentile ko fare governing body. Machane ke thil e girdi’ ni yad bang ko governing body ko ngiyal’ ney. Ya ngiyal’ ney ma re ulung nem e yigoo girdi’ ni Kristiano ni Gentile ni kan duguliyrad, ma kari taw’athnag Jehovah e maruwel ni yad be tay.​—Efesus 2:11-15.

8, 9. Mang boch ban’en ni ke thil ko yaram ko fare Governing Body ko ngiyal’ ney?

⁸ Nap’an ni sum fare Watch Tower Bible and Tract Society of Pennsylvania ko duw ni 1884 nge mada’ ko 1972, ma rib baga’ lungun fa en ni president ko fare Society u lan e ulung rok Jehovah, ya fare Governing Body e chuchugur ni taareb rogon ko fare board of directors ko fare Society. Ke micheg Jehovah ni ke felan’ ko re yaram nem ya ke flaabnagrad. U thilin e duw ni 1972 nge 1975, ma ke yoor e girdi’ ko fare Governing Body ya yad 18 u gubin. Ma kan fol ko yaram u nap’an e bin som’on e chibog ya urngin e girdi’ ko re ulung nem e kan pi’ mat’awrad ni ngar rogned e thin, ma boch i yad e ku yad e pi director ko fare Watch Tower Bible and Tract Society of Pennsylvania.

⁹ Ka nap’an e 1975 ma boch i yad ko re 18 e girdi’ ney e kar mu’naged e yafas rorad u fayleng. Kar gelgad ko fayleng ma aram mar ranod ‘ngar pared nga but’ u tooben Jesus u tagil’.’ (Revelation 3:21) Aram fan ni ke ragag e girdi’ ko fare Governing Body e chiney nib muun ngay reb e girdi’ ni kan dugliy ko duw ni 1994. Baga’ ni goo kar pillibthirgad. Machane yibe ayuweg e pi walag ney ni kan dugliyrad ko tin nib mil fan ngorad. U uw e yib e binem e ayuw riy? Yira nang e fulweg ko re deer nem nfaanra ngan yaliy rogon e mon’og ni tay e girdi’ rok Got ko ngiyal’ ney.

Kan Tay Tanggin fare Israel Rok Got

10. Chon mini’ e kar uned ngak e piin ni kan dugliyrad ko pigpig ku Jehovah ko ngiyal’ ney, ma mang e kan weliy morngaagen ko thin ko profet?

¹⁰ Nap’an e 1884 ma ke chugur ni urngin e piin ni ma un ko fare Israel rok Got e yad e Kristiano ni kan dugliyrad ko kan ni thothup. Machane munmun me m’ug yugu reb e ulung ma nap’an e 1935 min tamilangnag ni yad fare “ulung ni baga’” ni be weliy Revelation guruy ni 7 morngaagen. Yad be athapeg e par u fayleng me ere yad fa “tin nu fayleng ban’en” ni ke m’agan Jehovah ngay ni nge kunuy nga taabang u daken Kristus. (Efesus 1:10) Yad fare “ulung ni baga’” ni bay ko fanathin rok Jesus u morngaagen e yu ran’ i saf. (John 10:16) Ka nap’an e 1935, ke yoor e yugu boch e saf ko ulung rok Jehovah. Yad be yib ni “bod e manileng, ni bod e bulogol ni yad be sul nga tabinaw rorad.” (Isaiah 60:8) Ke yoor e girdi’ ko fare ulung ni baga’ ma ke buch uw e girdi’ ni kan dugliyrad ya boor iyad e kar mu’naged e yafas rorad u fayleng, me ere ke ga’ e maruwel ni ma rin’ girdien yugu boch e saf u lan e ulung ko Kristiano.

11. Ku mang boch ban’en ni kan pi’ ngak e girdi’ ni yad yugu boch e saf ma faram ma yigoo pi Kristiano ni kan dugliyrad e mmil fan ngorad?

¹¹ Ban’en nib baga’ fan nib mil fan ngak fare “nam nib thothup” rok Got e ngan wereg e thin u morngaagen felngin Jehovah. Weliy Paul ni aram bod e maligach ni yima pi’ u tempel, ma ke tay Jesus chilen ko piin ni ra mang e “pi prist rok e en ni pilung,” ni ngar machibnaged e girdi’ min fil ban’en ngorad. (Exodus 19:5, 6; 1 Peter 2:4, 9; Matthew 24:14; 28:19, 20; Hebrews 13:15, 16) Machane fare babyor ni Wulyang Nt’agil’ E Damit ko August 1, 1932, e ke yog ko piin ni be yip’ fan Jonadab ni ngar uned ko re maruwel ney. Ma boor e girdi’ ko yugu boch e saf e goo yad be rin’ ko ngiyal’ nem. Ngiyal’ ney ma ke chugur ni urngin e maruwel ko machib e girdien yugu boch e saf e yad be rin’ ya aram rogon ni yad ma “pigpig ngak [Got] ni rran nge nep’ u lan e tempel rok.” (Revelation 7:15) Ku aram rogon tabolngin e ngiyal’ ney ko girdi’ rok Jehovah ma piin piilal ko ulung e yad e Kristiano ni kan duguliyrad ni yad e pi “t’uf” ni bay u ba’ ni mat’aw i pa’ Jesus Kristus. (Revelation 1:16, 20) Ma kan weliy u lan e Wulyang Ntagil’ E Damit ko May 1, 1937, ni ku rayog ni nge mang girdien yugu boch e saf e pi tapigpig ko ulung (presiding overseer). Ma mus ni bay e pi pumoon ni kan duguliyrad, machane ku rayog ni nge un girdien yugu boch e saf ko re maruwel nem nfaanra dabiyog rok e piin ni kan dugliyrad ko kan ni thothup ni ngar rin’ed. Ngiyal’ ney ma ke chugur ni urngin e piin piilal ko ulung e yad girdien yugu boch e saf.

12. Mang thin ko Bible ni ma micheg ni ba puluw ni ngan pi’ e maruwel ko ulung nib baga’ fan ngak e girdi’ ni yad yugu boch e saf?

¹² De puluw ni ngan pi’ e maruwel nib baga’ fan ngak girdien yugu boch e saf fa? Danga’, ya aram rogon ni un rin’ faram. U Israel kakrom ma boch e girdi’ nu bang (ni yad e ngabchey ni kar pared u rom) e kar uned ko boch e liw nib tolang. (2 Samuel 23:37, 39; Jeremiah 38:7-9) Ma tomren ni kan fek yu Israel nga Babylon ni yad e kalbus, ma kan duguliy boch e girdi’ ni Nethinim (piin ni gathi yad yu Israel ni yad e tapigpig u tempel) ni ngar uned nga boch e maruwel ni goo piyu Levi e ma un ngay faram. (Ezra 8:15-20; Nehemiah 7:60) Maku Moses, ni ir fa en ni kan guy yaan u tooben Jesus u nap’an ni i pig ramaen, e ke fol ko n’en ni yog Jethro ni be’ nu Midian. Ma boch nga tomren e i ning ku Hobab ni fak Jethro ni nge pow’iyrad nga daken e ted iyan.​—Exodus 18:5, 17-24; Numbers 10:29.

13. Pi girdi’ ni kan dugliyrad e be fol rok mini’ ya yad ba sobut’an’ mi yad pi’ boch ban’en nge mil fan ngak e girdi’ ni yad yugu boch e saf?

¹³ Ngiyal’ ntungun fa 40 e duw ni ur pared u ted, me yibilay Moses ku Jehovah ni nge pi’ be’ nga luwan, ya i nang ni dabi un nga lan fare Binaw ni Kan Micheg ngorad. (Numbers 27:15-17) Yog Jehovah ngak ni nge duguliy Joshua u p’eowchen urngin e girdi’, me yodor Moses, ni yugu aram rogon ni kab fel’ fithik’ i dow ma dawori tal ko maruwel ni fan ko yu Israel. (Deuteronomy 3:28; 34:5-7, 9) Ere ku arrogon e piin ni kan dugliyrad ko kan ni thothup e yad ba sobut’an’ mi yad pi’ boch e maruwel nib baga’ fan ngak e piin ni yad yugu boch e saf.

14. Mang boch e thin ko profet ni ma tamilangnag ni ra yoor iyan e maruwel ni ran pi’ ngak e girdi’ ni yad yugu boch e saf u lan e ulung?

¹⁴ Bay e thin ko profet morngaagen rogon ni ra ga’ iyan e maruwel nra rin’ e girdi’ ni yad yugu boch e saf. I yiiynag Zekariah ni piyu Filistia ni gathi yad yu Israel e ra “bod e sheik nu Judah.” (Zekariah 9:6, 7) Pi sheik e yad e pilung ko ganong, me ere be weliy Zekariah ni en ni ir e toogor rok yu Israel faram e ra un ko bin riyul’ e liyor ma ra bod e pilung ko reb e ganong u lan e re Binaw nem ni kan Micheg. Maku, nap’an ni weliy Got ban’en ngak fare Israel rok Got me gaar: “Girdien yugu boch e nam e bay ur pigpiggad ngom. Ma girdi’ nu bang e bay ur gafaliyed yu ran’ i saf rom, mu ur wolduguyed e but’ rom ma yad be ayuweg e yungi woldug rom ni grapes. Ma bay nnangmed ni gimed e pi prist rok Jehovah, mi gimed e pi tapigpig rok e Got rodad.” (Isaiah 61:5, 6; NW) Fapi “girdien yugu boch e nam” nge “girdi’ nu bang” e ma sor fan ko girdien yugu boch e saf. Ma kan pi’ boch e maruwel nib mil fan ngorad ni be yoor iyan ya be pillibthir iyan e tin ni ka bay girdien fachi ulung ma dabki n’uw nap’an me mus e yafas rorad u fayleng mi yad yan nga tharmiy mar pigpiggad ni yad e “pi prist rok Jehovah,” mu ur pared u tooben e chiya rok Jehovah ni yad e “pi tapigpig rok e Got rodad.”​—1 Korinth 15:50-57; Revelation 4:4, 9-11; 5:9, 10.

“Fare Mfen . . . ni Bayi Yib”

15. Ngiyal’ ney ko tomur ma bin ngan e ulung ko Kristiano e kar “pillibthirgad” ma bin ngan e be yip’ fan “fare mfen . . . ni bay yib”?

¹⁵ Ke felan’ e tin ni ka bay girdien fachi ulung ni ngar skulnaged girdien yugu boch e saf ko boch e maruwel ni baga’ fan. Psalm 71:18 e be gaar: “O Got, dab kum pageg nge mus ko ngiyal’ ni kug pillibthir me manna’ piyan lolugeg, nge yan i mada’ ko ngiyal’ ni kug mu’ i weliy morngaagen paam ngak e bin migid e mfen, ni yad e piin ni bay yib, mu gu weliy ngorad u morngaagem nge rogon fene gel gelngim.” Kan weliy fan e re verse ney u lan fare babyor ni Wulyang Ntagil’ E Damit ko December 15, 1948, me tamilangnag ni ke pillibthir girdien e ulung ko Kristiano ni kan dugliyrad. Miki yog ni kar falfalan’gad ya yad be “sap nga m’on ko thin ko profet u lan e Bible ni be weliy morngaagen ba mfen nib biech ni bay yib.” Pi thin nem e be sor fan ku mini’? Be weliy fare Wulyang Ntagil’ E Damit ni gaar: “Weliy Jesus morngaagrad ni yad ‘yugu boch e saf rok.’” ‘Fare mfen ni bay yib’ e ma sor fan ko piin ni ra par u tan e bin nib biech e yaram ko fayleng ni be gagiyegnagrad fare Gil’ilungun u tharmiy.

16. Mang boch e flaab ni be athapeg e piin ni yad ‘fare mfen ni bay yib’?

¹⁶ Der weliy e Bible ko ngiyal’ nra chuw urngin e Kristiano ni kan dugliyrad rok e pi walagrad ko re ‘mfen ney ni bay yib’ mi yad un ngak Jesus Kristus ko rir rok. Machane pi girdi’ ney ni kan dugliyrad e ke mich u wan’rad ni ke chugur iyib e ngiyal’ ni bay ra chuwgad. Ya ka nap’an e duw ni 1914 ma be lebug e thin ni yiiynag Jesus morngaagen e “ngiyal’ ko tomur,” ma aram e be dag ni ke chugur ko ngiyal’ nran thang e re fayleng ney. (Daniel 12:4; Matthew 24:3-14; Mark 13:4-20; Luke 21:7-24) Dabki n’uw nap’an ma ra yibnag Jehovah e fayleng nib biech ma ‘fare mfen ni bay yib’ e yira ‘pi’ ngorad e gin nsuwon gil’ilungun Got [u fayleng] ni kan ngongliy rogon kan tay ni fan ngorad ni ka nap’an e ngiyal’ nsunumiy e fayleng riy.’ (Matthew 25:34) Yad ba falfalan’ ya yad be athapeg e ngiyal’ nra Paradis e fayleng ma ran faseg bokum milyon e girdi’ u Hades. (Revelation 20:13) Ma ra moy e piin ni kan dugliyrad u rom mar pininged e magar ku piin ni kan fasegrad ko yam’ fa? Nap’an e duw ni 1925, ma ke weliy fare babyor ni Wulyang Ntagil’ E Damit ko May 1 ni gaar: “Susun ndabda turguyed e n’en nra rin’ Got fa n’en ndabi rin’. . . . [Machane] ba tamilang ni girdien fare Galesiya [pi Kristiano ni kan dugliyrad] e yira rirnagrad u m’on ni ran faseg e piin nib yul’yul’ ni kar m’ad nkakrom [pi mich rok Jehovah ko ngiyal’ u m’on ko Kristiano].” Ku aram rogon ni tamilangnag fare Wulyang Ntagil’ E Damit ko September 1, 1989, faani weliy morngaagen ko ra moy e piin ni kan dugliyrad ko ngiyal’ nran faseg e girdi’ ko yam’ me gaar: “Aram ban’en ni de t’uf.”d

17. Mang taw’ath ni ra un e girdi’ ni kan dugliyrad ngay ni yad Jesus Kristus ni Pilung?

¹⁷ Rriyul’ ni ri dada nanged ko mang e ra buch ko pi Kristiano ni kan dugliyrad ni ra bagayad. Machane bochan ni immoy Moses nge Elijah rok Jesus faani thil yaan ma aram e be tamilangnag ni pi Kristiano ni kan dugliyrad mar fasgad ko yam’ e bay ra moyed Jesus u nap’an ni ra yib nib rir ni nge “pi’ puluwon urngin e girdi’ nra be’ ma rogon puluwon ko tin ni rin’” u nap’an e ngiyal’ ko pufthin. Maku gad manang ni ke micheg Jesus ni pi Kristiano ni kan dugliyrad ni yad ra ‘gel’ e bay ra uned ngak ma ‘ba ley i wasey e bayi gagiyegnag urngin e pi nam ngay’ u nap’an Armageddon. Nap’an nra yib Jesus nib rir ma yad ra par rok u tagil’ mi yad “gagiyegnaged fa ragag nge l’agruw i ganong nu Israel.” Ma yad Jesus e bay ra ‘pirdiiyed Satan u tan e rifrif u ayrad.’​—Matthew 16:27–​17:9; 19:28; Revelation 2:26, 27; 16:14, 16; Roma 16:20; Genesis 3:15; Psalm 2:9; 2 Thessalonika 1:9, 10.

18. (a) Ra uw rogon min ‘kunuy urngin ban’en ni bay u tharmiy me par Kristus ni ir e llug riy’? (b) Mang e rayog ni nga dogned morngaagen rogon ni ran ‘kunuy urngin ban’en u but’ me par Kristus ni ir e llug riy’?

¹⁸ Rogon ni ke yarmiy Jehovah ma be mon’og iyan ni be “kunuy urngin e tin ni sunumiy ban’en nga taabang me par Kristus ni ir e llug riy.” Ma ke chugur ni nge m’ay i lebug e tin nib m’agan’ ngay ni fan ko “urngin ban’en ni bay u tharmiy.” Ke chugur ko ngiyal’ nra un urngin e 144,000 e girdi’ ku Jesus nga tharmiy ni fan ko “mabgol rok fare Fak e Saf.” Ere ke yoor e maruwel ni yibe pi’ ngak e pi walag nib ilal ni yad yugu boch e saf ni yad be yip’ fan “urngin ban’en ni bay u fayleng,” ya yad be ayuweg pi walagrad ni kan dugliyrad. Rib manigil e ngiyal’ ni gad be par riy! Ma rib manigil ni ngan guy e tin nib m’agan’ Jehovah ngay ni be lebug! (Efesus 1:9, 10; 3:10-12; Revelation 14:1; 19:7, 9) Ma kari falfalan’ e piin ni yad yugu boch e saf ni ngar ayuweged e pi walagrad ni kan dugliyrad mi yad pigpig u taabang ni kar manged “taab ran’ i saf” ma “taabe’ e be gafaliyrad” mi yad par u tan pa’ fare Pilung ni Jesus Kristus, ma yad pining e sorok ngak fa En Th’abi Ga’ u Palpal Th’ib ni Jehovah Got!​—John 10:16; Filippi 2:9-11.

[Boch e Thin nra Tamilangnag Murung’agen]

Rayog ni Ngam Weliy?

◻ Uw rogon ni ke mon’og e ulung rok Got u nap’an e bin som’on e chibog?

◻ Uw rogon ni ke mon’og iyan fare Governing Body ko Pi Mich Rok Jehovah ko ngiyal’ ney?

◻ Mang boch e thin ko Bible ni ma micheg ni bpuluw ni ngan pi’ e maruwel nib baga’ fan ngak e girdi’ ni yad yugu boch e saf u lan e ulung rok Jehovah?

◻ Uw rogon ma kan “kunuy urngin ban’en ni bay u tharmiy” nge “urngin ban’en ni bay u but’” u taabang me par Kristus ni ir e llug riy?

[Sasing ko page 16]

Mus ni de moy e tin som’on e girdi’ ko governing body u Jerusalem, machane ke maruwel e governing body u rom

[Sasing ko page 18]

Pi Kristiano ni kan dugliyrad e yad e taw’ath ko girdi’ rok Jehovah

C. T. Russell 1884-1916

J. F. Rutherford 1916-42

N. H. Knorr 1942-77

F. W. Franz 1977-92

M. G. Henschel 1992-