Jehovah​—Ba Got Ni Ma Dag E Pi N’en Nib Mith

“Bay ba Got u tharmiy ni ma dag e pi n’en nib mith.”​—DANIEL 2:28.

1, 2. (a) Uw rogon nib thil Jehovah ko Toogor rok nth’abi ga’? (b) Uw rogon nib taareb rogon e girdi’ ko re n’ey?

JEHOVAH, ir e Got ko palpal th’ib nth’abi ga’ ma ma t’ufegey, ma ir e An Ta sunumiy urngin ban’en, ma ir e Got nib gonop ma mmat’aw. De t’uf ni nge mithag ir fa nge mithag e tin ni ngongliy fa nge mithag e tin m’agan’ ngay ni nge rin’. Ya ngiyal’ ni ke turguy ma ma dag ir. Aram rogon nib thil ko Toogor rok ni Satan ni Moonyan’, ya ma mithag ko ir mini’ nge tin nib m’agan’ ngay.

² Mmath keru’ Jehovah ku Satan, maku arrogon e piin ni ma liyor ngorow. Piin ni ma lek Satan e yad ba sasalap ma yad ma dake modingnagrad. Yad ma guy rogon ni ra m’ug ni yad ba gol, machane yad ma ngongliy e pi n’en nib l’ag ko lumor. Kan nog ko pi Kristiano nu Korinth ni dabra gingad ko re n’ey. “Pi girdi’ nir e gathi riyul’ ni yad bogi apostal, yad e apostal ni goo bogi ban’en, ni yad be lifith l’ugunrad u morngaagen e maruwel ni yad be tay ma kar piliyeged yad kar boded yaan e tin riyul’ e apostal rok Kristus. Ere dab ni gin ngay, ya ku rayog rok moonyan’ ni nge piliyeg ir nge bod yaan ba engel ko tamilang.” (2 Korinth 11:13, 14) Machane piin Kristiano e yad ma sap ngak Kristus ni ir e Ani Ga’ rorad. Nap’an ni immoy u fayleng me fol rok e Chitamangin i Jehovah Got. (Hebrews 1:1-3) Ere ra fol e pi Kristiano rok Kristus ma aram e yad be folwok rok Jehovah ni ir fare Got ko tin riyul’ ban’en, nge tin nib gagiyel, nge tin nib tamilang ban’en. De t’uf ni ngar mithaged ko yad mini’ ara ngar mithaged e tin ni yad be ngongliy ara tin nib m’agan’rad ngay.​—Efesus 4:17-19; 5:1, 2.

3. Mang e ngan weliy ko girdi’ ni ma yog ni piin ni ma un ko Pi Mich Rok Jehovah e kan towarsariyrad ngar uned ngay ma aram ba “sect nib mith”?

³ Ngiyal’ nib m’ag ma ma tamilangnag Jehovah boch ban’en u morngaagen e tin nib m’agan’ ngay nge morngaagen e gabul nge langleth ni dawori nang e girdi’. Aram rogon ni ir ba Got ni ma dag e pi n’en nib mith. Ere yibe pining e girdi’ ni ba adag ni ngar pigpiggad ngak​—yibe wenig ngorad—ni ngar filed e pi n’en nem ni ke tamilangnag nib mith. Nap’an e duw ni 1994 ma kan fith boch ban’en ngak 145,000 e Pi Mich u reb e nam u Europe ma kan pirieg ni ra bagayad ma i fl’eg i yaliy e machib ko Pi Mich Rok Jehovah u lan sogonapan dalip e duw fin ra turguyed ni ngar uned ko Pi Mich. Ere yad rorad e kar turguyed e re n’em ma dan towasariyrad. Ma ka yad be turguy e n’en ni ngar rin’ed. Susun, boch i yad e ur lemnaged ni kayigi elmirin e motochiyel ko Kristiano me ere kar turguyed ni dabkura uned ko Pi Mich. Machane nap’an fa lal e duw ni ke yan ma boor e pi girdi’ ney ni yad e Pi Mich faram e ur yaluweged yad ni ngar sulod ko ulung ma kar manged e Pi Mich biyay.

4. Mang e dabi maga’fan’ e pi Krstiano ngay, ma mang fan?

⁴ Machane gathi urngin e piin ni yad e Pi Mich faram e yad ma sul ko ulung, ma boch i yad e ba tolang e liw rorad u lan e ulung ko Kristiano. Machane dabni gin ngay ya mus ko piin nib fel’ thilrad Jesus ni yad pi gachalpen ni bod Judas ni apostal, e ke pi’ keru’ ngak. (Matthew 26:14-16, 20-25) Ma aram tapgin ni ngi i maruwaran’uy ko Kristiano fa? Ma bochan e re n’em ma dariy fan angin ni be yib ko maruwel ni be tay e Pi Mich Rok Jehovah fa? Danga’, ya bod rogon Judas Iskariot ni ke egnag Jesus machane aram e dan taleg e tin nib m’agan’ Got ngay.

Ba Gel Gelngin Machane Ba Gol

5. Uw rogon ni gad manang ni ma t’ufeg Jehovah nge Jesus e girdi’, ma uw rogon ni kar dagew e t’ufeg?

⁵ Jehovah e ir ba Got ni ma t’ufegey. Ma runguy e girdi’. (1 John 4:7-11) Yugu aram rogon fene tolang e liw rok, machane ba felan’ ngay ni nge m’ag fager ko girdi’. Be weliy u morngaagen reb e tapigpig rok nkakrom ni gaar: “‘I Abraham e i par nib mich Got u wan’ ma bochan e michan’ rok ngak Got me matheeg Got ngak ni ke mang be’ nib mat’aw,’ me pining Jehovah Abraham ni gaar ‘Abraham ni fager rog.’” (James 2:23, NW; 2 Kronicles 20:7; Isaiah 41:8) Bod rogon e girdi’ ni yad fager ma yad ma weliy boch ban’en ngorad ni tin nib mith, maku arrogon ni ma rin’ Jehovah ko pi fager rok. Me fol Jesus rok e Chitamangin ko re n’ey ya ke m’ag fager ko pi gachalpen me weliy boch ban’en ngorad. I gaar ngorad: “Aram e dab ku gog ni gimed e tapigpig rog, ya be’ nib tapigpig e de nang e n’en ni be ngongliy e en ni masta rok. Machane nggog ni gimed e tafager rog, ni bochan e kug weliy ngomed urngin e tin ni kug rung’ag rok e Chitamag.” (John 15:15) Tin ndan nnang ara “tin nib mith,” ni bay u thilin Jehovah, nge Fak nge pi tafager rorow e ma chugumiyrad nga taabang u fithik’ e t’ufeg nge yul’yul’.​—Kolose 3:14.

6. Mang fan nde t’uf ni nge mithag Jehovah e tin nib m’agan’ ngay?

⁶ Fan fare ngochol rok Jehovah e “Ma N’igin ni Nge Buch,” ma re n’em e ma tamilangnag ni rayog rok ni nge mang e n’en nib t’uf ni nge rin’ e tin m’agan’ ngay. Jehovah e gathi bod e girdi’ ya de t’uf ni nge mithag e tin m’agan’ ngay ni bochan ni be rusnag ni ra dibchey e girdi’ u kanawo’ rok ndabiyog ni nge lebuguy. Ri dabiyog ni nge war ere ma tamilangnag e tin ke m’agan’ ngay u lan e Thin Rok ni Bible. Ke micheg ni gaar: “Thin ni ma yib u l’ugunag . . . ndabiyog ni nge dabi rin’ e tin ni ke m’ay i lemnag rog; ya ra rin’ urngin ban’en ni kug l’og ni nge rin’.”​—Isaiah 55:11.

7. (a) Mang e ke yiiynag Jehovah u Eden, ma uw rogon ni ke micheg Satan nib riyul’ e thin rok Got? (b) Uw rogon ni ba riyul’ e thin ko 2 Korinth 13:8 u gubin ngiyal’?

⁷ Boch nga tomren fare togopuluw u Eden ma ke dag Jehovah e n’en nra buch u tomren e magawon u thilrow Satan ni Toogor Rok. Ran bechnag fa an Owchen Got nib gel e amith riy machane dabi yim’, ma yira bechnag Satan ma tomur riy ma ra yim’. (Genesis 3:15) Nap’an e 33 C.E., me bechnag fare Moonyan’ Kristus Jesus ni ir fare Owchen ya ke n’igin ni ngan li’ ngem’. Aram rogon ma ke lebuguy Satan e thin ko Bible miki micheg ni Jehovah e ir ba Got ko thin riyul’, ni yugu aram rogon ni de m’agan’ Satan ngay. Machane bochan ni ke fanenikay e thin riyul’ nge tin mmat’aw ban’en, ma ir be’ nib tolangan’ ma de kalngan’, ma aram fan ni ke rin’ e pi n’en ni i yiiynag Got nra rin’. Arrogon ya bay e thin nib puluw ko piin ni ma togopuluw ko tin riyul’ ni mus ngak Satan ni be gaar: “Ya dariy ban’en nrayog ni gu rin’ed nib togopuluw ko thin rok Got ni aram e tin riyul’, ya ke mus ni ban’en ni nge yib fan ngay.”​—2 Korinth 13:8.

8, 9. (a) Mang e manag Satan, machane bochan ni manang ma aram e dabiyog ni nge lebug e tin nib m’agan’ Jehovah ngay fa? (b) Piin ni ma togopuluw ku Jehovah e kan ginangrad ko mang ma mang fan ni yad ma dariy fannag?

⁸ Ka nap’an e ngiyal’ ni kan dugliy Gil’ilungun Got ko duw ni 1914, ma ke puluw e thin ko Revelation 12:12 ni be gaar: “Ere mu falfalan’gad e pi tharmiy, ni gimed urngin e piin ni gimed be par u wur! Machane ri bayi gafgow e fayleng nge day! Ya ke yib fare Moonyan’ ngomed ni kari damumuw, ya manang ndaki n’uw nap’an ni nge par.” Me ere ke thiliyeg Satan e kanawo’ rok ya manang ni daki n’uw nap’an ni ra par fa? Faan manga er rogon ma aram e be yog Satan nib sorok Jehovah ni ir ba Got ko tin riyul’ ma ir e An Th’abi Ga’ me ere bay mat’awun ni ngan liyor ngak ni kari mus ni goo ir. Machane dabun fare Moonyan’ ni nge yog ni ke war, ni mus nfaanra manang e tin riyul’.

⁹ Ma tamilangnag Jehovah e n’en nra buch u nap’an nra yib Kristus ni nge pufthinnag e fayleng rok Satan. (Matthew 24:29-31; 25:31-46) Thin rok e ma weliy u morngaagen e pi tayugang ko fayleng ni gaar: “Ngiyal’ nem e ra gaar e girdi’ e ke gapas ndariy ban’en nra buch, ma yad ra da’da’ ni ke taw e riya’ ngorad!’ ma dabiyog ni ngar milgad riy​—ya bod e amith ni ma yib ngak be’ ni ppin ni be n’en ni nge gargel.” (1 Thessalonika 5:3) Piin ni ma lek Satan e ma dariy fannag e pi thin nem. Kan tay lanin’rad u fithik’ e lumor ya ke kireb gumercha’rad, ma aram e dabiyog ni ngar kalgadngan’rad ko kanawo’ rorad nib kireb ma dabiyog ni ngar thiliyeged e tin ni kar fineyed ni ngar kirebnaged e tin nib m’agan’ Jehovah ngay.

10. (a) Uw fene polo’ ni ke lebug e thin ko 1 Thessalonika 5:3 machane susun uw rogon u wan’ e girdi’ rok Jehovah? (b) Mang fan ni ra gel e togopuluw ni ma tay e girdi’ ngak girdien Got?

¹⁰ Nap’an e 1986 ma ke dugliy fare United Nations e re duw nem ni Duw ko Gapas u Gubin e Nam, ka aram ma goo be weliy e fayleng morngaagen e gapas nge pagan’uy. Bay boch ban’en ni kan rin’ ni nge yognag e gapas u fayleng, ma ke yib angin riy ni buch uw. Aram e ke lebug e re thin ko profet nem fa ka bay ban’en ni yira yog nib lingagil? Ra tamilangnag Jehovah e re n’em ko ngiyal’ ni ba adag. Ma nguuda pared nib od ko tirok Got ban’en, “ma gad sonnag e chirofen nem, ni ir e Rran rok Jehovah.” (2 Peter 3:12, New World Translation) Ka yibe weliy morngaagen e gapas nge pagan’uy, ma piin ni manang e re thin ney machane dariy fan u wan’rad e ra gel e togopuluw ni yad ra tay mi yad lemnag ni dabi lebuguy Jehovah e thin rok, ara dabiyog rok. (Mu taarebnag ko Eklesiastes 8:11-13; 2 Peter 3:3, 4.) Machane manang e tin riyul’ e Kristiano ni ra lebuguy Jehovah e tin nib m’agan’ ngay!

Ngan Tay Fan e Pi N’en ni ke Dugliy Jehovah

11. Mang e ke fil Daniel nge Josef u morngaagen Jehovah?

¹¹ Nebukadnezzar ni Pilung nu Neo-Babylon e ke lik’aynag ban’en ni ke wageynag laniyan’ machane de nang ko mang e ke lik’aynag, ma aram me ning e ayuw. Ma pi prist rok, nge pi taman bey rok, nge pi tamerong e de yog rorad ni ngar weliyed ngak ko mang e ke lik’aynag nge mang fan. Machane ke yog rok Daniel ni tapigpig rok Got, me yog ni gathi bochan ni ir e ba gonop. I gaar Daniel: “Bay ba Got u tharmiy ni ma dag e pi n’en nib mith. Nebukadnezzar ni pilung, i Got e ke yog ngom e n’en ni bay yib i m’ug.” (Daniel 2:1-30) Ma in e chibog u m’on riy ma Josef ni ir reb e profet rok Got e ke guy ni Jehovah e ir ba Got ni ma dag e pi n’en nda nnang.​—Genesis 40:8-22; Amos 3:7, 8.

12, 13. (a) Mini’ e bin th’abi ga’ e profet rok Got, ma mang fan? (b) Mini’ ko ngiyal’ ney e “kan ta’rad nib mil fan ngorad e tin nib thothup nib mith rok Got” ma susun uw rogorad u wan’dad?

¹² Jesus e ir e bin th’abi ga’ e profet rok Jehovah u fayleng. (Acts 3:19-24) I gaar Paul: “Kakrom e boor yay ni i non Got ngak pi chitamangidad ni boor kanawoen ni i non ngorad u l’ugun e pi profet, machane tiney e rran ni ir e tomren e rran e ke non ngodad u l’ugun e en ni Fak. Ir faanem ni pa’ e maruwel Got ngay nge sunumeg e fayleng nge urngin ban’en ni ba’ riy, me ir faanem ni Got e ke dugliy ni nge mil suwon urngin ban’en ngak ko tomur.”​—Hebrews 1:1, 2.

¹³ I non Jehovah ngak e tin som’on e Kristiano u daken Jesus ni Fak, me tamilangnag ngorad e tin nib mith. I gaar Jesus ngorad: “Gimed e kan weliy ngomed e tin nib mith ni murung’agen e gagiyeg rok Got.” (Luke 8:10) Ma boch nga tomren me weliy Paul u morngaagen e pi Kristiano ni kan dugliyrad ni yad e “pi tapigpig rok Kristus ni yad e kan ta’rad ni ke mil fan ngorad e tin nib mith rok Got.” (1 Korinth 4:1) Ngiyal’ ney ma aram rogon e pi Kristiano ni kan dugliyrad, mi yad fare tapigpig nib yul’yul’ mab gonop mu daken fare Governing Body ma yad ma pi’ e ggan nib spiritual ko ngiyal’ nib puluw. (Matthew 24:45-47) Faanra gad ma tay fan e pi profet rok Got nkakrom, nge Fak, ma gathi susun ni ngad ted fan fare ulung ni ke ta’ Got nib mil fan ngorad ni ngar weliyed e thin ko Bible nib t’uf ko girdi’ rok ko ngiyal’ ney nib mo’maw e par fa?​—2 Timothy 3:1-5, 13.

Ngan Tamilangnag fa Ngan Mithag?

14. Wuin ni ma rin’ e pi Kristiano boch ban’en nib mith, ma aram mi yad fol ku mini’?

¹⁴ Bochan ni ma tamilangnag Jehovah boch ban’en me ere susun ni nge tamilangnag e pi Kristiano urngin ban’en ni yad manang u gubin ngiyal’ fa? Ma lek e pi Kristiano e n’en ni yog Jesus ngak e pi apostal rok ni ngar ranod ni “thingar ra ayuwgad ni bod rogon e porchoyog mi yad munguy ni bod rogon e bulogol.” (Matthew 10:16) Faanra ngan tay chilen ko pi Kristiano ni dabiyog ni ngar liyorgad ku Got nrogon nib puluw ko nangan’ rorad, ma yad ra “fol rok Got” ya yad manang ni dariy reb e ulung ko girdi’ e bay mat’awun ni nge yog ko uw rogon ni ngan liyor ku Jehovah. (Acts 5:29) I dag Jesus ko uw rogon e re n’ey. Be weliy ni gaar: “Tomren e biney mi i milekag Jesus u lan yu Galile i yan; me dabuy ni nge milekag i yan u lan yu Judea, ni bochan piyu Israel ni yad bay u rom ni yad be finey ni manga ra lied Jesus ngem’. Ma aram e ke chugur e madnom ni ma par yu Israel u nochi naun nguun madnom, ma aram me yog Jesus ngak pi walagen ni pumoon [ni yad pi walagen nde mich Jesus u wan’rad] ni gaar: . . . ‘Mmarod ngam uned ko madnom. Me gag e dab gu wan ko re madnom nem, ya dawori taw nga nap’an ni nggu wan.’ I yog ngorad e re bugithin ney me par u Galile. Faani yan pi walagen Jesus ni pumoon ko fare madnom, ma aram me ki yan Jesus ko fare madnom, nde yan u fithik’ e girdi’, yi yan nib mith.”​—John 7:1, 2, 6, 8-10.

Ngan Nog Ban’en fa Dab Nnog?

15. Uw rogon ni ke tamilangnag Josef ni yu ngiyal’ ma bay e t’ufeg riy ni ngan tay ban’en nib mith?

¹⁵ Yu ngiyal’ ma yib gonop ma yibe t’ufegey ni dab kun tamilangnag ban’en me par nib mith. Susun, uw rogon u wan’ Josef, ni chitamangin Jesus ni ke pof, faani nang ni ke diyen Maria ndawora mabgolgow? Be weliy ni gaar: “Mi Josef ni ir e nge mang pumoon rok e be’ ni gubin ngiyal’ ma be rin’ e tin nib mat’aw; ere dabun ni nge kirebnag thin Maria nga fithik’ e girdi’, ma aram me finey ni ngar wergow ndabi nang be’.” (Matthew 1:18, 19) Ri ra kireb ni faan manga kan rin’ u fithik’ e girdi’!

16. Mang e mil fan ngak e pi piilal, nge yugu boch e girdi’ ko ulung ni fan ko pi n’en ni susun ndab nog ku be’?

¹⁶ Pi n’en ni kan tay nib mith ya ra tamra’ be’ ngay ara ra k’aring e kireban’ e susun ndab nog ko piin ndariy rogon ngorad. Aram e n’en ni ma lemnag e pi piilal ni Kristiano u nap’an ni thingara fonownaged be’ ara fl’eged laniyan’ ara ngar gechignaged be’ ya ke denen nib togopuluw ku Jehovah. Ba t’uf ni ngan pithig e pi magawon ney rogon nib puluw ko Bible; ma de t’uf ni ngan weliy e pi n’en ney ngak e piin ndariy rogon ngorad maku gathi aram rogon e t’ufeg. Ma dabi siy ni girdien e ulung ni Kristiano e dabra guyed rogon ni nge weliy e pi piilal ngorad ban’en nib mith ya yad ma tay fan e n’en nib mil fan ngak e pi piilal ni dabra weliyed ban’en ndariy rogon ni ngan nog. Proverbs 25:9 e be gaar: “Mu weliyew be’ e magawon u thilmew, ma dab kum tamilangnag ban’en ni kan nog ngom ndab ni weliy ku be’.”

17. Mang fan ni ma tay e pi Kristiano e pi n’en nsusun ndabni weliy ku be’ nib mith, machane mang fan ndabiyog e re n’ey u gubin ngiyal’?

¹⁷ Re thin ney e ku ma sor fan ko girdien chon e tabinaw nge piin fager. Ra ngan siyeg e magawon me kirebnag thilin be’ nge be’ ma baga’ fan ni dab kun weliy ban’en ni susun ndab nog ku be’. “Nifeng ni ma yib u le’luch e ma yibnag e n’uw nib gel ni bod amthun e gargel; ma blowthey ni ma yog ban’en nib mith e ma yibnag owchen nib damumuw.” (Proverbs 25:23) Ma yu ngiyal’ ma ba t’uf ni ngan nog ban’en nib mith ngak e gallabthir, nge pi piilal ko ulung ni Kristiano, nge yugu boch e girdi’ ya aram rogon ni ngan yul’yul’ ngak Jehovah nge pi motochiyel rok nib mat’aw, maku aram rogon ni ngan dag e t’ufeg ko piin ni ma rin’ ban’en nib oloboch.a Machane baga’ ni dabi weliy e pi Kristiano e tin nib mith u morngaagen yugu boch e girdi’, ni gowa yad.

18. Mang dalip felngin e Kristiano ni rayog ni nge ayuwegdad ngad turguyed ko mang e susun ni nga dogned ku be’ nge mang e susun ndab dogned?

¹⁸ Ere ma fol e Kristiano rok Jehovah ndabni weliy ban’en nib mith ko ngiyal’ nsusun dab nog, ma ra weliy ko ngiyal’ nib puluw ma kari mus. Nap’an ni be turguy e n’en nra yog ku be’ nge n’en ndabi yog, ma susun ni nge rin’ u fithik’ e sobutan’uy, nge michan’uy, nge t’ufeg. Ma bochan nib sobutan’ ma dabi tolangnag ir me weliy ko girdi’ urngin ban’en ni manang ara ra k’aring e girdi’ me yog ni bay boch ban’en ni manang nib mith. Bochan ni ke mich e Thin Rok Jehovah u wan’ ma ke michan’ ko fare ulung ko Kristiano ma aram e ra k’aring ni nge machibnag e thin ko Bible ni kan thagthagnag ma ra ayuw riy ndabi yog ban’en nra k’aring e damumuw ko girdi’. Arrogon, t’ufeg e ra k’aring ni nge weliy e pi n’en ni ma n’uf Got nge pi n’en nib t’uf ni nge nang e girdi’ nge yog e yafas ngorad. Ma dabi weliy ban’en ni susun ndab nog, ya manang ni faanra ra weliy ma aram e gathi be dag e t’ufeg.

19. Mang kanawo’ e ma tamilangnag ko mini’ e tin riyul e Kristiano ma mang wenegan riy?

¹⁹ Aram rogon e par nib thabthebel ni ma tamilangnag e tin riyul’ e Kristiano. Ya der mithaged ko mini’ Got ndab rogned fithingan ara rogned ni ir ba Trinitas ni aram e machib ni dabiyog ni ngan nang fan. Aram rogon e pi got ko pi teliw ni googsur, ma gathi aram rogon fa bin riyul’ e Got. (Mu guy Acts 17:22, 23.) Pi Mich Rok Jehovah ni kan dugliyrad e ri yad ma tay fan fare taw’ath ni “kan ta’rad ni ke mil fan ngorad e tin nib thothup nib mith morngaagen Got.” Yad ma tamilangnag e pi n’en ney ngak yugu boch e girdi’, mi yad ayuweg e piin nib yul’yul’ gumercha’rad ngar fagergad Jehovah.​—1 Korinth 4:1; 14:22-25; Zekariah 8:23; Malaki 3:18.

[Boch e Thin nra Tamilangnag Murung’agen]

Mang e Fulweg Rom?

◻ Mang fan nde t’uf ku Jehovah ni nge mithag e tin nib m’agan’ ngay?

◻ Mini’ e ma tamilangnag Jehovah e tin nib mith rok ngak?

◻ Mang e mil fan ngak e pi Kristiano u morngaagen e pi n’en nsusun ndab nog ku be’?

◻ Mang dalip felngin ni ra ayuweg e pi Kristiano ngar nanged ko mang e susun ni ngar rogned ku be’ ma mang e dab rogned?

[Sasing ko page 22, 23]

Ma tamilangnag Jehovah e tin nib mith u daken e Thin Rok