Report Ko Piin Ni Ma Wereg Fare Thin Nib Fel’ Ko Gil’ilungun Got

Ke Pirieg e “Churwo’ nu L’ugun e Yar nib Tolang Puluwon”

“GAGIYEG nu tharmiy e bod be’ ni ma chuway’ ni be gay e churuwo’ nu l’ugun e yar ntin nib fel’. Ma faani pirieg reb nrib fel’ me yan i pi’ ni chuway’ urngin ban’en ni ba’ rok’ me fek e salpiy riy nge chuw’iy fare churuwo’ ngay.” Ke yog Jesus e re fanathin ney ni nge tamilangnag feni ga’ fan e gagiyeg rok Got. (Matthew 13:45, 46) Piin ni yad ma tay nib ga’ fan Gil’ilungun Got e yad ma pag farad ni fan e nge yog ngorad. Aram e n’en ni yibe tamilangnag ko n’en ni buch u Pingtung County, ni reb e binaw u Taiwan.

Nap’an e duw ni 1991 me un ba wu’ i mabgol ni Lin fithingrow ko fol Bible ko Pi Mich Rok Jehovah. Nap’an ni nang reb a tayugang ko teliw me guy rogon ni ngar unew ko teliw rok. Ma pi’ fagal wu’ i mabgol e racha’ ko babiy nge racha’ ko dabar ni chuway’ nga market ere kar lemnagew ni ngar fithew fare tayugang ko teliw ko uw rogon u wan’. Me yog fare tayugang ko teliw ni gaar: “urngin ban’en ni ke sunumiy Got e rayog ni ngan kay.” Ma Pi Mich Rok Jehovah e kar pied e athamgil nga laniyan’ row ni ngar folgow ko nen ni be yog e Thin Rok Got u Bible. Kar filew ni ba thothup e racha’ u wan’ Jehovah ya “yafas e bay ko racha’.” (Levitikus 17:10, 11, The New English Bible) Tin riyul’ e Kristiano e thingara “paloggad . . . ko racha’.” (Acts 15:20) Bochan ni kar biegew e Bible u morngaagen e re n’ey mar lemnagew ni ngar talgow i pi’ e racha’ ni chuway’ ni yugu aram rogon ni baga’ ni aram e gin ni ma yib e salpiy ngorow riy. Daani n’uw nap’an me yib e skeng ngorow nib gel.

U mon ni ke fil fagali mabgol e thin nu Bible ma kar yungew 1,300 ken e buw u daken e binaw rorow. Yugu aram rogon ni ra yan lal e duw mfini k’uf fapi buw machane napan ni ra k’uf ma rayog ngorow medlip i ragag nge medlip e biyu’e dola reb e duw. Napan ni chugur ni ngan t’ar womengin fapi buw ma thingari lemnag fagali mabgol ko mang e ngar rin’ew. Nap’an ni kar filew e Bible mar nangew ni piin Kristiano e thingar ra pithiged yad ko urngin “banen ni ma alitnag e dowef nge lanin’uy” ni bod e tamagow nge drug nge yengyeng e buw. (2 Korinth 7:1) Mang e kar rin’ew?

Ke magawon e nangan’ rok Mr. Lin me tal ko fol Bible. Munmun me pi’ Mrs. Lin e buw ni chuway’ ko yu ken e buw rorow ni ke nuw nap’an me yognag $3,000. Re ney e be dag ko mang e ra buch faan yow ra ayweg fapi buw rorow. Machne ku be magawonnag e nangan rok Mr. Lin.

Ke magawon e lem rok nge mada’ nga reb e rran ni ke yog ngak e Pi Mich ni ngar toyed fapi buw. Me yog e Pi Mich ngak ni ir rok e nge turguy e nen’ nra rin’ ere ir e thingari toy ya nge fek gilban. (Galatia 6:4, 5) Kan pi’ e athamgil nga laniyan’ ni nge lemnag fare thin ni bay ko 1 Korinth 10:13, ni be gaar: “Urngin e n’en ni ma waliy e girdi’ nge denen ni ke yib ngomed e ereyer e mit i n’en ni ka ma yib ngak e girdi’. Yi Got e dabi thilyeg e tin ni ke yog nra rin’ ngodad, ma dabiyog ni nge pagmed nge yib ngomed e pi n’en ni ma waliy e girdi’ nge denen nge pag rogon ndabkiyog romed ni ngam taleged gimed riy; machane re ngiyal’ i n’em e ra pi’ gelngimed ngam k’adedan’med riy.” Me yog e Pi Mich ngak ni gaar: “Faan gamad ra toy fapi buw ma ri chey’ mi gimew kalngan’mew ngam mognew ni gamad e gamad ba kireb. ” Dani n’uw nap’an me reb e rran ni kadbul me od Mrs. Lin nga lingan e chain saw. Pumoon rok nge bitir rorow e yad be th’ab fapi buw!

Ke pireg Mr. Lin ni ba riyul e tin ke micheg Jehovah. Ke un ko maruwel ni de magawonnag e nangan’ rok ma rayog ni nge mang be’ ni ma n’uf Jehovah. Ke un ko taufe ko reb e circuit assembly ko Pi Mich Rok Jehovah ko April 1996.

Arrogon ke pi’ Mr. Lin “urngin ban’en ni bay rok” me chuw’iy e “churuwo’ nu l’ugun e yar nib tolang puluwon.” Chiney ma ke taw’ath ya ke fel’ thilrow Jehovah Got ma be pigpig ni fan ko Gil’ilungun Got.