Um Pired Ni Ra Bigimed Ma Ba T’uf Bigimed Rok Nrogon E Walag!
“Um pired ni ra bigimed ma ba t’uf bigimed rok nrogon e walag.”—HEBREWS 13:1.
1. Mang e ngam rin’ ni nge par e nifiy ni be daramram u reb e nep nib gel e garbeb riy, ma mang ban’en nib mil fan ngodad ni taareb rogon ngay?
RIB gel e garbeb u wen, ma be yan e temperature nga but’. Ma ke mus ni taa ban’en ni be pi’ e gawel u lan e naun rom ni aram tafen e nifiy. Yafas ko girdi’ e ma tor ko nguum ayuweg fare nifiy ngi i par ni be daramram. Ere ga ra par nga but’ ma ngam yaliy ni be war e nifiy riy iyan ma be war ramaen e coal riy me math me talumor fa? Ri danga’. Ya nguum tay e l’ud ngay ngki daramram. Ma aram rogon ni thingarda rin’ed ko reb e “nifiy” ni kab baga’ fan—ni bin ni susun ni be daramram u gumerchadad—ni aram e t’ufeg.
2. (a) Mang fan ni rayog ni ngan nog ni ke garbeb e t’ufeg ko ngiyal’ ney ni tin tomren e rran? (b) Uw fene ga’ fan e t’ufeg ko tin riyul’ e Kristiano?
2 Gad ma par ko ngiyal’ ni ke yiiynag Jesus u morngaagen ni ra war e t’ufeg u fithik’ e piin ni yad ma yog ni yad e Kristiano u gangin e fayleng. (Matthew 24:12) Be weliy Jesus u morngaagen e bin th’abi fel’ e t’ufeg ni aram e t’ufeg ku Jehovah Got nge Bible ni Thin Rok. Ma ka bay yu mit e t’ufeg ni ku be war iyan. Kan yiiynag ko Bible ni nap’an e “tin tomren e rran” ma boor e girdi’ e “dab kur runguyed e girdi’.” (2 Timothy 3:1-5) Uw fene riyul’ e re n’ey! Tabinaw e susun ni aram e gin ni bay e runguy riy, machane u rom ma bay e cham nge gafgow—yu ngiyal’ ma rib gel e kireb riy—ma aram ban’en ni yugu ma buch. Machane u lan e re fayleng ney nib gel e garbeb riy ma kan tay chilen ko pi Kristiano ni gathi ke mus ni ngar t’ufeged yad ya ngar paged farad u fithik’ e t’ufeg, mi yad tay yugu girdi’ nga m’on rorad. Susun ni ngad daged e re t’ufeg ney ni ra gagiyel ni aram e urngin e girdi’ ni ra guy, ya aram e pow ko bin riyul’ e ulung ko Kristiano.—John 13:34, 35.
3. Mang e t’ufeg ko pi walag, ma uw rogon ni ngii ul’ul’ iyan?
3 Kan thagthagnag nga laniyan’ apostal Paul ni nge gaar: “Um pired ni ra bigimed ma ba t’uf bigimed rok nrogon e walag.” (Hebrews 13:1) Rogon ni yog reb e babyor ma fare bugithin nu Greece ni “t’ufeg nrogon e walag” (phi·la·del·phiʹa) “e ma sor fan ko t’ufeg u fithik’ e runguy, mab gol, ma ma lemnag e girdi’ ma ma pi’ e ayuw ngorad.” Ma mang fan e n’en ni yog Paul u mornaagen e par ni yibe t’ufeg e girdi’? Be weliy fa binem e babyor ni gaar: “Dabi garbeb e re t’ufeg nem.” Ere dabi gaman ni ke mus ni ngan runguy e pi walagdad; ya thingarada daged nge gagiyel. Maku thingarda maruweliyed e re t’ufeg ney ni nge par, ma dabi garbeb. Mo’maw fa? Arrogon, machane kan ni thothup rok Jehovah e rayog ni nge ayuwegdad ngad t’ufeged e pi walagdad ma nguuda ngongliyed. Ngad lemnaged dalip e kanawo’ ni rayog ni ngan tay e l’ud ko nifiy riy ko re t’ufeg ney u gumerchadad.
Ngan Dag e Runguy
4. Mang e runguy?
4 Faanra ga ba adag ni nge ga’ iyan rogon ni ba t’uf rom e pi walag ni pumoon nge ppin ni Kristiano, ma ba t’uf ni ngam runguyrad, ngam nang fan e pi magawon nge gafgow ni ma yib ngorad. I tamilangnag apostal Peter e re n’ey faani yoloy ni gaar: “Ere thingari gimed gubin ni nge taareb rogon e lem romed mu um runguyed gimed; me bigimed me t’uf rok bigimed nrogon e piin ni walag ni girdien Kristus, mu um pired nib fel’ e thin romed ngomed ma ba sobut’ lanin’med ngomed.” (1 Peter 3:8) Fare bugithin ni Greek ni “um runguyed gimed” e ma sor fan ko “ngan un ko gafgow rorad.” Be’ ni ba salap ko thin ni Greek ni bay ko Bible e be weliy u morngaagen e re bugithin ney ni gaar: “Be weliy u morngaagen laniyan’ e girdi’ ni be par ni be un i lemnag yugu boch e girdi’ ni gowa aram e lem rodad.” Ere, ba t’uf e runguy. Reb e tapigpig rok Jehovah nib yul’yul’ ma ke pillibthir e ke gaar: “Runguy e aram amthum ni bay u gumerchaeg.”
5. Uw rogon ni gad manang ni ma runguy Jehovah e girdi’?
5 Jehovah e bay e runguy rok ni aram rogon fa? Ri arrogon. Ya gad ma bieg u morngaagen e gafgow ni tay e girdi’ rok ni piyu Israel ni gaar: “Ke par ni ke kireban’ ngorad ko ngiyal’ ni yad ba gafgow.” (Isaiah 63:9) Gathi ke mus ni ke guy Jehovah e gafgow rorad; ya ke un ngorad ko gafgow. N’en ni yog Jehovah u Zekariah 2:8 ngak e girdi’ rok e ma tamilangnag ko uw fene gel ni ma runguy e girdi’ ye gaar: “Ani be math ngom e ke math nga tiren owcheg.”a Ke weliy be’ u morngaagen e re verse ney ni gaar: “Lan owchey e aram ban’en nth’abi sogfal mab mom nra kireb u downgin e girdi’; ma tiren owchey—e aram e n’en ni ma yib e tamilang nu lang riy ni nge yog ni ngan guy ban’en—aram e bin th’abi gel e thamtham riy maku aram e n’en th’abi ga’ fan riy. Dariy ban’en ni kab fel’ ni nge tamilangnag rogon ni ma runguy Jehovah e tin nib t’uf rok.”
6. Uw rogon ni dag Jesus Kristus e runguy?
6 Ku arrogon Jesus e gubin ngiyal’ ma ke dag e runguy. Boor yay ni ke “taganan’” ko girdi’ nib m’ar ara ba magawon u ban’en. (Mark 1:41; 6:34) Ke tamilangnag ni faanra dabi gol be’ ngak e pi gachalpen ni kan duguliyrad ma bod rogon ni kan rin’ ngak. (Matthew 25:41-46) Ma ngiyal’ ney ma fare “prist nib tolang,” rodad ni bay u tharmiy e “ma kireban’ ngodad nga fadad meewar.”—Hebrews 4:15.
7. Uw rogon ma runguy e ra ayuwegdad u nap’an ni ke chalbadad ni bochan reb e walag ni pumoon ara ppin?
7 “Ma kireban’ ngodad nga fadad meewar”—re n’em e ma fl’eg laniyan’dad fa? Ere dabi siy ni ra bagadad ma ba adag ni nge yodorom ngak bagadad. Machane kab mom ni ngan gayiy thibngin e girdi’. (Matthew 7:3-5) Machane yay ni migid ni ra k’aring reb e walag ni pumoon ara ppin e kankanan’ ngom, ma mang ni dab mu rin’ e re n’ey? Mu lemnag ni taareb salpmew e cha’ nem, ma taareb rogon e par romew, ma taareb rogon pangimew, ma taareb thibngimew. Rayog ni nge mudugilan’um ni dab mu oloboch ni bod rogon e cha’ nem—fa mu rin’ boch ban’en ni kab gel e kireb riy fa? Dabi pag rogon e pi n’en ni gad be lemnag ni susun ni nge rin’ e girdi’, ya susun ngad lemnaged yad ni bod gadad nge fil munguyan’dad ni bod Jehovah ni ‘manang ni gadad e fiyath.’ (Psalm 103:14; James 3:17) Manang ni bay e gin ni gad ma mus riy. Ma der tay chilen ngodad ni ngad rin’ed ban’en ndabiyog rodad. (Mu taarebnag ko 1 Kings 19:5-7.) Nguuda lemnaged e yugu girdi’ ni aram rogon.
8. Susun uw rogon u wan’dad u nap’an ni ke gafgow reb e walag ni pumoon ara ppin?
8 I yoloy Paul ni fare ulung e bod ba dowef ni boor yu yang riy nib thilthil ma yad ma maruwel u taabang. Miki gaar: “Faanra gafgow bayang u dowey, ma urngin e yu yang ni ka ba’ e yad ma un ngak ko gafgow.” (1 Korinth 12:12-26) Ba t’uf ni ngad uned ko gafgow fa ngad runguyed e piin ni be un ko gafgow. Pi piilal e yad ma rin’ e re n’ey. Ki yoloy Paul ni gaar: “Faanra meewar be’, me un lanin’ug ngak ni susun e gag e kug meewar; ma faani mul be’ nga fithik’ e denen, me ri kireban’ug.” (2 Korinth 11:29) Pi piilal nge piin ni ma lekag e ulung e yad ma folwok rok Paul ko re n’ey. Nap’an ni yad ma welthin nge ngiyal’ ni yad be ayuweg e yu ran’ i saf, ma ngiyal’ ni yad be pithig e magawon, ma yad ma athamgil ni ngar runguyed e girdi’. Yog Paul ni gaar: “Mu uned ko meyor ngak e piin ni yad be yor.” (Roma 12:15) Nap’an ni manang e pi saf ni pi tachugol saf e be runguyrad mi yad manang farad, ma yad ma lemnag e gafgow rorad, ma aram e ra mom ni ngar folgad ko fonow ni yad ra pi’ mi yad pag ni ngan pow’iyrad min lowan’nagrad. Yad ma un ko pi muulung nib m’agan’rad ngay, ma ke felan’rad ya yad ra ‘pirieg e toffan.’—Matthew 11:29.
Ngan Tay Fan
9. Uw rogon ni ma dag Jehovah ni ma tay fan felngidad?
9 Bin l’agruw e kanawo’ ni rayog ni ngan ayuweg e t’ufeg u fithik’ e pi walagey e ngan tay farad. Ngad ted fan e yugu boch e girdi’ ma ngada lemnaged felngirad nge athamgil ni yad ma tay. Gad ra yodor ma aram e gad be folwok rok Jehovah. (Efesus 5:1) U gubin e rran ma ma n’ag fan e denen rodad ni gathi rib ubchiya. Maku ma n’ag fan rodad ko denen nib ubchiya nfaanra kad kalgadngan’dad. Ma nap’an ni ke n’ag fan ma aram ma dabki lemnag. (Ezekiel 33:14-16) I fith ko Psalm ni gaar: “Faan mang e mu tay ngan’um e kireb ni gamad be rin’, me mini’ e rayog rok ni nge thay ndab ni gechignag, O Jah, O Jehovah?” (Psalm 130:3; New World Translation) Ma lemnag Jehovah e pi n’en nib fel’ ni gad ma rin’ ko pigpig ngak.—Hebrews 6:10.
10. (a) Mang fan ni bay e riya’ riy ni faanra bwu’ e mabgol e dakur tew farow? (b) Susun mang e nge rin’ be’ nfaanra dakir tay fan e ani mabgol rok?
10 Rib baga’ fan ni ngad folwokgad ko re n’ey u lan e tabinaw. Nap’an ni ma dag e gallabthir ni yow ma tay farow, ma yow ma tay e kanawo’ ko tabinaw rorow. Ngiyal’ ney ma papey ni ma dar e mabgol, ma aram e ke mom ni ngan dariy fannag u wan’uy e ani mabgol min lemnag thibngin ma gathi ngan lemnag felngin. Lem nib kireb ni aram rogon e ma kirebnag e mabgol, me munmun ma dariy e falfalan’ riy ma ba tomal. Faanra be war iyan rogon ni ga ma tay fan e ani mabgol rom, ma ga fithem, ‘Ri dariy felngin e ani mabgol rog?’ Mu lemnag ko mang fan ni ke t’uf rom e cha’ nem ma kam mabgolgow. Ke m’ay nga bayang e pi n’en nem ni kam t’ufeg ko cha’ nem fa? Dabi siy ni danga’; me ere mu athamgil nib elmirin ni ngam tay fan felngin e ani mabgol rom, ma ga weliy ngak ni ga ma tay fan.—Proverbs 31:28.
11. Mang boch e ngongol nsusun ni ngan siyeg ni fan ni nge par e bin riyul’ e t’ufeg u lan e mabgol?
11 Tay fan e ku ma ayuweg e pi mabgol ni nge t’uf e mabgol rorad nriyul’. (Mu taarebnag ko 2 Korinth 6:6; 1 Peter 1:22.) T’ufeg ni aram rogon ni ma tay fan e dabi pag ni ngan ngongliy e ngongol nib kireb ngak e an mabgol rok ko ngiyal’ ndariy be’, ma dabi pag ni ngan nog e thin ni ra kirebnagan’uy ara ndariy fannag e ani mabgol, ma dabi pag ni dabkun non ngak in e rran, ma dabni cham. (Efesus 5:28, 29) An figirngin nge an leengin ni ri yow ma tay farow e yow ma yog e sorok ngorow. Yow ma rin’ ni gathi ke mus u p’eowchen e girdi’ ya yow ma rin’ u gubin ngiyal’ ni yow bay u p’eowchen Jehovah—ni aram e gubin ngiyal’.—Proverbs 5:21.
12. Mang fan ni susun ni nge weliy e piin gallabthir ni yad ma tay fan felngin e pi bitir rorad?
12 Ku arrogon e piin bitir ma ba t’uf ni ngar nanged ni bay farad. Ma gathi nge yog e gallabthir rorad nib sororad nib pag rogon, ya susun ni ngar pininged e magar ko bitir rorad ko pi felngirad nge pi n’en ni yad ma rin’ nib fel’. Dab mu pag talin rogon ni ke yog Jehovah ni ke felan’ ku Jesus. (Mark 1:11) Ku mu lemnag e kanawo’ ni tay Jesus ni ir fare “masta” ko reb e fanathin. I pining e magar ngak l’agruw e ‘tapigpig ni yow ba fel’ mab yul’yul’’ ntaareb rogon ni yugu aram rogon nib thil e n’en ni kan pi’ ngorow mab thil e n’en ni ur fl’egew. (Matthew 25:20-23; mu taarebnag ko Matthew 13:23.) Ku arrogon e pi gallabthir nib gonop e yad ma gayiy rogon ni ngar pininged e magar ko bitir rorad ni ra reb nib thil felngin, nge pi n’en nib salap riy, nge pi n’en ni ma ngongliy. Machane ku yad ma guy rogon ndabi pag rogon ni yad ma ga’nag fan e pi n’en ni ma rin’ e bitir rorad ni aram e ra diliiy laniyan’ e bitir mi yad lemnag ni thingara rin’ed urngin ban’en nib fel’ rogon. Dubrad ni nge ilal e bitir rorad mi chachalbrad fa mulan’rad.—Efesus 6:4; Kolose 3:21.
13. Mini’ e yad e som’on ni yad ma tay fan e girdi’ u lan e ulung?
13 U lan e ulung ko Kristiano ma pi piilal nge piin ni ma lekag e ulung e yad ma dag e kanawo’ ni ngan tay fan ra reb e girdi’ ko yu ran’ saf rok Got. Mmo’maw e maruwel rorad ya ku mmil fan ngorad ni ngar pied e gechig nib mat’aw, mi yad fonownag e piin ni kar olobochgad u fithik’ e sumunguy, mar pied e fonow nib gel ko ngiyal’ nib t’uf. Uw rogon ni yad ma thabthabelnag e pi n’en ney nib mil fan ngorad?—Galatia 6:1; 2 Timothy 3:16.
14, 15. (a) Uw rogon ni dag Paul ni ke thabthabelnag e fonow nib gel ni i pi’? (b) Uw rogon nrayog ko pi piilal ko Kristiano ni ngar thabthabelnaged rogon ni yad ma yal’uweg e magawon nge rogon ni yad ma pining e magar ko girdi’? Mu weliy ko fanathin.
14 Rib manigil e kanawo’ ni tay Paul. Ya immoy nib lingagil rogon ni ma skulnag ban’en, nge rogon ni ke rin’ e maruwel ko piilal nge tachugol saf. I ayuweg e pi ulung ni boor e magawon rorad, ma de tinna’ ni nge pi’ e fonow ngorad nib gel ko ngiyal’ nib t’uf. (2 Korinth 7:8-11) Ran sul nga daken e machib ni tay Paul ma ba tamilang ni ri in yay ni ke pi’ e fonow nib gel e thin rok—ya ke mus u nap’an ni ba t’uf. Ere ke ngongol ni be dag e gonop rok Got.
15 Faanra nga nog ni maruwel ko ulung ko piin piilal e bod e musik, ma fonow nib gel nge gechig e bod e n’en ni ka nog e note ngay ni aram bochi yang ko fare tang. Ma re note nem e ba puluw ni aram rogon. (Luke 17:3; 2 Timothy 4:2) Mu lemnag ba tang ni kari mus ntaareb e note ni ba’ riy, ni yibe sul nga daken biyay nge biyay. Ra kireb teldad ko re n’em. Ku arrogon e pi piilal ko Kristiano ni yad ma guy rogon ni nge thabthabel e skul ni yad ma tay mi yad rin’ boch ban’en nib thilthil. Gathi ke mus ni yad ma yaluweg e magawon. Ya baga’ ni skul ni yad ma tay e ma ubingey. Bod rogon Jesus Kristus ma pi piilal e yad ma gayiy e tin nib fel’ ni ngan pining e magar riy, ma gathi yad ma gayiy thibngin e girdi’. Yad ma tay fan e maruwel nib gel ni be tay e pi walagrad ni Kristiano. Ma goo yad manang ni ra be’ ma be rin’ e tin nrayog rok nib mus rogon ni nge pigpig ku Jehovah. Ma boch e piilal e yad ma tamilangnag e re n’em ko thin rorad.—Mu taarebnag ko 2 Thessalonika 3:4.
16. Uw rogon Paul u wan’ e girdi’ ni bochan e ke tay fan e pi Kristiano ma ke runguyrad?
16 Dariy e maruwar riy ni pi Kristiano ni ke ayuwegrad Paul e baga’ ni ur nanged ni ke tay farad ma ke runguyrad. Uw rogon ni gad manang e re n’ey? Mu lemnag ko uw rogon Paul u wan’rad. Dar rusgad ngak, ni yugu aram rogon ni ir be’ nib baga’ lungun. Danga’, ya ke t’uf rorad ma ur bad ngak. Ma nap’an ni chuw u bang, ma pi piilal e ‘yad be gumuchmuch ngak Paul ma yad be faray owchen ni yad be fingichiy’! (Acts 20:17, 37) Piin piilal e ri yad ma pining e magar riy—nge ku gad gubin—ya ke tay Paul e kanawo’ ni ngad folwokgad riy! Arrogon, ngad daged ni ra bagadad e be tay fan bagadad.
Ngongol u Fithik’ e T’ufeg nge Runguy
17. Mang wenegan nib fel’ ni yib ko ngongol nib gol u lan e ulung?
17 Reb i ban’en ni ma k’aring e t’ufeg ko pi walagey e ngongol nib gol. Yog Jesus ni “Ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” (Acts 20:35) Demtrug ko mang e gad ra pi’ ni tirok Got ban’en, ara chugum, ara tayim nge gelngidad, ma gathi ke mus ni gad ra felan’nag yugu boch e girdi’ ya ku gad ra felan’nagdad. U lan e ulung ma ngongol nib gol e ra af ngak be’ nge be’. Ngan gol ngak be’ e ra k’aring ni nguun gol ngak be’ nge be’. Ma dabki n’uw nap’an me ga’ e t’ufeg u fithik’ e pi walag!—Luke 6:38.
18. Mang fan fare thin ni “gol” ni bay ko Mikah 6:8?
18 I yog Jehovah ko piyu Israel ni ngar golgad ngak e girdi’. Be yog ko Mikah 6:8 ni gaar: “Gimed e girdi’ u gubin yang, ke yog Jehovah ngomed e tin nib fel’. Tin ni ke yog ngomed ni ngam rin’ed e baaray ni ke gaar: mu rin’ed e tin nib yal’uw, um pired nib t’uf romed ni ngam golgad ngak e girdi’, mu um folgad rok Got u fithik’ e sobut’an’.” Uw rogon ni nge “t’uf romed ni ngam golgad ngak e girdi’”? Fare bugithin nu Hebrew nib sor fan ko “gol” (cheʹsedh) e kan piliyeg e thin riy nthin ni Meriken ni “runguy.” Rogon ni yog fare babyor ni The Soncino Books of the Bible, ma re thin ney e “kab boor e ngongol nib l’ag ngay ko fare bugithin ni Meriken ni mercy ara runguy. Ya ma sor fan ko ‘runguy ni piliyeg ni ngongol,’ ma ngan rin’ ban’en nib gol, ni gathi ke mus ko piin nib gafgow ya ngan rin’ ngak urngin e girdi’.” Ere yog reb e scholar ni cheʹsedh e ma sor fan ko “t”ufeg ni yibe maruweliy.”
19. (a) Uw rogon nrayog ni ngad golgad ngak e girdi’ u lan e ulung? (b) Mu weliy ko uw rogon ni kan dag e t’ufeg ko pi walagey ngom.
19 Rogon e t’ufeg rodad ko pi walagdad e gathi ke mus ni ban’en ni ngan lemnag. Ya aram ban’en nriyul’. Ere mu gayiy e kanawo’ ni ngam gol ngak e pi walagem ni pumoon nge ppin. Mu bod Jesus, ni gathi ke mus ni ke sonnag e girdi’ ngar bad ngak ya ke m’on ni nge rin’ ban’en. (Luke 7:12-16) Mu lemnag e piin nib gafgow. Bay be’ ni piilal ara m’ar nib t’uf ni ngan nib ni guy ara ngan rin’ boch ban’en ni fan ngak fa? Bay e ‘bitir ni dariy e matam’ nib t’uf ni nge tiyan’ ngak fa? Bay be’ ni ke mulan’ nib t’uf ni ngan motoyil ngak ara ngan pi’ e athamgil nga laniyan’ fa? Rogon nrayog rodad ma nguuda ted e tayim ni ngad golgad ngak e girdi’. (Job 29:12; 1 Thessalonika 5:14; James 1:27) Dabda paged talin ni yigoo piin dar flontgad e bay ko ulung, me ere rogon ni ngan gol ngak e girdi’ e ngan n’ag fan rorad—dabkun lemnag e kireb ku be’ ni yugu aram rogon ni bay tapgin. (Kolose 3:13) Faanra ran n’ag fan u gubin ngiyal’ ma ra par e ulung nde yoor raba’, ma dariy e fanenikay, ma dariy e cham, ma pi n’ey e bod e gulgul ni ke munur ni ma thang e nifiy ko t’ufeg u fithik’ e pi walag.
20. Susun uw rogon ni ngad yaliyed gadad ni gad gubin?
20 Ngad turguyed ni ngii par fare nifiy ko t’ufeg ni be daramram u gumerchadad. Nguuda yaliyed gadad. Gad ma runguy yugu boch e girdi’ fa? Gad ma tay fan e girdi’ fa? Gad ma gol ngak e girdi’ fa? N’umngin nap’an ni gad ra yodorom ma ra par fare nifiy ko t’ufeg ni be pi’ e gawel ko pi walagdad ndemtrug ko uw fene gel e garbeb ko re fayleng ney ni der lemnag e yugu girdi’. Ere “um pired ni ra bigimed ma ba t’uf bigimed rok nrogon e walag”—chiney iyan ngaram ndariy n’umngin nap’an!—Hebrews 13:1.
[Boch e Thin nra Tamilangnag Murung’agen]
a Bay yu ken e Bible ni ma yog ni en ni be math ko girdi’ rok Got e gathi be math nga lan owchen Got ya lan owchen yu Israel fa be math nga lan owchen. Re oloboch ney e sum ko girdi’ ni medieval ni ur thiliyeged boch e thin ko Bible ni ur lemnaged nde puluw. Ere kar dabuyed ni ngan tamilangnag rogon fene gel ni ma runguy Jehovah e girdi’.
Uw Rogon u Wan’um?
◻ Mang e t’ufeg ko pi walag, ma mang fan ni thingar ud maruwliyed?
◻ Uw rogon ma faanra gad ra runguy e girdi’ ma aram e ra par e t’ufeg rodad ko pi walagdad?
◻ Uw rogon nib l’ag e tay fan ko t’ufeg ko pi walag?
◻ Uw rogon ma gol ngak e girdi’ e ma k’aring nge ga’ e t’ufeg u lan e ulung ko Kristiano?
[Kahol ko page 27]
T’ufeg ni Yibe Maruweliy
In e duw faram ma immoy reb e pumoon ni be fil e Bible u taabang ko Pi Mich Rok Jehovah ma ke maruwaran’ ko t’ufeg ko pi walag. I nang ni ke yog Jesus ni gaar: “Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” (John 13:35) Machane mo’maw ni nge mich u wan’ ko re n’em. Reb e rran ma ke guy e t’ufeg ko Kristiano ni yibe maruweliy.
Yugu aram rogon ni ma par ko wheelchair, machane yan e re pumoon ney u bang nib palog ko binaw rok. U Behlehem, Israel, me un ko reb e muulung ko ulung. Ma reb e Mich ni girdi’ ni Arab e ke pining yugu reb e Mich ni wasol nge re moon nem ni ngar parew ko tabinaw rok ko re nep i n’em. U m’on ni nge mol me fith e re moon nem ko facha’ ko rayog ni nge yan nga wen ko beranda nkakakadabul ni nge guy e kamadabiy. Ke yog facha’ nib gel e thin rok ni thingar dabi rin’ e re n’em. Ma bin migid e rran me weliy fare walag ni Arab ko mang fan. Bay be’ ni ke piliyeg e thin rok me yog ni faanra guy e piin buguli yoror rok ni bay e girdi’ ni Jew ni be par rok—ni aram fare moon ni be fil e Bible—ma yad ra urfeg e naun rok ni ir nge tabinaw rok e bay riy. Ke maathuk laniyan’ fare moon ni be fil e Bible me ere ke fith ni gaar, “Ere mang fan ni kam piningeg kam fek i yib e riya ngomed?” De t’uf ni nge piliyeg be’ e thin rok fare walag ni Arab ya ke sap ko fare moon me gaar, “John 13:35.”
Kari nang fare moon ni be fil e Bible nib riyul’ e t’ufeg ko pi walag. De n’uw nap’an nga tomren me un ko taufe.
[Sasing ko page 29]
Bochan ni ffel’ daken Paul ma ma tay fan e girdi’ ma yad ba adag ni ngar bad ngak