Ma Chaariy Jehovah E Pigpig Ni Ga Ma Tay Ngak Ko Yafas Rom Ni Polo’

“Demtrug e n’en ni gimed ra ngongliy ma ngam tedan’med ngay, ni gowa gimed be maruwel rok Jehovah, ma gathi rok e girdi’.”​—KOLOSE 3:23, New World Translation.

1, 2. (a) Mang e bin th’abi fel’ e taw’ath ni rayog ngodad? (b) Mang fan ni yu ngiyal’ ma dabiyog ni ngad rin’ed urngin ban’en ni gad ba adag ko pigpig ku Got?

PIGPIG ku Jehovah aram e bin th’abi fel’ e taw’ath ni rayog ngodad. Ke n’uw nap’an ni be weliy u lan e re ke babyor ney ni nge un e pi Kristiano ko machib nib elmirin, mi yad “athamgil boch” nfaanra rayog. (1 Thessalonika 4:1) Machane gathi gubin ngiyal’ ni rayog ni ngad rin’ed urngin ban’en ni gad ba adag ko pigpig ku Got. Reb e walag ni ppin ni dawori mabgol ma ke chugur ni 40 e duw faram ni ke un ko taufe e ke gaar: “Rogon salpeg ma ba t’uf ni nggu maruwel nib full-time. Gu be un ko maruwel ni gathi bochan ni nge yog boor e mad nib fel’ ngog ara nggu un ko vacation cruise ko barkow, ya bochan ni nge yog e tin nib t’uf ko par rog nib muun ngay puluwon e tafalay ni medical nge dental. Gu be lemnag ni ke mus ni gu be pi’ ngak Jehovah e tin ni ke aw e tayim rog nge gelngig.”

² Bochan nib t’uf Got rodad ma aram e ma k’aringdad ni ngad adaged ni ngad rin’ed urngin ban’en nrayog rodad ko machib. Machane re n’em e ma tor ko uw rarogodad nge uw salpedad. Ka bay boch e maruwel nib t’uf ni ngan rin’ ni bay ko Bible nib muun ngay ni ngan ayuweg girdien e tabinaw, ma aram e ba t’uf ni ngan pi’ e tayim rodad nge gelngidad ko tabinaw rodad. (1 Timothy 5:4, 8) Ngiyal’ ney ni “mo’maw e par,” e kari gel e mo’maw riy. (2 Timothy 3:1) Nap’an ndabiyog ni ngad rin’ed urngin ban’en ni gad ba adag ni ngad rin’ed ko machib, ma sana ra kireban’dad. Sana ra maruwaran’dad ko ba adag Got e liyor ni gad be tay fa.

Ba Gamog e Pigpig ko Yafas ni Polo’

3. Mang e ba adag Jehovah ni ngad rin’ed?

³ U Psalm 103:14, ma be yog e Bible ni manang Jehovah “e n’en nni ngongliydad ngay; ma manang ni gad e fiyath.” Kab boor ni manang u morngaagen e pi n’en nrayog rodad ko yugu boch e girdi’. Ma der tay chilen ni ngad pied ban’en ni kab boor ko bin nrayog rodad. Mang e ba adag ni ngad rin’ed? Ban’en ni rayog ko urngin e girdi’ ndemtrug salperad: “Demtrug e n’en ni gimed ra ngongliy ma ngam tedan’med ngay, ni gowa gimed be maruwel rok Jehovah, ma gathi rok e girdi’.” (Kolose 3:23) Arrogon, ba adag Jehovah ni ngad pigpiggad ngak ko yafas rodad ni polo’​—ni gad gubin.

4. Uw rogon e pigpig ku Jehovah ko yafas ni polo’?

⁴ Uw rogon ni ngan pigpig ku Jehovah ko yafas rodad ni polo’? Fare bugithin ni Greek ni “yafas ni polo’” e ma sor fan ko “sum ko yaal.” Ma fare “yaal” aram be’ ni polo’ ni dowef nge laniyan’. Ere rogon ni ngan pigpig ko yafas ni polo’ e ngad pied gadad, ni gad fanay urngin ban’en rodad ma gad yiluy owchedad nge gelngidad ni mus rogodad riy ko pigpig ku Got. Ere ngad rin’ed urngin ban’en rayog ni ngad rin’ed u gelngidad.​—Mark 12:29, 30.

5. Uw rogon e pi apostal ni be dag ni gathi taareb rogon e machib ni gad ma tay ni gad gubin?

⁵ Ere gad gubin ma taareb rogon urngin ban’en ni gad ra rin’ ko machib ya aram fan e pigpig ko yafas ni polo’ fa? Dabiyog ya ra be’ ma rogon ni ra yog rok ya ba thil thil rarogon e girdi’. Mu lemnag e pi apostal rok Jesus ni yad ba yul’yul’. Dabiyog ni ngar rin’ed urngin ban’en ni taareb rogon. Susun, ri buch uw ni gad manang u morngaagen boch e apostal, ni bod Simon ni be’ ni Cananaean nge James ni fak Alfaeus. Sana gathi ri boor e maruwel ko apostal ni ur rin’ew. (Matthew 10:2-4) Machane ke yog ku Peter ni nge fek e maruwel nib tomal​—ma ke pi’ Jesus ngak “fapi kiy ko gagiyeg nu tharmiy”! (Matthew 16:19) Machane de tolang Peter ko tin ni ka bay e apostal. Nap’an ni pig e changar rok John me guy fa Bin ni Biech e Jerusalem ni bay ko Revelation (sogonapan 96 C.E.), me guy 12 e malang ni ir e kan yoloy fithingan “fa ragag nge l’agruw i apostal ngay.”a (Revelation 21:14) I tay Jehovah fan e maruwel ni rin’ urngin e pi apostal, ni yugu aram rogon ni boch i yad e kab boor ban’en ni kar rin’ed ko yugu boch iyad.

6. Mang e ra buch ko pi awoch ni kan yung nga daken e “but’ nib yong’ol” ko fanathin rok Jesus u morngaagen e en ni be yung e awoch, ma mang boch e deer ni sum?

⁶ Ku arrogon gadad ma de lemnag Jehovah ni taareb rogon e maruwel ko machib ni gad ra tay. I tamilangnag Jesus e re n’ey ko fare fanathin ni pi’ u morngaagen fa en ni ke yung e awoch, ni ma sor fan ko maruwel ko machib. Ke wer e awoch nga daken e but’ nib thil thil, ni be yip’ fan gum’ercha’en e girdi’ ni ke rung’ag fare thin. Me weliy Jesus ni gaar: “Ma boch fapi awoch e wer nga daken e but’ nib yong’ol, me tugul nge k’uf: ni yu ken e raay wom’engin, ma yu ken e nel’ i ragag, ma yu ken e guyey.” (Matthew 13:3-8, 18-23) Mang e be yip’ fan e wom’engin, ma mang fan nib thil thil oren wom’engin ni ke k’uf?

7. Mang wom’engin ni yib ko pi awoch nem ni kan yung, ma mang fan nib thil thil urngin wom’engin ni k’uf?

⁷ Fare awoch ni kan yung e aram “fare thin u morngaagen e gagiyeg rok Got,” me ere wom’engin ni ra yib riy e ma sor fan ko machib ni ngan wereg, ni ngan weliy ngak yugu boch e girdi’. (Matthew 13:19) Mab thil thil oren wom’engin ni ma yib​—yu ken ma guyey wom’engin ma yu ken e raay​—ya ba thil thil e yafas ko girdi’ ni salperad nge rarogorad. Be’ nib fel’ fithik’ i dow mab gel gelngin e rayog ni nge yoor e tayim ni nge tay ni nge machibnag e girdi’ ku be’ ni ke m’ar fa ke pillibthir ma ke meewar. Be’ nib fel’ yangaren ni dawori un ko mabgol e ke puf rogon ma boor ban’en ni rayog ni nge rin’ ko be’ ni thingari maruwel nib full-time ni nge ayuweg e tabinaw rok.​—Mu taarebnag ko Proverbs 20:29.

8. Uw rogon u wan’ Jehovah e piin ni ma pi’ e tin th’abi fel’ e n’en nrayog ni ngar pied ko yafas rorad ni polo’?

⁸ Be lemnag Got ni en ni be pigpig ngak ko yafas rok ni polo’ ni be k’uf wom’engin ni guyey e gathi rib gel e michan’ rok ni bod be’ ni be k’uf wom’engin ni raay fa? Ri danga’! Ba thil thil urngin wom’engin ni ra yib ku be’ nge be’, machane ke felan’ Jehovah ngay ya pigpig ni kan tay e bin th’abi fel’ nrayog ni ngad rin’ed. Dab mu pag talin ni ke thil thil oren wom’engin ni ke yib ku be’ nge be’ machane urngin ni yib ko “but’ nib fel’.” Fare bugithin ni Greek (ka·losʹ) ni “fel’” e ma sor fan ko ban’en nib “gamog” ma ma “falfalan’nag gum’ercha’ey, ma ba fel’ yaan.” Kan fl’eg laniyan’dad ya gad manang ni faanra gad ra rin’ urngin ban’en nrayog rodad ma ba fel’ gum’ercha’dad u p’eowchen Got!

Dan Taarebnag Be’ ku Be’

9, 10. (a) Gum’ercha’dad e rayog ni nge k’aring e lem rodad ni uw rogon nde puluw? (b) Uw rogon ni be tamilangnag fare fanathin ni bay ko 1 Korinth 12:14-26 ni der taarebnagdad Jehovah ngak yugu boch e girdi’ ko pi n’en ni gad ma rin’?

⁹ Machane sana gum’ercha’dad e ra pufthinnagdad ni yugu ba reb rogon. Sana ra taarebnag e pigpig ni gad be tay ko pigpig ni ma tay yugu boch e girdi’. Sana ra gaar, ‘Boch e girdi’ e kab boor e machib ni yad be tay ngog. Ere uw rogon me felan’ Jehovah ko pigpig ni gu ma tay ngak?’​—Mu taarebnag ko 1 John 3:19, 20.

¹⁰ Lem rok Jehovah nge kanawo’ rok e kab tolang ngodad. (Isaiah 55:9) 1 Korinth 12:14-26 e ma tamilangnag ko uw rogon u wan’ Jehovah e athamgil ni gad ma tay, ya be yog ni girdien e ulung e bod ba dowef ni boor yang i dowey​—lan owchey, nge buguli paay, nge buguli ay, nge teliy, nge ku boch. Mu lemnag e dowef ko girdi’. Ra makakar ni ngam taarebnag lan owchem ko buguli paam ara mu taarebnag buguli em nga lan telim! Ya ra bayang ma ba thil e n’en ni ma rin’, machane yad gubin ma yibe fanay ma bay fan mab baga’ fan. Ku arrogon ni ma chaariy Jehovah e pigpig ni ga ma tay ko yafas rom ni polo’ ndemtrug ko kab boor ban’en ni be rin’ yugu boch e girdi’ ngom fa kab lich.​—Galatia 6:4.

11, 12. (a) Mang fan ni ma lemnag boch e girdi’ ni yad “meewar” ara “dariy farad”? (b) Uw rogon u wan’ Jehovah e pigpig ni gad ma tay?

¹¹ Yu ngiyal’ ma sana gad ra lemnag ni gad ba “meewar” ko yugu boch e girdi’ ara “dariy fadad” ya gad m’ar ara kan pillibthir ara yugu ban’en. Machane gathi aram rogon u wan’ Jehovah. Be yog e Bible ngodad ni gaar: “Dabiyog ni ngad pired ndariy e yungi n’en ni ba’ u dowdad ni gadad be finey nib meewar, ma yungi n’en u dowey nib tomur u wun’dad e ereram e yu yang ni ir e gadad ma tiyan’dad ngay nguud fal’eged rogon. . . I Got e ke chamey dowdad ni aram rogon ni fan e nge gel i ta’ fan e yungi n’em u dowey nib tomur u wun’uy.” (1 Korinth 12:22-24) Ere ra be’ ma rayog ni nge fel’ u wan’ Jehovah. Ya ma chaariy e pigpig ni ga ma tay ngak u rogon nrayog rodad. Gathi kan k’aring gum’ercha’em ni ngam rin’ urngin ban’en rayog rom ni ngam pigpig ku Got ya ma nang fan ma ma t’ufegey?

¹² N’en nib baga’ fan u wan’ Jehovah e gathi kam rin’ ban’en ntaareb rogon ko yugu be’ ya baga’ fan u wan’ ni ngam rin’ e n’en nrayog rom​—ko yafas rom. Ma chaariy Jehovah e athamgil ni gad ma tay ma n’en ni be micheg e re n’ey e rogon ni ngongol Jesus ngak l’agruw e ppin u nap’an e tin tomren e rran ko yafas rok u fayleng.

“Ba Taw’ath ni rib Tolang Puluwon” ni Pi’ Reb e Ppin ni Ma Tay Fan Jesus

13. (a) Mang e buch u nap’an ni tay Maria e florida nga daken lolugen Jesus ngu daken ay? (b) Uw fene tolang puluwon e florida ku Maria?

¹³ Nap’an ni ke balayal’ ko Biernes, Nisan 8, me taw Jesus nga Bethany, ni aram ba binaw ni ba achig ni bay ko ba’ ni ngek ko fare Burey ni Olive, ni sogonapan l’agruw e mayal palogngin u Jerusalem. Immoy boch e girdi’ ko re binaw nem ni rib t’uf rok Jesus​—Maria nge Martha, nge Lazarus ni walagrow ni pumoon. Sana boor yay ni ke par Jesus rorad. Ma nap’an e balayal’ ko Sabado, me un Jesus nge pi fager rok ko abich u tafen Simon, ni immoy faram nib daraw ma sana ke golnag Jesus. Nap’an ni be par Jesus ni be gifeg ko tebel, me rin’ Maria ban’en u fithik’ e sobut’an’ ni ke dag ni rib t’uf rok fare moon ni ke faseg walagen ko yam’. Ke t’ar reb e melor nib sug ko florida “nrib tolang puluwon.” Rriyul’ ni rib tolang puluwon! Ya 300 denarii puluwon ni aram puluwon e maruwel u reb e duw. Ke puog e re florida ney nga daken lolugen nge ay Jesus. Me faley ay Jesus nga piyan lolugen.​—Mark 14:3; Luke 10:38-42; John 11:38-44; 12:1-3.

14. (a) Uw rogon u wan’ e pi gachalpen e n’en ni rin’ Maria? (b) Uw rogon ni tay Jesus fan Maria?

¹⁴ Ke puwan’ pi gachalpen! Ur gaargad, ‘Mang fan ni kan adbey e re florida nem ni aram rogon?.’ Ma Judas, e ke mithag e lem rok me weliy u morngaagen e ayuw ni ngan pi’ ko piin nib t’uf ban’en ni gaar: “Mang fan nda ni pi’ e re florida nem nchuway’ ndalip miriay e dollar puluwon mi ni wereg u pa’ e piin ni gafgow?” De yog Maria ban’en. Machane yog Jesus ko pi gachalpen ni gaar: “Mu digeyed e cha’ nir. Mang fan ni gimed be kirebnag laniyan’? Ya n’en ni ke rin’ e cha’ nir ngog e rib fel’ [ni bbugithin nib puluw ko ka·losʹ] . . . Re pin ney e ke rin’ ngog urngin e tin nrayog rok; ke puog e florida nga dakenag ni aram e ke ngongliy rogon e dowef rog u m’on ko gum’eyag. Ere mu ted fanmed i yan ko re bugithin ney! Demtrug e gin’en ni yira machibnag e Thin nib Fel’ ni yib rok Got riy u gubin yang u roy u fayleng, ma yira weliy murung’agen e n’en ni ke rin’ e re pin ney, ni fan e nge puguran e re pin ney ngan’uy.” Dabi siy ni ke gapas laniyan’ Maria ko pi thin ney nib fel’ ni yog Jesus!​—Mark 14:4-9; John 12:4-8.

15. Mang fan ni kan k’aring laniyan’ Jesus ko n’en ni rin’ Maria, me ere mang e gad be fil u morngaagen e pigpig ko yafas ni polo’?

¹⁵ N’en ni rin’ Maria e ke k’aring gum’ercha’en Jesus. Ke lemnag ni ke rin’ ban’en ni rib fel’ ni ngan nog e sorok ngak. Ma puluwon fare taw’ath e gathi aram e n’en nib baga’ fan u wan’ Jesus ya n’en nib baga’ fan e “ke rin’ urngin e tin nrayog rok.” Ke rin’ ban’en ko ngiyal’ nrayog me pi’ e n’en nrayog ni nge pi’. Yu ken e Bible e ma piliyeg e pi thin ney ni gaar, “Ke rin’ urngin ban’en nrayog rok,” ara, “Ke rin’ urngin ban’en nrayog rok u gelngin.” (An American Translation; The Jerusalem Bible) Ke pi’ Maria ban’en u polo’ i yafas rok ya ke pi’ e tin nth’abi fel’ nrayog rok. Aram rogon e pigpig ko yafas ni polo’.

“L’agruw Chi Kobre’ Nrow” rok be’ ni Ppin ni Kem’ Figirngin

16. (a) Ke diin me yaliy Jesus reb e ppin nib gafgow ni kem’ figirngin ni be yin’ e salpiy nga lan tafen e salpiy? (b) Uw fene tolang puluwon e chi kobre nrow ko fare ppin ni kem’ figirngin?

¹⁶ In e rran nga tomren u nap’an e Nisan 11, me par Jesus u lan fare tempel nib n’uw nap’an ya kan togopuluw ngak me pi’ e fulweg ko boch e deer u morngaagen e tax, nge fas ko yam’, nge yugu boch ban’en. Ke puwan’ ko pi tamachib ko motochiyel nge pi Farise ya “kar felan’gad u puluwon e piin ni ppin ni ke yim’ figirngirad ya yad be lag e naun rorad.” (Mark 12:40) Ma aram me par Jesus nga but’ u gin ni ka nog fare Veranda ko Ppin ngay ya aram e gin ni bay 13 tafen e salpiy riy. Ke par boch ni be yaliy e girdi’ ni be yin’ e salpiy nga lan. Ma boor e piin ni pire’ salpiyan ni be yin’ e salpiy ngay ni pire’, ma boch i yad e be lemnag nib sororad ni bochan, ma yad be uf. (Mu taarebnag ko Matthew 6:2.) Nge mu’ me sap owchen Jesus nga reb e ppin. Yugu be’ e dabi lemnag nib lingagil e re ppin nem nge salpiy ni pi’. Machane rayog ku Jesus ni nge poy gum’ercha’en e girdi’, me ere ke nang ni ir “be’ ni ppin nib gafgow ya ke yim’ figirngin.” Miki nang ko ri in e salpiy ni ke pi’​—“l’agruw chi kobre’ nrow nib achig.”b​—Mark 12:41, 42.

17. Uw rogon u wan’ Jesus e n’en ni pi’ fare ppin ni kem’ figirngin, ma mang e gad be fil ko re n’ey u morngaagen e n’en ni ngan pi’ ku Got?

¹⁷ I pining Jesus pi gachalpen ngar bad ngak, ya ba adag ni ngar guyed e n’en ni be n’en ni nge fil ngorad. Gaar Jesus, “Boor e salpiy ni ke yin’ ko tin ni ke yin’ urngin e girdi’ ni yad be yin’ e salpiy nga lan fare tafen e salpiy.” Ke yog ni boor e salpiy ni ke yin’ ko tin ni ke yin’ urngin e girdi’. Ya ke pi’ “urngin e chi salpiy ni ba’ rok”​—tin ni ka bay e salpiy rok. Ma bochan ni ke rin’ e re n’em ma ke tay ir nga pa’ Jehovah. Ere kan lingagilnag e re ppin nem ya ngan fil rok rogon ni ngan pi’ ban’en ku Got ma taw’ath ni pi’ e rib sobut’ puluwon. Machane u p’eowchen Got ma rib tolang puluwon!​—Mark 12:43, 44; James 1:27.

Ngan Fil Ban’en Rok Jehovah ko Uw Rogon u Wan’ e Pigpig ko Yafas ni Polo’

18. Mang e gad be fil ko ngongol rok Jesus ngak e gali ppin ney?

¹⁸ Rogon ni ngongol Jesus ngak e gali ppin ney, e ma fil ban’en ngodad u morngaagen rogon u wan’ Jehovah e pigpig ko yafas ni polo’. (John 5:19) De taarebnag Jesus fare ppin ni kem’ figirngin ku Maria. Taareb rogon u wan’ fene ga’ fan fa l’agruw chi salpiy rok nge “florida nib tolang puluwon” rok Maria. Yow l’agruw e ur piew e n’en th’abi fel’ nrayog rorow, me ere baga’ fan u wan’ Got. Ere faanra ga be lemnag ni dariy fam ya dabiyog ni ngam rin’ urngin ban’en ni ga ba adag ko pigpig ku Got, ma dabi mulan’um. Ya ma felan’ Jehovah ko tin th’abi fel’ ni rayog ni ngam pi’ ngak. Dab mu pag talin ni Jehovah e “ma guy e n’en ni bay u gum’ercha’en e girdi’,” me ere manang e n’en ni ga ba adag ni ngam rin’.​—1 Samuel 16:7.

19. Susun mang fan ndabda turguyed e kireb ko girdi’ ko pigpig ni yad be tay ku Got?

¹⁹ Rogon u wan’ Jehovah e pigpig ko yafas ni polo’ e susun ni nge suruy laniyan’dad u rogon ni ra bagadad ma ma lemnag bagadad nge rogon ni gad ma ngongol ngodad. Dariy e t’ufeg riy ni ngan thibthibnag e athamgil ni be tay boch e girdi’ ara ngan taarebnag e pigpig ni be tay be’ ku be’! Bay e kireban’ riy ya ke yoloy reb e Kristiano ni ppin ni gaar: “Yu ngiyal’ ma bay boch e girdi’ ni ma lemnag ni faanra gathi gur e pioneer ma aram e dariy fam. Bay boch i gadad ni gad ma athamgil ni ‘ke mus’ ni gad e publisher machane kub t’uf ni ngan tay fadad.” Dabda paged talin ni dariy rogodad ni ngad turguyed ko uw rogon e pigpig ni be tay e Kristiano ko be rin’ u yafas rok ni polo’ fa danga’. (Roma 14:10-12) Ma chaariy Jehovah e pigpig ko yafas ni polo’ ko ra reb fa bokum milyon e publisher nib yul’yul’, ma susun ni ku er rogodad.

20. Susun mang e ngad lemnaged u morngaagen e pi walagdad?

²⁰ Machane uw rogon nfaanra be m’ug riy ni boch e girdi’ e buch uw ban’en ni yad be rin’ ko machib ko tin nrayog rorad? Faanra ke buch uw e maruwel ni be tay be’ ko machib ma aram ma rayog ni nge lemnag e piin piilal ni ba t’uf ni ngan ayuweg e cha’ nem ara ngan pi’ e athamgil nga laniyan’. Maku thingar dabda paged talin ni boch e girdi’ ma pigpig ko yafas rorad ni polo’ e bpuluw ko fa l’agruw e chi kobre nrow ko fare ppin ni kem’ figirngin ma gathi fare florida nib tolang puluwon rok Maria. Ffel’ ni ngad lemnaged ni pi walagdad ni pumoon nge ppin e ba t’uf Jehovah rorad ma aram e ra k’aringrad ni ngar rin’ed urngin ban’en nrayog rorad​—ma gathi tin th’abi lich ban’en nrayog. Dabi siy ni dariy reb e tapigpig rok Jehovah ni ra turguy ni nge rin’ buch uw ban’en ko tin rayog rok ko pigpig ku Got!​—1 Korinth 13:4, 7.

21. Mang maruwel ni be lek boor e girdi’, ma mang boch e deer ni sum?

²¹ Machane boor e girdi’ rok Got ma pigpig ko yafas rorad ni polo’ e ba muun ngay ni ngan un ko reb e maruwel ni rib fel’ e taw’ath riy​—ni aram e maruwel ko pioneer. Mang boch e flaab ni ma yib ngorad riy? Ma uw rogon e pi arodad ni dawori yog ni ngad uned ko pioneer​—uw rogon nrayog ni ngad daged ni gad ba passig ni bod e pioneer? Bin migid e article e ra pi’ e fulweg ko pi deer ney.

[Boch e Thin nra Tamilangnag Murung’agen]

Uw Rogon ni Ga Ra Fulweg?

◻ Uw rogon ni ngan pigpig ku Jehovah ko yafas ni polo’?

◻ Uw rogon ni be dag fare fanathin ni bay ko 1 Korinth 12:14-26 ni der taarebnagdad Jehovah ko yugu boch e girdi’?

◻ Mang e gad be fil u morngaagen e pigpig ko yafas ni polo’ ko n’en ni yog Jesus u morngaagen fare florida rok Maria nib tolang puluwon nge fagal chi kobre rok fare ppin ni kem’ figirngin?

◻ Susun uw rogon ni gad ra lemnagdad ni bochan rogon e pigpig ko yafas ni polo’ u wan’ Jehovah?

[Sasing ko page 10]

I pi’ Maria e tin th’abi fel’ ni ba’ rok, me tay e florida nga daken Jesus ko gapgep ni “rib tolang puluwon”

[Sasing ko page 11]

Fa l’agruw chi kobre nrow rok fare ppin ni ke yim’ figirngin​—ni ke chugur ni dariy puluwon machane rib tolang puluwon u p’eowchen Jehovah