Jehovah, Reb E Got Ni “Ba Gur Ni Nge N’ag Fan”

“Jehovah, i gur e gab manigil ya gab gur ni ngam n’ag fan e kireb rok e girdi’.”​—PSALM 86:5, New World Translation.

1. Mang fan ni fene tomal laniyan’ David ni Pilung, ma uw rogon ni kan fl’eg laniyan’?

MANANG David ni pilung nu Israel ko uw fene tomal laniyan’ be’ ni ke kireb e nangan’ rok. Ya i yol ni gaar: “Oloboch rog e ke pag daken lolugeg; bod rogon ba gilab ni kaygi tomal ngog. Kug gamig nga malngin ni da kug thamiy; kug tolul ma be gel’gel’ gum’ercha’eg.” (Psalm 38:4, 8) Machane kan fl’eg laniyan’ David. Ya manang ni yugu aram rogon ni ma fanenikay Jehovah e denen ni ke ngongliy be’, machane dabi fanenikay Jehovah fa en ni ke denen​—ni faanra riyul’ ni ke kalngan’ me pi’ keru’ ko kireb rok. (Psalm 32:5; 103:3) Ke mich u wan’ David ni mm’agan’ Jehovah ngay ni nge runguy e piin ni kar k’algadngan’rad ko kireb rorad mi gaar: “Jehovah, i gur e gab manigil ya gab gur ni ngam n’ag fan e kireb rok e girdi’.”​—Psalm 86:5.

2, 3. (a) Nap’an ni ngad denengad, mang ni gad ma fek, ma uw rogon nra fel’ rogodad riy? (b) Mang lem nrayog ni nge yib ngak be’ ni kaygi tomal malngin e nangan’ rok? (c) Mang e be yog e Thin nu Bible nib m’agan’ Jehovah ngay ni nge n’ag fan e denen rodad?

² Ku er rogon e ngiyal’ ni gad ma denen ma gad ra fek malngin e nangan’ nib kireb. Aram rogon gubin e girdi’ ni ra kireban’rad ko kireb ni kar ngongliyed, ni mus nra fel’ rogorad riy. Rayog ni nge mithmithegdad ni ngad yal’uweged e oloboch rodad. Machane boch e Kristiano e kaygi tomal ko nangan’ rorad. Ya sana be pufthinnagrad gum’ercha’rad ma yad ra lemnag ni dabi n’ag Got fan e kireb rorad ndemtrug ni feni gel ni kar kalgadngan’rad. Nap’an ni be lemnag reb e walag ni ppin u morngaagen e oloboch rok, me yog ni gaar: “Kari gafgow lanin’ug ko ngiyal’ ni kug lemnag ni sana dabki t’uf Jehovah rog.” Mus ko ngiyal’ u tomren ni ke kalngan’ me fol ko fonow ni ke pi’ e piin ni piilal ko ulung ngak, me par ni be lemnag ni dariy rogon ni nge n’ag Got fan e kireb rok. Ke weliy ni gaar: “Dariy reb e rran ni ke yan ni da gu wenig ngak Jehovah ni nge n’ag fan e denen rog.” Faanra kaygi tomal ko nangan’ rodad, ma ra guy Satan rogon ni nge n’igin ni nge mulan’dad me n’igindad ngad lemnaged ni dariy rogodad ni ngad pigpiggad ku Jehovah.​—2 Korinth 2:5-7, 11.

³ Machane gathi er rogon e lem rok Jehovah! Ya be tamilangnag e Thin Rok ni faanra riyul’ ni kad kalgadngan’dad ma mm’agan’ Jehovah ni nge n’ag fan e kireb rodad me dag ni ke runguyey. (Proverbs 28:13) Ere faanra kaa mu lemnag ni dabkiyog ni nge n’ag Got fan e kireb rom, ma ba t’uf ni nge tamilang iyan u wan’um ko mang fan ni ma n’ag Got fan e denen ma uw rogon ni ma rin’.

Mang Fan ni Jehovah e “Ba Gur ni Nge N’ag Fan”?

4. Mang e manang Jehovah morngaagen e n’en nni ngongliydad ngay, me ere uw rogon ni ma ngongol ngodad?

⁴ Be weliy e thin nu Bible ni gaar: “Rogon feni mal’af thilin e ngek nge ngal e aram rogon nra chuweg e denen rodad nge mal’afnag rodad. Rogon feni gol ba matam ngak pi fak e aram rogon feni gol Jehovah ngak e piin ni yad be par ni bay madgun u wan’rad.” Mang fan ni aram feni gol Jehovah ngodad? Fa bin migid e verse e be fulweg ni gaar: “Manang e n’en nni ngongliydad ngay ma manang ni gadad e fiyath.” (Psalm 103:12-14) Arrogon, dabi pag Jehovah talin ni gad e girdi’ nni sunmiy ko fiyath, ma manang ni bay e meewar rodad, ma gad ma oloboch ya gathi gad ba flont. Fare bugithin ni manang e “n’en nni ngongliydad ngay” e be puguran ngodad ni Jehovah e bod e en ni ma ma’th’ib ma gadad bod e th’ib ni ke ngongliy.a (Jeremiah 18:2-6) Fa en ni ma ma’th’ib e ma chichiiy pa’ ko th’ib machane gathi kaygi gel ya manang e n’en nni ngongliy ngay. Ere ku er rogon Jehovah fa En ni Ma Ma’th’ib ni ma runguydad ya manang ni gad mmeewar ya gadad e tadenen.​—Mu taarebnag ko 2 Korinth 4:7.

5. Mang ni be weliy e babyor ni Roma u morngaagen gelngin e denen?

⁵ Manang Jehovah gelngin e denen. Be weliy e Bible ni ba gel e denen ma be gagiyegnag e girdi’. Uw fene gel e gagiyeg ko denen? U lan e babyor ni Roma me weliy apostal Paul e pi thin nib tamilang ni: Gad “ba’ u tan gelngin e denen,” ni bod e salthaw ni bay u tan pa’ e ga’ rok (Roma 3:9); ke “gagiyegnag” urngin e girdi’ u fayleng ni bod e pilung (Roma 5:21); ma “be par u fithik’dad” (Roma 7:17, 20); ma ba’ e “motochiyel” riy ni be maruwel u fithik’dad, ya be guy rogon ni nge gagiyegnagdad. (Roma 7:23, 25) Rib mo’maw’ e re cham ney ni thingar da togopuluwgad nga gelngin e denen ni bay u fithik’ dowdad nde flont!​—Roma 7:21, 24.

6. Uw rogon u wan’ Jehovah e piin ni ke kalngan’rad ko kireb rorad ma yad be wenig ngak ni nge runguyrad?

⁶ Ere manang Got ni ma runguydad ni dabiyog ni ngad folgad rok u gubin ban’en ni yugu demtrug rogon ni ri baadag ni nge rin’ gum’ercha’dad. (1 Kings 8:46) Ke micheg Got ni faan gad ra wenig ngak ni nge runguydad ni bod e chitamangiy ma kad kalgadngan’dad ma ra n’ag fan e kireb rodad. Yog David ni en ni yoloy e psalm ni gaar; “Got, maligach rog ngom e kalngan’ ni kug tay; ya be’ ni ke kalngan’ nge fol rom e dab mu n’ag.” (Psalm 51:17) Dabki pag Jehovah be’ ni ke mulan’ ara kaygi’ tomal e nangan’ rok. Rib manigil e pi thin ney ni ke tamilangnag ni be par Jehovah ni ba gur ni nge n’ag fan e kireb rok e girdi’!

7. Mang fan ndabiyog ni ngad lemnaged nra runguydad Got u gubin ban’en?

⁷ Ere rayog ni ngad taweygad ngay ni ngad ngongliyed e denen ni bochan e runguy rok Got ma bochan e gathi gad ba flont? Danga’! Dabi runguy Jehovah e girdi’ ni be gowa’ ke kalngan’. Runguy rok e bay e gin ni ra mus riy. Dabki n’ag fan e kireb rok e piin ni kar dugliyed ni nga ur denengad ma dabra kalgadngan’rad. (Hebrews 10:26-31) Machane faan ra guy Got be’ ni ke “mulan’” ma ra “bung rogon ni nge n’ag fan” e kireb rok. (Proverbs 17:3) Ngad lemnaged boch e thin ni bay u Bible ni be tamilangnag morngaagen fene mudugil Got ni nge n’ag fan e denen.

Uw Fene Mudugil Nra N’ag Jehovah Fan e Denen?

8. Mang e ma rin’ Jehovah ko ngiyal’ ni nge n’ag fan e denen rodad, me ere uw rogon u wan’dad?

⁸ Yog David ni Pilung ni ke kalngan’ ni gaar: “Ma aram mu gu weliy e denen rog ngom, dagu mithag rom e tin nib kireb ni kug rin’. Gu turguy u wan’ug ni nggu weliy e pi denen rog nem ngom Jehovah. Ma ga n’ag fan urngin e kireb rog.” (Psalm 32:5) Fare bugithin ni “n’ag fan” [pardon] e ba sor fan nga reb e thin nu Hebrew ni be yip’ fan e “ngan chibiy,” ara “ngan fek, ara ngan “dunubiy.” Sor fan fare thin ni kan yoloy u roy ko ‘ngan chuweg e lem nib kireb.’ Ere Jehovah e ke chibiy e pi denen rok David me dunubiy nga bang. (Mu taarebnag ko Levitikus 16:20-22.) Dariy e maruwar riy ni ke baud laniyan’ David riy. (Mu taarebnag ko Psalm 32:3.) Ku er rogon nrayog ni nge mudugil u wan’dad nra n’ag Got fan e denen rodad ni bochan e kad maruweliyed e michan’ rodad ko biyul’ ni tay Jesus Kristus. (Matthew 20:28; mu taarebnag ko Isaiah 53:12.) Ere piin ni ke chibiy Jehovah e denen rorad me chaariy nga bang e de t’uf ni ngar pired nib tomal lanin’rad ko denen ni kar ngongliyed kafram.

9. Mang fan e thin rok Jesus: “Ma ga n’ag fan u wan’um e kireb ni ke rin’ boch e girdi’ ngomad”?

⁹ I machibnag Jesus morngaagen e par u thilin e piin ni ma pi’ e salpiy nge piin ni ma tay e malfith ni fan ni nge tamilang rogon ni ma n’ag Jehovah fan e denen. Ya amu lemnag ni yog Jesus ngodad ni ngad meybilgad: “Ma ga n’ag fan u wan’um e kireb ni ke rin’ boch e girdi’ ngomad.” (Matthew 6:12) Ere ke taarebnag Jesus e “denen” ko “malfith.” (Luke 11:4) Faan gad ra denen, ma kad manged e “girdi’ ni kad ted malfith rodad” ngak Jehovah. Fare bugithin nthin nu Greece ni “n’ag fan” [forgive] e sor fan ko “ngan pag, ara nge mulan’uy ko reb e malfith ni kan tay, ya dabni tay chilen ni ngan sulweg.” Ere faan ra n’ag Jehovah fan e denen rodad ma be pag e malfith ni susun ni ngad sulweged ngak. Ere piin ni ke kalngan’rad e rayog ni nge falfalan’rad ngay. Dabi yog Jehovah nthingari sulweg e malfith ni faanra ke n’ag!​—Psalm 32:1, 2; mu taarebnag ko Matthew 18:23-35.

10, 11. (a) Mang fan e pi thin ni ‘nge yog ni chuweg e denen romed’ ni bay u Acts 3:19? (b) Uw rogon ni ke tamilangnag ni mmus rogon ni ma n’ag Jehovah fan e denen?

¹⁰ U Acts 3:19, ma bay mit e thin ni be tamilangnag rogon ni ma n’ag Got fan e denen ni be gaar: “Ere mu kalgadngan’med mi gimed pi’ keru’med ko denen mi gimed chel ngak Got, nge yog ni chuweg e denen romed.” Ke yib e thin ni ‘chuweg’ ko reb e thin nu Greece ni be yip’ fan ni ngan “thang, chuweg, ara gothey.” Ke lemnag boch e scholar ni bod rogon ni kan thang e yol. Uw rogon nrayog ni ngan rin’? Ya kan ngongliy awtan kakrom ko carbon, nge gum, nge ran. De n’uw nap’an u tomren ni ke rin’ be’ ban’en ko re awtan nem ma rayog ni nge fek e mad nib garda’ me faley me m’ay awtan.

¹¹ Aram e ke tamilangnag ni mmus rogon ni ma n’ag Jehovah fan e denen. Faani n’ag fan e denen rodad ma bod rogon ni ke fek e mad nge faley. De t’uf ni ngad tamdaggad nra sul e denen rodad nga laniyan’ nga m’on ya be tamilangnag e Bible u morngaagen e runguy rok Jehovah ni rib manigil: Faani n’ag fan e denen, ma dabki lemnag!

“Dab Ku Gu Lemnag e Kireb Rorad ni Kar Ngongliyed”

12. Faani yog e thin nu Bible ni dabi lemnag Jehovah e denen rodad, ma sor fan ni dabiyog ni nge sul nga laniyan’? Mang fan ni aram rogon e fulweg rom?

¹² U daken e profet ni Jeremiah me micheg Jehovah morngaagen e piin ni yad girdien fare m’ag nib biech ni ke gaar: “Bay gu n’ag fan e denen rorad u wan’ug ma dab ku gu lemnag e kireb ni kar ngongliyed.” (Jeremiah 31:34) Ere faanra n’ag Jehovah fan e denen ma dabiyog ni nge sul e denen nga laniyan’ fa? Danga’ gathi aram rogon. Be weliy e Bible u morngaagen boor e girdi’ ni ke n’ag Jehovah fan e denen rorad, nib muun David ngay. (2 Samuel 11:1-17; 12:1-13) Ba gagiyel ni manang Jehovah e oloboch ni kar ngongliyed ma susun ni nge tamilang u wan’dad ngad nanged. Kan yoloy e denen ni kar ngongliyed nga lan e Bible nib muun ngay rogon ni kar kalgadngan’rad nge rogon ni ke n’ag God fan e denen rorad ni fan ni nge fel’ rogodad riy. (Roma 15:4) Ere mang fan e thin nu Bible ni be yog ni Jehovah e dab ki “lemnag” e pi denen ni ke ngongliy e girdi’ ni ke n’ag fan?

13. (a) Mang fan fapi thin ni Hebrew ni kan piliyeg ni “ku gu lemnag”? (b) Mang e be yog Jehovah ngodad faani yog, “Dab ku gu lemnag e denen rorad”?

¹³ Fan fapi thin ni Hebrew ni kan piliyeg ni “ku gu lemnag” e gathi ke mus ni ngan lemnag e tin ni buch kafram. Be weliy e babyor ni Theological Wordbook of the Old Testament, nib muun ngay ni “ngan rin’ ban’en ni ngan yal’uweg.” Ere ra ngan “lemnag” e denen ma ba l’ag ngay ni ngan rin’ ban’en ni ngan yal’uweg e piin ni tadenen. Nap’an ni yog Hosea ni profet e thin u morngaagen piyu Israel ni gaar: “Ra lemnag [Jehovah] e pi oloboch rorad,” me sor fan ngay nra pufthinnagrad Jehovah ni bochan ni dar kalgadngan’rad ko kireb rorad. Mi ki gaar: “Ma ra tiyan’ ko denen rorad.” (Hosea 9:9) Machane faani yog Jehovah, “Dab ku gu lemnag e denen rorad,” ma be micheg ni faani n’ag fan e denen rok be’ ni ke kalngan’, ma dabi pufthinnag e pi denen rok u ba ngiyal’ nga m’on. (Ezekiel 18:21, 22) Ere ra pag Got talin e kireb rodad ma dabi puguran ngodad e denen rodad biyay ni fan ni nge pufthinnagdad. Jehovah e ke dag rogon nib fel’ ngodad ma rayog ni ngad folwokgad rok ngad ngongolgad ni aram rogon ngak yugu boch e girdi’. Faanra sum e magawon, ma mmanigil ni dab ni sul nga daken e oloboch ni kan n’ag fan kafram.

Uw Rogon Wenegan e Denen Rodad?

14. Faani n’ag fan e denen rok be’ ni ke kalngan’ ma mang fan ni dabiyog ni nge siyeg wenegan e kireb ni ke ngongliy?

¹⁴ Ere mang, dabi yib wenegan e kireb ngak e girdi’ ni bochan ni be par Jehovah ni ba gur ni nge n’ag fan e denen fa? Ri danga’. Ya dabiyog ni ngad denengad ma ngad siyeged wenegan riy. Ya i yoloy Paul ni gaar: “Dabmu banniged gimed, ya dariy be’ nrayog ni nge bannag Got. Ra be’ ma mit i n’en ni yung e ir e ra t’ar wom’engin. (Galatia 6:7) Ra yog ni nge aw wenegan e ngongol nib kireb rodad ngodad, machane dabi n’igin Jehovah ni nge yib e magawon ngodad u tomren ni ke n’ag fan e denen rodad. Faanra sum e magawon ma susun ni nge dabi lemnag e Kristiano, ‘Sana be gechignageg Jehovah ko denen ni kug ngongliy kafram.’ (Mu taarebnag ko James 1:13.) Machane ku dabi siyeg Jehovah wenegan e ngongol rodad ngodad. Ya ma yib wenegan e denen ngak e girdi’ ma dabi yororiyrad Jehovah ko​—dar ko mabgol, diyen ni dan lemnag, m’ar ni tomal, nge m’ay e pagan’ ara dabni tay fan. Amu lemnag ni yugu aram rogon ni ke n’ag fan e kireb ni ke ngongliy David ngak Bath-sheba nge Uriah, machane de yorornag Jehovah David ko wenegan ni yib ngak u tomren.​—2 Samuel 12:9-14.

15, 16. Uw rogon ni ke fel’ rogon e en ni kan iring ban’en rok nge faanem ni ke ngongliy e kireb ko motochiyel ko Levitikus 6:1-7?

¹⁵ Yu ngiyal’ ma rayog ni nge yib mit wenegan e denen ngodad. Ya amu lemnag e thin ko Levitikus guruy ni 6. Be weliy e Motochiyel ni Pi’ Moses u morngaagen e ngiyal’ nra ngongliy be’ e ngongol nrib kireb me iring ban’en rok piyu Israel u fithik’ e yargel ara nge bannagrad me fek ban’en rorad. Ma ra yog faanem ni gathi kireb e rok, me mus ni nge l’ifith l’igin me micheg ni de rin’. Aram e magawon ko l’agruw ni’ ni bagayow me yog ban’en machane dariy e mich riy. Munmun ma ke kireb e nangan’ rok faanem ni ke ngongliy e kireb me tamilangnag e denen rok. Ra nge n’ag Got fan e denen rok ma ba t’uf ni nge rin’ dalip ban’en: thingari sulweg e n’en ni ke iring, me pi’ puluwon e baking ni 20 percent, ma ra pi’ reb e kaming ni pumoon ni maligach ngak Jehovah. Ma aram me weliy e motochiyel: “Thingari wenig e prist nga p’eowchen Jehovah ni fan ngak faanem, ma aram ma thingari n’ag fan e denen rok.”​—Levitikus 6:1-7; mu taarebnag ko Matthew 5:23, 24.

¹⁶ Re motochiyel nib runguy ney e yib rok Got. Ke fel’ rogon e en ni kan iring ban’en rok, ya kan sulweg e chugum rok ma dariy e maruwar riy ni ke baud laniyan’ ko ngiyal’ ni ke tamilangnag faanem e kireb rok. Maku, faanem ni ke kireb e nangan’ rok e ke fel’ rogon ko fare motochiyel ya ke mithmitheg ni nge tamilangnag e kireb rok me yal’uweg ir. Dabi siy ni dabi n’ag Got fan e denen rok ni faanra dabun ni nge rin’ e pi n’en ney.

17. Faanra kad kirebnaged laniyan’ e girdi’ ko denen rodad, mang e baadag Jehovah ni ngad rin’ed?

¹⁷ Yugu aram rogon ni gathi gad ba m’ag ko pi Motochiyel ni Pi’ Moses, machane be tamilangnagan’ Jehovah ngodad, nib muun ngay rogon e lem rok ko n’ag fan. (Kolose 2:13, 14) Nap’an ni kad kirebnaged laniyan’ e yugu girdi’ ara kad denengad ngorad, ma ra falfalan’ Jehovah ni faan gad ra athamgil ni ngad ‘yal’uweged e kireb.’ (2 Korinth 7:11) Ba l’ag ngay ni nge tamilang u wan’dad e denen rodad, ma ngad weliyed e kireb rodad, ma ngad weniggad ngak fa en ni kad denengad nib togopuluw ngak. Ma rayog ni ngad weniggad ku Jehovah u daken e maligach ni tay Jesus ni nge biechnag e nangan’ rodad ma ngad pired nib mudugil u wan’dad ni ke n’ag Got fan e denen rodad.​—Hebrews 10:21, 22.

18. Mang gechig nrayog riy ko ngiyal’ nra n’ag Jehovah fan e denen?

¹⁸ Bod e labthir nib t’uf e bitir rok, ma ma llowan’nagdad Jehovah ko ngiyal’ ni nge n’ag fan e denen rodad. (Proverbs 3:11, 12) Faanra rib ubchiya e denen rok e Kristiano, ma rayog ni nge mul e tow’ath rok ni piilal, ministerial servant, ara reb e pioneer. Sana ra kireban’ ngay ni ke mul e tow’ath rok u ba’ ngiyal’ nib ngoch. Machane re gechig ney e de sor fan ngay ni de fel’ faanem u wan’ Jehovah ara de n’ag Jehovah fan e denen rok. Thingar dabda paged talin ni gechig ni yib rok Jehovah e be micheg ni gadad ba t’uf rok. Faan gad ra fol riy ma gad par nib tamilang u wan’dad ni ra fel’ rogodad riy ma ra yog e par ndariy n’umngin nap’an ngodad.​—Hebrews 12:5-11.

19, 20. (a) Faanra kam ngongliy e kireb, mang fan e susun ndabmu dugliy ndabiyog ni nge runguyem Jehovah? (b) Mang ni yira weliy morngaagen ko bin migid e article?

¹⁹ Uw fene fel’ ni ngad nanged nrayog ni ngad pigpiggad ku reb e Got ni “ke bung rogon ni nge n’ag fan e kireb rok e girdi’”! Gathi ke mus ni denen nge oloboch rodad ni ma guy Jehovah. (Psalm 130:3, 4) Manang e n’en ni bay u gum’ercha’dad. Faanra ga be lemnag ni ke m’ing lanin’um ma kam mul ko denen ni kam ngongliy kafram, dabmu dugliy ni dabiyog ni nge runguyem Jehovah. Yugu demtrug e oloboch rom kafram, faanra kam kalngan’um riy, ma kam yal’uweg e kireb rom riy, ma kam wenig ngak Jehovah ni nge n’ag fan e denen rom u daken e racha’ rok Jesus ni m’ap nga but, ma rayog ni nge mudugil u wan’um e thin ko 1 John 1:9: “Faan gadad ra weliy e denen rodad ngak Got ma rayog ni ngad pagedan’dad ngak, ya tin nib mat’aw e ra rin’, ya ra n’ag fan u wan’ e denen rodad me biechnagdad u urngin e kireb ni kad ngongliyed.”

²⁰ Be pi’ e thin ko Bible e fonow ni ngad folwokgad rok Jehovah ma ngad n’aged fan e denen rok yugu boch e girdi’. Machane, uw fene yoor nrayog ni ngad n’aged fan ma ngad paged talin e denen ni ma ngongliy e girdi’ ngodad? Ireram e n’en ni gad ra weliy ni migid.

[Boch e Thin nra Tamilangnag Murung’agen]

Uw Rogon e Fulweg Rom?

◻ Mang fan ni “ba gur [Jehovah] ni nge n’ag fan e denen”?

◻ Uw rogon ni ke tamilangnag e thin nu Bible ni mmus rogon ni ma n’ag Jehovah fan e denen?

◻ Faanra n’ag Jehovah fan e denen rok be’, ma uw rogon ni dabki lemnag e denen rok?

◻ Mang e baadag Jehovah ni ngad rin’ed ko ngiyal’ ni kad kirebnagedan’ e girdi’ ko denen rodad?

[Sasing ko page 24]

Faanra kad kirebnagedan’ e girdi’ ko denen rodad, ma baadag Jehovah ni ngad yal’uweged e kireb