Jehovah e Ir e En Th’abi Fel’ Rogon ni Ma N’ag Fan e Kireb

1. Mang ban’en nib riyul’ ni yoloy Solomon ni Pilung ko Eklesiastes 7:20?

I YOLOY Solomon ni Pilung ni gaar: “Dariy be’ u fayleng ni goo tin nib mat’aw e ma ngongliy ni gubin ngiyal’ ma der ma oloboch.” (Ekl. 7:20, BT) Rib riyul’ e re n’ey, ya gad gubin ni gad bogi tadenen. (1 John 1:8) Ere gad gubin nib t’uf ni nge n’ag Got nge girdi’ fan e denen rodad.

2. Uw rogon u wan’um ni faanra ke n’ag reb e fager rom nrib pach e thin romew fan e kireb rom?

² Dabisiy nra yib ngan’um ba ngiyal’ ni kam kirebnag laniyan’ reb e fager rom nrib pach e thin romew. Ere kam wenig ngak ni bochan e ga baadag ni ngki fel’ thilmew bayay. Mang e mu lemnag u nap’an ni n’ag fan rom? Gur, ke fel’ boch lanin’um, fa? Arrogon, mab mudugil ni kum felfelan’!

3. Mang e gad ra weliy ko re article ney?

³ Gad baadag ni nge mang Jehovah e bin th’abi fel’ e Fager rodad, machane yu ngiyal’ e gad ra yog ara da rin’ed boch ban’en nra kirebnag laniyan’. Ere mang fan nrayog ni nge pagan’dad ni baadag ni nge n’ag fan e kireb rodad? Mang e ba thil u rogon ni ma n’ag Jehovah fan e kireb nge rogon ni gad ma n’ag fan e kireb? Ma bin tomur e, mini’ e rayog ni nge n’ag Got fan e kireb rok?

BA M’AGAN’ JEHOVAH NGAY NI NGE N’AG FAN E KIREB

4. Mang fan nrayog ni nge pagan’dad nib m’agan’ Jehovah ngay ni nge n’ag fan e kireb?

⁴ Be micheg e Thin rok Got ngodad nib m’agan’ Jehovah ngay ni nge n’ag fan e kireb. Nap’an ni be weliy murung’agen ngak Moses u daken e Burey ni Sinai, me non u daken ba engel ni gaar: “I Somol, i Somol e ir fare Got nri ma runguy e girdi’ ma ma kireban’ ngorad, ni gathi mmachreg ni ma yib e puwan’ ngak, ma ma t’ufeg e girdi’ ma ma yul’yul’ ngorad. Tin ni ke yog ngak boor i biyu’ e girdi’ ni bay rin’ ngorad e dabi thil, ma n’ag fan u wan’ e tin ni kan rin’ nde mat’aw, nge tin nib kireb, nge denen.” (Ex. 34:6, 7) Jehovah e ir reb e Got nib gol ma ma runguyey, ma gubin ngiyal’ nib m’agan’ ngay ni nge n’ag fan e kireb rok e piin kar kalgadngan’rad ko denen rorad.​—Neh. 9:17; Ps. 86:15.

5. Mang e ma rin’ Jehovah ni bochan e ri manang rarogodad nrib fel’ rogon nrogon ni be yog e Psalm 103:13, 14?

⁵ Bochan ni Jehovah e Ir e Ke Sunmiydad, ma aram fan ni manang gubin ban’en u rarogodad. Aygum lemnag e re n’ey! Manang Jehovah gubin ban’en u murung’agen gubin e girdi’ u fayleng. (Ps. 139:15-17) Ere rayog ni nge guy gubin i thibngidad ni ke af rok e gallabthir rodad ngodad. Ku manang urngin ban’en ni ke buch u lan e yafos rodad ni ma m’ug u rarogodad. Ere mang e ma rin’ Jehovah ni bochan e ri manang rarogodad nrib fel’ rogon? Re n’ey e ma k’aring ni nge dag e runguy ngodad.​—Ps. 78:38, 39; mu beeg e Psalm 103:13, 14.

6. Uw rogon ni ke dag Jehovah nib m’agan’ ngay ni nge n’ag fan e kireb rodad?

⁶ Ke dag Jehovah nib m’agan’ ngay ni nge n’ag fan e kireb rodad. Manang ni bochan e n’en ni rin’ Adam ni ir e bin som’on e pumoon ni immoy, ma aram fan ni kad pared nga tan gelngin e denen nge yam’. (Rom. 5:12) Dariy ban’en nrayog ni ngad rin’ed ni ngad chuweged gadad ara yugu be’ u tan e biney e buch waathan. (Ps. 49:7-9) Machane Got rodad ni gad ba t’uf rok e ke dag ni be runguydad, ma aram me rin’ ban’en ya nge yag nda chuwgad u tan gelngin e denen nge yam’. Mang e re n’em? Be tamilangnag e John 3:16 ni ke pi’ Fak ni kari maagirag rok ni nge yim’ ni fan ngodad. (Matt. 20:28; Rom. 5:19) Ke yim’ Jesus ni fan ngodad ya nge yag ni chuw urngin e piin yad ra maruweliy e michan’ rorad ngak u tan gelngin e denen nge yam’. (Heb. 2:9) Ba mudugil nri amith laniyan’ Jehovah u nap’an ni guy e yam’ ni tay Fak nrib t’uf rok nib gel e amith nge tamra’ riy! Ere faan gomanga dabun Jehovah ni nge n’ag fan e kireb rodad, mab mudugil ndabi pag Fak ni nge yim’.

7. Mini’ l’agruw e girdi’ ni bay murung’agrow u Bible ni n’ag Jehovah fan e kireb rorow?

⁷ Boor e girdi’ ni bay murung’agrad u Bible ni n’ag Jehovah fan e kireb rorad. (Efe. 4:32) Mini’ bagayad ni be yib ngan’um? Sana ga be lemnag Manasseh ni Pilung. Boor ban’en nrib gel e kireb riy ni rin’ nib togopuluw ngak Jehovah. I liyor ko got ni googsur me k’aring e girdi’ ni ngkur rin’ed e re n’ey. Ki li’ pi fak me pi’rad ni maligach nga boch e got ni googsur. Ki yan i tay ba liyos nga lan e tempel rok Jehovah. Be weliy e Bible murung’agen ni be gaar: “I denen nib gel nib togopuluw ngak Somol ngari k’aring e damumuw ngak.” (2 Kron. 33:2-7, BT) Machane nap’an ni dag Manasseh nriyul’ ni ke kalngan’, ma aram me n’ag Jehovah fan e kireb rok. Ki sulweg bayay ko liw rok ni ir e pilung. (2 Kron. 33:12, 13) Sana ku be yib ngan’um David ni Pilung ni ngongliy boch e denen nib ubchiya’ nib togopuluw ngak Jehovah nib muun ngay nra parew be’ ni gathi mabgol rok miki thang e fan rok be’. Machane nap’an ni weliy e denen rok me dag nriyul’ ni ke kalngan’, ma aram me n’ag Jehovah fan e kireb rok. (2 Sam. 12:9, 10, 13, 14) Arrogon, rayog ni nge pagan’dad nib m’agan’ Jehovah ngay ni nge n’ag fan e kireb rodad. Maku reb e, gad ra guy nrogon ni ma n’ag fan e kireb e ba thil nga rogon ni ma n’ag e girdi’ fan e kireb.

BA THIL ROGON NI MA N’AG JEHOVAH FAN E KIREB

8. Bochan ni Jehovah e ir e bin th’abi fel’ e Tapuf Oloboch, ma mang e ma rin’ nga rogon ni ma n’ag fan e kireb?

⁸ Jehovah e ir e “Tapufthin ko fayleng ni polo’.” (Gen. 18:25) Reb e tapuf oloboch nib manigil e ri manang e motochiyel nib fel’ rogon. Aray rogon Jehovah ni bochan e gathi kemus ni ir e Tapuf Oloboch rodad, ya ku ir e En Ma Pi’ e Motochiyel ngodad. (Jas. 4:12) Dariy be’ ni manang ko mang e ba fel’ nge mang e ba kireb nrib fel’ rogon ni bod Jehovah. Mang e kub t’uf ni nge rin’ reb e tapuf oloboch nib manigil? Ba t’uf ni nge nang gubin ban’en u murung’agen reb e oloboch u m’on ni nge dugliy e n’en ngan rin’ ngay. Ere Jehovah e ir e bin th’abi fel’ e Tapuf Oloboch ni bochan e gubin ban’en ni manang.

9. Mang boch ban’en ni manang Jehovah u m’on ni nge dugliy ko nge n’ag fan e kireb rok be’ fa danga’?

⁹ Jehovah e ba thil ko girdi’ ni yad ma pithig e oloboch ni bochan e gubin ngiyal’ ni manang gubin ban’en u murung’agen ban’en ni ke buch. (Gen. 18:20, 21; Ps. 90:8) Kub thil ko girdi’ ni bochan e gubin ban’en nrayog ni nge guy ara rung’ag. Manang ni rarogon e gallabthir rok be’ ni ke af ngak, nge rogon e chugol nni tay ngak, nge gin ni ilal riy, nge rogon ni ma lem e ma m’ug ko ngongol rok. Ku manang e n’en bay u gum’irchaey. Rib tamilangan’ u fan ni ma rin’ be’ ban’en. Dariy ban’en nrayog ni ngan mithag rok. (Heb. 4:13) Ere nap’an nra n’ag Jehovah fan e kireb rok be’, ma ke rin’ ni bochan e manang urngin ban’en ni ke buch ni bay rogon ngak facha’.

10. Mang fan nrayog ni nga dogned ni gubin ban’en ni ma dugliy Jehovah nib mat’aw? (Deuteronomy 32:4)

¹⁰ Gubin ban’en ni ma dugliy Jehovah nib mat’aw, maku de laniyan’. Der ma n’ag fan e kireb rok be’ ni be yan u rogon yaan facha’, ara urngin ban’en ni bay rok, ara feni ga’ fan, ara rogon e salap rok. (1 Sam. 16:7; Jas. 2:1-4) Dariy be’ nrayog ni nge towasariy ara pi’ puluwon u fithik’ e sasalap ni nge rin’ ban’en. (2 Kron. 19:7) Jehovah e ba thil ya der ma pag e kankanan’ ara kireban’ ni yugu ba pag rogon ni nge gagiyegnag e pi n’en ma dugliy. (Ex. 34:7) Dariy e maruwar riy ni Jehovah e ir e bin th’abi fel’ e Tapuf Oloboch ni bochan e manang urngin ban’en u murung’agdad nge n’en be buch rodad.​—Mu beeg e Deuteronomy 32:4.

11. Uw rogon nib thil rogon ni ma n’ag Jehovah fan e kireb?

¹¹ Piin nra yoloyed e Pi Babyor ko Bible nni Yoloy Nsom’on ni Thin ni Hebrew e ra nanged nib thil rogon ni ma n’ag Jehovah fan e kireb. Yu ngiyal’ e yad ma fanay bbugithin ni Hebrew ni be yog reb e babyor ni “kemus ni yima fanay ni ngan weliy rogon ni ma n’ag Got fan e kireb ko pi tadenen. Danir ma fanay e re bugithin ney ni ngan weliy rogon ni ma n’ag e girdi’ fan e kireb rok yugu boch e girdi’.” Kemus ni yigoo Jehovah e rayog rok ni ngari n’ag fan e kireb rok reb e tadenen ni ke kalngan’. Mang angin ni ma yib u nap’an nra n’ag Jehovah fan e kireb rodad?

12-13. (a) Mang angin nra yib ngak be’ u nap’an nra n’ag Jehovah fan e kireb rok? (b) Nap’an nra n’ag Jehovah fan e kireb rodad, ma uw n’umngin nap’an nra par angin?

¹² Nap’an nra m’agan’dad ngay ni ke n’ag Jehovah fan e kireb rodad, ma aram e ‘ngiyal’ nra yib gelngidad’ ni kub muun ngay ni nge gapas lanin’dad me beech e nangan’ rodad. Rayog ni nge fel’ lanin’dad ni aray rogon ni faanra “Somol” e ir e ke n’ag fan e kireb rodad. (Acts 3:19, 20) Nap’an nra n’ag Jehovah fan e kireb rodad, ma ra sulweg rogon e tha’ u thildad ngki fel’ bayay nge yan i par ni gowa dawor da denengad.

¹³ Nap’an nra n’ag Jehovah fan e kireb rodad, ma dakuriy ba ngiyal’ nra sul nga i weliy ngodad ara gechignagdad ni bochan. (Isa. 43:25; Jer. 31:34) “Rogon feni mal’af thilin e ngek nge ngal” e aram rogon nra chuweg Jehovah e denen rodad.b (Ps. 103:12) Nap’an ni gad ra lemnag rogon nri ma n’ag fan e kireb, ma ri gad ra ngat ngay maku ra k’aringdad ni ngad pininged e magar ngak. (Ps. 130:4) Machane mini’ e rayog ni nge n’ag Jehovah fan e kireb rok?

MINI’ E RA N’AG JEHOVAH FAN E KIREB ROK?

14. Mang e kad filed u rogon ni ma dugliy Jehovah ni nge n’ag fan e kireb?

¹⁴ Kad filed nrogon ni ma dugliy Jehovah ko nge n’ag fan e kireb fa danga’ e gathi be yan u rogon feni war ara feni ubchiya’ e denen ni ke rin’ be’. Kud filed ni ma fanay Jehovah e tamilangan’ rok ni ir e En Ke Sunmiydad, nge En Ma Pi’ e Motochiyel, nge Tapuf Oloboch rodad u nap’an ni be dugliy ko nge n’ag fan e kireb rok be’ fa danga’. Mang boch ban’en ni ma lemnag u m’on ni nge dugliy ko nge n’ag fan e kireb rok be’ fa danga’?

15. Mang reb e ban’en ni ma lemnag Jehovah u m’on ni nge dugliy ko nge n’ag fan e kireb rodad fa danga’ nrogon ni be yog e Luke 12:47, 48?

¹⁵ Reb riy e aram e ma lemnag Jehovah ko faen ke denen e manang ko ba kireb e n’en be rin’ fa danga’. Ireray e n’en ni tamilangnag Jesus ko Luke 12:47, 48. (Mu beeg.) Be’ ni be rin’ ban’en nib kireb ni lem rok maku manang ni n’en be rin’ e de m’agan’ Jehovah ngay e aram e be rin’ reb e denen nib ubchiya’. Ere rayog ni nge dugliy Jehovah ndabi n’ag fan rok. (Mark 3:29; John 9:41) Machane riyul’ ni yu ngiyal’ e gad manang nib kireb e n’en kad rin’ed. Faanra aray rogon, ma gur, ka yira n’ag fan e kireb rodad? Arrogon, ya ka bay ban’en ni ma lemnag Jehovah u m’on ni nge dugliy ko nge n’ag fan e kireb rodad fa danga’.

16. Mang e be yip’ fan ni ngan kalngan’uy? Mang fan nib t’uf ni ngad kalgadngan’dad ni faanra nge n’ag Jehovah fan e denen rodad?

¹⁶ Ku reb e aram e ma lemnag Jehovah ko faen ke denen e rriyul’ ni ke kalngan’ fa danga’. Mang e be yip’ fan ni ngan kalngan’uy? Ra kal be’ ngan’ ma be yip’ fan ni “ke thilyeg rogon e lem rok ara n’en be lemnag ni nge rin’.” Kub muun ngay ni ngari dabuy mi ri kireban’ be’ ko n’en nib kireb ni ke rin’ ara ngari dabuy mi ri kireban’ nde rin’ e n’en nib fel’ nsusun e nge rin’. Be’ ni ke kalngan’ e gathi kemus ni ke kireban’ ko kireb ni ke rin’, ya kki kireban’ ngay ni ke pag e tha’ u thilrow Jehovah ni nge palog me k’aring ni nge rin’ e pi kireb nem. Dab mu pagtalin nrib ubchiya’ e denen ni rin’ Manasseh nge David ni Pilung, machane me n’ag Jehovah fan rorow ni bochan e rriyul’ ni kar kalgowngan’row. (1 Ki. 14:8) Arrogon, ra n’ag Jehovah fan e kireb rodad ni faanra ke guy ni kad kalgadngan’dad. Machane de gaman ni kemus ni nge kireban’dad ko denen ni kad rin’ed, ya thingar ki m’ug ko ngongol rodad.c Ku ireray reb e ban’en ni ma lemnag Jehovah.

17. Mang e be yip’ fan ni nge pi’ be’ keru’ ko kireb rok? Mang nib ga’ fan e re n’ey ni faanra nge dab kud sulod ko kireb ni ud rin’ed kafram? (Isaiah 55:7)

¹⁷ Ku reb e ban’en nib ga’ fan e aram e ma lemnag Jehovah ko ke pi’ be’ keru’ ko kireb rok fa dawor. Ra nge pi’ be’ keru’ ko kireb rok ma be yip’ fan ni nge tal i rin’ e tin nib kireb me tabab i rin’ e n’en nib m’agan’ Jehovah ngay. (Mu beeg e Isaiah 55:7.) Thingar ki thilyeg rogon e lem ni ma tay ya nge yag ni pag e lem rok Jehovah ni nge pow’iy. (Rom. 12:2; Efe. 4:23) Thingar ki dugliy u wan’ ni nge taleg e lem nge ngongol nib kireb ni i rin’ kafram. (Kol. 3:7-10) Bin riyul’ riy e, michan’ rodad ko fare biyul ni pi’ Kristus e aram tapgin ni ma n’ag Jehovah fan e denen rodad me beechnagdad. Nap’an nra guy Jehovah ni gad be athamgil u rogon nrayog rodad ni ngad thilyeged e ngongol rodad, ma aram e ra yibnag angin e re biyul nem ngodad.​—1 John 1:7.

NGE PAGAN’UM NGAY NRA N’AG JEHOVAH FAN E KIREB ROM

18. Mang boch ban’en ni kad weliyed u murung’agen rogon ni ma n’ag Jehovah fan e kireb?

¹⁸ Ngad sulod u daken boch ban’en nib ga’ fan ni kad weliyed. Jehovah e ir e en th’abi fel’ rogon ni Ma N’ag Fan e Kireb u ga’ngin e palpalth’ib. Mang fan nrayog ni nga dogned e re n’ey? Bin som’on e bochan ni gubin ngiyal’ nib m’agan’ ngay ni nge n’ag fan e kireb. Bin migid e manang gubin ban’en u rarogodad, ma ir e en th’abi fel’ ni nge dugliy ko riyul’ ni kad kalgadngan’dad ko kireb rodad fa dawor. Ma bin dalip e nap’an nra n’ag Jehovah fan e kireb rodad ma kari n’ag fan ndakir lemnag ma ke yan i par ni gowa dawor da denengad. Re n’ey e ra ayuwegdad ni nge beech e nangan’ rodad mu kud fel’gad u wan’.

19. Mang fan nrayog ni ngad felfelan’gad ni yugu aram rogon ndawor da flontgad ma ka ra ud denengad?

¹⁹ Riyul’ ni n’umngin nap’an ndawor da flontgad ma ka ra ud denengad. Machane rayog ni nge pi’ e pi thin ni baaray ko Insight on the Scriptures, Volume 2 ko page 771 e athamgil nga lanin’dad ni be gaar: “Ma runguyey Jehovah ma manang nib meewar e pi tapigpig rok. Ere de t’uf ni nga i kireban’rad ni gubin ngiyal’ ni bochan e dawor ra flontgad ma yad ma oloboch. (Ps 103:8-14; 130:3) Faanra yad be athamgil u rogon nrayog rorad ni ngar rin’ed e n’en nib m’agan’ Got ngay, ma rayog ni ngar felfelan’gad. (Fil 4:4-6; 1Jo 3:19-22).” Ri be pi’ e re n’ey e athamgil nga lanin’dad!

20. Mang e gad ra weliy ko bin migid e article?

²⁰ Gad ba felfelan’ nib m’agan’ Jehovah ngay ni nge n’ag fan e denen rodad ni faanra riyul’ ni kad kalgadngan’dad. Machane uw rogon ni ngad folwokgad u rogon ni ma n’ag Jehovah fan e kireb? Mang boch e kanawo’ ni gad ma n’ag fan e kireb riy ni taareb rogon ngak Jehovah, machane mang boch e kanawo’ nib thil? Ma mang nib ga’ fan ni nge tamilangan’dad ko re n’ey? Bin migid e article e ra weliy e fulweg ko pi deer ney.