Mang Fan Ni Ngan Pining E Magar?

THINGARI thiliyeg Harley e maruwel rok ni bochan ni kan sey e niw u keru’, ni immoy ni ir reb e machinist faram ma chiney e be maruwel u ofis. Nap’an ni kan fith ko uw rogon u wan’ e maruwel rok me gaar Harley: “Kug tawrengnag fa binem e maruwel rog ni maruwel ko masin. Machane bin riyul’ riy e kab gel e falfalan’ rog ko maruwel rog e chiney ko fa binem.”

Ke weliy Harley ko mang fan ni ke fel’ laniyan’ ni gaar: “Ya ba fel’ e lem ko girdi’ ni gamad ma maruwel u taabang. Ba thil ko fa binem e maruwel rog, ya ani ga’ rog e chiney nge piin ni gamad be maruwel u taabang e yad ma tay fan e n’en ni gu ma rin’, ma yad ma pining e magar ngog. Aram e n’en nib gel e thil riy ko fa binem e maruwel.” Ke falfalan’ Harley e chiney ko maruwel ya be thamiy ni bay fan ma ba t’uf rok e girdi’.

Ra felan’ be’ ni faan ran pining e magar ngak fa ngan tay fan ko ngiyal’’ ni bay rogon ngak. Ma wenegan e dan tay fan be’ e rib gel e kireb riy ni bod ni yog Shakespeare ni gaar: “I gur ngalan’ e garbeb e mu thoy e nifeng, mu thoy, ya gathi gab kireb ni bod e girdi’ ndar pininged e magar nga ban’en.” Bay e kireban’ riy ya boor e girdi’ e dan gol ngorad.

Mu Ayuw ni nge Dabi Aw ni Dab Mu Pining e Magar

U fayleng e ngiyal’ ney e be lich e girdi’ ni yad ma pining e magar. Susun, i fith be’ ni tayol e deer ni gaar: “Be’ ni ppin ni ra un ko mabgol e bay e tayim rok ni nge pining 200 e girdi’ me yoloy nga babyor, me ere mang fan ndariy e tayim rok ni nge yoloy e babyor ni nge pining e magar ko piin ni kar pied e taw’ath ngorow?” Boor e girdi’ e daan yad ma yog fare bugithin ni “kammagar.” Be yoor e girdi’ ni yad ma m’onegrad ma be buch uw iyan e piin ni ma pining e magar u ban’en. Aram reb e pow ko tin tomren e rran. I ginang apostal Paul ni gaar: “Thingar mu nang u wan’um ni ngiyal’ ni tin tomren e rran e ra yoor e riya’. Ra par e gird’ ni ke mus ni yad be lemnagrad . . . Ma dabra pininged e magar nga ban’en.”​—2 Timothy 3:1, 2, Phillips.

Ma yu ngiyal’ ma kan tay e thin ni kaygi pag rogon ni ka nog e flattery ngay nga lon ni ngan pining e magar. Rogon ni ngan pining e magar e thingari yib u gumer’cha’em ma gathi bochan ni nge yog ban’en ngom. Machane flattery, ara ngan n’uf be’ nib pag rogon e ban’en ni dariy e yul’yul’ riy ma ra rin’ be’ ni bochan ni ba adag ni nge m’on ara nge yog ban’en nib fel’ ngak. (Jude 16) Thin ni aram rogon nib manigil nga wom’engin i l’uguney e ma bannag be’ ma ma sum ko tolangan’uy nge ufanthin. Ere mini’ e ra adag ni ngan nog e thin ni aram rogon ngak ni thin nde yul’yul’? Machane rib fel’ e thin nib yul’yul’ ni ma pining e magar.

Cha’ ni ma pining e magar u ban’en e ba’ angin ni ma yib ngak. Ra fel’ laniyan’ ni bochan ni be pining e magar u gumer’cha’en ma aram e ra par nib falfalan’ mab gapas laniyan’. (Mu taarebnag ko Proverbs 15:13, 15.) Felngin ni ngan pining e magar ngak be’ e rib manigil ma ra ra ayuweg be’ ndabki damumuw ma dabki awan’ ara taliyeg.

“Um Pininged e Magar ngak Got u Lanin’med”

Be yog e Bible ngodad ni ngad athamgilgad nge yog ni ngad pininged e magar nga ban’en u lanin’dad. I yoloy Paul ni gaar: “Demtrug e n’en nra yib ngomed ma gubin ngiyal’ ni ngam pininged e magar ngak Got. Erera’ e tin ni ba adag Got ni ngam rin’ed e piin ni kam manged girdien Kristus Jesus.” (1 Thessalonika 5:18) Me pi’ Paul e fonow ko yu Kolose ni gaar: “Ma gapas ni ma pi’ Kristus nga lanin’dad e nge mang ir e ngi i gagiyegnag lanin’med . . . Ere um pininged e magar ngak Got u lanin’med.” (Kolose 3:15) Bay boor e thin ko Psalms ni be pining e magar u ban’en, ni be dag felngin e magar ni yima pining u gumer’cha’ey e ma yib rok Got. (Psalm 27:4; 75:1) Rib tamilang ni ma felan’ Jehovah u nap’an ni gad ra pining e magar ngak ko pi n’en nib l’ag ko par ko yafas rodad u gubin e rran.

Machane mang boch ban’en ko re fayleng ney ni ma n’igin ni nge mo’maw ni ngad pininged e magar u lanin’dad? Uw rogon nrayog ni ngad daged ni gad ma pining e magar u lanin’dad u gubin e rran? Bin migid e thin e ra pi’ e fulweg ko pi deer ney.