Dabi N’uw Nap’an Ma Ri Ra Puf Rogon Pi Fak Got

“Ya tin ni sunumeg Got e turguy Got ni nge m’ay fan . . . Machane yad be son u fithik’ e l’agan’, ni aram e reb e rran e bay ra pired ni gathi yad e sib rok e wod, mi yad un ko flaab rok pi fak Got.”—ROMA 8:20, 21.

1. Uw rogon ni bpuluw e maligach ni pi’ Jesus ko fa Rofen e Biyul?

I PI’ Jehovah Fak ni maagirag rok ni nge mang maligach ni fan ko biyul ma aram me mab e yan nga tharmiy ni fan ko fa 144,000 e girdi’ ma nge yog e yafas ni manemus u fayleng ngak e tin ni ka bay e girdi’ nu fayleng. (1 John 2:1, 2) Kada filed ko fa binem e thin ni maligach rok Jesus ni fan ngak fapi Kristiano ni kan dugliyrad e ba taareb rogon ko n’en ni rin’ fare prist nib tolang nu Israel u nap’an ni pi’ e garbaw nib maligach ni fan ko denen rok, nge denen rok chon e tabinaw rok, nge denen rok fare ganong nu Levi ko Rofen e Biyul. Chirofen nem e i pi’ e kaming nib maligach ni fan ko denen rok e tin ni ka bay e girdi’ nu Israel, ma ku arrogon e maligach rok Kristus e ni pi’ ni fan ngak e denen rok e tin ni ka bay e girdi’ nu fayleng. Ba kaming ni kab fas e ni pag nge yan nga bang u daken e ted ni gonapan e be fek i yan e denen rok urngin e girdi’ ni ur fl’eged ko fa binem e duw.a​—Levitikus 16:7-15, 20-22, 26.

2, 3. Mang fan fare thin rok Paul ni bay ko Roma 8:20, 21?

² Tomren ni i weliy Paul e athap rok e girdi’ nra manged “pi fak Got” u tharmiy i gaar: “Urngin e pi n’en ni sunumiy Got e ri yad be sonnag e chirofen ni bayi flaabnag Got pi fak. Ya tin ni sunumeg Got e turguy Got ni nge m’ay fan, ni gathi yad e ra lemniged, machane bochan e Got e lemnag ni nge yodorom. Machane yad be son u fithik’ e l’agan’, ni aram e reb e rran e bay ra pired ni gathi yad e sib rok e wod, mi yad un ko flaab rok pi fak Got.” (Roma 8:14, 17, 19-21) Mang fan e re thin ney?

³ Nap’an ni sum Adam ni chitamangdad ma immoy ni be’ nib flont, ni “fak Got” ir. (Luke 3:38) Bochan e denen rok e ke mang e “sib rok e wod” miki sib urngin e girdi’ nu fayleng. (Roma 5:12) Ke pag Got ni ngan gargeleg e girdi’ nib “m’ay farad” ni bochan e ke af e denen ngorad, machane i pi’ Got e “l’agan’” ngorad u daken “owchen” ni Jesus Kristus. (Genesis 3:15; 22:18; Galatia 3:16) I weliy e Revelation 21:1-4 u morngaagen e ngiyal’ ni “dabku unim’, ma dabki i kireban’uy, ma dabku un yor ma dabku un amith.” Kan micheg e re thin ney ngak e “girdi’ nu fayleng” ere mmich u wan’dad ni ra moy ba yalen e girdi’ nu fayleng nib biech ni yad be par u tan Gil’ilungun Got ma ra biech lanin’rad ma ra fel’ fithik’ i dowef rorad ma ngar pared ni manemus u fayleng ni yad “pi fak Got.” U nap’an e Gagiyeg rok Kristus ni Biyu’ e Duw, bay i puf rogon urngin e girdi’ ni tamafol ma “dabkur pared ni yad e sib rok e wod.” Tomren ni kar micheged ni yad ba yul’yul’ ku Jehovah u tomren fa bin tomur e skeng ma bay ni pithigrad ni manemus ko denen nge yam’. (Revelation 20:7-10) Piin nra moyed u fayleng ko ngiyal’ i n’em e “bay ra flaabgad ni yad pi fak Got.”

Yad Be Pong Ni Be Lungurad, “Moy!”

4. Mang fan fare thin ni “ngan fek fare ran ko yafos nib tow’ath”?

⁴ Ri ba fel’ e n’en ni bay nga m’on ko girdi’ ni yibe athapeg! Aram fan ni ri ba pasig e pi Kristiano ni kan duguliyrad ni yad be weliy morngaagen ngak yugu boch e girdi’! Piin ni kan duguliyrad ni ka yad bay u fayleng ni yad ra mang “leengin” fare Fak e Saf, ni Jesus Kristus e yad be riyul’nag fare thin ko profet ni gaar: “Fare Kan ni Thothup nge fare pin ni nge mabgol e lungurow, “Moy!” Urngin e girdi’ ni yad ra rung’ag e re bugithin ney e thingar ki lungurad, “Moy!” Moy i gur en ni ke yib e belel ngom; ngam fek fare ran ko yafos nib tow’ath ni yira pi’ ngak e en ni ba adag ni nge yog ngak.” (Revelation 21:2, 9; 22:1, 2, 17) Angin e maligach rok Jesus ni biyul’ e gathi ke mus ni bay fan ngak fa 144,000 e girdi’ ni kan duguliyrad. Kan ni thothup rok Got e be maruwel u daken e piin ni yad bay u fayleng piin ni yad fare ppin ni nge un ko mabol ni be lungurad, “Moy.” Yugu demutrug be’ nra rung’ag e re pong nem ma ke yib e belel ngorad ara yad be yim’ ni bochan e tin nib mat’aw ban’en e ku rayog ni ngar uned ko pong ni nge lungurad, “Moy” ma aram rogon ni ra yognag ngak e pi taw’ath rok Jehovah.

5. Ke falfalan’ e Pi Mich Rok Jehovah ya chon mini’ e bay u fithik’rad?

⁵ Rib mich u wan’ e Pi Mich Rok Jehovah e pi taw’ath ni ra yib rok Got u daken Jesus Kristus. (Acts 4:12) Ma yad ba falfalan’ ni bochan e bay u fithik’rad boch e girdi’ ni yad ba yul’yul’ ni yad ba adag ni ngar filed morngaagen ma ngar rin’ed e tin nib m’agan’ Got ngay. Ma ba mab e pi Kingdom Hall rorad ya nge un urngin e piin ni ba adag ni ngar bad e chiney ko “ngiyal’ ko tomur” ngar “feked fare ran ko yafos nib tow’ath ni yira pi’ ngak e en ni ba adag ni nge yog ngak.”​—Daniel 12:4.

Boch Ban’en ni ke Thil u Lan In e Duw

6. Uw rogon ni ke ayuweg e kan ni thothup rok Got e pi tapigpig rok Jehovah yu ngiyal’?

⁶ Ma turguy Got e yu ngiyal’ ni nge riyul’nag e tin nib m’agan’ ngay ma tin ni ma rin’ ni fan ko girdi’ e bay rogon ko fa yu ngiyal’ i n’em ni ke turguy. (Eklesiastes 3:1; Acts 1:7) Yugu aram rogon ni i yib e kan ni thothup rok Got nga daken e pi tapigpig rok ni ur pared u m’on rok Kristus, machane dani fakayrad ni ngar manged pi fak nib spiritual. Machane nap’an Jesus i yib e ngaray e ke taw ko ngiyal’ ni nge fanay Jehovah e kan ni thothup ma nge fakay e piin ni kar ognaged yad ni yad e pumoon nge ppin ma ngar uned ko taw’ath rorad u tharmiy. Ma uw rogon e ngiyal’ ney? Ka re kan ni thothup nem e be maruwel u daken “yugu boch e saf” rok Jesus, machane gathi be pug nga lanin’rad ni ngar athapeged e yan nga tharmiy. (John 10:16) Ke pi’ Got e athap ngak e pi girdi’ ney ni ngar pared u paradis u fayleng, ere yad ma falfalan’ ngay ni ngar ayuweged e tin ni ka bay ko fachi ulung u roy fayleng ni ngar machibgad ko ngiyal’ ney ni dawori m’ay e re m’ag nib kireb ney maku dawori yib e m’ag rok Got nib biech mab mat’aw.​—2 Peter 3:5-13.

7. Mang maruwel ni ke tiyan’ e Piin ni Ma Fil e Bible ngay, machane mang e kar nanged u morngaagen e paradis?

⁷ I tabab Got ni nge “flaabnag pi fak” u nap’an ni i puog e kan ni thothup u nap’an e Pentekost ko 33 C.E., me duguliy e ngiyal’ ni nge m’ay i kunuy fare “Israel rok Got” nib spiritual ni yad 144,000 u gubin. (Hebrews 2:10; Galatia 6:16; Revelation 7:1-8) I un girdien fachi ulung ko mokun girdi’ ko duw ni 1879, ma boor yay ni weliy morngaagen e chi ulung nem u lan e re babyor ney. Maku manang e Piin ni ma Fil e Bible (ni yima pining e Pi Mich Rok Jehovah ngorad e chiney) ni ku be weliy e Bible morngaagen e athap ko yafas ni manemus u fayleng. Fare Watch Tower ko July 1883 e gaar: “Nap’an ni i duguliy Jesus Gil’ilungun, me thang e kireb ma aram e ra paradis e fayleng, . . . ma piin nra moy ko low ko yam’ e ra fasgad ngar pared ko re paradis nem. Ma faan yad ra fol ko pi motochiyel ko fare gil’ilungun ma aram e rayog ni nguur pared ni yad ba fas u lan e paradis.” Munmun me lich iyan e piin nni kunuyrad ngar manged girdien fachi ulung, min tabab i kunguy nga lan e ulung rok Jehovah e piin ni dar athapeged e yan nga tharmiy. Ma ngiyal’ i n’em e i tamilangnag Got nga laniyan’ e pi tapigpig rok ni kan duguliyrad ngar gonopiyed boch ban’en.​—Daniel 12:3; Filippi 2:15; Revelation 14:15, 16.

8. Uw rogon ni kan tamilangnag u morngaagen e athap ko par u fayleng u nap’an e 1930 iyib ngaray?

⁸ Baga’ ni ka nap’an e duw ni 1931 e ke chagil e piin ni yad ma athapeg e par u fayleng ngak e ulung ni Kristiano. Nap’an e re duw nem e i tamilangnag Jehovah ngak e pi Kristiano ni kan duguliyrad ni ka yad bay u fayleng ma ngar nanged fan fare thin u Ezekiel guruy ni 9 ni bay fan e re thin nem ngak e piin ni ra par u fayleng ni yad e piin ntay e pow ngorad ya ngar pared ka yad ba fas u lan e m’ag rok Got nib biech. I tamilang u wan’rad ni pi girdi’ nem ni yad bod e saf e ku yad bod Jonadab (ara Jehonadab) ni ir e fager rok Jehu. (2 Kings 10:15-17) U lan fare duw ni 1934 e i tamilang u wan’rad ni piin ni yad bod e “Jonadab” e thingar ra “ognaged yad” ngak Got. U lan fare duw ni 1935 e ke tamilang u wan’rad ni fare “ulung ni baga’” e yad yugu boch e saf ni yad be athapeg e par u fayleng, ma u m’on ko re duw nem e ur lemnaged ni fare “ulung ni baga’” e yad ba ulung i girdi’ nra un ko yan nga tharmiy nra chaggad ngak fare ulung i girdi’ ni yad “leengin” Kristus u tharmiy. (Revelation 7:4-15; 21:2, 9; Psalm 45:14, 15) Ma baga’ ni ka nap’an fare duw ni 1935 e ke gay girdien fachi ulung e piin ni yad ba yul’yul’ ni yad ba adag ni ngar pared ni manemus u paradis u fayleng.

9. Tomren e 1935 ma mang fan ni ke tal boch e Kristiano ndakur uned ko abich nge garbod u nap’an fare Abich Rok Somol ko Balayal’?

⁹ Tomren fare duw ni 1935 ma boch e Kristiano ni ur uned ko fare abich ko fare flowa nge wain u nap’an e Abich Rok Somol ko Balayal’ e kar talgad i un ko fare flowa nge fare wain. Mang fan? Ya bochan e ka fini tamilang u wan’rad ni yad be athapeg e yafas u fayleng ma gathi yafas u tharmiy. I gaar reb e ppin ntaufenag ko duw ni 1938, “Gathi rib mich u wan’ug ni gu ra un nga tharmiy, ni yugu aram rogon ni un lemnag nib puluw ni nge kay fare flowa nge wain e piin ni yad be machib u gubin e rran ma yad ba pasig ko machib. Ma nap’an fare duw ni 1935 e ke tamilang ni yibe kunuy reb e ulung ni baga’ ni yad be athapeg e par u fayleng ni manemus. Gamad boor ni kug falfalan’gad ni bochan e ke tamilang u wan’mad ni gamad bang ko fare ulung ni baga’, ma aram e kug talgad i kay fare flowa nge wain.” Mus fapi babyor ko Kristiano e ke thil e thin riy. Fapi babyor nfl’eg faram e fan ngak e pi girdi’ rok Jesus ni kan duguliyrad ma ka nap’an e 1935 iyib e ngaray ma fapi Watchtower nge yugu boch e babyor ni fl’eg fare “tapigpig nib yul’yul’” e ni fl’eg ni fan ngak e piin ni kan duguliyrad nge piin ni yad be athapeg e par u fayleng.​—Matthew 24:45-47.

10. Nge diin min tay be’ nga luwan be’ ni kan dugliy ko kan ni thothup ni daki yul’yul’?

¹⁰ Faan manga daki yul’yul’ be’ ko fachi ulung? Ra yib yugu be’ nga luwan, fa? Arrogon e thin rok Paul u mornaagen fare ke gek’iy ni olive ni ba fanathin. (Roma 11:11-32) Faan manga thingar ni thilyeg be’ ni kan duguliy ko kan ni thothup, ma ra pi’ Got lon faanem ngak be’ nib mich u wan’ ma i pigpig ngak Got u fithik’ e yul’yul’ ni bokum e duw.​—Mu taarebnag ko Luke 22:28, 29; 1 Peter 1:6, 7.

Boor Fan ni ngan Pining e Magar u Lanin’uy

11. Mang e be micheg e thin ko James 1:17 ngodad ni yugu demtrug e n’en ni gad be athapeg?

¹¹ Nap’an ni gad ra pigpig ku Jehovah u fithik’ e yul’yul’ ma ra pi’ e tin nib t’uf rodad nge tin nib mat’aw ni gad ba adag. (Psalm 145:16; Luke 1:67-74) Yugu demutrug ko gad be athapeg e tharmiy ara gad be athapeg e par u fayleng, ma bay boor fan ni ngada pininged e magar ngak Got. Gubin ngiyal’ ma ra rin’ e pi n’en ni nge fel’ rogon e piin ni yad ma t’ufeg Got. I yog James ni gaar, “urngin e tin nib fel’ ni be pi’ Got ngodad nge urngin e tow’ath nrib manigil ma be yib u tharmiy ngodad, ni be yib rok Got nga but’, ni ir e sunumiy urngin ban’en ni be gal ramaen u lan e lang.” (James 1:17) Ngada weliyed morngaagen boch e pi taw’ath nge pi flaab ney.

12. Mang fan nrayog ni nga dogned ni ke pi’ Jehovah e athap ni rib fel’ ngak ra reb e tapigpig rok nib yul’yul’?

¹² Ke pi’ Jehovah e athap ngak ra reb e pi tapigpig rok nib yul’yul’. I pining boch i yad ngar uned nga tharmiy. I pi’ e athap ni ra fas e yam’ ngar pared ni manemus u fayleng ngak e pi mich rok ni ur pared u m’on rok Kristus. I mich u wan’ Abraham ni bay ra fas ko yam’ ma i sonnag “fare binaw ni ba taan u but’ ndabi chuw biid” ma re binaw nem e aram Gil’ilungun e tharmiy ma ra par Abraham u tan. (Hebrews 11:10, 17-19) Ku arrogon e ngiyal’ ney ma be pi’ Got e athap ko bokum milyon e girdi’ nrayog ni ngar pared ni manemus u paradis u fayleng. (Luke 23:43; John 17:3) Dabi siy ni urngin e piin ni ke pi’ Jehovah ngorad e athap nrib fel’ ni aram rogon e susun ni ngar ted fan.

13. Mang boch ban’en ni rin’ fare kan ni thothup rok Got u daken e girdi’ rok?

¹³ Ma pi’ Jehovah e kan ni thothup rok nib taw’ath ko girdi’ rok. Pi Kristiano ni yad be athapeg e par u tharmiy e kan dugliyrad ko kan ni thothup. (1 John 2:20; 5:1-4, 18) Machane pi tapigpig rok Got ni be athapeg e par u fayleng e bay e ayuw ko kan ni thothup rorad. Aram rogon Moses ni bay e kan ni thothup rok Jehovah rok, nge ku fa 70 e girdi’ ni kan dugliyrad ngar ayuweged. (Numbers 11:24, 25) Fare kan ni thothup e ke ayuweg Bezalel ya ir e ta ngongliy boch ban’en ni fan ko tabernacle ko piyu Israel. (Exodus 31:1-11) Kan ni thothup rok Got e ke yib nga daken Gideon, nge Jefthah, nge Samson, David, nge Elijah, nge Elisha, nge yugu boch e girdi’. Yugu aram rogon ni dabi un e pi girdi’ ney nga tharmiy, machane ke pow’iyrad e kan ni thothup, ni bod rogon e piin yugu boch e saf rok Jesus ko ngiyal’ ney. Ere gathi bochan ni bay e kan ni thothup rok Got ku be’ ma aram e mich riy ni ra yan nga tharmiy. Machane kan ni thothup rok Jehovah e ma pow’iydad, ma ma ayuwegdad ni ngad machibnaged e girdi’ ma ngad lubeged e pi n’en nib mil fadad ko tirok Got ban’en, ma ma pi’ gelngidad, ma ma k’aringdad ngad ngongliyed e ngongol ko t’ufeg, nge falfalan’, nge gapas, nge gum’an, nge gol, nge ngongol nib fel’ nge michan’ nge sumunguy, nge t’ar laniyan’. (John 16:13; Acts 1:8; 2 Korinth 4:7-10; Galatia 5:22, 23) Gathi susun ni ngad falfalan’gad ko re taw’ath ney ni yib rok Got?

14. Uw rogon ni ma yib angin ngodad ko pi taw’ath rok Got ni tamilangan’uy nge gonop?

¹⁴ Taw’ath ni ma pi’ Got e tamilangan’ nge gonop ma susun ni ngad pininged e magar riy, ndemtrug ko gad be athapeg e par u tharmiy ara fayleng. Tamilangan’ nib puluw u morngaagen Jehovah e ma ayuwegdad ni ngad “mel’eged e tin ni ir e ba th’abi fel’” ma “ud ngongolgad nrogon ni ba adag Jehovah.” (Filippi 1:9-11; Kolose 1:9, 10) Gonop ni yib rok Got e ma ayuwegdad ma ma pow’iydad ko yafas rodad. (Proverbs 4:5-7; Eklesiastes 7:12) Tin riyul’ e tamilangan’ nge gonop e bay ko Thin Rok Got, ma tin ni ka bay girdien fachi ulung e ri yad ba adag e n’en ni be weliy u morngaagen e athap rorad u tharmiy. Machane gathi ke mus ni bochan ni ba t’uf rok be’ e Thin Rok Got ma manang fan nib fel’ rogon ma aram e mich ni ke pi’ Got ni kan pining ni nge yan nga tharmiy. Boch e pumoon ni bod Moses nge Daniel e ur yoloyed yu yang e Bible, machane yira fasegrad ko yam’ mi yad par u fayleng. Ma demtrug ko gad be athapeg e par u tharmiy ara fayleng, ma gad gubin ma yibe pi’ ga’dad u daken fare “tapigpig nib yul’yul’ mab gonop” rok Jehovah. (Matthew 24:45-47) Ri gad ma pining e magar ni bochan e tamilangan’ ni ke yog ngodad!

15. Mang reb e taw’ath rok Got ni rib fel’, ma uw rogon u wan’um?

¹⁵ Maligach ni biyul ni pi’ Jesus e bin th’abi fel’ e taw’ath ni pi’ Got ngodad, ma ma yib angin ngodad riy ndemtrug ko gad be athapeg e par u tharmiy ara fayleng. Got e rib t’uf e girdi’ nu fayleng rok “ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafas ndariy n’umngin nap’an ngorad.” (John 3:16) Ma bochan nib t’uf rok Jesus e girdi’ ma aram me “pi’ e pogofan rok nge biyuliy boor e girdi’ ngay.” (Matthew 20:28) I weliy apostal John ni daken Jesus Kristus e ir e be “n’ag Got fan e denen rodad riy, ni gathi ke mus ni denen rodad [girdien fachi ulung], ya ku er rogon e denen rok urngin e girdi’.” (1 John 2:1, 2) Ere gad gubin ma susun ni ngad pininged e magar ko re taw’ath ney ni rayog e yafas ni manemus ngak e girdi’.b

Ga Ra Un Ngay?

16. Mang ban’en nib ga’ fan ni yira madenomnag u tomren ni ke aw e yal ko April 11, 1998, ma susun mini’ e ra un ngay?

¹⁶ Susun ni ngad pininged e magar ku Got ko maligach ni pi’ ni aram Fak ma aram e ra k’aringdad ngad uned ko pi Kingdom Hall ara yug gin ni ra muulung e Pi Mich Rok Jehovah riy u tomren ni ke aw e yal ko April 11, 1998, ni ngan madenomnag e yam’ ni tay Kristus. Nap’an ni ke tababnag Jesus e re madenom ney ni yad pi apostal rok ko re nep’ i n’em ni ra yim’ me gaar: “Um rin’ed e re n’ey ngi i pugurag ngomed.” (Luke 22:19, 20; Matthew 26:26-30) Tin ni kay bay e piin ni kan dugliyrad ni yad buch uw e yad ra kay fare flowa ndariy e is riy ni be yip’ fan downgin Jesus ndariy e denen riy nge fare wain nib rorow ni be yip’ fan rachaen ni kan puog nga but’ ni fan ko maligach. Kari mus ni pi Kristiano ni kan dugliyrad ko kan ni thothup e yad ra un ko abich ya yigoo yad e kan tayrad nga tan e bin nib biech e m’ag nge fare m’ag ko Gil’ilungun ma kan ni thothup rok Got e mich rorad ni yad ra yan nga tharmiy. Ku ra un bokum milyon e girdi’ ngay mi yad guy e re n’em ma yad be pining e magar riy ya yad ba t’uf rok Got nge Kristus ma aram mar piew e maligach ni ke yognag e yafas ni manemus ko girdi’.​—Roma 6:23.

17. Susun mang e dabda paged talin u morngaagen rogon ni ngan dugliy be’ ko kan ni thothup?

¹⁷ Boch e girdi’ e ra oloboch mi yad lemnag ni yad ra yan nga tharmiy ma aram e lem rorad ya arrogon e machib ko teliw rorad faram, ara yad yad ma lemnag ni aram rogon ni bochan ni ke yim’ be’ nib t’uf rorad, ara ba gel e gafgow rorad u fayleng, ara yad be lemnag ni ke pi’ Jehovah reb e taw’ath nib lingagil ngorad. Machane gad gubin e susun ndabda paged talin ni pi thin ko Bible e der tay chilen ngodad ni ngad uned ko abich nge garbod ko Puguran ni bochan ni ngad pininged e magar ni fan ko maligach ni pi’ Kristus. Maku rogon ni ngan turguy ko mini’ ni ran dugliy ko kan ni thothup e “dariy rogon ko n’en ni ba adag e girdi’ fa n’en ni yad be rin’, ya ke mus ni yigoo Got e bay rogon ngay,” me ir fa En ni ke fakay Jesus ni ir Fak nib spiritual ma ke mus ni 144,000 e girdi’ e ra fakay ngar uned ko flaab rok.​—Roma 9:16; Isaiah 64:8.

18. Mang flaab ni bay nga m’on ko boor e girdi’ ni be pigpig ku Jehovah ko ngiyal’ ney?

¹⁸ Yafas ni manemus u paradis u fayleng e aram e athap ko piin ni be pigpig ku Jehovah ko ngiyal’ ney ni tin tomren e rran. (2 Timothy 3:1-5) Dabki n’uw nap’an ma yad ra un ko falfalan’ ko re paradis ney. Ma ra moy e piin ni pi fak e pilung ni yad ra yarmiy e pi n’en u fayleng u tan e gagiyeg nu tharmiy. (Psalm 45:16) Ra par e girdi’ u fithik’ e gapas ya yad ra fol ko pi motochiyel rok Got mi yad fil e kanawo’ rok Jehovah. (Isaiah 9:6, 7; Revelation 20:12) Boor ban’en ni ran rin’ ya yira dimow naun min suwey e fayleng. (Isaiah 65:17-25) Ma amu lemnag fene falfalan’ e pi tabinaw ni ke fas e girdi’ rorad ko yam’! (John 5:28, 29) Tomren e bin tomur e skeng, ma ra thumur urngin e kireb. (Revelation 20:7-10) Nge mu’ ma ra sug e fayleng ko piin nib flont ni ‘bay ra pired ni gathi yad e sib rok e wod, mi yad un ko flaab rok pi fak Got.’

[Boch e Thin nra Tamilangnag Murung’agen]

Mang e Fulweg Rom?

◻ Mang fan fare thin ni “ngan fek e rran ko yafos nib taw’th”?

◻ Demtrug ko gad be athapeg e par u tharmiy ara fayleng, ma mang fan ni susun ni ngad pininged e magar ku Got riy?

◻ Mang madenom ni susun ni ngad uned ngay u gubin e duw?

◻ Mang e bay nga m’on ko girdi’ rok Jehovah ni yad boor2d?

[Sasing ko page 26]

Bokum milyon e girdi’ e be ‘fek e rran ko yafos nib taw’ath.’ Gur bagayad fa?