I Fek Jehovah Pi Fak Ni Pire’ Nge Thapegrad Ngak

“Rib mat’aw ni muruwliy nge yan Jesus u fithik’ e gafgow nge yan i par nga rogon ni be finey Got, ni fan e nge yog ni fek Jesus pi fak Got ni pire’ i yan nge thapegrad ngak Got ngar uned ngak ko flaab ni ba’ rok.”​—HEBREWS 2:10.

1. Mang fan nrayog ni nge mich u wan’dad ni ra riyul’ e tin nib m’agan’ Jehovah ngay ni fan ko girdi’?

SUNUMIY Jehovah e fayleng nge mang tafen e girdi’ mi yad par rin ndariy n’umngin nap’an. (Eklesiastes 1:4; Isaiah 45:12, 18) Rriyul’ ni ke denen Adam ni chitamangidad ma aram me af e denen nge yam’ ngak pi fak. Machane n’en ni ke m’agan’ Got ngay ni fan ko girdi’ e ra lebug u daken fare Owchen ni kan micheg ni aram Jesus Kristus. (Genesis 3:15; 22:18; Roma 5:12-21; Galatia 3:16) Bochan ni kari t’uf rok Jehovah e girdi’ ma aram me pi’ “Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.” (John 3:16) Ma t’ufeg aram e n’en ni ke k’aring Jesus ni “nge pi’ e pogofan rok nge biyuliy boor e girdi’ ngay.” (Matthew 20:28) Re “biyul’ ni puluwon” ney e ma pi’ puluwon mat’awun boch ban’en ni ke mul u pa’ Adam ma ma yognag e yafas ni manemus ko girdi’.​—1 Timothy 2:5, 6; John 17:3.

2. Mang e n’en ni un rin’ ko Rofen e Biyul’ ni be yip’ fan e e maligach rok Jesus ni biyul’?

² Fa Rofen e Biyul’ u gubin e duw e be yip’ fan e maligach ni biyul’ ni pi’ Jesus. Rofen nem ma ra pi’ fare prist nib tolang nu Israel reb e garbaw ni pumoon ni fan ko denen me tay rachaen nga daken fare Arke nib thothup ni bay ko fa Gin’en Nth’abi Thothup u lan fare tabernacle ma boch nga tomren mu lan fare tempel. Kan rin’ e re n’ey ni fan ngak, nge tabinaw rok, nge ganong nu Levi. Ku arrogon Jesus Kristus ni som’on me pi’ rachaen ni fan ko denen ko “pi walagen” nib spiritual. (Hebrews 2:12; 10:19-22; Levitikus 16:6, 11-14) Nap’an e Rofen e Biyul’ miki pi’ fare prist nib tolang ba kaming ni maligach ni fan ko denen me tay rachaen nga lan fa Gin’en Nth’abi Thothup, ma aram me biyuliy e denen ko fa 12 i ganong ni gathi yad e pi prist. Ku arrogon Jesus Kristus ni Prist nib Tolang e ra tay rachaen ni puluwon e piin ni ke michan’rad ngak, me thang e denen rorad.​—Levitikus 16:15.

Kan Fek i Yib ko Flaab

3. Rogon e thin ni bay ko Hebrews 2:9,10, mang e n’en ni ka be rin’ Got u lan fa 1,900 e duw ni ke yan?

³ U lan 1,900 e duw ma be rin’ Got ban’en ni fan ko “pi walagen” Jesus. I yoloy apostal Paul u morngaagen e re n’ey ni gaar: “Machane Jesus e gadad be guy! Ya ba ngoch nap’an ntay nib sobut’ ngak e pi engel, ni nge yim’ ni fan ngak urngin e girdi’ ni bochan e be runguy Got e girdi’. Ma kad guyed ni ke teeliyawnag Got ko flaab nge ta’ fan e chiney ni bochan fare yam’ ni ta’ ni gafgow riy. [Jehovah Got] ni ir e sunumiy urngin ban’en ma be ayuweg ni gubin be par nib fel’ rogon, e rib mat’aw ni muruwliy nge yan Jesus u fithik’ e gafgow nge yan i par nga rogon ni be finey Got, ni fan e nge yog ni fek Jesus pi fak Got ni pire’ i yan nge thapegrad ngak Got ngar uned ngak ko flaab ni ba’ rok.” (Hebrews 2:9, 10) Fa En ni ma Thapegey e aram Jesus Kristus, ni ke fil rogon ni nge fol u daken e gafgow ni tay u nap’an ni ke par nib girdi’ u fayleng. (Hebrews 5:7-10) Jesus e an som’on ni kan fakay ni ir fak Got nib spiritual.

4. Wuin ma uw rogon nni fakay Jesus ni ir Fak Got nib spiritual?

⁴ I fanay Jehovah e kan ni thothup rok, ara gelngin, ni nge fakay Jesus ni ir Fak nib spiritual, me un ko flaab u tharmiy. Nap’an ni goo yow John ni Tataufe, min lithag Jesus nga ar u fithik’ e ran ni be yip’ fan ni ke ognag ir ngak Got. Fare Gospel ko Luke e be gaar: “Nap’an ni mu’ i taufenag urngin e girdi’, ma kun taufenag Jesus. Ma nap’an ni be meybil, me mab e tharmiy, me yib fare Kan ni Thothup u lan i yib nga daken ni bod yaan ba bulogol. Me yib ba lam u tharmiy ni be gaar, ‘I gur Fakag ni gab t’uf rog, kari felan’ug ngom.’” (Luke 3:21, 22) I guy John fare kan ni thothup ni ke yib nga daken Jesus me rung’ag laman Jehovah ni be yog ni ke felan’ ngak Jesus ni ir Fak nib t’uf Rok. Ngiyal’ nem mu daken e kan ni thothup, me fakay Jehovah Jesus ni ir e bin som’on ko ‘pi fak ni pire’ ni nge thapegrad ngak ni ngar uned ko flaab ni ba’ rok.’

5. Mini’ e piin nsomm’on ni yib angin e maligach rok Jesus ngorad, ma uw urngirad?

⁵ “Pi walagen” Jesus e yad e som’on ni ke yib angin ngorad fare maligach ni pi’. (Hebrews 2:12-18) Ke pig e changar rok apostal John me guyrad ni yad bay u tharmiy ni kar uned ko flaab u daken fare Burey ni Zion ni yad fare Fak e Saf, ni aram Jesus Kristus ni kan faseg ko yam’. Miki yog John ko uw urngirad ni gaar: “Me ere faan gu sap ma ba’ fare Fak e Saf nib sak’iy nga daken e burey ni Zion; ni yad raay nge aningeg i ragag ne aningeg i biyu’ e girdi’ ni ba’ fithingan rorad nge fithingan e Chitamangin ni kan tay nga peri’rad. . . . Kan biyuliyrad u fithik’ e tin ni ka ba’ e girdi’ nu fayleng ma yad e tin som’on e girdi’ nni pi’rad ngak Got ne ngak fare Fak e Saf. Dawor ra lifithed l’ugunrad biid; ma dariy e kireb rorad.” (Revelation 14:1-5) Ere fa ‘pi fak ni pire’ ni kan thapegrad ngak Got ngar uned ko flaab rok’ u tharmiy e yad 144,001 u gubin ma kari mus​—ni aram Jesus nge pi walagen nib spiritual.

“Kan Gargelnag Rok Got”

6, 7. Mini’ e piin nni “gargelnagrad rok Got,” ma mang fan e re n’ey ngorad?

⁶ Piin ni ke fakay Jehovah e kan “gargelnagrad rok Got.” Yoloy apostal John ngak e piin ni aram rogon ni gaar: “En ni kan gargelnag rok Got e dakir denen i yan, ya ke yib rarogon Got ngak; ma bochan i [Jehovah] e ke mang Chitamangin, ma aram fan ndabkiyog ni nge denen i yan ya nni gargelnag rok Got.” (1 John 3:9) Re “rarogon Got” ney e aram e kan ni thothup rok Got. Mu daken e re n’em nge tin rok, ma ra reb fa 144,000 e girdi’ e kan “gargelnag nib biech” ya yad be athapeg e par u tharmiy.​—1 Peter 1:3-5, 23.

⁷ Nap’an ni kan gargelnag Jesus nib girdi’ ma ir Fak Got ni bod rogon Adam ni be’ nib flont ni ir “fak Got.” (Luke 1:35; 3:38) Machane tomren ni ke un Jesus ko taufe ma ke yog Jehovah ban’en nib baga’ fan ni gaar: “I gur Fakag, ni gab t’uf rog, ni kari felan’ug ngom.” (Mark 1:11) Pi thin nem nge fare kan ni thothup ni yib ngak e ke tamilangnag ni aram e ngiyal’ ni ke gargelnag Got Jesus ni ir Fak nib spiritual. Ere sogonap’an ni kan “gargelnag Jesus nib biech” ni bay mat’awun ni nge un ko yafas nib kan ni Fak Got u tharmiy. Maku arrogon pi walagen nib spiritual ni yad 144,000 u gubin ma kan “gargelnagrad biyay.” (John 3:1-8; mu guy fare Wulyang Ntagil’ e Damit, ko November 15, 1992, pages 3-6.) Ku bod rogon Jesus ma ke dugliyrad Got ko kan ni thothup me tay chilenrad ni ngar wereged fare thin nib fel’.​—Isaiah 61:1, 2; Luke 4:16-21; 1 John 2:20.

Mich Riy ni Ke Mang Fak Got nib Spiritual

8. Mang e mich riy ni kan fakay (a) Jesus nge (b) pi gachalpen u daken e kan ni thothup

⁸ Bay e mich riy ni ke mang Jesus fak Got nib spiritual. Ye guy John ni Tataufe fae kan ni thothup ni yib nga daken Jesus me rung’ag ni be yog Got ni ke dugliy fare Messiah ke mang Fak nib spiritual. Machane ra diin ma ra nang pi gachalpen Jesus ni kan dugliyrad ni yad pi fak Got nib spiritual? Nap’an ni yan Jesus nga tharmiy me gaar: “Yi John e i taufe ko ran, machane ka in e rran ma aram min taufenagmed ko fare kan ni thothup.” (Acts 1:5) Kan “taufenag pi gachalpen Jesus ko kan ni thothup” ko rofen ni Pentekost ko 33 C.E. Ngiyal’ ni ke yib e kan ni thothup ma ki ‘yib lingan ban’en u lan e lang ni bod lingan bangi nifeng nib gel ni ke thow’ ma “nifiy ni bod yaan e yunmon” ni ke wer; ni ra be’ u rom ma ke yan i math reb ngak. Ma n’en nth’abi lingagil ni ke buch e ke ko pi gachalpen ni ngar uned ko “numon nlungun boch e nam, ni bod rogon ni ke muruwliyrad fare kan ni thothup ni ngar nonod.” Ere kan guy nga owchey ma kan rung’ag e mich riy ni ke bing e kanawo’ ni nge yan pi gachalpen Kristus nga tharmiy ni yad pi fak Got mi yad un ko flaab.​—Acts 2:1-4, 14-21; Joel 2:28, 29.

9. Mang e mich riy ni piyu Samaria nge Kornelius nge yugu boch e girdi’ u nap’an e bin som’on e chibog e kan dugliyrad kar manged pi fak Got nib spiritual?

⁹ Ma boch nga tomren me machib Filip u Samaria. Piyu Samaria e kar adaged e thin ni ke weliy mar uned ko taufe, machane dariy e mich riy ni ke dugliyrad Got ni yad pi fak nib spiritual. Nap’an ni yibilayrad apostal Peter nge James mar tew pa’row nga daken e pi cha’nem ni ke mich u wan’rad, “me yib fare kan ni thothup ngorad” u rogon nib gagiyel ko piin ni be guyrad. (Acts 8:4-25) Aram e mich riy ni ke mang yu Samaria ni ke mich Got u wan’rad pi fak nib spiritual. Ku arrogon Kornelius u nap’an e 36 C.E., nge yugu boch e girdi’ ni gathi yad piyu Israel ni kar uned ko thin riyul’ rok Got. Peter nge pi Jew ni ke mich Got u wan’rad ni kar uned ngak e yigura “gingad ngay ni ku er rogon e piin ni gathi yad piyu Israel ni ke puog Got e tow’ath rok nga dakenrad, ni aram fare kan ni thothup. Ya rrung’aged fa piinem ni yad be welthin nthin nu bayang ma yad be pining e magar ngak Got nga feni sorok.” (Acts 10:44-48) Boor e Kristiano u nap’an e bin som’on e chibog e kan pi’ ngorad e “pi tow’ath ko kan ni thothup,” ni bod rogon ni ngan non nlungun boch e nam. (1 Korinth 14:12, 32) Ere kan micheg ko pi cha’ ney ni kan dugliyrad ni yad pi fak Got nib spiritual. Machane ra diin me nang e pi Kristiano u tomren ko ngiyal’ nem ni kan dugliyrad ni yad pi fak Got nib spiritual fa danga’?

Mich ni Pi’ Fare Kan ni Thothup

10, 11. U daken fare thin ko Roma 8:15-17, ma uw rogon ni ngam weliy ni fare kan ni thothup e be micheg e piin ni yad ra un ku Kristus ko gagiyeg?

¹⁰ Urngin fa 144,000 e Kristiano ni kan dugliyrad e kari michan’rad ni bay rorad e kan ni thothup rok Got. I yol Paul u morngaagen e re n’ey ni gaar: “Ya fare kan ni thothup ni ke pi’ Got ngomed e der ma taymed nigimed e sib ko denen nguum pired nigimed be rus; ya re kan ni thothup nem e ma ngongliymed ngam manged pi fak Got, ma gelngin e kan ni thothup e gadad ma non riy ngak Got ni ma lungudad, ‘Abba, Chitamangidad!’ Fare kan ni thothup rok Got e ir e be micheg nga lanin’dad ni gadad pi fak Got. Ere faanra kad manged pi fak, ma rayog ngodad e flaab ni ke tay ni fan ko girdi’ rok, ma ku ra da uned ngak Kristus ngad fanayed e tin ni ke tay Got ni fen; ya faanra gadad be un ko gafgow ni tay Kristus, ma ka gadad ra un ko flaab rok.” (Roma 8:15-17) Pi Kristiano ni kan duguliyrad e yad manang u lanin’rad ni yad pi fak e Chitimangirad u tharmiy, ni rib mudugil lanin’rad ko re n’em. (Galatia 4:6, 7) Kari mutrug u lanin’rad ni ke fakayrad Got ni yad pi fak nib spiritual mi yad pi walagen Kristus ma ra uned ngak ko Gagiyeg u tharmiy. Kan ni thothup rok Jehovah e ma n’igin e re n’em.

¹¹ Fare kan ni thothup rok Got e ma suwey laniyan’rad e piin ni kan duguliyrad ni ngar puluwnaged ngorad e n’en ni yog e Thin Rok Got u morngaagen e par u tharmiy. Susun, nap’an ni yad ma bieg e n’en ni yog e Bible u mornaagen pi fak Jehovah nib spiritual, ma kari mudugil u wan’rad ni pi thin nem e ma sor fan ngorad. (1 John 3:2) Goo yad manang ni kan “taufenagrad ni aram e kar taab girdi’gad Kristus Jesus” ma ni taufenagrad ni kar uned ko yam’ ni tay. (Roma 6:3) Kari mutrug u lanin’rad ni yad pi fak Got nib spiritual, ma aram e yad ra yim’ min fasegrad nga tharmiy mi yad un ko flaab ni bod Jesus.

12. Mang e ke n’igin e kan ni thothup rok Got nga laniyan’ e pi Kristiano ni kan dugliyrad?

¹² Ngan fakay be’ ni ir fak Got nib spiritual e gathi aram ban’en ni ran athamgiliy nge yog ngom. Piin ni kan dugliyrad ni yad pi fak Got nib spiritual e gathi yad ba adag ni ngar ranod nga tharmiy ni bochan ni ke chalbarad ko pi magawon u fayleng. (Job 14:1) Danga’ ya kan ni thothup rok Jehovah e ke n’igin e piin nriyul’ ni kan duguliyrad ni ngar athapeged mar adaged boch ban’en nib thil ko yugu boch e girdi’. Piin ni kan dugliyrad ni aram rogon e yad manang ko uw fene fel’ e par nib flont u paradis u fayleng u fithik’ e girdi’ rorad nge pi fager rorad ni yad ba falfalan’. Machane, gathi aram e n’en ni ri yad ba adag ni ngar uned ngay. Ya ri yad ba adag ma yad ma athapeg e par u tharmiy ma aram ma ke m’agan’rad ngay ni ngar paged urngin ban’en u fayleng nge pi n’en ni rayog ngorad u fayleng.​—2 Peter 1:13, 14.

13. Rogon ni yog ko 2 Korinth 5:1-5, ma mang e ‘ri ba adag’ Paul, ma re n’ey e be tamilangnag e mang u morngaagen e piin ni kan dugliyrad ko kan ni thothup?

¹³ Fare athap ko par u tharmiy ni pi’ Got ko pi girdi’ nem e rib gel ma aram mi yad bod Paul ni ke gaar: “Ya gadad manang nre tent ney ni gadad be par u lan ni aram e re dowef ney nu fayleng e nap’an nra puth, ma ba’ e naun rodad u tharmiy ni nga darod da pired nga lan, nib naun ni Got e ke ngongliy, ni bay i par ndariy n’umngin nap’an. Ma chiney e gadad be par nib tomalan’dad, ya kar da m’ad ni bochan ni nga non’ nga dakendad e tabinaw rodad ni ba’ u tharmiy ni bod e munmad; ya ra nin’ nga dakendad ni bod e munmad ma mmudugil ni ba’ e dowef rodad. Ma ngiyal’ ni gadad be par u lan e re tent ney nu fayleng e gadad be gel’gel’ ni ke tomalan’dad; gathi fene gadad ba adag ni ngad n’iged e dowef rodad nu fayleng, machane gadad ba adag ni ngan tay e bin nu thamrmiy nga dakendad, i fan e bin nra yim’ e bayi mang yafos e ful’. I Got e ir e cha’ ni ke ngongliy rogodad ni fan ko re methiliyeg dowef nem, ma ke pi’ e kan ni thothup rok ngodad ni aram e mich u urngin ban’en ni ke tay ni fan ngodad.” (2 Korinth 5:1-5) ‘Kari yim’’ Paul ni bochan ni ba adag ni ngan faseg ko yam’ nga tharmiy ni ir ba kan ndabi yim’ biid. Ke weliy u morngaagen e dowef ko girdi’ ni bod ba “tent” ni rayog ni nge puth, ni aram ba naun ni ngan par riy nib ngoch nap’an ma aram e ba thil ko naun ko tabinaw. Pi Kristiano ni bay e kan ni thothup rorad ni be micheg ni yad ra yan nga tharmiy e yugu aram rogon ni yad be par u fayleng ma dowrad e dowef ko girdi’ machane yad be athapeg ni ngar pared ko “naun ni Got e ke ngongliy” ni aram ba dowef nib kan ndabiyog ni nge yim’ ma dabi kireb biid. (1 Korinth 15:50-53) Bod Paul ma rayog ni ngar gaargad: “Ere rib pagan’dad, ma kab fel’ u wun’dad ni gadad ra pag tafedad ni re dowef rodad ney nga darod da pired ngak Somol nga naun rodad [u tharmiy].”​—2 Korinth 5:8.

Nni Tayrad Nga Lan Yugu Boch e M’ag Nib Thil

14. Nap’an ni i tababnag Jesus fare Puguran, ma mang m’ag ni i micheg ko som’on, ma mang e ra yognag ngak piyu Israel nib spiritual?

¹⁴ Rib mich u wan’ e pi Kristiano ni kan duguliyrad ko kan ni thothup ni kan tayrad nga lan l’agruw e m’ag ni yugu ba thil. I weliy Jesus morngaagen reb fa l’agruw i m’ag nem u nap’an ni fanay fare flowa ni dariy e is riy nge fare wain u nap’an e Puguran ko yam’ nira tay. I weliy morngaagen fare wain ni gaar: “Re kap ney e bin nib beech e m’ag u thilin Got nge girdi’ ni rachaeg ni bay map’ nga but’ni fan ngomed e ir e bayi micheg.” (Luke 22:20; 1 Korinth 11:25) Mini’ e bay ko fa bin nib biech e m’ag? Jehovah Got nge girdi’ nu Israel nib spiritual​—aram e piin ni ke m’agan’ Jehovah ngay ni nge fekrad nga tharmiy ngar uned ko flaab rok. (Jeremiah 31:31-34; Galatia 6:15, 16; Hebrews 12:22-24) Be maruwel fa bin nib biech e m’ag u daken rachaen Jesus ni ke map’ nga but’ ma ma fek e girdi’ u gubin e nam ni fan ko ngochol rok Jehovah ma pi Kristiano ney ni kan dugliyrad ko kan ni thothup e yad bang “owchen” Abraham. (Galatia 3:26-29; Acts 15:14) U daken fa bin nib biech e m’ag ma aram e ra un urngin piyu Israel nib spiritual ko flaab ya ran fasegrad ko yam’ mi yad un ko yafas ndabi m’ay biid u tharmiy. Aram ba “m’ag ni bayi par ndariy n’umngin nap’an,” me ere angin nra yib riy e ra par ni manemus. Ka bay nga m’on ni yira guy ko mang boch ban’en nran rin’ u tan e re m’ag ney u nap’an fare Biyu’ e Duw iyan ngaram.​—Hebrews 13:20.

15. Rogon e thin ni bay ko Luke 22:28-30, mang m’ag ni kan micheg ngak pi gachalpen Jesus ni kan dugliyrad, nge wuin e yad ra yib nga tan e re m’ag nem?

¹⁵ Fa “pi fak ni pire’” ni ke m’agan’ Jehovah ngay ni ngar uned ko ‘flaab ni ba’ rok’ e ku yad e ra bagayad ma kan unegrad ko fare m’ag ko Gil’ilungun Got nu tharmiy. Yog Jesus u morngaagen e re m’ag ney u thilin ir nge pi gachalpen ni gaar: “Urngin e gafgow ni yib ngog ma mpired rog nda mpaged gag; ere rogon ni ke pi’ e Chitamag mat’awug ngog ni ngug gagiyeg, e eram e n’en ni ;bay gu rin’ ngomed. Bay mu uned ngog ko abich nge garbod u tebel rog ko gin nsuwog, ma bay mpired nga tail’ e pilung ngam gagiyegniged fa ragag nge l’agruw i ganong nu Israel.” (Luke 22:28-30) I tabab fare m’ag ni kan micheg ni nga gin nsuwon Got ko ngiyal’ ni kan duguliy pi gachalpen Jesus ko kan ni thothup ko Pentekost ko 33 C.E. Fare m’ag nem ni kan micheg e ra par ni manemus u thilin Kristus nge fapi pilung nra uned ngak ko gagiyeg. (Revelation 22:5) Ere kari mich u wan’ fapi Kristiano ni kan duguliyrad ni yad ba’ ko fare m’ag nib biech ni kan micheg ngorad makub mich u wan’rad ni yad ba’ ko fare m’ag ni kan micheg ngorad nra uned ko gagiyeg. Ere nap’an fare Abich ko Balayal’ rok Somol ni yira madenomnag e ke mus ni piin ni ka yad bay ko fayleng ko piin ni kan duguliyrad e yad ra un ko fare abich ko flowa mar unumed fare wain. Ma fare flowa e be yip’ fan downgin Jeus ni dariy e denen riy ma fare wain e be yip’ fan rachaen nib machalbog nni puog u nap’an ni yim’ me aram min duguliy fare m’ag nib biech ni kan micheg. ​—1 Korinth 11:23-26; mu guy fare Wulyang Ntagil’ e Damit, ko February 1, 1989, page 17-20.

Kan Piningrad, Kan Mel’egrad, ni Piin ni Yad Ba Yul’yul’

16, 17. (a) U m’on ni ‘ngar uned ko flaab’mang e thingar nrin’ ngak fa 144,000ni yad gubin? (b) Mini’ fa “ragag i pilung” ma uw rogon e ngongol rorad ngak “pi walagen” Kristus ni ka yad bay u fayleng”?

¹⁶ Yay nsom’mon ni yira fanay angin e maligach ko biyul’ ni tay Jesus ma ra yan i aw ni rayog ni ngan pining fa 144,000 e girdi’ ni ngar uned ko par u tharmiy min mel’egrad ko kan ni thothup rok Got. Faanra “ngar uned ngak ko flaab ni bay rok” ma thingar ra “athamgilgad nge yib fan e pong ni ke tay Got ngorad” ma ngar yul’yul’gad nge mada’ ko yam’. (2 Peter 1:10; Efesus 1:3-7; Revelation 2:10) Kari lich e piin kan dugliyrad ko kan ni thothup ni kar magaygad u fayleng machane ka yad ba yul’yul’ ni yugu aram rogon ni be togopuluw “fa ragag i pilung” ngorad. Ma “fa ragag i pilung” e be yip’ fan urngin e pi am nu fayleng. I gaar reb e engel, “Bay ra chamgad ngak fare Fak e Saf; machane fare Fak e Saf nge piin ni ke piningrad ni ke mel’egrad, ni piin ni yad ba yul’yul’ ma yad be un ngak e bay ra gelad ngorad, ya ir e Somol ko pi somol nge Pilung ko pi Pilung.” ​—Revelation 17:12-14.

¹⁷ Ri dariy ban’en nrayog ni nge rin’ e pi pilung nu fayleng ngar gelgad ngak Jesus ni ir e “Pilung ko pi pilung”, ya bay Jesus u tharmiy. Machane rayog ni ngar dumumuwgad ngak “pi walagen Jesus” ni ka yad bay u fayleng. (Revelation 12:17) Re dumumuw nem e ra m’ay u nap’an e mahl rok Got u Armageddon u nap’an nra gel fare “pilung ko pi pilung” nge “pi walagen” ni “kan piningrad ma kan mel’egrad ma yad ba yul’yul.” (Revelation 16:14, 16) Machane, chiney i yan nge mada’ ko ngiyal’ i n’em ma ri boor e maruwel ni bay rok e pi Kristiano ni kan duguliyrad. Mang e yad be rin’ e chiney u m’on ko ngiyal’ nra flaabnagrad Jehovah?

Mang e Fulweg Rom?

◻ Chon mini’ ni i mel’egrad Got ni ngar uned ko ‘flaab ni ba’ rok u tharmiy’?

◻ Mang fan fare bugitin ni “kan gargelegrad rok Got”?

◻ Uw rogon ma ‘fare kan ni thothup e ma pi’ e mich’ ngak boch e Kristiano?

◻ Mang boch e m’ag ni kan micheg ngak e piin ni kan dugliyrad ko kan ni thothup?

[Sasing ko page 23]

Nap’an e Pentekost ko 33 C.E., ma kan micheg ni kan bing e kanawo’ nrayog ni ngan un ko flaab u tharmiy