Ognagey nge Puf Rogoy ni Ngan Turguy Ban’en

“Kristus e ke chuwegdad ko sib ke ta’dad ni gathi ka gadad e sib.”​—GALATIA 5:1.

1. Fa yu bugithin nu Hebrew nge Greek ni piliyeg ni “ognagey,” nge “inauguration,” ara “consecration” e ma sor fan ko mang?

PIIN ni ur yoloyed e Bible e ur fanayed yu bugithin ni Hebrew nge Greek ni ngar weliyed u morngaagen e par nib dar ni fan nga ban’en fa ngan tay be’ nga bang ni fan nga ban’en nib thothup. U lan e pi Bible nthin ni Meriken ma yibe piliyeg e pi thin ney ko “ognagey,” “inauguration,” ara “consecration.” Yu ngiyal’ ma yibe fanay e pi thin ney ni fan ko naun​–ni baga’ ni fan ko tempel rok Got u Jerusalem nge liyor ni yibe tay u rom. Ma gathi ri yima fanay e pi thin ney ni fan ko pi n’en nder sor fan ko teliw.

Kan Ognagey ngak “fare Got nu Israel”

2. Mang fan nrayog ni ngan nog ni Jehovah e ir “fare Got rok piyu Israel”?

² Nap’an e 1513 B.C.E., me ayuweg Got piyu Israel ngar chuwgad ko sib u Egypt. De n’uw nap’an nga tomren me tayrad nga bang ni yad e girdi’ rok, me fl’eg e m’ag u thilrad. Ke yog ngorad ni gaar: “Faan gimed ra fol rog ngam ayuweged e m’ag rog, ma gimed ra par ni kam manged e girdi’ rog. Fayleng ni polo’ e ban’en rog, machane bay mpired ni gimed e girdi’ ni kug mel’egmed ni ngam manged girdieg.” (Exodus 19:5; Psalm 135:4) Yog Jehovah ni piyu Israel e yad e girdi’ rok, me ere rayog ni ngan nog ni Jehovah e ir “fare Got nu Israel.”​—Joshua 24:23.

3. Mang fan ni gathi ba laniyan’ Jehovah u nap’an ni ke mel’eg yu Israel ni ngar manged girdi’ rok?

³ Ke fek Jehovah yu Israel kar manged girdi’ rok, ma aram ma gathi ba laniyan’, ya ki lemnag e piin gathi yad piyu Israel. Ke yog ko girdi’ rok ni gaar: “Dab um gafgowniged girdien yugu boch e nam ni yad be par u lan e nam romed. Ngongol romed ngorad e nge bod rogon e ngongol romed ngak e girdi’ nu Israel, ngar t’ufgad romed ni bod fanmed t’uf romed. Dab mu paged talin ni um pired u Egypt ni gimed girdien yugu reb e nam. I gag [Jehovah] ni Got romed.” (Levitikus 19:33, 34) In e chibog nga tomren me ri nang apostal Peter ko uw rogon e re n’em u wan’ Got ye gaar: “Ka fin gu nang e chiney nriyul’ ni gubin e girdi’ ma taareb rogorad u wan’ Got. En ni ba’ madgun Got u wan’ ma be rin e tin nib mat’aw e ra i par nib fel’ u wan’ Got ndemtrug ko be’ u kun nam.”​—Acts 10:34, 35.

4. Mang boch ban’en nib t’uf ni nge rin’ yu Israel ku Got, ma kar folgad riy fa danga’?

⁴ Ku mu tiyan’um ngay ni rogon ni yad ra par ni yad e girdi’ rok Got e ma tor nga ban’en. Kari mus nfaanra yad ra fol rok Got mar folgad ko motochiyel rok ma aram mi yad par ni yad e “girdi’ rok.” Ma bay e kireban’ riy ya daki fol yu Israel ko re n’ey. Kar n’aged fare Messiah ni Got e l’og u nap’an e bin som’on e chibog C.E., me ere kan n’agrad ndakur pared ni yad e girdi’ rok Got. Daki par Jehovah ni ir “fare Got nu Israel.” Ma girdien fare nam nu Israel e gathi ka yad e girdi’ rok Got ni kar ognaged yad ngak.​—Mu taarebnag ko Matthew 23:23.

Kan Ognag “fare Israel rok Got“

5, 6. (a) Mang fan e thin rok Jesus ni ke yiiynag u Matthew 21:42, 43? (b) Wuin nge uw rogon ni sum “fare Israel rok Got”?

⁵ Ere ra par Jehovah ni dariy e girdi‘ rok ni kar ognaged yad ngak fa? Danga’. I weliy Jesus Kristus e thin ko Psalm me yiiynag ni gaar: “Dawor mpoyed e n’en ni ke yog e babyor nib thothup? Ya ke gaar, ‘Fare malang ni dabuy e piin ni yad ma toy e naun ya ra fineyed ndariy fan e you ni aw ni aram e re malang ni ir e ba th’abi ga’ fan. Re n’ey e [Jehovah] e yodoromnag, rib manigil e n’en ni ke rin’ [Jehovah].’ Me ul’ul’ Jesus ngay nge gaar, ‘Ere nggog ngomed ni gagiyeg rok Got e bay ni chuweg romed ngan pi’ ngak girdien reb e nam ni yad e bay yib wom’engirad nib fel’.’”​—Matthew 21:42, 43.

⁶ Fare “nam ni bay yib wom’engirad nib fel’” e aram e ulung ko Kristiano. Nap’an ni immoy Jesus u fayleng, me mel’eg e girdi’ ni ra un ko re nam nem. Machane nap’an e Pentekost 33 C.E., ma Jehovah Got e ir e ke dugliy fare ulung ko Kristiano ya ke puog e kan ni thothup rok nga daken e girdi’ riy, ni yad 120 u gubin. (Acts 1:15; 2:1-4) Boch nga tomren me yoloy apostal Peter ni re ulung ney e ke mang “girdien fare nam ni ke mel’eg[rad] Got, ni [yad] e pi prist rok e en ni Pilung, ma [yad] fare nam ni yad ba thothup, ni yad girdien Got.” Ma mang fan ni kan mel’egrad? Ni ngar “wereged murung’agen e n’en nrib fel’ ni ke ngongliy Got, ni ir e pining[rad] u fithik’ e lumor nga[r] bad nga fithik’ e tamilang rok nrib fel’.” (1 Peter 2:9) Pi gachalpen Kristus ni kan dugliyrad ko kan ni thothup e yad e nam ni kan ognag ku Got ni yad “fare Israel rok Got.”​—Galatia 6:16.

7. Mang angin nra yib ko fare Israel rok Got, ma mang e thingara siyeged?

⁷ Girdien fare nam nib thothup e yad “girdien Got” machane gathi yad e sib. Ya ba math’ keru’ ko re n’em ya kab gel e puf rogon rorad ko fare nam nu Israel kakrom. Yog Jesus ngak e girdi’ nra un ko re nam nib biech ney ni gaar: “Ma bay mu nanged e tin riyul’, ma tin riyul’ e ir e bayi ayuwegmed nge dab kum pired ni gimed e sib.” (John 8:32) I tamilangnag apostal Paul ni pi Kristiano e dabkura pared u tan fare m’ag ko Motochiyel. Ere ke yog ko pi walag u Galatia ni gaar: “Chiney e gathi gadad e sib​–yi Kristus e ke chuwegdad ko sib ke ta’dad ni gathi ka gadad e sib! Ere um pired nrogon e girdi’ ni gathi yad e sib, ma dab kum paged gimed ngkum manged sib bayay.”​—Galatia 5:1.

8. Uw rogon ma kab gel e puf rogon ko girdi’ ni bay ko yaram ko Kristiano ko bin ni bay ko girdi’ u tan e m’ag ko Motochiyel?

⁸ Nge mada’ ko ngiyal’ ney ma ke fol fare Israel rok Got ko pi n’en nib t’uf ni ngar rin’ed ku Got me ere gathi yad bod yu Israel kakrom. Susun ndabda gingad ko re n’ey ya girdi’ riy e ke puf rogorad mi yad turguy ni ngar folgad. Ma piyu Israel kakrom e ni gargelnagrad ni yad e girdi’ ni kan ognag ku Got, machane girdien fare Israel rok Got e yad e kar turguyed ni ngar ognaged yad. Ere rib gel e thil u thilin e yaram ko Kristiano nge fare m’ag ko Motochiyel ko piyu Jew, ya piyu Jew e kan ognagrad ku Got ma dabiyog ni ngar turguyed ban’en.

9, 10. (a) Uw rogon ni tamilangnag Jeremiah ni ra thil rogon i ognagey ku Got? (b) Mang fan ni gathi urngin e Kristiano ko ngiyal’ ney ni kar ognaged yad ku Got e gathi yad bang ko fare Israel rok Got?

⁹ I yiiynag Jeremiah ni profet u morngaagen e ngiyal’ nra thil rogon e ognagey ku Got faani gaar: “I [Jehovah] e be gaar, ‘Ba’ ba ngiyal’ ni be yib ni bay taw ngay mu gu ngongliy reb e m’ag nib beech u thilmad e girdi’ nu Israel nge girdi’ nu Judah. Dabi bod fare m’ag ni gu ngongliy u thilmad pi chitamangirad ko fa ngiyal’ ni baaram ni gu kol pa’rad nggu fekrad nga wuru’ yu Egypt. Dar pired ni yad ba yul’yul’ ko re m’ag nem ni gu ngongliy u thilmad, ni yugu aram rogon ni gag e Somol rorad. I gag [Jehovah] e ku gog e pi thin ney. Ra taw ko ngiyal’ nem, ma baaray e re m’ag ni bay gu ngongliy u thilmad e girdi’ nu Israel: bay gu tay e motochiyel rog nga lanin’rad mu gu yoloy nga lan [gum’ercha’rad]. Bay gu mang Got rorad, ma bay ra manged girdi’ rog.”’​–Jeremiah 31:31-33.

¹⁰ Kan tay e motochiyel rok Got nga “lanin’rad” ni ba dake kan yoloy nga “lan gum’ercha’rad,” me ere ba adag girdien fare Israel rok Got ni ngar lubeged e n’en ni kar ognaged yad ngay. Rib gel ni yad ba adag e re n’em ma gathi aram rogon piyu Israel kakrom ni kan gargelnagrad ni kan ognagrad ku Got ma gathi yad e kar turguyed. Ngiyal’ ney ma ke pag lal e milyon e girdi’ u ga’ngin e fayleng ni ku rib gel ni yad ba adag ni ngar rin’ed e tin nib m’agan’ Got ngay ni bod fare Israel rok Got. Ma kar ognaged yad ku Jehovah Got ni ngar rin’ed e tin nib m’agan’ ngay. Yugu aram rogon ni dariy e athap rorad ni nga ranod nga tharmiy ni bod fare Israel rok Got, machane yad ba falfalan’ ya ke l’agan’rad ni ngar pared ni manemus u fayleng u tan pa’ e Gagiyeg rok Got u tharmiy. Yad ma tay fan yu Israel nib spiritual ya yad ma ayuweg e tin ni ka bay e girdi’ ko re nam nem u fayleng ni ngar lubeged e maruwel rorad ni ngar “wereged murung’agen e n’en nrib fel’ ni ke ngongliy Got, ni ir e pining[rad] u fithik’ e lumor nga[r] bad nga fithik’ e tamilang rok nrib fel’.”

Ngan Maruweliy e Puf Rogon rok Got u Fithik’ e Gonop

11. Kan sunumeg e girdi’ ni uw rogon, ma susun uw rogon ni ngan maruweliy e re nem?

¹¹ I ngongliy Got e girdi’ ni yad ba adag e puf rogon. Ke pi’ ngorad e nangan’ ni ngar pared nib puf rogorad. Fa wu’ ni som’on e mabgol e kar fanayew mat’awrow ni ngar turguyew ban’en. Machane, dan rin’ u fithik’ e gonop nge t’ufeg ya kar turguyew ban’en ni ke yibnag e gafgow ngorow nge ngak pi fakrow. Re n’ey e ma tamilangnag ni der towasariy Jehovah e girdi’ ni ngar rin’ed ban’en nib togopuluw ko n’en ni yad ba adag ni ngar rin’ed u laniyan’rad. Ma “Got e ba t’uf rok e en ni ma pi’ ban’en u fithik’ e falfalan’,” me ere ke mus nra felan’ ko piin ni kar ognaged yad ngak ni kar felan’gad ngay ni ngar rin’ed, ni yad e kar turguyed. (2 Korinth 9:7) Dabi fel’ u wan’ nfaanra gathi aram rogon.

12, 13. Mang fan nib fel’ e kanawo’ ni tay Timothy u rogon ni kan chugliy, ma mang e rin’ boor e piin fel’ yangaren ni bochan e kanawo’ ni ke tay?

¹² Pi Mich Rok Jehovah e goo yad manang e re n’ey ere yad ma yog nib t’uf ku be’ ni nge ognag ir ngak Got machane dabni towasariy be’ ni nge rin’, ni mus ko pi bitir rorad. Pi Mich Rok Jehovah e gathi bod e pi yuraba’ i teliw, ya der ma taufenag e bitir ni madway ya dabiyog ni ngar ognaged yad ku Got ma gathi yad e kar turguyed. Ngan folwok rok Timothy ni ir be’ ni pumoon ni fel’ yangaren. Nap’an ni ilal, me yog apostal Paul ngak ni gaar: “Nguum par ko tin nib riyul’ ni kan fil ngom, ni ir e kari mich u wan’um. I gur e ga manang ko mini’ e piin ni ur machibniged gur, ma ga manang nnap’an ni ka gab bitir ma ga manang e thin ni bay u lan fare babyor nib thothup, ni ir e rayog ni nge tamilangnigem u rogon ni yima thap ngak Got, ni ma yog u daken e michan’ ngak Kristus Jesus.”​—2 Timothy 3:14, 15.

¹³ Mu tay fanam iyan riy ni i nang Timothy e thin ni bay u lan e babyor nib thothup ya kan fil ngak u nap’an ni kab bitir. Ke mich u wan’​–ma gathi kan towasariy ni nge un–​ko machib ko Kristiano ni ke fil e chitiningin nge titaw rok ngak. (2 Timothy 1:5) Ma aram me nang Timothy ni bay e gonop riy ni ngan lek Kristus, ma aram ma ir e ke turguy ni nge ognag ir ku Got. Ngiyal’ ney ma bokum biyu’ e piin fel’ yangaren ni pagal nge rugod ni gallabthir rorad e yad e Pi Mich Rok Jehovah e kar folwokgad ko re kanawo’ ney. (Psalm 110:3) Ma yugu boch e girdi’ e danga’. Ya ra be’ ma ir e ra turguy e tin ni nge rin’.

Ngan Turguy ni Ngan Mang Sib ku Mini’?

14. Mang e be yog Roma 6:16 u morngaagen e puf rogon?

¹⁴ Dariy reb e girdi’ ni be par ni kari puf rogon. Ya gubin e girdi’ ma bay e gin ni ma mus e puf rogon rorad riy ko boch e motochiyel ko fayleng, ni bod e motochiyel ko gravity, ni dabiyog ni ngan siyeg ndariy wenegan. Maku dariy be’ ni be par ni kari puf rogon ko tin nib spiritual ban’en. I gaar Paul: “Damu nanged e re bugithin ni baaray: faan gimed ra pi’med nga pa’ be’ ni bod rogon e sib, ni aram e nguum folgad rok faanem, ma aram e kam manged sib rok fare masta ni ir e gimed be fol rok, ni demtrug ko denen e kam manged sib rok, ni wenegan ni ma yib e yam’, ara kam manged sib rok e fol, ni wenegan ni ma yib e kan mat’aw ngak Got?”​—Roma 6:16.

15. (a) Uw rogon u wan’ e girdi’ e par ni sib ku be’, machane mang e yad ma rin’? (b) Mang boch e deer nib puluw ni ngad fithed gadad riy?

¹⁵ Boor e girdi’ e dubrad ni ngan nog ni yad e sib ku be’. Machane ngiyal’ ney ma bin riyul’ riy e boor e girdi’ e ma pag ni ngan suwey lanin’rad ma aram mi yad rin’ e tin ni ba adag yugu boch e girdi’ ni ngar rin’ed ni de m’agan’rad ngay. Susun, fare advertising industry nge entertainment world e ma guy rogon ni nge taareb laniyan’ e girdi’, mi yad turguy e n’en ni ngar rin’ed. Ma pi ulung ko am nge teliw e ma suwey laniyan’ e girdi’ ngar uned ko pi n’en ni yad be mon’eg, ma gathi yad ma rin’ u gubin ngiyal’ u daken e thin rorad ni ke suwey lanin’rad, ya yad ma k’aring e girdi’ ni ngar pared nib yul’yul’ ko reb e ulung fa ban’en. I yog Paul ni ‘kad manged sib rok fare masta ni ir e gadad be fol rok,’ me ere fel’ ni ra bagadad e nge fith ir ‘Gag e sib ku mini’? Mini’ e ma suwey lanin’ug ko pi n’en ni gu ma turguy nge rogon e par rog? Gu ma fol ko pi tayugang ko teliw, ara pi tayugang ko am, ara piin ni boor e salpiy rorad, ara piin nib gilbuguwan ko kachido? Mini’ e gu ma fol rok​–Got fa girdi’?’

16. Uw rogon ma pi Kristiano e yad e sib rok Got, ma uw rogon ni ngan lemnag e re par ni sib ney nib puluw?

¹⁶ Pi Kristiano e der lemnaged ni bochan ni yad be fol rok Got ma aram e dariy e puf rogorad. Ya ke m’agan’rad ngay ni ngar maruweliyed e puf rogon rorad ni bod Jesus Kristus, mi yad puluwnag e pi n’en ni yad ba adag nge pi n’en ni yad ma mon’eg ko tin nib m’agan’ Got ngay. (John 5:30; 6:38) Yad ma athamgil nge yog “laniyan’ Kristus” ngorad, mi yad par u tan pa’ ni ir Lolugen e ulung. (1 Korinth 2:14-16; Kolose 1:15-18) Bod rogon e ppin ni ke un ko mabgol ma ke m’agan’ ngay ni nge maruwel u taabang rok figirngin ya ba t’uf rok. Ma riyul’, yima yog ko fare ulung ko pi Kristiano ni kan dugliyrad ni aram bod e ppin nib machalbog ni kan micheg ngak Kristus ko mabgol.​—2 Korinth 11:2; Efesus 5:23, 24; Revelation 19:7, 8.

17. Mang e ke turguy urngin e Pi Mich Rok Jehovah ni ngar manged?

¹⁷ Ra reb e Pi Mich Rok Jehovah ndemtrug ko be athapeg e par u tharmiy fa fayleng, ma ra bagayad ma ir rok e ke ognag ir ku Got ni nge rin’ e tin nib m’agan’ ngay ma nge fol rok ni ir e Ga’. Ra reb e Pi Mich Rok Jehovah ma ir rok ni ke turguy ni nge mang sib rok Got ma gathi sib ko girdi’. Aram e ba puluw ko n’en ni yog apostal Paul ni gaar: “Yi Got e ke chuw’iymed nib tolang puluwmed ni ke pi’; ere dab kum manged e sib rok e girdi’.”​—1 Korinth 7:23.

Ngad Filed Rogon ni nge Yib Angin Ngodad

18. Wuin ni ke bung rogon be’ ko taufe?

¹⁸ U m’on ni ke bung rogon be’ nrayog ni nge mang reb e Pi Mich Rok Jehovah, ma bay boch ban’en ko Bible ni susun ni be fol riy. Piin piilal e ra lemnag e girdi’ ni yad ba adag ni ngar manged Pi Mich rok Jehovah ma thingara turguyed ko yad manang fan e ognagey ko Kristiano fa danga’. Rriyul’ ni ba adag ni nge mang reb e Pi Mich Rok Jehovah fa? Ke m’agan’ ngay ni nge pag boch ban’en ni bochan fa? Faanra danga’, ma dawori bung rogon ni nge un ko taufe.

19. Mang fan ni dariy tapgin ni ngan gathibthibnag be’ ni ke turguy ni nge ognag ir ku Got nge mang tapigpig rok?

¹⁹ Machane faanra be rin’ urngin ban’en nib t’uf ma mang fan ni ngan thibthibnag ni bochan ni ke lemnag ni nge turguy ni nge par u tan pa’ Got nge Thin Rok ni kan thagthagnag? Kab kireb ni nge pag be’ ni nge yib nga tan pa’ Got ko bin ni nge yib nga tan pa’ e girdi’ fa? Fa gathi ri ra yib angin? Gathi arrogon ni ma lemnag e Pi Mich Rok Jehovah. Ke taareban’rad ko fare thin rok Got ni yoloy Isaiah ni gaar: “I gag Jehovah, ni Got rom, me gag e En ni be skulnagem u rogon ni nge yib angin ngom, me gag e En ni be guy rogon ni ngam man ko kanawo’ ni susun ni ngam man riy.”​—Isaiah 48:17.

20. Uw rogon ma yibe pithig e girdi’ mi yad par nib puf rogon ni bochan e thin riyul’ ko Bible?

²⁰ Thin riyul’ ko Bible e ma pithig e girdi’ ko machib ni googsur ko pi yuraba’ i teliw, ni bod e machib ko gafgow ndabi mus u fithik’ e nifiy u infierno. (Eklesiastes 9:5, 10) Ya ma suguy gum’ercha’rad ko magar ni bochan e athap ko piin ni kar m’ad​—fare fas ko yam’ u daken e maligach ni biyul’ ni pi’ Jesus Kristus. (Matthew 20:28; Acts 24:15; Roma 6:23) Thin riyul’ ko Bible e ma pithig e girdi’ ko chalban ko pi n’en ni ma micheg e pi am ni der m’ag. Ya ma n’igin ni nge sug gum’ercha’rad ko falfalan’ ya kar nanged ni be gagiyeg Gil’ilungun Got u tharmiy ma dabki n’uw nap’an ma ra suwey e fayleng. Thin riyul’ ko Bible e ma pithig e girdi’ ko ngongol ni be ar’arnag dowey, ni der ma n’uf Got ma wenegan ni ma yib riy e ma kirebnag e tha’ u thilin e girdi’ nge Got, ma ma yibnag e m’ar, ma yima yim’ riy nib pay. Ere ba’ angin ni ngan mang sib ku Got ko bin ni ngan mang sib ko girdi’. Ma bin riyul’ e faanra ra ognag be’ ir ngak Got ma ra yib angin “ko biney e tamilang . . . ma bin bay yib e tamilang e bay yog e yafos riy ngak ndariy n’umngin nap’an.”​—Mark 10:29, 30.

21. Uw rogon u wan’ e Pi Mich Rok Jehovah e ognagey ku Got, ma mang e yad ba adag?

²¹ Pi Mich Rok Jehovah ko ngiyal’ ney e dan gargelnagrad ni yad ba nam ni kan ognag ku Got ni bod piyu Israel kakrom. Pi Mich Rok Jehovah e yad bang ko ulung ko pi Kristiano ni kar ognaged yad ku Got. Ra reb e Mich Rok Jehovah ni ke un ko taufe ma ke rin’ ni bochan ni ba adag ma ke maruweliy e puf rogon rok ni nge ognag ir ku Got. Arrogon, wenegan ni yib ko Pi Mich Rok Jehovah ni bochan ni kar ognaged yad ku Got e ke fel’ thilrad Got ma yad ba adag ni ngar pigpiggad ngak. Ri yad ba adag ni ngar pared ko re tha’ ney nib falfalan’, mi yad chichiiy pa’rad ko fare puf rogon ni ke pi’ Jesus Kristus ngorad ya ke pithigrad ndabkura pared ni yad e sib.

Uw Rogon ni Ga Ra Fulweg?

◻ Mang fan ni gathi ba laniyan’ Got u nap’an ni ke mel’eg yu Israel ngar manged “girdi’ rok”?

◻ Mang fan ni gathi dariy e puf rogon ko pi Kristiano ni kar ognaged yad ku Got?

◻ Mang angin ni ke yib ko piin ni kor ognaged yod ku Jehovah Got?

◻ Mang fan ni kab fel’ ni ngan mang reb e tapigpig rok Jehovah ko bin ni ngan mang tapigpig rok e girdi’?

[Sasing ko page 12]

Yu Israel kakrom e kan ognagrad ku Got u nap’an ni gargelnagrad

[Sasing ko page 13]

Ognagey ko Kristiano e ra be’ me turguy