Mu Par Ni Ga Be Pigpig Ku Jehovah Nib Mudugil Gum’irchaem

“Gum’irchaeg e ba mudugil, O Got, gum’irchaeg e ba mudugil.”—PSALM 57:7, NW.

1. Mang fan ni rayog ni nge yog ngodad e michan’ nib gel ni bod rogon David?

RAYOG rok Jehovah ni nge gelnag e michan’ rodad ni gadad e Kristiano, ma aram rayog ni ngada chichiiyed pa’dad ko ulung ni Kristiano ni gadad e pi tapigpig ni kada ognaged gadad. (Roma 14:4) Ma arfan, rayog ni nge yog ngodad e michan’ nib gel ntaarebrogon ko fare psalmist ni David, ni i k’aring ni nge yon’ e tang ni gaar: “Gum’irchaeg e ba mudugil, O Got.” (Psalm 108:1) Faanra ba mudugil gum’irchadad, ma ra k’aringdad ni ngada lebguyed e maruwel rodad ni kada ognaged gadad ku Got. Ma gad ra sap ngak ni nge pow’iydad me pi’ gelngidad, ma gad micheg ni dabiyog ni ngan mithmithegdad, ma gad ba mudugil ko tin kada dugliyed ni ngada rin’ed nge michan’ rodad ni gadad e piin nib yul’yul’, “ni gubin ngiyal’ ma boor e maruwel ni ngada rin’ed ni fan ngak Somol.”​—1 Korinth 15:58, NW.

2, 3. Mang fan fare fonow ni pi’ Paul ni bay ko 1 Korinth 16:13?

² Fapi fonow ni kan pi’ ngak pi gachalpen Jesus u Korinth kakrom e ba mudugil ni kub m’ag ko piin Kristiano ko ngiyal’ ney, me yog Paul ni apostal ni gaar: “Mu ayuwgad, mpired ni gimed mmudugil u fithik’ e michan’ romed ngak Kristus, dabmu rusgad, mpired ni gimed ba gel.” (1 Korinth 16:13) Thin ni Greek ma fa yu bugithin kan yoloy ni yibe rin’ ara present tense, ni aram e be fonownagey ni ngan ulul i rin’ ban’en. Mang fan e re fonow ney?

³ Rayog ni ngada “pared ni gad be od” ko tirok Got ma aram ngada togopuluwgad ngak fare Moonyan’ ma ngad pared ni gadad ba chuchugur ku Got. (James 4:7, 8) Pagan’ rodad ku Jehovah e ra ayuwegdad ni nge par ni ke taareban’dad ma rayog ni nge ‘par nib mudugil e michan’ rodad ni gadad e Kristiano.’ Gadad​—nib muun ngay boor e ppin u fithik’dad—​“e ngada ngongolgad ni bod e pumoon” ni ngada pigpiggad ku Got ni dabda rusgad ni gadad e tamachib ko Gil’ilungun. (Psalm 68:11) Me par nib “gel gelngidad” ya gad be par ni gadad be sap ngak e Chitamangidad u tharmiy nge pi’ gelngidad ni fan ni ngada rin’ed e tin nib m’agan’ ngay.​—Filippi 4:13.

4. Mang e kada rin’ed me yog rodad ni ngada uned ko taufe ni gadad e piin Kristiano?

⁴ Kada daged ni kada adaged e thin riyul’ u nap’an ni kada ognaged gadad ngak Jehovah ni lem rodad ma kada daged e re n’em u nap’an ni kan chulthagdad nga fithik’ e ran. Machane mang e ke pow’iydad ni ngada uned ko taufe? Bin som’mon e kan fil ngodad e tamilangan’ ko Thin rok Got nib puluw. (John 17:3) Bochan e re n’en ney me gel e michan’ rodad min k’aringdad ni ngad kolgadngan’dad, ni gad be dag ni kari kireban’dad ko kireb ni kada rin’ed kafram. (Acts 3:19; Hebrews 11:6) Bin migid ma kada pig i chelgad ngak Got, ya bochan kada paloggad ko ngongol nib kireb ni fan ni ngada tababnaged e yafas nib puluw ko tin nib m’agan’ Got ngay. (Roma 12:2; Efesus 4:23, 24) Ma bin migid riy e kada ognaged gadad ku Jehovah u daken e meybil u fithik’ e yul’yul’. (Matthew 16:24; 1 Peter 2:21) Kada ninged ku Got ni nge yog ngodad e nangan’ nib fel’ ma kada uned ko taufe ni fan ni ngada daged ni kada ognaged gadad ngak. (1 Peter 3:21) Gad ra fal’eg i lemnag e pi n’en ney ma ra ayuwegdad ni nge mudugil lanin’dad me par ni gad be athamgil ni ngada maruwelgad u gubin ngiyal’ uw rogon ni ngada lebguyed e maruwel rodad ni kada ognaged gadad ku Jehovah ma ngada pigpiggad ngak nib mudugil gum’irchadad.

Mu Pared ni Ngam Maruwelgad ni Nge Yog Ngomed fare Tamilangan’ nib Puluw

5. Mang fan ni thingarda ululgad ni ngada filed e tamilangan’ nu Bible?

⁵ Rogon nrayog ni ngada rin’ed e maruwel rodad nrogon ni kada ognaged gadad ngak Got, e thingarda pared ni gad be fil e Bible ni fan ni nge yog ngodad e tamilangan’ nra gelnag e michan’ rodad. Uw feni gel e falfalan’ rodad ni ngada ked e ggan nib spiritual ko yay ni som’mon ni kada nanged e thin riyul’ rok Got! (Matthew 24:45-47) Ba fel’ lamen e pi ggan” nem​—ma ra gelnagdad ko tirok Got. Chiney e baga’ fan ni nge par ni gad be kay e ggan nib spiritual ni boor ban’en riy nra ayuwegdad ma aram e rayog ni nge par nib mudugil gum’irchadad ni gadad e pi tapigpig rok Jehovah ni kada ognaged gadad.

6. Uw rogon ma kan ayuwegem ni ngari gel e tayfan rom ko thin riyul’ ni bay u lan e Bible?

⁶ Ba t’uf ni ngan athamgil ma aram e rayog ni nge yoor e tamilangan’ ko Thin nu Bible. Re n’ey e ba taareb rogon ko ngan gay e machaf ni kan mithag​—nib t’uf ni ngan maruweliy nib gel. Machane uw feni gel e flaab riy ni ngan pirieg “fare tamilangan’ rok Got”! (Proverbs 2:1-6) Nap’an ni reb e tamachib ko Gil’ilungun e ke fil e Bible ngom ko yay ni som’mon, sana ke fanay fare babyor ni Knowledge That Leads to Everlasting Life. Sana ra reb e guruy ma kam piew boor e tayim ngay, ma sana gathi kemus ni taab yay. Ke yib angin ngom ni bochan ra reb e scripture ni dan weliy murung’agen min pithig e Bible ngan bieg min weliy mrung’agen. Faanra mo’maw’ ni ngan nangfan e thin riy min fal’eg i weliy. Kari fal’eg rogon e en ni be fil e Bible ngom, me meybil ni nge ayuwegmew fare kan ni thothup rok Got, me ayuwegem ni ngam thamiy u gum’irchaem ma ga adag e tin riyul’.

7. Uw rogon ma rayog ku be’ ni nge fil e thin riyul’ rok Got ngak yugu boch e girdi’?

⁷ Re athamgil nem e ba puluw, ya i yog Paul ni gaar: “Cha’ ni kan fil murung’agen fare thin ngak e susun e nge pi’ boch urngin e tin nib fel’ ni ba rok ngak e cha’ ni ir e machibnag e re thin nem ngak.” (Galatia 6:6) Fare Greek text uroy e be dag ni fare machib nni fek ko Thin rok Got e kari ta’ nga laniyan’ nge gum’ichaen fa cha’ ni kan “fil boch ban’en ngak.” Bochan ni kan fil ngom ni aram rogon ma ke ayuwegem ni nga kum mang sensey rok yugu boch e girdi’. (Acts 18:25) Rogon ni ngam par nib yul’yul’ ko maruwel rom nrogon ni kam ognag e yafas rom, ma aram thingar mu par ni gab gel ma gab mudugil ko tirok Got ni aram nga um fil e Thin rok Got me yog rom.​—1 Timothy 4:13; Titus 1:13; 2:2.

Mu Lemnag Uwrogon ni Kam Kalngan’um Ma Kam Pig i Chel Ngak Got

8. Uw rogon ma ngada daged e ngongol nib fel’ ni gubin ngiyal’?

⁸ Ka ga manang rogon ni baud lanin’um u nap’an ni kam fil e thin riyul’, ni kam kalngan’um, ma kam thamiy ni ke n’ag Got fan e kireb rom nbochan ni ke mich e maligach ni pi’ Jesus u wan’um? (Psalm 32:1-5; Roma 5:8; 1 Peter 3:18) Ba mudugil ni kam dabuy ni ngam sul ko yafas rom nib kireb kafram. (2 Peter 2:20-22) U fithik’ boch ban’en, ma meybil ngak Jehovah ni gubin ngiyal’ e ra ayuwegem ni nge par ni ga be dag e ngongol nib fel’, ma ngam rin’ e maruwel rom nrogon ni kam ognag e yafas rom ngak, ma nguum par ni ga be pigpig ku Jehovah u fithik’ e yul’yul’.​—2 Peter 3:11, 12.

9. Bochan kada paged e ngongol nib kireb, ma mang kanawo’ e susun ni gad ra yan ngay?

⁹ Bochan ke thil e yafas rom ma aram kam pi’ keru’um ko ngongol nib kireb, mu ulul ni ngam ning e ayuw rok Got ni fan ni nge par nib mudugil gum’irchaem. Ba riyul’, ni kam un kafram ko kanawo’ nib thil machane kam yaliy reb e map ni yima pagan’uy ngay ma kam tabab ni ngaman ko kanawo’ nib mat’aw. Chiney e dab ku mu sor nga bang. Mu par ni ga be pagan’um uw rogon ni be pow’iyem Got, ma ngam dugliy ni ngam par ko kanawo’ ni yan ko yafas.​—Isaiah 30:20, 21; Matthew 7:13, 14.

Dabmu Pagtalin ni Kam Ognag e Yafas Rom Ma Kam Un ko Taufe

10. Mang boch ban’en ni thingarda ted ngan’dad nrogon ni kada ognaged gadad ku Got?

¹⁰ Mu tay ngan’um ni kam ognag e yafas rom ngak Jehovah u fithik’ e meybil, ni ga be lemnag ni ngam pigpig ku Got ndariy n’umngin nap’an. (Jude 20, 21) Ngan ognag e yafas e be yip’ fan ni ngan tay be’ nga bang, ara ngan kieg, ni fan ko n’en nib thothup. (Leviticus 15:31; 22:2) Rogon ni kam ognag e yafas rom e gathi ban’en nra par nib ngoch nap’an ara kam mil fan ban’en ngak e girdi’. Kam ognag e yafas rom ngak e En be Gagiyegnag e Palpalthib, ma rogon ni ngam lebuguy e re n’en ney e ba t’uf ni ngam yul’yul’ ku Got u polo’ i yafas rom. Arrogon, ‘faanra ud pired ni gadad ba fos ma fan ngak Somol, ma gadad ra yim’ ma ngad m’ad ni fan ngak Somol.’ (Roma 14:7, 8) Falfalan’ rodad e ra tor nga daken rogon ni gad be fol ko tin nib m’agan’ Got ngay nge rogon ni gad be ulul ko pigpig ngak nib mudugil gum’irchadad.

11. Mang fan ni thingar dabmu pagtalin e tin ni baaray ni kan taufenagem nge mang e be yip’ fan?

¹¹ Mu tay ngan’um ni gubin ngiyal’ nrogon ni kam un ko taufe ma ireray e n’en ni be dag ni kam ognag e yafas rom ngak Got u polo’ i gum’irchaem. Dan towasariyem ni ngam un ko taufe, ya bochan gur e kam dugliy ni lem rom. Ke mudugil lanin’um e chiney ni ngam rin’ e tin nib m’agan’um ngay nrogon nib puluw ko tin nib m’agan’ Got ngay ni n’umngin e yafas rom riy? Kam wenig ngak Got ni nge yog ngom e nangan’ nib fel’ ma kan taufenagem ni be dag ni kam ognag e yafas rom ngak. Mu par ni bay e nangan’ rom nib fel’ ma aram ngam lebuguy e maruwel rom nrogon ni kam ognag e yafas rom, ma ngari flaabnagem Jehovah.​—Proverbs 10:22.

Tin nib M’agan’um Ngay e Bay Ban’en ni Be Rin’ Riy

12, 13. Uw rogon ma tin nib m’agan’dad ngay e ba peth nga rogon ni kada ognaged e yafas rodad ma kan taufenagdad?

¹² Riyul’ nrogon ni ognag e yafas min taufenagey e ke yibnag e flaab ni boor ngak boor e girdi’ u fayleng ni polo’. Nap’an ni gad ra un ko taufe ni fan ni ngada daged ni kada ognaged gadad ngak Got, ma aram kada m’ad nrogon nib l’ag ko ngongol rodad kafram machane dada paged e tin nib m’agan’dad ngay. Rogon ni gadad e piin ni ke michan’dad ni kan fil ngodad ban’en nib fel’ rogon, ma aram e gad be rin’ e tin nib m’agan’dad ngay u nap’an ni kada ognaged gadad ku Got u fithik’ e meybil min taufenagdad. Gad ra ognag e yafas rodad ma ngada uned ko taufe e ba t’uf ni nge tamilang e tin nib m’agan’ Got ngay u wan’dad ma ngada rin’ed e re ney ni gadad rodad. (Efesus 5:17) Ma aram gad be folwok rok Jesus, ni i rin’ e tin nib m’agan’ ngay u nap’an ni ke tal ko maruwel ni daykusang, min taufenag, me pi’ e yafas rok ni polo’ ni fan ni nge rin’ e tin nib m’agan’ e Chitamngin u tharmiy ngay.​—Psalm 40:7, 8; John 6:38-40.

¹³ Ba m’agan’ Jehovah Got ni ra flont Fak “u daken e gafgow.” Ere ke rin’ Jesus e tin nib m’agan’ ngay ni fan ni nge k’adan’ u fithik’ e yul’yul’. Bochan e re n’em, me “meybil ni wenig ngak Got ni baga’ laman u fithik’ e lu’, . . . ma aram fan ni fulweg Got taban e meybil rok.” (Hebrews 2:10, 18; 5:7, 8) Faan gadra dag e tayfan ku Got nib gel ni aram rogon, ma ku ra mudugil lanin’dad ni “ra fulweg taban” e meybil rodad ma rayog ni ngada pagedan’dad ni ra gelnagdad Jehovah ni gadad e Pi Mich Rok ni kada ognaged gadad ngak.​—Isaiah 43:10.

Rayog ni Nge Par nib Gel Gum’irchaem

14. Mang fan ni thingarda bieged fare Bible ni gubin e rran?

¹⁴ Mang e ra ayuwegem ni nge par nib gel gum’irchaem ma aram rayog ni ngam rin’ e maruwel rom nrogon ni kam ognag e yafas rom ku Got? Mu bieg fare Bible ni gubin e rran ni fan ni nge yog ngom e tamilangan’ ko Thin rok Got ni be mon’og iyan. Ireray e n’en ni “fare tapigpig nib yul’yul’ mab gonop” e be fonownagdad ni gubin ngiyal’. Kan pi’ e fonow ni aram rogon ya bochan rogon ni gad ra rin’ e maruwel rodad nrogon ni kada ognaged e yafas rodad e ba t’uf ni ngada pared ni gad be yan nrogon nib puluw ko Thin Riyul’ rok Got. Faanra be fil e ulung rok Jehovah e machib nde riyul’ ni lem rorad, ma susun dabni fonownag e Pi Mich Rok Jehovah nge piin ni yad be machibnagrad ni ngara bieged fare Bible.

15. (a) Mang e thingarni lemnag u nap’an ni ngan turguy ban’en? (b) Mang fan nrayog ni nga nog ni fare maruwel ni ma yib e salpiy riy e gathi ban’en nri baga’ fan rok reb e Kristiano?

¹⁵ Ga ra dugliy ban’en, ma ngam lemnag u gubin ngiyal’ ko mang e ra rin’ e re nen n’ey ngom ni gur e kam ognag e yafas rom ngak Jehovah. Sana ba l’ag e re n’ey ko maruwel rom. Kam athamgil ni nrayog ni nge ayuwegem e re n’en ney ni ngam mon’og ko bin riyul’ e liyor? Yugu aram rogon ni piin ni masta e baga’ ni kara pirieged ni piin Kristiano ni kara ognaged e yafas rorad e yad e girdi’ ni yima pagan’uy ngorad ma yad ba salap ko maruwel, maku kara guyed ni Pi Mich rok Jehovah e gathi ri yad ma lemnag rogon ni ngara mon’oggad u fayleng ma dabra lemnaged ko uw rogon ni nge yog ngorad e maruwel nib tolang puluwon ngak yugu boch e girdi’. Aram rogon e Pi Mich ya bochan gathi yad be nameg ni nge yoor e chugum rorad, nge rogon ni nge gilbuguwrad, ma nga nog e sorok ngorad, ara ngeb gelngirad. Piin ni be lebuguy e maruwel rorad nrogon ni kara ognaged yad ku Got, e ri baga’ fan u wan’rad ni ngara rin’ed e tin nib m’agan’ Got ngay. Ma gathi ri baga’ fan u wan’rad e maruwel rorad ni be ayuwegrad ni nge yog ngorad e tin nib t’uf ko yafas rorad. Bod rogon Paul ni apostal, maruwel nri baga’ fan u wan’rad e aram e maruwel ko Kristiano ni ngan machib. (Acts 18:3, 4; 2 Thessalonika 3:7, 8; 1 Timothy 5:8) Ga be m’oneg ko yafas rom fare Gil’ilungun?​—Matthew 6:25-33.

16. Mang e gad ra rin’ nfaanra bochan e magafan’ nib gel e mo’maw’ ni ngada lebguyed e maruwel rodad nrogon ni kada ognaged gadad ku Got?

¹⁶ Sana boch e girdi’ e kari tomal lanin’rad nga boch e magafan’ u m’on ni kara filed e thin riyul’. Machane kari sug ko falfalan’ gum’ircha’rad, mi yad pining e magar, me t’uf Got rorad u nap’an ni ke yog ngorad fare athap ko Gil’ilungun! Yad ra lemnag e tin nib fel’ ni ke yog ngorad ni ka nap’an kafram ma sana ra ayuwegrad ni ngara lebguyed e maruwel rorad nrogon ni kara ognaged yad ku Jehovah. Ma ku reb, uw rogon nfaanra magafan’ nib pag rogon nbochan fapi magawon ni ma yib ko yafas ko re m’ag ney e chiney e ra thang “fare thin rok Got,” ni bod e rachngal ni ra taleg ni nge dabi tugul e awoch nge yib wom’engin? (Luke 8:7, 11, 14; Matthew 13:22; Mark 4:18, 19) Faanra kam guy ni ke tabab ni nge buch rom nge chon e tabinaw rom e re n’en ney, mu pagfan urngin e magafan’ ni keb ngom ngak Jehovah ma ngam meybil ni nge ayuwegem ni nge gel e t’ufeg nge falfalan’ rom. Faanra ngam pagfan e magawon rom ngak, ma ra gelnagem me pi’ gelngim ni ngam ulul ko pigpig ngak u fithik’ e falfalan’ ni ba mudugil gum’irchaem.​—Psalm 55:22; Filippi 4:6, 7; Revelation 2:4.

17. Uw rogon ma rayog ni ngan gel ko skeng nib gel?

¹⁷ Nguum meybil ku Jehovah Got ni gubin ngiyal’, ni bod ni kam meybil u nap’an ni kam ognag e yafas rom ngak. (Psalm 65:2) Nap’an ni kan wawliyem ni ngam rin’ e tin nib kireb ara nap’an ni keb e skeng ngom nib gel, ma ngam ning ni nge pow’iyem Got ma nge ayuwegem ni ngam fol riy. Mu tay ngan’um nib t’uf e pagan’, ya bochan James ni gachalpen e i yoloy ni gaar: “Faanra dariy e gonop rok bigimed, ma nge wenignag ngak Got, ye ir e ra pi’ ngak; yi Got e ba gol ngak urngin e girdi’. Machane thingari pagan’med ngak Got ko ngiyal’ ni gimed ra wenignag ban’en ngak, ma dabi maruwaran’med rok; ya cha’ nra maruwaran’ rok e bod ba ley i n’ew u maday nnifeng e be mithmitheg ma be yannag. Be’ ni ara’ rogon e thingari dabi lemnag nra pi’ Somol ban’en ngak, ya dawori mudugil laniyan’ ko tin ni be rin’.” (James 1:5-8) Faanra keb e skeng ni gowa kaygi tomal, ma rayog ni nge mudugil lanin’dad ko re thin ni baaray: “Urngin e n’en ni ma wawliy e girdi’ ni ke yib ngomed e ereyer e mit i n’en ni ka ma yib ngak e girdi’. Machane Got e ba yul’yul’, ma dabi pag ni ngeb ngomed e tin ni ma wawliy e girdi’ nib pag rogon ni ndabkiyog romed ni ngam taleged gimed riy, machane u nap’an ni keb e tin ni ma wawliy e girdi’ nga kireb ma ku ra pi’ e kanawo’ u rogon ni ngam gel ngay ma aram me yog rom ni ngam k’adan’.”​—1 Korinth 10:13, NW.

18. Mang e gad ra rin’ nfaanra denen rodad nib gel ni dan nang e ir e be warnag lanin’dad ma mo’maw’ ni ngada lebguyed e maruwel rodad nrogon ni kada ognaged gadad ku Jehovah?

¹⁸ Uw rogon nfaanra be magawonnagem reb e denen nib mith ma aram e n’en ni be warnag e tin ni kam dugliy lanin’um ni ngam lebuguy ko maruwel rom nrogon ni kam ognag e yafas rom ku Got? Faanra kam kalngan’um, ma ra felan’um ko fare tamilangan’ ni dabi dariyfannag Jehovah fare ‘gum’ircha’ ni kari pilngan’ ni ke mogothgoth.’ (Psalm 51:17) Ngam gay e ayuw ko piin piilal ni Kristiano ni ma t’ufegey, ya ga manang ni yad be​—folwok rok Jehovah—​ma aram dabra dariyfannaged e tin ni ga be tafinaynag ni nge fel’ thilmew e Chitamam nu tharmiy biyay. (Psalm 103:10-14; James 5:13-15) Ngemu’ bochan kam biech biyay u gelngin e tirok Got nge gum’irchaem nib mudugil, ma aram rayog rom ni ngam fal’eg rogon e kanawo’ ni fan nga em ma ga pirieg ni rayog rom ni ngam lebuguy e maruwel rom nrogon ni kam ognag e yafas rom ku Got.​—Hebrews 12:12, 13.

Nguun Pigpig nib Mudugil Gum’irchaey

19, 20. Mang fan ni baga’ fan ni ngada ululgad i rin’ e maruwel rodad nrogon ni kada ognaged e yafas rodad?

¹⁹ Ngiyal’ ney nib mo’maw’ e par riy, ma thingarda athamgilgad ni ngad lebguyed e maruwel rodad nrogon ni kada ognaged e yafas rodad ma nguuda pigpiggad ku Got ni ba mudugil gumir’chadad. I yog Jesus ni gaar: “Machane en nra athamgil nge mada’ ko tomur e ra yog e yafas ngak.” (Matthew 24:13) Bochan gad be par ko “tin tomren e rran,” ma aram rayog ni ngeb e tomur ndemtrug e ngiyal’. (2 Timothy 3:1) Maku, dariy bagadad ni ke mudugil laniyan’ ni ra gabul ma ka be par nib fas. (James 4:13, 14) Ere baga’ fan ni ngada rin’ed e maruwel rodad nrogon ni kada ognaged e yafas rodad e chiney!

²⁰ Kari weliy Peter ni apostal e re n’ey ko fa bin l’agruw e babyor rok. I dag ni bod ni kan thang e girdi’ nib kireb u nap’an ni keb e Ran ni Boor, ere fare fayleng ni be yip’ fan ban’en, ara ulung ko girdi’ nib kireb, e yira thangrad u nap’an fare “rran rok Jehovah.” Arfan ni ke non Peter nib ga’ laman ni gaar: “Mit i mang e girdi’ e susun e baymu boded ko maruwel nib thothup nrogon nib l’ag ko pigpig ku Got”! Maku ka rogned ngorad ni gaar: “Pi cha’ ni gimed ba t’uf rog, bochan ni kam nanged e pi n’en ney ni ka nap’an kafram, mu kol ayuwgad ni dab mu folgad ko [fapi tamachib ni googsur nge girdi’ nib kireb] ya ra war e lem romed nib mudugil.” (2 Peter 3:5-17, NW) Rib gel e kireban’ riy, nfaanra girdi’ ni kan taufenag e ke sor nga bang me yim’ ni dakiyog rok ni nge ta’ gum’irchaen nib mudugil!

21, 22. Uw rogon ma thin ni bay ko Psalm 57:7 e ke aw nib riyul’ ngak David nge tin riyul’ e Kristiano?

²¹ Rayog ni nge gel e lem rom ni ga baadag ni ngam lebuguy e maruwel nrogon ni kam ognag e yafas rom ku Got nfaanra ngam tay ngan’um fare rran ni kan taufenagem ma ngam ning e ayuw ku Got ma aram thin rom nge ngongol rom e ra falfalan’nag gum’irchaen. (Proverbs 27:11) Dabi pag Jehovah ni nge war e girdi’ rok, ma rib t’uf ni ngada pared nib yul’yul’ ngak. (Psalm 94:14) Me dag e runguy u nap’an ni ke kirebnag e tin ni ke dugliy e pi toogor rok me ayuweg David. Bochan ke falfalan’ David, ma aram ke wereg e thin me gaar, nib mudugil, ma dabiyog ni ngan mithmitheg, e t’ufeg rok ngak e En Ke Ayuweg e yafas rok. Me tang ni kari yib u gum’irchaen, ni gaar: “Ba mudugil gum’irchaeg, O Got, ba mudugil gum’irchaeg. Nggu tang ma ngu g’on e tang ni be pining e sorok.”​—Psalm 57:7.

²² Bod rogon David, ma tin riyul’ e Kristiano e kari mudugil lanin’rad ni ngar pared nib yul’yul’ ku Got. Kara pininged e sorok ngak Jehovah nib mudugil gum’ircharad nbochan ir e ke ayuwegrad ma kara magaygad nib fas, ma yad ma tang ni yibe pining e sorok u fithik’ e falfalan’. Faanra ba mudugil gum’irchaem, ma ra tor nga daken Got, mu daken e ayuw rok ma rayog ni ngam lebuguy e maruwel nrogon ni kam ognag e yafas rom ngak. Arrogon, rayog ni ngam bod e “en nib mat’aw” ni murung’agrad e yon’ fare psalmist e tang ni gaar: “Dabi rus ni mus ko ke rung’ag e n’en ni ke buch nib kireb. Ba mudugil gum’irchaen, ma be tor nga daken Jehovah.” (Psalm 112:6, 7, NW) Bay e michan’ rom ku Got ma kari pagan’um ngak, ma aram rayog ni ngam rin’ e maruwel rom nrogon ni kam ognag e yafas rom ma dab mu tal ko pigpig ku Jehovah nib mudugil gum’irchaem.

Ka Ga Manang?

• Mang fan ni thingarda maruweliyed ni gubin ngiyal’ ni fan ni nge yog ngodad e tamilangan’ ko Bible nib puluw?

• Mang fan ni thingarda ted nga lanin’dad uw rogon ni kad kolgadngan’dad nge uw rogon ni kada pig i chelgad ngak Got?

• Gad ra lemnag ko uw rogon ni kada ognaged e yafas rodad min taufenagdad ma uw rogon ni nge fel’ rogodad riy?

• Mang e ra ayuwegdad ni rayog ni ngada pigpiggad ku Jehovah nib gel gum’irchadad?

[Pictures on page 28]

Gad ra tay fare maruwel ko Kristiano ni ngan wereg e machib ni nge mang bin som’mon e maruwel rodad e ra ayuwegdad ni ngada ululgad ko pigpig ku Jehovah ni ba gel gum’irchadad

[Picture on page 28]

Ga be ayuwegem ni nge par ni gab gel ko tirok Got ni bochan ni ga be beeg Thin rok Got ni gubin ngiyal’?