Reb E Pilung Nib Fel’ Rogon Mab Gonop

Ga ma lemnag ni fel’ rogon e ra falfalan’nagem fa? Faanra pi’ be’ boor e salpiy ngom, ma gathi ra falfalan’um? Baga’ nra falfalan’um ngay. Dabi siy nrayog ni ngam lemnag rogon ni ga ra fanay.

BA RIYUL’ ni bay boor ban’en nrayog ni ngam chuw’iy ni nge fel’ rogom ma nge falfalan’um ngay. Salpiy e ku rayog ni nge ‘ayuwegem’ ko pi magawon ni ke fin m’ug, ni bod e liliy ara ngan talegem ko maruwel.​—Eklesiastes 7:12.

Machane u rogon nib m’ag e salpiy nge falfalan’? Taareb rogon e tafinay rom ko girdi’ ni yad ma lemnag ni falfalan’ e sum ko fel’ rogon? Mo’maw’ ni ngan nang e fulweg ko gali deer ney ya rayog ni ngam theeg e salpiy machane dabiyog ni ngam rin’ ko falfalan’. Dabiyog ni ngam tay e falfalan’ nga daken e thebthebal ngam nang tomalngin.

Machane be m’ug ni boch e girdi’ nib fel’ rogon e yad ba falfalan’, ma yugu girdi’ e danga’. Ku aram rogon e piin ni yad gafgow. Machane, baga’ ni ma lemnag e girdi’​—ni ku piin nib fel’ rogorad​—ni salpiy ni boor e ra yibnag e falfalan’ ngorad.

Be’ ni ke yol u morngaagen e re n’ey e Solomon ni Pilung nu Israel kakrom. Ir bagayad e girdi’ ni kari fel’ rogon u fayleng. Rayog ni ngam bieg morngaagen e par rok nib fel’ rogon ko bin 10 e guruy ko fa bin som’on e babyor ni Kings. Ya amu lemnag e thin ko verse 14 ni be gaar: “Gubin e gol ni yib ngak Solomon u taareb e duw e ke gaman nel’ miriay nge nel’ i ragag nge nel’ e talent ko gol.” Biney e bpuluw ko 25 ton e gol. Puluwon e re gol nem e ngiyal’ ney e bpuluw ko $200,000,000 u Meriken!

Machane gathi ke mus ni ke fel’ rogon Solomon ko salpiy; ya i flaabnag Got Solomon ko gonop. Be weliy e thin ko Bible ni gaar: “Solomon ni pilung e ba gel e mal’af riy ni boor ban’en rok ma ba gonop ngak urngin e pilung, ma fayleng ni ga’ngin e yad baadag ni ngar bad ngak ngar motoyilgad ko gonop ni ke pi’ Got ngak.” (1 Kings 10:23, 24) Ku rayog ni nge fel’ rogodad ko gonop rok Solomon, ya pi n’en ni ke yoloy nga but’ e aram bang e Bible. Ngad guyed ko mang i yog nga rogon ni ba m’ag e fel’ rogoy nge falfalan’.

[Credit Line]

Kan fek rok Die Heilige Schrift - Übersetzt von Dr. Joseph Franz von Allioli. Druck und Verlag von Eduard Hallberger, Stuttgart