Yira Skengnag E Michan’ Ko Pi Kristiano

“Gathi urngin e girdi’ ma bay e michan’ rorad.”​—2 THESSALONIKA 3:2, New World Translation.

1. Uw rogon ni dag chepin e girdi’ ni gathi urngin e girdi’ ni bay e bin riyul’ e michan’ rorad?

N’UMNGIN nap’an e chep ko girdi’ ma immoy e piin pumoon nge ppin nge bitir ni bay e bin riyul’ e michan’ rorad. Fare bugithin ni “bin riyul’” e bpuluw ngay ya bokum milyon e yugu girdi’ e bay e michan’ rorad ni yugu ba thil rogon ni yigi michan’rad nga ban’en ni yugu aram rogon ndariy tapgin. Michan’ ni aram rogon e ba l’ag ko pi got ni googsur nge liyor ni de puluw u wan’ Jehovah ni An Th’abi Ga’ ma de puluw ko Thin Rok. Aram fan ni yoloy apostal Paul ni gaar: “Gathi urngin e girdi’ ma bay e michan’ rorad.”​—2 Thessalonika 3:2.

2. Mang fan ni baga’ fan ni ngad yaliyed e michan’ rodad?

² Machane pi thin nem ni yog Paul e be tamilangnag ni immoy boch e girdi’ ko ngiyal’ nem ni bay e bin riyul’ e michan’ rorad, maku arrogon e ngiyal’ ney. Boor e piin ni ma poy e re ke babyor ney e yad ba adag ni nge yog e bin riyul’ e michan’uy ngorad ma nge ga’ e michan’ rorad​—ni aram e michan’ ni bpuluw ko thin riyul’ nu tharmiy. (John 18:37; Hebrews 11:6) Aram rogom fa? Me ere baga’ fan ni ngam nang ni yira skengnag e michan’ rom me ere thingar mu fl’eg rogom riy. Mang fan nib mudugil e re n’em?

3, 4. Mang fan nsusun ni ngad sapgad ngak Jesus ni fan ko skeng ko michan’uy?

³ Thingarda nanged u wan’dad ni michan’ rodad e ma tor nga daken Jesus Kristus. Arrogon, be weliy e Bible ni ir e An ni ma Ayuweg nge Gel e michan’ rodad. Ma ke rin’ Jesus e re n’em u daken e thin rok nge ngongol rok, nge rogon ni ke lebuguy e thin ko profet. Ke gelnag e n’en nrayog ni nge dugliy e girdi’ e bin riyul’ e michan’ rorad nga daken. (Hebrews 12:2; Revelation 1:1, 2) Ma ku Jesus e “yib ngak urngin kanawoen e pi n’en ni ma waliy e girdi’ nge denen ni bod gadad, machane de denen.” (Hebrews 4:15) Arrogon, kan skengnag e michan’ ku Jesus. Re n’em e susun ni nge pi’ e athamgil nga lanin’dad ma gathi nge mulan’dad ara nge magafan’dad.

⁴ Bochan ni ke un Jesus ko gafgow nge yan i mus ko ngiyal’ ni yim’ u daken baley i gek’iy ma gafgow ni i tay e “fil rogon riy ni ngi i fol rok Got.” (Hebrews 5:8) Ke micheg ni rayog ni nge par e girdi’ ni bay e bin riyul’ e michan’ rorad u fithik’ urngin mit e skeng ni ra yib ngorad. Ri baga’ fan e re n’ey u nap’an ni gad ra lemnag e n’en ni yog Jesus u morngaagen pi gachalpen ni gaar: “Mu ted fanmed i yan ko n’en ni ku gog ngomed: Dariy reb e sib ni baga’ ngak e masta rok.” (John 15:20) Ma riyul’ ni yog Jesus u morngaagen pi gachalpen ko ngiyal’ ney ni gaar: “Urngin e girdi’ ni bay ra fanenikayed gimed ni bochag.”​—Matthew 24:9.

5. Uw rogon ni ma tamilangnag e Bible ni ra yib e skeng ngodad?

⁵ U tabolngin e re chibog ney min tababnag e pufthin ko tabinaw rok Got ni yad e som’on nni kan pufthinnagrad. Ke yiiynag e Bible ni gaar: “Ya ke taw nga nap’an ni nge tabab e pufthin, ma piin ni girdien Got e yad e som’on ni ngan pufthinnagrad. Ere faanra gadad e nge tabab rodad, ma uw rogon nra yan i mus ngak e piin nder pagan’rad ko fare Thin Nib Fel’ ni yib rok Got? Ni bod rogon ni be yog e babyor nib thothup ni be gaar: ‘Faanra be mo’maw rogon e girdi’ nib mat’aw ni ngar thapgad ngak Got ko binem e tamilang, me ere mang e bay rin’ e piin ndariy fan Got u wun’rad nge piin ni yad ba tadenen?’”​—1 Peter 4:17, 18.

Ran Skengnag e Michan’​—Mang Fan?

6. Mang fan ni baga’ fan e michan’uy ni kan skengnag?

⁶ Michan’ ni dan skengnag e dariy e mich riy nib riyul’, ma dan nang ko uw fene fel e re michan’ nem. Bod rogon e babyor ni fan ko salpiy ni check ni dawor ni fek puluwon. Sana kan pi’ e check ngom ni puluwon reb e maruwel ni kam rin’, fa puluwon e chugum ni kam pi’ ku be’, fa kan pi’ ngom nib taw’ath. Sana be m’ug riy nib riyul’ e re check nem, machane riyul’ ni arrogon fa? Riyul’ ni bpuluw puluwon ko in e salpiy ni kan yoloy nga daken fa? Ku arrogon e michan’ rodad ni susun gathi ke mus ni be m’ug riy rodad ara ke mus ni gad ma yog u dap’e l’igin’dad. Thingarni skengnag ni ran micheg nib gel mab fel’. Nap’an ni kan skengnag e michan’ rodad ma gad ra pirieg nib gel mab ga’ fan. Ku rayog ni nge m’ug riy e pi n’en ni thingarda muruwliyed ni nge gel boch e michan’ rodad fa nge fel’ boch.

7, 8. Mang tapgin e skeng ni ma yib ngodad?

⁷ Ma pag Got ni nge yib e togopuluw ngodad ara yugu boch ban’en ni ngan skengnag e michan’ rodad. Be gaar e Bible: “Ma faanra yib e mit nem e sikeng ngak be’ nrayog ni nge waliy faanem nge denen, ma thingari dabi gaar u laniyan’: ‘Re n’ey ni be n’en ni nge waliyeg nggu denen e yib rok Got.’ Ya dariy ban’en nib kireb nrayog rok ni nge yan i guy rogon nge waliy Got nge denen, mi Got e der rin’ ngak be’.” (James 1:13) Mini’ fa mang e ir tapgin e pi gafgow nem? Aram Satan, nge re fayleng ney, nge dowdad nde flont.

⁸ Gad manang ni ma suwey Satan e fayleng, ni laniyan’ e girdi’ nge ngongol rorad. (1 John 5:19) Ma goo gad manang ni ir tapgin e togopuluw ngak e pi Kristiano. (Revelation 12:17) Machane ke mich u wan’dad ni be guy Satan rogon ni nge waliydad ko pi n’en ni ma ar’ar’nag dowdad nde flont, ma ma k’aringdad ko pi n’en ko re fayleng ney nib fel’ yaan, ma be athapeg ni ngada awgad ko wup rok, ma ngada pied keru’dad ku Got, ma dabki felan’ Jehovah ngodad fa? Ma dabda gingad ko pi n’en ni ma rin’ Satan ya aram e pi n’en ni rin’ u nap’an ni ke guy rogon ni nge waliy Jesus.​—Matthew 4:1-11.

9. Mang angin nra yib ngodad ko kanawo’ ni tay e girdi’ ni kar pared nib gel e michan’ rorad?

⁹ U daken e Thin Rok nge ulung ko Kristiano ma ma tay Jehovah u p’eowchdad e kanawo’ nrayog ni ngad folwokgad riy. I gaar Paul: “Pi walageg, mpired ni gimed gubin ni gimed be folwok rog. Kug daged rogon ngomed; ere mfal’eged i yaliy e piin ni yad be fol riy.” (Filippi 3:17) Paul e ir reb e tapigpig rok Got ni kan dugliy ko kan ni thothup u nap’an e bin som’on e chibog, ma ke ngongliy e michan’ rok u fithik’ boor e gafgow. Ma tungun e bin 20 e chibog ma gathi dakuriy e girdi’ nib gel’ e michan’ rorad ni ngad folwokgad rorad. Fare thin ko Hebrews 13:7 e ba puluw ko ngiyal’ ney ni taareb rogon ko ngiyal’ ni kan yoloy e pi thin ney ni gaar: “Um tafinayniged fa piinem ni yad e urogned e thin romed, ma yad e rogned e thin rok Got ngomed. Mu tafinayniged rogon ni ur pired nge rogon e yam’ nra tiyed, mi gimed fol u rogon ni ur pired nib michan’rad ngak Got.”

10. Mang boch e example ko michan’uy ni bay ko ngiyal’ ney?

¹⁰ Rib puluw e pi thin nem nfaanra gad ra lemnag angin ni yib ngak girdien fachi ulung ni bochan e ngongol rorad. Rayog ni ngad lemnaged e kanawo’ ni ur ted ma ngad folwokgad ko michan’ rorad. Ya bay e bin riyul’ e michan’ rorad ni kan skengnag u fithik’ e gafgow. U nap’an e duw ko 1870 iyib ngaray ma ke sum ba ulung i Kristiano ni yad walag u ga’ngin e fayleng. Ma wom’engin e michan’ rok girdien fachi ulung e ke yoor ko lal nge baley i milyon e Pi Mich Rok Jehovah ni yad be machibnag e thin ko Gil’ilungun Got. Pi ulung u ga’ngin e fayleng ko piin ni ma un ko bin riyul’ e liyor e aram e mich riy ni kan skengnag e michan’ rorad.—Titus 2:14.

Kan Skengnag e Michan’ u Morngaagen fare Duw ni 1914

11. Mang fan ni baga’ fan fare duw ni 1914 ku C. T. Russell nge piin nib chugur ngak?

¹¹ In e duw u m’on ni ke tabab e bin som’on e mahl ko fayleng ma i wereg girdien fachi ulung e thin ni 1914 e aram reb e duw ni baga’ fan ni kan yiiynag morngaagen u lan e Bible. Machane, boch ban’en ni ur rogned e dawori taw ko ngiyal’ nra lebug, ma gathi rib puluw ko Bible e n’en ni ur lemnaged nra buch. C. T. Russell, ni ir e bin som’on e president ko fare Watch Tower Society, nge boch e girdi’ ni yad ma maruwel u taabang e ke tamilang u wan’rad nib t’uf ni nge gel e machib ni yibe tay. Ya kar bieged e pi thin ney ni be gaar: “Yira machibnag fare thin nib fel’ ko gagiyeg rok Got u gubin yang u fayleng ni nge nang e girdi’ u gubin e nam; ma aram mfini taw nga tomren e fayleng.” (Matthew 24:14, King James Version) Machane uw rogon nrayog ni ngar lubeged e re n’em ya yad buch uw?

12. Uw rogon e thin riyul’ ko Bible u wan’ be’ ni ma chag ku Russell?

¹² Mu lemnag ko uw rogon e re n’ey u wan’ A.H. Macmillan, ni ir be’ ni chag ku Russell. Kan gargeleg u Canada, ma dawori gaman 20 e duw rok Macmillan me bieg fare babyor rok Russell ni The Plan of the Ages (1886). Ma re nep’ n’em ni tabab Macmillian ni nge poy e re ke babyor nem ma ke lemnag ni: “Ereray e thin riyul’!” Nap’an e summer ko 1900, me mada’nag Russell u reb e convention ko pi Bible Students, ni aram e n’en ni kan pining ko Pi Mich Rok Jehovah ko ngiyal’ nem. Daani n’uw nap’an nga tomren me un Macmillan ko taufe ma kar maruwelgow Brother Russell u taabang ko tochuch ko fare Society u New York.

13. Mang e ke magawonnag laniyan’ Macmillan nge boch e girdi’ u morngaagen rogon nra lebug e thin ko Matthew 24:14?

¹³ Pi Kristiano nem ni kan dugliyrad e ur rogned ni 1914 e aram e duw ni ra buch ban’en nib puluw ko tin nib m’agan’ Got ngay. Machane Macmillan nge yugu boch e girdi’ e ur lemnaged ko uw rogon ni ran lebuguy fare thin ni bay ko Matthew 24:14 min machibnag e girdi’ u gubin e nam ko chi tayim ni ka bay nib ngoch. Me munmun me gaar: “Ka gu manang yu ngiyal’ ni ug weliyew Brother Russell morngaagen e re n’em me gaar, ‘Chiney u New York ma kab boor piyu Jew ni bay u roy ko tin ni bay u Jerusalem. Kab boor piyu Ireland ni bay u roy ko tin ni bay u Dublin. Ma kab boor e girdi’ nu Italy ni bay u roy ko tin ni bay u Roma. Ere faanra gad ra machibnagrad u roy, ma aram ma kan wereg e thin nga ga’ngin e fayleng.’ Machane ku dawori gapas lanin’mad ko re n’em. Ere kan lemnag ni ngan fl’eg fare kachido ni ‘Photo-Drama’.”

14. U m’on ko 1914, ma mang e kan fl’eg nib lingagil?

¹⁴ Fare kachido ni “Photo-Drama of Creation” e aram ban’en nib lingagil ya daworni ngongliy ban’en ni aram rogon! Kan puthuy yaan boch ban’en ni be mithmith nge sasing ni slide ni bay raen ni boor, maku bay e thin riy ni be weliy e thin ko Bible nge musik ni kan chubeg ko phonograph record. Nap’an e 1913, ma ke weliy fare babyor ni The Watch Tower u morngaagen reb e convention u Arkansas, U.S.A. ni gaar: “Kan puruy’nag ma kan turguy ni ke taw ko ngiyal’ ni ngan fanay e kachido ni ngan fil e thin riyul’ ko Bible ngak e girdi’. . . . me weliy [Russell] ni ke tabab e re maruwel ney dalip e duw faram ma chiney e ke chugur ni nge m’ay i fl’eg rogon bokum miriay e sasing nib fel’ yaan, ni boor e girdi’ ni yad ra adag ma ra tamilangnag fare Gospel, ma ra ayuweg e girdi’ nge mich Got u wan’rad biyay.”

15. Mang angin ni yib ko fare kachido ni “Photo-Drama”?

¹⁵ Ma aram angin ni yib ko fare “Photo-Drama” u tomren ni kan dag ko yay nsom’on ko January 1914. Baaray boch e report ni bay ko fare The Watch Tower ko 1914:

April 1: “Reb e tamachib ni ke guy l’agruw yang ko re kachido nem e ke gaar, ‘Ke mus ni baley e re kachido nem ni PHOTO-DRAMA OF CREATION ni kug guy machane ka boor ban’en ni kug fil riy u morngaagen e Bible ko tin ni kug fil ko skul ko machib ni theological seminary ni kug un ngay dalip e duw.’ Miki guy reb e girdi’ ni Jew e re kachido nem nge mu’ me gaar, ‘Chiney ma kug mang reb e Jew ni kab fel’ ko bin baaram ko ngiyal’ u m’on ndawor gguy e re kachido nem.’ Boch e prist ko Katolik nge piin ni sebester e kar guyed fare kachido ni DRAMA mar rogned e sorok ngay. . . . Ke mus ni ragag nge l’agruw e re kachido nem ni DRAMA ni kan fl’eg . . . Machane kan pag u lan guyey nge taareb e mach . . . Ma boor ko guyey nge lal i biyu’ e girdi’ e be guy e re kachido nem u gubin e rran, ma yad be rung’ag e thin riy, ma yad be pining e sorok ngay, ma yad be fl’eg i lemnag ma yibe flaabnagrad.”

June 15: “Pi sasing riy e ke k’aringeg ni nggu passig i wereg fare thin Riyul’, ma ke gel fani t’uf rog e Chitamangidad nu tharmiy nge Walagdad nib Nganni’ ni Jesus. Gubin e rran ma gu ma meybil ku Got ni nge flaabnag fare kachido ni PHOTO-DRAMA OF CREATION nge urngin e girdi’ ni be ngongliy ma be dag ko girdi’ . . . I gag reb e tapigpig romed u daken Got, ni fithingag e F. W. KNOCHE.​—Iowa.”

July 15: “Gamad be falfalan’ ya boor e girdi’ ko re mach ney ni yad ba adag e re kachido nem, ma gamad manang ni aram rogon ni yibe machibnag e girdi’ u ga’ngin e fayleng ma bochan e re kachido nem ma yibe kunuy e girdi’ ni ke mel’eg Somol ni yad bod e malang nib tolang puluwon ni machaf. Chiney ma ke yoor e girdi’ ni Bible student ni be un ko ulung ni bochan e re kachido nem ni Photo-Drama. . . . I gag reb e walagmed ni taareb e Somol rodad ma fithingag e EMMA L. BRICKER.”

November 15: “Gamad manang ni gimed ba falfalan’ ni ngam nanged ni be yib angin e machib ko fare kachido ni PHOTO-DRAMA OF CREATION u London Opera House, Kingsway. Ke gagiyel ni pa’ Somol e be ayuweg rogon ni yibe dag e re kachido ney ma be falfalan’ urngin e pi walag ngay . . . Urngin mit e girdi’ e be guy e re kachido ney; ma kug guyed boor e tayugang ko teliw ni kar bad. Be’ ni ir e vicar . . . e ke ning boch e ticket ni rayog ni ngar sulow e ppin rok ngar guyew biyay. Ma be’ ni Rector ko galesiya ni Church of England ma in yay ni ke guy re kachido ney ni DRAMA, ma ke fek iyib boor e fager rok ni ngar bad ngar guyed. L’agruw e girdi’ ni bisof e kar bow, nge ku boch e girdi’ nib tolang e liw rorad.”

December 1: “Gamow e ppin rog e ri gamow be pining e magar ku Chitamangidad nu Tharmiy ko re taw’ath ney ni kan fl’eg u dakenam. Ya bochan fare kachido ni kam fl’eg ni PHOTO-DRAMA ma aram fan ni kug guyew e thin riyul’ ma ke michan’mow ngay . . . Ku fekew fa nel’ i babyor ni kam fl’eg ni STUDIES IN THE SCRIPTURES. Pi babyor nem e ri be ayuwegmow.”

Wenegan e Skeng ko Ngiyal’ Nem

16. Mang fan ni ke yib e skeng ko duw ni 1914?

¹⁶ Ma mang e buch u nap’an ni de riyul’ e n’en ni kan lemnag nra buch ko pi Kristiano nib yul’yul’ ma dar uned ngak Somol ko duw ni 1914? Bay ba ngiyal’ ni kan skengnag nib elmirin e pi girdi’ nem ni kan dugliyrad. Ke weliy fare The Watch Tower ko November 1, 1914 ni gaar: “Dabda paged talin ni gad bay ko ngiyal’ ko skeng.” Ma kan weliy u morngaagen e re n’ey u lan fare babyor ni Jehovah’s Witnesses​—Proclaimers of God’s Kingdom (1993) ni gaar: “Pi duw ko 1914 nge mada’ ko 1918 e aram ba ngiyal’ ni ‘ngalan’ e skeng’ ko pi Bible Students.” Yad ra pag ni ngan skengnag e michan’ rorad ma ra gel ma ngan thiliyeg e lem rorad nge puluw ko fare maruwel ni baga’ fan ni bay nga m’on rorad fa?

17. Uw rogon u wan’ e piin ni kan dugliyrad ni bochan ni ke pag e duw ni 1914 ma ka yad bay u fayleng?

¹⁷ Fare The Watch Tower ko September 1, 1916 e ke weliy ni gaar: “Ku lemnaged ni ra m’ay fare maruwel ko Mokun girdi’ ko fare Galesiya [girdien fachi ulung] u m’on ko ngiyal’ ntungun fare Ngiyal’ ni Kan Dugliy ni Fan ko Pi Nam; machane dariy ban’en u Bible ni be yog e re n’em. . . . Ere ke kalngan’dad ni ka be ul’ul’ iyan fare maruwel ko Mokun girdi’ fa? . . . Pi walag, susun ni ngad pared ni gad be pining e magar ku Got u lanin’dad, ma be gel iyan rogon ni gad ma tay fan fare Thin Riyul’ ni Ke pi’ ngodad nib taw’ath ni kad guyed ma kad uned ngay, ma susun nge gel e pasig rodad ni ngad ayuweged yugu boch e girdi’ ngar nanged fare Thin Riyul’.” Kan skengnag e michan’ rorad, ma kar gelgad ko re skeng nem. Machane susun ni nge nang e Kristiano ni rayog ni nge yib e skeng ngodad ni boor mab thil thil.

18, 19. Ku mang boch e skeng ni yib ko girdi’ rok Got u tomren ni yim’ Brother Russell?

¹⁸ Susun, ki yib mmit e skeng ngak girdien fachi ulung u tomren ni yim’ Brother Charles T. Russell. Aram e skeng ko yul’yul’ rorad nge michan’ rorad. Mini’ ‘fare tapigpig nib yul’yul’’ ni bay ko Matthew 24:45? Boch e girdi’ e ur lemnaged ni aram Brother Russell, ma dar adaged ni ngar uned ko pi n’en nib biech ni kan yarmiy ko ulung. Ma faanra Brother Russell e ir fare tapigpig, ma mang e ra rin’ e pi walag ko ngiyal’ ntomren ni kem’? Susun ni ngar leked be’ ni kan dugliy, fa ke taw ko ngiyal’ ni ngan poy ni gathi be fanay Jehovah taabe’, ya be fanay ba ulung i Kristiano ni yad ba ulung i tapigpig?

¹⁹ Kun skengnag e pi Kristiano u nap’an e duw ni 1918 ya pi tayugang ko Kristendom e ur k’aringed e piin baga’ lungurad ko fayleng ni ngar makathgad mar tunguyed boch ban’en ni googsur nib togopuluw ko ulung rok Jehovah. (Psalm 94:20, KJ) Kan gafgownag e pi Bible Student u North America ngu Europe. Ma re togopuluw ney ni sum ko pi tayugang ko teliw e ke gel u nap’an e May 7, 1918, ya kan pi’ e U.S. federal warrant ni ngan kol J. F. Rutherford nge boch e girdi’ ni ma chag ngak, nib muun ngay A. H. Macmillan. Kan nog e thin ni googsur u morngaagrad, ma de tay e pi tayugang telrad ngorad ni yad be yog ni dar rin’ed ban’en ni aram rogon.

20, 21. Rogon ni kan yiiynag ko Malaki 3:1-3, ma mang e yibe rin’ ko girdien fachi ulung?

²⁰ Yugu aram rogon ni dar nanged e ngiyal’ nem machane aram e yibe biechnagrad, ni bod ni be yog u Malaki 3:1-3 ni gaar: “Mini’ e rayog rok ni nge athamgiliy e re Rran nem ni bay yib riy? Mini’ e rayog rok ni nge fos nnap’an nra yib i m’ug? Ra yib ma ra bod ba nifiy ni ma rannag e wasey nge par ndaki maathuk ban’en ngay, ma bod e sop nib gel. Bay yib [fare mol’og ko m’ag rok Got] ni bod be’ ni ma rannag e silber ko nifiy nge par ndaki maathuk ban’en ngay. Bayi machalbognag e pi prist nu Levi ni bod rogon e silber nge gol ni yima rannag ko nifiy nge par ndakuriy ban’en nib maathuk ngay. Ma aram e bay ra pied ngak [Jehovah] e mit i n’en nib mat’aw ni nga ni pi’ ngak ni maligach.”

²¹ Ma nap’an ni ke chugur nga tungun e World War I ma ki yib reb e skeng ko pi Bible Student​—ko yad ra par u mathilin e magawon ko pi nam. (John 17:16; 18:36) Boch e girdi’ e dar pared u mathilin e magawon. Ere nap’an e 1918, ke l’og Jehovah “fare mol’og ko m’ag,” ni aram Kristus Jesus, nge yan nga tempel Rok nib spiritual ni nge klinnag e piin ni ma liyor ngak ni yad buch uw nge chuweg e alit ko fayleng rorad. Piin ni ke mudugilan’rad ni ngar pared nib yul’yul’ e kar filed ban’en riy mar mon’oggad iyan mi yad pasig i wereg e machib.

22. Mang e ka bay ni ngan weliy u morngaagen e skeng ko michan’uy?

²² N’en ni kad filed e gathi ke mus ni chep. Ya ba l’ag ko rarogon e ulung rok Jehovah u ga’ngin e fayleng ko ngiyal’ ney. Ma bin migid e thin e ra weliy boch e skeng ni ke yib ko girdi’ rok Got ko ngiyal’ ney ma gad ra guy ko uw rogon nrayog ni ngad gelgad ko pi skeng nem.

Ka Ga Manang?

◻ Susun mang fan ni nge lemnag e girdi’ rok Jehovah ni yira skengnag e michan’ rorad?

◻ U m’on ko 1914 ma uw rogon e athamgil ni kan tay ni ngan wereg e thin rok Got?

◻ Mang fare “Photo-Drama,” ma mang angin ni yib riy?

◻ Uw rogon ni kan skengnag e michan’ ko piin ni kan dugliyrad ko pi duw ni 1914-18?

[Sasing ko page 12]

Nap’an e ngiyal’ ntungun e bin 19 e chibog nge tabolngin e bin 20 e chibog, ma girdi’ u boor e nam e be fil e Bible u daken e pi babyor ni “Millennial Dawn” ma munmun min pining e “Studies in the Scriptures” ko pi babyor nem

[Sasing ko page 13]

Reb e babyor ni yoloy C. T. Russell ni ke weliy boch e thin riy e be gaar: “Fare kachido ni The Photo-Drama of Creation’ e aram ban’en ni fl’eg fare IBSA​—ni International Bible Students Association. Ya be nameg ni ngan fil ban’en ngak e girdi’ ni boor nib puluw ko Bible ma be micheg e Bible”

[Sasing ko page 15]

Ke milekag Demetrius Papageorge iyan ni be dag fare kachido ni “Photo-Drama of Creation.” Ma munmun, ma kan nin’ nga kalbus ni bochan ni ke par u mathilin e magawon ko fayleng ya ir reb e Kristiano