Rogon u Wan’ e Kristiano e Pi Yalen ko Gum’eyag

1, 2. Nap’an ni yim’ be’ ma mang e ba t’uf ni ngan rin’, ma mang boch e magawon nrayog ni nge yib ko pi Kristiano?

¹ Faanra yim’ be’ nib tomgin ni be’ nib t’uf rodad ma ba gel e kireban’ riy. Mo’maw ni ngan nang fan ma ba gel e amith u gum’erchaey. Ngan guy be’ nib t’uf rodad ni be yim’ u tomren ni ke gafgow ko m’ar nib n’uw nap’an e ba thil, machane ku ba gel e kireban’ riy.

² Demtrug mang e buch me yim’ be’ nib t’uf rodad, ma thingarni fl’eg laniyan’ e piin ke kireban’rad ni bochan. Ma be’ ni Kristiano ni ke kireban’ e sana ran togopuluw ngak ni bochan e girdi’ ni yad ba adag ni ngar folgad ko boch e yalen ko gum’eyag. Aram rogon u boor e binaw u Africa nge Micronesia.

3. Rogon ni be yog ko James 1:27, ma susun mang e n’en ni baga’ fan nib l’ag ko n’en ni ngan yarmiy ko gum’eyag, ma mang boch e deer ni susun ni ngad fithed gadad?

³ Mang e ra ayuweg e Kristiano ni nge siy i un ko boch e yalen ko gum’eyag ni de puluw ko Bible? Uw rogon nrayog ni nge pi’ e pi Kristiano e athamgil nga laniyan’ e girdi’ ko pi ngiyal’ ni aram rogon? Piin ni be gayiy rogon ni nge felan’ Jehovah ngorad e yad ba adag ni ngar nanged e pi fulweg ko pi deer nem, ya “Baaray e n’en ni be finey Got ni Chitamangiy ni ir e bin machalbog ma ba riyul’ e liyor ngak, ni aram e ngan ayuweg e bitir ndariy e gallabthir rorad nge piin ni ppin ni ke yim’ e pumoon rorad ma yad be gafgow, mu un ayuwegey nge dabi kirebnigey e kireb nu fayleng.”—Jas. 1:27.

4. Mang e ba l’ag ko boor e yalen ko gum’eyag ma mang e ma lemnag e girdi’ ni thingara rin’ed?

⁴ Yalen e Ba L’ag nga Ban’en ni Ke Mich u Wan’uy: Boor e yalen ko gum’eyag e ba l’ag ko mich u wan’uy ni piin ni kar m’ad e yad ba fos u giyow ko kan ni yad e girdi’ rodad kakrom. Ma ma lemnag e girdi’ ni thingara felan’naged e pi kan nem mar rin’ed boch ban’en. Fa yad ma lemnag ni ra damumuw ngorad e piin buguli yoror rorad ni yad ma lemnag ni ra yib e kireb nga daken e binaw ni faanra dabni rin’ boch e yalen.

5. Mang boch e thin nriyul’ ko Bible ni de m’ag ko boor e yalen ko gum’eyag?

⁵ Tin nriyul’ e Kristiano e thingari dabi pag e marus ko girdi’ nge n’igin ni nge un ko boch e yalen nde felan’ Got ngay. (Prov. 29:25; Matt. 10:28) Be dag e Bible ni piin ni kar m’ad ma dariy ban’en ni yad manang ya be gaar: “Piin ni kab fas e yad manang ni yad ra yim’; machane piin ni kar m’ad e dariy e chi n’en ni yad manang . . . dariy e maruwel, dariy e tafinay, dariy e llowan’, dariy e gonop u lan e low ko yam’ ni aram e gin ni ga ra yan ngay.” (Ekl. 9:5, 10) Ere i ginang Jehovah Got e girdi’ rok nkakrom ni dabra guyed rogon ni ngar felan’naged e pi yam’ ara ngar nongad ngorad. (Deut. 14:1; 18:10-12; Isa. 8:19, 20) Pi thin nriyul’ ney ko Bible e de m’ag ko boor e yalen ko gum’eyag.

6. (a) Boor e binaw ma mang e ma buch u tomren ni yim’ be’? (b) Mang e ba l’ag ko pi yalen ney?

⁶ Pi Muulung ko Gum’eyag ni All-Night Wake: Boor e binaw ma ma muulung e girdi’ u tafen facha’ ni kem’ ma yad ma par nib od u polo’ e nep’. Ma boor yay ma yima tay e mur ma yima chubeg e musik nib ga’ lingan. Yima yog ni aram rogon ma ngan felan’nag e yam’ ma yibe ayuweg e tabinaw ko pig. Ku yima pi’ e welthin ni fan ni nge felan’nag e yam’. Tomren fare welthin ma ma yin’ e girdi’ e tang ko teliw nge mu’ ma yugu be’ e ra pi’ e welthin. Rayog ni nge buch ni aram rogon nge mada’ ko ngiyal’ ni kakadabul.a

7. (a) Mang fan ndabi un e tin riyul’ e Kristiano ko muulung ko wake? (b) Mang fan nib l’ag e pi n’en ney ko pig?

⁷ Tin riyul’ e Kristiano e dabi un ko muulung ni all-night wake ara ngan par ni polo’ e nep’ ko gum’eyag ya be dag e Bible ni piin ni kar m’ad ma dabiyog ni ngar ayuweged ara ngar rin’ed e kireb ko piin nib fos. (Gen. 3:19; Ps. 146:3, 4; John 11:11-14) Be yog ko Bible ni dabni un ko pig. (Rev. 9:21; 22:15) Machane sana ba ppin ni Kristiano ni kem’ figirngin e dabiyog ni nge taleg e girdi’ ngar rin’ed boch ban’en nib l’ag ko pig. Sana yad ra yog ni thingarni tay e all-night wake u tafen. Mang e rayog ni nge rin’ e pi walag ni ngar ayuweged e pi Kristiano ni ke yib e re magawon ney ngorad?

8. Uw rogon nrayog ko pi walag ngar ayuweged e Kristiano ni kem’ e girdi’ rok ni nge par nib klin ko tirok Got ban’en ni faanra boch e girdi’ e ra guy rogon ni ngar towarsariyed ni nge un ko yalen ko teliw ni googsur?

⁸ Ke ayuweg e pi piilal ko ulung e tabinaw ko Kristiano ni kem’ be’ nib t’uf rorad ya kar weliyed boch ban’en ko girdi’ rorad nge piin buguli yoror rorad. Tomren ni kan non ngorad ma sana ra fel’ u wan’ e pi girdi’ ney ni ngar chuwgad ko re tabinaw nem u fithik’ e gapas ma ngar muulunggad biyay ko gum’eyag yugu reb e rran. Machane mang ni faanra ra damumuw boch e girdi’? Sana ran cham ni faanra ran guy rogon ni nguun weliy fan ngorad. ‘Ya tapigpig rok Somol e thingari dabi un ko tugthin. Thingari munguy ngak urngin e girdi’, ma nge par ni ir reb e tamachib nib fel’ ma ba gum’an’. (2 Tim. 2:24) Ere sana dabiyog ko ppin ni Kristiano ni kem’ figirngin nge bitir rok ni ngar taleged e girdi’ rorad mar gelgad. Machane dabra uned ko pi n’en nib l’ag ko pi yuraba’ i teliw ni googsur ni yibe rin’ u tabinaw rorad, ya yad ma fol ko motochiyel rok Got ni begaar: “Dab mu guyed rogon ni ngam pachgad ngak e piin nde mich Got u wun’rad nguum maruwelgad u taabang nib taareb lanin’med.—2 Kor. 6:14.

9. Uw rogon ma fare thin ko 2 Korinth 6:14 e ba m’ag ko gum’eyag ni be rin’ reb e girdi’ ko teliw ni googsur?

⁹ Pi thin ney e ku ba m’ag ko ngiyal’ ni ngan tay fare yam’ nga lan e low. Dabi un e Pi Mich Rok Jehovah ko tang, nge meybil, nge pi n’en ni be rin’ e girdi’ ko teliw ni googsur. Faanra lemnag e pi Kristiano ni thingara uned ngay ya aram e girdi’ rorad machane dabra uned ko pi n’en ni yad be rin’.—2 Kor. 6:17; Rev. 18:4.

10, 11. (a) Muulung ko gum’eyag ni ma tay e Pi Mich Rok Jehovah e bay fan ko mang? (b) Uw rogon e gum’eyag ni aram rogon u wan’ e pi tolang ko am nu South Africa?

¹⁰ Gum’eyag ni Ngan Tay Fan: Gum’eyag ni ma tay e Pi Mich Rok Jehovah e dabi unegd e pi n’en ni yibe rin’ ni ngan felan’nag e yam’. Yima pi’ e welthin u daken e Bible u lan e Kingdom Hall ara gin ni funeral parlor, ara tabinaw rok facha’ ni kem’, ara gin ni ngan tay fare yam’. Fan fare welthin e ngan fl’eg laniyan’ e piin ni ke kireban’rad u daken e thin ko Bible u murung’agen e yam’ nge athap ko fas ko yam’. (John 11:25; Rom. 5:12; 2 Pet. 3:13) Rayog ni ngan yin’ e tang nu Bible, ma tomren fare muulung ma ngan pi’ e meybil.

¹¹ Kan tay reb e gum’eyag ni aram rogon ko reb e Mich Rok Jehovah ni ir walagen Nelson Mandela ni ir fare president faram ko nam nu South Africa. Tomren fare muulung ma ke pining fare president e magar ngak fa en ni pi’ e welthin. Boor e girdi’ nib tolang ko am e kar uned ngay. Yog be’ ni cabinet minister ni gaar: “Aram e gum’eyag ni bin th’abi fel’ uw rogon ni kan rin’.”

12. Mang e yalen ko boch e binaw ni ngan dag ko girdi’ e kireban’uy, ma ba puluw e re n’ey ko Kristiano?

¹² Rayog ni Ngan Chuw ko Miti Mad ni Fan ko Gum’eyag? Ma kireban’ e Pi Mich Rok Jehovah u nap’an ni yim’ be’ nib t’uf rorad. Bod rogon Jesus ma yad ma yor. (John 11:35, 36) Machane der ma lemnaged nib t’uf ni ngar daged e kireban’ rorad u fithik’ e yoor ni fan ni nge guy e girdi’. (Mu taarebnag ko Matt. 6:16-18.) Bay boch e binaw ma piin ni ppin ni kem’ figirngirad e susun ni ngar chuwgad nga miti mad ni fan ko kireban’ ni ngan felan’nag e yam’. Susun ni ngan chuw ko pi mad ney in e pul fa reb e duw u tomren fare gum’eyag, ma ngiyal’ ni ke m’ay e re ngiyal’ i n’em ma yibe tay e mur.

13, 14. Mang e ke buch u nap’an ni de un e girdi’ ko yalen ni ngan dag e kireban’ u p’eowchen e girdi’ ma mang angin ni yib ngorad?

¹³ Faanra dabni dag u p’eowchen e girdi’ e kireban’, ma yibe lemnag ni yibe dariy fannag fare yam’. Bochan e re n’ey ma pi pilung nu Swaziland e kar tulufed e Pi Mich Rok Jehovah ko tabinaw rorad nge binaw rorad. Machane pi walagrad nib spiritual u yugu boch e binaw e kar ayuweged e pi Kristiano ney ni yad ba yul’yul’.

¹⁴ Fare High Court nu Swaziland e ke tay nib sorok e Pi Mich Rok Jehovah ma susun ni ngan pagrad ngar sulod nga taferad nge binaw rorad. Ma ku bay reb e ppin ni Kristiano ni kem’ figirngin ma kan pag ni nge par u tafen u tomren ni kan dag e babyor ni yoloy figirngin nge tape recording ni be yog ni dabi chuw leengin ko re mit i mad nem. Ere ke micheg ni be tay fan figirngin.

15. Mang e rayog ni ngan rin’ nge mom ko girdi’ ni kem’ be’ nib t’uf rorad ngar ted e gum’eyag ni ma tay fan ku Jehovah?

¹⁵ Baga’ fan ni ngan yoloy nga but’ e n’en ni ngan rin’ ko gum’eyag u m’on riy, ma ri aram rogon u yu gin ni yibe rin’ e pi yalen nem nde puluw ko Bible. Ngan lemnag Victor ni be’ nu Cameroon. Ke yoloy nga but’ e n’en ni ngan rin’ ko ngiyal’ nra yim’ nge gum’eyag rok. Girdien e tabinaw rok e yad e piin nib tolang ma yalen rorad e ba gel nib muun ngay ni ngan liyor ko yil ko lolugen e girdi’. Victor e ir be’ ni yad ma tay fan, me ere ke nang ni ran rin’ ni aram rogon ko yil ko lolugen u tomren ni yim’. Ere ke yoloy nga but’ nib tamilang ko uw rogon nra tay e Pi Mich Rok Jehovah e gum’eyag rok. Aram e ke mom rok leengin nge bitir rok, ma kan tamilangnag e machib ko girdi’ u lan e binaw.

16. (a) Mang e ke suwey laniyan’ boch e girdi’ ma kar turguyed boch ban’en ni kireb ni fan ko pi n’en ni ngan rin’ ni fan ko be’ ni kem’? (b) Rogon ni be yog ko 1 Korinth 10:32 ma mang e susun ni ngad lemnaged?

¹⁶ Dabni Fol ko Yalen nde Puluw ko Bible: Boch e piin ni manang e thin ko Bible e kar rusgad ni ngar pared nib lingagil. Dubrad ni ngan gafgownagrad me ere kar guyed rogon ni ngar felan’naged e piin buguli yoror rorad mar n’igined nge m’ug ni yad be tay e wake ni fan ko yam’. Ffel’ ni ngan yan i guy e piin ni kem’ e girdi’ rorad ngan fl’eg lanin’rad, machane de t’uf ni ngan tay reb e muulung min welthin u tafen fa en ni kem’ u gubin e rran u m’on ko gum’eyag. Ngan rin’ ni aram rogon ma rayog ni ngan kirebnag laniyan’ boch e girdi, ya yad ra lemnag ni piin ni be un ngay e de michan’rad ko n’en ni be yog e Bible u murung’agen rarogon e yam’—1 Kor. 10:32.

17. (a) Mang e buch ko maruwel ko ulung ko machib u boch e ulung u nap’an ni yim’ be’? (b) Mang boch e thin ko Bible nra ayuwegdad ngad pared nib th’abthebel ko tirok Got ban’en?

¹⁷ Be yog e Bible ko pi Kristiano ni ngar mon’eged e liyor ku Got ma ngar fanayed e tayim rorad u fithik’ e gonop. (Matt. 6:33; Efe. 5:15, 16) Machane boch e binaw ma de un e ulung ko machib ko reb e wik ni bochan e yam’. Gathi ke mus u Africa ni bay e re magawon ney. Reb e report u South America e be weliy u murung’agen reb e gum’eyag ni gaar: “Dalip e muulung ko Kristiano ma ri buch uw e girdi’ ni kar uned ngay. Ma ragag e rran e de un e girdi’ ko machib. Mus ni piin ni gathi girdi’ ko ulung nge pi Bible student ma kar gingad ngay ma ke kireban’rad ya be un e pi walag ni pumoon nge ppin ko pi n’ey ko yam’.”

18. Mang boch e yalen ko gum’eyag ni ke fol boch e girdi’ riy, ma aram ma mang e lemnag e girdi’?

¹⁸ U boch e binaw ma girdien e tabinaw ku be’ ni kem’ e ra pining boch e girdi’ nga taferad ngar abichgad u tomren fare gum’eyag. Machane boor yu yang u Africa ma bokum miriay e girdi’ ni ma un ko gum’eyag e ma yan nga tafen fa en ni kem’ ma yad ba adag e mur, ma boor yay ma yibe pi’ e gamanman ko maligach. Boch e girdi’ ko ulung ko Kristiano e kar uned ko re yalen ney, ma aram ma be lemnag e girdi’ ni yad be fol ko yalen ni ngan felan’nag e yam’.

19. (a) Mang e susun ni nge pow’iy e girdi’ ngar turguyed boch ban’en ni fan ni ngan pi’ puluwon e gum’eyag? (b) Mang e ra buch me pi’ e ulung e ayuw?

¹⁹ Gum’eyag ni ma tay e Pi Mich Rok Jehovah e de tolang puluwon me ere dabi magawonnag e piin ni kem’ e girdi’ rorad. Ere de t’uf ni ngan yarmiy ni ngan pi’ e salpiy ni fan ni ngan pi’ puluwon e gum’eyag. Faanra bay boch e ppin ni kem’ figigirngirad ni yad ba gafgow ko salpiy ma dabi siy ni bay boch e girdi’ ko ulung nra pied e ayuw. Faanra de gaman e re salpiy nem ma rayog ni nge yarmiy e pi piilal ni ngan pi’ e ayuw ko piin ni bay rogon.—1 Tim. 5:3, 4.

20. Mang e ke mudugilan’ e piin nib t’uf Jehovah rorad ni fan ko yalen ko yam’?

²⁰ Gathi gubin e yalen ko yam’ ma be togopuluw ko Bible. Machane faanra er rogon ma ke mudugilan’ e pi Kristiano ni ngar folgad ko Bible.b (Acts 5:29) Yugu aram rogon ni rayog ni nge yib e togopuluw ngorad, machane boor e tapigpig rok Got ni rayog ni ngar micheged ni kar gelgad ko pi skeng ney. Kar rin’ed ya Jehovah e pi’ gelngirad, ni ir fare Got ni “urngin mit e ayuw me ir e be yib rok ngodad” ma pi walag e ayuwegrad ya kar fl’eged lanin’rad u fithik’ e gafgow rorad.—2 Kor. 1:3, 4.

[Boch e Thin nra Tamilangnag Murung’agen]

[Deer ni Ngan Pi’ e Fulweg Riy]