Rogon e Tayam’ u Wan’ e Kristiano

KE MADA’ lamrad nga lang ni yad be yor ni kari kireban’rad. Kar chuwgad ko mad nib talumor ma kar paged yad nga but’ ni yad be dolo’loy. Yima tay e salpiy nge boch e tow’ath nga lan fare kahol ara nga tooben. Mang fan ni yad be rin’ ni aram rogon? Ireray e n’en ni yima rin’ u nap’an e tayam’ ni ma muulung bokum miriay e girdi’ nga taabang ni ngar fingichiyed fare yam’.

Boor e Pi Mich Rok Jehovah ni yad ma par ko binaw ni bay e girdi’ rorad riy nge piin buguli yoror rorad nri yad ma tayfan boch e yalen ni de puluw ko Bible, maku yad ma tamdag ko yam’. Mmich u wan’ bokum milyon e girdi’ nnap’an nra yim’ be’, ma ke mang thagith ni rayog ni nge gafgownag ara ayuweg e piin ni kab fas. Re michan’ ney e kan puthuy nga boch e yalen ko tayam’. Riyul’ ni kireban’ ni yima ta’ u nap’an ni ke yim’ be’ e ban’en ni ka yima rin’. Bay yu ngiyal’ ni yor Jesus nge pi gachalpen u nap’an ni ke yim’ be’ nib t’uf rorad. (John 11:33-35, 38; Acts 8:2; 9:39) Machane darur rin’ed nib pag rogon ni bod ni ma rin’ e girdi’ ko ngiyal’ nem. (Luke 23:27, 28; 1 Thess. 4:13) Mang fan? Reb i fan e yad manang e tin riyul’ u murung’agen e yam’.

Be yog e Bible nib tamilang ni gaar: “Piin bfos e yad manang ni bay ra m’ad, machane piin nib yam’ e dariy ban’en ni yad manang. . . . Urngin e t’ufeg rorad, fanenikan nge tin yad be yim’ ni bochan e ke un ngorad ko yam’. . . . Demtrug ko mang e ga be rin’ ma ngam rin’ ni kari mus rogom riy, ni bochan e dakuriy ban’en ni ngan rin’, ma dariy e tafinay, ma dariy e llowan’, ma dariy e gonop u lan e fayleng ko yam’ ni aram e gin ni ngam man ngay.” (Ekl. 9:5, 6, 10, BT) Pi thin ney u Bible ni kan thagthagnag e be tamilangnag nnap’an nra yim’ be’ ma dakuriy ban’en ni ka manang. Dabkiyog ni nge lem ara thamiy ban’en ara non. Yira nang e tin riyul’ u Bible ma uw rogon ni ra ayuweg e Kristiano u nap’an e tayam’?

Dab ‘Kum Rin’ed Ban’en nde Klin’

Pi Mich rok Jehovah e dakurur uned nga boch e yalen ni yima rin’ ko binaw rorad nib l’ag rogon ko fare machib ni piin kar m’ad e ka yad ba fas u bang, ma rayog ni ngar rin’ed ban’en ngak e piin ni kab fas. Boch e yalen ni bod e ngan adfeg e yam’ fa ngan par nga tooben e yam’, nge mur u tomren e gum’eyag, nge ngan madnomnag e rorran ni yim’, nge ngan pi’ e maligach ko yam’ nge munfingich. Urngin e pi ney e dabun Got ya bochan ni bay rogon ko machib nib togopuluw ko thin nu Bible u murung’agen e yaal ni dabi yim’. (Isaiah 26:14, BT) Tin riyul’ e Kristiano e ‘dabiyog ni ngar abichgad u tebel rok Somol mi ki yad abich u tebel rok e pi moonyan’,’ ar fan ni dubrad ni ngar uned ko pi yalen nem. (1 Kor. 10:21) Yad ma fol ko motochiyel ni gaar: “Thingar mu chuwgad rorad, ngam pithiged gimed rorad. Ma dariy ban’en ni ngkum rin’ed ko n’en nde klin.” (2 Kor. 6:17) Machane gathi gubin ngiyal’ nib mom ni ngan palog ko pi yalen nem.

U yu yang u fayleng, e yad ma fol ko pi yalen nem ya ke mich u wan’rad nra puwan’ e thagith nra dabin rin’. Yibe lemnag ni ra dab ni fol ko pi yalen nem ma ra gafgow e binaw. Bochan ni der ma un e Pi Mich Rok Jehovah ko pi yalen nem, ma yima gathibthibnagrad, ma kan dabuy dakenrad ni mus ko girdi’ rorad. Yima yog ni yad be magawonnag e girdi’ ma darur ted fan e yam’. Yu ngiyal’ ma boch e piin ni gathi yad e Pi Mich e yad ma towasar ni ngar ted murung’agen e tayam’ ko Kristiano. Ere uw rogon ni dabda maluagthingad e piin ni yad be towasariydad ni ngad uned ngorad ko yalen e tayam’ ni de m’agan’ Got ngay? Maku mang e ngad rin’ed ngad paloggad ko yalen ni kireb nra kirebnag e tha’ u thildad Jehovah?

Ngam Tamilangnag e Tin Kam Dugliy

Yalen u boch e binaw, e ra ba um e girdi’ ma bay e en nib ga’ ni ir e nge turguy e n’en ni ngan rin’ ko fare gum’eyag. Reb e Kristiano e thingari weliy nib tamilang rogon e gum’eyag ni ma tay e Pi Mich Rok Jehovah nib puluw nga kenggin e machib nu Bible. (2 Kor. 6:14-16) Ngan guy rogon ni n’en ni ngan rin’ e dabi magawonnag laniyan’ e pi walag nge yugu boch e girdi’ ni yad manang e n’en ni gad ma machibnag u murung’agen e yam’.

Faanra ke yim’ be’ min nog ngak e ulung rodad ni gadad e ngad yarmiyed e tayam’, ma piin ni piilal e yad ra yog ngak e pi walag ni ke yim’ be’ nib t’uf rorad ko mang e ngan rin’. Ma ngar ayuweged ni nge tamilang boch e thin nu Bible u wan’rad ni bay rogon ko tayam’ ma rayog ni ngan rin’ urngin ban’en nib puluw ko thin rok Got. Faanra ke yib boch e girdi’ ni gathi yad e Pi Mich ngar rogned ni ngan rin’ boch ban’en nde puluw ko Bible, ma ba ga’ fan ni dabda uned ngorad ma ngad weliyed ngorad e michan’ rodad u fithik’ e sumunguy nge tayfan. (1 Pet. 3:15) Ma faanra ri yad be gelfen ni ngar rin’ed e tin ni kar turguyed ma mang e susuna ngad rin’ed? Ere ngad chuwgad. (1 Kor. 10:20) Ma rayog ni ngad tayed reb e welthin u Kingdom Hall ara yugu bang ni fan ko tayam’. Ni ngan beeg e “thin ko babyor nib thothup” ni nge pi’ e athamgil nga lanin’dad. (Rom. 15:4) Yugu aram rogon nde moy fare yam’ u rom, mab puluw ni ngan pi’ fare welthin. (Deut. 34:5, 6, 8) Ngongol ko piin ni de michan’rad e rayog ni nge gelnag e kireban’ rodad. Machane ba pagan’dad ya gad manang ni manang Got ni gad baadag ni ngad rin’ed e tin nib mat’aw. Ya nge m’ug ni re gelngin nem ni ir e ba th’abi gel e “yib rok Got.”​—2 Kor. 4:7.

Ngam Yoloy e N’en ni Ga Baadag

Fel’ ni ngam yoloy ngan nang ko mang e ngan rin’ ngom u nap’an ni ga ra yim’. Ya ba mom ni ngan weliy ko piin ni gathi yad e Pi Mich ya ba ga’ ni yima tay fan e thin ko yam’. Rib ga’ fan ni ngan yoloy nga babyor ko uw rogon ni ngan tay fare tayam’, nge wuin nge uw e gin ni ngan tay riy, ma mini’ e nge tay murung’agen. (Gen. 50:5) En ni ke fal’eg e nge yoloy fithingan ngay nge ani mich rok. Piin nib tamilangan’rad ko thin nu Bible e dab ra songad ngar pilibthirgad fa kari gel e m’ar rorad mfin ra fal’eged e babyor.​—Prov. 22:3; Ekl. 9:12.

De mom rok boch e girdi’ ni ngar fal’eged e babyor ni aram rogon. Machane, faanra ngam rin’ ni aram rogon ma be m’ug ni kam ilal ko tirok Got ban’en ma ga be lemnag boch e girdi’. (Fil. 2:4) Ffel’ ni gur e ngam rin’ e re n’ey ko bin ni ngam pag fan ko girdi’ rom. Ya rayog ni ngan towasariyrad ngar uned nga boch e yalen nde puluw ko Bible ni aram e tin ni dabum ni ngan rin’.

Tayam’ ni De Yoor e Salpiy ni Ngan Fanay Ngay

Boor e binaw ni girdi’ riy e yad be lemnag ni ba t’uf e tayam’ ni boor e salpiy ni yima fanay ngay ya ra danga’ ma ra damumuw e thagith rorad. Maku yad ma rin’ ni aram rogon ni bochan e nge “guy e girdi’” nrib t’uf fare yam’ rorad ara nge nang e girdi’ nib fel’rogorad. (1 John 2:16) Yima fanay boor e tayim nge maruwel nge chugum ni fan ko tayam’ ya “yibe lemnag nib fel’.” Yu ngiyal’ min pag ni nge yan boor e rran ma feni k’eyag e yam’ nge yog ni ngan kunuy boor e salpiy ni fan ko puluwon e sikoki nge yog ni ngan sulweg fare yam’ nge girdien e tabinaw rok ko binaw rorad. Machane, faanra gonopiy e tin riyul’ e Kristiano e n’en ni ngan rin’ nge n’en ni dabin rin’ u nap’an ni ke yim’ reb i girdien e tabinaw rorad ma ra ayuwegrad ni dabi magawon e pigpig rorad ku Got.​—Fil. 1:10.

Pi Kristiano ni kar ilalgad ko tirok Got ban’en e kar nanged nib fel’ ni ngar paloggad ko pi yalen ni ma rin’ e girdi’ ndar nanged e motochiyel rok Got. Gad manang ni boch e yalen ni boor e salpiy ni yima fanay ngay e de puluw ko thin rok Got ma de “yib rok e en ni Chitamangiy; ya urngin me yib rok e fayleng.” (1 John 2:15-17) Thingar da kol ayuwgad ni dabi af ngodad ngongolen boch e girdi’ ni yad ba ufanthin. (Gal. 5:26) Kan guy ni bochan e tamdag ko yam’ nge girdi’ ma ba ga’ ni boor e girdi’ ni ma un ko tayam’ ma aram fan ni ke mo’maw’ ni ngan gagiyegnag. Ngan tay fan e yam’ e ba mom ni nge k’aring e girdi’ ngar ngongliyed boch e ngongol nde yalen. Tayam’ ni aram rogon, e sana yima dolo’loy, ma yibe faray owchen fare yam’, ma yibe non ngak ni gowa ra rung’ag, ma yibe tay e salpiy nga pa’ nge boch e chugum. Faanra buch ni aram rogon ko tayam’ ni be tay e Kristiano, ma yibe darifannag fithingan Jehovah nge girdi’ rok.​—1 Pet. 1:14-16.

Gad ra nang e tin riyul’ rarogon e yam’ ma ra ayuwegdad ni ngad tayed e tayam’ nib puluw ko thin rok Got. (Efe. 4:17-19) Yugu aram rogon ni Jesus e ir be’ ni th’abi gilbuguwan ni immoy, min k’eyag ni de yoor ban’en ni kan rin’ ni fan ngak. (John 19:40-42) Piin ni bay “laniyan’ Kristus” rorad e yad manang nrib fel’ e gum’eyag ni aram rogon. (1 Kor. 2:16) Ba tamilang, ni ra ngan tay e tayam’ ko Kristiano ni aram rogon ma ra ayuwegey ni ngan siyeg e yalen nib togopuluw ko thin rok Got. Ma ra par ni ba gapas, mab fel’, mab m’ag ko girdi’ nib t’uf Got rorad.

Tomren e Gum’eyag

Ba ga’ ni yima rin’ boch ban’en u tomren e gum’eyag. U boch e nam, e aram e ngiyal’ ni yima fal’eg thilin boch e girdi’ ko fare tabinaw nib kireb thilrad. Yima wereg e langith u tooben fare malang ya yibe lemnag ni ireray e pow ni kan n’ag fan e kireb. Ya ra danga’ ma ra damumuw fare yam’.

Tin riyul’ e Kristiano e yad manang rarogon e yam’ ma darur ma tamdaggad ko fare yam’. (Ekl. 9:5, 10) Bochan ni kar nanged ni boch e tayam’ e bay rogon ko machib ni googsur ere dubrad ni ngar uned ngay. Ngan un nga boch e yalen nib togopluw ko thin nu Bible e be darifannag Got ma be magawonnag laniyan’ boch e tapigpig rok Jehovah.

Nge Guy e Girdi’ ni Gad ba Thil

Ri gad ba felfelan’ ni da ku da tamdaggad ko fare yam’ ni aray e n’en ni ma yib ngak e girdi’ ni dar nanged e tin riyul’! (John 8:32) Gadad e ‘girdi’ nib mil suwdad ko tamilang’ e ku ma kireban’dad u nap’an ni kem’ be’ rodad e ri ba mudugil e athap rodad ni ra fas e yam’. (Efe. 5:8; John 5:28, 29) Athap ko fas ko yam’ e ra ayuwegdad ni dabi gel e kireban’ rodad ni bod e “piin ni dariy ban’en ni ke l’agan’rad ngay.” (1 Thess. 4:13) Re n’ey e be pi’ e athamgil nga lanin’dad ni ngad yul’yul’gad ko liyor nib machalbog, ma dab da rus gad ko girdi’.​—1 Pet. 3:13, 14.

Faan gad ra fol ko thin nu Bible ma ra guy e girdi’ e ‘thil u thilin e piin ni be pigpig ngak Got nge piin ni der pigpig ngak.’ (Mal. 3:18) Ra yan i taw nga ba ngiyal’ ma dakuriy be’ ni ra yim’. (Rev. 21:4) Nap’an ni gad be sonnag e tin ni ke micheg Jehovah, ma manga yigi pirieg ni ka gadad be par nib machalbog ma dariy thibngidad ni gad ba dar ko ngongol nib kireb nib muun ngay e tayam’ ni de puluw ko thin rok Got.​—2 Pet. 3:14.

[Picture on page 30]

Rib fel’ ni ngan yoloy nga but’ e n’en ni gadad baadag ni ngan ni rin’ u nap’an ni gad ra yim’