Deer ko Piin Ma Bieg

Faanra ra li’ be’ ir ngem’, rayog ku reb e Kristiano u lan e ulung ni ngan pi’ e welthin u nap’an e gum’eyag?

Ra reb e tapigpig ni Kristiano ma susun ni nge turguy e tin ba fel’ ko nangan rok ko rayog ni nge pi’ e welthin u nap’an e gum’eyag rok e en yibe lemnag ni ke yim’ ni gowa ke li’ ir. Nap’an ni ra turguy ban’en, mab t’uf ni nge lemnag boch e deer ni baaray: Uw rogon be’ ni ke li’ ir kem’ u wan’ Jehovah? Riyul’ ni ke yim’ fa cha’ ni bochan e ke li’ ir? Bochan ke kireb lolugen ara ke gel ke gel e kireban’ rok ma arfan ni ke li’ ir kem’? Uw rogon u wan’ e girdi’ ko binaw rok fa cha’ ni ke li’ ir kem’?

Gadad e piin Kristiano, gadad baadag ni ngad nanged ko uw rogon be’ ni ke li’ ir u wan’ Jehovah. Ma lemnag Jehovah ni yafas e ba thothup ma rib t’uf rok. (Genesis 9:5; Psalm 36:9) Be’ ni ke li’ ir ni lem rok e ir e ke thang e pogofan, ma arfan ni de fel’ owchen Got. (Exodus 20:13; 1 John 3:15) Bochan e re n’eney ma riyul’ ni dabiyog ni ngan pi’ e welthin u nap’an e gum’eyag ku be’ ni ke li’ ir?

Amu lemnag e n’en ni buch rok Saul ni fare Pilung nu Israel. Nap’an ni ke guy ni dabiyog ni nge gel ko fa bin tomur e mahl ni tay ngak piyu Philistine, ma de pag Saul e pi cha’ nem ni toogor rok ngar gafgownaged, “Me girngiy Saul e birok e sayden u tafen nge pag ir nga taban.” Nap’an ni pirieg piyu Philistine downgin, mi yad richibiy nga dow e rungrung ko fare mach ni Beth-shan. Tomren ni ke rungaag e girdi’ nu Jabesh-gilead e n’en ni ke rin’ piyu Philistine, mar bad ra feked downgin ngar urfiyed. Meere ra feked e yil’ rok ngar k’eyaged. Mi yad par ndar kayed ban’en ni medlip e rran, ya aram e yalen rok piyu Israel ni yad ma dag e kireban rorad u nap’an ni ra yim be’. (1 Samuel 31:4, 8-13; Genesis 50:10) Nap’an ni ke nang David, ni ir e en ke dugliy Jehovah, e n’en ni ke rin’ e girdi’ nu Jabesh-gilead, me yog ni gaar: “I Somol e nge fal’eg waathmed ni bochan ni kam daged rogon fanmed yul’yul’ ngak e pilung romed ya kam k’eyged. Ere Somol e nge runguymed ngi i par nib yul’yul’ ngomed. Ku arrogon gag nib fel’ e tin bay ug rin’ ngomed ni bochan e tin kam ngongliyed.” (2 Samuel 2:5, 6) De weliy e Bible murng’agen e girdi’ nu Jabesh-gilead ni kan pufthinnagrad nbochan kar rin’ed e yalen rorad u nap’an e gum’eyag ni kar ted ni fan ku Saul ni Pilung. Mu taarebnag ko pi cha’ ni kar m’ad ni dan k’eyagrad nbochan e kireb ni kar rin’ed. (Jeremiah 25:32, 33) Rayog ni nge fal’eg reb e Kristiano i lemnag fare chep u murung’agen Saul u nap’an ni ra turguy ban’en ko ra pi’ e welthin u nap’an e gum’eyag ku be’ ni kem’ ni ke li’ ir.

Rayog ni nge lemnag e en nra pi’ e welthin u nap’an e gum’eyag. De taareb rogon ko girdi’ ni ba mich u wan’rad ni dabi yim’ fare yaal, ya Pi Mich Rok Jehovah e der ma pi’ e welthin ni fan ko gum’eyag ni be lemnag ni fa cha’ ni ke yim’ e ke yan nga reb e fayleng. Ra pi’ e welthin ni gathi fan ku be’ ni ke yim’, ya nge fal’eg laniyan’ e piin kari kireban’rad ma ngeb angin ngak e girdi’ ni ur moyed u rom murung’agen rarogon e yam’. (Eklesiastes 9:5 10; 2 Korinth 1:3-5) Reb i fan ni ngan pi’ e welthin u nap’an e gum’eyag e nge ayuweg e girdi’ ni kar bad ni ngar fal’eged i lemnag ni yafas e dabi par nib n’uw nap’an. (Eklesiastes 7:2) Rayog ni ngan rin’ e re n’ey nfaanra ngan pi’ e welthin u nap’an e gum’eyag ku be’ ni ke li’ ir?

Riyul’, bay boch e girdi’ ni sana yad be lemnag ni riyul’ ni ke fek fa cha’ e pogofan rok ni lem rok, ma ri manang ni ke denen nib togopuluw ngak Jehovah. Machane rayog ni ngan dag ni riyul’ ni aram rogon e lem rok? Gathi ke li’ ir ya de yog ni nge gagiyegnag e lem rok ko ngiyal’ nem? Boch e girdi’ ni kar guyed rogon ni ngar li’ed yad e kar kolgadngan’rad ma da kur li’ed yad. Be’ ni ke li’ ir e dabiyog ni nge kalngan’ ko n’en ni ke rin’.

Yugu reb e n’en ni ku baga’ fan e boch e girdi’ e kar li’ed yad ya bochan ni ke kireb lolugrad. Riyul’ ni rayog ni nga nog ni pi cha’ nem e kar lied yad kar m’ad. Rogon boch e matheeg ni kan ta’, ma 90 pasent ko girdi’ ni kar lied yad e immoy e magawon rorad ni ke kireb lolugrad u boch e kanawo’ ara kar mechamgad ko drug. Ra n’ag Jehovah fan ko girdi’ ni kar li’ed yad kar m’ad ni bay e magawon rorad ni aram rogon? Dariy rogodad ni ngada turguyed ni fa cha’ ni kem’ e ke denen nib togopuluw ngak Jehovah ndabi n’agfan. Rayog ni nge lemnag e en nra pi’ e welthin e magawon ko fa cha’ ni kem’ nge tafalay ni ke un ngay kafram u nap’an ni be fal’eg i lemnag ni faanra ra pi’ e welthin ko gum’eyag.

Ka bay reb ni ngan lemnag: Uw rogon e n’en ni ke rin’ fa cha’ ni ke li’ ir kem’ u wan’ e girdi’ ko binaw rok? Ireray e n’en ni ngari tiyan’ e piin piilal ngay, ni be lemnag ni nge dabi kireb e ulung ko Pi Mich Rok Jehovah u wan’ e girdi’ ko re binaw nem. Be yan u rogon ni be lemnag e girdi’ ko re binaw nem murung’agen e girdi’ ni ke li’ ir kem’, e sana ra dugliy e piin piilal ni dabni pi’ e welthin ni fan ko girdi’ ni yoor ara dabni fek nga lan e Kingdom Hall.

Yugu aram rogon, nfaanra reb e Kristiano e kan wenignag ni ir e nge pi’ e welthin ko gum’eyag, ma sana ra lemnag rogon ni rayog ni nge rin’ e re n’enem. Faanra ke turguy ni nge yodor, ma susun nge kol ayuw ni nge dabi yog u nap’an e welthin rok ni rayog ni ngan faseg be’ ko yam’ ni aram rogon. Athap rok fa cha’ ni ke yim’ boch nga m’on e bay u pa’ Jehovah, ma dariy be’ nrayog ni nge yog ko ran faseg e cha’ nem fa danga’. En tapigpig ni be pi’ e welthin e rayog ni nge tiyan’ ko thin riyul’ u lan e Bible u murung’agen e yam’ ma nge fal’eg laniyan’ e piin ni ke kireban’rad.