Ramaen Jehovah E Ke Gal Nga Daken E Girdi’ Rok
“Mi gag Somol e bay gu mang tamilang ngom ni dariy n’umngin nap’an.”—Isaiah 60: 20.
1. Uw rogon ni ma flaabnag Jehovah e girdi’ rok ni yad ba yul’yul’?
“MA FALAN’ JEHOVAH ngak e girdi’ rok. Ma fl’eg gamogen e piin nib sobut’an’ me thapegrad.” (Psalm 149:4) Aram e n’en ni yog e ani yoloy e psalm kakrom ma chepin e girdi’ e ke micheg nib riyul’ e thin rok. Nap’an nib yul’yul’ e girdi’ rok Jehovah me ayuwegrad, me fl’eg waathrad, me matanagiyrad ni nge dabi yib e kireb ngorad. Kakrom e ke ayuwegrad ni ngar gelgad u nap’an ni kar mahlgad e pi toogor rorad. Ngiyal’ ney e ma ayuweg e michan’ rorad me micheg ngorad ni nge yog e yafas ni manemus ngorad u daken e maligach rok Jesus. (Roma 5:9) Ma rin’ e re n’ey ni bochan e yad ba gamog u p’eowchen.
2. Mang e ma pagan’ e girdi’ rok Got ngay ni yugu aram rogon ni yima togopuluw ngorad?
2 Gad ma par u reb e fayleng ni be par u fithik’ e lumor, ere piin ni “yad ba adag ni ngar pired u reb e pangin nib m’agan’ Got ngay” e bay ni gafgownagrad. (2 Timothy 3:12) Machane manang Jehovah e n’en ni be rin’ e piin ni tatogopuluw me ginangrad ni gaar: “Ma pi nam ndab ur pigpiggad ngom e bay ni thirifrad u but’.” (Isaiah 60:12) Ngiyal’ ney e bay boor miti togopuluw. U boch e binaw e yima guy rogon ni ngar taleged e machib ara ngongliy e motochiyel ni nge taleg e liyor ni ma tay e tin riyul’ e Kristiano ngak Jehovah. U yugu boch e binaw e yima gafgownag e piin ni ma liyor ngak Jehovah mi yad urfeg e chugum rorad. Machane dab mu pag talin ni ke turguy Jehovah e n’en nra buch rok e piin ni ma togopuluw ko tin nib m’agan’ ngay. Dabi m’ag e togopuluw ni yibe tay. Dabi m’ag e maruwel rok e piin ni ma togopuluw ngak Zion ara piin ni owchen u fayleng. N’en ni ke micheg Jehovah ni Got rodad e ma pi’ e athamgil nga lanin’dad, fa?
Flaab Ni Ke Pag Urngin
3. Mang fanathin e ma tamilangnag gamogen nge felngin e piin ni ma liyor ngak Jehovah?
3 Bin riyul’ riy e ke flaabnag Jehovah e girdi’ rok ko ngiyal’ ney ni tomren e re m’ag nib kireb ney, ma ke pag urngin e flaab ni kar nameged. Ma ke fl’eg gamogen e gini yima liyor ngak riy ma ke fl’eg yaan e piin ni bay e ngochol rok u dakenrad. Rogon e thin rok Isaiah ni profet e ke gaar Got ngak Zion: “Ren ko gek’iy ni pine nge juniper nge cypress, ni tin th’abi fel’ e ren ni yibe fek ko garger nu Lebanon e bay ni fek i yib nga ni fulwegem nga rogon, i gur Jerusalem, ya nga ni ngongliy e tempel rog nge fel’ yaan.” (Isaiah 60:13) Rib fel’ yaan e pi burey ni boor e gek’iy u daken. Ere pi gek’iy nem e be yip’ fan gamogen nge galwog rok e piin ni ma liyor ngak Jehovah.—Isaiah 41:19; 55:13.
4. Mang e be yip’ fan fare “tempel” nge “tagil’ rifrifen ay” Jehovah, ma uw rogon ni kan fl’eg yaan e re n’en ney?
4 Mang e be yip’ fan fare “tempel” ara gini’ ma tay Jehovah e rifrifen ay u daken ni be weliy Isaiah 60:13 morngaagen? Gali thin ney e be yip’ fan lan e garog ko tempel rok Jehovah nib fanathin ni be yip’ fan kanawoen ni nga nib ngak u fithik’ e liyor u daken Jesus Kristus. (Hebrews 8:1-5; 9:2-10, 23) I yog Jehovah e n’en nib m’agan’ ngay ni nge fl’eg yaan e re tempel nem nib fanathin, ma ra rin’ u nap’an ni ra fek’ e girdi’ ko urngin e nam ngay ngar meybilgad ngak u rom. (Haggai 2:7) I guy Isaiah ba ulung i girdi’ ni yad be yib ko pi nam ni ngar bad ko burey rok Jehovah ni ngar meybilgad ngak u rom. (Isaiah 2:1-4) Bokum miriay e duw nga tomren me guy apostal John “ba ulung i girdi’ ni pire’ ni pire’—ni dariy be’ nrayog ni nge theegrad. Nra bad u gubin e nam, nge ganong, nge gubin mit e girdi’ . . . , Aram fan ni kar sak’iygad u m’on u tagil’ Got ni yad be pigpig ngak ni rran nge nep’ u lan e tempel rok.” (Revelation 7:9, 15) Ke lebug e thin ko profet e ngiyal’ ney ma kada guyed nga owchedad rogon ni ke fel’ yaan e tempel rok Got.
5. Uw rogon ni ke thil rarogon pi fak Zion me fel’ rogorad?
5 Kari gel e thil u rarogon Zion ya kari flaab! I gar Jehovah ngak: “Ma gathi bay kum par ni kan n’igem ma yibe fanenikayem, nib binaw ni kan n’ag ma dakuriy e girdi’ riy. Bay gu gagiyegnigem nge gilbuguwam me fel’ yaam, nib binaw ni bay un felfelan’ riy ndariy n’umngin nap’an.” (Isaiah 60:15) Tomren e bin somm’on e mahl ko fayleng e ke gel e gafgow rok fare “Israel rok Got.” (Galatia 6:16) U wan’ Zion e gowa “kan n’ag” ya piin ni fak u fayleng e de tamilang u wan’rad e n’en nib m’agan’ Got ngay ni ngar rin’ed. Machane nap’an fare duw ni 1919 ke gelnag Jehovah e pi tapigpig rok ma ka nap’an e ngiyal’ nem e ke flaabnagrad ke fel’ rogorad ko machib. Kari fel’ lanin’dad ni bochan e n’en ni ke micheg Got ko re verse nem, fa? Ya ra “uf” Jehovah ni bochan Zion. Arrogon, ra “uf” pi fak Zion ngak, maku ra “uf” Jehovah ngak Zion. Yira “felfelan’” ni bochan Zion. Ma gathi ba ngoch nap’an ni yira falfalan’. Ya fel’ rogon rok Zion nge piin ni yad owchen u fayleng e ra par ni “dariy n’umngin nap’an.” Dabi m’ay e flaab rorad.
6. Uw rogon ni ma fanay e tin riyul’ e Kristiano e pi felngin e pi nam?
6 Mmotoyil nga yugu reb e thin ni ke micheg Got. I non Jehovah ngak Zion ni gaar: “Pi nam nge pi pilung e bay ur ayuweged gur ni bod ba matin ni be tathuthnag fak. Ma bay mu nang ni gag Somol e kug chuwegem u pa’ e toogor rom, ma fare Got nu Israel nib gel gelngin e ke biyuliyem.” (Isaiah 60:16) Uw rogon ni ma unum Zion e “milik rok e pi nam” me “tathuth rok e pi pilung”? Ma rin’ ya pi Kristiano ni kan duguliyrad ko kan ni thothup nge “yugu boch e saf” ni ma un ngorad e yad ma fanay felngin e pi nam ni fan e nge mon’og e bin riyul’ e machib. (John 10:16) Salpiy ni yima pi’ e ma ayuweg e machib u fayleng iyan. Yima fanay e masin ni fan ni ngan fl’eg e Bible nge pi babyor ni ma weliy fan e Bible u bokum mit e thin. Dariy biyay ni ka nap’an e girdi’ ni rayog e machib ni bod rogon e ngiyal’ ney. Girdi’ ko bokum e nam e yad be fil ni Jehovah e ir e Tabiyul rodad ni bod rogon ni ke biyuliy e pi tapigpig rok.
Ke Mon’og e Ulung
7. Uw rogon ni ke mon’og pi fak Zion?
7 Ke fl’eg Jehovah gamogen e girdi’ rok u yugu reb e kanawo’. Ke flaabnag e ulung rorad ke mon’og iyan. Gad ra bieg u Isaiah 60:17 ni gaar: “Bay gu fek e gol i yib ngom ma gathi bronze, ma silber e bay yan nga luwan e wasey, ma bronze e bay yan nga luwan e ren; bay yog e wasey ngom ma gathi malang. Pi pilung rom e dab kur gafgowniged gur; bay gu tiyeg ngorad nguur gagiyeggad u fithik’ e yal’uw nge gapas.” Kab fel’ boch e gol ko bronze maku arrogon fapi n’en ni kan weliy ko re verse ney. Bpuluw e mon’og ni be tay fare Israel rok Got ko re thin nem ya be mon’og e ulung ko tin tomren e rran. Ngada weliyed boch ban’en ni ke mon’og.
8-10. Mu weliy boch ban’en ni ke mon’og e ulung riy ni ka nap’an e duw ni 1919.
8 U m’on ko fare duw ni 1919 ma piin ni piilal nge pi deacon e ur gafaliyed e ulung ko girdi’ rok Got, ma un towaliy e piin ni piilal nge pi deacon. Machane nap’an e duw ni 1919 ma fare “tapigpig nib yul’yul’ mab gonop” e ur duguliyed be’ ni nge mang service director ko ra reb e ulung ni nge gagiyegnag e machib u mit e tabinaw. (Matthew 24:45-47) Machane de m’ag e re maruwel nem u boor e ulung ni bochan e de un boch e piilal ni kan towaliyrad ko fare machib u mit e tabinaw. Ere nap’an fare duw ni 1932 ma ka nog ngak e pi ulung ni nge dab kun towaliy e piin ni piilal nge pi deacon. Ya ngar towaliyed boch e pumoon ni ngar manged e service committee ni ngar maruwelgad fare service director u taabang. Gowa ke yan e “bronze nga luwan e ren”—mab gel e mon’og riy!
9 Nap’an fare duw ni 1938 ke turguy e pi ulung u fayleng iyan ni nge puluw boch e ulung rorad ko n’en ni bay ko Bible. Bay ni gafaliy e pi ulung u tan pa’ e company servant nge boch e moon ni yad ra ayuweg, ma yad urngin e ke duguliyrad fare tapigpig nib yul’yul’ mab gonop. Daku ni towal! Ere kan duguliy e piin ni ngar gafaliyed e ulung u rogon nib theocratic. Gowa ke yan e “wasey nga luwan e malang” ara “ke yan e gol nga luwan e bronze.”
10 Ka nap’an e ngiyal’ nem e be mon’og e ulung iyan. Susun, nap’an fare duw ni 1972 e ke tamilang ni ba ulung e piilal ni kan duguliyrad nrogon nib theocratic ni dariy bagayad nib tolang nga bagayad e kab puluw boch nga rogon ni kan gafaliy e tin somm’on e ulung ni Kristiano. Ma gonapan l’agruw e duw e chiney ni ke mon’og e ulung boch. Kan thilyeg rogon ni yima gagiyegnag e pi corporation rodad ma rayog ni nge tayan’ e Governing Body ko tirok Got ban’en ma gathi goo tin nib sor fan ko corporation e ngar maruweliyed.
11. Mini’ e be gagiyegnag e mon’og ni be tay e ulung, ma mang wenegan e mon’og ni ke tay e ulung?
11 Mini’ e be ayuweg e ulung ni nge mon’og iyan? Ir Jehovah Got. Ir e ani be gaar: “Bay gu fek e gol i yib ngom.” Maku be gaar: “Bay gu tiyeg ngorad nguur gagiyeggad u fithik’ e yal’uw nge gapas.” Arrogon, Jehovah e be gagiyegnag e girdi’ rok. Mon’og ni be tay e ulung e ku reb e kanawo’ ni ke fl’eg gamogen e girdi’ rok. Ma ke flaab e Pi Mich Rok Jehovah u boor e kanawo’. Gad ra bieg u Isaiah 60:18 ni gaar: “Lamey ni yibe cham e gathi bay kun rung’ag; ma dab ki mogoth e nam rom bayay. Bay gu matanagiyem mu gu ayuwegnem ni gu bod ba yoror ngom; bay mu pining e magar nge sorok ngog ya kug ayuwegem.” Rib fel’ e re thin ney! Machane uw rogon ni ke lebug fare thin?
12. Uw rogon ni ke yib e gapas ngak e pi Kristiano ma be gagiyegnagrad e gapas?
12 Ke yiluy e tin riyul’ e Kristiano owcherad ngak Jehovah nge mang ir e nge fonownagrad nge pow’iyrad. Ma ke weliy Isaiah wenegan ni gaar: “I gag e bay gu machibnag e girdi’ rom, mu gu pi’ e fel’ rogon nge gapas ngorad.” (Isaiah 54:13) Ma maruwel e kan ni thothup rok Jehovah u daken e girdi’ rok, ma reb i waamngin e kan ni thothup e aram e gapas. (Galatia 5:22, 23) Bay e gapas u fithik’ e girdi’ rok Jehovah ma yad bod bang nrayog ni ngan toffan riy u fithik’ e fayleng nib sug ko cham. Bay e gapas rorad ni bochan e t’ufeg rok e tin riyul’ e Kristiano, maku ra moy e re gapas ney u lan fare m’ag nib biech. (John 15:17; Kolose 3:14) Ri gad ba adag e re gapas nem ma ra bagadad e ma ayuweg e re gapas nem, ma yima yog e sorok ngak e Got rodad ni bochan. Ma re gapas nem e bangi n’en ko paradis nib fanathin ni gad bay riy e chiney! —Isaiah 11:9.
Ra I Gal Ramaen Jehovah Iyan
13. Mang fan nrayog ni nge mich u wan’dad ni nge dabi m’ay e tamilang rok Jehovah u daken e girdi’ rok?
13 Ku ra gal ramaen Jehovah nga daken e girdi’ rok, fa? Ra gal! Gad ra bieg u Isaiah 60:19, 20 ni gaar: “Ma gathi ku yal’ e bay i yib ramaen ngom ni rran, ara yib ramaen e pul ngom ni nep’. Yi gag Somol e bay gu mang tamilang ngom ni dariy n’umngin nap’an; ramaen e flaab rog e bayi gal nga dakenam. Pi rran ni i yib e gafgow ngom riy e bayi mus, mi gag Somol e bay gu mang tamilang ngom ni dariy n’umngin nap’an, nib thil ko yal’ nge pul ni l’agruw ni bayi m’ay ramaen.” Nap’an ni ke m’ay e “kireban’” rok e girdi’ rok Jehovah ko duw ni 1919 me gal ramaen Jehovah nga dakenrad. Chiney ni ke pag 80 e duw nga tomren, ma ka yad be falfalan’ ni ka be gal ramaen Jehovah nga dakenrad ni bochan e yad ba fel’ u wan’. Ma dabi tal e re tamilang nem. Ya tamilang rok Got e dabi “aw” ni bod ni be aw e yal’ ara be aw e pul. Danga’ ya ra gal ramaen nga dakenrad ni dariy n’umngin nap’an. Rib fel’ e n’en ni ke micheg Got ngodad ni gad be par ko tin tomren e rran ko re fayleng ney ni be par u fithik’ e lumor!
14, 15. (a) Uw rogon ni ba “mat’aw” urngin e girdi’ rok Got? (b) Mang e be athapeg fa yugu boch e saf nrogon e thin ni bay ko Isaiah 60:21?
14 Kum motoyil ko yugu reb e thin ni ke micheg Jehovah ngak piin ni owchen Zion u fayleng ni yad fare Israel rok Got. I gaar Isaiah 60:21: “Urngin e girdi’ rom ni bay ur rin’ed e tin nib mat’aw, mi yad tafanay e nam ndariy n’umngin nap’an. I gag e gu yungrad, i gag e gu sunmiyrad, ya nggu dag fanag sorog ngak urngin e girdi’.” Nap’an fare duw ni 1919 e kan gelnag e pi Kristiano ni kan duguliyrad ko kan ni thothup ma yad yugu miti girdi’. Yad ma par u fithik’ e fayleng nib tadenen machane “kan mat’awnagrad” ni bochan e michan’ rorad ko maligach rok Kristus Jesus ni ke pi’ ni biyul. (Roma 3:24; 5:1) Ma yad bod piyu Israel ni kan pagrad ko kalbus u Babylon ni kar “tafanayed fare binaw” ni reb e binaw nib fanathin ni aram e paradis rorad nib fanathin. (Isaiah 66:8) Gamogen e re binaw nem e dabi m’ay, ya fare Israel rok Got e gathi yad bod piyu Israel kakrom ni dar yul’yul’gad. Yira yog e sorok ngak Got ni bochan e michan’ rorad, nge k’adan’ ni yad be tay, nge pasigan’ rorad.
15 Urngin girdien e re nam nem e yad bay u tan fare m’ag nib biech ni ke micheg Got. Kan yoloy e motochiyel rok Jehovah nga daken gumercha’rad, ma ke n’ag Jehovah fan e pi denen rorad ni bochan e maligach rok Jesus ni biyul. (Jeremiah 31:31-34) Ke mat’awnagrad me tay ni yad “pi fak” me ngongol ngorad ni gowa yad ba flont. (Roma 8:15, 16, 29, 30) Kun n’ag fan e denen rok yugu boch e saf ni kar uned ngorad ni bochan e maligach rok Jesus, ma yad bod Abraham ni ke mat’aw u p’eowchen Got ma ir e fager rok Got ni bochan e michan’ rok. “Kar lukniged e mad rorad kar wechwechniged nga rachaen fare Fak e Saf.“ Ma ke nameg pi cha’ ney ni yad yugu boch e saf yugu boch e flaab ni bay yib. Tomren ni kar pared nib fas ko fare “gafgow nib gel” ara kar fasgad ko yam’, ma yad ra guy ni ke lebug fare thin ko Isaiah 60:21 u nap’an ni ke paradis ga’ngin yang e fayleng. (Revelation 7:14; Roma 4:1-3) Ngiyal’ i n’em ma “piin ni yad mmunguy e bay ra pired u daken e nam u fithik’ e gapas, mu ur pired u fithik’ e gapas ni yad ba felfelan’.”—Psalm 37:11, 29.
Ka Yad Ra Yoor Iyan
16. Mang e ke micheg Jehovah, ma uw rogon ni ke lebug e thin rok?
16 U lan e bin tomur e verse ko Isaiah 60 e gad ra bieg riy e bin tomur e thin ni ke micheg Jehovah u lan e re guruy nem. I gaar ngak Zion: “Mus ko re tabinaw nib th’abi lich e girdi’ riy ma ba sobut’ ni bay ra pired ni bod ba nam ni baga’ ma ba gel. Bayi taw nga nap’an mu gu gagiyegnag ni nge doro’ nib gur. Yi gag e Somol.” (Isaiah 60:22) Ngiyal’ ney e ke rin’ Jehovah e n’en ni ke micheg. Nap’an ni kan gelnag e pi Kristiano ni kan duguliyrad ko kan ni thothup ko duw ni 1919, ri yad ba lich—ni yad bod fare “tabinaw nib lich e girdi’ riy.” Machane kar yoorgad u nap’an ni ke un yugu boch e girdi’ ngorad ni yad fare Israel nib spiritual. Ma aram me un yugu boch e saf ngorad ni kar yoorgad. Ke un boor e girdi’ nib yul’yul’ ngorad ni bochan e gapas ni bay rorad ni aram fare paradis nib fanathin ni bay ko “binaw” rorad, ere fare “binaw nib lich e girdi’ riy” e ke mang ba “nam nib gel.” Re “nam” ney—ni aram fare Israel rok Got nge “girdi’ ko yugu boch e nam” ni yad nel’ million urngirad—e kar yoorgad nga boor e nam nu fayleng e chiney. (Isaiah 60:10) Urngin e pi girdi’ ney e yad ma gal ramaen Jehovah ma aram fan ni yad ba gamog u p’eowchen Jehovah.
17. Uw rogon ni ke ayuwegem fare thin ni bay ko Isaiah guruy ni 60?
17 Arrogon, ke gel e michan’ rodad ni bochan e kada weliyed e thin ni bay ko Isaiah guruy ni 60. Ke fel’ lanin’dad ni bochan e ke nang Jehovah u m’on riy ni ra gafgow e girdi’ rok mi yad sul nga rogon. Ke n’uw nap’an u m’on riy e ke nang Jehovah ni ra yoor e girdi’ ni yad ra liyor ngak ko ngiyal’ ney. Ma rib fel’ lanin’dad ni bochan e gad manang ni dabi pagdad Jehovah! Ke micheg ngodad ni ra par e garog ko “re mach nem” nib mab ni fan ngak e “piin ni yad ba adag e yafas ni dariy n’umngin nap’an”! (Acts 13:48) Ra gal ramaen Jehovah nga daken e girdi’ rok. Ra uf Jehovah ngak Zion ni bochan e ke gel e tamilang rok pi fak Zion. (Matthew 5:16) Kari mudugil lanin’dad ni gad ra chugurgad ngak fare Israel rok Got ma gad ra tay fan e taw’ath rodad ni nge gal rodad ramaen Jehovah!
Rayog ni Ngam Weliy Fan?
• Mang fan ni ke pagan’dad ni yugu aram rogon ni yima togopuluw ngodad?
• Uw rogon ni ke tathuth pi fak Zion rok e pi nam?
• Uw rogon ni ke tay Jehovah e “bronze nga luwan e ren”?
• Mang l’agruw felngin Got ni kan tamilangnag u Isaiah 60:17, 21?
• Uw rogon ni ke mang fare “tabinaw nib lich e girdi’ riy” reb e “nam nib gel”?
[Box/Pictures on page 28]
THIN ROK ISAIAH NI PROFET—Tamilang ni Fan ko Urngin e Girdi’
Thin ni kan weliy ko gali article ney e kan weliy u nap’an e assembly ntay ko 2001/02 ni kan nog e “Teachers of God’s Word” District Convention. Tomren fare welthin min pi’ reb e babyor nib biech ni Isaiah’s Prophecy—Light for All Mankind, Volume Two. Fare duw u m’on riy ma kan pi’ fare ke babyor ni Isaiah’s Prophecy—Light for All Mankind, Volume One. Chiney ni kan pi’ fare babyor nib biech ma bay l’agruw e babyor ni be weliy fan urngin e verse ko babyor rok Isaiah. Gali babyor ney e ra ayuwegdad ni ngada nanged fan ma ngada ted fan e babyor rok Isaiah ya ra gelnag e michan’ rodad.
[Pictures on page 25]
Ke fl’eg Jehovah gamogen e girdi’ rok me thapegrad ni yugu aram rogon ni yima togopuluw ngorad
[Pictures on page 26]
Ma fanay e girdi’ rok Got felngin e pi nam ni fan e nge mon’og e bin machalbog e liyor ngak Got
[Picture on page 27]
Ke flaabnag Jehovah e girdi’ rok ke mon’og e ulung rorad me yog e gapas ngorad