“Re Tabinaw Nib Th’abi Lich E Girdi’ Riy” E Ke Gaman “Reb E Biyu’”
“Mus ko re tabinaw nib th’abi lich e girdi’ riy e ra gaman reb e biyu’ ma bin ba achig e bay ra mang ba nam nib gel.”—ISAIAH 60:22.
1, 2. (a) Mang fan ni be par e fayleng u fithik’ e lumor? (b) Uw rogon ni ke gal ramaen Jehovah nga daken e girdi’ rok ni buch uw iyan?
“YUGU boch e nam e bay ra pired u fithik’ e lumor, machane gur e bay gal ramen [Jehovah] nga dakenam; ir ni ba’ rom e bayi gal ramaen rom.” (Isaiah 60:2) Pi thin ney e ma weliy u murung’agen rarogon e fayleng ka nap’an e 1919. Ya ke dabuy Kristendom fare pow ni ba’ Jesus Kristus, ni ir e “tamilang ko girdi’ nu fayleng.” (John 8:12; Matthew 24:3) Bochan ni “kari damumuw” Satan ni ir e en nth’abi ga’ ko “pi tayugang ko re fayleng ney ni bay u fithik’ e lumor,” ma fa bin 20 e chibog aram e bin th’abi kireb e chibog. (Revelation 12:12; Efesus 6:12) Boor e girdi’ e be par u fithik’ e lumor.
2 Machane bay e tamilang ko ngiyal’ ney. Ma ‘gal Jehovah ramaen’ nga daken e pi tapigpig rok, ni yad girdien fachi ulung, ni yad owchen fare “ppin” nu tharmiy. (Isaiah 60:1) Ka nap’an e ngiyal’ ni kan pagrad u kalbus ko machib rok Babylon ko 1919, ma ke gal raamrad rok Got ma be ‘gal raamrad u p’eowchen e girdi’.’ (Matthew 5:16) Ka nap’an e 1919 nge mada’ ko 1931, ma ke gel e tamilang ko Gil’ilungun Got ya pi girdi’ nem e be digey urngin e machib nge lem nu Babylon. Kar yoorgad ke gaman bokum biyu’ i yad u nap’an ni ke lebuguy Jehovah e n’en nke micheg ni gaar: “Gimed gubin e piin ni bay mmageygad ko girdi’ nu Israel e bay gu kunuymed nga taabang ngam pired ni gimed bod e saf ni bay u lan ba sum, ma bod ba ran’ i saf ni bay u daken e ted ko gin ni bay e pan riy ni yad ma kay. Laman e girdi’ ni pire’ e bayi suguy e nam romed.” (Mikah 2:12) Nap’an e 1931 ma ke gal ramaen Jehovah nga daken e girdi’ rok u rogon nib gagiyel ya kar tunguyed fithingrad ni Pi Mich Rok Jehovah.—Isaiah 43:10, 12.
3. Uw rogon me tamilang ni ra gal ramaen Jehovah nga daken yugu boch e girdi’ ni gathi yad girdien fachi ulung?
3 Kari mus u daken “fachi ulung” e ra gal ramaen rok Jehovah? (Luke 12:32) Danga’. Fare Wulyang Ntagil’ e Damit ko September 1, 1931, e ke weliy u murung’agen yugu reb e ulung i girdi’. Kan tamilangnag e thin ni bay ko Ezekiel 9:1-11, min dag ni fare moon ni bay fare writer’s inkhorn e be yip’ fan girdien fachi ulung. Ke tay re “moon” nem e pow nga peri’ mini’? Aram girdien “yugu boch e saf” ni yad be athapeg ni ngar pared u paradis u fayleng. (John 10:16; Psalm 37:29) Nap’an e 1935 ma kan tamilangnag ni re ulung ney ko “yugu boch e saf” e yad fare “ulung ni baga’ . . . nra bad u gubin e nam” ni ke guy apostal John. (Revelation 7:9-14) Ka nap’an e 1935 ke mada’ ko chiney, ma kan tay e athamgil nib gel ni ngan kunuy e girdi’ ko re ulung nib baga’ ney.
4. Mini’ e “pi pilung” nge “pi nam” ni bay ko Isaiah 60:3?
4 Bay e thin ni ke yiiynag Isaiah u murung’agen e re maruwel ney ni ngan kunuy e girdi’ ni be gaar: “Ma pi nam e bay ra leked ramaem i yib, ma pi pilung e bay ra leked ramaem i yib ni bod e woch ni puf ngorad.” (Isaiah 60:3) Mini’ e “pi pilung” nem? Aram e tin ni ka bay girdien fare 144,000 ni yad ra un ngak Jesus Kristus ko gagiyeg u tharmiy ma kar pow’iyed e maruwel ko machib. (Roma 8:17; Revelation 12:17; 14:1) Ngiyal’ ney ma ka bay in e biyu’ iyad u fayleng ma kab boor girdien e “pi nam” ni aram e piin ni be athapeg e par u fayleng ni yad ma yib ngak Jehovah ni nge machibnagrad ma yad be pining yugu boch e girdi’ ni ngar uned ngay.—Isaiah 2:3.
Pi Tapigpig Rok Jehovah ni Yad ba Pasig
5. (a) Mang e be dag ni dawori war e pasig ko girdi’ rok Jehovah? (b) Tin ngan e binaw ni kar mon’oggad ko duw ni 1999? (Mu guy fare chart ko pages 17-20.)
5 Rib gel e pasig ni tay e Pi Mich Rok Jehovah u nap’an e bin 20 e chibog! Ma yugu demtrug ni be yoor iyan e magawon ni be diliiy lanin’rad, machane de war e pasig rorad u nap’an ni yad be chugur iyan nga duw ni 2000. Yad be fol ko n’en ni tay Jesus chilen ni gaar: “Mmarod ngak girdien e pi nam ngam pingeged yad ngar manged pi gachalpeg.” (Matthew 28:19, 20) Nap’an e bin tomur e duw ko bin 20 e chibog ma ke yoor e piin ni yad e publisher ko fare thin nib fel’ ya ke gaman 5,912,492 ma aram e tin th’abi yoor. Ma ke gaman 1,144,566,849 e awa ni kar ted ni ngar weliyed ko girdi’ u murung’agen Got nge tin nib m’agan’ ngay ngak e girdi’. Ma ke gaman 420,047,796 e return visit rorad ma kar filed e Bible ngak 4,433,884 e girdi’ ni dariy puluwon. Rib fel’ e maruwel ni kar ted u fithik’ e pasig!
6. Mang e n’en nib biech ni kan yarmiy ni fan ko piin pioneer, ma mang angin ni yib riy?
6 Fa binem e duw ko January, ma ke yog fare Governing Body ni ran thiliyeg e awa ni ra thognag e piin pioneer. Ere boor e girdi’ ma kar uned ko pioneer ni regular ara pioneer ni ayuw. Nap’an e bin som’on nge mada’ ko bin aningeg e pul ko 1999, ma ke mun aningeg yay ko fa binem e duw oren e girdi’ ni kar pied e babyor ko reular pioneer ngak fare branch ofis nu Netherlands. Ma bay e report nu Ghana ni be gaar: “Ka nap’an e ngiyal’ ni kan thiliyeg e awa ni ra thognag e piin pioneer, ma be yoor iyan e piin ni be un ko regular pioneer.” Nap’an e duw ni 1999 ma ke yoor e girdi’ ni be un ko pioneer u gangin e fayleng ke gaman 738,343—aram e yad be dag ni ke ‘pasigan’rad ni ngar rin’ed e tin nib fel’.’—Titus 2:14.
7. Uw rogon ni ke flaabnag Jehovah e maruwel ni tay e pi tapigpig rok?
7 Ke flaabng Jehovah e re maruwel ney? Arrogon. I gaar u daken Isaiah: “Mu sap u toobem i yan ngam guy e pi n’en ni yibe rin’: Be muulung e girdi’ rom ni ngar sulod nga taferad! Pi fakam ni pumoon e bay ra bad u mal’af, ma pi fakam ni ppin e bay ni fekrad i yib nrogon e bitir ni yima fek.” (Isaiah 60:4) “Pi fak ni pumoon nge ppin” ni kan dugliyrad ko kan ni thothup ni kan kunuyrad nga taabang e ka yad be pigpig ku Got u fithik’ e pasig. Ma chiney e yibe kunuy girdien yugu boch e saf rok Jesus nga taabang ngar uned ko “pi fak Jehovah ni pumoon nge ppin” u lan 234 e binaw nge donguch.
“Urngin Mit e Ngongol nib Fel’”
8. Mang boch e ‘ngongol nib fel’’ ni be rin’ e Pi Mich Rok Jehovah?
8 Mmil fan ngak e pi Kristiano ni ngar wereged fare thin nib fel’ ko Gil’ilungun Got mar ayuweged e girdi’ ni ngar manged pi gachalpen Jesus. Machane ke bung rogorad “nrayog ni ngar rin’ed urngin mit e ngongol nib fel’.” (2 Timothy 3:17) Ere yad ma ayuweg girdien e tabinaw rorad u fithik’ e t’ufeg, ma yad ma gol ngak yugu boch e girdi’ nge piin nib m’ar. (1 Timothy 5:8; Hebrews 13:16) Ma yad ma ognagrad ni ngar rin’ed boch e maruwel mar toyed boch e Kingdom Hall—aram ba maruwel ni be pi’ e mich. U Togo, mu tomren ni kan toy reb e hall, ma girdien yugu reb e teliw e yad ba adag ni ngar nanged ko mang fan nrayog ko Pi Mich Rok Jehovah ni ngar toyed e naun rorad ma girdien e galesiya rorad e thingara pied puluwon ku be’ ni ngan toy e naun rorad! Reb e report nu Togo e be yog ni bochan ni kan toy boch e Kingdom Hall u rom nrib fel’ rogon ma ba adag e girdi’ ni ngar rentnaged e naun ara ngar toyed e naun rorad nib chugur ko gin ni yira toy e Kingdom Hall.
9. Mang e rin’ e Pi Mich Rok Jehovah u nap’an ni ke yib e gafgow nga bayang?
9 Ma yu ngiyal’ ma ba t’uf ni ngan rin’ yugu boch e maruwel. Fa binem e duw ma ke yib e durru’ ara yoko’ nga boch e binaw, ma baga’ ni Pi Mich Rok Jehovah e yad e tin som’on e girdi’ ni kar pied e ayuw. Kan kirebnag lan e binaw nu Honduras ko fare yoko’ ni Hurricane Mitch. Ma rib pay ni ke yarmiy fare branch e girdi’ ni ngar pied e ayuw. Pi Mich u Honduras nge yugu boch e binaw e kar pied e mad, nge ggan, nge falay, nge yugu boch ban’en. Ma fapi Regional Building Committee e kar toyed boch e naun ko girdi’. Ere de n’uw nap’an u tomren fare gafgow ma kan ayuweg e pi walag u rom ni ngar sulod nga rogon. U Ecuador, ma ke ayuweg e Pi Mich Rok Jehovah e pi walagrad u nap’an ni kan tharey e binaw ko ran kan kirebnag e naun rorad. Ma reb e girdi’ ko am e ke guy ni yad be maruwel nib fel’ rogon me gaar: Faan mang e rayog ni nggu pi’ puluwon ni ngam maruwelgad ni fan ngog, ma boor ban’en nrayog ni ngan rin’! Ra fel’ nfaanra girdi’ ni bod gimed e bay u gubin yang u fayleng.” Maruwel nib fel’ ni aram rogon e ma n’uf Jehovah Got ma aram e mich riy ni “yul’yul’ ku Got e ri baga’ fan u gubin ban’en.”—1 Timothy 4:8.
Yad “Be Yib ni Bod e Manileng”
10. Yugu demtrug ni be lich iyan oren e girdi’ ni fachi ulung u fayleng, machane mang fan ni be gel iyan u rogon ni yibe wereg fithingan Jehovah?
10 Be fith Jehovah ni gaar: “Mini’ e pi cha’ ney ni yad be yib ni bod e manileng, ni bod e bulogol ni yad be sul nga tabinaw rorad? Ya girdien e pi donguch e ke l’agan’rad ngog, ma pi barkow nu Tarshish e kar bad ko pi nam nib orel ni yad be fulweg e girdi’ rok Got nga taferad . . . Girdien yugu boch e nam e bay ra ubunged bayay e yoror rom, ma pi pilung rorad e bay ur pigpiggad ngom.” (Isaiah 60:8-10) “Pi fak” Jehovah ni yad e pi Kristiano ni kan dugliyrad e yad e tin som’on ni ke ‘gal ramaen’ Jehovah nga dakenrad. Nge migid e yib “girdien yugu boch e nam,” ni yad fare ulung ni baga’ ni yad ma ayuweg pi walagrad ni kan dugliyrad, mar uned ngorad i wereg fare thin nib fel’. Ere yugu aram rogon ni be lich iyan oren girdien fachi ulung u fayleng, machane ka yibe wereg fithingan Jehovah nga gangin e fayleng nib mus rogon.
11. (a) Mang e ka be ul’ul’ iyan, ma mang angin ni yib riy ko duw ni 1999? (b) Tin ngan e binaw ni ri boor e girdi’ ni kar uned ko taufe u nap’an e 1999? (Mu guy fare chart ko pages 17-20.)
11 Ma bochan e re n’em ma bokum milyon e girdi’ e yad be yib ni “bod e bulogol ni yad be sul nga tabinaw rorad,” yad be pirieg e ayuw u lan e ulung ko Kristiano. Bokum biyu’ e girdi’ e be un ngay u gubin e duw, ma kab mab e kanawo’ nrayog ni nge un boch. I gaar Isaiah: “Pi garog rom e bay i par nib mab ni rran nge nep’, ya pi pilung ko pi nam e bay ur feked e fel’ rogon rorad i yib ngom.” (Isaiah 60:11) Fa binem e duw ma 323,439 e girdi’ e kar ognaged yad ngak Jehovah mar uned ko taufe, ma dawori ning e garog. “Fel’ rogon ko pi nam,” ni aram girdien fare ulung ni baga’, e ka yad be yib nga lan e garog. (Haggai 2:7, NW) Ya dabni taleg e piin ni be guy rogon ni ngar chuwgad u fithik’ e lumor. (John 12:46) Ma nguura ted fan fare tamilang!
Dabni Rus u Fithik’ e Togopuluw
12. Uw rogon ma piin nib t’uf rorad e talumor ma kar guyed rogon ni ngar thanged e tamilang?
12 Piin ni ba t’uf rorad e par u fithik’ e lumor e yad ma fanenikay e tamilang rok Jehovah. (John 3:19) Boch e girdi’ e ma guy rogon ni ngar thanged e re tamilang nem. Ma dabni gin ngay. Ya mus ni Jesus ni ir e “bin riyul’ e tamilang, ni fare tamilang ni yib nga fayleng nge gal ramaen nga daken urngin e girdi’,” ma kan moningnag, min togopuluw ngak, ma girdi’ ko binaw rok e kar lied kem’. (John 1:9) U lan e bin 20 e chibog, ma kan moningnag e Pi Mich Rok Jehovah, ma kan nin’rad nga kalbus, ma kan taleg e maruwel rorad, ma kan li’rad kar m’ad, ya kar yul’yul’gad ku Jehovah me gal ramarad e tamilang rok. Ma ngiyal’ ney e pi tatogopuluw e kar wereged e thin ngoogsur u murung’agen e piin ni be gal ramaen ko tamilang rok Got. Boch e girdi’ e yad ba adag ni nge lemnag e girdi’ ni ba kireb e Pi Mich Rok Jehovah ma susun ni ngan taleg e maruwel rorad. Ma ke gel e pi tatogopuluw ney?
13. Mang angin ni yib ya kan tamilangnag e thin nriyul’ u lan e simbung?
13 Danga’. Ya faanra ba puluw ma ke weliy e Pi Mich Rok Jehovah e thin nriyul’ ko simbung. Me ere, kan wereg fithingan Jehovah u lan e pi simbung nge magazine nge radio nge tv. Ma ke yib wenegan nib fel’ riy ni fan ko machib. U Denmark, ma kan pag ko tv u murung’agen “Mang fan ni be war iyan e michan’ rok piyu’ Denmark.” Ma kan fithfith girdien yugu boch e teliw nib muun ngay e Pi Mich Rok Jehovah. Ma aram me yog be’ ni ppin ni gaar: “Rib tamilang ko mini’ e bay e kan ni thothup rok Got rorad.” Kan tabab i fil e Bible ngak.
14. Mang e thingari nang e pi tatogopuluw?
14 Goo manang e Pi Mich Rok Jehovah ni boor e girdi’ nu fayleng e ra togopuluw ngorad. (John 17:14) Machane, yad ma par nib gel ni bochan e pi thin ni yiiynag Isaiah ni be gaar: “Pi fak e piin ni ur gafgowniged gur e bay ra bad ra siro’gad ngom ngar tiyed fam. Urngin e piin ni ur darifanniged gur e bay ra parawgad u tooben e rifrif u em. Bay rogned fithingam ni fare Binaw rok [Jehovah], ni Zion ni fare Binaw rok fare Got nib thothup nu Israel.” (Isaiah 60:14) Thngari nang e pi tatogopuluw ni yad be cham ngak Got. Mini’ e rayog ni nge gel ko re n’em?
15. Uw rogon ma “pi nam nge pi pilung e bay ur ayuweged [e Pi Mich Rok Jehovah] ni bod ba matin ni be tathuthnag fak,” ma uw rogon ni m’ug e re n’ey ko maruwel ko machib ni yad be tay?
15 Ki micheg Jehovah ni gaar: “Bay gu gagiyegnigem nge gilbuguwam me fel’ yaam, nib binaw ni bay un felfelan’ riy ndariy n’umngin nap’an . . . Pi nam nge pi pilung e bay ur ayuweged gur ni bod ba matin ni be tathuthnag fak. Ma bay mu nang ni gag [Jehovah] e kug chuwegem u pa’ e toogor rom, ma fare Got nu Israel nib gel gelngin e ke biyuliyem.” (Isaiah 60:15, 16) Arrogon, ke biyuliy Jehovah e girdi’ rok. Faanra yad ra pagan’ ngak, ma yad ra par “ndariy n’umngin nap’an.” Ma “pi nam e bay ur ayuweged” yad ya yad ra fanay boch ban’en rorad ni ngar mon’eged e bin riyul’ e liyor. Susun, yibe fanay e computer nge communications technology ni ngan fl’eg e babyor ni Wulyang’ Ntagil’ e Damit ko 121 mit e thin nge fare Awake! ko 62 mit e thin. Bay reb e program ko computer ni kan fl’eg ni ngan ayuweg i piliyeg e thin ko Bible ni New World Translation nga bokum mit e thin, ma aram e ma pi’ e falfalan’ ko girdi’. Nap’an ni kan fl’eg e Bible ni Christian Greek Scriptures ko thin ni Croatian u nap’an e 1999 ma ke yib e lu’ nga owchen bokum biyu’ e girdi’. Yog reb e walag ni pumoon nib pillibthir ni gaar: “Ke n’uw nap’an ni ug sonnag e re ke Bible ney. Ma chiney e rayog ni nggum’ u fithik’ e gapas!” Boor ko 100 milyon ken e Bible ni New World Translation, e kan wereg ko 34 mit e thin.
Yibe Par nib Fel’ Ngongoley
16, 17. (a) Yugu aram rogon nib mo’maw ni ngan fol ko motochiyel rok Jehovah machane mang fan ni ri baga’ fan ni ngan rin’? (b) Mang e be dag ni rayog ko pi fel’ yangaren ni ngar pared ni dabra alitgad ko kireb ko fayleng?
16 I gaar Jesus: “Ya en ni ma rin’ e tin nib kireb e fanenikan fare tamilang.” (John 3:20) Ma piin ni ma par ko fare tamilang e ba t’uf rorad e pi motochiyel rok Jehovah nib tolang. Yog Jehovah u daken Isaiah ni gaar: “Urngin e girdi’ rom ni bay ur rin’ed e tin nib mat’aw.” (Isaiah 60:21a) Ba mo’maw ni ngan rin’ e tin nib mat’aw u lan e fayleng ni yugu be wer iyan e ngongol ndarngal, nge ban, nge dogol, nge tolangan’. U boch e binaw ma be par e girdi’ nib fel’ rogorad ko salpiy, mab mom ni ngan lek e salpiy. Machane i ginang Paul ni gaar: “Piin ni yad ba adag ni nge yoor e salpiy rorad e yad mapagrad ngak e pi n’en ni ma pingeg e girdi’ nge denen, mi yad aw ko wup ko ar’ar ni aram e yibe ar’arnag e tin ndariy fan nge tin nra kirebnigey, ni ir e ma girngiy e girdi’ ko tagan mi yad malog.” (1 Timothy 6:9) Rib gel e kireban’ riy u nap’an nra un be’ ko shiyobay nib elmirin ma aram e ke n’ag e tin ni baga’ fan ban’en ni aram e pi muulung ko Kristiano, nge pigpig nib thothup, nge gafarig nib fel’, nge maruwel u lan e tabinaw!
17 Ma rib mo’maw ko piin fel’ yangaren ni ngar pared ni yad ba mat’aw, ya piin taab yangarrad e yad be un ko drug abuse nge ngongol ndarngal. U Suriname, ma reb e pagal nib pichoay e ke pining reb e rugod ni 14 e duw rok ngar parew. Ke yog fachi ppin ndabi un ngak ya be togopuluw ko Bible ni ngan rin’ e re n’em ndawori un ko mabgol. Ma yugu boch e ppin u skul e ur moningnaged e chi ppin nem mar diliiyed laniyan’ ni nge thiliyeg e lem rok, mar rogned ni urngin e ppin ma yad ba adag ni ngar pared e re pagal nem. Machane ke par e chi ppin nem nib mudugil. Ma in e wik nga tomren, min pirieg ni ke m’ar e re pagal nem ko AIDS. Kari falfalan’ fachi ppin ni ke fol ko motochiyel rok Jehovah ni ‘dabni un ko ngongol ndarngal.’ (Acts 15:28, 29) Rib falfalan’ e Pi Mich Rok Jehovah ko pi fel’ yangaren ni be par nib mudugilan’rad ko tin nib mat’aw. Michan’ rorad nge gallabthir ror ad e be dag fene ‘sorok’ Jehovah—ya ma n’uf fithingan.—Isaiah 60:21b.
Ke N’igin Jehovah ni nge Yoor
18. (a) Mang ban’en nib ga’ ni ke rin’ Jehovah ni fan ko girdi’ rok? (b) Mang e mich riy ni ra yoor iyan e ulung rok Jehovah, ma mang e bay nga m’on ni fan ko piin ni ma par ko fare tamilang?
18 Arrogon, ma gal ramaen Jehovah nga daken e girdi’ rok, ma ma flaabnagrad, ma ma pow’iyrad, ma ma gelnagrad. Nap’an e bin 20 e chibog ma kar guyed ni ke lebug e thin ni yiiynag Isaiah ni gaar: “Mus ko re tabinaw nib th’abi lich e girdi’ riy e ra gaman reb e biyu’ ma bin ba achig e bay ra mang ba nam nib gel. Bay i taw nga nap’an mu gu gagiyegnag ni nge doro’ nib gur. Yi gag [Jehovah].” (Isaiah 60:22) Nap’an e 1919 iyib ngaray ma “fare tabinaw nib th’abi lich e girdi’ riy” e ke yoor ko “reb e biyu’.” Ma dawori tal i yoor! Fa binem e duw ma 14,088,751 e girdi’ ni kar uned ko fare Puguran ko yam’ ni tay Jesus. Boor e pi girdi’ ney e gathi yad e Pi Mich Rok Jehovah. Ke falfalan’dad ni kar uned ko re madenom nem, ma gad ma piningrad ni nguu ranod ko fare tamilang. Ka be gal Jehovah ramaen nga daken e girdi’ rok. Ma kab mab e garog ko ulung rok. Ere nge par urngin e girdi’ nib mudugilan’rd ni nguur pared ko tamilang rok Jehovah. Ma boor e flaab nrayog ngodad e chiney! Ma gad ra falfalan’ nga m’on u nap’an ni ra par urngin ban’en ni sunmiy Jehovah ni yad be n’uf ma yad be pining e sorok ngak ya ke sorok!—Revelation 5:13, 14.
Rayog ni Ngam Weliy?
• Mini’ e ke gal ramaenrad ko tamilang rok Jehovah u nap’an e tin tomren e rran?
• Mang e be dag ni dawori war e pasig ko girdi’ rok Jehovah?
• Mang boch e ngongol nib fel’ ni be un e Pi Mich Rok Jehovah ngay?
• Yugu demtrug ni yibe togopuluw ngodad, machane mang e ke mudugilan’dad ngay?
[Chart on page 17-20]
1999 SERVICE YEAR REPORT OF JEHOVAH’S WITNESSES WORLDWIDE
(See bound volume)
[Pictures on page 15]
Ka be yib e girdi’ nga ulung rok Jehovah
[Picture on page 16]
Ke falfalan’dad ni dawori ning Jehovah e garog ko piin ni ba t’uf rorad e tamilang