Yafas Ni Fan Ngak E Piin Ni Ke Mel’eg Fare Tamilang

“I Jehovah e tamilang rog ma ir e ba’ rog ni be ayuwegeg iyan. I mini’ e gu ra tamdag ngak?”​—PSALM 27:1.

1. Mang ayuw ni ma pi’ e yafas ni ke pi’ Jehovah?

TAMILANG ko yal’ e ma yib rok Jehovah, ma rayog e yafas u fayleng ni bochan e yal’. (Genesis 1:2, 14) Ma Jehovah e ku ir e sum rok fare tamilang nib fanathin, ma re tamilang nem e ma thang fare talumor ko fayleng rok Satan ni ma yibnag e yam’. (Isaiah 60:2; 2 Korinth 4:6; Efesus 5:8-11; 6:12) Ma piin ni ke mel’eg fare tamilang e rayog ni nge lungurad ni bod rogon e ani yoloy e Psalm ni gaar: “I Jehovah e tamilang rog ma ir e ba’ rog ni be ayuwegeg iyan. Mini’ e gu ra tamdag ngak?” (Psalm 27:1a) Machane piin ni ke mel’eg e talumor e bay ni pufthinnagrad ni bod rogon nrin’ u nap’an Jesus.​—John 1:9-11; 3:19-21, 36.

2. Mang e ke buch rok e piin ni kar pied keru’rad ko tamilang rok Jehovah kakrom, ma mang e buch rok e piin ni kar folgad rok?

² U nap’an Isaiah ma baga’ ni ke pi’ e girdi’ rok Jehovah keru’rad ko fare tamilang. Ma ke guy Isaiah wenegan riy ni kan thang fare nam nu Israel ni bay ko lel’uch. Ma nap’an fare duw ni 607 B.C.E. kan gothey Jerusalem nge tempel riy min fek piyu Judah nga kalbus nga reb e nam. Machane piin ni kar folgad ko thin rok Jehovah e ke gel e michan’ rorad ma rayog ni nge dab ra uned ko togopuluw ngak Jehovah. I micheg Jehovah ngak e piin ni kar folgad rok ni ngar magaygad nib fas ko duw ni 607 B.C.E. (Jeremiah 21:8, 9) Ngiyal’ ney ma gadad e piin nib t’uf fare tamilang rodad e rayog ni ngada filed boor ban’en ko n’en ni buch kakrom.​—Efesus 5:5.

Falfalan’ Rok E Piin Ni Bay U Fithik’ Fare Tamilang

3. Mang e ke pagan’dad ngay e ngiyal’ ney, ma mang fare “nam nib mat’aw” nib t’uf rodad, ma mang fare “mach nib gel” ko re “nam” nem?

³ “Ba gel e mach rodad. Ayuw ni yib rok Got e ir e yoror nge gel rodad. Mu binged fare garog ni fan e nge yib e nam nib mat’aw nga lan ni yad e piin nib yul’yul’ e ngongol rorad.” (Isaiah 26:1, 2) Aray rogon e thin rok e piin nib pagan’rad ngak Jehovah. Piyu Jew ni yad ba yul’yul’ u nap’an Isaiah e ke mich Jehovah u wan’rad ma gathi fapi got ni googsur ni i meybil girdien e nam ngorad ya goo Jehovah e rayog ni nge ayuwegrad. Ku arrogon e ngiyal’ ney nib pagan’dad ngak Jehovah. Mab t’uf rodad fare “nam nib mat’aw” rok Jehovah ni yad fare “Israel rok Got.” (Galatia 6:16; Matthew 21:43) Ma kub t’uf e re nam nem rok Jehovah ni bochan e ba yul’yul’ e ngongol rorad. Bochan e flaab ni yib rok Got ma bay ba “mach nib gel” rok fare Israel rok Got, ni aram ba ulung ni be ayuweg fare Israel rok Got.

4. Ere susun uw rogon lanin’dad?

⁴ Piin ni bay u lan e re “mach” ney e yad manang ni “ra ayuweg Jehovah laniyan’ nib mudugil rok be’ ma ra ayuweg u fithik’ e gapas iyan ni bochan e ke pagan’ faanem ngak Jehovah.” Ma ayuweg Jehovah e piin ni ma pagan’rad ngak mi yad fol ko pi motochiyel rok nib mat’aw. Ere ma fol e piin nib yul’yul’ nu Judah ko thin rok Isaiah ni gaar: “Gimed e girdi’, mu pagedan’med ngak Jehovah ni gubin ngiyal’, ya Jehovah e ir fare War ni dariy n’umngin nap’an.” (Isaiah 26:3, 4; Psalm 9:10; 37:3; Proverbs 3:5) Piin ni ma pagan’rad ngak Jehovah e yad ma sap ngak “Jah Jehovah” ni ir fare War rorad. Ma yad ma falfalan’ u fithik’ e “gapas iyan.”​—Filippi 1:2; 4:6, 7.

Ra Tamra’ E Pi Toogor Rok Got

5, 6. (a) Uw rogon ni kan tamra’nag Babylon kakrom? (b) Uw rogon ni kan tamra’nag “Babylon nib Gilbuguwan”?

⁵ Ra uw rogon ni faan manga gafgow e piin ni ma pagan’rad ngak Jehovah? Susun dab ra tamdaggad. Ya yu ngiyal’ e ma pag Jehovah ni nge buch ni aram rogon, machane ra pi’ e ayuw ngorad, me gechignag e piin ni be gafgownagrad. (2 Thessalonika 1:4-7; 2 Timothy 1:8-10) Amu lemnag e n’en ni buch rok reb e “binaw nib tolang.” I gaar Isaiah: “I sobut’nag Jehovah e piin ni ma par u daken e burey, ni fare binaw nib tolang. I sobut’nag fare binaw, i tun ko but’, me thiy ko fiyath. Yira yotˈ nga daken; ay e piin ni yibe gafgownagrad e ra yot’ nga daken ma ay e piin nib sobut’ e yot’ nga daken.” (Isaiah 26:5, 6) Fare binaw nib tolang e aram Babylon. Ya re binaw nem e ke gafgownag e girdi’ rok Got. Ma mang e buch rok yu Babylon? Nap’an fare duw ni 539 B.C.E. e ke war u puluwon yu Mede nge yu Persia. Kan sobut’nag!

⁶ Thin rok Isaiah ni profet e be weliy e n’en ni ke buch rok Babylon nib Gilbuguwan ko ngiyal’ ney ni ka nap’an e 1919. Kan tamra’nag e re binaw nib tolang nem ko re duw nem u nap’an ni thingari pag e girdi’ rok Jehovah ni gowa yad ba kalbus u lan e re binaw nem. (Revelation 14:8) Ma kun tamra’nag boch. Fare ulung ni Kristiano ni gathi yad boor e yad be “yot’ nga daken” e piin ni ur kalbusnagrad. Nap’an fare duw ni 1922 e ur wereged fare thin ni ra yib tomren Kristendom mi yad wereg fare thin ni taareb rogon ko fa aningeg e yubul ko fa aningeg i engel ko Revelation 8:7-12 nge fa dalip e gafgow ni bay ko Revelation 9:1–11:15.

“Mmat’aw Kanawoen E Piin Nib Mat’aw.”

7. Mang ayuw e ma yog ngak e piin ni ma fanay fare tamilang rok Jehovah, ma mini’ e ke l’agan’rad ngak, ma mang e ba t’uf rorad?

⁷ Ma thapeg Jehovah e piin ni ma yib ko tamilang rok, me ayuweg e kanawo’ rorad ni bod rogon ni yog Isaiah ni gaar: “Mmat’aw kanawoen e piin nib mat’aw. Gab mat’aw, ere ga ra pacheg kanawoen e piin nib mat’aw. Arrogon, ke l’agan’mad ngom nge kanawo’ rom, O Jehovah. Kari t’uf e ngochol rom romad.” (Isaiah 26:7, 8) Jehovah e ir ba Got nib mat’aw, ma thingari fol e piin ni ma meybil ngak ko pi motochiyel rok nib mat’aw. Ma nap’an ni yad ra fol ma ra pow’iyrad Jehovah me pacheg e kanawo’ rorad. Nap’an ni yad ra fol rok ma be dag e piin nib sobut’an ni kar l’agedan’rad ngak ma rib t’uf rorad e ngochol rok.​—Exodus 3:15.

8. Uw rogon laniyan’ Isaiah?

⁸ Rib t’uf rok Isaiah e ngochol rok Jehovah. Ke m’ug ni aram rogon ko bin migid e thin rok ni gaar: “Gab t’uf rog nnepˈ; ma u fithik’ag e gu ma gayem, ya nap’an ni bay e thin rom ni fan ko fayleng ma rayog ni nge fil e girdi’ nu fayleng e tin nib mat’aw ban’en.” (Isaiah 26:9) Rib t’uf Jehovah rok Isaiah u fithik’ e “yaal rok” ara ga’ngin yang e yafas rok. Amu lemnag fare profet nnep’ ni be meybil ngak Jehovah u fithik’ e gapas, ma be weliy fithik’ i laniyan’ ngak ma be gay e kanawo’ rok Jehovah. Ngada folwokgad rok! I fil Isaiah e tin nib mat’aw ban’en ko tin ni rin’ Jehovah. Ke pi’ Isaiah e kanawo’ ngodad ni ngada tedan’dad ya ngada nanged e tin nib m’agan’ Jehovah ngay.

Ke Mel’eg Boch E Girdi’ E Talumor

9, 10. Uw rogon ni dag Jehovah e runguy ngak e nam rok ni dar yul’yul’gad, ma mang e kar rin’ed ni bochan?

⁹ I runguy Jehovah e girdi’ nu Judah, machane de fol urngin e girdi’ rok. Baga’ ni ke mel’eg e girdi’ ni ngar togopuluwgad ko bin ni ngar uned ko tamilang ko machib rok Jehovah. I gaar Isaiah: “Yugu aram rogon ni kan runguy e ani ba kireb, ma de fil e tin nib mat’aw. Ba kireb e ngongol rok u lan fare binaw nib yal’uw ma de guy fene fel’ Jehovah.”​—Isaiah 26:10.

¹⁰ I ayuweg Jehovah yu Judah u puluwon e pi toogor rorad u nap’an Isaiah, machane dubun boor e girdi’ ni ngar lemnaged ni aram rogon. Ma nap’an ni i flaabnagrad Jehovah me pi’ e gapas ngorad, dar pininged e magar ngak. Ere ke n’agrad Jehovah ni ngar pigpiggad ngak “yugu boch e masta,” me pag ni nge yib yu Babylon ngar kalbusnaged yu Jew ko duw ni 607 B.C.E. (Isaiah 26:11-13) Munmun me sul boch i yad nga taferad.

11, 12. (a) Mang e bay nga m’on rok e piin ni kar kalbusnag yu Judah? (b) Nap’an fare duw ni 1919 mang e bay nga m’on rok e piin ni kar kalbusnag e pi tapigpig rok Jehovah?

¹¹ Ma uw rogon e piin ni kar kalbusnaged yu Judah? I fulweg Isaiah ni gaar: “Yad ba yam’, ma dab kur fasgad. Dariy gelngirad ni yad ba yam’, ma dab kun fasegrad ko yam’. Ere kam tayan’um ngorad ni fan ni ngam thangrad ma dab kun weliy morngaagrad biyay.” (Isaiah 26:14) Tomren ni ke war Babylon ko 539 B.C.E. ma dariy ban’en ni bay nga m’on rok. Munmun ma dakuriy fare binaw. “Dariy gelngin Babylon ni ba yam’ ” ma ke mus nu lan e babyor e bay morngaagen. Aram e ginang rok e piin ni ke l’agan’rad ngak e piin nib gel ko re fayleng ney!

¹² Ke lebug yu yang e re thin ko profet ney u nap’an ni ke pag Got ni gowa ngan kalbusnag e pi tapigpig rok ko duw ni 1918 me pithigrad ko kalbus ko duw ni 1919. Ka nap’an e ngiyal’ nem ma dariy ban’en ni bay nga m’on rok Kristendom, ni ir e ke kalbusnag e girdi’ rok Got. Machane rib gel e flaab ni bay nga m’on rok e girdi’ rok Jehovah.

“Kam Yoornag Girdien Fare Nam”

13, 14. Mang flaab ni ke yog ngak e pi tapigpig rok Jehovah ni ka nap’an e 1919?

¹³ Ke flaabnag Got e pi tapigpig rok ni kan duguliyrad ko kan ni thothup ko duw ni 1919 ni bochan e kar kalgadngan’rad. Somm’on me kunuy e tin ni ka bay ko fachi ulung ni yad e Israel rok Got mfini kunuy “fare ulung ni baga’ ” ko “yugu boch e saf” rok. (Revelation 7:9; John 10:16) I weliy Isaiah u m’on riy ni aram rogon e flaab ni ra yib. Be gaar: “Kam yoornag girdien fare nam, O Jehovah, kam ga’nag fare nam; kam tolangnagem. Kam ga’nag e mathil ko fare nam. O Jehovah, kar tedan’rad ngom u nap’an ni kar gafgowgad; ma ba sakathkath e meybil rorad ngom u nap’an ni kam gechignagrad.”​—Isaiah 26:15, 16.

¹⁴ Mathil ko fare Israel rok Got e ngiyal’ ney e ke taw ko ga’ngin yang e fayleng ma gonapan nel’ million girdien fare ulung ni baga’ ni yad be un i machibnag fare thin nib fel’ mab pasigan’rad ngay. (Matthew 24:14) Rib gel e flaab ni yib rok Jehovah! Ma yibe pining e sorok nga fithngan ni bochan! Chiney e kan nang e re ngochol nem u lan 235 e nam​—ma kari lebug e n’en ni ke micheg nra rin’.

15. Mang e ke fas biyay ko duw ni 1919?

¹⁵ Rib t’uf rok yu Judah e ayuw rok Jehovah ni fan ni ngar thaygad ko kalbus u Babylon. De yog rorad ni ngar rin’ed u gelngirad. (Isaiah 26:17, 18) Ma ku arrogon fare Israel rok Got ni kan pithigrad ko 1919 e aram e mich riy ni be ayuwegrad Jehovah. De yog ni ngan pithigrad ni dariy e ayuw rok Got riy. Ma rib gel e thil riy ma ke taarebnag Isaiah ko be’ ni ke fas ko yam’. Be gaar: “Be’ rom ni ke yim’ e ra fas ko yam’. Yam’ rog​—yad ra fas biyay. Mu odgad, mu tolulnaged e falfalan’, gimed e piin ni ma par u fithik’ e fiyath! Ya garaayuw romed e bod rogon e garaayuw ko woldug ni mallow, ma fare but’ e ra gargeleg e piin ni yad ba yam’.” (Isaiah 26:19; Revelation 11:7-11) Arrogon, piin ni dariy gelngirad ni yad ba yam’ e gowa bay ni gargelegrad ni ngkur maruwelgad biyay!

Ayuw U Fithik’ E Riya’

16, 17. (a) Mang e thingari rin’ piyu Jew ko duw ni 539 B.C.E. ni fan ni ngar magaygad nib fas? (b) Mang e be yip’ fan e “pi senggil” e ngiyal’ ney, ma uw rogon ni ke fel’ rogodad riy?

¹⁶ Gubin ngiyal’ mab t’uf rok e pi tapigpig rok Jehovah e ayuw rok. Machane, dabi n’uw nap’an ma ra k’iyag pa’ ko yay ni tomur nib togopuluw ko m’ag rok Satan ma ri ra t’uf e ayuw rok Got rok e piin ni ma liyor ngak. (1 John 5:19) I weliy Jehovah u morngaagen e riya’ ko re ngiyal’ i n’em ni gaar: “Marod, e girdi’ rog, marod nga lan e pi senggil romed ngam ninged e mab romed. Ngam mithgad ni bochi ngiyal’ nge mada’ ko ngiyal’ ni ke m’ay fare gechig. Ya ngam sapgad! Ra yib Jehovah u tagil’ nge gechignag girdien e binaw ni ur denengad nib togopuluw ngak ma but’ e ra tamilangnag e racha’ ni kan puog nga daken ma dabki mithag riy e piin ni kan thang e fan rorad.” (Isaiah 26:20, 21; Zephaniah 1:14) Re thin ney e ke tamilangnag e n’en ni thingari rin’ piyu Jew ya ngar magaygad nib fas u nap’an ni war Babylon ko 539 B.C.E. Piin ni kar folgad ko re thin ney ra par u lan taferad u nap’an ni be mahl e pi salthaw u kanawo’.

¹⁷ Ngiyal’ ney ma fapi “senggil” e be yip’ fan fa bokum biyu’ e ulung ko girdi’ rok Jehovah u fayleng iyan. Pi ulung ney e ma pi e ayuw e chiney, ya aram e gini bay e ayuw ko pi walagey nge ayuw ko piin ni piilal. (Isaiah 32:1, 2; Hebrews 10:24, 25) Bpuluw e re thin ney e chiney ni kari chugur tomren e re m’ag ney ma yafas rodad e ra yan u rogon e fol ni gad ra tay.​—Zephaniah 2:3.

18. Uw rogon ni ra li’ Jehovah “fare gamanman nu maday”?

¹⁸ I weliy Isaiah morngaagen e ngiyal’ nem ni gaar: “Chi rofen nem e ra fek Jehovah e sayden rok nib ga’ mab gel ma ra tayan’ ngak Leviathan ara gayuch, ni ir fare porchoyog ni be sirigig iyan ni ir ba sasalap, ma ra li’ Jehovah e re gamanman nu maday nem ni baga’.” (Isaiah 27:1) Mini’ fare “Leviathan” e ngiyal’ ney? Ir Satan ni ir “fare porchoyog ni ke kakrom” nge m’ag rok nib kireb ni yad ma mahl ngak fare Israel rok Got. (Revelation 12:9, 10, 17; 13:14, 16, 17) Ka nap’an e 1919 ma daki kol Leviathan e girdi’ rok Got. Dabi n’uw nap’an ma ra m’ay Leviathan. (Revelation 19:19-21; 20:1-3, 10) Ra thang Jehovah e re “gamanman nu maday nem ni baga’.” Dariy ban’en ni ra fanay Leviathan e ngiyal’ ney nib togopuluw ko girdi’ rok Jehovah e ra m’ag. (Isaiah 54:17) Rib fel’ lanin’dad ni bochan nib mich ni aram rogon!

“Ba Milay’ Ko Wain Ni Ba Wuthwuth”

19. Uw rarogon e tin ni ka bay ko fachi ulung e ngiyal’ ney?

¹⁹ Bay fan ni ngada falfalan’gad ni bochan e re tamilang ney ni yib rok Jehovah, fa? Bay fan! I weliy Isaiah e falfalan’ ko girdi’ rok Jehovah ni gaar: “Mu tangnaged fare ppin ko chi rofen nem, gimed e girdi’, ni nge lungumed: “Ba milay’ ko wain ni be wuthwuth. I gag Jehovah e gu be ayuweg fare milay’. Gubin ngiyal’ ni gu be puog e ran ngay. Gu ra matanagiy ni rran nge nep’ ni fan e dabi togopuluw be’ ngak.” (Isaiah 27:2, 3) I ayuweg Jehovah fare “milay’ ” ni be yip’ fan fare ppin ni fare Israel rok Got nge piin ni kar uned ngak. (John 15:1-8) Waamngin e re milay’ nem e be n’uf fithngan Got ma ma falan’nag e pi tapigpig rok u fayleng.

20. Uw rogon ni ma ayuweg Jehovah fare ulung ni Kristiano?

²⁰ Gad ba falfalan’ ni bochan e ke tal e damumuw rok Jehovah ngak e pi tapigpig rok ni kan duguliyrad ko kan ni thothup u nap’an ni ke pagrad ni gowa kan kalbusnagrad ko duw ni 1918. I gaar Jehovah: “Dakuriy e damumuw rog. Mini’ e ra pi’ e pan ni makankan ngog u nap’an e mahl? Gu ra yot’ daken. Ma gu ra tay e nifiy ngay. Danga’, ya nge un ngog nga tafenag nib gel, ma nge wenignag e gapas ngog; nge gapas thilmow.” (Isaiah 27:4, 5) Ra yot’ Jehovah daken e pan ni nge kirebnag e woldug rok ni grapes ni ma fl’eg e “wain ni ba wuthwuth.” Ere dabi kirebnag be’ e ulung ni Kristiano! Ya nge un urngin e girdi’ ko “tafen Jehovah nib gel,” ma ngar gayed e ayuw rok Jehovah. Gad ra rin’ ma ra gapas thildad Got​—ma ri baga’ fan ni nge gapas thildad Got ya l’agruw ni yog Isaiah ni ngada wenignaged e gapas.​—Psalm 85:1, 2, 8; Romans 5:1.

21. Uw rogon ni ke sug e binaw ko “woldug”?

²¹ I weliy Isaiah morngaagen yugu boch e flaab nra yib ni gaar: “Bayi taw ko tinem e rran ma ra yan lik’ngin Jacob, ma ra puf e floras rok Israel ma ra k’uf; ma ra sug e binaw ko woldug riy.” (Isaiah 27:6) Ke lebug e re thin ney ni ka nap’an fare duw ni 1919, ma be m’ug gelngin Jehovah riy. Ke suguy fapi Kristiano ni kan duguliyrad ko kan ni thothup e fayleng ko “woldug” ni be yip’ fan e machib. Kar chariyed e pi motochiyel rok Got nib tolang u fithik’ e re fayleng nib kireb ney. Ma ka be flaabnagrad Jehovah ma yad be yoor iyan. Ma bokum million e girdi’ ni kar chaggad ngorad ni yad yugu boch e saf ni “yad be pigpig ngak Got ni rran nge nep’.” (Revelation 7:15) Dab da dariy fannaged fare taw’ath ni bay rodad ni ngada ked fare “woldug” ma ngada pied ngak yugu boch e girdi’!

22. Mang flaab ni ma yog ngak e piin ni ma fanay fare tamilang?

²² Ri gad be pining e magar ngak Jehovah ya ke pi’ e tamilang ngak e girdi’ rok ni yad be par u fithik’ e lumor ko fayleng, fa? (Isaiah 60:2; Roma 2:19; 13:12) Re tamilang ney e ra gapasnag laniyan’ urngin e piin nra fanay fare tamilangnag ma ra falan’nagrad e chiney, ma rayog e yafas ni manemus ko gabul nge langleth. Ere bay fan ni gadad e piin nib t’uf fare tamilang rodad ni ngada pininged e sorok ngak Jehovah u fithik’ i gumercha’dad ma ngada uned ngak e ani yoloy e psalm ni nge lungudad: “Jehovah e ir e manab rog. Mini’ e nggu tamdag ngak? Nge l’agan’um ngak Jehovah; dab mu rus ma nge gel gumerchaem. Arrogon, nge l’agan’um ngak Jehovah.”​—Psalm 27:1b, 14.

Ka Ga Manang?

• Mang e bay nga m’on rok e piin ni kar gafgownaged e girdi’ rok Jehovah?

• Mang e i yog Isaiah ni ra yoor iyan?

• Mang e “pi senggil” ni nguuda pared riy, ma mang fan?

• Uw rogon ni yima pining e sorok ngak Jehovah ni bochan rarogon e girdi’ rok?

[Picture on page 28]

Ke mus ni piin nib mat’aw e kan pagrad ni ngar bad nga lan e “mach rok Jehovah nib gel” ni aram e ulung rok

[Picture on page 30]

I gaweg Isaiah Jehovah nnep’