Fa Ani Ta Ngongliy E Rume’ Nge Tin Ni Fl’eg

“[Ngam mang] ban’en ni ngan maruwel ngay ni fan nga boch ban’en nib fel’, . . . [ngam] par ni ke bung rogo[m] ni fan nga urngin e maruwel nib fel’.”​—2 TIMOTHY 2:21, New World Translation.

1, 2. (a) Mang fan ni rib manigil e maruwel rok Got ni ke sunmiy e pumoon nge ppin? (b) Mang fan ni ke sunmiy e Ani Ta Ngongliy e Rume’ Adam nge Efa?

JEHOVAH e ir fa Ani Ta Ngongliy e Rume’. Ma ban’en ni ke fl’eg ni rib fel’ e Adam ni bin som’on e llabthir rodad. Be weliy e Bible ni gaar: “Ma aram me fek [Jehovah Got] boch e but’ nge ngongliy ba girdi’ riy; me pag athon l’ugun ni ma pi’ e yafos nga lan p’ethungun, me fos fare girdi’,” ni aram e ke mang “ta pogofan.” (Genesis 2:7, footnote) Ma ba flont e re pumoon nem ni kan sunmeg, ya kan fl’eg ni bod yaan Got, ma bay rok pi felngin Got ni gonop, nge t’ufeg ko tin nib mat’aw nge tin ba yal’uw.

² I fanay Got reb e yumiyaw rok Adam me ngongliy e ppin riy​—ni nge ayuweg me gamaneg Adam. Ma kab pidorang Efa ko tin th’abi pidorang e ppin ko ngiyal’ ney. (Genesis 2:21-23) Maku rogon dowrow e gali nsom’on e girdi’ e rib flont ma rayog ni ngar rin’ew e maruwel rorow ni ngar fl’egew e fayleng ni ga’ngin nge mang paradis. Miki bung rogorow nrayog ni ngar folgow ko n’en ni yog Got ngorow ni bay ko Genesis 1:28 ni gaar: “Mu diyengow nge yoor pi fakmew, nge wer e piin ni owchemew nga gubin yang u fayleng ngar pired riy mi yad suwey.” Ma susun ni nge sug e fayleng ko girdi’ nib falfalan’, ni kar taab girdi’gad u fithik’ e t’ufeg ni “ir e ma chugumiy urngin ban’en nga taabang nge par ni ke fel’ rogon.”​—Kolose 3:14.

3. Ke diin ma gal som’on e gallabthir rodad e kar mangew e rume’ ni fan ko tin nde ga’ fan, ma mang wenegan ni ke yib riy?

³ Machane bay e kireban’ riy ya i turguy e gali som’on e gallabthir rodad ni ngar togopluwgow ku Ani Sunmiyrow ni ir fa Ani Ta Ngongliy e Rume’. Kanawo’ rorow e bod ni be yog ko Isaiah 29:15, 16 ni be gaar: “Rib gel e gafgow ni bayi ta’ e piin ni be mithag ban’en rok Jehovah, nge piin ni kar rin’ed ban’en u fithik’ e lumor mi yad gaar: ‘Mini’ e be guymad, ma mini’ e manang e n’en ni gamad be rin’?’ . . . Susun ni ngan tay ni taareb rogon e Ani ma ngongliy e rume’ nge fre but’ nni ngongliy e rume’ ngay fa? Susun ni nge yog e n’en ni kan ngongliy u murung’agen e en ni ngongliy ni gaar: ‘De sunmiyeg’? Ma fre n’en ni kan ngongliy e susun ni nge yog u murung’agen e an ni ke ngongliy ni gaar: ‘De adag e n’en ni ke ngongliy’’?” Bochan ni kar chelgow nga bayang ma ke yib wenegan riy nib kireb​—ni aram e yam’ ndabi m’ay biid. Maku ke af e denen nge yam’ ngak urngin e girdi’ ni yad pi fakrow. (Roma 5:12, 18) Kan kirebnag yaan fre n’en nib fel’ ni i ngongliy e An Ta Ngongliy e Rume’.

4. Mang e rayog ni ngan fanaydad ngay ni baga’ fan?

⁴ Yugu aram rogon ni gad e tadenen ya gad pi fak Adam, machane rayog ni ngad pininged e sorok ku Jehovah ni bod ni be yog ko Psalm 139:14 ni gaar: “Gu be pining e sorok ngom, yi gur e ngan mudugdag ngom; urngin e tin ni ga ma rin’ e dabiyog ni nge tamilangan’uy riy, ma rib fel’. Gu manang u lan ngorongoreg ni polo’.” Machane bay e kireban’ riy ni tin som’on e n’en ni ngongliy e Ani Ta Ngongliy e Rume’ e ke kireb yaan!

Fa Ani Ta Ngongliy e Rume’ e ke Ga’nag e Maruwel Rok

5. Ku mang e ra ngongliy e Ani Ta Ngongliy e Rume’?

⁵ Bay e falfalan’ riy ya An Tasunmiydad e ra ngongliy boch ban’en ni ir e Ta Ngongliy e Rume’ ni gathi ke mus ni gal som’on e girdi’ ni ke ngongliyrow. Yog apostal Paul ni gaar: “Machane gur mini’ ni ngam fulweg lungun Got, yi gur e ke mus ni gab girdi’? Ba rume’ nni ngongliy ko but’ e der ma gaar ngak e en ni ngongliy, ‘Mang fan ni mu ngongliyeg ni ara’ rogog?’ Mmudugil ni en ni ma ngongliy e rume’ ko but’ e bay mat’awun ni nge maruwel ko fa gi but’ nrogon ni be finey, ni nge ngongliy l’agruw i rume’ ko fa gi but’, nreb e yima fanay ko tin ni ba ga’ fan ban’en, ma reb e yima fanay ko tin ni gathi ri ba ga’ fan ban’en?”​—Roma 9:20, 21.

6, 7. (a) Uw rogon ni ma turguy boor e girdi’ ko ngiyal’ ney ni ngan ngongliyrad ngan fanayrad nga ban’en ni de ga’ fan? (b) Uw rogon ni yibe ngongliy e piin nib mat’aw ngan fanayrad ni fan ko tin baga’ fan ban’en?

⁶ Arrogon, boch e n’en ni ngongliy e An Ta Ngongliy e Rume’ e ran fanay ko tin ni baga’ fan ban’en, ma boch e ran fanay ko tin gathi ri baga’ fan. Piin ni ma turguy ni ngar uned ko fayleng ni be palog iyan nga orel rok Got ma gowa yibe ngongliyrad u rogon ni ran turguy ni yad ra un ko magothgoth. Nap’an ni yib Jesus Kristus ni ke Pilung, mara pufthinnag e girdi’, ma pi rume’ nem ni kan fanay ko tin nde ga’ fan e ba muun ngay e piin ni yad ba gelan’ ni bod e kaming ma be yog ko Matthew 25:46 ni, “pi cha’ ney e bay ni pi’rad ko gechig ndariy n’umngin nap’an.” Ma piin ni yad bod e saf ni yad ba “mat’aw,” ni yad e rume’ ni kan fanay ko tin “baga’ fan ban’en” e bay ranod ko “yafos ndariy n’umngin nap’an.”

⁷ Piin nib mat’aw e ba sobut’an’rad ya yad ma pag ni nge ngongliyrad Got u rogon ni ba adag. Kar folgad ko kanawo’ rok Got ko yafas rorad. Kar folgad ko fonow ni pi’ Got u 1 Timothy 6:17-19 ni be gaar: “Dabi l’agan’[med] ko pi n’em nde mudugil, ni aram e pi n’en ni ma fel’ rogoy riy ko biney e tamilang, machane ng[e] l’agan’[med] ngak Got ni ir e ba gol ni be pi’ urngin ban’en ngodad ni be fel’ rogodad riy.” Yad be “ngongliy e tin nib fel’, ma ngongol nib fel’ e nge yoor ni ngar ngongliyed, ma ngar golgad ni nge m’agan’rad ngay ni ngar pied boch e tin ni ba’ rorad ban’en ngak boch e girdi’. Ereray kanawoen mi yad kunuy e flaab ni fan ngorad ni ir e bay mang def ngorad nib gel ni fan ngorad e chiney i yan ngaram. Ma aram e ra yog ngorad e yafos ni ir e bin riyul’ e yafos.” Kar paged e thin riyul’ rok Got nge ngongliyrad me fl’eg rogorad ma rib mudugil e michan’ rorad ko n’en ni pi’ Jehovah u daken Kristus Jesus ni “ir e pi’ ir nge biyuliy urngin e girdi’ ngak Got” ni fan ni ngan sulweg nga rogon urngin ban’en ni ke mul u pa’ Adam. (1 Timothy 2:6) Ere susun ni nge m’agan’dad ngay ni ngad folgad ko n’en ni yog Paul ni “bin ni beech i gadad e nga don’ed nga dakendad. Erera’ e bin nib beech i gadad ni Got ni ir e sunumiy e yugu be beechnag [ngongliy yaan] iyan ni nge yan i par ni bod ir, me fal’eg rogomed ngar mu nanged ir”!​—Kolose 3:10.

Miti Mang Rume’ Gur?

8. (a) Uw rogon ni yima turguy ko miti mang rume’ ni ra mang be’? (b) Mang l’agruw ban’en ni ma sor fan ko uw rogon ni ngan ngongliy be’ ni bod e rume’?

⁸ Mang e ma turguy ko ra be’ mab miti mang rume’ e ra bod? Ma m’ug ko lem nge ngongol rok. Ma pi n’ey e ma tor ko tin ni yiba adag u gum’erchaey. Yog Solomon ni Pilung nib gonop ni gaar: “Ma lek e girdi’ gum’ercharad ni nge lemnag e kanawo’ rok, machane Jehovah e ma pow’iy e yan rok.” (Proverbs 16:9, NW) Bin l’agruw, ma yibe ngongliy e girdi’ u daken e tin ni yad ma rung’ag nge tin ni yad ma guy, nge piin ni yad ma chag ngorad, nge tin ni ma buch ngorad. Ere rib ga’ fan ni ngad folgad ko re thin ney ni be gaar: “Mpachegem ngak e piin ni yad ba gonop me yog e gonop ngom. Mm’agem ngak e girdi’ ni balyang ma ga kireb.” (Proverbs 13:20) 2 Peter 1:16 e be ginangdad ni dabda “torgad nga bogi yat ni girdi’ e sunumeg,” ara rogon ni yog ba ken e Bible ni Knox’s Roman Catholic version e “pi yat ni sum ko lem ko girdi’.” Ba muun ngay e pi machib ko apostate nu Kristendom nge pi madenom ko teliw.

9. Uw rogon ni rayog ni ngad folgad ko n’en ni be rin’ e Ani Ta Ngongliy e Rume’ u nap’an ni be ngongliydad?

⁹ Ere rogon ni gad ma fol ma aram rogon nrayog ni nge ngongliydad Got nrogon. U fithik’ e sobut’an’ ma rayog ni ngad dogned fre meybil ku David ni be gaar: “Got, mu guy lanin’ug ngam nang; mu sikengnigeg ngam nang e lem rog. Ma gguy ko bay e sabanban riy fa dariy, ma ga pow’iyeg u daken fa bin dabi m’ay e kanawo’.” (Psalm 139:23, 24) Be n’igin Jehovah ni ngan wereg fre thin ko Gil’ilungun. Ma kad adaged u gum’erchadad fre thin nib fel’ ma kad folgad rok Got me felan’dad ngay. U daken e ulung rok ma ma pi’ e taw’ath ko girdi’ nib sor fan ko fre maruwel ni ngan machibnag fre thin nib fel’; ngad koled e pi taw’ath ney ma gad chaariy.​—Filippi 1:9-11.

10. Uw rogon ni susun ni ngad athamgilgad ni ngad folgad ko tin ni kan yarmiy ko tirok Got ban’en?

¹⁰ Rib baga’ fan ni ngad tedan’dad ko Thin Rok Got, ma gad poy e Bible u gubin e rran ma gad weliy u murung’agen e Bible nge Jehovah ko girdi’ rodad nge pi fager rodad. Rogon ni ma rin’ e pi walag u Bethel nge piin ni yad e missionary ko Pi Mich Rok Jehovah e gubin e rran ni kakadabul ma yad ma abich u taabang ma yad ma poy e Bible ara boch e thin ko fre ke babyor ni Yearbook. Rayog ni ngam yarmiy ni aram rogon ko tabinaw rom fa? Maku ra yib angin ngodad ni ngad chaggad ko pi walagdad ko ulung ko Kristiano u nap’an e muulung ma gad pi’ e fulweg u nap’an e fol Wulyang Ntagil’ e Damit u gubin e wik!

Kan Ngongliydad Nrogon Nrayog ni Ngad K’adedan’dad ko Magawon

11, 12. (a) Uw rogon nrayog ni ngad folgad ko n’en ni yog James u murung’agen e skeng ni ma yib ngodad u reb e rran nge rreb? (b) Uw rogon ni ma pi’ Job e athamgil nga lanin’dad ni ngad pared nib yul’yul’?

¹¹ Nap’an e par rodad u reb e rran nge reb ma ma pag Got ni nge buch boch ban’en ngodad, ma yu ngiyal’ ma mo’maw ni ngad kadedan’dad riy. Susun uw rogon u wan’dad e pi n’ey? Rogon ni yog u James 4:8 ma dabda paged ni ngad damumuwgad ni bochan, ya ngad chugurgad ngak Got ma gad pagan’ ngak u polo’ i gum’erchadad me mich u wan’dad ni faan gad ra ‘chugur ngak, ma ra chugur ngodad.’ Rriyul’ ni thingarda athamgilgad u fithik’ e gafgow nge skeng, machane yibe pag ni nge yib ngodad ya aram rogon ni yibe ngongliydad nrogon ma angin nra yib riy e falfalan’. James 1:2, 3 e be fl’eg lanin’dad ni gaar: “Pi walageg ni girdien Kristus! Mu lemniged gimed nib fel’ waathmed ko ngiyal’ nra yib urngin mit e skeng riy ngomed, ya gimed manang ni faanra gelnagmed e michan’ romed ko pi skeng nem ni aram rogon, ma wenegan nra yib ngomed e aram e ke yog romed ni nguum k’adedan’med.”

¹² Miki gaar James: “Ma faanra yib e mit nem e skeng ngak be’ nrayog ni nge waliy faanem nge denen, ma thingari dabi gaar u laniyan’, ‘Re n’ey ni be n’en ni nge waliyeg nggu denen e yib rok Got.’ Ya dariy ban’en nib kireb nrayog rok ni nge yan i guy rogon nge waliy Got nge denen, mi Got e der rin’ ngak be’. Machane pi n’en ni ma waliy e girdi’ nge denen e ma yib ngak e en ni pag ir ko n’en nib kireb ni be ar’arnag nge waliy faanem nge aw ko wup.” (James 1:13, 14) Pi skeng ni ma yib ngodad e boor mab thil thil, machane bod rogon Job maku yibe fel’ rogon ngodad riy. Pi thin ni bay ko James 5:11 e ma fl’eg lanin’ad ya be gaar: “Gadad be yog ni kar felan’gad ni bochan e ra k’adedan’rad. Kam rung’aged murung’agen e gum’an’ ni ta’ Job, ma gimed manang e tin ni pi’ [Jehovah] ngak Job ko tomur. Yi [Jehovah] e ri ma runguy ma ma taganan’ ngak e girdi’.” Gad e rume’ u pa’ fa Ani Ta Ngongliy e Rume’, ma nguud pared nib yul’yul’ u gubin ngiyal’, me michan’dad ni bod Job ma ra yib angin!​—Job 2:3, 9, 10; 27:5; 31:1-6; 42:12-15.

Ngan Fl’eg Rogon e Pi Bitir Rodad

13, 14. (a) Wuin e susun ni nge tabab e gallabthir ni ngar ayuweged e bitir rorad ngar fl’eged rogorad, ma mang e susun ni yad be nameg? (b) Mang reb e thin nib falfalan’ ni aram wenegan ni yib riy?

¹³ Piin gallabthir e rayog ni ngar ayuweged e bitir rorad mar fl’eged rogorad u nap’an ni kab madway, ma rayog ni ngar manged e piin fel’ yangaren nib yul’yul’! (2 Timothy 3:14, 15) Aram rogon ni mus ko ngiyal’ ni rib gel e skeng. In e duw faram ma ba gel e togopluw ni kan ta’ u Africa, ma reb e tabinaw nib yul’yul’ e kar fl’eged fre ke babyor ni Wulyang Ntagil’e Damit u tabgulen e naun rorad. Ma reb e rran ma be yan e pi salthaw u mit e tabinaw iyan, ma yad be gay e piin pagal ni ngar uned ko salthaw. Bay e tayim ni nge mith l’agruw e pagal ko re tabinaw nem, machane faanra yib e pi salthaw mara fl’eged i gay boch ban’en ma dabi siy ni yad ra pirieg fre masin ni yad ma fl’eg e babyor ngay. Ma aram e ran gafgownag urngin e girdi’ ko re tabinaw nem fa ran li’rad ngar m’ad. Ere mang e rayog ni ngan rin’? Fagali pagal e ur rognew e thin ni bay ko John 15:13 ni be gaar: “Rogon nib th’abi t’uf rok be’ e pi tafager rok e nge pi’ e pogofan rok ni fan ngorad.” Ere kar parew ko living room. Ma ra piriegrow e pi salthaw ma dabi siy ni yad ra gafgownagrow nib elmirin fa ran li’row ngar m’ow u nap’an ni yow ra yog ni dabra unew ko salthaw. Machane aram e dakura gayed ban’en u rom. Ma dabni pirieg fre masin ni ma fl’eg e babyor, ma dabni gafgownag girdien e re tabinaw nem. Machane bay ban’en ni buch ni yira ngat ngay. Ya ke lukaf e pi salthaw e re naun nem, mi yad yan ko tin ni ka bay! Pi girdi’ nem ni yad bod e rume’ ni kan fanay ko ban’en ni baga’ fan e kar magaygad nib fas, ma kab manigil fre masin ni ma fl’eg e babyor, ma aram e kar ul’ul’gad i ngongliy e ggan nib spiritual. Bagayow e gali pagal nem nge walagen ni ppin e yow be pigpig u Bethel; ma ka be maruwel ko re masin nem.

¹⁴ Rayog ni ngan fil ko piin fel’ yangaren ko uw rogon ni ngar meybilgad, ma ra fulweg Got taban e meybil rorad. Aram e n’en ni buch u nap’an ni un thang e fan ko piyu Rwanda. Immoy ba bitir ni nel’ e duw rok nge gallabthir rok ni yibe n’en ni ngan li’rad ngar m’ad ko ba donmach ni hand grenade, ma ke meybil e chi buliyel nem nib ga’ laman me yibilay ni dabni li’rad ni fan ni rayog ni ngar ul’ul’gad i pigpig ku Jehovah. Ma aram e fa piin ni be n’en ni ngar lied e re tabinaw nem e ur gaargad, “Dabiyog ni nggu li’ed gimed, ni bochan e chi buliyel ney.”​—1 Peter 3:12.

15. Mang e ke ginangey Paul ngay u murung’agen e pi n’en ni ma kirebnagey?

¹⁵ Baga’ ni de t’uf ko piin fel’ yangaren ni ngar athamgilgad u fithik’ e magawon ni aram rogon fene gel, machane ka bay boor e skeng ni ma yib ngorad u skul ngu lan e re fayleng ney nib kireb: u boor e binaw ma ke yoor e thin nib kireb ni yima yog nge pi n’en ni yaan e ngongol ndarngal, nge fafel nib puwlag, nge bitir ni ma towarsariyrad ni ngar uned ko ngongol nib kireb. Boor yay ni i ginangey Paul ko pi n’en ney.​—1 Korinth 5:6; 15:33, 34; Efesus 5:3-7.

16. Uw rogon nrayog ni nge mang be’ ba rume’ ni ngan fanay ko tin baga’ fan ban’en?

¹⁶ Tomren ni ke weliy Paul u murung’agen e rume’ ni fan ko “tin ni ngan ta’ fan nge boch ni fan ko tin nib kireb,” me gaar: “Faanra fal’eg be’ rogon nge gilaf nga orel ko pi kireb ney ni gubin, ma yira fek ngan maruwel ngak ni fan nga boch ban’en nib fel’, ni bochan e ke pi’ ir ngak e Masta rok ma ke par nke bung rogon ni ngan maruwel ngak ni fan nga urngin e maruwel nib fel’.” Ere ngad pied e athamgil nga laniyan’ e piin fel’ yangaren ni ngar ayuwgad ko mini’ e yad be chag ngorad. Ngar “tedrad u urel ko tin ni ma ar’arnag e piin ni pagel, ma ngar nameged e tin nib mat’aw, mu ur athamgiliyed nguur pared nib mich Kristus u wun’rad, ma ba t’uf Got rorad nge girdi’ ma ba gapas lanin’rad ngar uned ngak e piin ni yad ma wenig ngak Somol u fithik’ e lem nib machalbog ni nge ayuwegrad Somol.” (2 Timothy 2:20-22) Ngan yarmiy e tabinaw ni “ra bagayad mi i pi’ e athamgil nga laniyan’ bagayad” ma aram e ra fl’eg rogon e piin fel’ yangaren. (1 Thessalonika 5:11; Proverbs 22:6) N’en nra ayuwegrad e ngan poy e Bible u gubin e rran ma ran fil e pi babyor ko ulung.

Ngan Ngongliy Gubin e Girdi’

17. Uw rogon nra ayuwegdad e gechig, ma mang wenegan nra yib riy ni falfalan’?

¹⁷ Ma pi’ Jehovah e fonow ngodad u daken e Thin Rok nge ulung rok ni nge ngongliydad nrogon. Dabda togopluwgad ko fonow rok Got! Ngam fol riy, ma ga pag ni nge ngongliyem nge fanayem Jehovah ni fan ko ban’en ni baga’ fan. Proverbs 3:11, 12 e be gaar: “Fakag, faan ra yal’uwegem [Jehovah], ma ngar mu tiyan’um ngam lemnag ni be fonownigem. Yi [Jehovah] e ma yal’uweg e piin ni yad ba t’uf rok, ni bod rogon ba matam ni ma yal’uweg be’ ni fak ni ba falfalan’ ngak.” Ma ka bay boch e fonow ko Hebrews 12:6-11 ni be gaar: “Yi [Jehovah] e ma gechignag e en nib t’uf rok . . . Ma faan bayi gechignagdad Got, ma gadad finey e ngiyal’ i n’em nre n’em ni ke yib ngodad e ban’en ni nge kireban’dad ngay, ma gathi nge felfelan’nagdad. Machane faani tomur riy ma fa piin ni mit nem e gechig e ke yal’uwegrad e ke yib wenegan ngorad ni aram e ke gapas lanin’rad ma ke yal’uw pangirad u mit Got.” Ma bin th’abi ga’ fan e gechig e yib u daken e Thin Rok Got.​—2 Timothy 3:16, 17.

18. Mang e gad be fil ko Luke guruy ni 15 u murung’agen e kalngan’uy?

¹⁸ Jehovah e ma runguy e girdi’. (Exodus 34:6) Nap’an ni ke denen be’ nib ubchiya machane ke kalngan’ ma ra n’ag Jehovah fan. Mus ni piin ni ‘prodigal’ ko ngiyal’ ney ma rayog ni ngan ngongliyrad ngan fanayrad ko ban’en ni baga’ fan. (Luke 15:22-24, 32) Sana gathi rib ubchiya’ e denen rodad ni bod fre pagal ni prodigal. Ma faanra gad ba sobut’an’ ma gad fol ko fonow ko Bible ma aram e rayog ni ngan ngongliydad ngad manged e pi rume’ ni ngan fanay ko ban’en ni baga’ fan.

19. Uw rogon nrayog ni nguuda pared ni be fanaydad Jehovah ni gad e pi rume’ ni fan ko tin baga’ fan ban’en?

¹⁹ Nap’an ni kad filed e tin riyul’ ko yay nsom’on ma kad daged ni gad ba adag ni nge ngongliydad Jehovah u rogon ni ba adag. Ere dakuda uned ko tin nu fayleng ban’en, ma kad athamgilgad ni nga don’ed nga dakendad fa bin nib biech e pangidad, ma kad ognaged gadad ku Got ma kad uned ko taufe. Kad folgad ko pi thin ni bay ko Efesus 4:20-24 ni be yog ni ‘mu n’iged pangimed ni kakrom ni ir e um pired riy​—ni fare pangin ni kakrom ni ar’ar nib kireb e bannag nge kirebnag. Thingar mon’ed nga dakenmed e bin nib beech i gimed ni bod rogon e munmad, ni bin nib beech i gimed ni Got e sunumeg ni bod ir, ma ke gagiyel u daken e bin riyul’ e wok nib yal’uw ma mmat’aw ni ke yog ngomed.’ Nguuda pared ni be ngongliydad Jehovah ni ir e Ani Ta Ngongliy e Rume’, ma gad pigpig ni gad e rume’ ni yibe fanay ni fan nga ban’en ni baga’ fan!

Ngan Sul Nga Daken

◻ Mang e m’agan’ e Ani Ta Ngongliy e Rume’ ngay ni fan ko re fayleng ney?

◻ Uw rogon nrayog ni ngan ngongliyem min fanayem ni fan nga ban’en ni baga’ fan?

◻ Uw rogon nrayog ni ngan ngongliy e pi bitir rodad ni bod e rume’?

◻ Susun uw rogon u wan’dad e gechig?

[Sasing ko page 20]

Yira ngongliyem ni fan ko ban’en ni baga’ fan fa yira n’agem?

[Sasing ko page 22]

Rayog ni ngan ngongliy e piin bitir ni bod e rume’ u nap’an ni kab madway