Bin nib Beech e Special Assembly Day

Kenggin e special assembly day ko 2008 e “Gadad Bod e But’ ni Yima Ngongliy e Th’ib Riy​—Ma Jehovah e Ir e En ni Ma Ngongliy e Th’ib,” ni ba m’ag ko Isaiah 64:8. Fonow nu Bible ni yira pi’ u nap’an e re assembly ney e ra ayuwegdad nguuda ted fan fel’ngin Jehovah ni aram e gonop, mat’aw, gelngin, nge t’ufeg rok e En nib Gilbuguwan ni Ma Ngongliy e Th’ib.

Welthin rok e circuit overseer ni “Nguuda Pigpiggad ni Gadad e Piin nib Yul’Yul’ ko Machib u Mit e Tabinaw,” e ra dag rogon ni be felfelan’ boor e girdi’ ko flaab ni bochan e ke tamilang e tin riyul’ u wan’rad ma yad be wereg ngak yugu girdi’. Ma welthin ni “Ra Mu Tiyan’um Ngay ma Ke Ayuweg Pogofam” e ra tamilangnag rogon ni ma ayuwegdad e ngiyal’ ni nguuda tedan’dad ko pi motochiyel nib mat’aw rok Jehovah. Kenggin e welthin nra pi’ fa en ni milekag e “Dab Mu ‘Folgad ko Ngongol ni Be Tay Girdien e Re M’ag Ney’” nge “Mu Pag ni Nge Ngongliyem Fa En nib Gilbuguwan ni Ma Ngongliy e Th’ib.” Yira pi’ e athamgil nga laniyan’ e pi gallabthir nge piin ni fel’ yangaren ko gali welthin ni “Piin ni Fel’ Yangaren ni Yad Be Pag ni Nge Fanayrad Jehovah” nge “Maruwel ni Ba Ga’ Fan Rok e Gallabthir ko Ngiyal’ ni Ngar Duruw’iyew e Bitir.” U fithik’ e demonstration nge interview, ma ra falfalan’dad ni ngad rung’aged ma da guyed rogon ni be machib e pi walagdad u mit e tabinaw. Piin ni kar ognaged e yafos rorad ku Jehovah ni yad ba adag ni ngar uned ko taufe e susun ni ngar weliyed ngak fa en ni presiding overseer nib papey. Dab mu pag talin ni ngam fek i yib e Wulyang Ntagil E Damit ni yira fil u nap’an e wik ko special assembly day.

Demtrug e tin nib m’agan’ fa En nib Gilbuguwan ni Ma Ngongliy e Th’ib ma bayi lebug. Machane be mil fan ngak ra reb i gadad ni ngad mel’eged rogon ni ngad folgad ko kanawo’ ni nge ngongliydad. Piin nib gonop ni ngar folgad rok Jehovah ni yad bod e but’ u daken e masin rok e en ni ma ngongliy e th’ib, e yad ra mang e girdi’ ni kar mon’oggad i yan, mar folgad rok, mar manged e girdi’ nrayog ni nge fanay Got. Faan gad ra fol rok Jehovah, ma gad be pining e sorok ko gagiyeg rok ma ra yog boor e flaab ngodad.