Bin nib Beech e Program ko Bin Migid e Special Assembly
Kenggin e special assembly rodad ko duw ni 2009 e ni fek ko Kolose 4:17 ni gaar: “Mu Guy Rogon Ngam Mu’nag Fare Maruwel ni Kan Pi’ Ngom.” Gad e Kristiano e rib ga’ fan e re fonow ney u wun’dad. Gad baadag ni ngada mu’naged e maruwel rodad u fithik’ e yul’yul’ ni bod rogon ni rin’ Jesus. (John 17:4) Ki dag apostal Paul e kanawo’ nib manigil ni ngad folwokgad riy ni aram e dugliy u wan’ ni nge mu’nag e maruwel ni kan pi’ ngak.—Acts 20:24.
Welthin ko circuit overseer e ra tamilangnag rogon ni be pithig boch e walag e magawon ni yad be mada’nag ko machib. Migid ma fare welthin ni kenggin e “Mu Ayuweg e N’en ni Kam Yung” e ra tamilangnag rogon ni ngad ayuweged e piin ni yad ‘baadag ni yog e yafos ndariy n’umngin nap’an ngorad.’ (Acts 13:48) Faen ni be lekag e ulung e ra weliy urngin e thin ni bay ko 2 Korinth 6:1-10 u lan e welthin rok ni kenggin e “Rogon ni Gad Be Micheg ni Gad Boch e Tamachib.” Ra yan i mithigiyal’ maku ra pi’ reb e welthin ni kenggin e “Ngar Mu Adag Mag Tayfan e Machib ni Gabe Tay.” Maku dabisiy ni fagal welthin ni kenggin e “Ma Felfelan’ e Piin Fel’ Yangaren nge Piin Pilibthir ko Machib ni Yad Ma Tay,” nge “Piin Fel’ Yangaren ni Yad Ma Rin’ e Maruwel nib Milfan Ngorad ko Machib” e ra yibnag e athamgil nga lanin’um. Piin ni kar ognaged yad ngak Got ma yad baadag ni ngar uned ko taufe u nap’an e assembly e susun e nga rogned ngak e en presiding overseer ni kane’. Reb ni ka gad ma rin’ ko pi assembly nge convention ni gad ma tay e fol Wulyang Ntagil’ E Damit. Ere gara fek e kerom e babyor ni yira fil ko re wik ni yira tay e assembly riy.
Ngada ayuwgad ni nge dabi m’on yugu boch e maruwel ko fare maruwel ni ke pi’ Jehovah ngodad. Ya kemus rogon ma gad mu’nag e re maruwel nem ni kan pi’ ngodad. Thin ko Bible ni yira weliy u nap’an e re muulung ney e ra ayuwegdad nge ga’ fan u wun’dad e n’en nthingar da rin’ed me yog nda tedan’dad ko tin nib ga’ fan ban’en maku gad be fal’eg i yaliy e machib ni gad be tay ni fan e ngad mu’naged nib fel’ rogon.