Fare Kanawo’ Ni Kari Mus Ni Ir E Ni Ma Yan Ko Yafos Ni Manemus

“I gag e kanawo’, me gag e tin riyul’, me gag e yafos.”​—JOHN 14:6.

1, 2. Mang e ke taarebnag Jesus ko kanawo’ ko yafos ni manemus, ma mang e n’en nib ga’ fan ko re fanathin nem?

FARE welthin nib gilbuguwan ni pi’ Jesus u daken e burey e taarebnag e kanawo’ ni ma yan ko yafos ni manemus ko ba kanawo’ ni ra yan be’ nga lan e garog me yan ngay. I tamilangnag Jesus ni re kanawo’ ney ni ma yan ko yafos e gathi mmom, ye gaar: “Marod ko bin nib wen’in e garog; ya ba ga’ langan e garog ko nifiy, ma kanawo’ ni yan ngay e mmom, ma boor e girdi’ ni be yan u daken. Ma garog ko yafos e ba wen’in, ma kanawo’ ni yan ngay e mmo’maw’, ma ba lich e girdi’ ni be pirieg.”​—Matthew 7:13, 14.

² Ga manang fan e re fanathin ney? Gathi be dag ni kari mus ni taareb e kanawo’ ni ma sor iyan ko yafos ma ba t’uf ni ngad tedan’dad ngay ni dabda sorgad nga bayang nib orel ko re kanawo’ nem ko yafos? Ere mang kanawo’ ni kari mus ni ir e ma sor iyan ko yafos ni manemus?

Maruwel Rok Jesus Kristus

3, 4. (a) Uw rogon ni be dag e Bible e n’en ni rin’ Jesus ni baga’ fan ni ke yog ni ngad thapgad ngak Got? (b) Wuin e yan som’on ni ke dag Got ni rayog e yafos ni manemus ko girdi’?

³ Ri ba tamilang ni Jesus e ri baga’ fan ko re kanawo’ nem, ya arrogon ni yog apostal Peter ni gaar: “Ke mus ni Jesus e rayog rok ni nge thapeg e girdi’ ngak Got; ya dakuriy yugu reb e ngochol nga bayang u roy u fayleng ni pi’ Got ngak e girdi’, ni ir e rayog rok ni nge thapegdad ngak Got.” (Acts 4:12) Ku aram rogon ni yog apostal Paul ni gaar: “Tow’ath rok Got ngodad ndariy puluwon e yafos ndariy n’umngin nap’an nra pi’ u daken e taab girdi’ ni kad tiyed e Somol rodad i Jesus Kristus.” (Roma 6:23) I tamilangnag Jesus ni kari mus ni ir e kanawo’ ko yafos ni manemus ni gaar: “I gag e kanawo’, me gag e tin riyul’, me gag e yafos.”​—John 14:6.

⁴ Ere ri baga’ fan ni ngad nanged ko uw rogon ni ke ayuwegdad Jesus ni rayog e yafos ni manemus ngodad. Ere ngad lemnaged ko uw rogon e liw rok. Ga manang ko wuin ni ke tamilangnag Jehovah Got ni rayog e yafos ni manemus ko girdi’ u tomren ni ke denen Adam? Fin tomren ni ke denen Adam. Ma ngad filed u murung’agen e yan som’on ni kan yiiynag ni ra thapeg Jesus Kristus e girdi’ ngak Got.

Fare Owchen ni Kan Micheg

5. Uw rogon nrayog ni ngad nanged ko mini’ fare porchoyog ni ke wawliy Efa?

⁵ I yog Jehovah Got boch e thin ni be yip’ fan ban’en ni nge tamilangnag ko mini’ fa En nra yib me thapeg e girdi’ ngak. I rin’ e re n’ey ko som’on u nap’an ni ke pi’ e gechig ko “fare porchoyog” ni ke non ngak Efa me wawliy ni nge th’ab e motochiyel rok Got me kay wom’engin e gek’iy ni kan fal nga bang. (Genesis 3:1-5) Ma gathi briyul’ ni non fare porchoyog. Ya aram ba kan nib gel ni be weliy e Bible murung’agen ni ir “fare porchoyog ni ke kakrom, ni kan tunguy fithingan ni Moonyan’, ara Satan.” (Revelation 12:9) I fanay Satan e re gamanman ney nib sobut’ ni nge non u daken me wawliy Efa. Ere nap’an ni ke pi’ Got e gechig ngak Satan me gaar: “I gur nge fare pin e bay mpirew ni gimew ba toogor; ma ku re rogon pi fak nge pi fakam ni bay ur pired ni yad ba toogor. Ma be’ nib moon ni fak fare pin e bay pirdiiy lolugem nge maad’ad nib gel, me gur e bay mu k’ad wurilen e rifrif u ay.”​—Genesis 3:15.

6, 7. (a) Mini’ fare pin ni ra gargelnag fare “owchen”? (b) Mini’ fare Owchen ni kan micheg, ma mang e ra rin’?

⁶ Mini’ e re “pin” ney ni Satan e ma fanenikay? Revelation guruy ni 12 e be tamilangnag ko mini’ “fare porchoyog ni ke kakrom” maku arrogon ni be tamilangnag ko mini’ e re pin ney ni toogor rok Satan. Mu yaliy verse 1 ni be weliy ni re pin ney e “mad rok e yal’ ma ba’ e pul u tan e rifrif u ay, ma ke teeliaw nga medlip i t’uf.” Re pin ney e be yip’ fan e ulung rok Got u tharmiy ni yad e pi engil nib yul’yul’, ma fare “pagel” nni gargelnag e be yip’ fan Gil’ilungun Got, me Jesus Kristus e Pilung riy.​—Revelation 12:1-5, The Jerusalem Bible.

⁷ Ere mini’ fare “owchen” ara fak fare pin ni bay ko Genesis 3:15, ni ir e en nra pirdiiy “lolugen” Satan me yim’? Aram fa en ni l’og Got u tharmiy nga but’ me ni gargelnag bochi pin nib machalbog, arrogon, aram Jesus. (Matthew 1:18-23; John 6:38) Be tamilangnag Revelation guruy ni 12 ni kan faseg ko yam’ me yan nga tharmiy, ma re Owchen ney ni Jesus Kristus e ra gel ngak Satan ma be yog ko Revelation 12:10 ni “fare gagiyeg rok Got” e ra dugliy me “par Kristus ni ir e Pilung.”

8. (a) Mang e n’en nib biech ni pi’ Got ni fan ni nge lebug e n’en nke m’agan’ ngay ko som’on? (b) Chon mini’ e yad bang ko bin nib biech e am rok Got?

⁸ Re gagiyeg ney u pa’ Jesus Kristus e aram ban’en nib biech ni ngongliy Got ni fan ni nge lebug e n’en nke m’agan’ ngay ko som’on ni ra par e girdi’ ndariy n’umngin nap’an u fayleng. Tomren ni i togopuluw Satan, ma ke rin’ Jehovah ban’en e chi ngiyal’ nem ni nge taleg wenegan e kireb u daken fare Am rok nib biech. Nap’an ni immoy Jesus u fayleng me tamilangnag ni gathi ke mus ni ir e ra un ko re am nem. (Luke 22:28-30) Ya ran mel’eg boch e girdi’, mi yad un ngak u tharmiy ngar gagiyeggad u taabang, ma aram mi yad mang bangi n’en ni owchen fare pin. (Galatia 3:16, 29) U lan e Bible ma kan nog ko uw urngin e pi girdi’ ney ni ra un ngak Jesus​—ni yad gubin e kan fekrad u fithik’ e girdi’ nib tadenen u fayleng​—ni yad 144,000 u gubin.​—Revelation 14:1-3.

9. (a) Mang fan nib t’uf ni nge yib Jesus nga fayleng nib girdi’? (b) Uw rogon ni ke taleg e n’en ni rin’ Moonyan’?

⁹ Machane u m’on ni ra tabab e re Am nem ko gagiyeg, ma baga’ fan ni nge m’ug Jesus Kristus ni ir kenggin e re owchen nem, u fayleng. Mang fan? Ya ke dugliy Jehovah Got ni ir fa En nra “kirebnag e maruwel rok Moonyan’.” (1 John 3:8) Boch e maruwel rok Satan e ke n’igin Adam ni nge denen, ma aram me yibnag e denen nge yam’ ngak urngin pi fak. (Roma 5:12) Ke kirebnag Jesus e re maruwel ney rok Moonyan’ ya ke pi’ e yafos rok ni nge biyuliydad. Ma aram tapgin ni ngan pithig e girdi’ ko denen nge yam’ me bing e kanawo’ ko yafos ni manemus.​—Matthew 20:28; Roma 3:24; Efesus 1:7.

N’en nke Yognag fare Biyul’

10. Uw rogon nib taareb rogorow Jesus nge Adam?

¹⁰ Kan afuweg e yafos rok Jesus u tharmiy nga yin be’ ni pin, me ere kan gargeleg nib flont, ndariy e denen rok Adam rok. Ma rayog ni nge par ndariy n’umngin nap’an u fayleng. Ku aram rogon Adam ni kan sunmiy nib flont ma rayog ni nge par ni manemus u fayleng. I tamilangnag apostal Paul nib taareb rogon e gali pumoon ney ni gaar: “‘Bin som’on e girdi’ e Adam ni Got e sunumeg me ta’ nib fos’; ma bin tomur e Adam [Jesus Kristus] e ir fare kan ni ma pi’ e yafos. Bin som’on e Adam e ni ngongliy ko but’, ere be’ u roy u fayleng; ma bin migid e Adam e yib u tharmiy.”​—1 Korinth 15:45, 47.

11. (a) Mang wenegan ni yib ko girdi’ ni bochan Adam nge Jesus? (b) Susun uw rogon u wan’dad e maligach ni pi’ Jesus?

¹¹ Rogon fene taareb rogon e gali moon ney​—ni kari mus ni yow e girdi’ nib flont ni immoy u fayleng​—ma kan tamilangnag ko n’en ni yog e Bible ni ke pi’ Jesus “ir nge biyuliy urngin e girdi’ ngak Got.” (1 Timothy 2:6) Jesus e ba taareb rogon ngak mini’? Ba taareb rogon ngak Adam u nap’an ni kab flont! Wenegan ni yib ni bochan e ke denen Adam e ke yibnag e yam’ ngak urngin e girdi’. Ma fare maligach ni pi’ “fa bin tomur e Adam” e ke n’igin nge yog ni ngan pithig e girdi’ ko denen nge yam’, ma aram e rayog ni ngad pared ni manemus. Rib ga’ fan e maligach ni pi’ Jesus! I yog apostal Peter ni gaar: “N’en ni kan pi’ nga puluwmed. . . e gathi ban’en nrayog ni nge kireb, ni bod rogon e silber ara gol.” Ya ke weliy Peter ni gaar: “Rachaen Kristus ni map’ ni ba ga’ fan. . . ni pi’ ir ni bod ba pifak e saf ndariy bang u dow nib kireb ara ba alit.”​—1 Peter 1:18, 19.

12. Uw rogon ni be weliy e Bible u murung’agen rogon nran chuweg e yam’?

¹² Rib manigil u rogon ni be weliy e Bible ko uw rogon nran pithig e girdi’ ko yam’ ni gaar: “Rogon ni taareb e denen [rok Adam] e ke turguy e gechig nga daken urngin e girdi’, e aram rogon ni taareb e ngongol nib mat’aw [ni ke par Jesus nib yul’yul’ nge mada’ ko yam’] e ke pithig urngin e girdi’ ko kireb ke pi’ e yafos ngorad. Ma rogon ni boor e girdi’ ni yan ni par ni yad e tadenen ni bochan e taareb e girdi’ [Adam] nde fol, e ku aram rogon ni boor e girdi’ ni bayi mat’awnagrad Got ngak ni bochan taabe’ [Jesus] ni ke fol.”​—Roma 5:18, 19.

Ban’en nib Fel’ Nga M’on

13. Mang fan ni aram rogon e lem ko girdi’ u murung’agen e yafos ni manemus?

¹³ Susun ni ngad falfalan’gad ko re n’ey ni ke pi’ Got ngodad! Gathi kam falfalan’ ya kan pi’ Be’ ni ra thapegdad ngak Got? Nap’an ni kan fith ko girdi’ ni, “Ga ba adag ni ngam par ni manemus?” ma kan weliy u lan e simbung nu Meriken ni 67.4 percent ko urngin e girdi’ ni kan deeriy e kar fulweged ni gaar, “Danga’.” Mang fan ni ka rogned ni dubrad ni ngar pared ni manemus? Ya rogon e par u fayleng e chiney ma ke yoor e magawon. Ke gaar be’: “Dabug ko ra uw rogon yaag u nap’an ni ke 200 e duw rog.”

14. Mang fan ni yira par ni manemus u fithik’ e falfalan’?

¹⁴ Machane gathi be yog e Bible u murung’agen e par ni manemus ma be gafgow e girdi’ ko m’ar, nge pillibthir, nge yugu boch e gafgow. Danga’, ya ra gagiyeg Jesus ni ir e Pilung ko Gil’ilungun Got ma ra chuweg urngin e magawon ni sum rok Satan. Rogon ni yog e Bible ma Gil’ilungun Got e ra “thirif u but’ urngin” e pi am ni be magawonnag e fayleng. (Daniel 2:44) Ngiyal’ nem ma ran pi’ e fulweg ko fare meybil ni i fil Jesus ngak pi gachalpen ni ngan “rin’ e tin nib m’agan’ [Got] ngay u roy u but’ ni bod rogon ni yibe rin’ u tharmiy.” (Matthew 6:9, 10, Today’s English Version) U lan e bin nib biech e fayleng rok Got, ma ran chuweg urngin e alit u fayleng ko tin nib kireb, ma aram me yib angin e biyul’ ni pi’ Jesus nib mus rogon. Arrogon, urngin e girdi’ ni bay mat’awrad e ran sulwegrad nga rogon mi yad par nib fel’ fithik’ i dowrad!

15, 16. Ra uw rogon e bin nib biech e fayleng rok Got?

¹⁵ Ma ra riyul’ e re thin ney ko Bible ni fan ko piin ni be par u lan e bin nib biech e fayleng rok Got ni gaar: “Ufin u downgin be’ e ra fel’ boch ko ngiyal’ ni baaram ni kab pagal; ma ra sul gelgin ni bod rogon ni immoy u nap’an ni kab pagal.” (Job 33:25) Ma yugu reb e thin ko Bible ni ra lebug e baaray ni be gaar: “Pi malmit e bay ra guyed ban’en ma piin ni biling e bay rrung’aged ban’en. Piin ni mugutgut e bay ra oggad nga lang nguur churu’gad, ma piin ndabiyog ni ngar nonod e bay ur tolulniged e felfelan’.”​—Isaiah 35:5, 6.

¹⁶ Mu lemnag: Demtrug e duw rodad e ngiyal’ nem ni 80, fa 800, ara bi ilal boch, ma ra par dowdad nib fel’. Ra bod rogon ni be yog e Bible ni gaar: “Dariy be’ ni be par u lan e binaw rodad ni bay ki yog nib m’ar.” Ma ku ra lebug e re thin ney ko ngiyal’ nem ni be gaar: “Bayi n’ag [Got] urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.”​—Isaiah 33:24; Revelation 21:3, 4.

17. Mang boch ban’en nrayog ni nge rin’ e girdi’ u lan e bin nib biech e fayleng rok Got?

¹⁷ U lan e re fayleng nib biech nem ma rayog ni ngad fanayed e man’ey rodad u rogon ni ke m’agan’ Got ngay u nap’an ni ke ngongliy ni dabi mus e tin nrayog ni nge fil. Mu lemnag e tin nib fel’ nrayog ni ngad rin’ed! Mus ni girdi’ nde flont e kar fanayed e tin nu fayleng ni ngar ngongliyed urngin ban’en ni bay rodad​—cellular phone nge microphone, nge kolok, nge pager, nge computer, nge skoki, arrogon urngin ban’en nrayog ni ngam mog. Urngin e pi n’en nem e dan fl’eg ko boch ban’en ni kan fek u bayang nib palog u palpal th’ib. Ere faanra gad ra par ndariy n’umngin nap’an ma dabi mus e tin nrayog ni ngad ngongliyed u lan e Paradis!​—Isaiah 65:21-25.

18. Mang fan ndabni chalban ko par u lan e bin nib biech e fayleng rok Got?

¹⁸ Ma dariy be’ nra chalban ko par. Ya mus ko chiney ma gad ma athapeg e bin migid e abich ni gad ra tay, ni yugu aram rogon ni bokum i biyu’ e abich ni kad ted faram. Ma nap’an ni gad ra flont ma ra gel rogon ni gad ra falfalan’ ni ngad ked e ggan nu Paradis. (Isaiah 25:6) Ma gad ra falfalan’ ni ngad gafaliyed e pi gamanman ma ngad guyed e ngiyal’ ni ke aw e yal’, nge pi burey, nge pi lul’, nge pi loway. Rriyul’ ni dabi chalban e girdi’ u lan e bin nib biech e fayleng rok Got!​—Psalm 145:16.

Ngan Rin’ e Tin nib T’uf ku Got ni Ngad Rin’ed

19. Mang fan nib puluw ni ngad lemnaged ni bay boch ban’en nib t’uf ku Got ni ngad rin’ed ni nge yog fare taw’ath ko yafos ngodad?

¹⁹ Ga be lemnag ni dariy ban’en ni ngam rin’ ma ra pi’ Got ngom fare taw’ath ni yafos ni manemus u Paradis? Gathi ba puluw ni ngan lemnag ni bay ban’en nib t’uf ku Got ni ngad rin’ed fa? Dabi siy. Gathi yugu ra pi’ Got fare taw’ath ngodad. Ra pi’ ngodad machane thingarda athamgilgad nge yog ngodad. Arrogon, ba t’uf e athamgil. Rayog ni ngam fith fare deer ni fith fare pagal ni pire’ ban’en rok ku Jesus ni gaar: “Mang e re n’en nib fel’ nthingar gu rin’ me yog e yafos ndariy n’umngin nap’an ngog?” Fa rayog ni ngam fith fare deer ni fith fa en ni pilungen e kalbus ngak apostal Paul ni gaar: “Mang e thingar gu rin’ me yog ni gu thap ngak Got?”​—Matthew 19:16; Acts 16:30.

20. Mang e ba t’uf ni ngad rin’ed ni nge yog e yafos ni manemus ngodad?

²⁰ Fa nep’ i n’em u m’on ni yim’ Jesus me tamilangnag ban’en nib t’uf ni ngad rin’ed u nap’an ni i meybil ngak e Chitamangin nu tharmiy ni gaar: “Baara’ ira’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.” (John 17:3) Gathi ba puluw ni ngad nanged ko mini’ Jehovah, ya ir e ke yognag e yafos ni manemus ngodad, maku ngad nanged ko mini’ Jesus Kristus ya ke yim’ ni bochedad? Machane llowan’ e gathi ke mus aram e n’en nib t’uf rodad.

21. Uw rogon ni gad ma dag ni gad be maruweliy e michan’ rodad?

²¹ Ku be yog e Bible: “En nra mich u wan’ e en ni Fak Got e aram e ke yog e yafos ndariy n’umngin nap’an ngak.” Miki gaar: “En dabi fol rok e en ni Fak Got e dabiyog e yafos ngak, machane be par e damumuw rok Got u daken ndariy n’umngin nap’an.” (John 3:36) Rayog ni ngam dag ni ke mich fa en ni Fak u wan’um nfaanra ga ra thiliyeg boch ban’en ko yafos rom nge puluw ko tin nib m’agan’ Got ngay. Thingar mu pi’ kerum ko kanawo’ nib kireb ni kam un ngay ma ga rin’ e tin nra felan’nag Got. Ba t’uf ni ngam rin’ e n’en ni yog apostal Peter ni gaar: “Mu kolgad ngan’med mi gimed pi’ keru’med ko denen mi gimed chel ngak [Jehovah], nge yog ni chuweg e denen romed.”​—Acts 3:19.

22. Uw rogon ni ngan lek luwan ay Jesus?

²² Dabda paged talin ni kari mus rogon rayog e yafos ni manemus ngodad e nge mich Jesus u wan’dad. (John 6:40; 14:6) Gad ma dag ni ke mich Jesus u wan’dad nfaanra ‘nguuda leked luwan ay.’ (1 Peter 2:21) Mang e ba muun ngay ko re n’em? I meybil Jesus ngak Got ni gaar: “Got, gub aray ni nggu rin’ e tin ni gab adag ni nggu rin’.” (Hebrews 10:7) Ri baga’ fan ni ngad folwokgad rok Jesus ma ngad ognaged e yafos rodad ngak Jehovah. Nge mu’ ma ba t’uf ni ngam un ko taufe u fithik’ e ran; ya ku arrogon ni rin’ Jesus. (Luke 3:21, 22) Ngan rin’ e pi n’en nem e ba puluw. Ya yog apostal Paul ni “gelngin fandad t’uf rok Kristus e ir e be gagiyegnagdad.” (2 Korinth 5:14, 15) Uw rogon? Bochan ni ke t’ufegdad ma aram me k’aring Jesus ni nge pi’ ir ni bochedad. Ere gathi susun ni nge k’arindad ni nge michan’dad ngak fa? Arrogon, susun ni nge k’aringdad ngad folwokgad rok u rogon ni ke pi ir ni nge ayuweg e girdi’. I par Kristus ni fan ni nge rin’ e tin nib m’agan’ Got ngay; ku aram e n’en ni thingarda rin’ed, ma dabkuudad pared ni gad be yan nga tabon lanin’dad.

23. (a) Mang e thingara uned ngay e piin ni rayog e yafos ngorad? (b) Mang e ba t’uf ni nge rin’ e girdi’ ko ulung ko Kristiano?

²³ Ma gathi ke mus e pi n’en nem. Be weliy e Bible ni nap’an ni ke un 3,000 e girdi’ ko taufe ko Pentekost 33 C.E., “min unegrad” ko re ulung nem. Kan unegrad ko mang? “Ur pired ni be machibnagrad e pi apostel, ma yad be par ni ke taareban’rad,” e yog Luke. (Acts 2:41, 42) Arrogon, kar muulunggad u taabang mar filed e Bible mar pared u taabang ma aram e kar manged bang fare ulung ko Kristiano. I un e tin som’on e Kristiano ko pi muulung u gubin ngiyal’ ni fan ni ngar filed e tirok Got ban’en. (Hebrews 10:25) Ku aram rogon e Pi Mich Rok Jehovah ko ngiyal’ ney, ma yad be piningem ngam un ngorad ko pi muulung ney.

24. Mang e “bin riyul’ e yafos” ma uw rogon nge wuin ni ra riyul’?

²⁴ Bokum milyon e girdi’ e chiney ni yad be un ko fare kanawo’ nib wen’in ni be sor iyan ko yafos. Ba t’uf e athamgil ni ngan par ko re kanawo’ ney nib wen’in! (Matthew 7:13, 14) I tamilangnag Paul e re n’ey faani gaar: “Mu athamgil ngam cham ni ke musmus rogom ko cham ni yibe tay u rogon nib mich Got u wun’uy, ngam yognag ngom e yafos ndariy n’umngin nap’an; ya ereray e re yafos nem ni ke piningem Got ngay.” Ra ngan rin’ e re n’ey ma ba t’uf ni ngam “chichiiy paam ko yafos ni ir e bin riyul’ e yafos.” (1 Timothy 6:12, 19, NW) Re yafos nem e gathi aram e yafos e chiney ni boor e gafgow riy ni yib ngodad u daken e denen rok Adam. Ya aram e yafos u lan e bin nib biech e fayleng rok Got, ni ra riyul’ u nap’an ni ra yib angin e maligach ni pi’ Kristus ngak urngin e piin nib t’uf Jehovah Got rorad nge Fak u tomren ni kan chuweg e re m’ag ney. Ngad turguyed e yafos nge yog ngodad​—“fa bin riyul’ e yafos”​—ni yafos ni manemus u lan e fayleng nib biech rok Got.

Uw Rogon ni Ngam Fulweg?

◻ Mini’ fare porchoyog, nge fare pin, nge fare owchen ni bay ko Genesis 3:15?

◻ Uw rogon nib puluw Jesus ngak Adam, ma mang e ke yognag fare biyul’?

◻ Mang e rayog ni nge l’agan’um ngay u lan e bin nib biech e fayleng ni ra pi’ e falfalan’ ngom?

◻ Mang boch ban’en nib t’uf ni ngad rin’ed ni nge yog ni ngad pared u lan e bin nib biech e fayleng?

[Sasing ko page 10]

Jesus e ir e kanawo’ ni kari mus ni ma yan ko yafos ni manemus ni fan ko piin bitir nge girdi’ nib ilal

[Sasing ko page 11]

Ngiyal’ ni ke turguy Got ma ra sul e piin pillibthir ko pagal