“Pi N’ey E Thingari Yib”

“Me fulweg Jesus ni gaar: ‘. . . Pi n’ey e thingari yib, machane gathi fan e pi n’ey e aram e ke taw nga tomren urngin ban’en.’”​—MATTHEW 24:4-6.

1. Mang e susun ni ngad adaged ni nanged u murung’agen?

DABI siy ni ga ba adag ni ngam nang u murung’agen e yafos rom nge n’en ni bay nga m’on rom ko gabul nge langleth. Ere ga ra adag ni ngam nang u murung’agen ban’en ni ke pug e tafinay rok C. T. Russell u nap’an e duw ni 1877. I yoloy Russell fare babyor ni The Object and Manner of Our Lord’s Return, me munmun me tababnag fare ulung ni Watch Tower Society. Re ke babyor ney ni 64 e page ni bay riy e ke weliy u murung’agen e ngiyal’ ni ra sul Jesus, ara wub rok nga m’on. (John 14:3) U daken fare Burey ni Olives me fith e pi apostal rok Jesus ngak u murung’agen e wub rok ni gaar: “Mog ngomad ko wuin e ra yib urngin fapi n’en ni ka mog, nge n’en nra yib ni nge dag ni ke taw ko ngiyal’ ni bay mub riy [ara, “wub rok,” King James Version] nge ngiyal’ ni tomren e fayleng.”​—Matthew 24:3.

2. Mang fan ni ke yoor e thin u murung’agen e n’en ni ke yiiynag Jesus?

² Ga manang e fulweg ni pi’ Jesus ngorad ma ga manang fan fa? Bay ko dalip e Gospel. Professor D. A. Carson e ke gaar: “Ri boor e tugthin ni sum ni bochan e pi thin ko Matthew 24 nge Mark 13 nge Luke 21 ya ba thil thil u rogon ni yibe piliyeg e thin riy.” Ma aram me weliy e lem rok​—ni ku aram reb e n’en nib thil. U nap’an fa binem e chibog ma rogon ni be lemnag e girdi’ ko mang fan e pi thin nem e be dag ni dariy e michan’ rorad. Ya ur weliyed ni de yog Jesus e pi thin ni bay ko fapi Gospel, ya tomren ni kan yoloy ma kan thiliyeg e thin riy, fa de lebug e n’en ni ke yiiynag​—aram e lem ko girdi’ nib tolang. Ma reb e girdi’ e ke weliy e thin ko fare Gospel rok Mark ‘me puthuy ko lem ko philosophy ni Mahayana-Buddhist!

3. Uw rogon ni be lemnag e Pi Mich Rok Jehovah e thin ni yiiynag Jesus?

³ Machane Pi Mich Rok Jehovah e ke michan’rad ko Bible ni aram e thin nriyul’, nib muun ngay e n’en ni yog Jesus ngak fa aningeg e apostal ni ur moyed Jesus u daken fare Burey ni Olives ko ko bin dalip e rran u m’on ni yim’. Ka nap’an e ngiyal’ ni immoy C. T. Russell, ma ke tamilangnag iyan ko girdi’ rok Got e pi thin nem ni i yiiynag Jesus. Ma in e duw faram miki tamilangnag fare babyor ni The Watchtower ko uw rogon e re thin ko profet ney. Ke mit ngom e pi thin nem ma ke ga’ fan u wan’um ya bay fan ko yafos rom?a Ngad sulod nga daken.

Ban’en nib Kireb ni ra Lebug nga M’on

4. Mang fan ni ke fith e pi apostal ku Jesus u murung’agen e gabul nge langleth?

⁴ I nang e pi apostal ni Jesus e ir fare Messiah. Ere nap’an ni ke weliy ngorad u murung’agen e yam’ nra tay ma ran faseg ko yam’, ma ra sul, ma kar lemnaged ni, ‘Nap’an nra yim’ Jesus ma ra yan nga bayang, ma uw rogon nrayog ni nge lebuguy urngin ban’en ni susun ni nge rin’ fare Messiah?’ Miki yog Jesus u murung’agen e ngiyal’ ni ra thumur yu Jerusalem nge fare tempel. Dabi siy ni i lemnag e pi apostal ni gaar, ‘Wuin nge uw rogon ni ra buch e pi n’en nem?’ Ma bochan ni ba adag e pi apostal ni ngar nanged fan e pi n’en nem, mu ur fithed ni gaar: “Mog ngomad ko wuin e ra yodor, ma ga yog ngomad ko mang e ra yib i m’ug ni pow riy ni aram e ke taw nga nap’an urngin e pi n’ir ni nge yib i m’ug?”​—Mark 13:4; Matthew 16:21, 27, 28; 23:37-24:2.

5. Uw rogon ni ke lebug e n’en ni ke yiiynag Jesus u nap’an e bin som’on e chibog?

⁵ I yiiynag Jesus ni ra yib e mahl, nge uyungol, nge misilpig, nge durru’, ma ran fanenikay min gafgownag e pi Kristiano, ma ra yib e pi messiah ni googsur, ma ran machibnag fare thin nib fel’ ko Gil’ilungun Got nga gubin yang. Ma aram e ra taw ko ngiyal’ ntomren e fayleng. (Matthew 24:4-14; Mark 13:5-13; Luke 21:8-19) I yog Jesus e re n’em u tabolngin e duw ni 33 C.E. Ma nap’an e pi duw nga tomren, me yog ko pi gachalpen ni ngar poyed e pi n’en ni ke yiiynag ni be lebug u rogon nib lingagil. Arrogon, be dag e chep ko girdi’ ni ke lebug fare pow ko ngiyal’ nem, ma aram me m’ay fare m’ag ko yu Jew ni bochan yu Roma u nap’an e 66-70 C.E. Uw rogon ni ke buch?

6. Mang e ke buch u thilin piyu Roma nge piyu Jew u nap’an e 66 C.E.?

⁶ Nap’an e ngal’an e gawel ko duw ni 66 C.E., me ba ulung nu Jew ni yad e Zealot e kar togopuluwgad ko pi salthaw nu Roma u lan e fort nib chugur ko fare tempel u Jerusalem, ma aram me wer e wagey u lan e binaw. U lan e babyor ni History of the Jews, me weliy Professor Heinrich Graetz ni gaar: “Cestius Gallus, e ir fare Governor nu Syria ma thingar tay e pi salthaw nu Roma ni yad ba tolang, . . . e dabki yog ni nge pag e togopuluw ngorad ma dabi guy rogon ni nge taleg. I pining e pi salthaw rok ngar bad nga taabang miki pining pi fak e pilung ni ngar pied e pi salthaw rorad.” Re ulung ney ko pi salthaw ni yad 30,000 e kar longobiyed yu Jerusalem. Ma aram min cham boch ma ke mil yu Jew nga lan e yoror nib chugur ko fare tempel. “U lan lal e rran u tomren ni yib yu Roma nga lan e garog ma be pag piyu Judah e missile ngorad ma thingar sulod nga tomur. Nap’an e bin nel’ e rran ma ke yog ni nga ranod nga lan e yoror nu le’luch ni bay u mit fare tempel.”

7. Mang fan nib thil e lem ko pi gachalpen Jesus ko piyu Jew?

⁷ Mu lemnag fene balyangan’ piyu Jew ko ngiyal’ nem ya kari mich u wan’rad ni ra ayuwegrad Got ma dabi pag nge buch ban’en ko binaw rorad nib thothup! Machane kan nog ko pi gachalpen Jesus ni ra yib e gafgow nga daken yu Jerusalem. I yiiynag Jesus ni gaar: “Bayi taw nga boch e rran me yib e toogor rom ngar cholngobiyed gur ko yoror ni but’ nge malang, mu ur bad i yib ngom u gubin yang. Ma bay ra kirebniged gur nge girdi’ ni bay u lan e yoror rom; ma dariy taareb e malang ni yad ra pag u tagil’.” (Luke 19:43, 44) Machane ku ra yim’ e pi Kristiano u Jerusalem u nap’an e 66 C.E.?

8. Mang gafgow ni ke yiiynag Jesus u murung’agen, ma mini’ e yad e piin ni kan “mel’egrad” ma ran lichnag e pi rran nem ni bocherad?

⁸ Nap’an ni pi’ e fulweg ngak e pi apostal u daken fare Burey nu Olives me yiiynag Jesus ni gaar: “Gafgow nra yib u lan e pi rran nem e kab gel e gafgow riy nga urngin e gafgow ni ke yib ngak e girdi’ u roy u fayleng ni ka nap’an e ngiyal’ ni baaram nsom’on ni sunumiy Got e fayleng riy nge yan i mada’ ko re ngiyal’ nem, ma aram e dab ki yib reb e gafgow bayay ni bod e binem. Machane ke lichnag [Jehovah] e pi rran nem; ya faan mang e dabi rin’ ni aram rogon ma dariy be’ nra fos. Machane ke lichnag Got e pi rran nem ni bochan e piin ni girdien ni ke mel’egrad.” (Mark 13:19, 20; Matthew 24:21, 22) Ere ran lichnag e pi rran nem ma ran ayuweg e “piin ni kan mel’egrad.” Mini’ e pi girdi’ nem? Dabi siy ni gathi yad e pi Jew ni yad e tatogopuluw ni ka rogned ni yad be liyor ngak Jehovah machane kar togopuluwgad ngak Fak. (John 19:1-7; Acts 2:22, 23, 36) Piin ni kan mel’egrad e ngiyal’ nem e yad e pi Jew nge girdi’ ni gathi yad yu Jew ni ke michan’rad ngak Jesus ni ir fare Messiah nge En nra Ayuweg e girdi’. I mel’eg Got e pi girdi’ nem, ma nap’an e Pentekost ko 33 C.E., me kunuyrad u taabang kar manged ba nam nib biech mab spiritual ni “fare Israel rok Got.”​—Galatia 6:16; Luke 18:7; Acts 10:34-45; 1 Peter 2:9.

9, 10. Uw rogon ni kan “lichnag” fare togopuluw ni tay piyu Roma, ma mang wenegan riy?

⁹ Kan “lichnag” e pi rran ma kan ayuweg e pi girdi’ ni kan dugliyrad ni yad bay u Jerusalem? I weliy Professor Graetz ni gaar: “De puluw u wan’ [Cestius Gallus] ni ngan ul’ul’ i cham ngak e pi girdi’ nem ko ngiyal’ nem, ya ke chugur ko ngal’an’ e n’uw . . . ma aram e dabiyog ni nge yib e chugum ni fan ko pi salthaw rok. Ere sana ke lemnag nib fel’ ni ngar sulod.” Yugu demtrug e n’en ni be lemnag Cestius Gallus ma ke chuw e pi salthaw nu Roma ko re binaw nem, ma be lekrad piyu Jew mi yad li’rad ma boor i yad e kar m’ad.

¹⁰ Ma bochan ni ke chuw yu Roma ma aram e ke yog ko pi gachalpen Jesus ni yad bay u Jerusalem ni ngar magaygad nib fos. Be dag chepin e girdi’ ni nap’an ni kan bing e kanawo’ me mil e pi Kristiano mar chuwgad ko gin’em. Aram e be dag gelngin Got ni nge nang e n’en ni bay nga m’on ma rayog ni nge ayuweg e piin ni be liyor ngak! Machane, uw rogon e pi Jew ni de mich Jesus u wan’rad ni kar pared u Jerusalem nge Judea?

Girdi’ ko Ngiyal’ Nem e Ra Guy

11. Mang e yog Jesus u murung’agen “re mfen ney”?

¹¹ Boor e girdi’ ni Jew e ur lemnaged ni dabi m’ay e liyor rorad u lan fare tempel. Machane i gaar Jesus: “Baaray ban’en ni ngam nanged rok e gek’iy ni fig. Ngiyal’ nra galunglung papa’ngin ma ke mirerey me tabab yuwan ko puf, ma aram e kam nanged ni ke chugur ni nge taw ngal’an e gowel. Ere ku er rogon ni ngiyal’ ni gimed ra guy e pi n’ey ni urngin ni be m’ug, ma aram e kam nanged ni fare ngiyal’ i n’em e ke chugur, ni aram e nge tabab. Mu ted famed i yan ko re bugithin ney! Bay yib urngin e pi n’ey u m’on ko ngiyal’ ndawori yim’ urngin e girdi’ ni yad bay e chiney ni yad ba fos. Tharmiy nge fayleng e bay chuw, ma thin rog e ri dabi math biid.”​—Matthew 24:32-35.

12, 13. Rogon u wan’ pi gachalpen Jesus ma fare thin ni yog Jesus u murung’agen “re mfen ney” e be sor fan ko mang”?

¹² Nap’an e pi duw u m’on ko 66 C.E., ma ke guy e pi Kristiano ni boor e pi n’en ko fare pow ni be lebug​—ni mahl, nge uyungol, ma kan machibnag fare thin nib fel’ ko Gil’ilungun Got nga gubin yang. (Acts 11:28; Kolose 1:23) Ma wuin ni ra yib e tomur? Mang fan e n’en ni yog Jesus ni gaar: ‘Bay yib urngin e pi n’ey u m’on ko ngiyal’ ndawori yim’ urngin e girdi’ ko re mfen ney [Greek, ge·ne·aʹ] ni yad ba fos’? Boor yay me pining Jesus ko piyu Jew nge pi tayugang ko teliw rorad ni yad be togopuluw ngak ni yad e ‘girdi’ nib kireb ko re mfen ney.’ (Matthew 11:16; 12:39, 45; 16:4; 17:17; 23:36) Ere nap’an ni ke weliy u murung’agen “re mfen ney” u nap’an ni bay u daken fare Burey nu Olives ma gathi be sor fan ko piyu Jew kafram iyib ngaray; ma gathi be sor fan ko pi gachalpen, ni yugu aram rogon ni yad “girdien fare nam ni ke mel’egrad Got.” (1 Peter 2:9) Maku gathi be yog Jesus ni “re mfen ney” e be sor fan nga ba ngiyal’.

¹³ Ya be weliy Jesus u murung’agen piyu Jew ko ngiyal’ nem ni yad be togopuluw ngak ma yad ra guy e ngiyal’ nra lebug fare pow ni ke pi’. Ke weliy Professor Joel B. Green u murung’agen “re mfen ney” ni bay ko Luke 21:32 ni gaar: “U lan e bin dalip e Gospel ma ‘re mfen ney’ (nge yugu boch e thin nib puluw ngay) e be sor fan ko ba ulung e girdi’ ni yad be togopuluw ko tin nib m’agan’ Got ngay. . . . [Ma sor fan] ko girdi’ ni ba gelan’rad mi yad pi’ keru’rad ko tin nib m’agan’ Got ngay.”b

14. Mang e ke buch ko re “mfen” nem, ma mang e ke buch ko pi Kristiano?

¹⁴ Fare mfen ko girdi’ nib kireb ni yad piyu Jew ni yad e tatogopuluw e kar guyed ni be lebug fare pow maku yad ra guy e ngiyal’ ni tomren. (Matthew 24:6, 13, 14) Ma aram e n’en ni ke buch! Ya nap’an e 70 C.E., me sul e pi salthaw nu Roma, ni Titus e ga’ riy ni ir fak Vespasian ni Pilung. Kari gel e gafgow ko piyu Jew ya kan longobiy e binaw rorad.c Be’ ni immoy ko ngiyal’ nem e Flavius Josephus me weliy ni nap’an ni ke mu’ piyu Roma i kirebnag fare binaw ma sogonapan 1,100,000 piyu Jew ni kar m’ad, ma gonapan 100,000 i yad ni kan fekrad ni yad e kalbus, ma boor i yad e ra yim’ ko bilig fa yad ra yim’ u tafen e gosgos ko piyu Roma. Rriyul’, ni fare gafgow u nap’an e 66-70 C.E. e aram e bin th’abi gel e gafgow ni yib u daken Jerusalem nge piyu Jew. Rib thil e n’en ni buch ko pi Kristiano ni kar folgad ko n’en ni ke ginang Jesus mar chuwgad u Jerusalem u tomren ni chuw e pi salthaw nu Roma u nap’an e 66 C.E.! Pi Kristiano ni kan dugliyrad ma kan “mel’egrad” e kan ayuweg e yafos rorad u nap’an e 70 C.E.​—Matthew 24:16, 22.

Ku Ra Lebug u Ba Ngiyal’ Nga M’on

15. Mang fan nrayog ni nge mich u wan’dad ni ka bay nga m’on e ngiyal’ ni ra lebug e thin ni kan yiiynag u rogon ni kab gel ko bin ni buch u nap’an e 70 C.E.?

¹⁵ Machane, gathi aram e ke mus. Ya u m’on riy ma ke tamilangnag Jesus ni tomren ni kan gathey fare binaw, ma ra yib u fithingan Jehovah. (Matthew 23:38, 39; 24:2) Ma aram me tamilangnag e re n’ey ko thin ni ke yiiynag u daken fare Burey nu Olives. Me weliy u murung’agen fare “gafgow ni baga’” ni bay yib, miki yog ni tomren e re n’em ma ra yib i m’ug e piin ni yad ra yog ni yad fare Messiah, ma piin ni gathi yad piyu Israel e bay ur t’ed u daken yu Jerusalem nge mada’ ko ngiyal’ ni ngar musgad riy. (Matthew 24:21, 23-28; Luke 21:24) Ere rayog ni nge sor fan ko yugu ba ngiyal’ nra lebug u rogon ni kab gel? Rogon ni be tamilanag e pi thin nem ma arrogon. Gad ra taarebnag e pi thin ko Revelation 6:2-8 (ni kan yoloy u tomren fare gafgow ni yib nga daken yu Jerusalem u nap’an e 70 C.E.) nga Matthew 24:6-8 nge Luke 21:10, 11, ma gad be guy ni ka bay nga m’on e ngiyal’ nra yib e pi mahl, nge uyungol, nge misilpig u rogon ni kab gel ko ngiyal’ nem. Ma be lebug e pi thin nem ni yiiynag Jesus u rogon ni kab gel ka nap’an e World War I ko 1914.

16-18. Mang e gad be sonnag ni ra buch nga m’on?

¹⁶ U lan in e duw ma ke tamilangnag e Pi Mich Rok Jehovah ni be lebug fare pow ko ngiyal’ ney ma aram e mich riy ni ka bay nga m’on fare “gafgow ni baga’.” Re “mfen” ney nib kireb e ra guy e re gafgow nem. Be m’ug riy ni bod kafram ma bay yu guruy ko re gafgow nem ma tabolngin (ni ran togopuluw ngak e pi yuraba i teliw) ma bod rogon e togopuluw ni tay Gallus u nap’an e 66 C.E. ni aram e ke tabab fare gafgow ni yib ngak yu Jerusalem.d Me munmun u ba ngiyal’ nga m’on, ma ra yib e tomur​—ma ra yib e magothgoth u ga’ngin e fayleng ni taareb rogon ko fa binem ni buch ko 70 C.E.

¹⁷ I weliy Jesus u murung’agen fare gafgow ni bay nga m’on rodad me gaar: “Nap’an ni yugu ra m’ay e re gafgow nem ko pi rran nem [ni ran thang e pi yuraba i teliw ni googsur] ma bayi talumor mit e yal’, ma dab ki mat ramaen e pul, ma t’uf e bay mul u lan e lang, ma gelngin e pi n’en ni bay u lan e lang e bay ni pingegrad nga ranod ko gin i gathi ir e yad be sor ngay. Ma aram e bayi m’ug e pow ko en ni Fak e Girdi’ u lan e lang; ma aram e urngin e ganong nu fayleng ni bay ra yorgad, ma bay ra guyed e en ni Fak e Girdi’ ni be yib nga but’ u daken e manileng ni bay gelngin ma rib galgal ramaen.”​—Matthew 24:29, 30.

¹⁸ Ere yog Jesus ni “nap’an ni yugu ra m’ay e re gafgow nem ko pi rran nem,” ma bay boch ban’en ni ra buch u lan e lang nib maluplup. (Mu taarebnag ko Joel 2:28-32; 3:15.) Ma ra faatal e piin nib kireb ma “bay ra yorgad.” Ma “bayi aw e girdi’ nga but’ ko marus ko ngiyal’ ni baaram ni yad be sonnag e n’en ni be yib i yib nga daken e fayleng ni polo’.” Machane gathi aram rogon e tin riyul’ e Kristiano! Ya yad ra ‘sak’iy ngar changargad nga lang, ya aram e ke chugur ni ngan chuwegrad u fithik’ e gafgow.’​—Luke 21:25, 26, 28.

Bay e Pufthin Nga M’on!

19. Uw rogon nrayog ni ngad nanged ko wuin ni ra lebug fare fanathin u murung’agen e pi saf nge kaming?

¹⁹ Mu tiyan’um ngay ni be yiiynag ko Matthew 24:29-31 ni (1) ra yib e en ni Fak e girdi’, (2) ma ra yib u rogon nib lingagil, (3) ma ra moy e pi engel rok, ma (4) urngin e ganong nu fayleng ni bay ra guyed. Ki yog Jesus e pi thin ney u lan fare fanathin u murung’agen e saf nge kaming. (Matthew 25:31-46) Ere be m’ug riy ni re fanathin ney e sor fan ko fa ngiyal’ u tomren tabolngin fare gafgow u nap’an ni ra yib Jesus ni yad e pi engel rok ma ra par u tagil’ e Pilung ma ra pi’ e pufthin. (John 5:22; Acts 17:31; mu taarebnag ko 1 Kings 7:7; Daniel 7:10, 13, 14, 22, 26; Matthew 19:28.) Ran pufthinnag mini’, ma mang wenegan riy? Be dag fare fanathin ni ra tiyan’ Jesus ngak urngin e pi nam, ni gowa yad gubin e kar muulunggad u p’eowchen u tharmiy.

20, 21. (a) Mang e ra buch ko pi saf ko fanathin rok Jesus? (b) Ma mang e ra buch ko pi kaming nga m’on?

²⁰ Ran kunuy e piin pumoon nge ppin ni yad bod e saf min tayrad nga ba’ ni mat’aw rok Jesus ni aram e kar fel’gad u wan’. Mang fan? Ya kar rin’ed e tin nib fel’ ngak pi walagen Jesus​—ni aram e pi Kristiano ni kan dugliyrad, ni yad ra un ngak Jesus ko gagiyeg u tharmiy. (Daniel 7:27; Hebrews 2:9-3:1) Ya rogon ni kan weliy u lan fare fanathin ma bokum milyon e Kristiano ni yad bod e saf e kar poyed ko mini’ pi walagen Jesus nib spiritual, ma aram mar maruwelgad u taabang mar ayuweged yad. Ma wenegan riy e ra magay fare “ulung ni baga’” nib fos u fithik’ “fare gafgow ni baga’” mi yad par ndariy n’umngin nap’an u Paradis, ni aram bang ko Gil’ilungun Got u fayleng.​—Revelation 7:9, 14; 21:3, 4; John 10:16.

²¹ Ma rib thil e n’en nra buch ko pi kaming! Matthew 24:30 e be weliy u murung’agen ni ‘bay ra yorgad’ u nap’an nra yib Jesus. Ma bay rogon ko re n’em ya kar togopuluwgad ko fare thin nib fel’ ko Gil’ilungun Got, mar gafgownaged pi gachalpen Jesus, mar adaged e re fayleng ney ni bayi m’ay. (Matthew 10:16-18; 1 John 2:15-17) Jesus​—ma gathi pi gachalpen u fayleng​—e ra turguy ko mini’ e yad e kaming. Ke weliy u murung’agenrad ni gaar: “Pi cha’ ney e bay ni pi’rad ko gechig ndariy n’umngin nap’an.”​—Matthew 25:46.

22. Mang e n’en ko thin ni yiiynag Jesus nib puluw ni ngad fl’eged i lemnag u murung’agen?

²² Rib fel’ rogon ni kan tamilangnag e pi thin ko Matthew guruy ni 24 nge 25. Machane, ka bay bang ko thin ni yiiynag Jesus nib fel’ ni ngad fl’eged i lemnag​—ni aram ‘e N’en ni Th’abi Dabuy ni ke sak’iy u lan fa gin’en nib thothup.’ Yog Jesus ko pi gachalpen ni ngar tedan’rad ngay ngar nanged fan e re n’ey mi tay talperad ni ngar rin’ed ban’en. (Matthew 24:15, 16) Mang e “N’en ni Th’abi Dabuy”? Ma wuin ni ke sak’iy u lan e gin’en nib thothup? Ma uw rogon nib l’ag e yafos rodad ngay e chiney iyan nga m’on? Ran weliy e re n’ey ko bin migid e thin.

[Boch e Thin nra Tamilangnag Murung’agen]

Ka Ga Manang?

◻ Uw rogon ni ke lebug e thin ko Matthew 24:4-14 u nap’an e bin som’on e chibog?

◻ Nap’an e pi apostal, ma uw rogon ni kan lichnag e pi rran min ayuweg e yafos, ni bod ni kan yiiynag ko Matthew 24:21, 22?

◻ Uw rogon fare “mfen” ni bay ko Matthew 24:34?

◻ Uw rogon ni gad manang ni fare thin ni kan yiiynag u daken fare Burey nu Olives e ku ra lebug biyay u rogon ni kab gel u ba ngiyal’ nga m’on?

◻ Wuiun nge uw rogon ni ra lebug fare fanathin u murung’agen e saf nge kaming?