Ke Falfalan’dad Ya Ke Dag Jehvoah Kanawoen Ngodad

“Re Got ney e rib yal’uw e ngongol rok, thin rok [Jehovah] e rayog ni ngan tor ngay ya der ma thil.”​—2 SAMUEL 22:31.

1, 2. (a) Mang e ba t’uf ko urngin e girdi’? (b) Kanawo’ rok mini’ e ffel’ ni ngad folwokgad riy?

URNGIN e girdi’ ma ba t’uf rorad ni ngan pow’iyrad. Arrogon, ba t’uf rodad e ayuw min pow’iydad iyan ko yafos rodad. Rriyul, i pi’ Jehovah e llowan’ ngodad nge nangan’ nrayog ni ngad gonopiyed e tin nib mat’aw nge tin nde mat’aw. Machane ba t’uf ni ngan skulnag e nangan’ rodad ni rayog ni nge pow’iydad nrogon. (Hebrews 5:14) Ma lanin’dad e ba t’uf ni nge nang e thin nib riyul’​—mab t’uf ni ngan skulnag rogon ni nge fl’eg i lemnag e pi thin nem​—ma aram e rayog ni ngad turguyed boch ban’en nib fel’ rogon. (Proverbs 2:1-5) Machane mus ni aram rogon ma rayog ni nge dabi m’ag e n’en ni kad turguyed ni bochan e pi n’en nde mudugil ko yafos. (Eklesiastes 9:11) Ma dabiyog rodad ni ngad nanged e n’en ni bay nga m’on rodad.

² Aram fan ni yoloy Jeremiah ni profet ni gaar: “Gu manang O Jehovah, ni dariy rogon ngak e girdi’ ni nge turguy e kanawo’ ni nge yan ngay. De mil fan ngak e girdi’ ni be yan ni nge gagiyegnag e yan rok.” (Jeremiah 10:23, New World Translation) Jesus Kristus, ni ir fa bin th’abi gilbuguwan e girdi’ ni immoy, e ke fol ko n’en ni ka nog ngak. I gaar: “En ni Fak Got e dariy ban’en ni be rin’ ni ir e tafinay rok; ke mus ni tin ni be guy ni be rin’ e Chitamangin e ir e be rin’. Ya n’en ni be rin’ e en ni Chitamangiy e ku er e n’en ni be rin’ e en ni Fak.” (John 5:19) Ere bay e gonop riy ni ngad folwokgad rok Jesus ma ngad sapgad ngak Jehovah ni nge gagiyegnag e yan rodad! I yin’ David ni Pilung e tang ni be gaar: “Re Got ney e rib yal’uw e ngongol rok, thin rok [Jehovah] e rayog ni ngan tor ngay ya der ma thil. Ir e bod bang fapi n’en ni ma fek e salthaw nge mith nga fon ko mahl, be par ni ara’ rogon u puluwon urngin e piin ni yad ma yib ngak ni nge yoror rorad.” (2 Samuel 22:31) Faanra gad ra guy rogon ni nga darod u kanawoen Jehovah ma gathi ngad torgad nga daken e gonop rodad, ma aram e ran pow’iydad u rogon nib yal’uw. Ngan pi’ keru’ ko kanawoen Got ma ra yan i aw nib gafgow.

I Dag Jehovah e Kanawo’

3. Uw rogon ni ke pow’iy Jehovah Adam nge Efa, ma mang e ke micheg ngorow?

³ Mu lemnag Adam nge Efa. Dariy e denen rorow machane ba t’uf ni ngan pow’iyrow. De n’ag Jehovah Adam me pag ni ir e nge finey urngin ban’en ni ngan rin’ u lan fare milay’ nu Eden. Ya ke pi’ Got e maruwel ngak ni nge rin’. Som’on, ma thingari tunguy Adam fithingan urngin e gamanman. Nge mu’ me pi’ Jehovah ku Adam nge Efa boch e maruwel nib mi fan ngorow ni ngar rin’ew u ba ngiyal’ nib n’uw nap’an. Ya thingara suweyew e fayleng, mar diyengow me yoor e girdi’ u fayleng, ma ngar ayuweged urngin e gamanman. (Genesis 1:28) Aram ba maruwel nib gel, machane angin nra yib riy e ra wer e paradis u ga’ngin e fayleng ma ra sug ko girdi’ nib flont ni yad be par nib fel’ thilrad urngin e gamanman. Rib fel’ e re n’em! Maku, nap’an ni be yan Adam nge Efa u kanawoen Jehovah, ma rayog ni ngar nonow ngak. (Mu taarebnag ko Genesis 3:8.) Rib manigil e re taw’ath nem​—ni nge fel’ thilrad e Ani Tasunmiy urngin ban’en!

4. Uw rogon ni ke dag Adam nge Efa ni dar yul’yul’gow ma dar pagan’gow ku Got, ma mang wenegan ni yib riy?

⁴ I tay Jehovah chilen ngorow ni dabra kew wom’engin fa ke gek’iy ni ma tamilangnagan’uy ko tin nib fel’ nge tin nib kireb ni bay u Eden, ma aram me yog ni ngar dagew ni yow ra fol​—ma yow ba adag ni nga ranow u kanawoen Jehovah. (Genesis 2:17) Ma de n’uw nap’an nga tomren, min skengnag e fol rorow. Nap’an ni yib Satan me yog e thin ngoogsur, ma ba t’uf ku Adam nge Efa ni ngar dagew ni yow ba yul’yul’ ku Jehovah mar pagan’row ko tin ni Ke micheg ngorow ma aram e rayog ni ngar parew ni yow be fol rok. Machane bay e kireban’ riy ya dar yul’yul’gow ma dariy e pagan’ rorow ku Got. Nap’an ni yog Satan ku Efa ni rayog ni nge rin’ e n’en ni ba adag me yog ni be ban Jehovah, ma aram me mich u wan’ Efa e pi thin nem ma ke th’ab e motochiyel rok Got. Ke lek Adam Efa mar denengow. (Genesis 3:1-6; 1 Timothy 2:14) Ma byoor e n’en ni ke mul u pa’row. Faan mang e ka ranow u kanawoen Jehovah ma ra yoor e falfalan’ rorow u nap’an ni be rin’ e tin nib m’agan Got ngay. Machane ke yan ni aw ni boor ban’en ni ke k’aring e kankanan’uy rorow, nge amith nge yan i mada’ ko ngiyal’ ni kar m’ow.​—Genesis 3:16-19; 5:1-5.

5. Mang e ke m’agan’ Jehovah ngay ni fan ko ba ngiyal’ nga m’on, ma uw rogon ni ma ayuweg e girdi’ nib yul’yul’ ni ngar guyed e ngiyal’ nra lebug?

⁵ Machane dawori thileyeg Jehovah e n’en ni ke m’agan’ ngay ni fan ko re fayleng ney ni nge mang paradis ma ra par e girdi’ riy ni yad ba flont, ndariy e denen rorad. (Psalm 37:11, 29) Ma dariy biyay ni de pi’ e fonow ni ra pow’iy e girdi’ ni ma lek kanawoen ma yad be athapeg ni ngar uned ko tin ni ke micheg. Piin ni bay telrad ni rayog ni ngar rung’aged ban’en, ma bay laman Jehovah u keru’dad ni be gaar: “Ereray e kanawo’. Mmarod nga daken, gimed e girdi’.”​—Isaiah 30:21, NW.

Boch e Girdi’ ni Ka Ranod u Kanawoen Jehovah

6. Mini’ l’agruw e pumoon kakrom ni ka ranow u kanawoen Jehovah, ma mang angin ni yib riy?

⁶ Rogon ni yog e Bible, ma ke mus ni buch uw e piin ni yad pi fak Adam nge Efa e ka ranod u kanawoen Jehovah. Abel e bin som’on e girdi’ ni aram rogon. Yugu aram rogon ni kem’ ni kab pagal, machane kem’ ni ke felan’ Jehovah ngak ma aram e rayog ni nge un ko “fas ko yam’ . . . ni tin nib mat’aw” ko ngiyal’ ni ke dugliy Got. (Acts 24:15, NW) Ra guy e ngiyal’ nra lebug e tin nib m’agan’ Jehovah ngay ni fan ko re fayleng ney nge girdi’. (Hebrews 11:4) Enok e ku ir be’ ni ke yan u kanawoen Jehovah, ma thin ni ke yiiynag u murung’agen e tin tomren e rran ko re m’ag ney e bay ko babyor ni Jude. (Jude 14, 15) Ku arrogon Enok e de n’uw nap’an e yafos rok. (Genesis 5:21-24) Ma “ba fel’ Enok u wan’ Got.” (Hebrews 11:5) Nap’an ni yim’ ma bod Abel ya ke mudugil e athap rok ni ran faseg ko yam’, ma ra un ko pi girdi’ ni ra guy e tin nib m’agan’ Jehovah ngay ni ke lebug.

7. Uw rogon ni dag Noah nge tabinaw rok ni kar yul’yul’gad ku Jehovah mar pagedan’rad ngak?

⁷ Ma nap’an ni ke gel iyan e kireb ko girdi’ ko fa ngiyal’ u m’on ni kan tharey e fayleng ko ran, ma kan skengnag e yul’yul’ ko girdi’ u rogon ni yad ra fol rok Jehovah. Nap’an e tin tomren e ran ko re m’ag nem ma kari mus ni buch uw e girdi’ e yad be yan u kanawoen Jehovah. Noah nge tabinaw rok e kar folgad rok Got mar pagan’gad ko n’en ni ke yog. Kar yul’yul’gad i rin’ e n’en ni ka nog ni ngar rin’ed ma dar uned ko kireb ni be rin’ e girdi’ ko ngiyal’ nem. (Genesis 6:5-7, 13-16; Hebrews 11:7; 2 Peter 2:5) Gad ma pining e magar ngorad ya kar pared nib yul’yul’ ku Got mar folgad rok. Ma aram e kar magaygad nib fos u nap’an ni ke yib fare Ran ma kar manged e girdi’ rodad.​—Genesis 6:22; 1 Peter 3:20.

8. Uw rogon ni nge yan yu Israel u kanawoen Got?

⁸ Munmun, ma ke fl’eg Jehovah reb e m’ag u thilin pi fak Jakob ni ir be’ nib yul’yul’, mar manged ba nam ni baga’ fan. (Exodus 19:5, 6) Ke pow’iy Jehovah e girdi’ rok u daken fare Motochiyel ni kan yoloy nga but’, ngu daken e ulung i prist, nge pi profet. Machane mmil fan ngak yu Israel ni ngar folgad rok. I yog Jehovah ngak yu Israel u daken e profet rok ni gaar: “Amu sap, gu be tay u m’on romed e fel’ waathan nge kireb waathan: yira fel’ waathmed nfaanra gimed ra fol ko pi motochiyel ni gu be tay chilen ngomed e chiney, ni gag Jehovah ni Got romed; ma ra kireb waathmed nfaanra dabmu folgad ko pi motochiyel ni pi’ Jehovah ni Got romed ngomed, mi gimed chel ngam siyeged fare kanawo’ ni gu be tay chilen ngomed, ma ngam lek yugu boch e got ni damu nanged.”​—Deuteronomy 11:26-28.

Fan ni Ke Digey Boch e Girdi’ e Kanawo’ rok Jehovah

9, 10. Mang e ke buch mab t’uf ko yu Israel ni nge pagedan’rad ku Jehovah mar pared nib yul’yul’ ngak?

⁹ Bod rogon Adam nge Efa ma ba t’uf rok piyu Israel ni nge pagan’rad ku Jehovah mar yul’yul’gad ngak ni aram e rayog ni ngar pared ni yad be fol rok. Piyu Israel e yad ba nam nib achig u fithik’ e pi nam ni be fanenikayrad. U ngal u le’luch ma bay yu Egypt nge yu Ethiopia. U ngek u yimuch ma bay piyu Syria nge yu Assyria. Mu charenrad e bay yu Filistia, nge yu Ammon, nge yu Moab, nge yu Edom. Ma yad gubin e kar manged pi toogor rok yu Israel u boch e ngiyal’. Maku, yad gubin e kar uned ko liyor ngoogsur, nib muun ngay e liyor ko liyos nge liyor ko t’uf, nge ngongol ndarngal, ma kar pied e bitir rorad ni maligach. Pi nam nem u charen yu Israel e kar taga’gad nga daken e pi got rorad ni nge yoor e bitir rorad, ma nge fel’ rogon e woldug rorad, ma ngar gelgad ko mahl.

¹⁰ Kari mus ni piyu Israel e kar liyorgad ko taareb e Got ni Jehovah. I micheg ngorad ni ra pi’ e flaab ngorad ma ra yoor e bitir rorad, ma ra yoor e woldug rorad, ma dabi gel e pi toogor rorad ngorad nfaanra yad ra fol ko pi motochiyel rok. (Deuteronomy 28:1-14) Machane boor piyu Israel e dar folgad rok. Ma piin ni ka ranod u kanawoen Jehovah e kar gafgowgad ni bochan e kar pared nib yul’yul’. Boch i yad ma kan gafgownagrad, ma kan moningnagrad, ma kan li’rad, ma kan nin’rad nga kalbus, ma kan pag e malang ngorad, ma boch e girdi’ nu Israel e kar lied yad kar m’ad. (Acts 7:51, 52; Hebrews 11:35-38) Aram ba skeng ko piin nib yul’yul’! Machane mang fan ni boor e girdi’ ma kar chuwgad ko kanaowen Jehovah? Bay l’agruw e n’en ko chepin yu Israel ni ra ayuwegdad ngad guyed e lem rorad ni de yal’uw.

Kanawo’ nib Kireb ni Dag Ahaz

11, 12. (a) Nap’an ni ke m’ag yu Syria e mahl ngorad, ma mang e de adag Ahaz ni nge rin’? (b) Mang l’agruw ban’en ni ke chel Ahaz ngak me taga’ nga dakenrow?

¹¹ I gagiyegnag Ahaz fare nam u yimuch ko piyu Judah u nap’an e bin meruk e chibog B.C.E. Ma dariy e gapas ko gagiyeg rok. Bay biyay ni piyu Syria nge fa bin le’luch e nam nu Israel e kar m’agew e mahl ngak, ma “ir nge urngin e girdi’ ko nam rok e rib gel e marus ni yib ngorad nguur t’ongad ni bod e ran’ e gek’iy ni mithmitheg e nifeng.” (Isaiah 7:1, 2) Machane nap’an ni yog Jehovah ni ra ayuweg Ahaz me pining ni nge guy ko ra rin’ fa danga’, ma de adag Ahaz e ayuw rok! (Isaiah 7:10-12) Ma wenegan ni yib riy e ke war piyu Judah mar gafgowgad nib gel.​—2 Kronicles 28:1-8.

¹² De adag Ahaz ni nge ning e ayuw rok Jehovah me skengnag, ma aram me ning e ayuw rok fare pilung nu Assyria. Machane pi nam u charen yu Judah e kar gafgownaged yad. Ma ku arrogon yu Assyria ni kar togopuluwgad ngak Ahaz mar “k’aringed e marus ngak,” ma aram me tabab fare pilung ni nge “pi’ e maligach ngak e pi got nu Damascus ni be togopluw ngak, me gaar: ‘Pi got ko pi pilung nu Syria e be ayuwegrad, ma aram e gu ra pi’ e maligach ngorad, mi yad ayuwegneg.’”​—2 Kronicles 28:20, 23.

13. Mang e dag Ahaz ni bochan ni ke chel ngak e pi got nu Syria?

¹³ Munmun ma ra yog Jehovah ngak yu Israel ni gaar: “I gag Jehovah ni Got romed, e gu be skulnagmed ni nge yib angin ngomed, ma gu be dag e kanawo’ ni ngam marod ngay. Faanra gimed ra fol ko pi motochiyel rog! Ma ra yoor e gapas romed ni bod e lul’, ma rogon ni gimed ra par nib mat’aw e ra bod e n’ew u maday.” (Isaiah 48:17, 18) Nap’an ni ke chel Ahaz ngak e pi got nu Syria, me dag Ahaz ni ke ‘palog ko kanawo’ ni susun ni be yan ngay.’ I fol ko lem ko pi nam u charen, me sap ko tin ngoogsur ni yad be lek ni ke pagan’rad ngay ma gathi Jehovah.

14. Mang fan ni dariy e tawey rok Ahaz u nap’an ni ke chel ngak e pi got ngoogsur?

¹⁴ Fapi got ko pi nam nib muun ngay yu Syria, e ke m’ug riy ni yad e “pi got ndariy fan.” (Isaiah 2:8) U ba ngiyal’ u m’on riy, u nap’an e gagiyeg rok David ni Pilung, ma ke dag Jehovah ni kab gel ngak e pi got nu Syria ya yu Syria e kar manged pi tapigpig rok David. (1 Kronicles 18:5, 6) Kari mus ni Jehovah e “ir fare Got ko pi got, me ir fare Somol ko pi somol, ma ir fare Got nth’abi ga’, mab gel, ma ma k’aring e marus ko girdi’,” ma yigoo ir e rayog ni nge ayuweg e girdi’ mar pared nib pagan’. (Deuteronomy 10:17) Machane i pi’ Ahaz keru ku Jehovah, me sap ko fapi got ko pi nam. Ma ke yib wenegan nib kireb ngak yu Judah ni bochan.​—2 Kronicles 28:24, 25.

Piyu Jew nge Jeremiah ni Yad Bay u Egypt

15. Uw rogon ni ke denen e pi Jew ni ur moyed u Egypt u nap’an Jeremiah?

¹⁵ Bochan ni de par e girdi’ nib yul’yul’ ku Jehovah ma nap’an 607 B.C.E., me pag Jehovah piyu Babylon ni ngar gotheyed yu Jerusalem nge fare tempel ni bay riy. Boor e girdi’ ko re nam nem e kan fekrad nga Babylon. Machane boch i yad e kan pagrad ni ngar pared u rom nib muun ngay Jeremiah ni profet. Nap’an ni kan li’ Gediliah ni ir fare Governor u fithik’ e makath, ma kar milgad nga Egypt mar feked Jeremiah nge un ngorad. (2 Kings 25:22-26; Jeremiah 43:5-7) Mu rom e kar pied e maligach ko boch e got ngoogsur. I guy rogon Jeremiah ni nge ayuweg e pi Jew nem ni dar yul’yul’gad, machane ke gelan’rad. Dar adaged ni ngar chelgad ngak Jehovah mar rogned ni dabra talgad i pi’ e maligach ko “fare pilung nu tharmiy ni ir be’ ni ppin.” Mang fan? Ya aram e n’en ni ur rin’ed e pi chitamangirad ‘u lan e pi mach nu Judah ngu daken e pi kanawo’ u Jerusalem, u nap’an ni ke fel’ rogorad ko flowa nge boch ban’en, ma dariy ban’en nib kireb ni buch ngorad.’ (Jeremiah 44:16, 17, NW) Miki yog piyu Jew ni gaar: “Ka nap’an e ngiyal’ ni kad talgad i pi’ e maligach ngak fare ‘pilung nu tharmiy ni be’ ni ppin’ ma dakuda pied e n’en ni ngan unum nib maligach ngak ma aram e kad gafgowgad, ma kan li’dad ko sayden ma kad m’ad ko uyungol.”​—Jeremiah 44:18, NW.

16. Mang fan ni de yal’uw e lem rok e pi Jew u Egypt?

¹⁶ Kari mus e n’en ni kar mel’eged e ke yib ngan’rad! Ma mang e thin riyul’? Rriyul’ ni ke pi’ piyu Jew e maligach ngak e pi got ngoogsur u lan fare binaw ni ke pi’ Jehovah ngorad. Yu ngiyal’ ma kar gafgowgad ni bochan e kar yodoromgad kar manged apostate, ni bod rogon u nap’an Ahaz. Machane “gathi mmachreg ni ma yib e puwan’ ngak [Jehovah]” ko girdi’ rok. (Exodus 34:6; Psalm 86:15) Ke l’og e pi profet rok ngorad ni ngar pininged yad ni ngar kalgadngan’rad. Yu ngiyal’ u nap’an ni ke yul’yul’ fare pilung, ma ke flaabnagrad Jehovah, me yib angin ko girdi’, ni yugu aram rogon ni boor e girdi’ e dar yul’yul’gad ngak. (2 Kronicles 20:29-33; 27:1-6) Ri de yal’uw e lem ko piyu Jew ni yad bay u Egypt mi yad yog ni pi got ngoogsur e kar pied e flaab ngorad u nap’an ni ur moyed u binaw rorad!

17. Mang fan ni ke mul fare tempel nge binaw u pa’ yu Judah?

¹⁷ U m’on ko 607 B.C.E., ma ke yog Jehovah ko piyu Judah ni gaar: “Gu ning chilen ngorad ni nguur folgad rog, ni fan e nguug par ni gag e Got rorad ma yad e girdi’ rog. Mu gog ngorad ni nguur ngongolgad ni bod rogon ni kug ning chilen ngorad, ma aram e ur pired nib fel’ rogorad.” (Jeremiah 7:23) Ke mul fare tempel u pa’ yu Jew nge binaw rorad ni bochan e da ranod u ‘kanawo’ ni tay Jehovah chilen ngorad.’ Ngad guyed rogon ni ngad siyeged i rin’ e re n’em.

Ma Flaabnag Jehovah e Piin ni Ma Yan u Kanawo’ Rok

18. Mang e thingari rin’ e piin ni ma yan u kanawoen Jehovah?

¹⁸ Ngiyal’ ney ni bod kafram, ma ba t’uf ni ngan par nib yul’yul’ ni fan ni ngan yan u kanawoen Jehovah​—ma ba t’uf ni ngan mudugilan’ ni ngan pigpig ngak ni yigoo ir. Ma ba t’uf ni ngan pagan’ ngak​—min mich u wan’uy ni pi n’en ni micheg Jehovah e rayog ni ngan tor ngay ma ra riyul’. Ba t’uf e fol ni ngan yan u kanawoen Jehovah​—ma ngan fol ko pi motochiyel rok ma dabni chel nga yugu reb e kanawo’. “Ba mat’aw Jehovah; ma ba adag e ngongol nib mat’aw.”​—Psalm 11:7, NW.

19. Uw rogon e pi got ni ma liyor e girdi’ ngay ko ngiyal’ ney, ma mang wenegan riy?

¹⁹ I pagan’ Ahaz ko pi got nu Syria. Ma piyu Israel ni yad bay u Egypt e ke l’aganrad ngay ni fare “pilung nu tharmiy ni be’ ni ppin” e ra ayuwegrad me fel’ rogorad, ma re got nem ni ppin e kan liyor ngak u ga’ngin e binaw ni Middle East nkakrom. Ngiyal’ ney ma boor e got e gathi yad e liyos nriyul’. I ginang Jesus ni dabni pigpig ko “Salpiy” ya ngan liyor ku Jehovah. (Matthew 6:24) I weliy apostal Paul u murung’agen e “chogow ni mmit e ta’ fan nge meybil ni yibe tay ngak e liyos.” (Kolose 3:5) Miki weliy u murung’agen e piin ni “yal rorad e ke mang got rorad.” (Filippi 3:19) Arrogon, salpiy nge chugum e aram e pi got ko ngiyal’ ney ni yibe liyor ngay nib elmirin. Rriyul’ ni boor e girdi’​—nib muun ngay e piin ni be un ko teliw​—e ke ‘l’agan’rad ko pi n’em nde mudugil, ni aram e pi n’en ni ma fel’ rogoy riy ko biney e tamilang.’ (1 Timothy 6:17) Boor e girdi’ e ba gel e maruwel ni yad ma tay ko pigpig ko pi got ney, ma boch i yad e ke fel’ rogorad​—yad be par ko tin th’abi fel’ e naun, ma boor e chugum rorad nib tolang puluwon, ma boor e ggan nib manigil ni yad ma kay. Machane gathi gubin e girdi’ ma ke fel’ rogorad. Ma mus ni piin ni ke munmun ma ke fel’ rogorad, machane kar pirieged ni dariy e falfalan’ riy. Ya pi n’em e de mudugil, ma dabi par ni dabi m’ay, ma dabi ayuwegrad ko tirok Got ban’en.​—Matthew 5:3.

20. Uw rogon ni ngad pared nib thabthabel?

²⁰ Rriyul’ ma ba t’uf ni ngad pared nib thabthabel e lem rodad ya gad be par ko ngiyal’ ni tin tomren e re m’ag ney. Ba t’uf ni ngad rin’ed e n’en nib t’uf ni ngad ayuweged e tabinaw rodad ko tin nib t’uf rorad. Machane faanra kab ga’ fan u wan’dad e par nib fel’ rogon, nge salpiy ara yugu boch ban’en, ko pigpig ku Got, ma aram e ke yan i aw ni gad be un ko mit e liyor ko liyos ma aram e gathi ka gadad be yan u kanawoen Jehovah. (1 Timothy 6:9, 10) Machane uw rogon u nap’an ni ke yib e magawon ngodad ko m’ar, ara salpiy, ara yugu boch ban’en? Dabda boded piyu Jew u Egypt ni kar gafgowgad ni bochan e kar pigpiggad ku Got. Ya ngad skengnaged Jehovah, ni aram e n’en nde rin’ Ahaz. Mu yul’yul’ ni ngam chel ngak Jehovah Got ni nge pow’iyem. Ma ngam pagan’ ko re n’em, ma ga yibilay ku Got ni nge pi’ gelngim, nge gonop ni ngam athamgil ko pi magawon rom. Ma ngam par nib pagan’ ni ga be sonnag e ngiyal’ nra flaabnagem Jehovah.

21. Mang boch e flaab ni ma yib ko piin ni ma yan u kanawoen Jehovah?

²¹ N’umngin nap’an e chep ko piyu Israel, ma ke flaabnag Jehovah e piin ni ka ranod u kanaowen. Yog David ni Pilung ni gaar: “O Jehovah, mu pow’iyeg ko tin mat’aw mu ayuwegneg ko pi toogor rog.” (Psalm 5:8, NW) I ayuweg Jehovah David me gel ngak e pi nam u charen ma pi nam nem e boch u tomren e kar gafgownaged Ahaz. U tan e gagiyeg rok Solomon, ma ke flaab yu Israel, mar pared u fithik’ e gapas me fel’ rogorad ma aram e n’en ni ba adag piyu Jew ni immoy u Egypt. Ma ke ayuweg Jehovah Hezekiah ni fak Ahaz, me gel ngak yu Assyria. (Isaiah 59:1) Arrogon, de ngoch ngoch pa’ Jehovah ngak e piin ni ur pared nib yul’yul’ ngak, ma da ranod u “kanawoen e piin ni yad e tadenen” ma ke fel’ e pi motochiyel rok Got u wan’rad. (Psalm 1:1, 2) Ku aram rogon e chiney. Machane uw rogon nrayog ni nge mudugilan’dad ni gad be yan u kanawoen Jehovah? Aram e n’en nran weliy ko bin migid e article.

Ka Ga Manang?

◻ Mang boch felngin nib t’uf ni fan ni nga darod u kanawoen Jehovah?

◻ Mang fan ni de puluw e lem rok Ahaz?

◻ Mang fan ni de yal’uw e lem ko piyu Jew ni immoy u Egypt?

◻ Uw rogon nrayog ni nge gel rogon ni ke mudugilan’dad ni nga darod u kanawoen Jehovah?

[Sasing ko page 21]

I chel Ahaz ngak e pi got nu Syria ma gathi Jehovah