Nguu Darod U Kanawoen Jehovah

“Mpar ni Jehovah e ke l’agan’um ngak mu um par ko kanawo’ rok; me pi’ gelngim ni ngam tafnay e binaw.”​—PSALM 37:34, New World Translation.

1, 2. Uw rogon ni yan David ni Pilung u kanawoen Jehovah, ma mang e ba t’uf ni ngad rin’ed ko ngiyal’ ney?

“MMOG ngog e kanawo’ ni thingar gu wan riy, ya gu be taga’ nga dakenam.” (Psalm 143:8, NW) Aram rogon e lem ko pi Kristiano ko ngiyal’ ney ni bod rogon ni yog David ni Pilung. Ri yad ba adag ni ngar felan’naged Jehovah ma ranod u kanawo’ rok. Mang e ba l’ag ngay? Rogon u wan’ David, ma thingari fol ko pi motochiyel rok Got. Ma ba muun ngay ni ngan pagan’ ngak Jehovah ma gathi ngan fl’eg thilin e pi nam. Arrogon, ba muun ngay ni ngan pigpig ku Jehovah min par nib yul’yul’ ngak, ma gathi ngak e pi got ko yugu boch e nam. Ma ka bay boch ban’en nib l’ag ngay ni fan ko pi Kristiano ni nga ranod u kanawoen Jehovah.

² Rogon ni ngan yan u kanawoen Jehovah e ba muun ngay ni nge michan’uy ko maligach ni pi’ Jesus Kristus ni biyul, min nog ni ir “fare kanawo’ me ir e tin riyul’ me ir e yafos.” (John 3:16; 14:6; Hebrews 5:9) Ku ba muun ngay ni ngan fol ko “fare motochiyel ni pi’ Kristus,” ni aram e nge bagadad me t’ufeg bagadad, ma ba gel rogon ni ngan t’ufeg pi walagen Jesus ni kan dugliyrad. (Galatia 6:2; Matthew 25:34-40) Piin ni ma yan u kanawoen Jehovah e ba t’uf rorad e pi motochiyel rok. (Psalm 119:97; Proverbs 4:5, 6) Yad ma chaariy e taw’ath rorad ni ngar uned ko machib ko Kristiano. (Kolose 4:17; 2 Timothy 4:5) Meybil e aram bang ko yafos rorad. (Roma 12:12) Ma yad ma ayuw u rogon e ngongol rorad ni ‘dabra ngongolgad ni bod e girdi’ ndawori tamilangan’rad, machane nguur ngongolgad ni bod rogon e girdi’ nib gonop.’ (Efesus 5:15) Dabra paged e tirok Got ban’en ni fan ko par nib fel’ rogon ara pi n’en ni ma ar’ar’nag dowey. (Matthew 6:19, 20; 1 John 2:15-17) Maku, baga’ fan ni ngan yul’yul’ ku Jehovah me pagan’uy ngak. (2 Korinth 1:9; 10:5; Efesus 4:24) Mang fan? Ya ba taareb rogon rarogodad ko piyu Israel kakrom.

Ba T’uf e Pagan’ nge Yul’yul’

3. Mang fan ni yul’yul’, nge michan’, nge pagan’ e ra ayuwegdad nguu darod u kanawoen Jehovah?

³ Piyu Israel e yad ba nam nib achig ma pi nam u charrad e ur fanenikayed yad mar uned ko ngongol nib golong ni aram bang ko liyor rorad ngak e pi liyos rorad. (1 Kronicles 16:26) Kari mus ni piyu Israel e ur pigpiggad ngak e bin riyul’ e Got ni danir guy ni Jehovah, ma ba t’uf rok ni ngar pared nib fel’ e ngongol rorad. (Deuteronomy 6:4) Ku arrogon e ngiyal’ ney ma ke mus ni in e milyon e girdi’ ni yad ma liyor ku Jehovah, ma yad ma par u fithik’ e girdi’ ni yad boor ko nel’ i bilyon u gubin mab thil e teliw rorad nge lem rorad ngorad. Faanra gad bang ko pi cha’ nem ni yad buch uw, ma thingarda ayuwgad ni dabni suwey lanin’dad u rogon nib kireb. Uw rogon? Ngan par nib yul’yul’ ku Jehovah Got min michan’ ngak ma ngan pagan’ ngak ni ra lebuguy urngin ban’en ni ke micheg. (Hebrews 11:6) Aram e ra ayuwegdad ndabi pagan’gad ko pi n’en ni ke l’agan’ e re fayleng ney ngay.​—Proverbs 20:22; 1 Timothy 6:17.

4. Mang fan ni girdien e pi nam e bay “lanin’rad u fithik’ e lumor”?

⁴ I dag apostal Paul ko uw rogon ni thingari par e pi Kristiano nib thil ko girdi’ nu fayleng faani yoloy ni gaar: “U fithingan Somol e nggog e re bugithin ni baaray riy ma ri gu be ning chilen ngomed ni be lungug: dab ku um ngongolgad ni bod rogon e piin ndar nanged Got, ni tin ni yad be lemnag e dabi yib fan, ma be par lanin’rad u fithik’ e lumor. Dawori yog ngorad e bin ni ma pi’ Got e wok, ni fan e dar nanged ma yad ba gelan’.” (Efesus 4:17, 18) Jesus e ir e “bin riyul’ e tamilang.” (John 1:9) Piin ni ma togopluw ngak fa ma yog ni mmich u wan’rad ngak machane dar folgad ko fare “motochiyel ni pi’ Kristus” e be par “lanin’rad u fithik’ e lumor.” Gathi yad ma yan u kanawoen Jehovah, ya “dawori yog ngorad e bin ni ma pi’ Got e wok.” Yad ma lemnag ni yad ba gonop ko tin nu fayleng ban’en, machane ‘dar nanged’ e tamilangan’ ni ma pow’iyey iyan ko yafos, ni aram e tamilangan’ u murung’agen Jehovah Got nge Jesus Kristus.​—John 17:3; 1 Korinth 3:19.

5. Yugu aram rogon ni be gal ramaen e tamilang ko thin riyul’ u fayleng, machane mang fan ni boor e girdi’ e da ur folgad riy?

⁵ Machane, fare tamilang ko thin riyul’ e be mat ramaen u ga’ngin e fayleng! (Psalm 43:3; Filippi 2:15) “Gonop e bay u lan e yu pa’ i kanawo’.” (Proverbs 1:20) Fa binem e duw ma boor ko reb e bilyon e awa ni ke tay e Pi Mich Rok Jehovah ni ur weliyed u murung’agen Jehovah Got nge Jesus Kristus ngak e piin migid ngorad. Ma bokum miriay e girdi’ ni kar adaged. Machane susun ni ngad gingad ya boor e girdi’ e dar adaged? Danga’. Ya i weliy Paul u murung’agen e piin ni yad “ba gelan’.” Boch e girdi’ e dubrad e machib ni bochan e yad ba siin ara ri ba t’uf e salpiy rorad. Ma yugu boch e girdi’ e ke suwey lanin’rad e pi yuraba’ i teliw ni googsur fa yad be un ko lem ko girdi’ ko ngiyal’ ney. Ma boor e girdi’ e kar gafgowgad u ban’en ma aram e kar pied keru’rad ku Got. Ma yugu boch e girdi’ e de yog ni ngar folgad ko pi motochiyel rok Jehovah. (John 3:20) Rayog ni nge un be’ ko pi n’en nem ni yugu aram rogon ni be yan u kanawoen Jehovah fa?

6, 7. Uw rogon ni ke mul piyu Israel ni yugu aram rogon ni yad e girdi’ rok Jehovah Got, ma mang fan?

⁶ Aram rogon ni buch ko piyu Israel kakrom, ya arrogon ni dag apostal Paul. I yoloy ni gaar: “Urngin e pi n’ey ni be fil ngodad, ma be ning chilen ngodd ndab ud m’ad ni bochan e tin nib kireb ban’en, ni bod yad, ara ud ted fan ma gadad be meybil ko liyos ni ma meybil boch e girdi’ ngay ni bod e n’en ni i rin’ boch i yad. Ya bod rogon ni be yog e babyor nib thothup ni be gaar, ‘Pi girdi’ nem e ra pired nga but’ ngar abichgad mi yad garbod, mi yad sak’iy ni ngar churu’gad.’ Thingar dab da ngongliyed e ngongol ko darngal ni bod ni i rin’ boch i yad, ma reliw’ nge dalip i biyu’ i yad e yim’ u lan taareb e rran.”​—1 Korinth 10:6-8.

⁷ Som’on e weliy Paul u murung’agen e ngiyal’ ni i liyor yu Israel nga ba liyos ni yaan e garbaw nni ngongliy ko gol u daken e Burey nu Sinai. (Exodus 32:5, 6) Aram e kar th’abed e motochiyel ni pi’ Got ngorad in e wik u m’on riy. (Exodus 20:4-6; 24:3) Nge migid, me weliy Paul u murung’agen fa ngiyal’ ni un yu Israel ko pi ppin ni yad pi fak yu Moab mar siro’gad ku Baal. (Numbers 25:1-9) Rogon ni kar liyorgad ko fare liyos ni yaan e garbaw e ur rin’ed e n’en ni be ar’arnag dowrad, mar ‘rin’ed e tin ni ke falfalan’rad ngay.’a Ma liyor ku Baal e mmuun ngay e ngongol nib puwlag. (Revelation 2:14) Mang fan ni un yu Israel ko pi n’en nem nib denen? Ya kar paged gum’ercha’rad nge ‘ar’arnag e tin nib kireb ban’en’​—ni liyor ko liyos nge ngongol ko darngal nib l’ag ngay.

8. Mang e rayog ni ngad filed ko pi n’en ni rin’ piyu Israel?

⁸ I tamilangnag Paul ni susun ni ngad filed ban’en ko pi n’en ney. Mang? Ri dabi lemnag be’ ni Kristiano ni nge siro’ ko ba liyos ni yaan e garbaw ara ba got nu Moab nkakrom. Machane uw rogon e ngongol ndarngal nge ngongol ni ngan rin’ e n’en ni yiba adag nib pag rogon? Aram e pi n’en ni yibe rin’ e ngiyal’ ney, ma faanra gad ra pag ni ngad ar’arnaged e pi n’en nem me gel u gum’ercha’dad, ma aram e gad ra palog ku Jehovah. Ma wenegan nra yib riy e taareb rogon ni faanra kad uned ko liyor ko liyos​—gad ra par nib mal’af rok Got. (Mu taarebnag ko Kolose 3:5; Filippi 3:19.) Ma ke musnag Paul e thin rok u murung’agen e pi n’en nem ko pi thin ney ni gaar: “Mpired u urel ko ta’ fan nge meybil ni yibe tay ngak e liyos ni ma meybil boch e girdi’ ngay.”​—1 Korinth 10:14.

Ayuw ni Ngan Yan u Kanawoen Got

9. (a) Mang ayuw e ba t’uf rodad ni nguu darod u kanawoen Jehovah? (b) Mang reb e kanawo’ ni gad ma rung’ag ba ‘bugithin u keru’dad’?

⁹ Faanra ke mudugilan’dad ni nguu darod u kanawoen Jehovah, ma gathi kan pagdad ndariy ban’en nra ayuwegdad. I yiiynag Isaiah ni gaar: “Telmed e ra rung’ag ba bugithin u keru’med ni be gaar: ‘Ereray e kanawo’. Mmarod u daken, gimed e girdi’,’ ya ri chey mi gimed sor ko ba’ ni mat’aw ara ba’ ni gilay’.” (Isaiah 30:21, NW) Uw rogon ma be rung’ag ‘teldad’ e re ‘bugithin nem u keru’dad’? Ngiyal’ ney ma dariy be’ ni ma rung’ag ba lam ara be yib e thin ngorad ni yib rok Got ni goo yad. Re “bugithin” nem ni yibe rung’ag e yib ngodad ni gad gubin ni taareb rogon. Som’on, ma ma yib ngodad u daken e thin ko Bible, ni bay e lem rok Got riy ma be weliy u murung’agen rogon ni ma ngongol Got ngak e girdi’. Gubin e rran ma gad be guy e tin ni sum ko piin ni “dawori yog ngorad e bin ni ma pi’ Got e wok,” me ere ba t’uf ni ngad bieged e Bible ma gad fl’eg i lemnag e tin ni kad filed u gubin ngiyal’ ma aram e gad ra par nib gel ko tirok Got ban’en. Aram e ra ayuwegdad ngad siyeged e “tin ndariy fan” ma ngad pared ni “ke bung rogodad nrayog ni ngad rin’ed urngin mit e ngongol nib fel’.” (Acts 14:14, 15; 2 Timothy 3:16, 17) Ra gelnagdad, ma ra ayuwegdad, ma ‘kanawo’ ni gad ra yan riy e ra yan i fel’.’ (Joshua 1:7, 8) Ere be yog e Thin rok Jehovah ni gaar: “Gimed e piin ni pagel, mu telmed ngog. Mu rin’ed e tin ni ku gog mu um pired ni gimed ba felfelan’. Mu telmed ko tin ni kug fil ngomed. Ngam gonopgad nge dab mpied keru’med ngay.”​—Proverbs 8:32, 33.

10. Mang e bin l’agruw e kanawo’ ni gad ma rung’ag ‘bbugithin u keru’dad’?

¹⁰ Fare ‘bugithin u keru’dad’ e ku ma yib ngodad u daken “fare tapigpig nib yul’yul’ mab gonop,” ni ma “pi’ e ggan ko ngiyal’ ni yima pi’ riy.” (Matthew 24:45-47) Reb e kanawo’ ni yibe pi’ e re ggan ney e bay ko pi babyor ni ma tamilangnag e thin ko Bible, ma ke yoor e re ggan ney ko ngiyal’ ney. Baaray rogon, u daken e babyor ni Wulyang Ntagil’ e Damit ma kan tamilangnag ngodad e thin ko profet. Ma re ke babyor nem e be pi’ e athamgil nga lanin’dad nguud athamgilgad ko maruwel ko machib ma ngad ayuweged e girdi’ ngar manged pi gachalpen Jesus ni yugu demtrug ni ke yoor e girdi’ ni dubrad e machib, ma kan ayuwegdad ni nge dabda mulgad, ma kan piningdad ni ngad muruweliyed nge yog pi felngin e Kristiano ngodad. Ri gad ma chaariy e pi ggan nem ni yibe pi’ ko ngiyal’ nib puluw!

11. Mu weliy e bin dalip e kanawo’ ni gad ma rung’ag fare ‘bugithin u keru’dad.’

¹¹ Fare tapigpig nib yul’yul’ mab gonop e ku yad ma pi’ e ggan u daken e pi muulung. Aram e pi muulung ko ulung, nge circuit assembly, nge pi convention u gubin e duw. Mini’ reb e Kristiano nib yul’yul’ ni der tay fan e pi muulung nem? Ma ayuwegdad nguu darod u kanawoen Jehovah. Boor e girdi’ e boor e tayim ni thingara pared u tabon e maruwel fa skul mar pared u fithik’ e girdi’ ni de taareb e michan’ rorad ngorad, me ere baga’ fan ni ngan cheg ko pi Kristiano u gubin ngiyal’ ya aram e ra ayuweg e yafos. Ngan un ko muulung ma aram rogon nrayog ni nge ‘bagadad ma ngi i ayuweg bagadad ma be dag ngak nib t’uf rok ma be rin’ e tin nib fel’ ngak.’ (Hebrews 10:24) Ba t’uf rodad e pi walagdad, ma gad ba falfalan’ ni ngad chaggad ngorad.​—Psalm 133:1.

12. Mang e ke mudugilan’ e Pi Mich Rok Jehovah ngay, ma uw rogon ni kar tamilangnaged?

¹² Byoor ko nel’ i milyon e girdi’ ni kan gelnagrad ko ggan nib spiritual ma yad be yan u kanwoen Jehovah, ma bokum milyon yugu boch e girdi’ e yad be fil e Bible ni ngar filed rogon ni ngar yodoromgad. Ke mulan’rad ya yad buch uw ma girdi’ nu fayleng e yad bokum bilyon fa? Ri danga’! Ke mudugilan’rad ni nguur folgad ko fare ‘bugithin u keru’rad,’ mi yad rin’ e tin nib m’agan’ Jehovah ngay u fithik’ e yul’yul’. Kar tamilangnaged u fithik’ e yoor e n’en ni ke mudugilan’rad ngay, ma nap’an fare District Convention ko 1998/99 ni “Kanawo’ rok Got ko Yafos” ma ke fl’eg e girdi’ e m’ag ni be yog ko mang e ke mudugilan’rad ngay. Tin migid e thin e be weliy ko mang e kar dugliyed.

N’en ni Kan Dugliy

13, 14. Uw rarogon e fayleng u wan’ e Pi Mich Rok Jehovah?

¹³ “Gadad e Pi Mich Rok Jehovah e kad muulunggad u taabang ko fare Convention ni ‘Kanawo’ rok Got ko Yafos’, ma ke taareban’dad ngay ni kanawo’ rok Got aram e bin th’abi fel’ e kanawo’ ni ngan par riy ko yafos. Machane goo gad manang ni boor e girdi’ e gathi aram rogon e lem rorad. Ke fol e girdi’ ko boor mit e lem nge philosophy, nge teliw ni be yog ko uw rogon e bin th’abi fel’ e kanawo’ ko yafos. Machane ran lemnag chepin e girdi’ u rogon nib puluw, ma be tamilangnag nib riyul’ e pi thin ni yog Got u Jeremiah 10:23 ni be gaar: ‘De mil fan ngak e girdi’ ni be yan ni nge gagiyegnag e yan rok.’

¹⁴ “Gubin e rran ma gad be guy ko uw fene riyul’ e pi thin nem. Ya be dariy fannag e girdi’ e kanawo’ rok Got ko yafos. Be lek e girdi’ e tin ni ba mat’aw u wan’rad. Ma wenegan ni yib riy e gafgow​—ke kireb e par u tabinaw, be par e bitir ni dariy be’ ni be pow’iyrad nrogon; ma be lek e girdi’ e fel’ rogon, ma aram e ke chalbarad mab m’ay fan e yafos rorad; ma ke yoor e bugel nge cham, ma boor e girdi’ ni kan li’rad kar m’ad; ma ke ruw raba’ e girdi’ ni bochan raen dowrad nge bochan e binaw rorad, ma aram e kan mahl ma boor e girdi’ ni kar m’ad riy; ma ke yoor e girdi’ ni be un ko ngongol ndarngal, ma aram e be yoor e m’ar ni be wer iyan ni bochan. Aram boch e magawon ni be gafgownag e girdi’ ndabkura pirieged e falfalan’, nge gapas, nge pagan’.

15, 16. Mang e kan dugliy ko fare resolution u murung’agen e kanawo’ rok Got ko yafos?

¹⁵ “Bochan rarogon e girdi’ ma gad be chugur iyan ko fare ‘mahl rok Got ni Gubin ma Rayog Rok,’ ni ka nog Armageddon ngay (Revelation 16:14, 16), ma aram e gad e Pi Mich Rok Jehovah e ke mudugilan’dad ngay ni:

¹⁶ “Som’on: Gad manang ni gad e fen Jehovah Got, ya ra bagadad ma ke ognag ir ngak, ma ke michan’dad ko n’en ni pi’ Jehovah ni aram fare biyul ni Jesus Kristus ni Fak. Ke mudugilan’dad ni nguu darod u kanawo’ rok Got ko yafos, ma gad ra pigpig ngak ni gad e Pi Mich Rok, ma gad ra fol rok u daken e gagiyeg rok Jesus Kristus.

17, 18. Mang e ke mudugilan’ e Pi Mich Rok Jehovah ngay ni fan ko ngongol rorad nge pi walagrad ni Kristiano?

¹⁷ “Bin L’agruw: Gad ra ul’ul i fol ko pi motochiyel ko Bible. Ke mudugilan’dad ni dab darod u rogon ni be yan e pi nam ni tin ni yad be lemnag e dabi yib fan. (Efesus 4:17-19) Ke mudugilan’dad ni nguud pared nib biech u p’ewochen Jehovah ma dabi kirebnagdad e kireb nu fayleng.​—James 1:27.

¹⁸ “Bin Dalip: Ngad chichiiyed pa’dad ko ulung rodad ni gadad e pi walag ni Kristiano u ga’ngin e fayleng. Gad ra par u mathilin e magawon ko pi nam, ma dabda uned ko magawon u thilin e pi nam ara girdien reb e binaw nge reb.

19, 20. (a) Mang e ra rin’ e pi gallabthir ni yad e Kristiano? (b) Uw rogon ni ra tamilangnag e tin riyul’ e Kristiano ni yad pi gachalpen Kristus?

¹⁹ “Bin aningeg: Gad e piin gallabthir e gad ra fil e kanawo’ rok Got ngak e pi bitir rodad. Gad ra dag e kanawo’ ngorad u rogon e par ko Kristiano, nib muun ngay e fol Bible u gubin ngiyal’, ma gad ra un ko machib nge pi muulung ko Kristiano.

²⁰ “Bin Lal: Gad gubin e gad ra athamgil ni nge yog pi felngin e Ani Tasunmiydad ngodad, ma gad ra athamgil ni ngad folwokgad rok u rogon pangin, nge kanawo’ rok, ni bod rogon ni rin’ Jesus. (Efesus 5:1) Ke mudugilan’dad ngay ni urngin ban’en ni gad ra rin’ ma gad ra rin’ u fithik’ e t’ufeg, ma aram e yira nang ni gad pi gachalpen Kristus.​—John 13:35.

21-23. Mang e ra ul’ul’ e Pi Mich Rok Jehovah ni ngar rin’ed, ma mang e ke mich u wan’rad ngay?

²¹ “Bin nel’: Dabda talgad i machibnag fare thin nib fel’ ko Gil’ilungun Got, ma ngad ayuweged e girdi’ ngar manged pi gachalpen Jesus, ma gad ra fil ngorad u rogon e kanawo’ rok Got ko yafos, ma gad ra piningrad ni nguur filed ban’en ko pi muulung ko ulung.​—Matthew 24:14; 28:19, 20; Hebrews 10:24, 25.

²² “Bin medlip: Ra be’ nge gadad ni gad bang ko reb e teliw, ma gad ra ul’ul’ i mon’eg e tin nib m’agan’ Got ngay ko yafos rodad. Gad ra fanay e Thin Rok ni bay ko Bible ni nge pow’iydad, ma dabda sorgad ko ba’ ni mat’aw ara ba’ ni gilay’, ma aram e gad ra micheg ni kanawo’ rok Got e kab tolang ko kanawo’ ko fayleng. Ke mudugilan’dad ni nguud leked e kanawo’ rok Got ko yafos​—u rogon nib mutrug, ma gad ra yul’yul’ ngay e chiney iyan ngaram ndariy n’umngin nap’an!

²³ “Ke mudugilan’dad ko pi n’en ney ya ke pagan’dad ko tin ni ke micheg Jehovah ni en nra rin’ e tin nib m’agan’ ngay e ra par nib fos ndariy n’umngin nap’an. Ke mudugilan’dad ngay ya ke mich u wan’dad ni faanra gad ra fol ko pi motochiyel ko Bible, nge fonow riy, ma aram e kanawo’ nth’abi fel’ ko yafos e chiney ma ku be fl’eg rogon e yafos nga m’on, ma aram e rayog e yafos ngodad ni ir e bin riyul’ e yafos. (1 Timothy 6:19; 2 Timothy 4:7b, 8) Ma n’en th’abi ga’ fan e ke mudugilan’dad ko pi n’en ney ni bochan e ba t’uf Jehovah rodad u polo’ i gum’ercha’dad, ngu polo’ i lanin’dad, ngu polo’ i gelngidad!

24, 25. Mang e ke fulweg e girdi’ ko re resolution nem, ma mang e ke mudugilan’rad ngay ni ngar rin’ed e piin ni be yan u kanaowen Jehovah?

²⁴ “Gubin e girdi’ ni kar uned ko re convention ney ni ke felan’rad ko pi thin ko re resolution ney, ma ra yog e ARROGON!”

²⁵ Bokum miriay e pi tafen e muulung u ga’ngin e fayleng e ke ga’ laman e girdi’ ni kar rogned e “ARROGON!” De maruwaran’ e Pi Mich Rok Jehovah ni nguu ranod u kanawo’ rok Jehovah. Ke pagan’rad ngak me michan’rad ni ra lebuguy urngin e tin ni ke yog nra rin’. Yad ma par nib yul’yul’ ngak, ndemtrug ko mang e ra buch. Ma ke mudugilan’rad ngay ni ngar rin’ed e tin nib m’agan’ ngay.

“Ba Got u Ba’ Rodad”

26. Uw rarogon nib falfalan’ e piin ni ma yan u kanawoen Jehovah?

²⁶ Manang e Pi Mich Rok Jehovah e thin ko Psalm ni gaar: “Mpar ni Jehovah e ke l’agan’um ngak mu um par ko kanawo’ rok; me pi’ gelngim ni ngam tafnay e binaw.” (Psalm 37:34) Ma dabra paged talin e n’en ni yog Paul ni gaar: “Faanra ba Got u ba’ rodad, me mini’ e rayog rok ni nge togopluw ngodad? Mus ngak Fak me pi’ ni fan ngodad ni gadad gubin nde yog ni nge tel! Ke pi’ Fak ngodad ere gathi ku ra pi’ urngin ban’en ngodad ndariy puluwon?” (Roma 8:31, 32) Arrogon, faanra nguu darod u kanawoen Jehovah, ma ra “pi’ urngin ban’en ngodad ni be fel’ rogodad riy.” (1 Timothy 6:17) Dariy bang ni kab fel’ ko gin ni gad bay riy​—ni gad be yan u kanawo’ rok Jehovah, ni gadad e pi walagdad ni pumoon nge ppin. Bay Jehovah u charendad, ma nge mudugilan’dad ni nguud pared u rom ma ngad athamgilgad nge mada’ ko tomur, ma nge michan’dad ngay ni ra taw ko ngiyal’ ni turguy Got ma gad ra guy urngin ban’en ni ke micheg ni ke riyul’.​—Titus 1:2.

[Boch e Thin nra Tamilangnag Murung’agen]

Ka Ga Manang?

◻ Mang e ba t’uf ko Kristiano ni nge yan u kanawoen Jehovah?

◻ Mang fan nib t’uf rodad ni nge pagan’dad ku Jehovah ma gad par nib yul’yul’ ngak?

◻ Mang ayuw ni bay u nap’an ni gad be yan u kanawoen Jehovah?

◻ Mu tamilangnag boch ban’en ko fare resolution ni kan fl’eg u nap’an e pi Convention ni “Kanawo’ Rok Got ko Yafos.”

[Sasing ko page 26]

Kan fl’eg reb e resolution ni baga’ fan u nap’an e pi District nge International Convention ni “Kanawo’ Rok Got ko Yafos