LIBRARY U ONLINE ni fan ko Wulyang ko Damit
Wulyang ko Damit
LIBRARY U ONLINE
Waab
  • BIBLE
  • PI BABYOR
  • PI MUULUNG
  • w99 12/1 pp. 18-22
  • Pi Labthir, Mang E Yibe Fil E Ngongol Romed?

Dariy e video ko n'en ni kam mel'eg.

Wenig ngom, dabiyog ni nge load e re video ney.

  • Pi Labthir, Mang E Yibe Fil E Ngongol Romed?
  • Fare Wulyang Ntagil’ E Damit Ni Be Weliy Morngaagen Gil’ilungun Jehovah—1999
  • Pi Subheading
  • Boch Ban'en ni Ku Taareb Rogon Ngay
  • Angin ni Yib ni Bochan e Ngongol nDag
  • Mang e Yibe Fil ko Ngongol rodad
  • Yibe Dag Rogon ni Ngan Bieg e Bible Gubin e Rran
  • Ngan Fal’eg Rogon E Tabinaw Nge Gel Ko Tirok Got
    Fare Wulyang Ntagil’ E Damit Ni Be Weliy Morngaagen Gil’ilungun Jehovah—2001
  • Pi Gallabthir Mu Pied E Tin Nib T’uf Rok E Tabinaw Romed
    Fare Wulyang Ntagil’ E Damit Ni Be Weliy Morngaagen Gil’ilungun Jehovah—2005
  • Mu Fil ko Bitir Rom ni Nge T’uf Jehovah Rok
    Fare Wulyang Ntagil’ E Damit Ni Be Weliy Morngaagen Gil’ilungun Jehovah—2007
  • Piin Gallabthir​—Mu Ayuweged Pi Fakmed ni Nge T’uf Jehovah Rorad
    Fare Wulyang ko Damit Ni Be Weliy Morngaagen Gil’ilungun Jehovah—2022
Kum Guy Boch Ban'en
Fare Wulyang Ntagil’ E Damit Ni Be Weliy Morngaagen Gil’ilungun Jehovah—1999
w99 12/1 pp. 18-22

Pi Labthir, Mang E Yibe Fil E Ngongol Romed?

“Ngam folwokgad rok Got, ni gimed pi fak ni gimed bat’uf rok, ma ngam ululgad   ko yan romed u fithik’ e t’ufeg.”​—EFESUS 5:1, 2.

1. Miti mang e thin ni pi’ Jehovah ngak fa wu’ i mabgol ni som’on?

JEHOVAH ir e Tababnag e yaram ko tabinaw. Ma urngin e tabinaw e thingara pininged e magar ngak ya Ir e ke ayuweg fa bin som’on e tabinaw me pi’ gelngirow ni nge yog e pi bitir ngorow. (Efesus 3:14, 15) I pi’ ngak Adam nge Efa boch kenggin e motochiyel ni aram e nge mil fan ngorow ni ngar folgow riy ku ke pi’ mat’awrow ni ngar dugliyew ban’en nrogon ni ngar rin’ew e pi’ nem. (Genesis 1:28-30; 2:6, 15-22) Tomren ni ke denen Adam nge Efa, me yib e pi magawon ngak e pi tabinaw ni ba mom’maw’’. Machane, i runguyrad Jehovah me pi’ ngorad boch e ayuw ni nge ayuweg e pi tapigpig rok uw rogon ni ngar pithiged e pi magawon nem.

2. (a) Uw rogon ni ke uneg Jehovah e thin ni un nog ko boch e fonow ni kan yoloy? (b) Mang e deer ni pi labthir e thingara fithed yad riy?

2 I Jehovah ni ir e Sensey rodad nrib fel’, e i pi’ boch e thin ni be pow’iydad ko mang e n’en ni thingarda rin’ed nge n’en ni thingar dabda rin’ed me yodor ni gathi kemus nu daken e n’en ni kan yoloy. Ma kakrom e kan fanay l’agruw e kanawo’ ni aram tin ni kan yoloy nge tin ni yib ngorad u daken e pi priest nge pi prophet nge pi lolugen e tabinaw. Mini’ e be fanay Jehovah ko ngiyal’ ney ni ur rogned boch e thin ni fan ni ngan skulnagdad? Yad e piin ni piilal nge pi labthir. Faanra gur reb e labthir, ga be skulnag e girdi’ u tabinaw rom ko pi kanawo’ rok Jehovah?​—Proverbs 6:20-23.

3. Mang e rayog ni nge fil e pi lolugen e tabinaw ko n’en ni dag Jehovah rogon ni ngan fil ban’en ngak be’ me yib angin?

3 Uw rogon ni ngan skulnag e girdi’ u lan e tabinaw? I dag Jehovah boch e kanawo’. I weliy boch e thin nib tamilang ko mang e tin nib fel’ nge tin nib kireb, me rin’ ni boor yay. (Exodus 20:4, 5; Deuteronomy 4:23, 24; 5:8, 9; 6:14, 15; Joshua 24:19, 20) Ma fith boch e deer ni nge pug e tafinay rok be’. (Job 38:4, 8, 31) U daken boch e fanathin nge chepin boch e girdi’, me pug e lem mma munguynag gumi’rcha’dad. (Genesis 15:5; Daniel 3:1-29) Pi labthir, u nap’an ni ga be skulnag e bitir rom, ga be guy rogomed ni ngam folgad ko binem e kanawo’ fa?

4. Mang e kada filed ko kanawo’ ni dag Jehovah nge rogon ni nge gechignag be’, ma mang fan ni baga’ fan e gechig?

4 Ba mudugil Jehovah ko tin nib mat’aw, machane manang ko mang e magawon ku be’ ni dawori flont. Arfan nu m’on ni nge gechignag be’, ma ma fil ban’en ma ma ginangey ni boor yay ma puguran ngak e girdi’ ni dawora flontgad. (Genesis 19:15, 16; Jeremiah 7:23-26) Ma ra llowannag be’ nrogon, ma dabi pag rogon. (Psalm 103:10, 11; Isaiah 28:26-29) Faanra aram e kanawo’ ni gad ma ayuweg e pi bitir rodad riy, ma biney e be dag ni gad manang Jehovah, ku arrogon e bitir ra papey ni ngar nanged murung’agen Got.​—Jeremiah 22:16; 1 John 4:8.

5. Mang e rayog ni nge fil e pi labthir ku Jehovah u murung’agen rogon ni ngar motoyilgad nga ban’en?

5 Mog, Jehovah ni ir e chitamangidad e ma motoyil ngodad u fithik’ e runguy. Gathi kemus ni ma pi’ e thin ko mang e susun ni ngan rin’. Ma pi’ athamgil nga lanin’dad ni ngad weliyed rogon ngak. (Psalm 62:8) Faan mang kad dogned e thin ngak ni depluw, ma dabi tolul u tharmiy ni nge puwan ngodad. Ma fil ban’en ngodad u fithik’ e sobut’an’. Arfan, nrib pluw, fare fonow ni i pi’ apostal Paul ni gaar: “Nguum folwokgad rok Got, ni gimed pifak nib t’uf rok”! (Efesus 4:31​–5:1) Rib fel’ e n’en ni dag Jehovah ngak e pi labthir nrogon ni ngar filed ban’en ngak e pi bitir rorad! Ban’en nra taw nga gumircha’dad ma ra k’aringdad ni ngad folwokgad rok.

Angin ni Yib ni Bochan e Ngongol nDag

6. Uw rogon ni lem nge ngongol ko pi labthir e be suguy laniyan’ e pi bitir rorad?

6 Gathi kemus ni thin ni nga nog, ya ngongol fa tin ni yima rin’ e ri ma k’aring e pi bitir ni ngar folwokgad riy. Demtrug ko baadag e pi labthir fa danga’, ma pi fakrad e yad ra folwok rorad e pi bitir rorad ko mang e yad be rin’. Sana ra felfelan’ e pi labthir​—ma yu ngiyal’ ma yad ra gin ngay—nap’an ni kar rung’aged ni tin ni kar rogned faram ma aram rogon e thin ni be yog e pi bitir rorad. Faan manga ngongol rok e pi labthir nge rogon ni yad ma finey ban’en e be dag rogon nib t’uf rorad e tirok Got ban’en, ma rayog ni ngar k’aringed e pi bitir rorad ni ngar rin’ed e tin nib fel’.​—Proverbs 20:7.

7. Miti mang e ngongol ni i dag Jephthah ngak e bitir rok ni ppin, ma mang angin ni yib riy?

7 Rib tamilang ni be weliy e Bible ko mang angin ni yib ko labthir ni ma dag e ngongol nib fel’. I Jephthah, ni ir reb e matam, ma ir e ga’ ko piyu Israel ni i fanay Jehovah u nap’an ni kar gelgad ko piyu Ammon. Thin ni kan yoloy rogon ni ke pi’ e fulweg ngak fare pilung nu Ammon e be dag ni ma beeg Jephthah u gubin ngiyal’ fare chep u murung’agen rogon ni ke ayuweg Jehovah e girdi’ nu Israel. Mom ni ke weliy e re chep nem, me dag e michan’ ku Jehovah nib gel. Mmutrug, ni re ngongol rok nem e ke ayuweg e bitir rok ni ppin ni nge gel iyan e michan’ rok me pag fan ir nge un ko pigpig ku Jehovah u polo’ i yafas rok ma de un ko mabgol. ​—Judges 11:14-27, 34-40; mu taarebnag ko Joshua 1:8.

8. (a) Mang ngongol nib fel’ ni dag e gallabthir rok Samuel ngak? (b) Uw rogon ni ke fel’ rogon Samuel?

8 I Samuel e ir be’ nib llowan u nap’an ni kab bitir ma ir reb e profit ni ke par nib yul’yul’ ku Jehovah i yan nge mada’ ko yam’. Ga baadag ni nge folwok e pi bitir rom ku ngongol rok? Ngam lemnag e tin ni rin’ e gallabthir rok Samuel, ni Elkanah nge Hannah fithingrow. Yug aram rogon ni girdi’en u lan e tabinaw rorad e dawora flontgad, ma gubin ngiyal’ e yad ma yan nga Shiloh ni fan ko liyor, ko gin ni bay fare tabernacle nib thothup riy. (1 Samuel 1:3-8, 21) Ngam lemnag feni yul’yul’ Hannah ko fare meybil ni ta.’ (1 Samuel 1:9-13) Ngam guy feni ga’ fan uwan’row ni ngar rin’ew e tin ni kar michegew ku Got. (1 Samuel 1:22-28) Re ngongol rorow nem e mutrug ni ir e ke ayuweg Samuel ni nge yog ngak e pi ngongol ni ke pi’ gelngin ni nge ulul ko kanawo’ nib mat’aw​— ni yugu demtrug rogon fapi girdi’ u chaaren ni yima yog e pi tapiggpig ku Jehovah ngorad ma yad be dariyfannag e kanawo’ ko tirok Got. Munmun, me pagan’ Jehovah ngak Samuel me mil fan ngak ni nge mang reb e profit rok.​—1 Samuel 2:11, 12; 3:1-21.

9. (a) Mang e n’en ni yima rin’ u lan e tabinaw nib fel’ ni ke ayuweg Timothy? (b) Miti mang girdi’ e ke mang Timothy?

9 Ga baadag ni nge bod fakam Timothy, ni nap’an ni kab pagal me un ku Paul ni apostal? Chitamangin Timothy e gathi reb e kristiano, machane chitiningin nge titaw rok e kar dagew ngak feni ga’ fan e tirok Got ban’en uwan’row. Ma mutrug ni aram e n’en ni ke ayuweg ni ngan toy e def nib fel’ ko par rok Timothy ni ir reb e kristiano. Gad manang ni Eunice, ni ir e chitiningin, nge Lois ni titaw rok e bay e “michan’ rorow . . . nib riyul’.” Par rorow ni yow e Kristiano e gathi ban’en ni de riyul’; riyul’ ni kar dagew e par nib pluw ko michan’ rorow, ma kar filew ngak Timothy ni nge rin’ ni aram rogon. I dag Timothy ni be’ nib mudugil ma riyul’ ni ma lemnag ko uw rogon ni nge mat’awnag yugu boch e girdi’.​—2 Timothy 1:5; Filippi 2:20-22.

10. (a) Mang boch ban’en u wuru’ e tabinaw nrayog ni nge kirebnag laniyan’ e pi bitir rodad? (b) Mang e susun ni ngad rin’ed ni bochan ni ke m’ug e tin nib kireb ko thin ko pi bitir rodad?

10 Gathi urngin ban’en ni ma suruy laniyan’ e pi bitir rodad e bay u lan e tabinaw. Bay boch e bitir u skul ni aram e skul ni yad ma un ngay, pi sensey ni maruwel rorad e ma skulnag e bitir, yad e girdi’ ni be lemnag ni urngin e girdi’ e thingara sapgad ko yalen ko binaw rorad, nge piin nib cheg ko gosgos ni ma liyor e girdi’ ngorad ni bochan, nge girdi’ nib tolang e liw rorad ko am ma kan tay nga shimbung e ngongol rorad nib fel’. Bay bokum million e bitir ni yad be par ko gin ni ma yib e mahl riy nib gel. Gad ra gin faanra ma yib e thin nib kireb u l’ugun’rad ara ke thil dakenrad ni bochan? Ra aram rogon ma mang e thingarda rin’ed? Rayog ni ngan pithig e magawon faanra ran puwan ngak e bitir ara nog boch e thin ngak u fithik’ e damumuw? Yira rin’ ban’en u fithik’ e gurgur, gathi kab fel’ ni ngad fithed gadad ko som’on ni ngad gaargad, “Gathi bay boch ban’en ni dag Jehovah rogon ni ke ayuwegdad ma sana ir e n’en ni rayog ni nge pithig biney e magawon?’​—Mu taarebnag ko Roma 2:4.

11. Nap’an ni ke rin’ e pi labthir e tin nib oloboch, uw rogon ni ra kirebnag e re n’ey laniyan’ e pi bitir rorad?

11 Riyul’, pi labthir ni dawora flontgad e gathi gubin ngiyal’ ni rayog ni ngar pithiged e magawon u tabinaw ko kanawo’ ni bin th’abi fel’. Yad ma oloboch. Faanra ke guy e pi bitir e oloboch rorad, ma ra buchuw e tayfan rorad ngak e gallabthir rorad fa.? Rayog ni nge buch ni aram rogon, faanra yad ma guy rogon ni ngar dariyfannaged e oloboch ni kar rin’ed ma ra yog ngorad u murung’agen e liw rorad u fithik’ damumuw. Machane ri gathi aram e n’en nra buch ni faanra pi labthir era par nib sobut’an’rad ma yad ma yog nib papey ni kar olobochgad. Ra yodor ma rayog ni ngara daged e ngongol nib fel’ ngak e pi bitir rorad, ma rayog ni ngara folwokgad rorad.​—James 4:6.

Mang e Yibe Fil ko Ngongol rodad

12, 13. (a) Mang e n’en ni bat’uf ni nge nang e pi bitir u murung’agen e t’ufeg, ma uw rogon ni ngan fil e ren’ey ngorad me yib angin? (b) Mang fan ni baga’ fan ni nge nang e pi bitir murung’agen e t’ufeg?

12 Bay boor ban’en ni rayog ni ngan fil ngak e bitir nib fel’ rogon ni gathi kemus ni ngan nog ngorad boch e thin ya ba fel’ ni ngan dag ngorad e ngongol nib fel’. Mu lemnag boch ban’en ni baaray.

13 Ngan dag fare t’ufeg ni dariy e lem nib siin u fithik’: Fan fare bugithin ni t’ufeg e aram a n’en ni nge tamilangnag ni ngan nang ko uw feni ga’ fan ni ngan dag e ngongol nib fel’. “Ba t’uf Got rodad nge gird’, ni bochan e [Got] e som’on ni at’ufegdad.” (1 John 4:19) T’ufeg e yib Rok ma ri ir i dag e re n’ey ngak e girdi.’ Re t’ufeg ne, ni a·gaʹpe, e kan yoloy u lan e Bible ni ke pag 100 yay. Aram reb e pow ni yira nang ko mini’ e tin riyul’ e kristiano. (John 13:35) Re t’ufeg ney e thingarni dag ngak Got nge Jesus Kristus ku arrogon e girdi’ ni bat’uf ni ngara t’ufeged yad​—musko girdi’ ni dubdad dakenrad. (Matthew 5:44, 45; 1 John 5:3) Re t’ufeg ney e susun ni bay u lan e gum’ercha’dad ma bat’uf ni ngongol rodad e be micheg e re n’ey ma fin ni fil ngak e pi bitir rodad me yib angin. Ngongol e ka baga’ laman ko thin. U lan e tabinaw, bat’uf ni nge guy e pi bitir me thamiy e t’ufeg nge yugu boch e ngongol nib m’ag ko re n’ey, ni bod e runguy. Faanra dariy e pin’en ney, ma ra sasagaal ni nge ilal nge tafinay rok, nge lem rok, nge rogon ni be thamiy ban’en. Maku bat’uf rorad ni ngar guyed ni riyul’ ni bay e t’ufeg nge runguy ko piin nib kristiano u wuru’ e tabinaw.​—Roma 12:10; 1 Peter 3:8.

14. (a) Uw rogon ni ngan fil ngak e pi bitir rogon ni ngar fal’eged ban’en me yib e felfelan’ riy? (b) Uw rogon ni ngan rin’ e re n’ey u lan e tabinaw?

14 Ngan fil rogon ni ngan maruweliy ban’en: Maruwel e ir e bin th’abi ga’ fan ko yafas. Bat’uf ni nge nang be’ rogon ni nge rin’ ban’en nib fel’, ma fini thamiy ni bay fan e yafas rok. (Ecclesiastes 2:24; 2 Thessalonians 3:10) Faanra kan tay chilen ko bitir ni nge ngongliy ban’en ma dan nog rogon nib tamilang ngak ko mang e susun ni nge rin’ min puwan ngak ya gathi rib fel’ e n’en ni ke rin’, ma ra mom’aw’ ni nge nang rogon ni nge ngongliy ban’en nib fel’ rogon. Machane faanra pi labthir nge pi fakrad e yad ma maruwel u taabang ma ngar rogned e magar ngorad ko ngiyal’ ni kar rin’ed e tin fel’, ma aram e kara filed rogon ni ngara ngongliyed ban’en ni bay e felfelan’ riy. Faanra be dag e pi labthir rogon ni ngan rin’ ban’en maku ra weliy fan ban’en, ma ra fil e pi bitir ni gathi kemus rogon ni ngan mu’nag e maruwel ya ku ra nang rogon ni ngar pithiged boch e magawon, ra nang rogon ni ngara yul’yul’gad ko maruwel rorad, nge rogon ni ngara weliyed fan ban’en nge rogon ni ngar turguyed ban’en. Rani yodor ma rayog ni ngan ayuwegrad ni ngeb nga laniyan’rad ni ku ma un Jehovah ko maruwel, ma ba fel’ e maruwel ni ma tay, e Jesus e ma folwok rok e Chitamangin. (Genesis 1:31; Proverbs 8:27-31; John 5:17) Faanra reb e tabinaw ni ma fal’eg e milay’ ara ma un ko fol chuway, ma boch e girdi’en e tabinaw e ma maruwel u taabang. Ara sana rayog ni nge fil e chitiningin ngak e bitir rok ni pumoon ara bitir rok ni ppin rogon ni ngan lum nge klinnag ban’en tomren e abich. Reb e matam ni maruwel rok e ba palog ko tabinaw rok e rayog ni nge lemnag boch e maruwel ni ir nge pi bitir rok e ngar maruweliyed u taabang. Rriyul’ ni tin nib fel’ e aram rogon ni nge lemnag e pi labthir ni gathi kemus rogon ni ngan mu’nag e maruwel rorad machane rogon ni nge mon’og e pi bitir u nap’an e yafas!

15. Mang boch e kanawo’ nrayog ni ngan fil e michan’ ngak be’? Ngam dag rogon.

15 Yibe ayuweg nra par nib gel e michan’ u nap’an ni yib a skeng: Ku michan’ e aram e n’en ni baga’ fan ko yafas rodad. Rani weliy e michan’ u lan e tabinaw, ma ra nang e pi bitir rogon ni ngar weliyed e re n’en ney. Maku rayog ni ngar nanged e n’en ni n’igin ni nge gel iyan e michan’ rorad u lan gum’ercha’rad. Machane faan mang yad ra guy e gallabthir rorad ni be par nib ba gel e michan’ rorad u nap’an ni yib ngorad e skeng nib gel, me yib angin riy ngorad ndariy n’umngin nap’an. Fa cha’ nu Panama ni ma un ko fol Bible e ke yog e pumoon rok ngak nra tuluf ko tabinaw rorow nfaanra dabi tal ko pigpig ku Jehovah. Machane, cha’ nem nge fa aningeg e bitir rok, e yad ma yan u but’ gubin ngiyal’ u 10 e mayel ngemu’ me yad un ko bus ni 20 miles ma rayog ni ngar tawgad nga Kingdom Hall nib chuchugur boch. U daken e n’en ni rin’, ma aram sagonapan 20 e girdi’ u tabinaw rok e kar chichiiyed pa’rad ko tin riyul’.

Yibe Dag Rogon ni Ngan Bieg e Bible Gubin e Rran

16. Mang fan ni kan nog ni urngin e girdi’ u tabinaw e bat’uf ni ngar bieged e Bible u gubin e rran?

16 Reb e yalen nrib fel’ ni demtrug e tabinaw ma rayog ni nge yarmiy e re n’ey​—aram e yaram ni pi labthir e rayog ni nge fel’ rogorad riy ma pi bitir rorad e rayog ni ngara folwokgad rorad e aram​—rani bieg e Bible u gubin ngiyal’. Faan mang rayog, mu bieg boch e thin nu Bible u gubin e rran. Dariy fan ni ngan bieg e thin nu Bible ni boor. Rani bieg e Bible u gubin ngiyal’ nge rogon e kanawo’ ni yibe bieg ma aram e n’en nri ba ga’ fan. Faanra piin ni bitir, ma rayog ni ngara motoyilgad ko audiocassettes ko Babyor Rog ko Chep nu Bible nfaanra ba’ ko thin rom ni ngan uneg ko bieg e Bible. Rani bieg e thin rok Got u gubin ngiyal’ ma rayog ni nge ayuwegdad ni nge par e lem rok Got nib m’on. Ma faanra gathi ra reb e ma bieg e Bible ya urngin e girdi’ e yad ma bieg u taabang, ma re n’ey e rayog ni nge ayuwegrad ni yad gubin e ngar ranod ko kanawo’en Jehovah. Fare drama ni Families​—Make Daily Bible Reading Your Way of Life! ko fare Convention ni kenggin riy e “Gods Way of Life” e ke pi’ athamgil nga laniyan’ e girdi’ ni ngan rin’ e re n’ey​—Psalm 1:1-3.

17. Uw rogon ni yira beeg e Bible u tabinaw min athamgil nge mit boch e thin riy nga lolugey me ayuwegey ni ngan fol ko fare fonow ni bay ko Efesus 6:4?

17 Un bieg e Bible u lan e tabinaw ni yad gubin e bpuluw ko thin rok apostal Paul nib thothup ni ke yoloy ni fan ko piin nib kristiano u Ephesus, i gaar: “Pi matam, dab um k’aringed e damumuw ngak pi fakmed, machane nguum ululgad ngam llowan’nagrad nrogon e lem-ni be yal’uweg Jehovah.” (Efesus 6:4) Mang fan e biney? “Lem-ni be yal’uweg” e ba sor fan ko “ngan tay nga lanin’uy”; ere piin ni kristiano ni matam e kan pi’ e athamgil nga lanin’rad ni ngar ted e lem rok Jehovah nga laniyan’ e pi bitir rorad​—ni ngar ayuweged e pi bitir ni ngar nanged e lem rok Got. Rani ayuweg e pi bitir ni nge mit e thin nu Bible uwan’rad ma ra ayuweg ni ngeb angin ngorad. Ban’en ni yibe nameg riy e aram nge yib e lem rok Jehovah ni nge pow’iy e lem ko pi bitir ma aram lem nge ngongol rorad era puluw ko kanawo’en Got ni yug demtrug ko bay fa demoy e gallabthir rorad u toobrad. Fare Bible e ir e def ko re lem nem.​—Deuteronomy 6:6, 7.

18. Nap’an ni yibe beeg fare Bible, mang e n’en nib t’uf ni fan ni ngan (a) nang fan ban’en nib tamilang? (b) fel’ rogoy ko boch e fonow ni kan beeg? (c) fol ko n’en ni be dag murung’agen e tin nib m’agan’ Got ngay? (d) ra ngan fel’ rogoy ko mang ni be weliy murung’agen e lem nge n’en ni i rin’ boch e girdi’?

18 Mmutrug, ni fare Bible e rayog ni nge ayuwegdad, nfaanra ke tamilang uwan’dad ko mang e be yog. Boor e girdi’, ni ba t’uf rorad ni ngar bieged boch i yang ni boor yay. Ra nge ri tamilang uwan’dad boch e thin, ma bat’uf ni ngad bieged boch e jibiki ara Insight on the Scriptures. Faan mang boch e thin ni kan bieg e be weliy murung’agen e fonow ara reb e motochiyel, mu tay e tayim ni ngam weliy murung’agen boch ban’en ni be buch ko ngiyal’ n’ey ni be dag ni bpuluw e re ney. Ngemu’ ma rayog ni ngam fith e deer, ‘Uw rogon ni ngeb angin ngodad nfaanra ngad folgad ko re fonow n’ey?’ (Isaiah 48:17, 18) Faanra fare thin nu Bible ni kan beeg e be weliy murung’agen boch ban’en ni bang ko tin ni m’agan’ Got ngay, mu fith, ‘Uw rogon nib l’ag e par rodad ko re n’ey?’ Susun gimed be beeg fare chep u murung’agen e lem nge tin ni ke rin’ boch e girdi’. Mang e magawon ko par ni kara uned ngay fram? Uw rogon ni kar pithiged e pi magawon nem? Uw rogon ni ngeb angin ngodad ko n’en ni kar rin’ed? Gubin ngiyal’ ma ngam ted e tayim ni ngam weliyed ko uw rogon nib l’ag fare chep ko par rodad e chiney.​—Roma 15:4; 1 Korinth 10:11.

19. Gad ra folwok rok Got, ma gad be pi e mang ngak e pi bitir rodad?

19 Aram reb e kanawo’ nib fel’ nrayog ni ngan nang e lem rok Got ngan tay nga laniyan’rad nge gum’ercha’dad. Rani yodor ma ra ayuwegdad nrayog ni ngada “folwokgad rok Got, ni gadad pifak.” (Efesus 5:1) Ma rayog ni ngada daged boch e ngongol nib fel’ nrib manigil ni nge folwok e pi bitir rodad riy.

Ka Ga Manang?

◻ Uw rogon ni ke fel’ rogon e pi labthir ko n’en ni dag Jehovah’s?

◻ Mang fan ni thingarni uneg e labthir e ngongol nib fel ko labthir ko thin ni yad ma yog?

◻ Mang boch ban’en nrib fel’ ni kan dag u daken e ngongol nib fel’ ko pi labthir?

◻ Rani beeg e Bible u tabinaw ma uw rogon ni ri ra fel’ rogodad riy?

[Sasing ko page 20]

Ke felfelan’ boor e girdi’ ni ngar bieged e Bible u tabinaw ni yad urngin u gubin e rran

    Yapese Publications (1984-2025)
    Mu Log Out
    Mu Log In
    • Waab
    • Mu Sharenag
    • Pi N'en Nrayog ni Ngam Mel'eg
    • Copyright © 2025 Watch Tower Bible and Tract Society of Pennsylvania
    • Rogon ni Ngan Fanay
    • Privacy Policy
    • Privacy Settings
    • JW.ORG
    • Mu Log In
    Mu Sharenag