Pi Gallabthir Mu Pied E Tin Nib T’uf Rok E Tabinaw Romed

“Faanra dabi ayuweg be’ e girdi’ rok, ni ba ga’ ni girdien e tabinaw rok, . . . ma aram e ke n’ag rogon nib mich Got u wan’.”​—1 TIMOTHY 5:8.

1, 2. (a) Mang fan ni rayog ni nge pi’ e athamgil nga lanin’uy ni ngan guy e pi tabinaw ni yad ma un ko muulung u taabang? (b) Mang boch e magawon ni ma mada’nag e pi tabinaw ni bochan e ngar tawgad ko muulung ni dab ra sowathgad?

RAM CHANGAR ngak girdien e ulung u m’on ni tabab reb e muulung, ma ga ra guy e pi bitir nib klin mab fel’ e munmad rorad ni yad be par u chaaren e gallabthir rorad. Gur, gathi bay e felfelan’ riy ni ga ra guy e t’ufeg ni bay ko pi tabinaw ney​—ni aram e t’ufeg ni fan ku Jehovah nge fan ngorad ni bagayad nge bagayad. Machane, mom ni ngan pagtalin gelngin e athamgil ni yima tay me yog ni nge un reb e tabinaw ko muulung nib puluw ko tayim ni kan ta’.

² Baga’ ni, pi gallabthir e rib boor pa’ u puluwrad ni polo’ e rran, ma pi nep’ ni bay e muulung, e ra yoor boch e maruwel rorad. Ngan fal’eg rogon e ggan, e ku reb e maruwel ni ngan rin’, nge skul ko bitir ni ngan rin’ u tabinaw nge m’ay. Pi gallabthir e bay e maruwel rorad nrib gel, ni ngar guyed rogon ni urngin e girdi’ u tabinaw e ba klin, ma kar abichgad, ma kar fal’eged rogorad nge dab ra sowathgad. Riyul’, ni ma buch boch e magawon ni dan lemnag ko bitir ko ngiyal’ ni susun e dabi buch. Ani nganni’ e ke gucthiy e jubong rok u nap’an ni be fafel. Ani th’abi bitir e ke puog e ggan rok nga but’. Me tabab e bitir ko maluagthin. (Proverbs 22:15) Mang wenegan nra yib? Yugu aram rogon ni gallabthir e kar yarmiyed nib fel’ rogon urngin ban’en ma rayog ni ngar sowathgad. Machane, baga’ nrayog ni yad ma taw nga Kingdom Hall ara tafen e muulung rorad u m’on ni nge tabab e muulung. Ri be pi’ e athamgil nga lanin’uy ni ngan guy e piin bitir ni gubin e wik nge gubin e duw ni yad be ilal iyan ni yad be ulul ko pigpig ku Jehovah!

3. Uw rogon ni ngad nanged ni rib ga’ fan u wan’ Jehovah e pi tabinaw?

³ Yugu aram rogon ni yu ngiyal’ ma maruwel rom ni gur reb e gallabthir e ba mo’maw’, mab gel e maruwel riy, ma rayog ni nge pagan’um ni baga’ fan u wan’ Jehovah e maruwel ni kam tay. Jehovah e ir tabolngin e yaram ko tabinaw. Arfan ni Thin rok e be yog ni urngin e tabinaw e kar sumgad nbochan “fithingan” ni Jehovah. (Efesus 3:14, 15) Ere nap’an ni gimed e pi gallabthir e gimed be athamgil ni ngam lebuguyed e maruwel romed u tabinaw nrogon, ma aram e gimed be pining e sorok ngak e Somol ni ir e Th’abi Tolang u palpalthib. (1 Korinth 10:31) Gur, gathi ba taw’ath aram nib ga’? Ere, ba puluw ni ngada lemnaged e maruwel ni ke pi’ Jehovah ngak e pi gallabthir. U lan e re article ney, e ngad lemnaged e re maruwel ney nib peth ko ngan pi’ e tin nib t’uf ko tabinaw. Ngada sulod nga daken dalip ban’en ni be lemnag Got ni nge pi’ e gallabthir ko tabinaw rorad.

Ngan Pi’ e Tin nib T’uf ko Dowef Rorad

4. U lan e tabinaw, ma mang yaram e ke rin’ Jehovah ni fan ni ngan pi’ e tin nib t’uf ko pi bitir?

⁴ I yoloy Paul ni apostal ni gaar: “Ma faanra dabi ayuweg be’ e girdi’ rok, ni ba ga’ ni girdien e tabinaw rok, ma aram e ke n’ag rogon nib mich Got u wan’, ma kab gel e kireb rok ngak be’ ndawori mich Got u wan’.” (1 Timothy 5:8) U nap’an ni weliy Paul murung’agen “be’” u roy, ma mini’ e bay u wan’? Be lemnag e en lolugen e tabinaw, ni baga’ ni fare matam. Maku ke pi’ Got ngak fare pin e maruwel ni yima ta’ fan ni aram e taayuw ko pumoon rok. (Genesis 2:18) Piin ni ppin u Bible e baga’ ni yad ma ayuweg e pumoon rorad ni ngar pied e tin nib t’uf ko tabinaw rorad. (Proverbs 31:13, 14, 16) Ngiyal’ ney, ma pi tabinaw ni ani be ayuwegrad e dariy e ani mabgol rok e ke yoor.a Boor e piin ni dariy e mabgol rorad ni yad be pi’ e tin nib t’uf ko tabinaw rorad nrib fel’ rogon. Riyul’ ni, rib fel’ ni reb e tabinaw ma bay e matam nge matin riy, ni fare matam e be pow’iyrad.

5, 6. (a) Mang boch e magawon ni be mada’nag e piin ni yad be guy rogon ni ngar pied e tin nib t’uf ko dowef rok e girdi’ rorad? (b) Nguun par ni uw rogon e lem ni nguun ta’ ko maruwel ndariy rogon ko tirok Got ma ra ayuweg e gallabthir ni Kristiano ni ngar k’adedan’rad ko maruwel rorad?

⁵ Bin 1 Timothy 5:8, mang e tin ni ngan pi’ ko tabinaw ni bay u wan’ Paul? Thin ni bay u tooben e re verse ney e ri be weliy murung’agen e tin nib t’uf ko dowef rok girdien e tabinaw. U lan e fayleng e ngiyal’ ney, e bay boor e magawon ni rayog ni nge mada’nag lolugen e tabinaw ni fan e nge pi’ e tin nib t’uf rorad ni aram rogon. Magawon ko salpiy e ke yoor ko re fayleng ney, maku ke yoor e girdi’ ni kan taleg ko maruwel rorad, ma ke yoor e girdi’ ndariy e maruwel rorad, ma ke tolang puluwon urngin ban’en. Mang e rayog ni nge ayuweg e gallabthir me yog ni ngar k’adan’gad ko pi magawon ney?

⁶ Gallabthir e thingari dabi pagtalin ni be lebuguy e maruwel ni Jehovah e ke pi’. Thin rok Paul ni kan thagthagnag e be dag ni be’ ni bay rogon ni nge fol ko re motochiyel ney machane ke dabuy ni nge rin’ e ba taareb rogon ngak be’ ni “ke n’ag rogon nib mich Got u wan’.” Reb e Kristiano e nge rin’ e tin th’abi rayog rok ni fan ni nge dabi sap Got ngak ni aram rogon. Machane bay e kireban’ riy, ya boor e girdi’ u fayleng e ngiyal’ n’ey e “dab kur runguyed e girdi’.” (2 Timothy 3:1, 3) Tin riyul’ riy, e kaygi yoor e piin chitamangiy ni kar pilo’gad ko maruwel rorad, ma kar paged e tabinaw rorad ni ngar magawongad. Piin figirngiy ni Kristiano e darur gelan’gad ni aram rogon, ni ngar lemnaged ni ngan pi’ e tin nib t’uf ko tabinaw rorad e de ga’ fan. Gathi yad bod e piin ni yad nga maruwel, ya piin gallabthir ni Kristiano e yad ma tay ni musko maruwel nrib sobut’ e yima ta’ fan ma baga’ fan, ma ban’en ni ra felfelan’nag Jehovah Got, ya ra ayuwegrad ni ngar pied e tin nib t’uf rok e girdi’ nib t’uf rorad.

7. Mang fan nib puluw ni piin gallabthir e ngar fal’eged i lemnag e tin ni ke rin’ Jesus?

⁷ Ma piin ni lolugen e tabinaw e ku rayog ni ngar pirieged ni ra ayuwegrad ni yad ra fal’eg i lemnag e tin i rin’ Jesus nrib fel’. Dab mu pagtalin ni bay e yiiy u Bible ni be weliy murung’agen Jesus ni ir e “Chitamangiy ni manemus.” (Isaiah 9:6, 7) Jesus ni “bin tomur e Adam” e ke yan nga lon “bin som’mon e girdi’ ni Adam” ni chitamangin e girdi’ ni be maruweliy e michan’ rorad. (1 Korinth 15:45) Jesus e ba chitamangiy nrib fel’ de taareb rogon ngak Adam ni ke mang be’ nib siin. Be yog e Bible murung’agen ni gaar: “Baaray tapgin ma kad nanged fan e t’ufeg: Kristus e ke pi’ e pogofan rok ni fan ngodad.” (1 John 3:16) Arrogon, ke m’agan’ Jesus ngay ni nge pi’ e yafas rok ni fan ko yugu boch e girdi’. Machane, ku ma tay e tin nib t’uf rok boch e girdi’ nib m’on ko tin nib t’uf rok ni ki mada’ ko tin nib achichig ban’en. Gimed e piin gallabthir e thingar mu folwokgad ko re lem nem ni yima pagfay.

8, 9. (a) Mang e rayog ni nge fil e gallabthir rok e pi arche’ u rogon ni yad ma duruiy e pi bitir rorad? (b) Uw rogon ma boor e gallabthir ni Kristiano ni ri yad ma pag farad?

⁸ Piin gallabthir e rayog ni ngar filed boor ban’en u murung’agen e t’ufeg ndariy e siin riy u fithik’ e thin ni yog Jesus ngak e girdi’ rok Got nib siin ni gaar: “Nge gaman e in yay ni kug guy rogon ni nggu kunuy urngin e girdi’ rom, ni bod ba alabal ni chugumiy pi fak nga tan pon, machane da mpageg nggu rin’.” (Matthew 23:37) I weliy Jesus u roy nib tamilang murung’agen ba alabal ni be tay e pi bitir rok u tan pon. Riyul’, ni pi gallabthir e rayog ni ngar filed boor ban’en u rogon ni ma ayuweg e arche’ e pi bitir rok, ni ma tay ir nga thatharen e riya’ ni fan ni nge yororiyrad. Tin ni ma rin’ e arche’ ni bay e bitir rok ni gubin ngiyal’, e ku rib fel’ ni ngan guy. Yad ma changeg ni gubin ngiyal’ ni fan ni ngar gayed e ggan. Yugu aram rogon ni ke chuchugur ni nge m’ay gelngirad, ma yad ma tay e ggan nga l’ugunrad, mi yad ful’ ma ku yad ning boch. Boor ko tin ke sunmiy Jehovah e “yad ba llowan’” u rogon ni yad ma gay e tin nib t’uf rorad nge tin nib t’uf ko pi bitir rorad.​—Proverbs 30:24.

⁹ Taareb rogon ko pi gallabthir ni Kristiano u ga’ngin yang u fayleng ni ri yad ma pag farad. M’agan’um ngay ni ngam un ko gafgow ko bin ni ngeb e gafgow ngak e pi bitir rom. Maku, m’agan’um ngay ni ngam un ko gafgow ma rayog ni ngam pi’ ban’en ngak girdien e tabinaw rom. Boor i gimed ni ma od ni kakadbul ni ngam uned ko maruwel nib gel ma ma chachalbamed ngay. Gimed ma un ko maruwel ya nge yog ni ngam pied e ggan nib fel’ ngak girdien e tabinaw. Gimed ma maruwel nib gel me mudugil ni bay e mad nib klin ni fan ko pi bitir romed, nge naun nib fel’, nge skul nib gaman. Ma gubin e rran nge gubin e duw ni ga ma rin’ ni aram rogon. Ba mudugil ni n’en ni ga ma rin’ ni ga ma pagfam ma ga ma k’adan’ e be felfelan’nag Jehovah! (Hebrews 13:16) Yugu aram rogon ma riyul’ ni ga manang ni bay boch e kanawo’ ni rib ga’ fan ni ngam pi’ ban’en ngak e tabinaw rom.

Ngan Ayuweg e Tabinaw ni Nge Fel’ Thilrad Got

10, 11. Mang e tin th’abi ga’ fan nib t’uf ko girdi’, ma mang e som’mon ni thingari rin’ e pi gallabthir ni Kristiano ni bochan ni ngar pied ngak e pi bitir rorad e re n’en ney nib t’uf rorad?

¹⁰ N’en ni kab ga’ fan ko ngan pi’ e ggan nib riyul’ e ngan fil e tin riyul’ ngak girdien e tabinaw. I yog Jesus ni gaar: “Girdi’ e dabiyog ni yigoo flowa e ra i kay mi i par nib fos, machane urngin bug e thin ni be yog Got e ir e ra i tay e girdi’ nib fos ndabi yim’.” (Matthew 4:4; 5:3) Gimed e gallabthir mang e rayog ni ngam rin’ed ngam ayuweg e tabinaw romed nge fel’ thilrad Got?

¹¹ U lan e re article ney, ma sana dariy yugu reb e thin nu Bible ni gubin ngiyal’ ni yima fanay ni bod rogon Deuteronomy 6:5-7. Mu pithig e Bible rom ma ngam bieg e pi verse ney. Ga ra guy u roy ni piin gallabthir e ka nog ngorad ni som’mon e ngar gelnaged e michan’ rorad, ma ngar gelnaged e t’ufeg rorad ku Jehovah mar tayed e thin rok nga gum’ircharad. Arrogon, ba t’uf ni ngam fil e thin rok Got nib fel’ rogon, ya nguun bieg e Bible ni gubin ngiyal’ ma nguun fal’eg i lemnag fan ni ngari tamilang e thin riy u wan’uy ni nge yog ni manang fan me t’uf rom e pi kanawoen Jehovah, nge pi kenggin e motochiyel, nge pi motochiyel. Angin ni ra yib, e ra sug gum’irchaem ko thin riyul’ u Bible nrib fel’ ni ra felfelan’nagem, ma ra gelnag e ta’ fan nge t’ufeg rom ni fan ku Jehovah. Ra yoor e tin nib fel’ ni rayog ni ngam fil ngak e pi bitir rom.​—Luke 6:45.

12. Uw rogon ni nge folwok e pi gallabthir ko tin ni rin’ Jesus ni ngar filed e tin riyul’ u Bible ngak e pi bitir rorad?

¹² Pi gallabthir nib fel’ thilrad Got e ke bung rogorad ni ngar folgad ko fonow ni bay ko Deuteronomy 6:7, ni ngar “filed” e thin rok Jehovah ngak e pi bitir rorad u gubin ngiyal’. Ngan “fil” ban’en e be yip’ fan ni ngan tamilangnag ban’en ni nguun sul nga daken ni boor yay. Ri manang Jehovah ni gadad gubin​—ni rib baga’ ni piin ni bitir—​e ba t’uf ni ngaun fil ban’en ngorad ni ngaun sul u daken me mit ngorad. Arfan ni, nap’an e machib ni i tay Jesus ma i sul nga daken e n’en ni ke weliy. Ni bod u nap’an ni be fil ngak pi gachalpen ni ngar sobut’an’gad ma dab ra ufgad maku dab ra tagenginggad, ma ke pirieg boor e kanawo’ u rogon ni nge fil ngorad e re n’em. I weliy fan boch ban’en ngorad, me fanay boch e fanathin, miki dag yaan. (Matthew 18:1-4; 20:25-27; John 13:12-15) Machane, n’en ni yira ngat ngay e de mulan’. Taareb rogon ko pi gallabthir nib t’uf ni ngar gayed boch e kanawo’ ni ngar filed kenggin e tin riyul’ ngak e pi bitir rorad. Ngar sulod nga daken e kenggin e motochiyel rok Jehovah u fithik’ e gum’an’ nge mada’ ko ngiyal’ ni kar nanged fan mar folgad riy.

13, 14. Mang e yu ngiyal’ ni pi gallabthir e rayog ni ngar filed e thin riyul’ u Bible ngak e pi bitir rorad ni yad be fanay e thin ko pi babyor rodad?

¹³ U nap’an e fol Bible u tabinaw e ireray ngal’an nib fel’ ni ngan fanay e pi n’en nem. Tin riyul’ riy, e fol Bible u tabinaw ni gubin ngiyal’ e ireray e def ko michan’ u reb e tabinaw. Pi tabinaw ko Kristiano u ga’ngin e fayleng e yad ma felfelan’ ko re fol Bible ney, ma yad ma fanay e pi babyor ni be yan u rogon e tin nib t’uf ko pi bitir rorad. Fare babyor ni Learn From the Great Teacher e ke mang ba taw’ath nrib ga’, maku arrogon fare babyor ni Questions Young People Ask​—Answers That Work.b Machane, gathi kemus ni ngal’an e fol Bible u tabinaw e rayog ni ngan fil ban’en ngak e pi bitir riy.

¹⁴ Rogon ni dag ko Deuteronomy 6:7, e boor ngal’an ni gimed e gallabthir e rayog ni ngam weliyed e tirok Got ban’en ngak pi fak romed. Demtrug ko nap’an ni gimed be milekag u taabang, ara gimed be rin’ ban’en u taabang, ara gimed be toffan u taabang, e rayog ni ngam pirieged e tayim ni ngam filed ngak pi fakmed e tirok Got ban’en nib t’uf rorad. Tin riyul’ riy, e de t’uf ni ngam “weliy” ngak e pi bitir rom murung’agen e thin riyul’ u Bible ni gubin ngiyal’. Ya, ngam guy rogon ni numon u tabinaw e nge gelnag e tabinaw ko tirok Got ban’en. Ni bod ni, fare babyor rodad ni Awake! e bay boor e article riy nib thilthil. Pi article ney, e rayog ni nge ayuweg ni ngan tababnag e sabethin u murung’agen e gamanman ni ke sunmiy Jehovah, nge pi binaw u fayleng nib fel’ yaan, nge yalen e girdi’ nge kanawoen e yafas rorad nib thilthil. Sabethin ni aram rogon e rayog ni k’aring e piin ni fel’ yangaren ni ngar bieged boch e babyor ni fare tapigpig nib yul’yul’ mab gonop e ke pi’.​—Matthew 24:45-47.

15. Uw rogon ma pi gallabthir e rayog ni ngar ayuweged e pi bitir rorad ngar lemnaged nib fel’ ma ba’ angin ni ngan machib?

¹⁵ Ngam weliyed ngak e pi bitir romed ban’en ni nge ayuweg e michan’ rorad e ku rayog ni ngam ayuwegrad riy u reb e kanawo’ ko tirok Got. Pi bitir ni Kristiano e ba t’uf ni ngar nanged rogon ni ngar weliyed e michan’ rorad ngak boch e girdi’. Riyul’ ni nap’an ni gimed be weliy murung’agen boch thin nib fel’ u lan fare The Watchtower ara Awake! ma rayog ni ngam gay e tayim ni ngam dag rogon ni ngan fanay e pi n’em ko machib. Ni bod ni, rayog ni ngam fith ni gaar: “Gur, gathi rib fel’ nfaanra ku ra yoor e girdi’ ni ngar nanged murung’agen Jehovah? Uw rogon u wan’um mang e ngan rin’ ma rayog ni ngada pirieged e girdi’ ni baadag e re machib ney?” Sabethin ni aram rogon e rayog ni nge ayuweg e piin ni fel’ yangaren ni ngar adaged ni ngar weliyed ngak boch e girdi’ e tin kar filed. Ngemu’, ma nap’an ni ra un pi fakam ngom ko machib, ma rayog ni ngar guyed rogon ni ga be weliy fare n’em ngak e girdi’. Maku rayog ni ngar guyed ni ngan machib e reb e maruwel ni kub manigil ma ra k’aring e felfelan’ nib gel.​—Acts 20:35.

16. Mang e rayog ni nge fil e pi bitir ni yad be motoyil ko meybil ko gallabthir rorad?

¹⁶ Pi gallabthir e ku ma pi’ e tin nib t’uf rok e pi bitir rorad ko tirok Got u nap’an ni yad be meybil. I fil Jesus ngak pi gachalpen u rogon ni ngan meybil, ma kar meybilgad u taabang ni boor yay. (Luke 11:1-13) Ngam mu lemnag ko uw feni yoor e n’en ni kar filed ni kar uned ngak Fak Jehovah ko meybil! Maku arrogon, ni pi bitir romed e rayog ni ngar filed boor ban’en ko meybil romed. Reb riy, e rayog ni ngar filed ni baadag Jehovah ni ngad nonad ngak ni yib u gum’irchadad, ma ngada chugurgad ngak nga dogned ngak e magawon rodad. Arrogon, meybil romed e ra ayuweg pi fakmed ni ngara filed e thin riyul’ nib ga’ fan: Rayog ni nge fel’ thilrad e Chitamangirad nu tharmiy.​—1 Peter 5:7.

Ngan Pi’ e Ayuw Nga Rogon e Lem

17, 18. (a) Uw rogon ni dag e Bible feni ga’ fan ni ngan dag e t’ufeg ngak e pi bitir? (b) Uw rogon ni nge folwok e piin chitamangiy rok Jehovah u rogon ni ngar daged e t’ufeg rorad ngak e pi bitir rorad?

¹⁷ Riyul’ ni, piin ni bitir e ku bay e tin nib t’uf ko lem rorad nib ga’ fan. Thin rok Got e be yog ko pi gallabthir ko uw feni ga’ fan ni ngan ayuweg e pi bitir rorad ko lem rorad. Reb riy, e piin ni ppin ni rugod e kan fonownagrad ni ngar “t’ufeged pi fakrad.” Re n’ey e bay rogon ko pi matin ni rugod ni yibe puguran ngorad ni ngar ngongolgad nrogon, ara ngar yal’uweged “lanin’rad.” (Titus 2:4) Tin riyul’ riy, e ngan t’ufeg e bitir e rib fel’. Re n’ey e ra skulnag e bitir u rogon ni nge dag e t’ufeg ma ra fel’ rogon riy ni n’umngin nap’an e yafas rok. Machane, ra dab ni dag e t’ufeg ngak e bitir mab kireb. Ra amithnag lanin’uy ma ireray e pow ni de yog rok e gallabthir ni ngar folwokgad rok Jehovah, ni ir e dag e t’ufeg nib gel ngodad nyugu aram rogon ni daworda flontgad.​—Psalms 103:8-14.

¹⁸ Jehovah e ir e ke dag e t’ufeg ngak e pi bitir rok u fayleng. Be yog 1 John 4:19 ni gaar ni, “Got e som’mon ni at’ufegdad.” Ri gimed e pi matam e thingar mu folwokgad ko tin ni rin’ Jehovah, ngam mu ayuweged ni ngari fel’ e tha’ u thilmed e pi fakmed. Bible e ri be fonownag e piin chitamangiy ni dab ra k’aringed e damumuw ngak e pi bitir rorad, “ya ri mulan’rad.” (Kolose 3:21) Ri ma k’aring e damumuw ni nge lemnag e pi bitir ni gallabthir rorad e dariy e t’ufeg rorad ara dariy farad u wan’rad. Pi chitamangiy ni be maruwaran’rad ni nga rogned e t’ufeg rorad e thingar dab ra paged talin e tin ni rin’ Jehovah. I non Jehovah u tharmiy nge dag ni ke fel’ u wan’ e n’en ni ke rin’ Fak nib t’uf rok. (Matthew 3:17; 17:5) Dabisiy ni kari pi’ e re n’em e athamgil nga laniyan’ Jesus! Maku arrogon e pi bitir, ni rayog ni nge gelnagrad ma ra pi’ e athamgil nga lanin’rad e thin rok e gallabthir rorad ni be yog ni yad ba t’uf rorad ma kar fel’gad u wan’rad.

19. Mang fan ni gallabthir ni Kristiano e baga’ fan ni nge yal’uweg e bitir rok, ma mang e n’en ni nge athamgil ni nge par nib thabthabel riy?

¹⁹ Riyul’ ni, t’ufeg rok e gallabthir ni fan ko bitir rorad e gathi kemus nu daken e thin rorad. Ri yima dag e t’ufeg ko ngongol. Ngar pied e tin nib t’uf ko dowef rorad nge thin rok Got e ra micheg e t’ufeg rorad ngorad, ni baga’ ni ngar daged ni t’ufeg e k’aringrad. Maku, nge yal’uweg e gallabthir e pi bitir rok e be micheg ni rib t’uf pi fak rok. Tin riyul’ riy, e “Somol e ma gechignag e en nib t’uf rok.” (Hebrews 12:6) Machane, ra dabi yal’uweg e gallabthir e bitir rorad ma be micheg ni be fanenikay! (Proverbs 13:24) Jehovah e ma par nib thabthabel ni gubin ngiyal’, ma ma yal’uwegey “nib fel’ rogon.” (Jeremiah 46:28, NW) Gathi gubin ngiyal’ nib mom ni nge rin’ e gallabthir ni de flont e re n’ey. Machane, ri bay fan ni ngam athamgil ni ngam rin’ e re n’em. Nge dag e gallabthir e lem nib mudugil nge t’ufeg u nap’an ni be yal’uweg e bitir rok e ra ayuweg e bitir ni nge ilal ni ba felfelan’, nge par u ba yafas ni ba’ angin. (Proverbs 22:6) Gur, gathi ireray e n’en ni baadag urngin e gallabthir ni Kristiano ni nge buch rok fakrad.

20. Uw rogon ni gallabthir e ngar ayuweged ngar binged e kanawo’ ngak e pi bitir rorad ni ngar “mel’eged e yafas”?

²⁰ Gimed e pi gallabthir faan gimed ra rin’ e maruwel nib ga’ fan ni ke pi’ Jehovah ngomed​—ni aram e ngam pied ngak e pi bitir romed e tin nib t’uf ko dowef rorad, nge michan’ rorad, nge lem rorad​—ma baga’ e taw’ath riy. Faan manga kam rin’ ni aram rogon ma ga ra ayuweg e bitir rom ni nge mel’eg e “yafas” ma tomur riy e ra par nib “fas.” (Deuteronomy 30:19) Pi bitir nem ni kar mel’eged ni ngar pipgiggad ku Jehovah ma ngaur pared ko fare kanawoen e yafas ni yad be ilal iyan e ra pi’ e felfelan’ ngak e gallabthir rorad nrib gel. (Psalms 127:3-5) Felfelan’ ni aram rogon e ra par ni manemus! Machane, uw rogon ma rayog rok e piin nib fel’ yangaren ni ngar pininged e sorok ngak Jehovah e ngiyal’ n’ey? Bin migid e article e ra weliy e re kenggin nem.

[Footnotes]

Uw Rogon ni Ngam Pi’ e Fulweg?

Mang e rayog ni nge rin’ e gallabthir ni fan ni ngar pied e tin nib t’uf ko pi bitir rorad

• ni fan ko dowef rorad?

• ni fan ko michan’ rorad?

• ni fan ko lem rorad?

[Picture on page 18]

Boor e arche’ ni yad ma maruwel nib elmerin’ ni fan ni ngar duruiyed e pi bitir rorad

[Picture on page 20]

Pi gallabthir e thingara ayuweged michan’ rorad ni som’mon

[Pictures on page 20, 21]

Piin gallabthir e rayog ni nga ra pirieged e tayim ni boor ni ngar filed ngak pi fakrad murung’agen faen Ta Sunmiy

[Picture on page 22]

Piin bitir e ma yib gelngirad ko thin nib fel’ ni ma yog e gallabthir rorad ni be dag ni yad ba fel’ u wan’rad