Kan Yuluy E Athap, Kan K’aring E T’ufeg

“Ma ra par e michan’, nge athap, nge t’ufeg, dalip ban’en; machane fare n’en ni bin th’abi ga’ ko pin’en ney e aram e t’ufeg.”​—1 CORINTHIANS 13:13, New World Translation.

1. Ke ginangdad Paul ni apostal u murung’agen e mang?

PAUL ni apostal e ke ginangdad ni, ke taabrogonag ko reb e barkow, ni michan’ rodad e rayog ni nge pil. Be weliy rogon ni ngan “ayuweg e michan’ nge nangan’, ya boch e girdi’ e ma dariyfannag e pi n’ey ma e kan kireb e michan’ rorad.” (1 Timothy 1:19) U lan fa bin som’on e chibog C.E., ma fapi barkow ni yibe fanay ko ngiyal’ nem e kan chamiy ko palang. Rogon ni nge par nib n’uw nap’an ma ba gel e ma taga’ nga daken rogon feni gel fare palang nge rogon ni kan chamiy e re nem ngay u fithik’ e salap.

2. Mang fan ni thingarni toy fare barkow ko michan’ rodad nib fel’ rogon, ma mang e bat’uf ni ngan rin’ ngay?

² N’en ni yima yog fare barkow ngay ni aram e michan’ ko girdi’ e thingari par ni be pes u daken maday ni aram e girdi’ ni bod ni ke yib e yoko’ ngay nib gel. (Isaiah 57:20; Revelation 17:15) Arfan ni bat’uf ni ngan chamiy e re ney nib fel’ rogon mab gel, ma be yan rogon e maruwel rodad. Nap’an ni ke gel e kireb ko fare “day” ni piyu Jew nge piyu Roma ngak e piin ni Kristiano kakrom, ma ke yoloy Jude ni gaar: “Gimed e piin nib t’uf rog, rogon ni ngam ubunged gimed ko michan’ romed ni bin th’abi thothup, e ngam meybilgad ku Got nrogon ni be un ngomed fare kan ni thothup, mu pired ni gimed ba t’uf rok Got, ma gimed be sonnag Jesus Kristus ni Somol rodad ni nge pi’ e yafas ni manemus ngomed ni bochan e be runguymed.” (Jude 20, 21) Bochan ni ke weliy Jude murung’agen e cham ni fan ko ‘fare michan’ ni kan pi’ ngak e piin nib thothup,’ fare bugithin ni “michan’ ni bin th’abi thothup” e susun e be yip fan e machib ni ma tay e piin ni Kristiano ni polo,’ nib muun ngay e thin nib fel’ u murung’agen rogon ni ngan thap ngak Got. (Jude 3) Kristus e ir e def ko re michan’ nem. Bat’uf e michan’ nib gel ma aram rogon ma rayog ni ngad chichiiyed pa’dad ko michan’ nib riyul’.

Ngan K’adan’ ko ngiyal’ ni Ke Yib e Yoko’ ni Aram e “Marus ko Yu Ulung e Girdi’”

3. Uw rogon ni be fanay yugu boch e girdi’ e “ma rus ko reb e ulung”?

³ Boch e duw ni ke yan faram, ma boor ban’en ni ke buch ni ri ma k’aring e marus ni bod ni boch e girdi e kar lied yad, nge girdi’ ni kan li’rad, nge boch e girdi’ ni ma cham nge yugu boch e girdi’ nib muun ngay boch e ulung ni dan nang ko yad mini’. Gad manang, ni boor e girdi’, nib muun ngay ni girdi’ nib tolang e liw rorad ko am mab yul’yul’ ko maruwel rorad, ni yad be lemnag ko uw rogon ni ngar ayuweged e girdi’ ni der ma un ko re ngongol ney, ni bod e piin ni bitir, ko uw rogon ni ngar paloggad ko pi ulung nem nib kireb. “Fare got ko re m’ag ney,” e dariy e maruwar riy ni ir e ke gagiyegnag ni nge buch e pi n’em ni kaygi kireb, ma aram e n’en ni ke n’igin e girdi’ ni yad be rus ko pi ulung nib kireb nem, ma ma fanayrad Satan ni fan e nge kirebnag girdien Jehovah. (2 Corinthians 4:4; Revelation 12:12) Boch e girdi’ e ma rin’ ban’en nib m’ag ko re magawon ne’y ni fan ni nge togopuluw yugu boch e girdi’ ko maruwel rodad. Bay boch e nam, ni kara k’aringed boch e girdi’ ni ngar uned ngorad ni fan ni ngar ayuweged e girdi’ ni dabi kirebnagrad “fapi ulung ni bay e riya’ riy” machane kar olobochgad ya kar rogned ni yad e Pi Mich Rok Jehovah ma aram kar wereged boch e thin ni de riyul’ nib togopuluw ko maruwel rodad. Arfan ni mom’aw ko boch e walagdad ni ngar uned ko machib u mit e tabinaw ko boch e nam u Europe ma boch e girdi’ ni ma un ko fol Bible e kar talgad nbochan. Ma aram fan ni boch e walagdad u rom e ke mulan’rad.

4. Mang fan ni thingari dabi mulan’dad ko togopuluw ni ma yib ngodad?

⁴ Machane, dabda paged ni nge mulan’dad, ya togopuluw e susun ra gelnag e michan’ rodad ni gad bang ko ulung ni kan nog e tin riyul’ e Kristiano ngorad. (Matthew 5:11, 12) Piin ni Kristiano kakrom e kan wereg boch e thin nib togopuluw ngorad ni kan nog ni yad e piin ni ma k’aring e girdi’ ni ngar togopuluwgad ko am, ma “ma yog e girdi’ boch e thin nib togopuluw ngorad” u gubin yang. (Acts 24:5; 28:22) Machane ke pi’ Peter ni apostal e athamgil nga laniyan’ e pi walag, mi yoloy ni gaar: “Pi tafager rog ni gimed ba t’uf rog, dab mu gingad ko gafgow ni yibe tay ngomed ni ba skeng ngomed, ni gowa ban’en ni kam gingad ngay. Machane, ngam felfelan’gad ni gimed be un ko gafgow ni i tay Kristus, nge yog ni ngar mu felfelan’gad ko ngiyal’ ni bay yib i m’ug ni be galgal ramaen.” (1 Peter 4:12, 13) Ma taabrogon ko, fa en ni ir bang ko governing body ko fa bin som’on e chibog e i yoloy ni gaar: “Pi walageg, Mu lemnaged gimed nib fel’ waathmed ko ngiyal’ nra yib urngin mit e skeng riy ngomed, ya gimed manang ni faanra gelnagmed e michan’ romed ko pi skeng nem, ma wenegan nra yib ngomed e aram e ke yog romed ni nguum k’adedan’med. Machane ngam guyed rogon ngam k’adedan’med nge mada’ ko tomur ndab mmulgad, nge yog ni mmarod mu pired ni kam yal’uwgad, ni aram e ke yan i mus nga rogomed ndakuriy ban’en nda mu gamangad riy.” (James 1:2-4) Taabrogon ko reb e barkow ni nifeng nib gel e ir era skengnag gelngin, nifeng nib gel ni aram e togopuluw ni ma yib ngodad era skengnag nge m’ug ko ba uw e gin nib war ko fare barkow ni aram e michan’ rodad.

Gafgow e Ra Yibnag e Kadan’uy

5. Uw rogon ni nge mudugilanin’dad nra par nib gel e michan’ rodad u nap’an ni ma yib e gafgow?

⁵ Piin ni Kristiano e rayog ni ngar nanged ko riyul’ ni ba mudugil lanin’rad nge uw feni gel e michan’ rorad ni kemus u tomren ni kar mada’naged e nifeng nib gel ni aram e gafgow ni ke yib ngorad ma de mulan’rad. Rayog ni ngan nog ni kadan’ e “ra mu’nag e maruwel rok” u maday ni ke yib e nifeng nib gel ngay nfaanra par “ni polo’ i lanin’dad ma ra fel’ urngin ban’en riy, nge dariy ban’en ni de gaman, nib muun ngay e michan’ nib gel. I yoloy Paul: “Ko urngin ban’en ni gamad be rin’ ma gamad be dag ni gamad e pi tapigpig rok Got, ya gamad be k’adan’ ko gafgow ni yibe tay ngomad ni boor, nge gafgow u ban’en, nge mom’maw’ ni gamad be pirieg nge boch ban’en ni be magawonagmad.”​—2 Corinthians 6:4, NW.

6. Mang fan ni thingarda pared nib “felfelan’ u nap’an ni ma yib e gafgow,” ma uw rogon ni be gelnag e athap rodad e re n’ey?

⁶ Fare nifeng ni rib gel ni aram e gafgow ni ma yib ngodad yu ngiyal’ e be pi’ e kanawo’ nrogon ni ngada daged ni fare barkow ni aram e michan’ rodad e ba fel’ mab gel. I yoloy Paul ngak e piin ni Kristiano u Roma: “Ngad felfelan’gad u nap’an ni ke yib e gafgow ngodad, ya gad manang ni pi n’ey e ma yognag e k’adan’ ngodad; ma k’adan’ e ma fal’egdad uwan’ Got; ma fel’ uwan’ ni gadad ma tay e ma yognag e l’agan’ ngodad, re l’agan’ ney ni e dabi m’ing lanin’dad riy.” (Romans 5:3-5) Ngan k’adan’ u nap’an ni ra yib e skeng ma gad ra fel’ uwan’ Jehovah. Ma ra gelnag e re n’ey e athap rodad.

Mang Fan ni Ke Pil e Barkow ni Be Yip Fan e Michan’ rok Yugu Boch e Girdi’

7. (a) Rogon ni yog Paul, mang e ke buch ku yugu boch e girdi’ ni bod ni ke pil e barkow ko michan’ rodad? (b) Uw rogon ni ke  pilo’ yugu boch e girdi’ ko tin riyul’?

⁷ Nap’an ni be ginang Paul e girdi’ ma be weliy murung’agen e barkow ni “ke pil,” ma be lemnag e piin ni kara “dariyfannaged” e nangan’ rorad nib fel’ ma ke mul e michan’ rorad. (1 Timothy 1:19) Ma boch i yad e aram Hymenaeus nge Alexander ma kar mangew be’ nib apostasy, kar pilo’gow ko tin riyul’ ma yow ma yog e thin ni de puluw. (1 Timothy 1:20, footnote; 2 Timothy 2:17, 18) Chiney, piin ni apostate, ni yad e piin ni kar digeyed e tin riyul’, e yad ma yog e thin nib gel mab togopuluw ko “fare tapigpig nib yul’yul mab gonop,” ni bod ni yad be k’ad farba’ i pa’ ni i duruw’iyrad ngay faram ko ggan nib spiritual. Ma boch e girdi’ e taabrogon ko fare “tapigig nib kireb,” me yog boch e thin ni gaar, “Ke sagaal ni nge yib e masta rog.” (Matthew 24:44-49; 2 Timothy 4:14, 15) De mich uwan’rad ni ke chuchugur e tomur ko re m’ag ney nib kireb ma yad be moningnag e piin ni kan nog e pi sib ngorad ma piin ni ma tiyan’ ko tayim rodad ya yad ma pi’ e athamgil nga laniyan’ girdi’en Jehovah ni ngar pared nib pasig ko pigpig ngak. (Isaiah 1:3) Pi apostate nem e kara “kirebnaged e michan’ ku yugu boch e girdi’,” ni bod e barkow ni ke pil.​—2 Timothy 2:18.

8. Mang e ke k’aring ke bilig ara ke ligilnag fare barkow ko michan’ rorad?

⁸ Boch e girdi’ ni kar ognaged yad e ke pil e barkow rorad ni aram e michan’ rorad nbochan’ ni kar dariyfannaged e nangan’ rorad mar uned ko fayleng ni ri yad ma tiyan’ ko fafel nge ngongol ni darngal. (2 Peter 2:20-22) Ma yugu boch e girdi’ e ke ligil e barkow ko michan’ rorad ya yad be lemnag ni fare gompek ko m’ag ni biech e gowa ka ba palog ma dabiyog ni ngan guy. Bochan ndabiyog ni ngar sumarnaged rogon ni ke lebug boch e thin ni kan yiiynag, ma aram kar paged talin e “rran rok Jehovah”, ma kar paged e tin riyul e liyor. (2 Peter 3:10-13; 1 Peter 1:9) Dabi n’uw nap’an mar pirieged yad ni kar sulod nga fithik’ e lumor ko ran ni ba arar, ma ba wagey ni aram e ran ko re m’ag ney e chiney nib kireb. (Isaiah 17:12, 13; 57:20) Boch e girdi’ ni kar talgad i chag ko ulung ko tin riyul’ e Kristiano e ka yad be lemnag ni ire ray e bin riyul’ e tilew. Machane, ba tamilang ni dakuriy e gum’an’ nge k’adan’ u fithik’rad ni aram e n’en nib t’uf rorad ma aram rogon rayog ni ngar sonnaged ngeb fa bin nib biech e fayleng ni ke micheg Jehovah. Yad be lemnag ni ke sagaal ni nge yib e Yafas u Paradis e ma dabi gaman rorad.

9. Mang e be rin’ yugu boch e Kristiano ni kar ognaged yad, ma ra pow’iydad e re ney ni ngad lemnaged e mang?

⁹ Bay boch e piin ni Kristiano u yu yang u fayleng ni kar ognaged yad ni gowa kara bachiyed e lay ko barkow rorad ko michan’ rorad. Ka be pes fare barkow u maday, ma dakir yan nga m’on ere bat’uf ni nge athamgil ni nge par nib gel e michan’ rok, machane kar mel’eged ni nga uranod nib sagaal. Bochan ni kar filed u murung’agen e athap ko girdi’ ni “dabki n’uw nap’an ma ra yib e Paradis,” ma boch e aram kar athamgiliyed ni ngar rin’ed ban’en ni nge yog ngorad e re n’ey​—yad ba pasig ni ngar uned ko machib ma yad ma un ko urngin e muulung u gubin ngiyal’ ni bod e pi assembly, nge convention. Ma bochan ni yad be lemnag e chiney ni pi n’en ni yad be athapeg e dawori chuchugur ni nge riyul’ nrogon ni yad be tafinaynag faram, ma kara sobut’naged fare puluwon ni yad ba adag ni ngar pied. Rayog ni ngan nang e re n’ey ya ke buchuw e tayim ni yad ma tay, derur ma uned ko muulung u gubin ngiyal’, ma derur ma feked e part rorad u nap’an e pi assembly nge pi convention. Ma boch e girdi’ e yad ma fanay e tayim rorad ni fan ko fafel nge rogon ni nge yoor e chugum rorad. Pi n’en ney e ra ayuwegdad ngad lemnaged ko mang e n’en ni susun ni nge k’aringdad ma aram rogon ni ngad fanayed e yafas rodad nib puluw rogon ni kad ognaged gadad ku Jehovah. Susun ni gad ra par nib pasig ko pigpig ngak ni kemus ni bochan fare athap rodad ko “Paradis ni be chuchugur i yib fa”?

Athap e Kan Taarebnag ko Yuluy

10, 11. Ke taarebnag Paul e athap rodad ko mang, ma mang fan nib puluw e re n’ey?

¹⁰ I weliy Paul u murung’agen Jehovah ni ir e ke micheg ni ngeb e pi taw’ath u daken Abraham. Ma aram ke weliy fare apostal ni gaar: “I Got . . . e ke yib ma ke micheg ban’en, ni aram rogon, u daken l’agruw ban’en ni dabkun thiliyeg [thin rok nge tin ni ke micheg] ni Got e ri der ma ban, ma gadad e kada milgad nga bang ni yima ayuwegey riy e susun ni ngad pared nib gel ni ngad chichiiyed pa’dad ko fare athap ni kan tay nga p’eowchedad. Fare athap ni bay rodad ni aram e yuluy ni fan ko fare yaal, ni l’agruw ni ba mudugil mab gel.” (Hebrews 6:17-19; Genesis 22:16-18) Fare athap ni kan tay nga p’owchen fapi Kristiano ni kan dugliyrad ni aram e yafas ndariy n’umngin nap’an u tharmiy. Chiney, ma boor ko pi tapigpig rok Jehovah e bay e athap rorad ni nge yog ngorad e yafas ni manemus u Paradis u fayleng. (Luke 23:43) Ra dariy e athap ni aram rogon, ma dabiyog ni nge yog ngak be’ e michan’.

¹¹ Fare yuluy e ir e n’en nib gel ma ma ayuwegey, ma ri baga’ fan nrayog ni nge par fare barkow ma dab man’ nga bayang. Dariy e sala ni nge chuw u gompek nfaanra dariy e yuluy rok. Bochan ni boor yay ni ke pil e barkow ni ke un Paul ngay, ma manang ni yafas ko girdi’ ni bay riy e ma tor nga daken e yuluy. (Acts 27:29, 39, 40; 2 Corinthians 11:25) Nap’an fa bin som’on e chibog, ma dariy e masin ko barkow aram fan ni mo’maw’ ko captain ni nge rin’ ban’en ni baadag. Ngiyal’ nem immoy e barkow ni fan ko mahl ni yima fanay e yap riy nge yan, ma yugu boch e barkow e ma taga’ nga daken e nifeng ni nge mithmitheg. Faanra ke guy ni barkow rok e be sor nga bang ni bay boor e malang riy, ma n’en ni rayog ni nge rin’ fare captain e kemus ni nge pag e yuluy nga but’ ma ra sonnag ni nge chuw fare yoko’, ya ke mudugil laniyan’ ni fare yuluy ni kan pag nga but’ e ra par mab muyluy fare barkow nge par. Arfan ni ke taarebnag Paul e athap ko pi Kristiano ko “reb e yuluy ko fare yaal, nib mudugil ma ba gel.” (Hebrews 6:19) Faanra be gafgownagdad e yoko’ ni aram e togopuluw fa ke yib ngodad yugu boch e skeng, ma athap rodad ni ba fel’ e taabrogon ko reb e yuluy ni ir e be gelnagdad ni gadad e pi yaal nib fas, ma aram rogon fare barkow ko michan’ rodad ni dabi sor nga bang nib sop’ling ni aram be par ni be maruwaran’dad fa bang ni boor e malang riy ni aram e apostasy.​—Hebrews 2:1; Jude 8-13.

12. Uw rogon ni ngada ayuweged gadad ni dabda paloggad ku Jehovah?

¹² Ke ginang Paul e pi Kristiano ni Hebrew: “Pi walag, mu ayuwgad’, ya ra danga’ ma ra par be’ u fithik’med nib kireb e gum’ercha’en ma ke war e michan’ rok nbochan ni ke par nib palog ko fare Got nib fas.” (Hebrews 3:12) U lan fare text ni Greek ma fare bugithin ni “ngan palog” e be sor fan ko “ngan par nib palog,” ni aram, ngan pag e tin riyul’. Machane rayog ni ngad siyeged ni dabi kireb e michan’ rodad ni bod e barkow ni ke pil. Michan’ nge athap era pi’ gelngidad nrayog ni ngad pared nib yul’yul’ ku Jehovah ni yugu demtrug ni ke yib e skeng nib gel ni bod e yoko’. (Deuteronomy 4:4; 30:19, 20) Michan’ rodad e dabi bod e barkow ni be un ko nifeng ni aram e machib ko piin ni apostate. (Ephesians 4:13, 14) Ma bochan e athap rodad ni bod e yuluy ni be ayuwegdad, ma rayog ni ngad k’adan’dad ko yoko’ ni ma yib ngodad ni gadad e pi tapigpig rok Jehovah.

Kan k’aring ko T’ufeg nge Kan ni Thothup

13, 14. (a) Mang fan ni fare yuluy ni aram e athap rodad e de gaman ni goo ir? (b) Mang e n’en ni bay gelngin riy ni be k’aringey ko pigpig nib thothup ko Jehovah, ma mang fan?

¹³ Fa en ni Kristiano e dabi yog ni nge taw ko m’ag ni biech nfaanra kemus ni be pigpig ku Jehovah e chiney ni bochan e athap rok ni nge par ndariy n’umngin nap’an u paradis u fayleng. Sana be par ni be chaariy e athap rok ya ir e ma pi’ gelngin ko par rok ni bod e yuluy, machane bat’uf ni nge uneg ko athap nge michan’ rok e gelngin e t’ufeg. Ke weliy Paul e re ney u nap’an ni ke yoloy ni gaar: “Ka be par ni bay e michan’, nge athap, nge t’ufeg’, aram dalip ban’en, machane t’ufeg e ir e n’en ni ri baga’ fan.”​—1 Corinthians 13:13.

¹⁴ T’ufeg rodad ku Jehovah ni yib u gum’ercha’dad e ir era pi’ gelngidad ma aram rogon rayog ni ngada pigpiggad ngak, ya ir e ke dag e t’ufeg rok ngodad nib riyul’. I yoloy John ni apostal: “Fa en ndariy e t’ufeg rok u lan e gum’ercha’en e dawori nang murung’agen Got, ya Got e t’ufeg. Kan dag e t’ufeg rok Got ngodad nbochan, ya ke l’og Got fak ni maagirag rok nga fayleng ma aram rogon rayog ni nge yog ngorad e yafas ni manemus u daken. Ma gadad, e ke t’uf Got rodad, ya ir e ke dag e t’ufeg rok ngodad ko tabolngin.” (1 John 4:8, 9, 19) Bochan ni gad be felfelan’ ko mang e i rin’ Jehovah, ma aram fare n’en ni thingarda lemnaged e gathi u murung’agen rogon ni ngad thapgad ngak Got, machane ngada lemnaged ko uw rogon ni ngada tedfan fithingan nib thothup nge rogon ni ngada pininged e sorok ngak ni Ir e bin th’abi tolang.

15. Uw rogon nib m’ag e t’ufeg rodad ku Jehovah ko fare magawon ni sum u murung’agen e liw rok?

¹⁵ Baadag Jehovah ni ngada pigpiggad ngak nbochan ni bat’uf rodad, gathi kemus nbochan e Paradis. Fare encyclopedia ko Bible ni Insight on the Scripturesa fithingan e be gaar: “Kari felfelan’ Jehovah ya liw rok ni ir e th’abi tolang nge fare ayuw ni yima tay ni fan ko pin’en ni ke sunmiy e t’ufeg kenggin. Kemus ni piin bat’uf e liw rok nib tolang rorad e baadag ni bochan e ngongol rok nib fel’ ma ba mat’aw. (1Co 2:9) Kara mel’eged ni ngar pared u tan e gagiyeg rok ko bin ni ngar pared rorad​—aram rogon ya ke tamilang uwan’rad murung’agen e t’ufeg rok nib, ba yal’uw, ma ba gonop, ma yad manang ni pi n’ey e ka ba fel’ ko pin’en ni bay rorad. (Ps 84:10, 11)”​—Volume 2, page 275.

16. Uw rogon ma t’ufeg rodad ku Jesus e bay gelngin ni be gagiyegnag e yafas rodad?

¹⁶ Bochan ni gadad e piin ni Kristiano, ere ku gad ma dag e t’ufeg rodad ku Jesus nbochan e t’ufeg ni ke dag ngodad. Ke weliy Paul ni gaar: “Fare t’ufeg ni bay rok Kristus e ke k’aringmad, ya aram e n’en ni kug dugliyed, ni taabe’ e ke yim’ ni fan ko urngin e girdi’; ere, yad urngin ma kar m’ad; ma ke yim’ ni fan ko urngin e girdi’ ma aram piin ni yad ba fas e nge dabku ur ngongolgad ni yad be yan nga tabon lanin’rad, machane ngar ngongolgad ni yad be yan ngan’ faanem ni ir e ke yim’ ni fan ngorad ma kan faseg ko yam’ ni fan ngorad.” (2 Corinthians 5:14, 15) I Kristus e ir e taare def ni yafas rodad, nga michan’ rodad, nge athap rodad e kan toy nga daken. T’ufeg rodad ku Jesus Kristus e be gelnag e athap rodad ma be ayuweg ni nge par nib mudugil e michan’ rodad, ko ngiyal’ ni ke yib e skeng ngay ni bod e yoko’.​—1 Corinthians 3:11; Colossians 1:23; 2:6, 7.

17. Mang e gelngin ni ma pi’ Jehovah ngodad, ma uw feni ga’ fan e re n’ey nrogon ni yog e Bible ko Acts 1:8 nge Ephesians 3:16?

¹⁷ T’ufeg rodad ku Got nge fak e aram e n’en ni be pi’ gelngidad ko par rodad ni gad e piin ni Kristiano, maku ma pi’ Jehovah ngodad yugu reb e ban’en ni ir e ku ma k’aringdad, ma ma pasignagan’dad, ma ma pi’ gelngidad ni ngad mon’oggad iyan ko pigpig ngak. Ire ram gelngin, ara kan ni thothup rok. Fare bugithin ni Hebrew nge Greek ni kan piliyeg ko thin nu Meriken ni “spirit” e be sor fan ko n’en nib gel ni be par u lan e lang, ni taabrogon ko nifeng. Fapi barkow ni kan nog barkow nlay ngay ntaabrogon ko boch e barkow ni ke un Paul ngay e ma tor nga daken gelngin e nifeng ma rayog ni ngar tawgad ko gin ngaranod ngay. Taabrogon, bat’uf rodad e t’ufeg nge ayuw ko gelngin Got ma aram rogon e barkow ko michan’ rodad ni ra k’aringdad ko pigpig ku Jehovah.​—Acts 1:8; Ephesians 3:16.

Darod nga M’on ko Gin ni Gad Be Nameg!

18. Mang e n’en nra ayuwegdad ni ngada k’adedan’dad ko boch ban’en ni ma yib ngodad nra skengnag e michan’ rodad?

¹⁸ Sana u m’on ni ngad tawgad ko m’ag nib biech ma ke yib e skeng ko Michan’ rodad nge t’ufeg nib gel. Machane ke pi’ Jehovah e yuluy ni “ba mudugil ma ba gel”​—ni aram e athap rodad. (Hebrews 6:19; Romans 15:4, 13) Faanra ke yib e togopuluw ngodad nge yugu boch e skeng, ma rayog ni ngada k’adedan’dad nfaanra ba mudugil e athap rodad ni bod ba barkow ni kan pag e yuluy riy nga but’. Tomren ni ke m’ay reb e yoko’ machane u m’on ni dawori yib yugu reb, ngarda athamgilgad ni nge par nib gel e athap rodad ma ngada gelnaged e michan’ rodad.

19. Uw rogon ni ngad ayuweged fare barkow ko michan’ rodad ni nge par ni be yan ko kanawo’ nib kiy ma rayog ni nge taw nga gompek ko bin ni biech e fayleng?

¹⁹ U m’on ni ke weliy murung’agen fare “yuluy ko yaal,” me yog Paul ni gaar: “Gamad be athapeg ni gimed gubin e ngam daged ni gimed be par nib pasig ko maruwel [“ngan papaynag,” footnote] ma aram ma rayog ni nge par nib mudugilanin’med ko athap romed nge mada’ ko tomur, ma dabmu sagaalgad, machane ngam folwok rok e piin ni ke michan’rad ma yad ba g’uman’ ma aram fan nrayog ngorad e tin ni kan micheg.” (Hebrews 6:11, 12) Kan k’aring e t’ufeg ku Jehovah nge fak nge ayuw ni yib ko kan ni thothup, ere ngada athamgilgad ni nge par fare barkow ko michan’ rodad ni nge yan nib kiy kanawoen nge mada’ ko ngiyal’ ni kad tawgad nga gompek ko bin nib biech e fayleng ni ke micheg Got.

[Footnote]

Ngan Sul nga Daken

◻ Mang e ke ginangdad Paul riy nib m’ag ko michan’ rodad?

◻ Uw rogon ni yugu boch e girdi’ ni ke pil e barkow rorad nib spiritual, ma uw rogon ni be par boch nib sagaal?

◻ Mang boch e ngongol nib fel’ ni susun ni ngan uneg ko michan’ rodad?

◻ Mang e ra ayuwegdad nge yog ni ngada tawgad nga gompek ko bin nib biech e fayleng ni ke micheg Got ngodad?

[Picture on page 16]

Fare barkow ni aram e michan’ e thingarni toy nib fel rogon ma aram rogon rayog ni ngan par nib mudugil u nap’an ni ke yib e magawon ni bod e yoko’

[Picture on page 17]

Michan’ rodad e rayog ni nge pil ni bod e barkow

[Picture on page 18]

Athap rodad e bod e yuluy ko yafas rodad ni gadad e Kristiano