LIBRARY U ONLINE ni fan ko Wulyang ko Damit
Wulyang ko Damit
LIBRARY U ONLINE
Waab
  • BIBLE
  • PI BABYOR
  • PI MUULUNG
  • w00 2/1 pp. 9-14
  • Ngan Nyuweg E Girdi’ Ni Ngar Chuchugurgad Ku Jehovah

Dariy e video ko n'en ni kam mel'eg.

Wenig ngom, dabiyog ni nge load e re video ney.

  • Ngan Nyuweg E Girdi’ Ni Ngar Chuchugurgad Ku Jehovah
  • Fare Wulyang Ntagil’ E Damit Ni Be Weliy Morngaagen Gil’ilungun Jehovah—2000
  • Pi Subheading
  • Boch Ban'en ni Ku Taareb Rogon Ngay
  • Fan ni Gad Ma Un ko Machib
  • N’en ni Ngad Rin’ed ko Maruwel Rok Jehovah
  • Mini’ e Be Ayuweg Jehovah?
  • Pi Chon e Maruwel Rok Got
  • Ngan Ubing e Maruwel ni Nge Par
  • Ngan Ubing e T’ufeg ni Fan Ku Got nge Kristus
  • Rogon ni Ngan Weliy Murung’agen Gil’ilungun Got
    Machib Ko Gil’ilungun—2014
  • Maruwel Rom E Ra I Par Nib Mudugil Ni Dabi Yik’?
    Fare Wulyang Ntagil’ E Damit Ni Be Weliy Morngaagen Gil’ilungun Jehovah—1999
  • “Ngan Chuchugur Ngak Got”
    Fare Wulyang Ntagil’ E Damit Ni Be Weliy Morngaagen Gil’ilungun Jehovah—2003
  • Um Par ni Gab T’uf rok Got
    Mang e Ri Be Fil e Bible?
Kum Guy Boch Ban'en
Fare Wulyang Ntagil’ E Damit Ni Be Weliy Morngaagen Gil’ilungun Jehovah—2000
w00 2/1 pp. 9-14

Ngan Nyuweg E Girdi’ Ni Ngar Chuchugurgad Ku Jehovah

“Dariy be’ nrayog ni nge yan ngak e en ni chitamangiy ya ke mus ni gag e ra yan rog ngak.”​—JOHN 14:6.

1. Mang e ke motochiyelnag Jesus ngak pi gachalpen u tomren ni kan faseg ko yam’, ma bochan ni ke fol e Pi Mich rok Jehovah riy ma mang angin ni yib ngorad?

ITAY Jesus Kristus chilen ngak pi gachalpen ni “ngar pingeged girdien e pi nam ni ngar manged e pi gachalpen, mi yad taufenagrad nga fithingan e Chitamangiy nge Fak nge Fare Kan ni Thothup.” (Matthew 28:19) Ke yan ragag e duw faram, ma ke ayuweg e Pi Mich rok Jehovah e girdi’ ni ke pag dalip e million ni kar chuchugurgad ku Got, e munmun ma kan taufenagrad ni be dag ni kar ognaged yad ni ngara rin’ed e tin nib m’agan’ Got ngay. Uw feni ga’ e felfelan’ riy ngodad nrayog ni ngada ayuweged yad ni ngar chuchugurgad ku Got!​—James 4:8.

2. Yugu demtrug ni boor e girdi’ ni kefin ni un ko taufe, ma mang e ke buch?

2 Machane, boch e nam ni bay boor e pi gachalpen Jesus nib biech riy ni kan taufenagrad e de yoor e math’eg ko girdi’ ni ma un ko machib u rom. Riyul’ ni bat’uf ni ngan sananag ko in e girdi’ ni kar m’ad, gubin e duw e ma yim’ e girdi’ ni 1 percent rorad. Machane, in e duw faram, e immoy boch ban’en ni ke mang tapgin ni kar pied keru’rad. Mang fan? Re article ney nge bin migid e yira yaliy ngan nang ko uw rogon ni ke chuchugur e girdi’ ku Jehovah nge mang fan ni bochi yad e kar pied keru’rad ngak.

Fan ni Gad Ma Un ko Machib

3. (a) Uw rogon ni fare maruwel ni kan pi’ ngak pi gachalpen Jesus e taabrogon ko n’en ni kan pi ko fare engel rogon ni yog ko Revelation 14:6? (b) Mang e kanawo’ ni kan pirieg nib fel’ ma rayog ni nge pug e tafinay rok e girdi’ ko thin u murung’agen Gil’ilungun Got, machane mang e magawon ni ke yib?

3 Ngiyal’ ney ko “tin tomren e rran,” ma pi gachalpen Jesus e bay e maruwel rorad ni ngar wereged e “tamilangan’ nib riyul’” nib m’ag ko “re thin nib fel’ ney ko fare gil’ilungun.” (Daniel 12:4; Matthew 24:14) Maruwel rorad e ba l’ag ko maruwel ko fare engel ni “bay e thin nib fel’ rok ni nge weliy ngak e girdi’ nu fayleng, nge urngin e pi nam nge ganong nge thin nge gubin mit e girdi’.” (Revelation 14:6) Ngiyal’ ney, ni girdi’ e ri yad ma tiyan’rad ko tin nu fayleng, e aram e kanawo’ ni rib fel’ rogon ni ngan pug e tafinay rorad ni ngar adaged Gil’ilungun Got ma ngan ayuwegrad ni ngar chuchugurgad ku Jehovah ma aram ngan nog ngorad murung’agen e athap ko girdi’ ni nge yog ngorad e yafas ni manemus u paradis u fayleng. Gad ma nang e re ney, ni girdi’ ni yad be un ko pi tapigpig rok Jehovah e kemus ni yad baadag ni nga ranod nga Paradis ma gathi rib mudugil ni ayrad e rayog ni nge par ni be yan ko kanawo’ nib wuin’in ni yan ko yafas.​—Matthew 7:13, 14.

4. Rogon ni yog Jesus nge fare engel ni be changeg u lan e lang, mang fan ni gad ma machibnag e thin nib fel’ ngak e girdi’?

4 I gaar Jesus: “Baara’ ira’ e yafas ndariy n’umngin nap’an, ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.” (John 17:3) Fare engel ni be changeg u lan e lang ma be machibnag e “thin nib fel’ ni dariy n’umngin nap’an” e gaar ngak e girdi’ ni be par u fayleng: “Nge yib madgun Got ngomed, mi gimed ta’ fan nga feni sorok, ya ke taw nga nap’an ni nge pufthinnag e girdi’, ere mu siro’gad mi gimed meybil u p’owchen Got ni Ir e sunmiy e tharmiy, nge but’, nge day, nge pi alublub.” (Revelation 14:7) Riyul’ ni gad be machibnag fare thin nib fel’ ni fan ni ngad ayuweged e girdi’ ni ngar chuchugurgad ku Jehovah u daken Jesus Kristus.

N’en ni Ngad Rin’ed ko Maruwel Rok Jehovah

5. Mang e ke yog Paul nge Jesus ni be dag ni gad be maruweliy e maruwel rok Jehovah, ma gathi tirodad e maruwel?

5 Nap’an niy be yoloy Paul e babyor ni fan ngak yugu boch e Kristiano nni duguliyrad, ma be weliy murung’agen “fare machib ni fan ni nge fel’ thilin Got nge Girdi’” ma ke yog ni ke ayuweg Got e girdi’ ni nge fel thilrad u daken e maligach ni pi’ Jesus Kristus. Be yog Paul ni “bod ni be wenig Got u daken dad” ma bochan ni “gad owchen Kristus ma gad be wenignag: ‘Ni ngam paged nge fel’ thilmed Got.’ ” Aram e lem ni ma k’aring e pasig! Ni yugu demtrug ko gad e piin ni kan duguliydad ma “kan l’ogdad ni gad owchen Kristus” ara gad e piin ni bay e athap rodad ni gad ra par u fayleng, dabda paged talin ni gad be maruweliy e maruwel rok Jehovah, ma gathi birodad e maruwel. (2 Korinth 5:18-20) Riyul’ ni Got e ir e be pining e girdi’ ma be fil ngorad ni ngar bad ngak Kristus. I weliy Jesus: “Ndariy be’ nrayog ni nge yib ngog ni faanra gathi en ni chitamangiy e pow’iy nge yib ngog, ni ir e ke l’ugeg ku gub, ma be chugur ngak; ma bay gu faseg ko yam’ ko chirofen ni tomur ko rran. Ke yoloy e pi Prophet, ‘Ma yad ra mang girdi’ ni ra skulnagrad Jehovah.’ Urngin e girdi’ ni kar rung’aged e thin ko en ni Chitamangiy me mit e tin ni ke yog ngorad e bay ra bad ngog.”​—John 6:44, 45.

6. Uw rogon ni ke rurug Jehovah e pi nam ko yay ni som’on, ma ngiyal’ nem, mini’ e ke pirieg e gapas nge pagan’ u lan e “naun” rok ni fan ko liyor?

6 Ngiyal’ ney ko tin tomren e rran, uw rogon ni be pining Jehovah e girdi’ ni nge bing ni fan ngorad fare “mab ko michan’”? (Acts 14:27, footnote; 2 Timothy 3:1) Reb e kanawo’ nib fel’ e aram ke n’igin ni nge machibnag e Pi Mich rok e thin ni nge thap e girdi’ ngak Got riy nge thin ni be pufthinnag e re m’ag nib kireb ney. (Isaiah 43:12; 61:1, 2) Re machib ney ni kan wereg u gubin yang e fayleng e be rurug e pi nam​—reb e pow ko pufthin ni kan dugliy ni ngan thang ban,en e dabki n’uw nap’an ma ra yib. Re ngiyal’ nem, ma girdi’ ni yad “ba t’uf” rok Got e yibe fekrad ngar chuwgad ko re m’ag ney ma kar pirieged ni yad be par nib pagan’rad ko “naun” rok ko tin riyul’ e liyor. Ere Jehovah e ke n’igin ni nge lebug e pi thin ko prophet ni Haggai i yoloy ni: “Bay gu rurug e pi nam ni gubin, ma ra yib urngin ban’en nib fel’ ko urngin e pi nam; ma nggu suguy e re naun ney ko felfelan.”​—Haggai 2:6, 7, footnote; Revelation 7:9, 15.

7. Uw rogon ni be bing Jehovah e gum’ercha’en e girdi’ ma be ayuwegrad ni ngar chuchugurgad ngak nge fak?

7 Jehovah e ke bing gum’ircha’en e pi girdi’ ney ni bay madgun uwan’rad​—“ke mel’egrad u fithik’ urngin e nam”—​ni yad ra “tiyan’rad ko pi n’en ni be weliy” e Pi Mich rok. (Haggai 2:7, Jewish Publication Society; Acts 16:14) Nap’an e bin taareb e chibog, ma yu ngiyal’ e ma fanay Jehovah e pi engel rok ni ngar pow’iyed e Pi Mich rok ni ngar pirieged e girdi’ nib yul’yul’ ni yad be yor ma yad be ning e ayuw rok ni yib nge ngorad. (Acts 8:26-31) Ngiyal’ ney e ke tamilang uwan’ e girdi’ u murung’agen fare n’en ni nrib fel’ ni ke pi’ Got ngorad u daken fak ni Jesus Kristus, ma kar chuchugurgad ku Jehovah nbochan e t’ufeg rok. (1 John 4:9, 10) Arrogon, ma ayuweg Got e girdi’ ni ngar chuchugurgad ngak nge fak u daken e “t’ufeg,” rok ara “t’ufeg nib riyul’.”​—Jeremiah 31:3, footnote.

Mini’ e Be Ayuweg Jehovah?

8. Mit i mang e girdi’ ni be chuchugurnag Jehovah ngak?

8 Ma ayuweg Jehovah e girdi’ ni be gay e ayuw rok ni nge chuchugur ngak nge fak. (Acts 17:27) Ba muun ngay e girdi’ ni “yad be gelgel ko amith ma yad be dolo’loy nbochan e tin nib kireb ni ma rin’” e Christendom, ma riyul’ ni arrogon, u ga’ngin yang e fayleng. (Ezekiel 9:4) Yad be “lemnag rogon ni nge yog ngorad e tin nib t’uf rorad ko tirok Got ban’en.” (Matthew 5:3) Riyul’, yad e piin ni ba “gol [“ba sobut’an’,” footnote] ni bay u fayleng,” ni yad ra par u Paradis u fayleng ni dariy n’umngin nap’an.​—Zephaniah 2:3.

9. Uw rogon ni nge guy Jehovah e girdi’ ni “nib fel’ e yafas ni manemus uwan,” ma uw rogon ni be ayuwegrad?

9 Rayog ni nge guy Jehovah gum’ercha’en e girdi’. Ke yog David ni Pilung ngak Solomon ni fak: “Ma fal’eg Jehovah i yaliy urngin e gum’ercha’, ma manang urngin ban’en ni yibe lemnag. Faanra ngam gay Got, ma ra pag ni ngam pirieg.” (1 Chronicles 28:9) Ma yan ko uw rarogon gum’ercha’en be’ nge lem rok, ara rogon ni ma lemnag ban’en, ma rayog ni nge guy Jehovah ko ra nge adag e n’en ni ke pi’ ni fan ni nge n’ag fan e pi denen nge fare athap ni nge yog ngak e yafas ni manemus u lan e m’ag nib biech nib mat’aw. (2 Peter 3:13) U daken e Thin rok, ni Pi Mich rok e kar machibnaged ma kar filed ngak e girdi’ murung’agen, ma ma ayuwegrad Jehovah ni ngar chuchugurgad ngak nge fak ni ‘urngin e piin nib fel’ uwan’rad e yafas ni manemus,’ nge piin ni ‘ke mich Got uwan’rad.’​—Acts 13:48.

10. Mang e be dag ni Jehovah be chugurnag boch e girdi’ ma yugu boch e danga’ machane da gathi kan turguy e par ko girdi’?

10 Bochan ni ma chuchugurnag Jehovah boch e girdi’ ngak ma yugu boch e danga’ ma biney e be dag ni ba m’ag e re ney ko machib ni kan nog predestination ngay? Ri danga’! Ya ma chuchugurnag Got e girdi’ ngak ni kemus ni be yan u rogon e n’en ni yad be lemnag ni nge yog ngorad. Ma ma tay fan e mat’awrad. Ke tay Jehovah nga p’eowchen e girdi’ e chiney e n’en nrayog ni ngar mel’eged ni taabrogon ko n’en ni ke tay nga p’eowchen piyu Israel ni ke pag 3,000 kakrom, nap’an ni gaar Moses: “Nggu tay nga p’eowchemed e yafas nge tin nib fel’, nge yam’ nge tin nib kireb. . . . Nggu tay e tharmiy nge fayleng ni ngar mangew mich ngomed edaba’, ni kug tay nga p’eowchemed e yafas nge yam’, fare taw’ath nge buch waathan; ma thingar mu mel’eged e yafas ni aram rogon nrayog ni ngam par nib fas, gimed nge piin ni owchemed, ni nge t’uf Jehovah ni Got romed romed, ngam motoyilgad nga laman ma ngam pared nib yul’yul’ ngak; ya ir e yafas romed ma ir era yoornag e rran rom.”​—Deuteronomy 30:15-20.

11. Uw rogon ni nge mel’eg piyu Israel e yafas?

11 Mu lemnag e re ney ni rogon ni nge mel’eg piyu Israel e yafas e susun ni ‘nge t’uf Jehovah rorad, nge ngar motoyilgad nga laman, ma ngar pared nib yul’yul’ ngak.’ Nap’an ni kan weliy e pi thin nem, ma piyu Israel e dawora tawgad ko fare Binaw ni kan Micheg. Ur moyed ko Tagpas u Moab, ni yad be tay talprad ni ngar th’abed fare Lul’ nu Jordan ma nga ranod nga Canaan. Baga’ ni yad baadag ni ngar lemnaged fare binaw nib “yong’ol ma baga’” nge binaw ni “kaygi yoor e milik nge t’ay e ngul riy” ni dabki n’uw napan ma ra yog ngorad e pin’em, machane rogon ni nge riyul’ e n’en ni yad ma tafinaynag e ra yan u rogon nib t’uf Jehovah rorad, nge rogon ni ngar motoyilgad nga laman, nge rogon ni ngar pared nib yul’yul’ ngak. (Exodus 3:8) Ke tamilangnag Moses e re n’ey, ma be gaar: “Faanra mu motoyilgad ko fapi motochiyel rok Jehovah ni Got romed, nge rogon ni gu be motochiyelnag ngomed edaba’, ni nge t’uf Jehovah romed, ni ngam marod u kanawoen ma ngam folgad ko fapi motochiyel rok nge yaram rok nge rogon ni be turguy ban’en, ma aram e gimed ra par nib fas ma ra yoor pifakmed, me Jehovah ni Got romed e ra taw’athnagmed ko fare binaw ni gimed ra yan ngay mi gimed par riy.”​—Deuteronomy 30:16.

12. Mang e be skulnagdad ni bod e n’en ni dag piyu Israel nib m’ag ko maruwel rodad ko machib?

12 Pi n’en nem e gathi be skulnagdad nga ban’en u murung’agen e maruwel rodad ni gad ma machib ma gad ma fil ban’en ngak e girdi’ e ngiyal’ n’ey ko tin tomren e rran? Gad ma lemnag murung’agen fare Paradis ni bay yib ma gad ma weliy ngak e girdi’ u murung’agen nap’an ni gad be un ko machib! Machane gadad nge girdi’ ni ma un ngodad ko fol Bible e dabda pared ni ngada guyed boch ban’en ko ngiyal ni ke riyul’ e n’en ni kan micheg nfaanra gad be pigpig ku Jehovah ni bay e lem nib siin u fithik’dad. Taabrogon ko piyu Israel, ma gadad nge piin ni gad be fil e Bible ngorad e thingari tamilang uwan’dad rogon ni nge ‘t’uf Jehovah rodad, nge rogon ni ngad motoyilgad nga laman, nge rogon ni ngad pared nib yul’yul’ ngak.’ Faan manga gad be lemnag e re ney u nap’an ni gad be machibnag e thin nib fel’, ma riyul ni gad be maruwel rok Got u taabang ni gad be ayuwegrad ni ngar chuchugurgad ngak.

Pi Chon e Maruwel Rok Got

13, 14. (a) Rogon ni yog ko 1 Korinth 3:5-9, ma uw rogon ni gad be maruwel rok Got u taabang? (b) Faanra ke yoor e girdi’ u lan e ulung ma mini’ e ngan nog e sorok ngak, ma mang fan?

13 Ke weliy Paul rogon ni gad be maruwel rok Got u taabang ma aram e ke taarebnag e re maruwel n’ey nga rogon ni ngan fal’eg e milay’. Ke yoloy ni gaar: “Me mini’ Apollos? arrogon, ma mini’ Paul? Ke mus ni gamow e tapigpig rok Got, ni gamow e gu pow’iyew gimed nge mich Kristus uwan’med. I gag e gu yung e awoch me tugul, mi Apollos e i puog e ran ngay, machane Got e be pi’ gelngin be ga’; arfan ni cha’ ni yung nge cha’ ni puog e ran e gathi ri baga’ farow. Yi Got e ir e baga’ fan yi ir e be pi’ gelngin e woldug be ga’. Chiney e fa en ni ke yung boch e awoch nge fa en ni ke puog e ran ngay e taareb rogorow, machane ra be’ ma ran pi’ puluwon nga rogon e maruwel ni i tay. Ya gamow be maruwel rok Got u taabang. Ma gimed e milay’ rok Got.”​—1 Korinth 3:5-9.

14 Bochan ni gad be maruwel Got u taabang, ma thingarda yunged “fare thin ko gil’ilungun” nga gum’ercha’en e girdi’, ma faanra baadag be’ e machib ma ngad puoged boch e ran ngay ni aram ngad fal’eged rogodad nib fel’rogon ma gad sul ngorad ni ngad tababgad i fil Bible ngorad. Faanra ba yong’ol fare but’, ni aram e gum’ercha’en be’, ma ra rin’ Jehovah e maruwel rok ni nge ayuweg nge tugul fare awoch ko tin riyul’ nge mang ba woldug ni ke yib wom’ngin. (Matthew 13:19, 23) Ra ayuweg be’ ni nge par nib chuchugur ngak nge fak. Ere ngan sumarnag, ma ra yoor e pi tamachib ko Gil’ilungun Got nbochan Jehovah ni ma maruwel u gum’ercha’en e girdi’, nge tugul fare awochngin e tin riyul’ ngar pared nib chuchugur ngak nge fak.

Ngan Ubing e Maruwel ni Nge Par

15. Mang e fanathin ni ke fanay Paul ni be dag ko uw rogon ni ngad ayuweged boch e girdi’ ni nge gel’ e michan’ rorad?

15 Gad be felfelan’ ni ke yoor e girdi’, machane ri gad baadag ni ngad guyed e girdi’ nib t’uf Jehovah rok, be motoyil laman, ma be par nib yul’yul’ ngak. Ma ra kireban’dad nfaanra kad guyed boch e girdi’ ko ulung ni ke war e michan’ rorad ma kar pied keru’rad. Bay boch ban’en ni rayog ni ngada rin’ed ni ngad taleged e re ney? Reb e fanathin ni i yog Paul, e be dag ko uw rogon ni ngad ayuweged yugu boch e girdi’ ni ngada ubunged e michan’ rorad. Be yoloy ni gaar: “Dariy be’ nrayog ni nge ngongliy yugu reb e def ya kan ta’ reb, ni aram Jesus Kristus. Ere faanra ke toy be’ reb e def ko gol, ara silver’, ara malang nib tolang puluwon, ara ren, ara pan, ara kenggin e komey, ma ra be’ ma bay ni guy fel’ngin e maruwel rok, ya ra taw ko rran ni ngan chuweg e upong u daken, ma nifiy e bayi sikengnag e maruwel rorad; me m’ug e bin riyul e fel’ngin e maruwel rok.”​—1 Korinth 3:11-13.

16. (a) Uw rogon fagal fanathin ni ke fanay Paul e be fil ban’en nib thil thil rogon? (b) Uw rogon ni maruwel rodad ko dimow naun e ra aw ni dariy fan, ma dabiyog ni nge par nfaanra yik ko nifiy?

16 U fanathin ni weliy Jesus murung’agen e milay’, ni nge ga’ iyan e woldug e ma taga’ nga daken feni fel’ rogon ni yibe yung, ngan puog e ran ngay u gubin ngiyal’, nge rogon ni flaabnag Got. Ma fa binem e fanathin ni weliy e be dag nib mil fan ngak e piin ni tamachib ko mang fel’ngin e dimow naun ni tay. Ke toy e naun ni bay e def riy nib mudugil ya ke fanay e tin nib gel? Ke ginangey Paul: “Ra be’ ma thingari ayuw ko uw rogon ni be toy e naun.” (1 Korinth 3:10, NW) Kan pug e tafinay rok e girdi’ ya kan nog ngak murung’agen fare athap rok ni nge yog ngak e yafas ni manemus u Paradis, ere nap’an ni gad be fil ban’en ngak be’ ma kemus ni gad be tiyan’dad nga boch e tamilangan’ nu Bible ma gad ma weliy ngak ko mang e thingari rin’ ni nge yog e yafas ni manemus ngak? Kemus ni aram rogon e kanawo’ ni ngada filed ban’en ngak be’: Faanra ga baadag ni ngam par ni manemus u Paradis, ma thingarmu un ko fol Bible, ma ngam un ko pi muulung, ma ngam un ko maruwel ni ngan machibnag e thin nib fel’ ngak be’’? Faanra aram rogon, dad ngongliyed e def nib mudugil nge par nib gel e michan’ rok, sana fare naun ni kada toyed e dabiyog ni nge par ko ngiyal’ ni ra yib e nifiy ko skeng ara dabiyog ni nge par nib n’uw nap’an e michan’ rok. Ran guy rogon ni ngan ayuweg be’ ni nge par nib chuchugur ku Jehovah ni kemus u daken fare athap ni nge yog ngak e yafas u Paradis nbochan ke pigpig ngak ko in e duw e bod ni kan toy e naun ko “boch e ren, nge pan, nge kenggin e komey.”

Ngan Ubing e T’ufeg ni Fan Ku Got nge Kristus

17, 18. (a) Mang e n’en ni rib t’uf ko be’ ma aram rogon rayog ni nge par nib mudugil e michan’ rok? (b) Uw rogon ni ngada ayuweged be’ ni nge par Kristus u lan gum’ercha’en?

17 Ra nge par e michan’ nib mudugil, ma bat’uf ni nge fel’ thiliy nge Jehovah u daken Jesus Kristus. Yugu daworda flontgad, ma rayog ni nge fel’ thildad Got ni kemus nu daken fak. (Romans 5:10) Mu lemnag e n’en ni yog Jesus ni gaar: “Dariy be’ nrayog ni nge yan ko en ni Chitamangiy ya kemus ni gag e ra yan rog ngak.” Ran ayuweg yugu boch e girdi’ ni nge gel e michan’ rorad, ya “dariy be’ nrayog ni nge ngongliy yugu reb e def ya kan tay reb, ni aram Jesus Kristus”. Mang e ba l’ag ko re n’ey?​—John 14:6; 1 Korinth 3:11.

18 Ran toy e def nga daken Kristus ma be sor fan ni ngan fil ban’en ngak be’ u rogon ni nge ga’nag e t’ufeg rok ku Jesus u daken e tamilangan’ rok u murung’agen e liw Rok ni ir fare Tabiyul, nge ir e Lolugen e ulung, nge Prist nib tolang nib tarunguyey, ma ir reb e Pilung ni be gagiyeg. (Daniel 7:13, 14; Matthew 20:28; Colossians 1:18-20; Hebrews 4:14-16) Fan e re ney e aram Jesus e ke mang be’ ni ri ba riyul’ uwan’rad ni bod ni be par u lan e gum’ercha’rad. Susun meybil ni gad ra ta’ ni fan ngorad e nge taabrogon ko meybil rok Paul ni fan ko pi Kristiano u Ephesus. Ke yoloy ni gaar: Gu ma ragbug u p’owchen Got ni Chitamangiy, . . . ni fan ni nge pagmed . . . ni nge par Kristus u gum’ercha’med u fithik’ e t’ufeg u daken e michan’ romed; ni aram rogon nge yan lik’ngimed nga fithik’ ma rayog ni ngan taymed nga daken fare def.”​—Ephesians 3:14-17.

19. Mang angin ni ra yib riy ni ngan ubung e t’ufeg ngak Kristus nga gum’erchaen e piin ma un ngodad ko fol Bible, ma mang e n’en ni bat’uf ni ngan fil ngorad?

19 Faanra gad ma ubing e piin ni ma un ngodad ko fol Bible nge ga’ iyan e t’ufeg rorad ku Jesus u lan e gum’ercha’rad, ma aram rogon ni kam ubing e t’ufeg rorad ku Jehovah. T’ufeg ni dag Jesus, rogon ni be thamiy ban’en, ma ke dag ni ir be’ nib runguy ma be dag ni aram rogon e pi fel’ngin Jehovah. (Matthew 11:28-30; Mark 6:30-34; John 15:13, 14; Colossians 1:15; Hebrews 1:3) Ere nap’an ni ke nang e girdi’ murung’agen Jesus ma ke ga’ e t’ufeg rorad ngak, ma rayog ni ngar nanged Jehovah nge ga’ e t’ufeg rorad ngak.a (1 John 4:14, 16, 19) Ba t’uf ni ngad filed ngak e piin ni ma un ko fol Bible ni ke ayuweg Jehovah Jesus ko urngin ban’en ni ke rin’ ni fan ko girdi’ ma arfan ni bat’uf ni ngad pininged e magar Ngak, nge nga dogned e sorok ngak, ma ngada liyorgad ngak ni ir fare “Got nrayog ni ngad thapgad ngak.”​—Psalm 68:19, 20; Isaiah 12:2-5; John 3:16; 5:19.

20. (a) Uw rogon ni ngada ayuweged yad ni ngar pared nib chuchugur ku Got nge fak? (b) Mang e yira weliy ko bin migid e article?

20 Bochan gad be maruwel rok Got u taabang, ngada ayuweged e girdi’ ni ngar pared nib chuchugur ngak nge fak, ngada ayuweged yad nge gel iyan e t’ufeg nge michan’ rorad ku Got u lan gum’ercha’rad. Ma aram rogon ma ra riyul’ Jehovah uwan’rad. (John 7:28) U daken Kristus, e rayog ni nge fel’ thilrad Got riy, ma ra t’uf rorad ma yad ra par nib yul’yul’ ngak. Derma dugliy ko in e tayim ni ngar ted ni fan ko pigpig ku Got u fithik’ e t’ufeg, ya ba mich uwan’rad ni n’en ni ke micheg Jehovah e ra yib i m’ug nib riyul’ ko tayim ni kan dugliy. (Lamentations 3:24-26; Hebrews 11:6) Ngiyal’ ni gad be ayuweg yugu boch e girdi’ ni nge gel’ iyan e michan’ rorad, nge athap, nge t’ufeg, ma thingarda ubunged e michan’ rodad ni nge bod reb e barkow nib gel ma rayog ni nge par u nap’an ni ke yib e yoko’ nib gel. Yira weliy e re ney ko bin migid e article.

[Footnote]

a Reb e ayuw nib fel’ nrayog ni ngam nang u murung’agen Jesus nib fel rogon nge rayog ni ngam nang Jehovah ni Chitamangin u daken, e aram fare babyor ni The Greatest Man Who Ever Lived, ni ke ngongliy fare Watchtower Bible and Tract Society of New York, Inc.

Ngan Sul nga daken

◻ Uw rogon ni gad ma pug e tafinay rok e girdi’ ko thin nib m’ag ko Gil’ilungun Got, machane mang e riya’ riy?

◻ Miti mang e girdi’ ni be ayuwegrad Jehovah ni ngar pared nib chuchugur ngak nge fak?

◻ Rogon nrayog ni nge taw piyu Israel nga lan fare Binaw ni Kan Micheg e ma taga’ nga daken e mang, ma mang e rayog ni ngada filed riy?

◻ Mang e gad ma rin’ ni ngada ayuweged e girdi’ ni ngar pared nib chuchugur ko Jehovah nge fak?

[Picture on page 10]

Yugu demtrug ni gad ma weliy ngak e girdi’ u murung’agen e athap rorad ni aram e yafas ni manemus u Paradis, n’en ni ri baga’ fan ni gad be nameg e aram rayog ngar pared nib chuchugur ku Jehovah

[Pictures on page 13]

Ma ra yib angin ngodad ko maruwel ni gad be sul ko girdi’ ni baadag e machib nfaanra gad ma fal’eg rogon nge fel’ rogon

    Yapese Publications (1984-2025)
    Mu Log Out
    Mu Log In
    • Waab
    • Mu Sharenag
    • Pi N'en Nrayog ni Ngam Mel'eg
    • Copyright © 2025 Watch Tower Bible and Tract Society of Pennsylvania
    • Rogon ni Ngan Fanay
    • Privacy Policy
    • Privacy Settings
    • JW.ORG
    • Mu Log In
    Mu Sharenag