Ngan Taleg fare Gafgow ko Dw Taabrogoy
Fa En Tasunmiy era ayuweg ni nge taabrogon e girdi’ rogon ni ri be tafinaynag e girdi ni nge yog ngorad. Chiney nge boch nga m’on, ma rayog ni ngada fal’eged boch ban’en nrayog ni ngad taleged boch fare gafgow ni ma yib ngodad nge tabinaw rodad nbochan de taabrogon e girdi’. Rogon ni ke lemnag Nelson Mandela, reb e president nu South Africa faram, “gad ba thil ko yugu boch e girdi nbochan ni gad be rin’ rogon e n’en ni bay rodad gathi nbochan ni gad be rin’ ban’en rogon e n’en ni kan nog’ ngodad.”
TIN ni buch u tomren e ke dag ni riyul’ e thin ni yog. Boor e piin ni pumoon nge piin ni ppin nni gargelnagrad ni gathi yad ba flaab machane, bochan ni kara fanayed e n’en ni bay rorad nrogon, ma aram ke yib angin ngorad mar pired nib thil ko yugu boch e girdi’ nib flaab ko tabolngin. Tin nib math’ keru’ riy, e aram boch e girdi’ ni yad ba flaab u nap’an ni kan gargelnagrad e kar adbeyed e n’en ni bay rorad ma dar fanayed e re nem nrogon.
Ngam Rin’ e Bin Th’abi Fel’ Rogon e N’en ni Bay Rom!
Pi Mich rok Jehovah e ri yad baadag ni ngar ayuweged e girdi’ ni ngar nanged murung’agen e tin nib m’agan’ Got ngay u daken fol Bible. Machane, yad manang, ni bat’uf ni nge nang e girdi’ e yol som’on ma aram rogon rayog ni nge tamilang uwan’ e thin nu Bible ma ra yib angin ngak. Ar fan ni Pi Mich rok Jehovah e kara filed ngak bokum i biyu e girdi’ rogon ni ngar bieged nge rogon ni ngar yoloyed e babyor, ma ba muun ngay fapi 23,000 e girdi’ (u lukngun ko duw ni 1990) ko reb e nam nu West Africa. Be weliy murung’agen e ayuw nib lingagil ni ma pi’ e Pi Mich rok Jehovah, fare Examiner u San Francisco e be gaar: “Rayog ni ngam mogned u murung’agrad ni yad e girdi’ nib fel’ u nam rodad. Yad ma pi’ puluwon e tax u fithik’ e pasig, ma yad ma ayuweg e girdi’ nib m’ar, yad ma athamgil ni ngar ayuweged e girdi’ ni dar nanged e yol.”
Maku, bochan ni yibe skulnag e girdi’ rogon ni ngan weliy e thin u fithik’ e yoor, ma Pi Mich rok Jehovah e kara ayuweged bokum biyu’ e girdi’ ni kar salapgad ko welthin, ma chiney rayog ni ngar pied e welthin nib fel’ rogon u fithik’ e yoor. Bochi yad e immoy e magawon rorad ko welthin. Mu lemnag reb e pumoon u South Africa ni ke yoloy: “Fare magawon rog faram nib mo’maw’ rog ni ngug non. Kug tamra ngay, ma l’agan’ug ni boch e girdi’ e ngar nonad ni fan ngog. . . . Nap’an ni kug un ko fare Theocratic Ministry School ma kan dugliy ni nggu pi’ e welthin ni Bible reading ni buchuw e tayengeg riy . . . , ke tabab ni nge mama’lugunag ma de yog ni nggu mu’nag e welthin rog u rogon e tayim nni tay ko binem e welthin. Tomren fare muulung ma fare [counselor] ko re skul nem e ke pi’ e fonow ngog u fithik’ e gol. Ke yog ni fel’ ni nggu fil rogon ni nggu bieg e babyor ni baga’ lamag. Kug fol ko re fonow nem, ma aram kug tay e tayim u gubin e rran, ni nggu bieg e Bible rog ni baga’ lamag nge fare babyor rodad ni Wulyang Ntagil’ E Damit.” Kari yib angin riy ko re pumoon nem ya chiney ma pi e welthin ni fan ko yoor ni bay bokum miriay, ara bokum e biyu’ e girdi’ ni be motoyil ngak.
Be Par ni Taabrogorad u Fithik’ e Walag
Ran weliy rogon e skul, nge rogon ni ngan ayuweg e dowef, nge economic nge social standing, ma ri ba thil e par ko Pi Mich rok Jehovah ko yugu boch e girdi’. Pi n’en ney e be dag rogon e par ko biney e fayleng ndawori flont ni yad be par riy. Machane faan ran taarebnag ko yugu boch e teliw ma riyul’ ni kara chuweged u fithik’rad fare magawon ni racial, nge social, nge economic prejudices.
Ke yib angin ngorad ko maruwel ni kar ted ya ri kar athamgilgad ni ngar folgad ko thin ni kar filed u Bible. Kara koled e pi kenggin e motochiyel ni polo’ i gum’ercha’rad ni bod: “Ba thil rogon ni ma guy Jehovah ban’en ko girdi’, ya girdi’ e ma guy ban’en rogon ni rayog ni ngar guyed ban’en nga owcherad; machane Jehovah e ma guy e gum’ercha’.” (1 Samuel 16:7, NW) “Got e gathi ba laniyan’, machane en ni bay madgun Got u wan’ ma be rin’ e tin nib mat’aw e ra i par nib fel’ u wan’ Got ndemtrug ko be’ u kun nam.” (Acts 10:34, 35) “Dabmu sulweged taban ngak be’ nib kireb. Ngam dag e tin nib fel’ nga p’eowchen e girdi’. Mu rin’ed urngin e tin nrayog romed ngam pired ni ba aw e gapas u thilmed nge urngin e girdi’.”—Romans 12:17, 18; ku mu guy 1 Timothy 6:17-19; James 2:5, 9.
Bochan ni yad ma athamgil ni ngar folgad ko pi kenggin e motochiyel nem u Bible ni be ayuwegrad ni nge taareban’rad, ma aram dabi pag e Pi Mich rok Jehovah ni nge par u fithik’rad fare magawon ni de taabrogoy nbochan ba thil thil e par rorad nga raen dowrad, nge social, ara economic. Pin’en ney e der ma laniyan’ e piin ni piilal riy u nap’an ni yad be dugliy ko mini’ e girdi’ ni bay rogon ni nge yog boch e maruwel ngak ni nge ayuweg e ulung. Pi maruwel, ni ngan fil ban’en ku be’ nge ngan ayuweg e ulung, e yima pi’ ngak girdien e ulung ni kara ilalgad ko tirok Got ban’en.—1 Timothy 3:1-13; Titus 1:5-9.
Fapi girdi’ ni kan gafgownagrad nbochan fare magawon ni de taarebrogoy ku ka yad bay u fayleng ni baga’ ni girdi’ riy e ba laniyan’rad, uw feni fel’ ni bay boch e walagrad ni pumoon nge ppin ni be dag ngorad rogon ni yad taareb u p’owchen fa En ni sunmiyrad! Rayog ni nge dag Martina ni riyul’ e re ney. Tomren ni ke digey chitamangin e tabinaw rok, me par ko tabinaw nib gafgow, ma taareb e labthir ni bay riy. Gubin ngiyal’ ma ngongolnag e girdi’ ngak rogon ni ir ba thil ko yugu boch e girdi’, gathi ri ma pagan’ ir, ma ke pirieg ni mom’aw ni nge fel’ thilrad e girdi’. Me sum e ngongol ngak ni ma dariyfannag ban’en nbochan. Machane, kan thiliyeg ban’en, tomren ni ke fil e Bible me mang reb e mich rok Jehovah. Be gaar: “Ka gu be chamnag e lem rog ni dpuluw, machane chiney bay gelngig ni nggu pithig biney e magawon. Gu ma tayfag e chiney’, ma ri ma pagan’ug e chiney u nap’an ni gu be non ban’en. Fare tin riyul’ e ke ayuwegeg ni nggu nang ni bay ban’en ni ke mil fan ngog. Kug nang e chiney ni gub t’uf rok Jehovah ku kug nang ni baga’ fan e yafas.”
U lan reb e ulung ko kristiano u ga’ngin yang e fayleng, Pi Mich rok Jehovah ni bay ko pi nam ni ka boor ko 230 e ke taarebrogorad ma yad be par nib thil ko fayleng. Bay yugu boch e teliw nrayog ni nga rogned i thin ni aram rogon ma ngar daged e re ney ko ngongol rorad, fa?
Riyul’ ni Pi Mich rok Jehovah e ma yog e thin nriyul’. Yad ba yul’yul’ ni nga rogned ni bochan kar ilalgad ko fayleng ndawori flont, ma aram dabiyog ni ngar chuweged urngin ban’en nib m’ag ko fare magawon ko girdi’ ni de taarebrogoy ni yugu boch e girdi’ e ke yan boor chibog ni kar athamgilgad ni ngar pithiged fare magawon—ma dabiyog. Yugu aram rogon, ma bay e felfelan’ u fithik’rad, boor ban’en ni kara rin’ed ni ngar taleged re magawon ney ni be gafgownag e girdi’. Ma bochan ni ba gel e michan’ rorad ko n’en ni ke micheg Got ngorad, yad be sap nga m’on ko fa bin ni biech e fayleng nib mat’aw ma aram fare magawon ni de taabrogoy e kan chuweg ni manemus.
Arrogon, urngin e girdi’ ni ma fol ko thin rok Got e dabki n’uw nap’an e yira sulwegrad ni nge taarebrogorad ko “sorok nge mat’awon” ni aram e tin m’agan’ Got ngay ni fan ko girdi’ ko tabolngin. Uw fini fel’ re lem ney! Ma chiney ma ra riyul’!
[Picture on page 7]
Pi Mich rok Jehovah e yad be chamnag e magawon ko yol ya yad be fil ngak bokum biyu’ e girdi’ rogon ni ngar bieged nge rogon ni ngar yoloyed ban’en
[Picture on page 8]
Thin riyul’ u lan e Bible e be ayuweg ni ngan chuweg e pi magawon ni bochan ni ba thil thil e girdi’ ko racial, social, nge economic