De Taabrogoy Got I N’igin ni Nge Aram Rogon?

Fare fulweg ko re deer ney ko taare thin nem e danga’. Ngada guyed ko mang fan.

GOT e n’igin ni nge yog ngak urngin e girdi’ e yafas nge felfelan’. Fare thin u murung’agen rogon nni sunmiy e girdi’, e be gaar: “Me gaar Got: ‘Aram e chiney e ngad ngongliyew e girdi’ ni bod yaadow, ni bod rogon gadow, ma yad ra suwey e nig nge arche’ nge gamanman nib mongmor nge fayleng ni polo’ nge urngin mit e gamanman ni be par u ga’ngin yang e fayleng.’ ” Tomren nni sunmiy urngin ban’en u fayleng, “Ke guy Got urngin ban’en ni ke ngongliy ma, am sap! urngin ban’en ma rib fel’.”​—Genesis 1:26, 31, New World Translation.

Bochan fare magawon ni de taabrogon e girdi’ e chiney ma rayog ni nge yog Got ni “rib fel’” ko girdi,’ fa? Ri dabiyog, ya “Got e t’ufeg.” (1 John 4:8) Kan nog ni dabi “ngongol Jehovah ni ba laniyan’.” Ya ba “flont e maruwel rok, ma urngin kanawoen e ba yal’uw. I Got e ir fa en nib yul’yul’, ma dariy ban’en rok ni de yal’uw; ba mat’aw mab fel’.” (Deuteronomy 10:17; 32:4; mu taarebnag ko Job 34:19, NW) I gaar apostal Peter: “Ke mudugil uwan’ug ni Got e gathi ba laniyan’, machane urngin e girdi’ ni ma par ko urngin e nam ni bay madgun uwan’ ma be maruweliy e tin nib mat’aw era par nib fel’ uwan’.”​—Acts 10:34, 35, NW.

Bochan ni Got e ma t’ufeg e girdi’, ma gathi ba laniyan’, ba yal’uw, ma ba fel, mab mat’aw, uw rogon ni ngan nog ni ke sunmiy e girdi’ me n’igin ni nge dabi taabrogorad nge rogon ni ngara fanayed mat’awrad ni nge yog e felfelan’ ngorad.? Ra nge pag ni nge par e magawon ko girdi’ ni boch i yad e ba laniyan’ me n’igin ni nge dabi taabrogon e girdi’ ma ba togopuluw ko ngongol rok. I m’agan’ Got ngay ni urngin e girdi’ e “yira gargelnagrad nib puf rogorad ma taabrogon e sorok ni nga nog ngorad ma nge taabrogon mat’awrad.” Machane, chiney, e ke lingagil ni gathi aram rogon e girdi’. Mang fan?

Fare Likngin e Magawon ni De Taabrogon e Girdi’

Bochan ni ke sunmiy Got e girdi’ ni nge taabrogorad e gathi be dag e re ney ni m’agan’ ngay ni nga ri taabrogorad ko urngin ban’en. Sana ba thil thil e salap rorad, nge tin ni yad baadag, nge pangirad. Maku de taabrogon e par rorad ara tolngin e liw rorad. Bod ni, de taabrogon e pumoon nge ppin ko urngin ban’en, machane ke sunmiy Got fare ppin ni “nge mang taayuw” ko pumoon. (Genesis 2:18) Pi llabthir e ba tamilang nib thil e liw rorad ko pi bitir rorad. Yugu aram rogon ni de taabrogon e girdi’ ko pi n’en ney, machane, yad urngin​—piin ni pumoon, nge piin ni ppin, nge piin ni bitir—​e nge yog ngorad fare mat’awon ni yib rok Got ni yad urngin e rayog ni ngara rin’ed boch ban’en ni nge yog e felfelan’ ngorad. Susun ni nge taabrogon e girdi rogon ni ngan nog e sorok ngorad nge par rorad u p’owchen Got.

Taabrogon ko pifak Got ni yad e pi engel, ni kan sunmiyrad, ma kan pi’ ngorad boch e maruwel nib thilthil nge n’en nib mil fan ngorad. (Genesis 3:24; 16:7-11; Isaiah 6:6; Jude 9) Yugu demtrug rogon, ma urngin e motochiyel nni pi’ ngorad, e rayog ni nge yog ngorad ni yad gubin e pin’en ni ke pi’ Got ngak e girdi’ ni fan ko yafas nge felfelan. Ma pi’ney e ri be dag ni Got e gathi ba laniyan’.

Machane, reb e engel e de felfelan’ ko yaram nib mat’aw ni ke tay Got kakrom. Baadag ni nge yog ngak boch ban’en ni ka boor ko n’en ni ke pi’ Got ngak, ma be ararnag ni nge yog ngak e liw nrib tolang. Bochan ni ke pag ni nge gel iyan fare lem rok nib kireb, ma aram ke tay ir ko gin nib tolang ni nge taginging ku Jehovah, ni Ir fa En ni bay mat’awon ni nge yog ngak e liw ni bin th’abi tolang ya ir e ke sunmiy urngin ban’en. Re engel nem ni ir fak Got ni tatogopuluw e wawliy e girdi’ ni ngar ninged ban’en ni ka boor ko n’en ni Ke pi ngorad. (Genesis 3:1-6; mu taarebnag ko Isaiah 14:12-14.) Aram fan, ni yibe sananag ni pi’nen ni ke pi’ Jehovah ngak e girdi’ ni nge yog e felfelan ‘ ngorad e de thabthabel. Re engel nem ni tatogopuluw e kan poy ko Revelation 20:2 ni “fare Moonyan’ nge Satan,” e ke mang likngin fare magawon ko girdi’ ni yad be par ni de taabrogorad.

Rayog Ni Nge Thil Boch Ban’en fa?

Fare fulweg ko fa taare thin e arrogon!

Machane mini’ e rayog ni nge thiliyeg boch ban’en nge fel’? Girdi’ nib tolang e liw rorad, e kar athamgilgad ni mus mus rogorad riy, ni ngar pithiged re magawon ney. Buchuw angin ni ke yib riy ngorad, aram fan ni be lemnag boor e girdi’ ni ran athapeg ni ngan pithig fare magawon ni de taabrogon e girdi’ ma rib mom’maw’ ni nge riyul’. Machane, lem rok Jehovah e kan yoloy ko Isaiah 55:10, 11: “Rogon ni be aw e n’uw nga but’, nge fare snow, ni be yib u tharmiy ma dabi sul nga bang ko gin i yib riy, ya yira wereg nga fayleng nge ayuweg e woldug nge k’uf, ma ngan pi’ e awoch ngak be’ ni tamilay’ nge fare flowa ngak be’ ni baadag ni nge kay ban’en, ma aram rogon e thin ni ma yib u l’ugunag ma ra yan i aw nib riyul’. Dabi sul ngog ko ngiyal’ ni dawori yib angin, machane ba mudugil ni nge rin’ e n’en nib fel’ uwan’ug, ya ra rin’ urngin ban’en ni kug l’og ni nge rin’.”

Yira nang ni i n’igin Jehovah ni ngan yoloy boch e thin ni be tamilangnag ko uw rogon ni nge lebug e tin nib m’agan’ ngay ni fan ko girdi’ ma bayi bing e kanawo’ nge yog ngorad e yafas nge felfelan’ ni aram e n’en ni ma fal’eg laniyan’uy! Bochan ni ir e Got ko tin riyul’ ma dabi pag ni tin ni ke micheg nge yan i aw nib m’ay fan. Ffel’, ya bay e mat’awon nge gelngin ni nge yodor. Uw rogon ni nge rin’ e re n’en ney?

Fare fulweg ko re deer ney e ba m’ag ko fare gil’ilungun ni i fil Jesus ngak pi gachalpen ni ngar yibilayed u murung’agen: “Chitamangimad ni ga bay u tharmiy, . . . Nge yib gil’ilungum ngeb ngomad. Ma ngan rin’ e tin nib m’agan’um ngay ni bod rogon u tharmiy, ku arrogon uroy u but’.” (Matthew 6:9, 10) Arrogon, Gil’ilungun Got e aram e talin e maruwel nra fanay Jehovah ni nge “thirif u but’ urngin e pi gil’ilungun ney [bay e chiney], ma ra par ni ir e ra gagiyegnag e fayleng ni dariy n’umngin nap’an.”​—Daniel 2:44.

U tan e gagiyeg ko gil’ilungun u tharmiy, ma ra m’ug e ulung ko girdi’ nib biech. Bochan e re n’ey, me yoloy apostal John ko fare babyor u Bible ni bin tomur ni Revelation ni gaar: “Kug guy reb e tharmiy nib biech nge reb fayleng nib biech; ya fa bin som’on e tharmiy nge bin som’on e fayleng e ke m’ay.” (Revelation 21:1) Ma ra m’ay urngin ban’en nib m’ag ko re magawon n’ey ni de taabrogoy ni bod​—e gafgow, m’ar, dan un ko skul, nge laniyan’, nge yugu boch ban’en ni ma gafgownag e girdi’.a

Ke pag ko taareb e chibog, ni be pi’ e Pi Mich Rok Jehovah e athamgil nga laniyan’ e girdi’ ni ngar sapgad ko re Gil’ilungun Got nem. (Matthew 24:14) Yad be athamgil ni ngar ayuweged boch e girdi’ ni nge yog ngorad e tamilangan’ u murung’agen e tin nib m’agan’ Got ngay ni bay u lan e Bible, ma aram yad be fanay e pi babyor nni ngongliy nge l’ugun’rad. Re maruwel rorad n’ey ni yad be skulnag e girdi’ u ga’ngin yang e fayleng, e gathi kemus ni yad be pi’ e athap ko girdi’ ni bay ba ngiyal’ ya ku ra taarebrogorad ma yad ra par nib felfel’an, machane ke yib angin ngorad e chiney ya kan taleg fare magawon ni de taabrogon e girdi’. Ngada guyed ko uw rogon.

[Footnote]

[Blurb on page 5]

M’agan’ Got ngay ni nge taabrogon urngin e girdi’ nrogon e par rorad nge felfelan’.