“Thin Nib Fel” Ni Bay U Lan E Apocalypse

“Mu gguy yugu reb e engel ni be changeg nib tolang u fithik’ e nifeng, ni ba’ rok e thin ndabi math biid, ni thin nib fel’ ni nge weliy ngak e girdi’ nu fayleng.”​—REVELATION 14:6.

1. Yugu demtrug nib mich uwan’ e Pi Mich rok Jehovah fare babyor ni Apocalypse, Ma mang fan ni gathi yad reb “ulung ni apocalyptic”?

BA TOGOPULUW ko pi thin ni kan wereg u murung’agen e Pi Mich rok Jehovah, e gathi yad e girdi’ ni kan nog “ulung ni apocalyptic ngorad” ara reb e “doomsday cult.” Machane, yad manang ni fare Apocalypse, ara babyor ni Revelation, e ir bang ko Thin rok Got ni kan thagthagnag. Riyul’, ni fare babyor ni Revelation e bay e thin riy u murung’agen rogon e pufthin ni yira ta’ ngak e piin nib kireb. Machane, u nap’an ni yad ra yan ni ngar wereged e thin rok Got ngak e girdi’, ma pi tapigpig rok Got e yad ma tiyan’ ni ngar weliyed ko girdi’ fre athap ni rib fel’ni be weliy e Bible murung’agen nib muun ngay e pi thin ko Apocalypse, ara Revelation. Ere, dar uneged boch e thin ngay ara ra chuweged boch e thin riy ni kan yiiynag.​—Revelation 22:18, 19.

Pi Tamachib ko Pi Thin Ni Ma Yibnag e Falfalan’

2. Mang e thin nu Bible ni yad ma fanay u nap’an ni yad be yan ko machib?

² Fare thin nu Bible ni baga’ e ma bieg e Pi Mich rok Jehovah ngak e girdi’ u nap’an ni ngar ranod ko machib e aram e thin rok Jesus ni gaar: “Ma re Thin rok Got ney Nib Fel’ ni murung’agen e gagiyeg rok e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.” (Matthew 24:14, footnote) Ma mang e re “thin nib fel’ ney u murung’agen gil’ilungun Got”? Ma boor e Pi Mich rok Jehovah nra pi’ e fulweg ko re deer ney ni ngar fanayed e pi thin ko Revelation ko guruy ni 20 nge 21 ni be weliy u murung’agen e gagiyeg rok Kristus u lan reb e biyu’ e duw ni aram e am ni fan ko girdi’ ma aram e dakuriy be’ ni ra yim’, ma dab kun yor, ma ‘dabkun’ amith.​—Revelation 20:6; 21:1, 4.

3. Taab rogon ko mang fare maruwel ni ngan machibnag e thin nib fel’ ni ma ta’ e Pi Mich rok Jehovah?

³ Bochan ni yad e pi tamachib ko fare thin nib fel’ ni ma yib e falfalan’ riy ngak e girdi’, ma Pi Mich rok Jehovah e yad bod lugun fare tamol’og ni yib u tharmiy ni be weliy e Revelation murung’agen ni gaar: “Mu gguy yugu reb e engel ni be changeg nib tolang u fithik’ e nifeng, ni ba’ rok e thin ndabi math biid, ni Thin Nib Fel’ ni nge weliy ngak e girdi’ nu fayleng, ni urgin e pi nam, nge ganong nge thin nge gubin mit e girdi’.” (Revelation 14:6) Fare “thin ndabi math biid” e ba muun ngay e pi thin u murung’agen “fare gil’ilungun (ara, gagiyeg) u fayleng ni ke mang e gagiyeg rok Somol rodad nge fare Messiah rok” ma fare “ngal’an ni kan dugliy” ni fan ku Jehovah “e nge kirebnag e piin ni kar kirebnaged e fayleng.” (Revelation 11:15, 17, 18) Gathi riyul’ ni thin nib fel’ e re nem, fa?

Mang e N’en ni Bay ko Revelation ni Fan Ngodad

4. (a) Mang e tin riyul’ ni be weliy fare babyor ni Revelation ko guruy ni taareb? (b) Mang e ba t’uf ni nge rin’ e piin ni yad baadag ni nge fel’ rogorad ko fare thin ni fel’?

⁴ Fare guruy ni som’on ko Revelation e be dag ni Jehovah e ir “fare Alpha nge fare Omega, . . . ni Ir e ba’ e chiney, me ir e immoy kakrom, me ir e bay yib, ni en tha’bi gel gelngin.” Me dag fak, ni Jesus Kristus, ni ir fare “Mich nib Yul’yul’,” “me ir som’on nni faseg ko yam’,” me ir e ra “gagiyegnag urngin e pilung nu fayleng.” Maku be weliy e re n’ u murung’agen Jesus ni “gadad e ba t’uf rok ma ke pithigdad ko denen rodad u daken racha’en.” (Revelation 1:5, 8) Ere, pi thin nu Revelation ni som’on ney e tabab ni nge weliy u murung’agen e thin riyul’ ni nge ayuweg be’ ni nge magay nib fas. “Piin ni be par u fayleng” e dabiyog ni nge ayuwegrad fare thin nib fel’ ni kan pi’ ngorad ni faanra de mich Jehovah uwan’rad, ma ngki michan’rad ni ke faseg Jehovah Jesus ko yam’ me dugliy ni nge mang Jesus e pilung ni nge Gagiyegdad e fayleng.​—Psalm 2:6-8.

5. Mang e maruwel ni ngan pi’ ngak Kristus nrogon ni be dag fare babyor ni Revelation ko guruy 2 nge 3 ?

⁵ Ma gal ni migid e guruy e be dag ni Jesus e ir be’ ni ma ayuweg e pi ulung ko pi gachalpen u roy u fayleng u fithik’ e t’ufeg. Ma fare babyor ni kan bachiy e kan yoloy ni ngan pi’ ngak fa medlip i ulung ni immoy u Asia Minor ko fa bin som’on e chibog C.E. pi thin ni bay riy e ke pi’ e athamgil nga laninyan’ e girdi’ nge boch e fonow nib gel ni ku ba m’ag ko girdi’ e ngiyal’ ney. Fapi thin ni kan pi’ ngak ulung ko kristiano e baga’ ni tin som’on e thin ni bay riy e be gaar: “gu manang e tin ni kam rin’” ara “gu manang e pi n’en ni ga be gafgow riy.” (Revelation 2:2, 9) Arrogon, ri manang Jesus ko mang e be rin’ e pi ulung ko pi gachalpen. I yog boch e thin nib fel’ ngorad ni bochan e t’ufeg, nge michan’, nge pigpig nib gel ni kar ted, nge gum’an’, ma kar pared nib yul’yul’ nga fithingan nge thin rok. Me yal’uweg yugu boch e girdi’ ya kar paged ni nge war e t’ufeg rorad ku Jehovah nge Fak, ara kara awgad ko ngongol ni darngal, ma kar liyorgad ko liyos, ara kar sunmiyed boch e ulung nib togopuluw ko kristiano.

6. Fapi thin ni bay ko guruy ni 4 e ra ayuweg e girdi’ ni ngara nanged e mang?

⁶ Fare guruy ni 4 e be dag yaan tagil’ Jehovah u tharmiy. Re n’ey e be dag boch ko uw feni fel’ yaan ni be galgal ramaen Jehovah nge uw rogon e yaram ko gagiyeg ni ra tay. Ma fapi pilung ni kan teeliyawnagrad, e bay chiya rorad nib liyeg e chiya ko en suwon e palpalthib, ni yad be liyor ku Jehovah mar gaargad: “Jehovah ni gur e Got romad, bay rogom ni ngan nog e sorok ngom, min ta’ fam, ma ba’ rogom ni nge mil suwon urngin ban’en ngom, yi gur e mu sunmiy urngin ban’en, yi gur mu lemnag mi yad sum ni yad ba fas.”​—Revelation 4:11.

7. (a) Mang e ke yog fare engel ni nge rin’ e piin ni yad be par u fayleng? (b) Mang e n’en ni baga’ fan ko maruwel rodad?

⁷ Bay fan e re n’ey ko girdi’ e ngiyal’ n’ey, fa? Ba tamilang ni ba’. Faanra yad ba adag e par u tan fare Gil’ilungun ni nge gagiyeg u lan taareb e biyu’ e duw, ma thingara motoyilgad ko mang e ke yog fare “engel ni be changeg u fithik’ e nifeng” ni be gaar: “Nge yib madgun Got ngomed, mi gimed ta’ fan nga feni sorok, ya ke taw nga nap’an ni nge pufthinnag e girdi’.” (Revelation 14:6, 7) Reb i fan ni rib baga’ fan ni Pi Mich rok Jehovah e yad be un ko maruwel ni ngan fil e Bible ngak e girdi’ e aram e yad be ayuweg e “piin ni yad be par u fayleng” ni ngar nanged murung’agen Jehovah mi yad pigpig ngak, mi yad tay fan ya ir e Sunmiy urngin ban’en, ma yad baadag ni ngar pared u tan e gagiyeg rok.

Fare fak e Saf e Bay Rogon ni Ngan Tayfan

8. (a) Mang e be weliy fagali guruy ni 5 nge 6? (b) Piin ni ma motoyil ko fare thin nib fel’ ko re ke babyor ney e yad ra nang e mang?

⁸ Gali guruy ni migid ney, ni aram e guruy ni 5 nge 6, e be dag ni Jesus kristus ni ir fare Fak e Saf e kan pirieg ni bay rogon ni nge pithig fare gi babyor ni kan bachiy ni bay medlip e hang riy, ni be dag ko mang e pi n’en nra buch ko ngiyal’ n’ey. (Mu taarebnag ko John 1:29.) Bay e lamay ni yib u tharmiy ni be non ngak fare Fak e Saf ni be yip fan ban’en ni gaar: “I gur ba’ rogom ni ngam fek fare gi babyor ni kan bachiy ngam bing fapi hang riy. Ya nli’em nga mum’, ma u daken racha’em e kam chuw’iy e girdi’ ngay ni ngar manged girdien Got, ni girdi’ u urngin e ganong, nge thin, nge gubin mit e girdi’, nge nam. Kam ngongliyrad kar manged ba nam i prist ni nguur pigpiggad ngak e Got rodad; ma bay ra gagiyeggad u fayleng.” (Revelation 5:9, 10) Pi thin ney ri e be dag ni bay boch e girdi’ u urngin yang ni kan piningrad u daken racha’en kristus ni ngar uned ngak nga tharmiy ma bay ra “gagiyeggad u fayleng.” (Mu taarebnag ko Revelation 1:5, 6.) Ma bang ko tomur ko re ke babyor ney ni Revelation e dag ko yad in.

9. Mang e be weliy fare guruy ni 6 u murung’agen Kristus?

⁹ Maku reb e n’en kan guy, aram e Jesus ni be yan u daken e os nib wech wech ni kan teeliyawnag, “me yan nrogon be’ ni ma gel ko mahl ni nge yan ko mahl nge gel.” Bay e falfalan’ riy, ya ra gel ko urngin e tin nib kireb nra yib nbochan fa dalip ni migid e girdi’ ni be yan u daken e os ni be yip fan ban’en ni bay ko Apocalypse, ma bay gelngirad ya rayog ni ngar yibnaged e mahl, nge uyungol, ma yam’ ni ke yib ko girdi’ ni ka nap’an fare duw ni 1914 ni aram fre duw nib baga’ fan. (Revelation 6:1-8) Fare maruwel rok Kristus nib thil, ni ir fare Fak e Saf ni yib rok Got, nge rogon ni ngan thapeg e girdi’ ngak Got nge murung’agen e tin nib m’agan’ Got ngay ni fan ko girdi’ e aram kenggin e machib ni ma fil e Pi Mich rok Jehovah ngak e girdi’.

10. (a) Mang boch e thin ni baga’ fan ni bay ko guruy ni 7? (b) Mang e ke weliy Kristus u murung’agen e piin ni nge yog ngorad e Gil’ilungun Got?

¹⁰ Fare Guruy ni 7 e bay e thin riy nib fel’. Kemus u lan fare babyor ni Revelation e yira pirieg urngin e girdi’ ni ke pining Jesus “fachi ulung” ngorad maku ke pi’ e Chitamangin fare Gil’ilungun ngorad. (Luke 12:32; 22:28-30) Ke duguliyrad Jehovah ko kan ni thothup rok. (2 Corinthians 1:21, 22) I John ni apostal, ni ir e ke kan dag fare Revelation, ngak e yog ni gaar: “Ma aram mi nog ngog e mathaeg ko piin ni kan tay e pow ngorad, ni yad raay nge aningeg i ragag nge aningeg e biyu’.” (Revelation 7:4) Re namba ney e ba mudugil ya kan yoloy biyay ko reb e guruy ni bay boch nga tungun ni be dag ni riyul’ e re n’ey, ya kan nog ni aram e namba ko urngin e girdi’ ni “kan biyuliyrad u fayleng” ni ngar uned ko fare Fak e Saf ni ngar gagiyeggad ko Burey ni Zion u tharmiy. (Revelation 14:1-4) Fapi galesiya ko Christendom e kar weliyed boch u murung’agen e re namba ney ni gathi rib tamilang, machane, reb e Bible scholar ni E. W. Bullinger e ke yog u murung’agen ni gaar: “Aram boch e thin ni kan weliy nib tamilang: reb e namba ni ba mudugil nib thil ko namba ni de mudugil ni urngin e pi n’en n’ey e bay ko re guruy ney.”

11. (a) Mang e thin nib fel’ ni rayog ni ngan guy ko guruy ni 7? (b) Mang e athap ni ke mab kanawoen ni fan ko piin ni yad bang ko “ulung ni baga’”?

¹¹ Mang e namba ni de mudugil ni be weliy Bullinger murung’agen? I yoloy John ni apostal ko verse 9 ni be gaar: “Ma faani mu’ e biney mu gu sap, mu gguy e girdi’ ni ke muulung ni pire’ ni pire’ ni dariy be’ ni rayog ni nge theegrad, ni ra bad u gubin e nam, nge ganong, nge gubin mit e girdi’, nge gubin e thin.” (Revelation 7:9) Mini’ e piin ni yad bang ko ulung ni baga’, uw rarogorad u mit Got, ma mang e taw’ath ni yad be sonnag ni nge yib ngorad nga m’on? Fare fulweg ni ke pi’ fare babyor ni apocalypse e aram e thin nib fel’ ni fan ko piin nra par u fayleng. Ma be gaar: “Pi cha’ nem e fapi girdi’ ni kar thapgad ngaray u fithik’ fare gafgow ni ba ga’ ntay ngorad. Kar lukniged e mad rorad kar wechwechniged nga racha’en fare Fak e Saf.” Yira ayuwegrad u nap’an ni ra yib “fare gafgow ni baga’” ni bochan e racha’en Kristus ni ke puog ni fan ngorad. I Kristus e “ra pow’iyrad ko fapi alublub ni bay e ran ko yafas riy. Ma bayi n’ag Got e lu’ u owcherad.” (Revelation 7:14-17) Arrogon, bokum million e girdi’ nib fas e ngiyal’ n’ey ni rayog ni ngar uned ko fare ulung ni baga’ ni dabiyog ni ngan theegrad ni ngara magaygad nib fas u nap’an ni ngan thang urngin ban’en nib kireb ko re fayleng ney. Bochan ni yad ra par u tan e Gagiyeg rok Jesus Kristus ni Pilung u lan reb e Biyu’ e Duw, ere ir e ra pow’iyrad ni nge yog ngorad e yafas ni manemus u fayleng. Gathi aram reb e thin nib fel’, fa?

“Pi Pufthin ni Ra Tay e Ba Riyul’ ma Ba Mat’aw”

12, 13. (a) Mang boch ban’en ni bay ko guruy ni 8 nge mada’ ko 19 ? (b) Mang fan ni de t’uf ni nge magafan’ e piin ni ba yul’yul’ gum’ercha’rad ko pi thin nem?

¹² Fapi guruy ni 8 nge mada’ ko 19 e aram tapgin ni be lemnag e girdi’ ni fare babyor ni Apocalypse, ara Revelation, e aram e babyor ni be yog boch e thin ni be weliy u m’on ko mang e gafgow ni ra yib nga m’on. Ma tin ni bay riy e aram e thin ko pufthin ni ba gel (yima yog ni yabul ni kan thoy, nge gafgow, nge pi bowl ko damumuw rok Got) ni fan ko urngin ban’en ko re fayleng rok Satan ney. Som’on, ma yira pufthinnag e pi yuraba’ i teliw ni googsur (“fare Babylon ni Gilbuguwan”), ma bin migid e fan ko pi am nu fayleng ni der ma fol ku Got, ni kan nog e gamanman ni maloboch ngay.​—Revelation 13:1, 2; 17:5-7, 15, 16.a

¹³ Pi guruy ney e be dag rogon ni ngan biechnag e tharmiy, ma Satan nge pi moonyan’ rok e kanin’rad u lang nga daken e fayleng. Re n’ey e rayog ni nge ayuweg e girdi ni nge tamilang uwan’rad ko mang fan ni ke yib e gafgow nga daken e fayleng ni ka nap’an e duw ni 1914 ma de yib u m’on ko re duw nem. (Revelation 12:7-12) Maku, be weliy e pi verse ney u murung’agen e thin ni be yip fan ban’en, nge fare magothgoth ni ra yib ni fan ku Satan nge urngin e tin nib kireb u fayleng. (Revelation 19:19-21) Ere susun nge gin e piin ni ba yul’yul’ gum’ircha’rad u nap’an ni ra yib e pi n’en ney? Danga’, ya chirofen ni yib e pufthin ni tay Got, me yib laman e girdi’ ni peri’ u tharmiy, nra gaargad: “Gimed e girdi’, ngam pining e sorok ngak Jah! Ya kanawoen min thap ngak, nge flaab, nge gelngin nib th’abi gel e mmil suwon ngak e Got rodad, ba riyul’ ma mat’aw e gechig ni ma turguy.”​—Revelation 19:1, 2.

14, 15. (a) U rogon ma tomren e re fayleng ney nib kireb e ra yibnag e fayleng ni ba mat’aw? (b) Mang fan ni susun pi thin ney ni ir bang ko Apocalypse e ra falfalan’nag e piin ni ba yul’yul’ gum’ercha’rad?

¹⁴ Dabi yibnag Jehovah fare m’ag nib biech ni faanra dawori chuweg e piin yad be kirebnag ere fayleng n’ey. (Revelation 11:17, 18; 19:11-16; 20:1, 2) Machane, dariy be’ fa reb e am ko girdi’ ni bay e mat’awun ni nge rin’ e re n’ey. Ya ke mus ni goo Jehovah nge fare Pilung ni Tapuf oloboch, ni ir Jesus Kristus, ni ir e kan dugliy, e rayog ni ngara rin’ew e re n’ey u rogon nib mat’aw.​—2 Thessalonians 1:6-9.

¹⁵ Rogon ni dag fare Apocalypse, ni rib tamilang e n’en nib m’agan’ Jehovah ngay ni ngan thang e tin nib kireb ko re fayleng ney. Re n’ey e susun ni ra k’aring e falfalan’ ko piin ni pumoon nge piin ppin ni “yad be dolo’loy ma yad be gilgel ko amith ni bochan e kireb ni yibe rin’.” (Ezekiel 9:4, New World Translation) Susun aram e n’en ni ra ayuwegrad ni ngar lemnaged ni thingar dabra adbeyed e tayim ni ngar folgad ko fare pong ni ke yog fare engel ko fare thin nib fel’ ni ke wereg, ni gaar: “Nge yib madgun Got ngomed . . . ya ke taw nga nap’an ni nge pufthinnag e girdi’, ere mu siro’gad mi gimed meybil u p’eowchen Got ni ir e sunmiy e tharmiy, nge but’.” (Revelation 14:7) Yibe athapeg ni pi girdi’ nem e yad ra liyor mi yad pigpig ku Jehovah mi yad chag ko Pi mich rok, “ni yad be fol ko pi motochiyel rok Got ma yad ba yul’yul’ ko fare thin nib riyul’ ni yib i yog Jesus ngan nang.”​—Revelation 12:17.

Fare Gagiyeg nib Falfalan’ u Lan Bbiyu’ e Duw

16. (a) Mang fan ni fapi galesiya ko Christendom e kar dariy fannagged e athap ko fare Biyu’ e Duw ara Millenium? (b) Mang fan ni ke mich uwan’ e Pi Mich rok Jehovah ni yira fulweg taban fare meybil ni ke fil Jesus ngak pi gachalpen?

¹⁶ Guruy ni 20 nge mada’ ko 22 ko fare babyor ni Revelation e bay boch e Thin riy ni aram tapgin ni ngan athapeg e gagiyeg u lan Fre e Biyu’ e Duw. Ke mus ni aram e gini bay riy u lan e Bible ni be weliy u murung’agen taareb e biyu’ e duw ni ir fare tabolngin e falfalan’ ni manemus u tharmiy nge fayleng. Fapi galesiya ko Christendom e kar dariyfannaged fare athap u lan e biyu e duw. Bochan ni ma machibnag e pi galesiya ni ra yan e piin nib mat’aw nga tharmiy ma piin nib kireb e ra yan nga infierno, ere dakuriy tagil’ e paradis u fayleng. Fare meybil ni ke fil Jesus ngak pi gachalpen, ni be ning ku Got ni “nge rin’ e tin nib m’agan’ ngay u roy u but’ ni bod rogon ni yibe rin’ u tharmiy,” e dakuriy fan uwan’ boor e girdi’ ni yad bang ko pi galesiya ko Christendom e re n’ey. (Matthew 6:10, New International Version) Machane gathi aram rogon ko Pi Mich rok Jehovah. Kari mich uwan’rad ni de sunmiy Jehovah e fayleng “ni dariy fan,” machane “fan e nge par e girdi’ riy.” (Isaiah 45:12, 18) Ere, fapi thin ni kan yiiynag kakrom, nga fare meybil ni ke fil Jesus ngak pi gachalpen, nge fare athap ko gagiyeg ni ra tay Jesus u lan taareb e Biyu’ e Duw ni be weliy fare apocalypse e urngin e rib puluw. Nap’an e Gagiyeg rok Kristus u lan Bbiyu’ e Duw, e ra ayuweg ni nge lebug e tin nib m’agan’ Jehovah ngay u fayleng ni bod rogon u tharmiy.

17. Mang e be dag ni fare taareb e “biyu e duw” ara millenium e aram e namba ni riyul’?

¹⁷ Fare bugithin ni “taareb e biyu’ e duw” e m’ug ni nel’ yay ko tin som’on e medlip e verse ko guruy ni 20 ko fare babyor ni Revelation. Fan ni ngan nang ni aningeg yay ni kan yoloy e re n’ey ni bay e n’en ni kan nog e definite article ngay ni “fare,” e be weliy e re n’ey u murung’agen taareb e biyu’ e duw n’umngin nap’an e ba riyul’, ma gathi ke mus ni aram e tayim nib n’uw nap’an, de mudugil, ni bod rogon e n’en ni be weliy e piin ni kan nog commentators ko Christendom ngorad ni yad be guy rogon ni ngari mich uwan’dad. Mang e ra buch u nap’an fare Gagiyeg u lan Taareb e Biyu’ e Duw? Som’on, yara chuweg gelngin Satan ko ngiyal’ nem. (Revelation 20:1-3; mu taarebnag ko Hebrews 2:14.) Aram e thin ni rib fel’!

18. (a) Mang fan ni rayog ni ngan nog Ni “rran” ko pufthin e reb e Biyu’ e duw? (b) Mang e ra buch u tomren ko fare taareb e biyu e duw?

¹⁸ Fre “mat’awon e pufthin” e kan pi’ ngak e piin ni “yad ra un ngak [Kristus] ni ngar gagiyeggad u lan reb e biyu’ e duw,” riyul’, aram e tayim ni n’umngin napan e reb e biyu’ e duw ni aram e “rran” ko pufthin. (Revelation 20:4, 6; mu taarebnag ko Acts 17:31; 2 Peter 3:8.) Yira faseg e yam’, ma ngar chaggad ko piin ni yad ra magay nib fas ko “fare gafgow ni baga’,” ma yira pufthinnagrad ni yad urngin ni be yan u rogon e ngongol rorad, ara tin ni kara rin’ed, ko ngiyal’ nem. (Revelation 20:12, 13) Tomren e taareb e biyu’ e duw, ma yira pag Satan u kalbus nib ngoch nap’an ni fan ni nge un e girdi’ ko fa bin tomur e skeng, ma tomur riy e aram ir, nge pi moonyan’ rok, nge yugu boch e girdi’ ni ma un ngak ko togopuluw e yira thang owcherad ni dariy n’umngin nap’an. (Revelation 20:7-10) Ma piin ni kar pired nib yul’yul’ ku Got u tomren ni ke yib fare skeng ngorad e ngan yoloy fithingrad nga lan “fare babyoren e yafas” ni dabni chuweg riy ma yira fekrad ngar uned ko yafas ni bay falfalan’ riy ni dabi m’ay biid, ma ngar pigpiggad ma ngar liyorgad ku Jehovah u paradis u fayleng.​—Revelation 20:14, 15; Psalm 37:9, 29; Isaiah 66:22, 23.

19. (a) Mang fan ni ke mudugil laniyan’dad ni tin ni kan micheg ni rib fel’ ulan fare babyor ni Revelation e ra riyul’? (b) Mang e yira weliy ko bin migid e article?

¹⁹ Aram e thin ni ma k’aring e falfalan’ ni bay ko fare babyor ni Apocalypse. Gathi aram e thin ni girdi’ e ke micheg ma dariy fan. Ke yoloy John ni apostal: “Ma faanem ni ke par nga tagil’ e gaar: ‘Chiney e nggu thiliyed urngin ban’en nge biech.’ Maku, be gaar: ‘Mu yoloy e re n’ey, ya pi thin ney e ba riyul’ ma rayog ni ngan pagan’uy ngay.’ ” (Revelation 21:5) Mang e thingarda rin’ed ma rayog ni ngada uned ko falflan’ u napan ni be lebug e pi ney? Fare babyor ni Revelation e bay boor e fonow riy ni fan ko piin ni yad baadag ni ngara falflanaged Got. Ran fol ko re fonow nem ma ra yog e falfalan’ ngodad ndabi m’ay, e chiney iyan e nga ram ni dariy n’umngin nap’an, ma aram e n’en ni ra dag e bin migid e article.

[Footnote]

Boch Ban’en Ni Ngan Sulod Nga Daken

◻ Mang e pi thin riyul’ ni rayog ni ngan guy ko fare babyor ni Revelation ko guruy ni 4 nge mada’ ko 6 ni ir bang ko thin nib fel’ ni baga’ fan?

◻ Mang e thin nib fel’ e rayog ni ngan guy ko Revelation ko guruy ni 7?

◻ Mang ni de t’uf ni nge kireban’ e piin ni ba yul’yul’ gum’ercha’rad ko pi thin ko pufthin ni bay ko fare babyor ko Revelation?

◻ U rogon ni nge mang “rran” ko pufthin fare Biyu’ e duw?

[Picture on page 20]

Ra chuweg Jesus Kristus e mahl nge uyungol nge yam’ u fayleng ni polo’