Ga Be Rin’ Urngin Ban’en Ni Kam Micheg Ku Got?

“Fare Got ni riyul’ e ra pufthinnag urngin mit e ngongol ko girdi’ nib l’ag ko urngin ban’en ni kan mithag, ni demtrug ko ba fel’ fa ba kireb.”​—ECCLESIASTES 12:14, New World Translation.

1. Mang e pi n’en ni ke pi’ Jehovah ngak girdi’en?

MA AYUWEG Jehovah e piin ni be ul’ul iyan ni be lemnag ni ir e Ani Ga’ ni Sunmiyrad. Fare thin rok ni kan thagthagnag e be pi’ ngorad fare tamilangan’ nib t’uf rorad ni ngar pared riy nib fel’ uwan’ Got. Fare kan ni thothup rok Got e be pow’iyrad ni ngar rin’ed e tin nib m’agan’ Got ngay “me yib wom’ngin i pangirad u fithik’ urngin mit e maruwel nib fel’.” (Colossians 1:9, 10) Maku, ma pi’ Jehovah e ggan nib spiritual ngodad nge ma ma fanay “fare tapigpig nib yul’yul’ mab gonop” ni nge pow’iydad. (Matthew 24:45-47) Bochan ni yad be pigpig ku Jehovah ma yad be rin’ fare maruwel ni baga’ fan ni ngan wereg e thin nib fel’ u murung’agen gil’ilungun Got, ma aram ma ke yib e taw’ath u tharmiy ngak girdien Got u boor e kanawo’.​—Mark 13:10.

2. Mang boch e deer nra sum nib m’ag ko pigpig ku Jehovah?

² Tin riyul’ e Kristiano e ba falfalan’ ni boor pa’ u puluwrad ko pigpig ku Jehovah. Machane, boch i yad e ke mulan’rad yad be lemnag ni dariy fan e maruwel ni kar ted. Yu ngiyal’, ma piin Kristiano ni kar ognaged yad ku Got e ra lemnag ko riyul’ ni bay fan e maruwel ni kar ted u fithik’ e yul’yul’ fa dangay. Ran lemnag e fol Bible u tabinaw nge yugu boch e maruwel ni yima ta’, ma boch e deer ni bod e tiney e sana ra yib ngan’ e en lolugen e tabinaw ni be gaar: ‘Riyul’ ni ba falfalan’ Jehovah ko n’en ni gad be rin’? Gad be rin’ e tin kad micheged ku Got?’ Fare fulweg ni ke yog fa cha’ ni ta ulunguy e girdi’ e rayog ni nge ayuwegey ni ngan pi’ e fulweg ni fan ko pi deer n’ey.

Urngin Ban’en Ma Ba M’ay Fan Fa?

3. Rogon ni yog ko Ecclesiastes 12:8, ri ba uw ga’ngin yang e n’en ni kan adbey?

³ Boch e girdi’ e be lemnag ni fapi thin ni ke yog fa cha’ nib gonop e gathi ri ma pi’ e athamgil nga laniyan’ urngin e girdi’ ni​—kab pagal ara ke pillibthir. “ ‘Ri mm’ay fan!’ yog fare ta ulunguy e girdi’, ni ‘Urngin ban’en e mm’ay fan.’ ” (Ecclesiastes 12:8) Riyul’, ni kan adbey e tayim ni kan dariyfannag e En ni Sunmiy urngin ban’en u nap’an ni ka yab pagal, min pillibthir ni dabni pigpig ngak, ma ke mus ni ngan dag ni ke yoor e duw ni aram angin ni ke n’uw nap’an e yafas. Urngin ban’en ma dariy fan, ara bod ban’en ni ba dogur, u puluwon be’ ni aram rogon, ni yugu demtrug ni ke yim’ ma boor e chugum rok ma ir be’ ni ba gilbuguwan ko re fayleng n’ey ni fare kan nib kireb e be gagiyegnag, ni Satan ni fare Moonyan’.​—1 John 5:19.

4. Mang fan ni rayog ni ngan nog ni gathi urngin ban’en e bm’ay fan?

⁴ Gathi urngin ban’en ma dariy fan ko piin ni ke kunuy boch e chugum u tharmiy ni tirok Got ban’en ya yad e pi tapigpig nib yul’yul’. (Matthew 6:19, 20) Boor pa’ u puluwrad ni baga’ fan ni fan ku Somol, ma re maruwel n’ey e gathi ra aw ni mm’ay fan. (1 Corinthians 15:58) Machane faanra gadad e Kristiano ni kad ognaged gadad ku Got, ma gad be par ni boor e maruwel rodad ni aram e maruwel ni ke pi’ Got ngodad ko ngiyal’ n’ey ni kan nog tin tomren e rran ngay? (2 Timothy 3:1) Ara sana kad folgad ko par ni ke mus nib thil boch ko piin ni buguli yoror rodad? Sana yad ma un ko yugu boch e teliw ma sana yad ba yul’yul’ boch ngay, ma yad ma un ko muulung rorad u gubin ngiyal’ ma yad ma guy rogon ni ngar folgad ko pi n’en ni kan nog ngorad nib t’uf ni ngara rin’ed. Mmutrug, ni gathi yad e pi tamachib ko thin nib m’ag ko Gil’ilungun Got. Dariy rorad e tamilangan’ nib puluw ni chiney e aram e tayim ni kan nog “tin tomren e rran ngay” ma der ma lemnag ni gad be par ko ngiyal’ ni ke buchuw e tayim riy.​—Daniel 12:4.

5. Faan manga ri gad ma lemnag ko u rogon ni nge mon’og e par rodad ko ngiyal’ ney, ma mang e thingarda rin’ed?

⁵ Ke yog Jesus Kristus boch e thin u murung’agen e ngiyal’ nib mo’maw’ ni gaar: “Chirofen ni bay e en ni Fak e Girdi’ e bod e n’en ni rin’ ko fa ngiyal’ i n’em nnap’an Noah. Ni bod rogon fapi rran ni ba aram ni immoy nga m’on ko fa ngiyal’ i n’em ni yib e ran nge tharey e binaw, un abich ma yibe garbod, ma be mabgol e pumoon nge ppin nge yan i mada’ ko rofen ni baaram ni yan Noah nga lan fare arke; machane kar dariy fannaged e n’en ni bay yib ngorad nge yan i mada’ ko ngiyal’ ni baaram ni yib e ran nge tharey e binaw nge fekrad ni yad gubin. Ere aram rogon e ngiyal’ ni baaram ni bay yib e en ni Fak e Girdi’ riy.” (Matthew 24:37-39) Ngan rin’ ni de pag rogon, ma dariy e kireb riy ni ngan abich nge ngan garbod, ma nguun mabgol ya aram e yaram ni Got e tababnag. (Genesis 2:20-24) Machane, faanra kad guyed ni kari magafan’dad ko uw rogon ni ngad mon’oggad ko re fayleng n’ey ni taabrogon ko yugu boch e girdi’, ma mang fan ni dabmu meybilgad? Rayog ni nge ayuwegdad Jehovah ni ngad ted Got nge Gil’ilungun nib m’on uwan’dad, ma ngada rin’ed e tin nib mat’aw, ma ngada rin’ed e tin kad micheged ngak.​—Matthew 6:33; Romans 12:12; 2 Corinthians 13:7.

Ngan Ognagey Nge Tin ni Kan Micheg Ku Got

6. Mang e kanawo’ ni boch e girdi’ ni kan taufenagrad e de yog ni ngar rin’ed e tin nib mil fan ngorad ku Got?

⁶ Boch e Kristiano ni kan taufenagrad e ba t’uf ni ngar meybilgad ku Got u fithik’ e yul’yul’ ya dar faned e yafas rorad ni ngar uned ko machib ni kar micheged ya aram e n’en ni ke m’agan’rad ngay ko ngiyal’ ni kar ognaged yad ku Got. Gubin e duw, mab pag 300,000 e girdi’ ni ma un ko taufe u lan in e duw in ke yan nge mada’ ko chiney, machane urngin e Pi Mich rok Jehovah e de m’ag rogon nib puluw ko re namba ney. Boch e girdi’ ni kar manged e pi tamachib kafram e kar talgad ko maruwel ni ngan machibnag fare thin nib fel’ ngak e girdi’. Machane, ra bagayad ma thingari un ko machib u fithik’ e yul’yul’ u m’on ni nge un ko taufe. Ere yad manang fare maruwel ni ke pi’ Jesus ngak pi gachalpen ni gaar: “Ere mmarod . . . ngam pingeged yad ngar manged pi gachalpeg, mi gimed taufenagrad nga fithingan e Chitamangiy nge Fak nge fare Kan ni Thothup, mi gimed fil ngorad rogon ni nguur folgad u gubin e tin ni ku gog ngomed ni nguum rin’ed.” (Matthew 28:19, 20) De kireb nfaanra boch e girdi’ e mo’maw’ ngorad ni ngar uned ko re maruwel ney ni bochan e ke yib e magawon ngorad nib gel, ara sana ke yib e m’ar ngorad nge yugu boch e magawon ni mo’maw’ ni ngan pithig. Machane urngin e piin ni dakuura pigpiggad ku Got nge Kristus u fithik’ e pasig e daki par rogon nib m’ag ko tin ni micheg ni ngar rin’ed ni fan ko fa en ni i Sunmiydad.​—Isaiah 43:10-12.

7. Mang fan ni thingarda muulunggad nga taabang u gubin ngiyal’ ni ngad liyorgad ko Got?

⁷ Israel ni kakrom e ir reb e nam ni kan ognag ku Got, ma u tan fare m’ag ko Motochiyel, ma girdi’ ni ma par riy e bay boch ban’en ni kar micheged ku Jehovah. Reb e motochiyel, e ke tay chilen ngak urngin e pumoon ni ngar muulunggad u taabang ko dalip e madenom u gubin e duw, ma reb e moon ni de un ko fare Paluk’af ni lem rok e “kan thirif u but’” ni kem’. (Numbers 9:13; Leviticus 23:1-43; Deuteronomy 16:16) Ran fol ko tin nib mil fan ngorad ni yad e girdi’ ni kar ognaged yad ku Got, ma piyu Israel e thingara muulunggad u taabang ni ngar pigpiggad ngak. (Deuteronomy 31:10-13) Dariy bang ko Motochiyel ni be gaar, ‘Ngam mu rin’ e re n’ey ni faanra ba m’ag ko yafas rom. Piin ni chiney ni kar ognaged yad ku Jehovah, e ba mudugil ni re motochiyel n’ey e ra ayuweg ni nge tomal e pi thin rok Paul ney uwan’rad ni gaar: “Ere nge bagadad ma ngi i lemnag bagadad, ma nge bagadad ma ngi i ayuweg bagadad ma be dag ngak nib t’uf rok ma be rin’ e tin nib fel’ ngak. Ma ngad guyed rogon ndab da paged e muulung rodad, ni bod rogon ni be rin’ boch e girdi’. Ma nge bagadad me pi’ athamgil nga laniyan’ bagadad, ngari gel ni fan e gimed be guy ni chirofen ni bay yib Somol riy e be chugur.” (Hebrews 10:24, 25) Arrogon, tin nib mil fan ngodad ni gadad e pi Kristiano ni kad ognaged gadad e ba muun ngay ni nguuda muulunggad u taabang.

Ngam Dugliy Ban’en Rogon nib Thabthabel!

8. Mang fan ni en ni kan taufenag ni kab pagal e ri thingari fal’eg i lemnag e pigpig ku Got ni be tay?

⁸ Sana gur reb e pagal ni kam ognagem ku Jehovah. Boor e taw’ath ni ra yib ngom ni faanra ngam tay nib m’on ko yafas rom e Gil’ilungun Got. (Proverbs 10:22) Ngam meybil ngam gonopiy urngin ban’en, ni rayog ni ngam fanay e yafas rom ngay ni ka gab pagal ko mit e pigpig u polo’ e yafas rom​—reb e kanawo’ nib fel’ ni ngam dag ni ga be lemnag e En ni Sunmiyem. Ra danga’, ma maruwel ni fan ni nge yoor e chugum rom e ra gagiyegnag e tayim rom nge lem rom. Bod rogon e n’en ni be rin e girdi’, sana ga ra un ko mabgol nib papey ma ga aw nga fithik’ e malfith ma aram rogon ma rayog ni nge yog boch e chugum ngom. Fare maruwel ni ma yib boor e salpiy riy ngom e sana ba t’uf ni ngam yoornag e tayim rom nge gelngim ngay. Faanra ke yog boch e bitir ngom, ma thingar mu ayuweg e tabinaw rom u lan in e duw ya ba mil fan ngom.(1 Timothy 5:8) Ma sana dam pagtalin e En ni i Sunmiyem, machane fel’ ni ngam nang ni ngam gonopiy e re n’ey u m’on, ya ra dabmu gonopiy ban’en, ma rayog ni nge gagiyegnag e re n’ey e yafas rom ko ngiyal’ ni kam ilal. Ngiyal’ ni kam pillibthir, ma ga ra sap nga tomur ma ga lemnag ni kab fel’ ni faanra kam fanay e yafas rom u nap’an ni ka gab pagal ni ngam pigpig ngak e En ni i Sunmiydad. Mang fan ni dabmu gonopiy e chiney e yafas rom nga m’on, ma aram rogon ma ra felan’um ko pigpig ni kam tay ni fan ku Jehovah u nap’an ni kagab pagal?

9. Mang e rayog ni nge buch ko fa en ni ke pillibthir e chiney ni kafram e kan pi’ ngak reb e maruwel nib gel u lan e ulung?

⁹ Ngam mu lemnag e pi n’en ney​—u murung’agen be’ ni ir e ma gafaliy “yu ran’ i saf rok Got.” (1 Peter 5:2, 3) Bochan ni ke yib boch e magawon ngak, me dugliy ni nga tal ko pi maruwel ney u lan e ulung. Riyul’, ni cha’ nem e ke pillibthir e chiney, ma ke gel e magawon rok ni nge un ko pigpig ku Got. Machane ku rayog ni nge athamgil ni nge yog ngak biyay e maruwel u lan e ulung, fa? Riyul’ ni boor e taw’ath e rayog ni nge pi’ e cha’ nem ngak yugu boch e girdi’ ni faan rayog ni nge un nga boch e maruwel u lan e ulung! Bochan ni dariy be’ ni ma par ni ke mus ni fan ngak, ya pi fager rok nge piin nib t’uf rok e ra falfalan’ nfaanra rayog ni nge yoornag e maruwel rok, ni fan ni nge pining e sorok ngak Got. (Romans 14:7, 8) Tin ni ri baga’ fan, e dabi pag Jehovah talin e n’en ni ke rin’ be’ ko pigpig ni i tay. (Hebrews 6:10-12) Ere, mang e ra ayuwegdad ni dabda paged talin e En ni Sunmiydad?

Pi Ayuw ni Dabda Paged Talin e En ni Sunmiydad

10. Mang fan ni fa en ni ta ulunguy e girdi’ e ri bay rogon ni nge pow’iydad ko u rogon ni rayog ni ngad lemnaged e En ni Sunmiydad?

¹⁰ Fa cha’ ni ta ulunguy e girdi’ e bay rogon ni nge pow’iydad rogon ni dabda paged talin e En Sunmiydad. Ke fulweg Jehovah e meybil ni tay u fithik’ e yul’yul’ ma aram e ke pi’ ngak e tamilangan’ nib pag rogon. (1 Kings 3:6-12) I yaliy Solomon nib fel’ rogon urngin ban’en nib m’ag ko yafas ko girdi’. Ma reb, ke thagthagnag Got ngak ni nge yoloy e pi n’en ni be pirieg ma aram rogon ma rayog ni nge fel’ rogon yugu boch e girdi’ riy. I yoloy ni gaar: “Ma gathi ke mus ni fa cha’ ni ta ulunguy e girdi’ i mang be’ nib gonop, ya ku ma fil ngak e girdi’ e tamilangan’ u gubin ngiyal’, me fal’eg i lemnag ma i fal’eg i gay, ma aram rogon ma rayog ni nge yoloy boor e thin ni ba yaram. Fa cha’ ni ta ulunguy e girdi’ e i guy rogon ni nge pirieg e pi thin ni nge rayog ni nge falfalan’ag be’ ma nge yoloy e pi thin nib puluw ma ba riyul’.”​—Ecclesiastes 12:9, 10, NW.

11. Mang fan ni thingarda folgad ko fonow nib gonop ni ke pi’ Solomon?

¹¹ Kan thiliyeg e pi thin ney ko Greek Septuagint ni be gaar: “Maku reb, e bochan ni fare tamachib e ba gonop, ma bochan ni ke fil e tamilangan’ ngak e girdi; ma aram rogon nra rung’ag tel e fanathin nib fel’, me fal’eg fare tamachib i gay nib gel ni nge pirieg e pi thin nra fel’ ma nge yoloy e pi n’en nib mat’aw​—mab riyul’.” (The Septuagint Bible, Charles Thomson i thiliyeg) Ke athamgil Solomon ni nge taw e tin nib fel’ nga gum’ircha’en e piin ni ma bieg e pi thin ni i yoloy nib fel’ ma riyul’ ni ri baadag e girdi’ ma boch e kenggin e fel’ rogorad riy. Bochan pi thin rok ni bay u Bible e ke thagthagnag e kan ni thothup, ma dariy e maruwar riy ni ffel’ uwan’dad boch ban’en ni ke pirieg nge boch e fonow nib gonop ni ke yoloy.​—2 Timothy 3:16, 17.

12. Uw rogon ni ngam weliy e thin ni ke yog Solomon ni bay ko Ecclesiastes 12:11, 12 ko thin rom?

¹² Yugu demtrug ni dariy e masin kakrom ni yima fanay ni ngan fal’eg e babyor, ma boor e pi babyor ni bay u nap’an ni immoy Solomon. Uw rogon ni ngan lemnag e pi babyor nem? Me gaar: “Fapi thin ko piin ni ba gonop e bod rogon e oxgoads, ma piin ni ma kunuy e pi thin nem e bod rogon e richib ni kan richibiy; ma fa en tagafaliy e saf ke pi’ ngorad e pi n’ey. Ma urngin ban’en e de chag ko re n’ey, fakag, ngam kol ayuw: Rani ngongliy e pi babyor ni boor ma dabi mus, ran tiyan’uy ngay ma yira gafgow riy.”​—Ecclesiastes 12:11, 12, NW.

13. Uw rogon ma thin ko piin ni bay e gonop rok Got rorad e taabrogon ko tin nib m’uth, ma mini’ e piin ni yad bod e “pi richib ni kan pirdiiy nga but’”?

¹³ Fapi thin rok e piin ni ke yog ngorad e gonop rok Got e bod rogon e oxgoads. Uw rogon? Pi thin ney e ma k’aring e piin ni ma bieg ara piin ni be motoyil ngay ni ngar mon’og gad u rogon nib puluw ko thin nib gonop ni kar bieged ara thin ni kar motoyilgad ngay. Maku, piin ni be par ni ma tiyan’ ko “pi thin ni kan kunuy,” ara pi thin ni riyul’ ni ba gonop ma baga’ fan, e bod rogon “fapi richib ni kan pirdiiy nga but’,” ara kan richibiy nib gel. Riyul’ ni aram rogon ya pi thin nib fel’ nem e ma dag e gonop rok Jehovah ma arfan ni rayog ni nge ayuweg e piin ni ma bieg ara ma motoyil ngay. Faan manga gur reb e llabthir ni bay madgun Got u wan’um, ma gathi ngam athamgil ni ngam ta’ re gonop ney nga laniyan’ nge gum’ircha’en e bitir rom?​—Deuteronomy 6:4-9.

14. (a) Mit i mang e babyor e dariy fan ni ngan “tiyan’uy ngay”? (b) Ma mang e babyor e thingarda tiyan’dad ngay, ma mang fan?

¹⁴ Ere, mang fan ni ke yog Solomon u murung’agen e pi babyor nem? Ya bochan, e yira taarebnag ko thin rok Jehovah, ma fapi babyor ko re fayleng ney ni dabi m’ay e lem ko girdi’ e bay riy. Ma aram lem ni baga’ ni ba m’ag ko lem rok Satan ni fare Moonyan’. (2 Corinthians 4:4) Ere, “ra gel e tiyan’” ko n’en ndabi yib angin nra par nib n’uw nap’an. Ma riyul’, ni boor ko pi babyor nem e rayog ni nge kirebnag e michan’ rodad. Bod rogon Solomon, ngada fal’eged i lemnag ko mang e be weliy e Thin rok Got u murung’agen e yafas. Re n’ey e rayog ni nge gelnag e michan’ rodad ma gad ra par nib chuchugur ku Jehovah. Ra ngam fanay e tayim rom ni boor ko yugu boch e babyor ara yugu boch ban’en ni yibe fil ma ra magar nagdad. Ma baga’ ni aram rogon nfaanra aram e yol ni lem rok e girdi’ nu fayleng ni likngin e ba togopuluw ko gonop rok Got ma arfan ni gathi bfel’ e re n’ey ma ra kirebnag e michan’uy ngak Got nge tin nib m’agan’ ngay. Ere, dabda paged talin ni yol ni ri baga’ fan ma ma yib angin u nap’an Solomon nge ngiyal’ n’ey e aram e thin ni be dag e gonop rok “fa en ma gafaliy e saf,” ni Jehovah Got. I pi’fa 66 ken Fapi Babyor nib Thothup, ma thingarda tiyan’dad ngay. Fare Bible nge boch e babyor ni ke ngongliy fare ‘sib nib yul’yul’ e ra ayuwegdad ni nge yog ngodad “fare tamilangan’ rok Got.”​—Proverbs 2:1-6.

Tin ni Kad Micheged ku Got nib Polo’

15. (a) Uw rogon ni ngam weliy e pi thin rok Solomon u murung’agen “e tin nib mil fan ko girdi’ ni urngin”? (b) Mang e thingarda rin’ed ma aram rogon ni rayog ni ngad rin’ed e tin ni ba mil fan ngodad ku Got?

¹⁵ Facha’ ni ta ulunguy e girdi’, ni Solomon, e i sumarnag urngin ban’en me fleg i yaliy, me gaar, “U tungun urngin ban’en ni kan rung’ag e baaray rogon: Ngeb madgun e bin riyul’ e Got uwan’uy muun fol ko pi motochiyel rok, ya ireray e maruwel ko girdi’ nib polo’. Bochan ni fare Got ni riyul’ e ra pufthinnag urngin mit e maruwel nge mada’ ko tin nib mith, ni demtrug ko ba fel’ fa ba kireb.” (Ecclesiastes 12:13, 14, NW) Fare ma rus nib fel’, ara n’igin ni ngan tay fan e En ni Sunmiydad ma ra yororiydad, ma gad be athapeg ni tabinaw rodad e ba muun ngay, ni dab darod ko kanawo’ ko piin ni ba balyang nrayog ni nge fek boch e oloboch ndan lemnag i yib ngodad nge kirban’ nge ngak e piin nib t’uf rodad. Madgun Got nib fel’e ba machalbog ma aram e tabolngin e gonop nge tamilangan’. (Psalm 19:9; Proverbs 1:7) Faanra bay e tamilangan’ rodad ni kad filed u Bible ma gad ra fol ko pi fonow ni bay riy ko urngin ban’en ni gad ra rin’, ma aram gad be rin’ e “maruwel rodad ni urngin” ni fan ku Got. Danga’, de t’uf ni ngan yoloy nga babyor e pin’en ni thingarda rin’ed. Machane, tin nib t’uf ni ngad rin’ed e aram e ngad fanayed e thin rok Got ni nge pow’iydad u rogon ni ngad pithiged e pi magawon nra yib ngodad ma ngad rin’ed ban’en u gubin ngiyal’ nib puluw ko kanawo’ rok Got.

16. Uw rogon ni nge pufthinnag Jehovah ban’en?

¹⁶ Thingarda nanged ni dariy ban’en ni dabi guy fa En ni ke Sunmiydad. (Proverbs 15:3) Ra “pufthinnag urngin mit e ngongol ni ke rin’ e girdi’.” Arrogon, fa En ni th’abi tolang e ra pufthinnag urngin ban’en, ni ba muun ngay e pi n’en nib mith u owchen e girdi’. Ya ra nang e pi n’en n’ey ma ra k’aring laniyan’uy ni ngan fol ko motochiyel rok Got. Machane t’ufeg rodad ku Got e susun aram e som’on nra k’aringdad ni ngad folgad ko thin rok, ya ke yoloy John ni apostal ni gaar: “Ya baaray fan ni nge t’uf Got rodad, fan e ngad folgad ko ni ke yog ni ngad rin’ed; ma ti ni ke yog ni ngad rin’ed e gathi rib mo’maw.” (1 John 5:3) Ma bochan ni kan pi’ e motochiyel rok Got ngodad ni nge fel’ rogodad riy, me re ba tamilang ni gathi kemus ni ngad folgad riy ya ba puluw ni ngad rin’ed e pi re n’ey ma rriyul’ ni aram e n’en nib gonop. Ma gathi ban’en nib tomal u puluwon e piin ni ba t’uf e fa En ni Sunmiy urngin ban’en rorad. Ya yad ba adag ni ngar rin’ed e maruwel rorad nib mil fan ko cha’nem.

Ngam Rin’ Urngin Ban’en nib Mil Fan Ngom

17. Mang e gad ra rin’ ni faanra riyul’ ni gad baadag ni ngad rin’ed e tin nib mil fan ngodad ku Got ni urngin?

¹⁷ Faan manga gad ba gonop ma riyul’ ni gad baadag ni ngad rin’ed e tin nib mil fan ngodad ku Got ni urngin, ma gathi kemus ni ngad folgad ko motochiyel rok, machane riyul’ ni faanra bay madgun Got uwan’dad ma dabda rin’ed e tin ni dubun. Ma riyul’ ni nge yib “madgun Got uwan’uy e aram e tabolngin e gonop,” ma piin ni ma fol ko pi motochiyel rok e yad ba “llowan’.” (Psalm 111:10, NW; Proverbs 1:7) Ere ngad rin’ed urngin ban’en u fithik’ e gonop ma gad fol ku Jehovah ko urngin ban’en. Ma ri baga’ fan e re n’ey e chiney, ya fare Pilung ni Jesus Kristus e bay, ni ke dugliy Got ni ir e ra pufthinnag e girdi’ ma chirofen ni pufthin e ke chuchugur.​—Matthew 24:3; 25:31, 32.

18. Mang angin ni ra yib ngodad ni faan gad ra rin’ e tin ni ba mil fan ngodad ku Jehovah ni urngin?

¹⁸ Ra bagadad ma be yaliy Got e n’en ni be’. Gad ma lemnag e tirok Got ban’en, ara kada paged nifengin e fayleng e ke kirebnag thildad Got? (1 Corinthians 2:10-16; 1 John 2:15-17) Demtrug ko ka gad ba bitir fa kad pillibthirgad, ma ngad rin’ed urngin nrayog rodad ngad falfalan’aged e En ni Sunmiydad. Faan gad ra folrok Jehovah ngad rin’ed e motochiyel rok, ma aram e gad palog ko pi n’en ni bay ko fayleng ni tin kakrom ni dariy fan. Ngemu’ ma rayog ni ngad tedandad ko athap rodad nga m’on ni aram e yafas ni manemus ko m’ag ni biech ni ke micheg Got ngodad. (2 Peter 3:13) Aram e pi taw’ath ni rib fel’ ni fan e piin ni be rin’ e tin nib m’agan’ Got ngay ni kar lebguyed e tin kar micheg ku Got!

Uw Rogon ni Ngam Pi’ e Fulweg?

◻ Mang fan ni nga mog ni gathi ra aw ni mm’ay fan?

◻ Mang fan ni fa en Kristiano ni kab pagal e thingari fal’eg i lemnag rogon e pigpig ku Got ni be tay?

◻ Mit i mang e babyor e dariy fan ni ngan “tiyan’uy ngay”?

◻ Mang e “tin nib mil fan ngak e girdi’ ni urngin”?

[Picture on page 14]

Gathi urngin ban’en e ra aw ni mm’ay fan ngak e piin ni be pigpig ku Jehovah

[Picture on page 17]

De taab rogon ko pi babyor ko re fayleng n’ey, ma Thin rok Got e be pi’ athamgil nga laniyan’dad ma ra fel’ rogodad riy