Ngam Mu Lemnag Fa En Ni Ga’ Ni Ir E Sunmiyem

“Mu lemnag e chiney, e Ani Sunmiyem . . . u m’on ni nge yib e pi rran nib mo’maw’.”​—ECCLESIASTES 12:1, New World Translation.

1. Uw rogon ni nge fanay e piin ni kab pagal ni kar ognaged yad ku Got e yafas rorad nge gelngirad?

MA PI’ Jehovah gelngin ngak e pi tapigpig rok ni fan ni ngar rin’ed e tin nib m’agan’ ngay. (Isaiah 40:28-31) Ma riyul’ ni aram rogon ni yugu demtrug ko in e duw rorad. Machane piin ni kab pagal ni kar ognaged yad ku Got e thingara adaged ni ngar fanayed gelngirad u rogon nib gonop. Aram fan, ni kar ted nga gum’ircha’rad fare fonow ko “fare ta ulunguy e girdi’,” ni Solomon ni Pilung nu Israel kakrom. Ke yog ni gaar: “Mu lemnag e chiney, e En ni Sunmiyem ko ngiyal’ ni ka gab pagal, u m’on ni nge yib e pi rran nib mo’maw’, ara yib e pi duw ni ga ra gaar: ‘Ke chuwan’ug ko biney e tamilang.’ ”​—Ecclesiastes 1:1; 12:1, NW.

2. Mang e thingari rin’ e pi bitir ko piin Kristiano?

² Fare fonow ni ke pi’ Solomon ni ngan lemnag e En ni Sunmiyey u nap’an ni ka yab pagal e kan pi’ nsom’on ngak e piin ni pagal nge piin ni rugod nu Israel. Kan gargelnagrad u lan reb e nam ni kan ognag ku Jehovah. Uw rogon e pi bitir ko piin Kristiano ni kar ognaged yad ku Got ko ngiyal’ ney? Ba mudugil, ni yad ma lemnag e En ni Sunmiyrad. Faan yad ra rin’ e re n’ey, ma kar ted fan ma ku ra fel’ rogorad riy.​—Isaiah 48:17, 18.

Tin nib Fel’ Kakrom

3. Mang e tin nib fel’ ni ke dag Joseph, nge Samuel, nge David?

³ Boor e piin ni ba fel’ yangaren kakrom u Bible ni kar daged rogon ni ur lemnaged e En ni Sunmiyrad. Ka nap’an ni ka ba pagal i yan nga m’on, ma Joseph ni fak Jakob e ma lemnag e En Tasunmiy. Nap’an ni yib fare ppin rok Potiphar i wawliy Joseph ni ngar parew, ma de maruwaran’ ni nge togopuluw ngak me gaar: “Uw rogon ni nggu ngongliy e binir e ngongol nib kireb ni aram e kug denen nib togopuluw ngak Got?” (Genesis 39:9) Samuel ni ir reb e Levite e ke lemnag e En ni Sunmiy ni gathi ke mus u nap’an ni kab bitir ya ke par ni aram rogon nge mada’ ko ngiyal’ ni ke yim’. (1 Samuel 1:22-28; 2:18; 3:1-5) David ni be’ nu Bethlehem e nap’an ni kab pagal mab mudugil ni ma lemnag e En ni Sunmiy. Kan guy ni be pagan’ ku Got u nap’an ni ke cham ngak Goliath ni ir reb e giant nu Philistine, me gaar: “Kam fek e sayden nge sarey ni yima rogoy nge sarey ni yima yin’, machane gag e ku gub ngom u fithingan Jehovah ni ir e Got ko salthaw rok piyu Israel, ni ga be dariyfannag. Daba’ e nge piem Jehovah nga paag, ya bay gu gel ngom mu gu th’ab e k’ong rom nggu luf lolugem; . . . ma ra nang e girdi’ u ga’ngin yang e fayleng ni piyu Israel e bay e Got rorad. Ma urngin e girdi’ ni bay u roy ni bay ra guyed ndariy fan e sayden nge sarey ni nge maruwel Jehovah ngay nge ayuweg e girdi’ rok, ya ma gel ko mahl, ma bayi pi’med ni gimed gubin nga pa’mad.” De n’uw nap’an, me yim’ Goliath, me mil piyu Philistine.​—1 Samuel 17:45-51, NW.

4. (a) Mang e be dag ni de pagtalin fare rugod ni ir be’ nu Israel ni kan kalbusnag u Syria nge fare Pilung ni kab pagal ni Josiah e En ni Sunmiydad? (b) Uw rogon ni ke dag Jesus u nap’an ni ke 12 e duw rok ni de pagtalin e En ni Sunmiy?

⁴ Ma yugu be’ ni dawori ilal ni ke lemnag e En ni Sunmiy e aram e reb e rugod nu Israel nib kalbus. Ba manigil e n’en ni ke weliy ngak fare ppin rok Naaman ni ir e baga’ lungun ko pi salthaw nu Syria me yan nge guy e profet rok Got, ma kan golnag ko m’ar rok ni daraw, me mang e tapigpig ku Jehovah. (2 Kings 5:1-19) Reb e Pilung ni kab pagal ni Josiah e der rus ni nge ayuweg nge gel fare liyor ni machalbog ni fan ku Jehovah. (2 Kings 22:1–23:25) Machane fa cha’ ni ke lemnag e En ni Sunmiy u nap’an ni kab pagal e aram Jesus nu Nazareth. Mu lemnag ko mang e ke buch u nap’an ni ke 12 e duw rok. Gallabthir rok e kar fekew fa cha’ i Jesus ngar ranod nga Jerusalem ni fan ko fare Paluk’af. Ma nap’an ni yad be sul ko binaw rorad, ma kar nanged ni ke sor Jesus nga ba yang; ere kar sulow ni ngar guyew. Nap’an ni taw ko bin dalip e rran, mar piriegew Jesus u lan fare temple ni be fith boch e deer ngak e pi tamachib u rom. Ma ke fulweg e deer ni ke fith e chitiningin ngak u fithik’ e kireban’, ni gaar: “Mang ni ngam gayew gag? Da mu nangew ni thingar gub gu par nga naun rok e Chitamag?” (Luke 2:49) Bay angin ni nge fil Jesus e tamilangan’ nib m’ag ko tirok Got ban’en u temple, ni ‘fare naun ko Chitamangin.’ Ngiyal’ n’ey, ma fare Kingdom Hall ko Pi Mich rok Jehovah e aram gin nib fel’ ni ngan fil e tamilangan’ riy u murung’agen e Ani Sunmiy urngin ban’en.

Ngam Mu Lemnag Jehovah e Chiney!

5. Uw rogon ni ngam weliy ko thin rom e n’en ni ke yog fare ta ulunguy e girdi’ ni bay ko Ecclesiastes 12:1?

⁵ Fa en ni ma pigpig ku Jehovah u polo’ i gum’ircha’en e baadag ni nge pigpig ngak ni dabi adbey e tayim ma nge fanay urngin e rran ni ka bay rok ni fan ku Got. Machane, mang e n’en ni bay yib ngak be’ ni kab pagal ni be fanay e yafas rok ko tin ni dariy fan ya ke pagtalin e En ni Sunmiy urngin ban’en? Kan thagthagnag nga laniyan’ fa en ni ta ulunguy e girdi’, me gaar: “Mu lemnag e chiney, e En ni Sunmiyem ko ngiyal’ ni ka gab pagal, u m’on ni dawor mu taw ko pi rran nib mo’maw’, ara yib e pi duw ni bay mog ni ngam gaar: ‘Ke chuwan’ug ko biney e tamilang.’ ”​—Ecclesiastes 12:1.

6. Mang e mich riy ni gali cha’ ni kar pillibthirgow ni Simeon nge Ana e kar lemnagew e En ni ke Sunmiyrow?

⁶ Dariy be’ ni ba falfalan’ ko “fapi rran nib mo’maw’” ko ngiyal’ ni ke pillibthir. Machane piin ni kar pillibthirgad ni ma lemnag Got u gubin ngiyal’ e ba falfalan’. Bod rogon fa cha’ ni ke pillibthir ni Simeon, me dibey fa chi tir ni Jesus u tempel me yog e thin u fithik’ e falfalan’ ni gaar: “Somol, chiney e kam rin’ e tin ni mog ni bay mu rin’, ere mpageg i gag e tapigpig rom nggu wan u fithik’ e gapas. Ya kug guy nga owcheg e en ni kam pi’ ni ir e nge thapeg e girdi’ ngom, ni ir e kam ngongliy rogon u p’eowchen urngin e nam, ni ir e tamilang ni nge dag e kanawo’ rom ngak e piin ni gathi yad piyu Israel me gilnag buguwan e girdi’ rom ni piyu Israel.” (Luke 2:25-32, NW) Maku Ana ni ke meruk i ragag nge aningeg e duw rok e de pagtalin e En ni Sunmiy. Ma par u tempel u gubin ngiyal’ ma immoy u rom u nap’an ni kan fek fa chi tir ni Jesus i yib. “Ka re ngiyal’ i n’em me chugur e re ppin n’ey i yib me pining e magar ngak Got, me weliy murung’agen fare tir ngak urngin e girdi’ ni yad be sonnag Got ni nge chuweg yu Jerusalem u pa’ e toogor rok.”​—Luke 2:36-38.

7. Uw rogon salpen e piin ni kar pigpiggad ku Got nib n’uw nap’an ma kar pillibthirgad e chiney?

⁷ Pi Mich rok Jehovah ko ngiyal’ n’ey ni kar pillibthirgad, ni kar pigpiggad ku Got nib n’uw nap’an, e dabi siy ni ke yib e gafgow ngorad ma boor ban’en ni dabkiyog ni ngara rin’ed nbochan e ke yoor e duw rorad. Machane, ri yad ba falfalan’ ko n’en ni kar rin’ed, ma ri gad be tay fan e pigpig ni kar ted! Bay rorad “fare falfalan’ rok Jehovah,” ya ke mudugil laniyan’rad ni ke fanay gelngin u roy u fayleng ni aram e gelngin ni dariy ban’en nrayog ni nge taleg ma ke tay Jesus Kristus ni nge mang Pilung nu tharmiy nib gel. (Nehemiah 8:10) Chiney e ke taw ko ngiyal’ ni piin bitir nge piin pillibthir e ngar folgad ko fonow ni gaar: “Gimed e pagal nge rugod, nge piin pillibthir maku arrogon e piin ni bitir. Yad urngin ni ngar pininged e sorok nga fithingan Jehovah, ya fithingan e ir e th’abi ga’ u fithik’ urngin e ngochol. Ma feni sorok e ba tolang ko fayleng nge tharmiy.”​—Psalm 148:12, 13, NW.

8, 9. (a) De fel’ “fapi rran ni ba mo’maw’” ko mini’, ma mang fan ni aram rogon? (b) Uw rogon ni ngam weliy e thin ni bay ko Ecclesiastes 12:2?

⁸ “Fapi rran nib mo’maw’” ko piin ni kar pilibthirgad e der ma yib e falfalan’ riyngorad​—sana ma yib e kireban’ nib gel—​ngak e piin ni der ma lemnag e En ni Sunmiyrad nge piin ni dar nanged fan e tin nib m’agan’ Got ngay. Dariy e tamilangan’ rorad ko tirok Got ban’en nrayog ni nge ayuwegrad ni ngar pared nib thabthabel ko pi skeng ni ma yib ko piin pillibthir nge gafgow ni be magawonnag e girdi’ nbochan kan nin’ Satan u tharmiy nga but’. (Revelation 12:7-12) Arfan, ni fa en ni ta ulunguy e girdi’ e be fonownagdad ni ngad lemnaged e En ni Sunmiydad “u m’on ni nge 1’ay ramaen e yal’ nge tamilang e dakuriy ma ke m’ay ramaen e pul nge ku arrogon e pi t’uf, ma ra sul e manileng biyay u tomren ni ke aw e n’uw.” (Ecclesiastes 12:2) Mang fan e pi thin n’ey?

⁹ Ke taarebnag Solomon e piin ni kab pagal ko summer u Palestine ya aram e tayim ni yal’, nge pul, nge pi t’uf u rom e be mat ramaen u lan e lang ya dariy e manileng riy. Urngin ban’en ma rib tamilang. Nap’an ni ke pillibthir be’, ma pi rran rok e bod ni be par ni ba garbeb, ma be aw e n’uw, ya gubin ngiyal’ ma bay e magawon. (Job 14:1) Rib gel e kireban’ ni ngan nang e En ni Sunmiy urngin ban’en machane dan pigpig ngak u nap’an ni yafas e ka be par ni taareb rogon ko ngal’an e yal’ ni kab tamilang! Ma yafas ku be’ ni ke pillibthir ni bod rogon ngal’an e aw e n’uw, ya urngin ban’en ma be par nib lumor, ma ri aram rogon e piin ni kar adbeyed e tayim rorad u nap’an ni ka yad ba pagal nbochan ni kar pared ni boor pa’ u puluwrad ko tin ndariy fan. Yugu demtrug ko in e duw rodad, ma ngad ‘folgad ku Jehovah ni nge mus mus rogodad riy,’ ni bod Caleb, ni ma un ngak Moses ni profet u fithik’ e yul’yul’.​—Joshua 14:6-9.

Pi Magawon ko Be’ ni Ke Pillibthir

10. Mang e be yip fan (a) “fare matanag ko naun”? (b) “fapi pumoon nib gel gelngirad”?

¹⁰ Ma bin migid e ke weliy Solomon e pi gafgow ni ma yib “ko ngiyal’ ni pi matanag ko naun e bayi par ni be t’on, ma pi pumoon ni ba gel gelngirad faram e kar bugbugad, ma piin ni ppin ni ma bilig ban’en e kar talgad ko maruwel rorad ya ke buchuw e piin ta maruwel, ma piin ni ppin ni bay u winda ni be sap nga wen e kar guyed ni ke lumor urngin ban’en.” (Ecclesiastes 12:3, NW) Fare “naun” e be yip fan fare dowef ku be’. (Matthew 12:43-45; 2 Corinthians 5:1-8) Ma “piin ni matanag” e aram e pa’ nge buguli pa’, ni be ayuweg fare dowef ma ma pi’ e pi n’en nib t’uf. Faanra ke pillibthir be’ ma baga’ ni ma dada’ pa’ ya ke meewar, ma ke tarus, ma ke yaf. Ma “piin ni pumoon ni yad ba gel”​—ni aram e ayiy—​ma daki par nib gel ni bod rogon e duga’ ko naun ya ke war buguy ma yima yan u but’ ni bod ni yibe girngiy ayiy. Machane, gathi ga be falfalan’ ni ngam guy e pi walag ni kar pillibthirgad u nap’an e muulung?

11. Rogon ni kan weliy ko thin ni be yip fan ban’en, ma mang “fapi ppin ni be bilig ban’en” nge “fapi ppin ni bay u winda ni be sap nga wen”?

¹¹ “Fapi ppin ni ma bilig ban’en e kar talgad ko maruwel ya ke buchuw e piin ta maruwel”​—machane uw rogon? Nguwaley e ke kireb ni ke mungun ara kar in e ka ba’. Ke mo’maw’ ni nge yengyeng e ggan ara dabkiyog. “Fapi ppin ni bay u winda ni be sap nga wen”​—ni aram e pi owchey mab muun ngay fare lem ni ma ayuwegdad ni ngad guyed ban’en—​dabkiyog ni ngan guy nib fel’ rogon, nfaanra dawori gel e lumor riy.

12. (a) Mang fan e n’en ni yima yog ni “fapi mab ni fan ni ngan sap nga kanawo’ e kan ning”? (b) Mang e ga be lemnag u murung’agen e pi ta machib ni kar pillibthirgad?

¹² “Ma,” aram fare ta ulunguy e girdi’ e ki ul’ul ngay ni gaar, “fapi mab ni ngan guy fare kanawo’ riy e kan ning ma lingan e bil ggan e ke achichig, ma yugu ra non reb e arche’ ma kan od, ma urngin e rugod ko tang e ke achichig lamrad.” (Ecclesiastes 12:4) Fa gali mab ni l’uguney​—ni aram e dape’ l’uguney—​e dabkiyog ni ngan bing u gubin ngiyal’ ara ri dabkiyog ni ngan bing ni nge yog e thin ni ngan nang ko mang e n’en ni bay u lan fare “naun,” ara dowef, ko piin ni kar pillibthirgad ni der ma pigpig ku Got. Dariy ban’en ni rayog ni ngan pi’ ko “fare kanawo’” ni aram e pi girdi’ u wen. Machane, uw rogon e piin pillibthir ni ma un ko machib u fithik’ e pasig? (Job 41:14) Sana yad ma yan u but’ nib sasagaal u nap’an ni yad be un ko machib u mit e tabinaw iyan ma boch i yad ma mo’maw’ ni ngar nonad, machane ba mudugil ni yad be pining e sorok ngak Jah!​—Psalm 113:1.

13. Mang yugu boch e magawon ko piin ni kar pillibthirgad ni be weliy fa en ni ta ulunguy e girdi’, machane riyul’ ni uw rogon salpen e piin Kristiano ni kar pillibthirgad?

¹³ Ke achig lingan e bil ggan ko ngiyal’ ni ga be yengyeng e ggan ko yig ndakuriy e nguwal riy. Ma en ni ke pillibthir e dabkiyog ni nge mol nib fel’ rogon. Mus nga laman e arche’ ni be non e ra magawonnag e cha’ nem. Ke buchuw e tang nrayog ni nge yin’, ku ma yin’ e tang nib sagaal. “Urngin e rugod ko tang”​—ni aram fare melodic notes—​“e ke achig laman.” Ma piin ni kar ilalgad e ke sagaal telrad ni ngar rung’aged e tang nge tang ni be yin’ yugu boch e girdi’. Machane, piin ni kan dugliyrad ni kar pillibthirgad nge yugu boch e girdi’ ni ma un ngorad, maku boch i yad e gathi piin ni kab pagal, ma ka yad ma yin’ e tang ni baga’ lamrad u nap’an e muulung rorad. Ma aram e tang ni ma pining e sorok ngak Got. Ri gad be falfalan’ ni yad bay u toobdad, ni yad be n’uf Jehovah u lan e ulung!​—Psalm 149:1.

14. Ma nge marus e pillibthir ngay me tomal laniyan’rad?

¹⁴ Uw fene gel e kireban’ riy ni boor e piin pillibthir, ni baga’ ni tin ni baaray ni yad ma dariyfannag e En ni Sunmiy urngin ban’en! Fa cha’ ni ta ulunguy e girdi’ e ke yog ni gaar: “Maku, bay ra rusgad ko yungi n’en nib tolang, mus ko yan u kanawo’ ma yima rus. Ku ke yib e floras ko fare gek’iy ni Almon, ma fare asmen’ning e be yan u but’ ni bod ni be gathir u but’, ma ke yib boor wom’ngin, nbochan ni girdi’ e be yan u but’ nge yan nga naun rok ni manemus ma piin ni yad be dolo’loy e yad be liyeg fa yu pa’ i kanawo’.” (Ecclesiastes 12:5, NW) U daken e tawo’ nib tolang, ma boor e pillibthir ni ma rus ni ri mul nga but’. Ma mus ni faan yad ra sap nga ban’en nib tolang ma ra yib e balyang nga owcherad. Faanra ba t’uf ni ngar ranod nga kanawo’ ni bay boor e girdi’ riy, ma yad ma rus ni ngar maadadgad ara bay boch e girdi’ ni moro’ro’ ni ngar magawonnaged yad.

15. Uw rogon ni “fare gek’iy ni almond e ke yib e pi floras riy,” nge uw rogon ni fare asmen’ing e ‘be yan ni be girngiy downgin u but’?

¹⁵ Ma fare pumoon ni ke pillibthir, ni yima yog ni “fare gek’iy ni almond ni ke yib e floras riy,” e ba tamilang ni be yip’ fan ni ke mana’ piyan lolugen, ma munmun ma kari wech wech. Ma piyan lolugey ni ke mana’ e mungun nga but’ ni taabrogon ko floras nib wech ko fare gek’iy ni almond. Bochan ni ma ‘gathir u but’,’ ma sana ke bugbug keru’ ma ke pag pa’ nga but’ ara ke tay pa’ nga doorlen ma ke buguy bugun pa’, ere ke bod yaan e asmen’ing. Ere faanra bagadad ma aram rogon yaan, mu pag ni nge poydad yugu boch e girdi’ ni gad bang ko ulung rok Jehovah’ ni kan nog e pi asmen’ing nib machreg ngodad!​—Mu guy fare The Watchtower, May 1, 1998, ko pages 8-13.

16. (a) Mang fan fare bugithin ni ‘ke pilpil fare caper berry’? (b) Mang fare “naun ni manemus,” rok be’ ma mang e pow ni be dag ni ke chuchugur ni nge yim’ be’?

¹⁶ Fa en ni ke pillibthir e gathi ri baadag ni nge kay ban’en, yugu demtrug ni fare ggan ni kan tay nga p’eowchen e ba fel’ ni taab lamen ko fare caper berry. Re wom’ngin nem ni berry e ke n’uw nap’an ni yima fanay ni fan ni nge ayuweg be’ ni nge adag e abich. ‘Bochan ni ke pil fare caper berry’ ma biney e be micheg ni ke dubuy be’ ni ke pillibthir e abich, ma re wom’ngin n’ey e ku dabiyog ni nge ayuweg nge adag e abich biyay. Ma pi n’en n’ey e be dag ni be chuchugur iyan “ko naun rok ni manemus,” ni aram fare low ko yam’. Ra mang naun rok e re n’ey ni manemus ni faanra ke pagtalin e Eni Sunmiy urngin ban’en me fol ko kanawo’ nib kireb ma aram rogon dabi sulweg Jehovah e yafas rok u nap’an e fas ko yam’. Fapi pow ni be dag ni ke chuchugur ni nge yim’ be’ ni ke pillibthir e aram e laman u fithik’ e kireban’ ni ma gilgel’.

17. Uw rogon ni ke math’ “fare chen ni silver”, ma sana “fare bowl ni gol” e be yip fan e mang?

¹⁷ Kan fonownagdad ni dabda paged talin e En ni Sunmiydad “u m’on ni nge math’ e chen ni silver, nge u m’on ni nge pil fare bowl ni gol, nge u m’on ni nge pil fare rume’ ko alublub, nge u m’on ni nge pil fare waterwheel ni fan ko luwed.” (Ecclesiastes 12:6) Fare “chen ni kan ngongliy ko silver” e sana e be yip fan fare spinal cord. Ba mudugil ni nge yim’ be’ nfaanra ke kireb ni dabki fel’ fare kanawo’ ni ma yan gelngin ko man’ey. Fare “bowl ni gol” e be yip fan fare man’ey, ni bay u lan fare lo’, nib peth ko fare fare spinal cord. Bochan ni gol e ba tolang pulwon, ere ku arrogon fare man’ey nfaanra ke tal ko maruwel rok mi nim’.

18. Mang fan fare “rume’ ni bay ko alublub,” ma mang e ra buch ko ngiyal’ ni ke pil e re n’ey?

¹⁸ “Fare rume’ ko alublub” e aram fare gum’ircha’, ni ma yan e racha’ nga langin ma ma wereg biyay e re n’ey nga urngin yang u dowey. Faanra yim’ be’, ma gum’ircha’en e bod ba rume’ ni bay ko alublub ni ke pil ya dabki yog ni nge pomnag e yan e racha’ nga langin ni nge wereg biyay ni aram e n’en nib t’uf ko dowef ni nge par nib fel’ rogon. Fare ‘waterwheel ni fan ko fare luwed ni ke kireb’ e dabki chel, ma dabkiyog ni nge wereg e racha’ ni aram e n’en ni be ayuwegey ni nge par be’ nib fas. Ere i dag Jehovah ngak Solomon ko u rogon ni ngan wereg e racha’ u dowey kakrom u m’on ni ke dag fare togta ni William Harvey e re n’ey ko fa bin 17 e chibog.

19. Uw rogon ni fare bugithin ko Ecclesiastes 12:7 e ba m’ag ko yam’?

¹⁹ Me ulul fare ta ulunguy e girdi’ ngay ni gaar: “Nge mu’ ma ra sul fare fiyath nga but’ ni taab rogon ko tabolngin ma fare marchaal e ra sul ngak e bin riyul’ e Got ni riyul’ ya ir e ke pi’.” (Ecclesiastes 12:7, NW) Bochan ni ke pilpil “fare waterwheel”, ma fare dowef, ni kan ngongliy ko fiyath, e ra sul ko but’ biyay. (Genesis 2:7; 3:19) Ma ke yim’ fare yaal ma fare marchaal, ara gelngin e yafas, ni Got e ke pi’ e ke sul ngak me par rok e En ke Sunmiydad.​—Ezekiel 18:4, 20; James 2:26.

Mang e Be Sonnag e Pi Cha’ ni Dawora Paged Talin Got?

20. Mang e ke ning Moses ko ngiyal’ ni be meybil ni bay ko Psalm 90:12?

²⁰ Rib fel’ rogon ni dag Solomon ngodad ko uw fene ga’ fan ni dabda paged talin e En ni Sunmiydad ni Ani Ga’ rodad. Riyul’ ni ke mus ni yafas nib ngoch mab wagey e gathi karimus ara’ ku ra yog ngak e piin ni yad ma lemnag Jehovah ma ma rin’ e tin nib m’agan’ ngay u polo’ i gum’ircha’rad. Yugu demtrug ni yad e piin ni kab pagal fa kar pillibthirgad, ma lem rorad e taab rogon ko birok Moses e lem ni i meybil ni gaar: “Mu ayuwegmad nggu pired ko biney e tamilang nge yog ni yib e gonop ngomad.” Fare profet rok Got nib sobut’an’ e riyul’ ni baadag ni nge dag Jehovah ngak, ara nge fil ngak, nge piin ni yad piyu Israel rogon ni ngar daged e gonop ma yad tay fan ‘fapi rran ko yafas rorad’ ni ngar fanayed e pi n’en n’ey ko tin nib puluw ko kanawo’ rok Got.​—Psalm 90:10, 12.

21. Faanra ngad theeged e duw rodad ni fan ni ngad n’ufed Jehovah, ma mang e susun ni ngad rin’ed?

²¹ Piin Kristiano ni baga’ ni tin ni kab pagal e ba t’uf ni ngara motoyilgad ko fonow ni ke pi’ e en ni ta ulunguy e girdi’ ni ngar lemnaged e En ni Sunmiy urngin ban’en. Ka bay boor e tayim rorad ni ngar pigpiggad ku Got! Machane demtrug ko in e duw rodad, ma faanra kad filed rogon ni ngad theeg e pi rran rodad ni ngad n’ufed Jehovah e ngiyal’ n’ey ni “tin tomren e rran,” ma ku rayog ni ngad ul’ulgad ni ngad theeged iyan e duw rodad ni dariy n’umngin nap’an. (Daniel 12:4; John 17:3) Thingar dabda paged talin e Ani Ga’ ni i Sunmiydad ma aram rogon ma ra riyul’ e re n’ey. Maku thingarda rin’ed ku Got urngin e tin ni ba mil fan ngodad.

Uw Rogon ni Ngam Pi’ e Fulweg?

◻ Mang fan ni kan pi’ e athamgil nga laniyan’ e piin ni kab pagal ni dabra paged talin e En ni Sunmiyrad?

◻ Mang e be dag e Bible u murung’agen e piin ni dar paged talin e En ni Sunmiyrad?

◻ Mang boch e magawon ni ma yib ko piin ni kar pillibthirgad ni ke weliy Solomon?

◻ Mang e bay nga m’on ko piin ni ma lemnag Jehovah?

[Pictures on page 9]

David, nge fare rugod ni ir be’ nu Israel, nge Ana, nge Simeon e dar paged talin Jehovah

[Pictures on page 10]

Pi Mich rok Jehovah ni kar pillibthirgad e yad be pigpig ngak e En ni Sunmiydad u fithik’ e t’ufeg