Ngam Bieg Fare Babyor Ni Revelation U Fithik’ E Falfalan’

“Nge felan’ e en nra bieg e re ke babyor n’ey, ma nge felan’ e piin ni yad ra motoyil ko pi thin ni yib rok Got ni be weliy e tin ni bayi m’ug mi yad fol ko n’en ni kan yoloy nga lan e re ke babyor ney.”​—REVELATION 1:3.

1. Uw rogon e par rok John ni apostal u nap’an ni ke yoloy fare babyor ni Revelation, ma mang fan ni kan yoloy nga babyor e tin ni ke guy?

“I GAG JOHN . . . e kan tiyeg nga daken bochi nam ni Patmos fithingan ni bochan e ug weliy e thin rok Got nge thin murung’agen Jesus.” (Revelation 1:9) Aram rogon e par rok apostal John u nap’an ni ke yoloy fare babyor ni Apocalypse, ara Revelation. Yibe lemnag ni kan tay John nga Patmos u nap’an ni Domitian e pilung ni ir e be gagiyegnag piyu Roma (81-96 C.E.), me motochiyelnag ni ngan liyor ngak e pilung nu Roma mi i togopuluw ngak e piin Kristiano. Nap’an ni immoy John u Patmos, min piliyeg e changar rok me yoloy boch ban’en ni ke guy. I weliy John murung’agen, ni gathi fan ni ngan k’aring e marus ngak e pi Kristiano kakrom, ya bochan e ngan ubung e michan’ rorad, ma ngan fal’eg laniyan’rad, min pi’ e athamgil nga laniyan’rad ni bochan ni ke yib e skeng ngorad ko ngiyal’ nem nge boch e magawon ni ba yib.​—Acts 28:22; Revelation 1:4; 2:3, 9, 10, 13.

2. Mang fan e par rok John nge pi walagen ni girdien Kristus kakrom ni baga’ fan ko piin Kristiano e ngiyal’ ney?

² Par ko piin Kristiano kakrom u nap’an ni kan yoloy e re ke babyor ney e ri bay fan ko pi Kristiano ko ngiyal’ n’ey. Kan togopuluw ngak John ni bochan e ke machibnag ngak e girdi’ murung’agen Jehovah nge Jesus Kristus ni Fak. Ir nge pi walagen ni girdien Kristus e kar pired ko tayim ni boor e togopuluw ni ma yib ngorad ni bochan ni riyul’ ni yad ma athamgil ni ngar manged girdi’ nib fel’ machane dabiyog ni ngar uned ko liyor ko pilung. (Luke 4:8) Chiney ma bay boch e nam ni piin ni Kristiano riy e ke yib e magawon ngorad ni aram rogon, ni aram e nam ni am rorad e ra turguy ko mang e “tin nib fel’ ni nge rin’ e teliw.” Ere pi thin ni bay aram u tabolngin fare babyor ni Revelation e ri ma fal’eg lanin’uy ni be gaar: “Nge felan’ e en nra bieg e re ke babyor n’ey, ma nge felan’ e piin ni yad ra motoyil ko pi thin ni yib rok Got ni be weliy e tin ni bayi m’ug mi yad fol ko pi n’en ni kan yoloy nga lan e re ke babyor ney; ya ngiyal’ ni bayi m’ug e pi n’ey ni urngin e ke chugur.” (Revelation 1:3) Arrogon, piin ni ma bieg e re ke babyor ni Revelation ney ma ma tiyan’ ngay me fol riy e rayog ni nge yog e falfalan’ nib riyul’ nge pi taw’ath ngorad.

3. I yib rok Mini’ fare Revelation ni kan pi’ ngak John?

³ I yib rok mini’ fare Revelation, ma mang e n’en ni kan fanay ni ngan wereg e re thin ney? Fa bin som’on e verse e yog ngodad ni be gaar: “U lan e re ke babyor ney e kan yoloy fapi n’em ngay ni fini dag Jesus Kristus nga ni guy. Pi n’ey e pi’ Got ngak John ni nge dag ngak e pi tapigpig rok Got e n’en ni thingari m’ug ndab ki n’uw nap’an. Me l’og e engel rok nge yan i dag me weliy e pi n’ey ngak John, ni ir e tapigpig rok.” (Revelation 1:1) Ngan weliy rogon nib mom, fare babyor ni Revelation e yib rok Jehovah, me pi e re n’ey ngak Jesus, me dag e re n’ey ngak John u daken reb e engel. Yira fil nib fel’ rogon e pi thin nu Bible ney ma yira nang ni ku ke fanay Jesus fare kan ni thothup ni nge wereg boch e thin ngak e pi ulung min piliyeg John e changar rok John nge guy.​—Revelation 2:7, 11, 17, 29; 3:6, 13, 22; 4:2; 17:3; 21:10; mu taarebnag ko Acts 2:33.

4. Mini’ e ma fanay Jehovah ko ngiyal’ ney ni nge pow’iy e girdi’ rok u fayleng?

⁴ Ki fanay Jehovah fak, ni ir fare “lolugen e galesiya,” ni nge fil ngak e pi tapigpig rok u fayleng. (Ephesians 5:23; Isaiah 54:13; John 6:45) Ma ku ma fanay Jehovah e kan ni thothup rok ni nge skulnag girdien. (John 15:26; 1 Corinthians 2:10) Ma bod ni ke fanay Jesus “John ni tapigpig rok” ni fan ni nge dag e ggan nib spiritual nib fel’ ngak e pi ulung ko Kristiano ko bin taareb e chibog, ku arrogon e chiney ni ma fanay “fare tapigpig nib yul’yul’ mab gonop,” ni yad e girdi’ ni kan nog pi “walagen” Kristus u fayleng ngorad ma kan dugliyrad, ni fan ni nge pi’ ngak girdien e tabinaw rok nge pi girdi’ ni be un ngorad e “ggan nib fel’ ko ngiyal’ nib puluw” ni aram e ggan nib spiritual. (Matthew 24:45-47; 25:40) Ba falfalan’ e piin ni yad ma nang ko mini’ e ma Pi’ fare ‘taw’ath nib fel’ ni ma yib ngodad u daken e ggan ni spiritual nge piin ni Ma fanay Got ngorad e chiney.​—James 1:17.

Fapi Ulung ni Kristus e Be Pow’iyrad

5. (a) Kan taarebnag e ulung ko Kristiano nge piin ni piilal ku mini’? (b) Yugu demtrug ni dawori flont e girdi’, ma mang e n’en ni nge yoornag e falfalan’ rodad?

⁵ Fapi guruy ni bay u tabolngin re ke babyor ni Revelation ney, e be weliy ni fapi ulung ko Kristiano e kan taarebnag ko pi magal. Ma piin ni piilal rorad e kan taarebnag ko pi engel (tamol’og) nge pi t’uf. (Revelation 1:20)a Be weliy Kristus u murung’agen e tirok e maruwel, me yog ngak John ni gaar: “Baaray e thin ni ke pi’ faanem ni ba’ fa medlip i t’uf u lan e ba’ ni mat’aw i pa’, ni be yan u fithik’ fa medlip ley i tagil’ e magal ni gol.” (Revelation 2:1) Fa medlip yangi babyor ni kan pi ngak fa medlip e ulung nu Asia ko bin taareb e chibog C.E., e be dag ni pi ulung nem nge piin ni piilal rorad e yad ba gel ko yugu boch ban’en maku bay boch ban’en ni yad ba war riy. Ma aram rogon ko ngiyal’ n’ey. Arfan, ni ri gad ba falfalan’ ni fan e dabda paged talin ni Kristus, e ir Lolugdag, ma be par u lan e pi ulung ko Kristiano. Ri manang ko mang e be buch u fithik’rad. Yima yog ni piin piilal e bay “u ba’ ni mat’aw, i pa’,” ma fan e re thin ney, e aram Jesus e ir e be gagiyegnagrad ma ma pow’iyrad mab mil fan ngorad rogon ni ngar ayuweged e girdi u lan e pi galesiya rok.​—Acts 20:28; Hebrews 13:17.

6. Mang e be dag ni gathi ke mus ni piin ni piilal e yad ra weliy ngak Jesus Kristus ban’en?

⁶ Machane, bod ni gad be banniged gadad faan gad ra lemnag ni ke mus ni piin ni piilal e ra weliy ngak Kristus ko mang e kar rin’ed. Fapi thin rok Kristus ni kan wereg e bay bang riy ni ke gaar: “Ma aram urngin girdien e pi galesiya ma bay ra nanged ni gag faanem ni ir e ma yaliy e kidney nge gum’irchaen e girdi’. Ma bayi bigimed mu gu pi’ puluwon ni ba m’ag ko ngongol rok.” (Revelation 2:23) Bay l’agruw fan e re n’ey ni aram reb e ke ginangrad maku ke pi’ athamgil nga laniyan’rad​—arrogon kan ginangrad ni manang Kristus ko mang e lem ni be par u lan gum’ircha’dad, maku ke pi’ athamgil nga laniyan’dad ya be dag e re nem ni manang Kristus e maruwel ni kad ted ma ra taw’ath’ ni faan gad ra Ran rayog rodad.​—Mark 14:6-9; Luke 21:3, 4.

7. Uw rogon ni piin Kritiano u Philadelphia e kara folgad ‘ko thin u murung’agen rogon e gum’an ni i tay Jesus’?

⁷ Thin rok Kristus ni kan pi’ ngak fare ulung ko mach nu Lydia u Philadelphia e dariy e fanow nib gel u fithik’, machane bay e thin riy ni yibe micheg ban’en nra pug e tafinay rodad ni be gaar. “Ya kam ayuweg e thin u murung’agen rogon ni kug par ni gub gum’an’, ere bay gu tiyem ndabi buch ban’en rom ko re ngiyal’ i n’en ni baaram ni bay yib e gafgow riy nga daken e fayleng ni polo’, ni nge skengnag urngin e girdi’ nu fayleng.” (Revelation 3:10) Fare thin ni Greek ko “kam ayuweg fare thin u murung’agen rogon ni kug par ni gub gum’an’” e ku be yip’ fan ni “kam fol ko n’en ni kug gog u murung’agen e gum’an’.” Fare verse 8 e be dag ni pi Kristiano u Philadelphia e gathi ke mus ni kar folgad ko motochiyel rok Kristus ya ku yad ma fol ko fanow ni ngar gum’an’gad.​—Matthew 10:22; Luke 21:19.

8. (a) Mang e ke micheg Jesus ngak e piin ni Kristiano u Phil­adelphia? (b) Ngiyal’ ney e ke aw ngak mini’ fa “ngiyal’ ni nge yib e skeng riy”?

⁸ Ku ke yog Jesus ni bayi ayuwegrad ko “ngiyal’ ni nge yib e skeng riy” ngorad. Uw rogon ni ke lebug e re thin nem ngak e piin ni Kristiano kakrom ni daworda nanged. Yugu aram rogon ni ke m’ay e togopuluw nib ngoch nap’an u tomren ni ke yim’ Domitian ko duw ni 96 C.E., miki tabab e togopuluw biyay u nap’an e gagiyeg rok Trajan (98-117 C.E.), ma dariy e maruwar riy ni ke yib e skeng ngorad ni boor ni bochan. Machane fa “ngiyal’ ni nge yib e skeng riy” ngak e piin Kristiano e ra lebug nib gel u nap’an “fare rran rok Somol” ko “tin tomren e rran,” ni aram e tayim ni gad be par riy e chiney. (Revelation 1:10; Daniel 12:4) Piin Kristiano ni kan dugliyrad, e bay reb e tayim ni ke yib e skeng riy ngorad u nap’an e mahl ni bin 1 e mahl ko Fayleng ma de n’uw nap’an nga tomren. Machane, “fa ngiyal’ ni nge yib e skeng riy” ngak e piin Kristiano e ka be ulul iyan nge mada’ ko chiney. Re magawon n’ey e ra yib nga “urngin yang u fayleng ni bay e girdri’ riy,” ma ba muun ngay bokum million e girdi’ ni yad bang ko ulung ni baga’, ni yad be athapeg ni ngar thapgad ngak Got u nap’an ni ra yib fare gafgow ni baga’. (Revelation 3:10; 7:9, 14) Gad ra falfalan’ ni faan gad ra ‘fol ko n’en ni ke yog Jesus u murung’agen e gum’an’,’ ni gaar: “En ni ra athamgil nge mada’ ko tomur e rayog e yafas ngak.”​—Matthew 24:13.

Ngan Par u Tan e Gagiyeg Rok Jehovah u Fithik’ e Falfalan’

9, 10. (a) Mang boch e Kanawo’ ni ke yib angin ngodad ko fa pi thin ni kan weliy u murung’agen tagil’ Jehovah? (b) Uw rogon ni nge yoor e falfalan’ rodad ni faan gad ra bieg fare Revelation?

⁹ Rogon ni gowa kan guy yaan tagil’ Jehovah nge pi tapigpig rok u tharmiy ni bay ko guruy ni 4 nge 5 ko re ke babyor ni Revelation e ri gad ra gin ngay. Susun ni nge pug e tafinay rodad fare n’en ni ke rin’ e pi engel nu tharmiy nib gel gelngirad ya kar pininged e sorok ngak Got ma yad ba falfalan’ ni yad be par u tan e gagiyeg rok Jehovah nib mat’aw. (Revelation 4:8-11) Thingarni rung’ag lamdad nib chag nga laman e pi cha’ nem ni ra gaargad: “En ni ke par nga tagil’, nge fare Fak e Saf, e ngan nog e sorok ngorow, min ta’ farow min gelnag buguwrow ma bay ur pirew nib mil suwon urngin ban’en ngorow ni dariy n’1 nap’an.”​—Revelation 5:13.

¹⁰ Ngan weliy rogon nib mom, ma biney e be dag rogon ni gad ma par u tan pa’ Jehovah ko urngin ban’en u fithik’ e falfalan’. Me yoloy Paul ni apostal ni gaar: “Ere urngin ban’en ni nguum rin’ed ara gimed be yog ma ngam rin’ed u daken fithingan Somol Jesus, ma gimed be pining e magar u daken ngak Got ni Chitamangiy.” (Colossians 3:17) Gad ra bieg e Revelation ma riyul’ ni ma yib e falfalan’ riy ngodad ni faanra riyul’ ni gad ma tay fan Jehovah nge gagiyeg rok u gum’irchadad ma gad ra fol ko tin baadag ni ngad rin’ed ma gad rin’ e tin nib m’agan’ ngay.

11, 12. (a) Uw rogon ni ngan rurug min thang e yaram rok Satan u fayleng? (b) Rogon ni ka nog ko Revelation guruy ni 7, ma mini’ e “rayog ni nge par” ko ngiyal’ nem?

¹¹ Ngan par u tan e gagiyeg rok Jehovah u fithik’ e falfalan’ e aram likngin e falfalan’ ko girdi’ nge urngin ban’en ni bay u palpalthib. Dabki n’uw nap’an ma ra yib e duru’ nib gel ni be yip fan ban’en ni nge rurug e fayleng Satan nge kirebnag e def riy min thang. Ngiyal’ nem ma girdi’ ni dabi par u tan e gagiyeg rok Kristus u tharmiy, ni aram e am ara gagiyeg rok Got, e dariy bang ni rayog ni ngar ranod ngay ni ngar mithgad. Fare thin ni kan yiiynag e be gaar: “Ma aram e pi pilung nu fayleng, nge piin ni yad be gagiyeg nge pi tolang ko salthaw, nge piin ni boor ban’en rorad nge piin ni baga’ lungurad, nge tin ni ka ba’ e girdi’, ni piin ni yad e sib nge piin ni gathi yad e sib ko girdi e ra mithgad nga lan e yiy nge nga tan e war u daken e burey. Mi yad non ko burey nge war ni yad be tolul ni be lungurad, ‘Mmuchubu’gad nga dakenmad ngam mitheged gamad u owchen faanem ni ke par nga but’ u tagil’, nge damumuw rok fare Fak e Saf. Ya fare rran ni baga’ ni ir e ngar damumuwgow riy e ke taw, me mini’ e rayog ni nge fas riy?’ ”​—Revelation 6:12, 15-17.

¹² Fa bin migid e guruy, e bay e thin riy nib m’ag ko re deer nem, ya be weliy John ni apostal u murung’agen fare ulung ni baga’, ni kar magaygad nib fas ko fare gafgow ni baga’, ni “yad be sak’iy u m’on u tagil’ Got nge fare Fak e Saf.” (Revelation 7:9, 14, 15) Yima yog ni yad be sak’iy u m’on u tagil’ Got ya biney e be dag ni yad be tay fan tagil’ Got ma yad be par u tan e gagiyeg rok Jehovah u fithik’ e yul’yul’. Ere yad be sak’iy ni yad ba fel’ uwan’ Got.

13. (a) Baga’ ni girdi’ nu fayleng e yad be meybil ku mini’, ma mang fan fare pow ni kan ta’ nga peri’rad nge nga pa’rad? (b) Ere mang fan ni ba t’uf ni ngan gum’an’?

¹³ Ma ku reb e n’en ni be weliy fare guruy ni 13 e be dag ni yugu boch e girdi’ ni be par u fayleng e yad be liyor ko am ni Satan e ke sunmiy, ni yima yog fare gamanman ni maloboch ngay. Ma kan ta’ e pow “nga daken peri’rad” ara nga “pa’rad,” ma biney e be dag ni yad be pi’ ayuw ko re am n’ey ko lem nge gelngirad. (Revelation 13:1-8, 16, 17) Nge mu’, ma fare guruy ni 14 e be ulul ngay ni gaar: “En ni ra ta’ fan me meybil ngak fare gamanman nge yaan ni kan ngongliy ni liyos me thapeg fare pow nga daken peri’ ara nga daken e rifrif u pa’, e ir e ra unum e wain rok Got, ni wain ko damumuw rok, ni ke puog nga lan e kap ko damumuw rok ke yan i mus nga gelngin . . . Bochan e re n’ey ma aram fan ni nge k’adan’ e girdi’ rok Got nib thothup ni yad e girdi’ ni be fol ko motochiyel rok Got mab mich Kristus uwan’rad.” (Revelation 14:9, 10, 12) Tomren ni ke yan e tayim, ma reb e deer ni be yoor i yan e aram: Mini’ e ga ra par u tan pa’? Ga ra par u tan pa’ Jehovah nge gagiyeg rok ara ga ra par u tan pa’ e ko am ko girdi’ ni yima yog fare gamanman ni maloboch ngay? Ba falfalan’ e piin ni kar siyeged ni dabi yog ngorad fare pow ko fare gamanman ni maloboch ma kar pared nib yul’yul’ ni yad be par u tan e gagiyeg rok Jehovah.

14, 15. Mang e thin ni ke yib nib tomgin u nap’an ni be weliy fare Revelation murung’agen e Armageddon, ma mang fan e re nem ngodad?

¹⁴ Fapi pilung u “fayleng ni polo’” e yad be yan ko kanawo’ ni ra tomur riy ma yad ra chafin nga taabang ma ngar uned ko pufthin nra tay Jehovah ni ngan pithig fare magawon (issue) ni ke sum nib m’ag ko gagiyeg rok. Ma tomur riy e Armageddon, “fare mahl ni aram e rran rok Got ni gubin ma rayog rok.” (Revelation 16:14, 16) Reb e parenthesis nib t’uf ni ngan gonopiy ni bay u lukngun fapi thin ni be weliy u murung’agen rogon ni ngan kunuy e pi pilung nu fayleng ni ngar uned ko mahl ni yib rok Jehovah. Me yib laman Jesus nib tomgin u fithik’ e sabethin ni gaar: “Mmotoyil! Bay gub ni bod ba moro’ro’. Ra falfalan’ e en ni ke par be od ni be ayuweg e mad rok, ni bochan e nge dabi yan ni dariy e mad u daken ngi i tamra’ u fithik’ e girdi’.” (Revelation 16:15) Sana ba m’ag e pi n’ey ko fapi matanag u temple kakrom ni piyu Levi ni kan chuweg e mad rorad ni ngar tamra’gad u fithik’ e yoor ni faan ran guyrad ni yad be mol ko ngiyal’ ni yad be matanagiy fare temple.

¹⁵ Ba tamilang fare thin ni be gaar: Faanra gad baadag ni ngad magaygad nib fas u nap’an ni ra yib e Armageddon, ma ba t’uf ni ngad pared ni gad ba od ko tirok Got ban’en ma nga don’ed nga dakendad fare mad ni be yip fan ban’en ni nge nang e girdi’ ni gadad e Pi Mich rok Jehovah nib yul’yul’. Ra falfalan’dad ni faanra dabda paged ni ngad wargad ko tirok Got ban’en ma ngad ululgad ni dabda talgad, ni ngad wereged e “thin nib fel’ ni dabi m’ay biid” nib m’ag ko Gil’ilungun Got u fithik’ e pasig.​—Revelation 14:6.

‘Ba falfalan’ e En ni Be Fol ko Pi Thin N’ey’

16. Mang fan ni fapi guruy ko Revelation ni bay ko tungun e aram e n’en ni ra k’aring e falfalan’?

¹⁶ Piin ni ma bieg e re ke babyor n’ey ni Revelation u fithik’ e falfalan’ era falfalan’ ko ngiyal’ ni ngar bieged e pi guruy ney ni bay ko tomur ni be weliy murung’agen e athap rodad ni rib fel’​—ni aram fare tharmiy nge fayleng nib biech, ni aram fare am nu tharmiy nib mat’aw ni ra suwey e piin ni kan luknagrad ko denen rorad, ni urngin ni fan e ngan nog e sorok ngak “Jehovah ni ir e gubin ma rayog rok.” (Revelation 21:22) Nap’an ni ke m’ay i guy rok John e pi n’en ney nib fel’, ma fare engel ni tamol’og e ke gaar ngak: “Pi thin n’ey e rib mich ma ba riyul’; arrogon, ma Jehovah ni ir fare Got ko pi thin ni ke weliy e pi profet ney e l’og e engel rok ni nge dag ngak e pi tapigpig rok e pi n’en ni ra buch ni dabki n’uw nap’an. Me gaar, mu sap! Dabki n’uw nap’an mu gub. Ba falfalan’ e en ni be fol ko pi thin ni kan yiiynag ni bay u lan e re babyor n’ey ni kan bachiy.”​—Revelation 22:6, 7, NW.

17. (a) Ke micheg e Revelation 22:6 e mang? (b) Mang e susun ni ngada paloggad riy?

¹⁷ Piin ni ma bieg e re babyor ni Revelation ney u fithik’ e falfalan’ e ra yib nga laniyan’rad ni bay e thin u tabolngin fare “babyor ni kan bachiy” nib taabrogon ko pi thin n’ey. (Revelation 1:1, 3) Pi thin n’ey e be dag ngodad ni urngin e “tin” ni kan yiiynag ni bay ko re ke babyor n’ey ni aram e babyor u Bible ni bin tomur e “ra lebug ni dabki n’uw nap’an.” Gad be par ko tayim ni kan nog e tin tomren e rran ngay ma gad bay ko gin ni kaygi chuchugur ko tomur, ma ra lebug e pi n’en ni yibe weliy u lan e babyor ni Revelation ku ra yib nib papay nra ulul reb nga reb. Ma ban’en ni de mudugil ni tirok Satan e susun dabi k’aringdad ni ngad chuwchuwgad ko tirok Got ban’en. Piin ni ma bieg e re ke babyor n’ey nib gonop e ka yad manang e pi thin ni kan pi’ nga medlip e ulung u Asia ni dabra awgad ko pi wup ni bod chogowen, e chugum nge liyor ko liyos, nge ngongol ni darngal, nge ngan par u thilin e gawel nge garbeb, nge ulung ni kan nog e apostate ngay.

18, 19. (a) Mang fan ni susun ni nge yib Jesus, nge mang e athap ni ke weliy John ni ba fel’ ni ngada uned ngay? (b) Ku mang fan ni “ra yib” Jehovah?

¹⁸ U lan fare babyor ni Revelation, ma boor yay ni ke yog Jesus ni gaar: “Dabi n’uw nap’an mu gub.” (Revelation 2:16; 3:11; 22:7, 20a) Susun ni nge yib ni nge pufthinnag fare Babylon ni gilbuguwan, nge pi am ni be par u tan pa’ Satan, nge urngin e girdi’ ni kar siyeged e par u tan e gagiyeg rok Jehovah, ni chiney e aram e Gil’ilungun Kristus. Ngad dogned e thin ni bod rogon John ni apostal ni be gaar: “Amen! Moy, Somol Jesus.”​—Revelation 22:20b.

¹⁹ Me gaar Jehovah: “Mu tayilim! Dabki n’uw nap’an mu gub, ma bay gu fek puluwon e girdi’ i yib nra be’ ma bay gu pi’ puluwon ni be yan u rogon e n’en ni i rin.” (Revelation 22:12) Bochan ni gad be sonnag puluwon e gel ni kan tay ni aram e yafas ni manemus ko fa “bin nib biech e lan e lang” ara “bin nib biech e fayleng” ni kan micheg, ma sana ngad uned ko maruwel ni ngan pining u fithik’ e pasig e girdi’ nib yul’yul’ gum’ircha’rad ni ngad gaargad: “ ‘Moy!’ I gur e en ni ke yib e belel ngom; ngam fek fare ran ko yafas nib taw’ath ndariy puluwon ni yira pi’ ngak e en ni baadag ni nge yog ngak.” (Revelation 22:17) Ma yibe athapeg ni ngar manged e piin ni ma bieg fare babyor ni kan thagthagnag ma ma pug e tafinay rok e girdi’ni aram e babyor ni Revelation!

[Footnote]

Pi N’en ni Ngan Sulod Nga Daken

◻ Mang e n’en ni ke fanay Jehovah ni nge pi’ fare Revelation, ma mang e rayog ni ngada filed riy?

◻ Mang fan ni susun ni nge falfalan’dad ni ngada bieged e pi thin ni kan pi’ ngak fa medlip i ulung nu Asia?

◻ Uw rogon ni rayog ni ngada paloggad ko riya’ ko “ngiyal’ ni ra yib e skeng riy”?

◻ Mang e falfalan’ ni ra yib ngodad ni faan gad ra fol ko pi thin ko babyor ni kan bachiy ni bay e thin ko Revelation riy?

[Picture on page 25]

Ba falfalan’ e piin ni kar poyed ko mini’ e ke pi’ fare thin nib fel’

[Picture on page 28]

Ba falfalan’ e en ni be par ni ba od