Deer ko Piin ni Yad Ma Bieg e Pi Babyor

U Roma 12:19, i yog apostal Paul ni susun ni nge dabi yib e damumuw ngak e pi Kristiano, faani gaar: “Pi tafager rog, dab mu fulweged ngak be’ taban e kireb ni rin’ ngomed, machane ngam paged fan ko damumuw rok Got nge mang ir e rin’”?

Bin riyul’ riy, ri danga’. Apostal Paul u roy e be weliy morngaagen fare damumuw rok Got. Ri arrogon, re n’ey e gathi be yog ni aram e dariy fan ko pi Kristiano ni ngara paged yad nge yib e damumuw ngorad. Ya ri be fonownagdad e Bible ni thingari dabi gel e damumuw ni ngad ted. Mu lemnag boch e fonow ni ke pi’ Jehovah.

“Dab mu damumuw; ma dabi yib e puwan’ ngom! Dabi magafan’um! Ya dabi fel’ rogom riy.” (Psalm 37:8) “Machane gu be yog ngomed e chiney, ni en nra damumuw ngak be’ ni walagen e yira fek i yan nga p’eowchen e en ni ma puf oloboch.” (Matthew 5:22) “Tin nib kireb ni yima ar’arnag e rib gagiyel, aram e ngongol ko darngal, nge ngongol ni golong, nge ngongol ni puwlag, nge ta’fan nge meybil ngak e liyos ni ma meybil boch e girdi’ ngay, nge pig; nge tathil ni be tay e girdi’, nge cham ni yad be tay, nge awan’, nge damumuw.” (Galatia 5:19, 20) “Mu n’iged fan u wun’med urngin ban’en nib kireb ni ke aw nga lanin’med, nge tin ni kam dabuyed rok be’, ma dab ku um damumuwgad. Dab ku um tolulgad ngak be u fithik’ e damumuw ara u moged e thin nib kireb ngak be’!.” (Efesus 4:31) “gubin e girdi’ ma thingar ra gurgad ko motoyil, machane dab ra gurgad ngar damumuwgad.” (James 1:19) Maku, fare babyor ni Proverbs e be fonownagdad biyay nge biyay ni dabda paged ni nge yib e damumuw ngodad ke mus ni bochan e kerib ni ke rin’ be’ nib achichhig nge oloboch ko girdi’.​—Proverbs 12:16; 14:17, 29; 15:1; 16:32; 17:14; 19:11, 19; 22:24; 25:28; 29:22.

Fapi verse nib chuchugur ko Roma 12:19 e rib puluw ko fapi fonow. Be ta’ Paul chilen ngodad ni t’ufeg rodad ngak e girdi’ e susun ni nge yan ni aw nib riyul’, ma nguu dogned e thin nib fel’ ko piin ni yad be gafgownagdad, ma gad guy rogon ni ngad lemnaged ban’en nib fel’ ngak boch e girdi’, dabda sulweged taban e kireb ko kireb, ma gad athamgil ni ngad pared ni ba aw e gapas u thildad nge urngin e girdi’. Ma aram me yog ni gaar: “Pi tafager rog, dab mu fulweged taban e kireb ngak be’, machane ngam paged fan e damumuw; ye yog e babyor nib thothup ni gaar: “Be gaar Somol, ke mil fan ngog, ni gag e bay gu fulweg taban e kireb.’ ”​—Roma 12:9, 14, 16-19.

Ri arrogon, susun ni ndab da paged e damumuw rodad ni nge fekdad nga fithik’ e denen. Nangan’ rodad u rogon boch e thin nge gelngidad ni ngad rin’ed ban’en nib mat’aw e de flont. Faan gad ra pag e damumuw rodad nge fekdad ni ngad sulweged taban e kireb, ma ra ud rin’ed e kireb. Biney e ra felan’ag fare toogor rok Got i Satan. Ke yoloy Paul u bayang ni gaar: “Faanra mu damumuwgad, ma dab mpaged e damumuw romed nge fekmed nga fithik’ e denen; dab mu pired ni gimed ba damumuw nge polo’ reb e rran. Dab mu binged e kanawo’ ngak moonyan’.”​—Efesus 4:26, 27.

Bin nib fel’ ni ngan lek e bin ba gonop e kanawo, ngad paged Got nge guy ko wuin nge mini’ e ran sulweg taban e kireb ngak. Rayog ni nge rin’ u rogon ni manang e tin ni kan rin’, ma pufthin ni ra tay e ra dag ni ir Got nib mat’aw. Rayog ni ngad guyed ni ireray e pi thin ni be yog Paul u Roma 12:19 ni faanra gad ra sap nga lan e Bible u Deutoronomy 32:35, 41 (New World Translation) me uneg e pi thin ni baaray ngay ni gaar: “Bay gu fulweg taban e kireb, bay gu gechignagrad.” (Mu taarebrogonnag ko Hebrew 10:30.) Ere, yugu aram rogon ni gali thin ni “rok Got” ney e dabni pirieg u lan e thin nu Bible Greek, ma boor e girdi’ ni yad ma piliyeg e thin e ngiyal’ ney ni kar piliyegned ni rok Got ni bod rogon ni bay u Roma 12:19. Aram fan ni gad ra guy boch e thin ni “ngan pag Got nge mang ir e fulweg taban e kireb” (The Contemporary English Version); “ngan pag fan ko damumuw rok Got” (American Standard Version); “ngan pag Got ni nge pi’ e gechig ni faan ra ba magan’ ngay ” (The New Testament in Modern English); “ngan pag Got nge pi’ puluwon’ e kireb.”​—The New English Bible.

Mus ko ngiyal’ ni ke yog e toogor ko tin riyul’ e thin ni kireb ngodad ara kan gafgownagdad, ma rayog ni nge pagan’dad ko thin rok Jehovah Got ni rungaag Moses ni gaar: “Jehovah, Jehovah, ni ir fare Got nir ma runguy e girdi’ ma ma kireban’ ngorad, ni gathi mmachreg ni ma yib e puwan’ ngak, ma ma t’ufeg e girdi’ ma ma yul’yul’ ngorad, tin ni ke yog ngak bokum i biyu’ e girdi’ ni bay rin’ ngorad e dabi thil, ma n’ag fan u wan’ e tin ni kan rin’ ni de mat’aw, machane dabi fek owchen fe pag ndabi gechignagrad ko denen ni kar ngongliyed.”​—Exodus 34:6, 7, NW.