“Ke Taw Nga Nap’an!”

“Ke taw nga nap’an ni nge chuw ko re fayleng ney nge yan ngak e en ni Chitamangin.”​—JOHN 13:1.

1. Nap’an ni ke chugur e rorran ni Paluk’af ko duw ni 33 C.E. mang e be lemnag e girdi’ nu Jerusalem, ma mang fan?

NAP’AN NTAUFENAG Jesus ko duw ni 29 C.E. ke tabab Jesus ko fare kanawo’ ni ra taw ko “fare awa” nra yim’ riy, me fas ko yam’ me yan nga tharmiy. Chiney e ke taw ko tobolngin e duw ko 33 C.E. In e wik ni ke yan u tomren ni i puruy’ e Sanhedrin ni aram e court nib tolang rok yu Jew ni ngar thanged e fan rok Jesus. I chuw Jesus u Jerusalem me yan nga barba’ e lul’ ni Jordan ya ke nang fan e makath rorad. Ma sana Nicodemus ni ir reb e girdien e Sanhedrin e ke tamilangnag Jesus, ya fel’ e thin rorow. Ke chugur e madenom ko Paluk’af ma boor e girdi’ ni yib nga Jerusalem ma be non non e girdi’ u morngaagen Jesus. Be fith e girdi’, “Uw rogon ni gimed be finey? Sana dabi yib ko re madnom ney, fa?” Ma pi tolang ko prist nge pi Farise e kar wereged e thin ni faanra nang be’ e gini bay Jesus riy ma thingari yog ngorad.​—John 11:47-57.

2. Mang e rin’ Maria ni i tababnag e maluag thin, ma fulweg rok Jesus e ke dag ni manang e mang u morngaagen e “awa rok”?

² Chirofen ni Nisan 8 ni aram nel’ e rran u m’on ko Paluk’af e ke sul Jesus ko pi binaw nib chugur nga Jerusalem. Ke yan nga Bethany ni aram e binaw rok Martha, nge Maria, nge Lazarus ni yad e pi fager rok−ma Bethany e gonapan l’agruw e mayel nib orel nga Jerusalem. Ke taw ko balayal’ ko rofen ni Biyernes me madenomnag Jesus e Sabbath u rom. Bin migid e balayal’ me pigpig Maria ngak me puog e florida nib tolang puluwon nga daken Jesus me puwan’ pi gachalpen Jesus ngak. Me gaar Jesus: “Mpaged ya ke chaariy e tin ni ba’ rok ni fan ko chirofen ni ngan chibgilyeg riy. Ya piin ni gafgow e gubin ngiyal’; ma yad ba’ romed, machane gag e gathi gubin ngiyal’ ni bay ug par romed.” (John 12:1-8; Matthew 26:6-13) Manang Jesus ni “ke taw nap’an ni nge chuw ko re fayleng ney nge yan ngak e en ni Chitamangiy.” (John 13:1) Ka lal e rran ma ra “pi e pogofan rok nge biyuliy e girdi’ ni pire’ ngay.” (Mark 10:45) Ka nap’an e ngiyal’ nem e ke gurgur u wan’ Jesus ma bochi ngiyal’ ni ka bay rok e bay rogon ko urngin ban’en ni rin’ nge machib ni tay. Rib fel’ e kanawo’ ni dag Jesus ngodad ni gad be sonnag tomren e re m’ag ney! Amu lemnag e n’en ni rin’ Jesus ko bin migid e rran.

Chirofen Ni Yib Jesus Ni Gowa Ke Gel Ko Mahl

3. (a) Uw rogon ni yib Jesus nga lan yu Jerusalem ko rorran ni Madenom ko Nisan 9, ma mang e rin’ boor e girdi’? (b) Mang e yog Jesus ngak e pi Farise ni yad be gun’gun’ ni bochan e girdi’ ni yoor?

³ Chirofen ni Madenom ko Nisan 9 me yib Jesus nga lan e mach nu Jerusalem ni gowa ke gel ko mahl. I yib u daken fak e donkey ni be lebguy e thin ko profet u Zechariah 9:9​−ma faani chugur ko fare mach me filath e girdi’ e mad rorad nga daken e kanawo’ ma boch e girdi’ e kar th’abed yuwan boch e gek’iy mar filathed nga but’. Be lungurad, “I Got e nge ayuweg e en ni pilung ni ir e ke yib ni owchen Jehovah!” Bay boch e Farise u fithik’ e girdi’ ma yad ba adag ni nge puwan’ Jesus ngak e pi gachalpen. Me fulweg Jesus ngorad ni gaar: “Nggog ngomed ni faan yad ra th’ab gulungrad, ma ra mang malang e tolul.”​—Luke 19:38-40; Matthew 21:6-9.

4. Mang fan ni i wagey yu Jerusalem u nap’an ni yib Jesus nga lan e mach?

⁴ In e wik u m’on riy e ke guy boor e girdi’ Jesus ni ke faseg Lazarus ko yam’. Pi girdi’ ney e yad be weliy ngak yugu boch e girdi’ fare maang’ang ni kar guyed. Ere nap’an ni yib Jesus nga lan yu Jerusalem ke wagey e girdi’. Be fith e girdi’, “I mini’ e cha’nem?” Ma be gaar e girdi’ ni boor, “Ereray fare profet i Jesus ni yib u Nazareth nib binaw ni bay u lan yu Galile.” Nap’an ni guy fapi Farise e n’en ni be buch ke kireban’rad ni be lungurad, “Amu guyed ke thum e girdi’ nu fayleng yad be lek!”​—Matthew 21:10, 11; John 12:17-19.

5. Mang e rin’ Jesus u nap’an ni yan nga lan e tempel?

⁵ Ke yan Jesus nga tempel nge machib u rom ni bod rogon ni ka ma rin’ u nap’an ni yib nga Jerusalem ya ir e Tamachib ni Tolang. Me yib e piin nib malmit nge piin nib mugutgut ngak me golnagrad. Meri damumuw e pi tolang ko prist nge pi tamachib ni be yib e liliy ngak Jesus ma be tolul e pi pagal ni be lungurad, “Ke sorok Fak David!” I gaar fapi prist: “Ga be rung’ag e n’en ni yad be yog fa danga’?” Me fulweg Jesus: “Gu be rung’ag. Dawor mpoyed fa gin’em u lan e babyor nib thothup? Ya be gaar, Kam fil ngak e bitir nge bitir ni kabran ni ngar pininged e sorok nib fel’ rogon.” Ma nap’an ni be machib Jesus me guy e n’en ni yibe rin’ u lan e tempel.​—Matthew 21:15, 16; Mark 11:11.

6. Mang e rin’ Jesus nib thil ko n’en ni rin’ ko somm’on, ma mang fan?

⁶ Rib thil e n’en ni be rin’ Jesus e chiney ko n’en ni rin’ nel’ e pul faram! Ngiyal’ nem e de yib nga Jerusalem “u fithik’ e girdi’ ya yib nib mith” ni nge un ko Madenom ko Tabernacle. (John 7:10) Ma gubin ngiyal’ e i guy rogon ni nge mil ya nge ayuweg e yafas rok. Ma chiney e ke yib nga lan e mach u fithik’ e girdi’ ma kan pi’ e thin ni ngan kol! De wereg Jesus e thin ni ir fare Messiah. (Isaiah 42:2; Mark 1:40-44) Dubun Jesus ni ngan wereg e thin u morngaagen u fithik’ e wagey ara nge non non e girdi’ ma de puluw e thin rorad. Ma chiney e be weliy e girdi’ ni yoor u fithik’ e tamilang ni ir fare Messiah ma de fol Jesus ko thin rok e pi tolang ko teliw ni yad ba adag ni nge tal e girdi’ ko non non! Mang e ke thil? Ke thil ya “ke taw ko fare awa ni ngan pi’ e flaab ni ba ga’ ngak e en ni Fak e Girdi’ min ta’ fan.” Ma aram e n’en ni yog Jesus ko bin migid e rran.​—John 12:23.

De Rus−Machib Nra Ayuweg E Yafas

7, 8. Uw rogon ni ba taareb rogon e ngongol rok Jesus ko rorran ni Nisan 10 ko duw ni 33 C.E. ko n’en ni rin’ u lan e tempel ko rorran ni Paluk’af ko duw ni 30 C.E.?

⁷ Nap’an ni taw Jesus ko tempel ko rorran ni Montag ko Nisan 10, i rin’ ban’en ko n’en ni guy ko fa binem e rran. I tabab ni nge tuluf e piin ni yad be chuw’iy ban’en nge piin ni yad be fol chuway’ nga ban’en u lan e tempel. Me thikiy e tebel ko girdi’ ni ma thilyeg e salpiy nge chiya rok e piin ni yad be chuway’ ko bulugol, ma daki pag be’ ni nge yan u lan e tempel ni be fek ban’en.” Me tamilangnag e kireb rorad ni gaar: “Ba’ ni kan yoloy u lan e babyor nib thothup ni ke gaar Got, “Naun rog e bay nog nib naun ntafen e meybil rok e girdi’ ko gubin e nam. Machane kam thiliyed kam ted ni ke mang bangi n’en ni ma mith e moro’ro’ riy!””​—Mark 11:15-17.

⁸ Taareb rogon e ngongol rok Jesus ko n’en ni rin’ dalip e duw faram u nap’an ni yib nga tempel ko rorran ni Paluk’af ko duw ni 30 C.E. Machane kab gel boch e thin rok. Chiney e ke pining e “moro’ro’” ngak e piin ni be fol chuway’ u lan e tempel. (Luke 19:45, 46; John 2:13-16) Yad e moro’ro’ ni bochan e kaygi tolang puluwon e pi gamanman ni yira fanay ko maligach. I rung’ag e pi tolang ko prist nge pi tamachib nge pi tayugang’ e n’en ni rin’ Jesus mi yad gay kanawoen ni ngan thang e fan rok. Machane dar nanged rogon ni ngar lied Jesus ya ke ngat e girdi’ nga rogon e machib rok Jesus mi yad chugur ngak ni ngar motoyilgad ngak.​—Mark 11:18; Luke 19:47, 48.

9. Mang machib ni i weliy Jesus, me pining e piin ni bay u lan e tempel ni ngar rin’ed e mang?

⁹ Nap’an ni be machib Jesus u lan e tempel i gaar: “Ke taw ko fare awa ni ngan pi’ e flaab ni ba ga’ ngak e en ni Fak e Girdi’ min ta’ fan.” Arrogon, manang Jesus ni ka bay in e rran ni nge par u fayleng ni ba girdi’. I weliy Jesus ba fanathin u morngaagen ba awochngin e wheat ni thingari yim’ ya nge yib waamngin​−ni aram e be yip’ fan e yam’ ni ra tay ni fan e nge yog e yafas ni manemus ngak yugu boch e girdi’. Me pining Jesus e piin ni yad be motoyil ngak ni gaar: “En ni ba adag ni nge pigpig ngog e thingari un ngog, ya en ni tapigpig rog e bay i par rog ko gin ni gu ba’ riy. Ya Chitamag e ra ta’ fan e cha’ ni ma pigpig ngog.”​—John 12:23-26.

10. Uw rogon e yam’ ni ra tay Jesus u wan’?

¹⁰ I lemnag Jesus e yam’ ni ra tay u fithik’ e amith ni ka aningeg e rran me gaar: “Chiney e ke magaf lanin’ug−susun e mang e ngog? Gur nge lungug, “Chitamag, dab mpag e re awa ney nge yib ngog.” Machane dabiyog ni ngan siyeg e n’en ni bay nga m’on rok Jesus. I gaar: “Machane ara’ fan ni ku gub, bochan e nggu mada’nag e gafgow ni bay u lan e re awa ney.” Bin riyul’ riy e ke taareban’ Jesus ko tin nib m’agan’ Got ngay. Kari mudugil laniyan’ ni nge mang e pi n’en ni m’agan’ Got ngay e nge suruy e pi n’en ni nge rin’ nge mada’ ko yam’ ni ra tay ni maligach. (John 12:27) Rib fel’ e kanawo’ ni ke dag ngodad​−kanawoen e fol ko tin nib m’agan’ Got ngay!

11. Mang machib ni weliy Jesus ngak e piin ni kar rung’aged ba lam ni yib u tharmiy?

¹¹ Kari magafan’ Jesus ya manang ni bay rogon e yam’ ni ra tay ko fithngan e Chitamangin, ere i meybil Jesus ni gaar: “Ah Chitamag, mu tay fan fithingam.” Meri gin e piin ni yad be muulung u lan e tempel ya i yib ba lam u tharmiy ni gaar: “Kug ta’ fan ma bay kug rin’ biyay.” Fare Tamachib nib Ga’ e ke weliy fan ni ur rung’aged fare lam, nge wenegan e yam’ ni ra tay, nge fan ni thingari mich u wan’rad. (John 12:28-36) Boor ban’en ni rin’ Jesus u lan l’agruw e rran. Machane ka bay reb e rran ni kab ga’ fan.

Rorran Ni Ka Nog Nib Kireb E Rorad

12. Mang e rin’ e pi tolang ko yurba’ i teliw ni ngar ninged e kanawo’ rok Jesus ko thin ko rofen ni L’agruw Fene Maruwel ko Nisan 11, ma mang wenegan?

¹² Chirofen ni L’agruw Fene Maruwel ko Nisan 11, me yan Jesus nga lan e tempel biyay ni nge machib. Bay riy e girdi’ ni tatogopuluw. I fith e pi tolang ko prist nge piin ni piilal rok e girdi’ Jesus u morngaagen e pi n’en ni rin’ ko fa binem e rran ni lungurad: “Ba uw mat’awum ni ga be rin’ e pi n’ey? I mini’ e ke pi’ mat’awum.” Ke th’ab fare Sensey ni Baga’ gulungrad ko fulweg rok, me weliy dalip e fanathin​−l’agruw e fanathin u morngaagen e milay’ ni grapes nge reb u morngaagen e madenom ko mabgol−​ma pi fanathin ney e i tamilangnag fene gel e kireb rorad. Kar dumumuwgad ko n’en ni kar rung’aged mi yad ba adag ni ngar koled. Machane kar rusgad ngak e girdi’ ni yoor, ya kar ted ni Jesus e ir e profet. Ere kar guyed rogon ni ngar ninged e kanawo’ ngak ko thin mar koled Jesus ko n’en ni ra yog. Machane fulweg rok Jesus e ke th’ab gulungrad.​—Matthew 21:23; 22:46.

13. Mang fonow ni yog Jesus ngak e girdi’ ni yad be motoyil ngak u morngaagen e pi tamachib nge pi Farise?

¹³ Ma yog e pi tamachib nge pi Farise ni yad ma machibnag e Motochiyel rok Got, ere i yog Jesus ngak e girdi’ ni gaar: “Thingar mfolgad mi gimed rin’ gubin ban’en ni ka rogned ngomed ni ngam rin’ed; machane dab mfolgad ko tin ni yad be rin’, ya darir rin’ed e tin ni yad be machibnag.” (Matthew 23:1-3) Rib gel e thin rok Jesus! Machane dawori mu’ Jesus. Ereray e bin tomur e rran nra machib u lan e tempel ere i tamilangnag e pi kireb rorad​−ma thin rok e bod e dirra’ ni be ulul iyan.

14, 15. Mang boch e thin nib gel ni yog Jesus ngak e pi tamachib nge pi Farise?

¹⁴ Nel’ yay ni yog Jesus ni gaar, “Kam gafgowgad e pi tamachib ko Motochiyel nge gimed e pi Farise! Ya gimed e piin ni gimed be dake modingniged gimed.” I weliy Jesus ni aram rogorad ni bochan e kar ninged kanawoen Gil’ilungun e tharmiy ma dar paged e piin ni yad be yan u kanawoen ni ngar ranod nga lan. Pi girdi’ ni kireb ney e yad ma chur u maday ma yad ma th’ab e pi nam nga barba’ ya ngar pingeged taa be’ nge un ko teliw rorad ma wenegan riy e ra un ko yam’ ni manemus. Dar folgad ko tin ni baga’ fan ko Motochiyel ni aram e “mat’aw nge runguy nge yul’yul’” machane yad ma tay ni baga’ fan ni ngan pi’ taab guruy u ragag guruy e tin ni ba’ rorad ban’en. Gowa yad be lukuy “u wuru’ e kap nge plet rorad ma ba sug lan ko pi n’en ni ke yog ngorad u fithik’ e yargel nge chogow rorad” ma kan mithag e pi alit rorad ni bay u fithik’rad ya yad ba dake yad ba thothup. Yad ma ngongliy malangen e yam’ ko pi profet mi yad nunuwnag ya ngar daged rogon e runguy rorad, machane “yad owchen e piin nra lied e pi profet ngar m’ad.”​—Matthew 23:13-15, 23-31.

¹⁵ I tamilangnag Jesus ni dariy e michan’ rok e piin ni be togopuluw ngak ni gaar: “Kari mu gafgowgad e pi malmit nir ni gimed be pow’iy e girdi’.” Gowa yad mmalmit ni bochan e kab ga’ fan e gol ko tempel u wan’rad ko meybil ni yima tay u lan. Me ulul Jesus ngay me gelnag e thin rok ni gaar: “Gimed e porchoyog nge pi fak e porchoyog. Uw rogon ni gimed be finey ni ngam thaygad ko gechig ko Gehenna?” Arrogon, be yog Jesus ngorad ni bay ni thangrad ni manemus ni bochan e kireb rorad. (Matthew 23:16-22, 33) Dab da rusgad ni ngada weliyed e machib u morngaagen Gil’ilungun ni yugu aram rogon ni gad be tamilangnag e kireb rok e pi yurba’ i teliw.

16. Nap’an ni yad be par u daken e Burey nu Olives, mang e weliy Jesus ni bay yib ba ngiyal’?

¹⁶ Chiney e ke chuw Jesus u tempel. Be thig e yal’, me yan Jesus nge pi gachalpen nga daken e burey nu Olives. I par Jesus nga but’ u daken e burey me weliy rogon ni ngan gothey e tempel miki weliy e pow nra m’ug ko ngiyal’ ni be gagiyeg nge pow ko tomren e re m’ag ney. Ku bay fan e re thin ko profet nem ko ngiyal’ rodad ney. Re nep’ nem me yog Jesus ngak pi gachalpen ni gaar: “Gimed manang faram ni ka l’agruw e rran me taw ko madnom ni Paluk’af, ma en ni Fak e Girdi’ e bay ni pi’ ngan richibiy ko baley i ren.”​—Matthew 24:1-14; 26:1, 2.

I T’ufeg Jesus E Tirok E Girdi’ Nge Mada’ Ko Tomur’

17. (a) Nap’an e Paluk’af ko Nisan 14, mang e i fil Jesus ngak fa 12 i gachalpen? (b) Mang madenom ni i tababnag Jesus u tomren ni i chuw Judas Iscariot?

¹⁷ Fagal ni migid e rran​—ni Nisan 12 nge 13—​e de m’ug Jesus u fithik’ e tamilang u lan e tempel. Be guy e pi tolang ko pi yurba’ i teliw rogon ni ngar thanged e fan rok, ma dubun Jesus ni nge buch ban’en nge magawonnag e Paluk’af nra madenomnag u taabang ko pi apostal rok. Nap’an ni ra aw e yal’ ko rorran ni Aningeg Fene Maruwel ko Nisan 14 e aram e bin tomur e rran ko yafas rok Jesus u fayleng nib girdi’. Re nep’ nem e bay Jesus nge pi apostal rok u lan reb e naun u Jerusalem ko gini kan fl’eg rogon e madenom ko Paluk’af riy. Nap’an ni yad be madenomnag fare Paluk’af me fil ngak fa 12 i gachalpen kanawoen e sobut’an u nap’an ni i luknag ayrad. Me chuw Judas Iscariot ya ke egnag e Masta rok nga puluwon 30 yang e silver​−ni aram puluwon reb e sib nrogon e Motochiyel rok Moses−ma aram me tababnag Jesus e Puguran ko yam’ nra tay.​—Exodus 21:32; Matthew 26:14, 15, 26-29; John 13:2-30.

18. Mang boch e machib ni weliy Jesus ngak fa 11 e apostal rok ni yad ba yul’yul’, ma uw rogon ni i fl’eg rogorad ya ke chugur ni ra chuw rorad?

¹⁸ Tomren e bin somm’on e Puguran, i maluag thin fapi apostal ko mini’ e arorad ni kab ga’. De puwan’ Jesus ngorad ya i non ngorad u fithik’ e guman’ me yog ngorad ni ngar pigpiggad ngak yugu boch e girdi’. I tay Jesus farad ni bochan e kar chaggad ngak ni yugu aram rogon ni ke yib e gafgow ngak, me ere i micheg ngorad ni ngar uned ngak ko Gil’ilungun. (Luke 22:24-30) Me tay chilen Jesus ngorad ni ngar t’ufeged yad ni bod rogon ni i t’ufegrad. (John 13:34) I par rorad u lan e re naun nem me fl’eg rogorad ya ke chugur ni nge chuw rorad. I micheg ngorad ni yad e pi tafager rok, me pi’ e athamgil nga lanin’rad ni nge michan’rad, me micheg ngorad ni ra yib e kan ni thothup ngorad nge ayuwegrad. (John 14:1-17; 15:15) U m’on ni ke chuw ko re naun nem me meybil Jesus ngak e Chitamangin ni gaar: “Chitamag, ke taw ko fare awa. Mu gilnag buguwan Fakam me gilnag Fakam buguwam.” Riyul’ ni i ayuweg Jesus e pi apostal rok ke fl’eg rogorad ya ra chuw rorad, ma riyul’ ni “yigi i par ni yad ba t’uf rok nge yan i mada’ ko tomur.”​—John 13:1; 17:1.

19. Mang fan ni kari kireban’ Jesus u lan e milay’ nu Gethsemane?

¹⁹ Sana ke pag lukngun e nep’ u nap’an ni taw Jesus nge fa 11 i apostal rok ni yad ba yul’yul’ ko fare milay’ ni Gethsemane. Boor yay ni uranod e pi apostal rok ngaram. (John 18:1, 2) Ke in e awa ma ra yim’ Jesus ni gowa ir be’ nib kireb. Kari dabuy Jesus ni nge kireb fithngan e Chitamangin ni bochan rogon ni ra yim’, ere nap’an ni i meybil me map’ e athuw rok nga but’ ni racha’. (Luke 22:41-44) I gaar Jesus ngak e pi apostal rok: “Ke taw ko fare awa! Mu sapgad, baara’ faanem ni nge yognigeg!” Ka be non Jesus me yib Judas Iscariot ni ke un ba ulung i girdi’ ngak ni yad be fek e gul nge talin e cham. Kar bad ni ngar koled Jesus. De togopuluw Jesus ngorad. I weliy fan ni gaar: “Faanra gu rin’ ni aray rogon, ma ra diin me m’ug nib riyul’ e tin ni be yog e babyor nib thothup ni ke yog nthingari m’ug ni aray rogon?”​—Mark 14:41-43; Matthew 26:48-54.

Kan Tolangnag E Ani Fak E Girdi’!

20. (a) Mang boch e kireb nrin’ ngak Jesus u tomren nni kol? (b) U m’on ni aw e fan rok Jesus, mang fan ni yog ni gaar, “Ke lebug”?

²⁰ Tomren nni kol Jesus min nog nib kireb e rok u fithik’ e sasalap, ma pi tapuf oloboch nib kireb e ur pufthinnaged, ma Pontius Pilate e tay ni ngan gechignag, ma pi prist nge girdi’ ni yoor e ur gathibthibnaged, ma pi salthaw e ur moningnaged mar gafgownaged. (Mark 14:53-65; 15:1, 15; John 19:1-3) Ma rofen ni Biyernes ko misi’ min richibiy Jesus nga baley i ren me ri gel e amith ni bochan malngin downgin e be gireng ko richib u pa’ nge ay. (John 19:17, 18) Gonapan dalip i klok ko mathigyal’ me tolul Jesus ni gaar: “Ke libug!” Arrogon, ke lebuguy urngin ban’en ni ka nol’og nga fayleng ni nge rin’. Me pi’ e yafas rok nga pa’ Got, me thingeg lolgen me aw e fan rok. (John 19:28, 30; Matthew 27:45, 46; Luke 23:46) Bin dalip e rran nga tomren me faseg Jehovah Fak ko yam’. (Mark 16:1-6) Aningeg i ragag e rran nga tomren ni fas ko yam’ me yan Jesus nga tharmiy min tolangnag.​—John 17:5; Acts 1:3, 9-12; Philippians 2:8-11.

21. Uw rogon nrayog ni ngada folgad wok rok Jesus?

²¹ Uw rogon nrayog ni ngada “leked luwan ay Jesus”? (1 Peter 2:21) Ngada folgad wok rok ma ngada athamgilgad ni ngada machibnaged Gil’ilungun Got ma ngada ayuweged yugu boch e girdi’ ni ngar manged pi gachalpen Jesus ma dab da rusgad ni ngada weliyed e thin rok Got. (Matthew 24:14; 28:19, 20; Acts 4:29-31; Filippi 1:14) Dab da paged talin e ngiyal’ ni gad bay riy ma nge bagadad e nge pi’ e athamgil nga laniyan’ bagadad ni ngada t’ufeged gadad ma ngada rin’ed e tin nib fel’. (Mark 13:28-33; Hebrews 10:24, 25) Ma gubin ban’en ni gad ra rin’ e nge yan u rogon e tin nib m’agan’ Got ngay ma ngada tedan’dad ya gad be par ko “tin tomren e rran.”​—Daniel 12:4.

Uw Rogon Ni Ga Ra Fulweg?

• Uw rogon e machib rok Jesus u lan e tempel u Jerusalem ni bochan e manang ni ke chugur ni ra yim’?

• Mang e be dag ni i t’ufeg Jesus pi gachalpen nge mada’ ko tomur?

• Pi n’en ni buch ko tin tomren e awa ko yafas rok Jesus e be dag e mang u morngaagen?

• Uw rogon nrayog ni ngada folgad wok rok Jesus u nap’an ni gad be machib?

[Picture on page 14]

“I t’ufegrad Jesus nge mada’ ko tomur”