Fayleng E Kemus Ni Bangi Ban’en Ni Nga Un Skeng Riy?
FIN aray ke pagan’! Ke yog fare skeng rok. Fare bitir nu skul ni ke awparowon ko skeng u lan l’agruw e wik me ni tomur riy mi nog ngak e n’en ke yog fare skeng rok, rib gel e falfalan’ riy. Aram e chiney e rayog ni nge yog ngak fare maruwel ni yigi i lemnag.
Boor e girdi’ e yad ma changar ko yafas u fayleng ni aray rogon. Yad ma lemnag ni ban’en ni gubin e girdi’ ma thingari rin’ somm’on. Piin ni ma “yog” rorad e rayog ni ra mon’oggad ngara rin’ed reb e ban’en ni kab ga’ boch fan ku tomuren e biney. Ra gel e kireban’ riy ni faanra, riyul’, ni re yafas ney e chiney—e kemus ni ir e re n’en th’abi fel’—ni bay ni rayog ni nge l’agan e girdi’ ngay. Faanem ni bay u Bible ni Job nib nuw yang ko yafas rok i par nib fel’, fithik’ i dow ma boor ban’en rok e ki yog ni gaar: “Ppin, nge pumoon, e ba ngoch nap’an-e yafas rok ma ba sug ko wagey nge kireb riy.”—Job 14:1, New World Translation.
Rogon ni beb i m’ug ko lem rok e girdi’ ni yoor, e be yog fare New Catholic Encyclopedia ni be gaar: “Flaab u tharmiy e ereram e n’en ke duguliy Got ni nge yan e girdi’ ngay. . . . Falfalan’ ku be’ e bay u tharmiy ni kan ta’ ni fan ko falfalan’ ni rib fel’.” Bay reb e survey ni ka fini tay e Church of Christ u Meriken ni be dag ni 87 pasent ko piin ni ra uned ngay e yad be lemnag ni sana yad ra yim’ ma ranod nga tharmiy.
Boor e girdi’-ni gathi yad e Kristiano e ku yad ma athapeg ni tomuren ni kar m’ad mi yad chuw u fayleng nga ranod nga bang ni manigil. Bod rogon e piin ni Muslim, e yad ma athapeg ni nga ranod nga paradis u tharmiy. Bay barba’ e girdi’ ni ka nog e Followers of the Pure Land ngorad ko Buddhism u China nge Sapan ni ke mich u wan’rad ni faanra ur sulod u daken ni boor yay nguur lemnaged e “Amitabha,” ni fithingan fare Buddha ko tamilang ni Dabinus, ma aram e bay kur fasgad bayay u lan fare Binaw nib Machalbog, ara fa Western Paradis, ni bangi ban’en ni bay ra pired riy u fithik’ e bin tha’bi ga’ e falfalan’.
Ma bin riyul’ riy, e fare Bible, ni aram e re ke babyor ni tha’bi yoor mit e thin nu fayleng ni kan piliyeg riy maku e ri tay ni aram e re ke babyor nib thothup ntha’bi yoor ken ni kan wereg u fayleng iyan, e der yog ni fayleng e bangi ban’en ni yira chuw riy, bangi ban’en ni ta ma-af nga bang. Ni bod rogon, ni yog ni gaar: “Piin nib mat’aw e yad ra par u fayleng, mar pared riy ni dariy n’umngin nap’an.” (Psalm 37:29) U lan e Bible e ki yira pirieg riy fare thin nib ga’ fan ni yog Jesus ni gaar: “Ba fel’ waathan e piin ni yad ba sumunguy: ya yad ra par u fayleng.”—Matthew 5:5, King James Version.
Baga’ ni yima lemnag ni par rodad ko biney e fayleng e bay n’umngin nap’an ni de n’uw ma yam’ e ir e kanawo’ ko falfalan’ u tomuren e yafas. Ere faanra aram rogon, me ere yam’ e ba taw’ath nib fel’. Machane aram rogon ni ma lemnag e girdi’ e yam’, fa yad ma guy rogon ni nge n’uw nap’an e yafas? Rogon ni be m’ug ni yibe guy e piin yad be falfalan’ ya ba fel’ fithik’ i dowrad ya dar m’argad ma ba fel’ rogorad, ya boor ban’en rorad ma dubrad ni ngar m’ad.
Yugu demtrug rogon, ma bochan ni yafas u fayleng e ba sug ko riya’ nge gafgow, ma tharmiy e boor e girdi’ ni ma lemnag ni kemus e gini yira pirieg e bin riyul’ e falfalan’ riy nge gapas. Ere tharmiy e bangi ban’en ko falfalan’ nge gapas, ni dabiyog ni ngeb e kireb ngay ara wagagey? Ma uw rogon tomren ni ka nim’ ma kemus ni goo bin u tharmiy e giyow e bay? Sana ga ra gin ko fulweg ni bay ko Bible. Wenig ngom u mu bieg i yan.