Ba Deer ni Ma Yoornag Lanin’uy

BOOR rogon ni yima weliy murung’agen e yafos ko girdi’ nge yam’ ni yad ma tay, ma kub thilthil rogon ni yima lemnag. Bay boch e girdi’ ni yad ma lemnag nnap’an ni yad ra yim’, ma aram mar ngal’gad ni yugu ban’en ara ranod nga yugu bang ni ngar pared u rom. Ma boch e girdi’ e yad ma lemnag ni ku yad ra fos bayay ngar ngal’gad ni yugu ban’en. Machane, boch e girdi’ e yad ma lemnag nnap’an nra yim’ be’, ma aram e ke mus e yafos rok u rom ma dakuriy e athap rok.

Sana ba thil rogon ni ga ma lemnag e re n’ey. Rayog ni bochan rogon nni chuguliyem ara rogon e yalen ko gin ni ka mub riy. Ere, bochan nib thilthil rogon e lem ko girdi’ u murung’agen e n’en ni ma buch rok be’ u tomuren ni ke yim’, ma gur, bay be’ ara bang nrayog ni ngad pirieged e fulweg riy nib riyul’ nrayog ni nge pagan’uy ngay nib l’ag rogon ko re deer ney ni ma yoornag laniyan’ e girdi’, fa?

Ke yoor e chibog ni ke yan ni ma machibnag e pi tayugang’ ko teliw nnap’an nra yim’ be’ ma bay e yaal rok ni ma par nib fos ndabi yim’. Ba dake gubin e piin ni yad ma un nga yurba’ e teliw nib ga’ u roy u fayleng ni bod rogon e teliw ko piin ni yad ma yog ni yad e Kristiano, nge Hindu, nge Jew, nge Muslim, nge ku boch e teliw e ba mich u wan’rad nnap’an nra yim’ be’ ma bay e yaal rok ni ma par nib fos ndabi yim’, ma re yaal nem e ma yan i par ko giyow ko kan. Machane, pi Buddhist e ba mich u wan’rad ni boor yay ni ma yim’ be’ ngemu’ ngki fos bayay. Ma yad ma lemnag nre n’em ni bay ko girdi’ ndabi yim’ e ra munmun me yan i taw nga bangi ban’en nrib gapas mab felfelan’ e piin ni yad ma par riy ni ka nog e Nirvana ngay.

Bochan e pi machib ney, ma aram fan ni yooren e girdi’ u fayleng e yad ma lemnag nnap’an nra yim’ be’ ma aram e ke mab e kanawo’ ngak ni nge yan i par nga yugu reb e fayleng. Boor e girdi’ ni yad ma lemnag ni yam’ ni ma tay e girdi’ e aram bang ko yafos rodad nrib ga’ fan, ma kub muun ko n’en nib m’agan’ Got ngay. Machane, mang e be yog e Bible u murung’agen e re n’ey? Wenig ngom, mu beeg e bin migid e article, ya sana ga ra gin ko fulweg ko re deer ney.