Gol Ko Pi’ Ban’en E Ma Yibnag E Falfalan’

BOCHAN apostal Paul ni reb e Kristiano mab overseer nib tarunguyey, ma arfan ni rib adag ni nge nang salpen e piin ni taareb rogon e michan’ rorad. (2 Korinth 11:28) Arfan, u nap’an lukngun e-50 e duw ko bin som’mon e chibog u tomuren Jesus me yog ni ngan kunuy e salpiy ni fan ko pi Kristiano ni yad ba gafgow u Judea, miki fanay ere ngiyal’ i n’en nem nge fil ko girdi’ reb e n’en ni rib ga’ fan ni murung’agen rogon ni nga uni gol i pi’ ban’en nib m’agan’uy ngay. Ri tamilangnag Paul i weliy ni pi’ ban’en u fithik’ e falfalan’ e rib fel’ u wan’ Jehovah: “Ra be’ ma nge pi’ ban’en ni rogon ni ir e ke dugliy u laniyan’, ndabi kireban’ ngay ni ke pi’ fa reb e finey ni ban’en nthingari rin’, yi Got e ba t’uf rok e en ni ma pi’ ban’en u fithik’ e falfalan’.”​—2 Korinth 9:7.

Yib Gafgow nib Gel, Machane Yib Gol I Pi’ Ban’en

Oren e Kristiano ko bin-som’mon e chibog e de yoor ban’en rorad. I pirieg Paul ni “de yoor i yad e bay gelngin.” Yad e “piin nib meewar u fayleng,” “yad bogi ban’en nib sobut u fayleng.” (1 Korinth 1:26-28, New World Translation) Ni bod rogon, fapi Kristiano ni yad ma par u Macedonia ni “ri yad ba gafgow” ma kiy ma “gafgownagrad.” Yugu aram rogon, ma piin u Macedonia ni yad ba sobut’an ma ke michan’rad e ura wenignaged ni ngan guy rogon kanawo’en ngan pi’ e ayuw ko salpiy ni fan ko “machib ni kan dugliy ni nge rin’ fa piin ni yad ba thothup”; ere n’en ni ra pied, e micheg Paul ni ke thum’, nga “wuru’ i gelngirad”!​—2 Korinth 8:1-4, NW.

Machane, re gol ban’en ney u fithik’ e falfalan’ e gathi kan turguy urngin ni ngan pi’. Ya, n’en ni ke karingem ni ngam rin’, nge rogon fal’ngin u lanin’um ni ngam rin’, nge rogon u gum’ercha’em e aram e n’en nib ga’ fan. I tamilangnag Paul ngak e pi Kristiano nu Korinth ni lem nge gum’ercha’ey e bay rogon ko ayuw ni ngan pi’ ban’en. I gaar: “Gu manang ni gimed baadag ni ngam pied e ayuw, ma kug weliy murung’agmed ngak e girdi’ nu Macedonian ni gub uf ngay ni ke lungug, . . . fanmed pasig ni ngam pied e ayuw e ke pug laniyan’ boor i yad.” Kar ‘turguyed u lan gum’ercha’rad’ ni nga ur golgad u fithik’ e falfalan’.​—2 Korinth 9:2, 7, NW.

‘Lanin’rad e Ke K’aringrad’

Sana immoy u wan’ apostal Paul reb e ngongol ko pi’ ban’en u fithik’ e falfalan’, ni kaan rin’ u daken e ted kakrom ni ke pag 15 e chibog u m’on ko birok e tayim. Ni fa 12 i ganong rok yu Israel e ni chuwegrad ni dakur manged sib u Egypt. Ni aram fa ngiyal’ nem ni yad bay u enggin e Burey nu Sinai, me motochiyelnag Jehovah ni ngar toyed ba tabernacle ni fan ko liyor mi yad uneg ngay urngin ban’en nib t’uf ko liyor. Ni re n’en ney e boor ban’en ni ra yan ngay, ma aram min pining urngin e girdi’ ni ngar pied e ayuw.

Ere mang e n’en ni rin’ e pi cha’ nu Israel nem ni faan nog ngorad ere n’en nem? “Ra bad ni yad urngin, ni piin ke m’agan’ gum’ercha’rad ngay, ma ra feked i yib e tin ngar pied, nge urngin e girdi’ ni ke yog lanin’rad ngorad, mar feked i yib e n’en ni ngan pi’ ku Jehovah ni fan ko fare maruwel ko tento ko muulung.” (Exodus 35:21) Ere re nam nem, ra ognaged u fithik’ e gol? Ri arrogon! Baaray e n’en nnog ngak Moses: “Fapi girdi’ e kar pied ke yoor ko tin nib t’uf ko fare maruwel ni ke tay Jehovah chilen ni ngan ngongliy.”​—Exodus 36:5, NW.

Uw rogon e salpiy ni bay rok piyu Israel ko re ngiyal’ i n’en nem? Dawori n’uw nap’an, ni kefin ur gafgowgad ni yad e sib, ‘uni maruwel ngorad nib-elmerin,’ muur pired ni rib ‘gafgow e par rorad,’ ba yafas “nib gel e amith riy nge gafgow.” (Exodus 1:11, 14; 3:7; 5:10-18) Ere, susun dabiyog, ni bay bogi ban’en rorad ni aram urngin. Rriyul’, ya chuw yu Israel ko fa gin ur manged sib riy mar feked boch ban’en nge yu ulung e gamanman. (Exodus 12:32) Machane pi n’en nem e sana e de yoor, ya dawori n’uw nap’an ni kefin ra chuwgad u Egypt, mar tababgad ko gun’gun’ ya dakuriy e ufin nge flowa ni ngar ked.​—Exodus 16:3.

Ere uw e, gini, fek piyu Israel e pi n’en ni ba aram nib tolang puluwon riy ni ra pied ni ngan toy fare tabernacle ngay? Ra feked ko piin ni baaram ni ur moyed ni yad e masta rorad, ni yad piyu Egypt. Fare Bible e be yog ni be gaar: “Pi fak yu Israel . . . kar ninged ngak piyu Egypt e nunuw nni ngongliy ko silber nge gol nge mad. . . . [Piyu Egypt] e ra pied ngorad e pi n’en ni kara ninged.” Tiney boch e ayuw ni tay yu Egypt ni ra golgad ngar pied e chugum nib fel’ u wan’rad ya ba taw’ath ni yib rok Jehovah, ma gathi yib rok Farao. Fare babyor ni thothup e gaar: “Jehovah e ke gagiyegnag ke fel’ yu Israel u p’owchen yu Egypt, ma aram mar pied ngorad e tin kar ninged ngorad.”​—Exodus 12:35, 36, NW.

Ere aygum lemnag, ko, uw rogon laniyan’ piyu Israel. Boor mfen ni ku ur gafgowgad ni yad e sib ma boor ban’en ni yibe talegrad riy ma yibe tel rorad. Ma chiney ma ke puf rogorad ma ke yoor e chugum rorad nib tolang puluwon. Ere uw rogon ni yad ra lemnag ni faanra ngar pied boch e pi n’en nem? Rayog ni ngar lemnaged ni yad e kar thognaged ere bay mat’awrad ni nge par rorad. Machane, nap’an nnog ngorad ni ngar pied e ayuw ko salpiy ni ngan ayuweg e bin riyul’ e liyor, mar rin’ed​—ma de mo’maw’ rorad ara siinnaged! Dar paged talin ni Jehovah e ir e ke guy rogon ni nge yog ngorad e pi chugum nem. Arfan, ni ra pied ni boor ni boor e silver nge gol nge gamanman nib fas. Ra pied “ni rib fel’ u wan’rad.” ‘Gum’ercha’rad e ir e ke suruy laniyan’rad.’ ‘Lem rorad e yog ngorad.’ Rriyul’ “nni ognag ngan pi’ ni maligach ku Jehovah.”​—Exodus 25:1-9; 35:4-9, 20-29; 36:3-7.

Ngan Fal’eg Rogoy ni Ngan Pi’

Ga’ngin ara oren ban’en ni ngan pi’ gathi ri ereram e n’en ni ra dag yaan e bin riyul’ e gol ko wup ban’en u fithik’ e falfalan’. Bay ba ngiyal’ ni i yaliy Jesus Kristus e girdi’ ni be yan i yin’ e salpiy nga tafen e salpiy u tempel. Piin ni ba fel’ rogorad ni boor e salpiy rorad, e yad be yin’ e salpiy ni boor, machane Jesus e falan’ ni guy be’ ni ppin nib gafgow ni kem’ e pumoon rok ni yin’ nga lan tafen e salpiy l’agruw i salpiy nib achig ma ba sobut’. Me gaar: “Re ppin ney ni ke yim’ figirngin, e yugu aram rogon nib gafgow, me ir e boor e tin ni ke pi’ ko tin ke pi’ e pi cha’ nem. . . . Bochan ni ri baadag ma ke pi’ urngin e n’en bay rok ni fan ko par rok.”​—Luke 21:1-4; Mark 12:41-44.

Pin’en ni i yog Paul ngak piyu Korinth e taareb rogon ko re tafinay rok Jesus ney. Faani yira yog ni ngan pi’ e ayuw ni ngan ayuweg bochi gadad ni ke gafgow, Me ki yog Paul ni gaar: “Faanra ba pasigan’med ngay ni ngam pied ban’en, ma ra fek Got e tin ni kam pied nib taw’ath nrogon e tin nrayog ni ngam pied, ma gathi tin ni dariy romed.” (2 Korinth 8:12) Arrogon, ban’en ni ngan pi’ e ayuw ngay e gathi ban’en ni ngan tagengingnag ara ngan tataarebnag. Ra be’ ma nge pi’ e tini rayog rok, ma aram e ba fel’ u wan’ Jehovah ni rib falfalan’ ngay.

Yugu aram rogon ni dariy be’ ni rayog ni nge pi’ e fel’ rogon ngak Jehovah, ni ir e suwon urngin ban’en, ma pi’ ban’en e ma yibnag mat’awun e piin ni yad ma liyor ku Got ni nge bung rogon ni ngar daged e t’ufeg rorad ngak. (1 Chronicles 29:14-17) N’en ni yima pi’, ni yib e pi’ e ayuw ngay e gathi ban’en ni nga un dag ara fan nga boch e ngongol ni ba siin, ya ngan rin’ u fithik’ e ngongol nib fel’ min mon’ognag e bin riyul’ e liyor, me yibnag e falfalan’ ni ba muun ngay e taw’ath rok Got. (Matthew 6:1-4) I gaar Jesus: “Ba gel e falfalan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” (Acts 20:35) Rayog ni gad ra un nga boch ko re falfalan’ nem ni faan gad ra pi’ gelngidad ko pigpig ku Jehovah ma gad fal nga bayang boch ban’en ni bay rodad ni fan e ngada pied ni nge ayuweg e bin riyul’ e liyor miki ayuweg boch e piin ni ba t’uf e ayuw rorad.​—1 Korinth 16:1, 2.

Fal’eg Rogoy ni Ngan Pi’ Ban’en e Chiney

Chiney, ma Pi Mich rok Jehovah e ri yad be falfalan’ ni yad be guy e mon’og ni be tay e fayleng ni ga’ngin ko machib ko “re thin nib fel’ ney ni murung’agen fare gil’ilungun.” (Matthew 24:14) Nap’an fa bin tomur e ragag e duw ko fa bin 20 e chibog, ma boor ko 3,000,000 e girdi’ nni taufenagrad ni aram e kar daged ni kar ognaged yad ni ngar pigpiggad ku Jehovah Got, ma nap’an 30,000 e ulung nib biech ni ki sum. Arrogon, bayang ko dalip guruy ko pi ulung ko Pi Mich rok Jehovah ni bay e chiney e fini sum u lan fa bin baaray e ragag e duw ni ke yan! Oren e re mon’og ney e angin e maruwel nib elmirin ni i tay e pi Kristiano ni yad ba yul’yul’ ni pumoon ma ppin ni ri pied gelngirad nge tayim rorad ni bochan e nga u ranod iyan ko piin ni bay u toobrad nga rogned ngorad e tin baadag Jehovah. Maku boch e pi mon’og ney e angin e maruwel ko pi missionary, ni kar paged taferad ka ranod nga yu yang nib palog ni bochan e ngara pied e ayuw ko maruwel ni fan ko machib ko-fare gil’ilungun. Maku angin e re mon’og nem ma aram e ku kuni yarmiy boch e tagil’, nge kanawoen e machib ni aram e kiki t’uf ni nga ki yog boch e circuit overseer ni biech. Maku e ri tay, ni kiki t’uf boch e Bible ni boor ni ngan fanay ko machib me yibe fanay boch nga un skul riy. Maku ki t’uf boch e babyor nib yoor ni nga kuni ngongliy ni nga uni bieg. Ma boch e pi nam ni bay e naun ni office riy ni ka nog e branch building ngay e ke t’uf ni nga ni ga’nag ara ni thiliyeg tagil’ ngan tay nga bang nib ga’ boch e rad riy. Urngin e pi n’en ba t’uf ney e goo yibe rin’ nbochan e ayuw ni be pi’ e girdi rok Jehovah.

Ke T’uf e Pi Kingdom Hall

Reb e n’en ni ke m’ug ni ke t’uf ni ke bi gagiyel ko re mon’og ni baaray ni ke yoor e Pi Mich rok Jehovah e tagil’ e muulung rorad ni Kingdom Hall fithingan. Bay e survey ni kan tay aray ko m’on ko duw ni 2000 me bi m’ug nib boor ko 11,000 e Kingdom Hall nib t’uf ko yungin baaray e nam, ni fin yad be ngabchey i yan ma kab lich e salpiy rorad. Mu lemnag yu Angola. Dariy fan ni aram oren e duw ni yigi yibe cham u lan binaw rorad, ya re nam nem e kar pirieged ni ra reb e duw ma nap’an 10 pasent ni be mun ko Kingdom publisher rorad. Aram rogon, ma oren ko fa 675 i ulung ni bay ko re nam ney ni ba ga’ u Africa e ma muulung u wen ni dariy e naun. Kemus ni 22 e Kingdom Hall ko re nam nem, re 22 i Kingdom Hall ney e kemus ni 12 riy e bay e chigiy u daken.

Kub chuchugur ni nge aray rogon u Democratic Republic of Congo. Yugu aram rogon ni ba chugur i gaman e 300 e ulung ni bay ko fare mach nib ga’ nu Kinshasa, ma kemus nri ragag e Kingdom Hall. Ga’angin yang e re nam ney, ma aray e re gi n’en ni kari t’uf ni ngan toy boch e Kingdom Hall riy ni boor ko 1,500. Ma bochan nib papay ni be yoor e girdi’ ni be un ko Pi Mich rok Jehovah ko yungin ni baaray u ngek ni gin yu European, ma yu Russia nge yu Ukraine karognew nib t’uf rorow raay e Kingdom Hall. Ma aram rogon ni ba pey ni ke yoor e Pi Mich rok Jehovah u Latin America ma kab lich ko tin u Brazil, ya bay gonapan baley e milyon e Pi Mich u rom ma aram e ri kub t’uf boch e Kingdom Hall.

Ere n’en nge rin’ me yog e pi n’en nib t’uf ney ko pi yungi n’en baaray nib t’uf rorad, e aram e Pi Mich rok Jehovah e kar sunmiyed reb e program ni be maruwel nib pey ni yad be toy e Kingdom Hall. Re maruwel ney e be yib e salpiy riy ko salpiy ni be pi’ e pi walag u ga’ngin yang e fayleng ni yad ba gol ni yad be pi’ ma yad be pi’ u fithik’ e falfalan’, ni bochan ni nga ki mada’ ko bin th’abi gafgow e ulung ma nge yog tagil’ e liyor rorad nib fel’.

Ku bod rogon yu Israel kakrom, boor ban’en ni uni ngongliy nge fel’ nbochan e pi Kristiano ni yad ba yul’yul’ e ra ‘tayed fan Jehovah ko pi chugum rorad nib tolang puluwon.’ (Proverbs 3:9, 10) Ere Governing Body ko Pi Mich rok Jehovah e yad baadag e re ngiyal’ ney ni ngara pining e magar ngak urngin e girdi’ ni gum’ercha’rad e ke yog ngorad kar uned ko biney e ayuw ndariy puluwon ni yad rorad e ra lemnaged. Ma rayog ni nga gu pagedan’mad nga gelngin Jehovah ni bay i k’aring gum’ercha’en e girdi’ rok nga uri pied e ayuw ko tinib t’uf ko maruwel u gil’ilungun ni be ga’ iyan.

Chiney ni be ga’ e re maruwel ney u fayleng i yan, ma nga udi pired ni gad be gay rogon ni nga u daged fedad falfalan’ nge fedad pasig i pi’ gelngidad, nge tayim, nge tin bay rodad. Ma nge yog ni da pirieged e bin riyul’ e falfalan’ ni ma yib nbochan ni yibe pi’ ban’en ni yib falan’ ngay.

[Box on page 30]

“NGAN FANAY NIB FEL’ ROGON!”

“Ragag e duw rog. Kagu pi’ ere salpiy ney ngomed ni ngam chuwiyed e babyor ngay nge tin ba t’uf ni nga ni fal’eg e babyor riy.”​—Cindy.

“Gu baadag ni nga gu pi’ ere salpiy ney ngomed nga ku mu fal’eged boch e babyor riy ngad fanayed. Gu ayuweg ere salpiy ney ni yog ngog ni bochan e ugu ayuweg e chitamag. Ere mu maruwelgad ngay nib fel’ rogon!”​—Pam, medlip e duw rok.

“Ke kireban’ug ko fare yoko’. Gu be athapeg ni goo kab fel’ rogomed. Gali dola [$2, U.S.] ney e kari mus e salpiy ni bay u bank rog.”​—Allison, aningeg e duw rok.

“Fithingag e Rudy, ma ragag nge taareb e duw rog. Walageg ni pumoon e Ralph ni nel’ e duw rok. Ma walageg nib ppin e Judith ni l’aguw nge baley e duw rok. Kugu ayuweged reb ko salpiy ni yima pi’ ngomad ni aray e ke gaman e dalip e pul ni nga gu pied ngak pi walagmad ko [gini ke gothey e mahl]. Ere ke yog romad 20 e dola ni i re baaray ni kagu pied e chiney.”

“Ke kireban’ug ngak pi walag e [ni ke aw e yoko’ ngorad]. Ke yog 17 e dola ngog ni bochan e ugu un ko chitamag ko maruwel. Ere kagu pi’ ere salpiy ney ni gathi ri bay ban’en nib mudugil ban’en ni ngan fanay ngay, kagu t’ay ni gimed e ngamu dugliyed.”​—Maclean, meruk e duw rok rok.