Piin Piilal Nge Ministerial Servants E Got E Ke Dugliyrad

“Mu ayuweged gimed nge fare ulung i saf ni fare Kan ni Thothup e ke taymed ni nguum ayuweged.”​—ACTS 20:28.

1, 2. Uw rogon ni ke lebug e thin ni bay ko Isaiah 60:22?

KE n’uw nap’an kakrom ni i yog Jehovah ni bay ban’en nib thil nra buch u nap’an e tin tomren e rran. Kan weliy e re n’em u daken Isaiah ni profet ni gaar: “Tin nib lich e ra mang taareb e biyu’, nge tin nib achichig e ra mang reb e nam nib ga’. I gag Jehovah, e gu ra gagiyegnag nib gur nrogon nib puluw ngal’an.”​—Isaiah 60:22, New World Translation.

² Bay e mich riy ni be lebug e re yiiy ney ko ngiyal’ ney, fa? Arrogon, ba’! Nap’an e pi duw ni 1870, ma immoy reb e ulung rok Jehovah ni kan ngongliy u Allegheny, Pennsylvania, U.S.A. Ngiyal’ nem ni tabab e kari mus ni buchuw e girdi’ ni ma un ngay, ma munmun me yoor e girdi’ me sum bokum biyu’ e ulung u ga’ngin yang u fayleng ma ka be yoor i yan. Bokum milyon e pi tamachib ko Gil’ilungun Got​—ni aram e nam nib gel—​ni chiney e yad ba muun ko fa 91,000 e ulung ni bay ko fa 235 e nam u fayleng. Dariy e maruwar riy, ni aram e n’en ni be micheg ni Jehovah e be gurnag ni ngan ulunguy e tin riyul’ e pi tapigpig rok u m’on ni ngeb “fare gafgow ni baga’,” ni aram e n’en ni kari chuchugur ni ra lebug.​—Matthew 24:21; Revelation 7:9-14.

3. Mang fan fare n’en ni kan taufenag ‘nga fithingan e Chitamangiy, nge Fak, nge fare kan ni thothup’?

³ Tomren ni kara ognaged yad ngak Jehovah, nrogon nib puluw ko tin ni ke yog Jesus, ma bokum milyon e kan taufenagrad “nga fithingan e Chitamangiy nge Fak nge fare Kan ni Thothup.” (Matthew 28:19) Kan taufenag “nga fithingan e Chitamangiy” e be yip’ fan ni picha’ nem ni kar ognaged yad ku Jehovah e yad manang ni ir e Chitamangirad u tharmiy me ir e Ma Pi’ e Yafas mi yad par u tan e gagiyeg rok. Ma taufe ‘nga fithingan Fak’ e be yip fan ni Jesus Kristus e ke mang Tabiyul rorad, nge Tayog e thin, nge Pilung. Maku yad manang rogon ni be ayuwegrad e kan ni thothup rok Got, ara gelngin Got. Ma aram e n’en ni be dag ni kan taufenagrad ‘nga fithingan fare kan ni thothup.’

4. Uw rogon ni kan duguliy e pi tapigpig ni Kristiano?

⁴ Nap’an ni kan taufenagrad, ma pi gachalpen nib biech, e kan duguliyrad ni ngar manged pi tapigpig rok Got ni Jehovah. Mini’ e ke dugliyrad? Thin ni bay ko 2 Korinth 3:5 e ba m’ag ngorad ni gaar: “Ya gelngimad ni nggu maruweliyed ngay [ni gamad e pi tapigpig] e Got e ke pi’ ngomad.” Dariy yugu ban’en ni yad be lemnag ni kab fel’ ko tin ni baaray ni Jehovah Got e ir e ke dugliyrad! Tomren e taufe, ma ra mon’ogad i yan ko tirok Got ni yad e pi tamachib ko “thin nib fel’ ” u numngin nap’an ni yad ra fol u rogon ni be pow’iyrad gelngin Got ma ra ululgad i fanay e Thin rok.​—Matthew 24:14; Acts 9:31.

Got​—Gathi Girdi’—​e Ke Dugliy

5. Kan mel’eg e piin ni piilal nge piin ni ministerial servant nrogon nib democratic? Ngam mu weliy.

⁵ Ba t’uf ni piin ni piilal e ra ayuweg e ulung nib fel’ rogon ma piin ministerial servant e ra ayuwegrad ni ngar ayuweged e pi tapigpig nib pasig ni be yoor i yan. (Filippi 1:1) Uw rogon ni kan dugliy e picha’ nem ni kar ilalgad ko tirok Got? Gathi taab rogon ko n’en ni ma rin’ e piin ni Christendom. Ni bod ni, piin piilal e gathi ngan towaliyrad, ni nge yoor u fithik’ e piin u lan e ulung e ngar mel’eged yad. Gathi aram rogon, ya kan dugliyrad nrogon nib theocratic. Mang fan e re n’em?

6. (a) Mang fare theocracy nib riyul’? (b) Mang fan nrogon ni yima dugliy e piin ni ngar manged piin ni piilal nge ministerial e ba theocratic?

⁶ Ran weliy nrogon nib mom, ma fare bugithin ni theocracy e be yip fan e gagiyeg rok Got. Pi Mich rok Jehovah e be par u tan e gagiyeg rok ni lem rorad ma yad be maruwel u taabang ni fan e ngara rin’ed e tin nib m’agan’ Got ngay. (Psalm 143:10; Matthew 6:9, 10) Yima dugliy e piin ni ma ayuweg e ulung, ara piin ni piilal, nge piin ni ministerial servant nrogon nib theocratic ya bochan ni yima mel’eg ma yima pi’ e re maruwel nem ngak e pi pumoon ni kar mon’ogad ko tirok Got ban’en nrogon nib puluw ko yaram rok Got ni yog fare Babyor nib Thothup. Ma Jehovah ni ir e en “th’abi tolang,” e riyul’ ni bay mat’awon ni nge nang ko uwrarogon e ulung rok u fayleng.​—1 Chronicles 29:11; Psalm 97:9.

7. Uw rogon ni yibe gagiyegnag e Pi Mich rok Jehovah?

⁷ De taab rogon nga boor e teliw ni Christendom, ya Pi Mich rok Jehovah e gathi goo yad e kar dugliyed ko mit i mang am nib spiritual e ngar pared u tan pa’. Pi Kristiano nem nib yul’yul’ e be athamgil ni ngar folgad ko motochiyel rok Jehovah. Piin ni ma ayuweg e ulung e dan pi’ e re maruwel ney ngorad u daken e ulung, ngu daken e hierarchy, ara fare gagiyeg ni yima ta’ u galesiya ni presbyterian. Faanra bay boch ban’en u fayleng nra magawonnag e re yaram n’ey, ma dabi fol e girdi’ rok Jehovah riy. Yad ra par ni yad be fol u fithik’ e yul’yul’ ko thin ni i yog fapi apostal ko fa bin som’mon e chibog u nap’an ni ka ra gaargad: “Thingar gu folgad rok Got ko bin ni nggu folgad rok e girdi’.” (Acts 5:29) Arfan, ni ma fol e Pi Mich rok Got ko urngin ban’en. (Hebrews 12:9; James 4:7) Ngan fol ko yaram nrogon nib theocratic e ra falfalan’ Got ngay.

8. Uw rogon ni de taab rogon fare yaram ni democratic nge theocratic?

⁸ Bochan ni gadad e pi tapigpig rok Jehovah ni ir ba Theocrat nib ga’, ma aram e ffel’ ni ngada ted nga lanin’dad e n’en nib thil u thilin fare yaram nib democratic nge theocratic. Fare yaram ni Democratic e ba t’uf ni bay l’agruw e ulung ni be maruweliy ni nge yog ngorad fare maruwel, ma yira nang e re n’ey ya bochan ni yima ning e ayuw ko girdi’ riy ma ra un e girdi’ ni boor ko towal. Dariy ban’en ni aram rogon ko yaram ni theocratic u nap’an ni yira dugliy ni nge yog reb e maruwel ngak be’. Pi n’en ney e de yib rok e am ko girdi’; maku de yib rok fare n’en ni ka nog legal entity ngay. Ba tamilang ni be weliy Paul murung’agen ba ngiyal’ ni Jesus nge Jehovah e kar dugliyew ni nge mang “reb e apostal ko pi nam,” ma aram e yog ngak piyu Galatia ni kani dugliy ni “de yib rok e girdi’ ara u daken be’, ya daken Jesus Kristus nge Got ni Chitamangiy, ni ir e ke faseg Jesus ko yam’.”​—Roma 11:13; Galatia 1:1.

Kan ni Thothup e Ke Dugliy

9. Mang e be yog ko Acts 20:28 u murung’agen rogon ni ngan dugliy e piin ni kan tayrad ni ngara ayuweged e ulung?

⁹ I yog Paul ngak e piin ni yad ma par u Efesus ni kan tayrad ni ngara ayuweged e ulung ni Got e ke dugliyrad u daken e kan ni thothup. I yog ni gaar: “Mu ayuweged gimed nge fare ulung i saf ni Fare Kan ni Thothup e ke taymed ni nguum ayuweged. Gimed e ngam pired ko galesiya rok Got ni bod e piin ni ma ayuweg e saf, ya girdien e galesiya rok Got e ra manged girdien Got u daken e yam’ ni tay Fak.” (Acts 20:28) Piin Kristiano ni kan tayrad ni ngar ayuweged e ulung e thingara pared ni kan ni thothup e be pow’iyrad u nap’an ni yad be rin’ e maruwel rorad ni yad e tachugol saf rok Got. Faan manga be’ ni kan tay ni nge un ko reb e maruwel u lan e ulung ma munmun e dakir yog ni nge fol ko motochiyel rok Got, ma fare kan ni thothup e ra maruweliy ni ngan chuweg e cha’ nem ko maruwel rok boch nga m’on.

10. Uw rogon ni fare kan ni thothup e ri be ayuwegey u nap’an ni ngani dugliy e piin ni ra ayuweg e ulung nrogon nib theocratic?

¹⁰ Uw rogon ni fare kan ni thothup e be rin’ reb e maruwel nrib ga’ fan? Som’mon, ma fare babyor ni kan yoloy boch e thin ngay ni be dag boch ban’en ni nge maruweliy e piin ni baadag ni nge mang piilal e kan ni thothup e ke thagthagnag. U lan e pi babyor ni i pi’ Paul ngak Timothy nge Titus, e i weliy Paul riy boch ban’en ni susun ni nge yog ngak e piin ni piilal nge piin ministerial servant. Ke weliy murung’agen 16 e pi motochiyel nib thilthil ni rib t’uf. Ni bod ni, girdi’ ni kan tayrad ni ngara ayuweged e ulung e susun nge fel’ thin nge pangin, ma ba gonop, ma ba fel’ e ngongol rok; ma thingari m’agan’ ngay ni nge t’ufeg e milekag ni kar bad nga tabinaw rok, ma thingari yog rok ni nge machib; ma thingari yog rok ni gagiyegnag girdien e tabinaw rok nib fel’ rogon. Ma susun yad e piin ni dab ur balyanggad ko rrum, ma thingar dabra chogownaged e salpiy, ma yad ma t’ar lanin’rad. Ma taab rogon ko piin ni yad be nameg ni ngar manged ministerial servant ni susun nguur folgad ko pi motochiyel ney.​—1 Timothy 3:1-10, 12, 13; Titus 1:5-9.

11. Mang boch e ngongol nib fel’ ni susun ni nge yog ngak e piin ni be maruweliy ni nge yog ngorad boch e maruwel u lan e ulung?

¹¹ Ra ngan sul u daken e pi fal’ngin ney ma ra m’ug ni piin ngar ayuweged yugu boch e girdi’ u rogon ni ngar liyorgad ku Jehovah e susun yad e piin ni ri yad ma dag e ngongol ko Kristiano. Piin ni pumoon ni yad be nameg ni nge yog boch e maruwel ngorad u lan e ulung e thingara daged ni be maruwel fare kan ni thothup u dakenrad. (2 Timothy 1:14) Susun ni ngan guy e mich riy nib tamilang ni gelngin Got e be pi’ wom’ngin ngak e pi cha’ nem ni aram e “t’ufeg, nge falfalan, nge gapas laniyan’, nge gum’an’, nge gol, nge fel’ ngak e girdi’, nge yul’yul’, nge sobut’an’, nge t’ar laniyan’.” (Galatia 5:22, 23) Pi wom’ngin nem e rayog ni ngan guy u nap’an ni ngara ayuweged ara nga ur nongad ngak e pi walag nge yugu boch e girdi’. Riyul’, ni boch e girdi’ e yad ma dag boch wom’ngin e kan ni thothup ko yafas rorad ni kab gel ko yugu boch e girdi’, machane sana boch e girdi’ e ke yog rorad ni ngar folgad ko boch e motochiyel ni fan ko piin ni ma ayuweg e ulung nib fel’ rogon. Machane yafas ko piin ni be nameg ni ngan dugliyrad ni ngar manged e piilal ara ministerial servant e thingara daged ni kar ilalgad ko tirok Got ban’en, ma yad ma fol ko pi motochiyel rok Got.

12. Mini’ e rayog ni nga nog ni kan ni thothup e ir ke dugliy e cha’ nem?

¹² Nap’an ni ke fonownag Paul yugu boch e girdi’ ni ngar folgad rok, ma aram bay rogon ni nge yog ni aram rogon ya bochan ni ke fol rok Jesus Kristus, ni ir e ke ‘dag ngodad rogon ni ngad folwokgad rok ma aram e rayog ni ngada leked luwan’ ay.’ (1 Peter 2:21; 1 Korinth 11:1)Piin ni ke yog rorad ni ngar folgad ko pi motochiyel u Bible u nap’an ni kan dugliyrad ni ngar manged piin ni piilal ara ministerial servants e rayog ni nga nog ni kan ni thothup e ke dugliyrad.

13. Uw rogon ni kan ni thothup e ir e ma ayuweg e piin ni kan mel’eg ni ra ayuweg e ulung?

¹³ Ka bay taaban’en ni be dag rogon ni be maruweliy fare kan ni thothup u nap’an ni yira mel’eg ma ngan dugliy boch e girdi’ ni ngara manged piin ni piilal u lan e ulung. I yog Jesus ni ‘fare Chitamangiy u tharmiy e ra pi’ fare kan ni thothup ngak e piin ni yad ra ning ngak.’ (Luke 11:13) Ere nap’an ni piin ni piilal u lan e ulung e ngara muulunggad ni fan e ngara mel’eged boch e pumoon ni ngar pied ngorad boch e maruwel, mar yibilayed ni nge yog ngorad gelngin Got ni ra pow’iyrad. Yad ma mel’eg be’ nrogon nib puluw ko n’en ni be weliy e Thin rok Got ni kan ni thagthagnag, ma kan ni thothup e ra ayuwegrad ni ngara nanged ni riyul’ ni fa cha’ ni yibe lemnag ni yira pi’ ngak reb e maruwel e riyul’ ni ra fol ko n’en ni be yog e babyor nib thothup. Piin ni be mel’eg boch e girdi’ ni fan ko re maruwel n’ey e susun dabra dugliyed ban’en ni be yan u rogon yaan be’, nge feni tolang e skul ni ke un ngay, ara boch e salap rok. Tin som’mon ni yad ra tedanrad ngay e nga ra nanged ko riyul’ ni ke ilal fa cha’ ko tirok Got, ma piin ni girdien e ulung e dabi maruwaran’rad ni ngar bad ngak ni nge pi’ e fonow ngorad.

14. Mang e gad ra fil ko thin ni bay ko Acts 6:1-3?

¹⁴ Yugu aram rogon ni piin ni piilal u lan e ulung e yad ma ayuweg e piin ni piilal ni ma lekag e ulung u nap’an ni yira mel’eg boch e walag ni pumoon ni ngara manged piilal nge ministerial servants, machane yima mel’egrad nrogon nib puluw ko n’en ni un rin’ ko fa bin som’mon e chibog. Ba’ biyay, nib t’uf reb e pumoon ni ke ilal ko tirok Got ni nge ayuweg reb e maruwel nib ga’ fan. Ke pi’ fare governing body boch e thin ni gaar: “Ere gimed e pi walagmad u daken Jesus e ngam mel’eged medlip ni’ u fithik’med ni gimed manang ni yad ba sug ko fare Kan ni Thothup ma yad ba gonop, ma gadad tayrad ni yad e nge mil fan e gaf ney e maruwel ngorad.” (Acts 6:1-3) Yugu aram rogon ni boch e pumoon ni be un ko re muulung nem e ur mel’eged e piin yira pi’ ngak boch e maruwel, machane pi pumoon u Jerusalem ni kar ilalgad ko tirok Got ban’en e ura dugliyed. Ma aram rogon e n’en ni yima rin’ ko ngiyal’ ney.

15. Uw rogon ni ba l’ag ko fare Governing Body u nap’an ni yira dugliy e piin pumoon ni nge yog ngorad reb e maruwel u lan e ulung?

¹⁵ Fare Governing Body ko Pi Mich rok Jehovah e yad ma dugliy e piin ni ngara manged bang ko Branch Committees. Nap’an ni yira dugliy ko mini’ e bay rogon ni nge fek e re maruwel nib tomal ney, ma ma lemnag fare Governing Body e thin rok Jesus ni gaar: “Ya cha’ ni boor e tin ni kan pi’ ngak e yibe finey ni ba ga’ labgen ni nge fulweg; ma cha’ ni ka boor boch e tin ni kan pi’ ngak e yibe finey ni ka boor boch e tin ni nge fulweg ni labgen.” (Luke 12:48) Gathi kemus ni ma duguliy fare Governing Body e piin ni nga ra manged bang ko Branch Committee, ya ku yad ma dugliy e piin ni nga ra manged piin piilal u Bethel nge piin piilal ni ma lekag e ulung. Yugu aram rogon, ma yad ma ta’ ni boch e pumoon ni ke ilal ko tirok Got e ke mil fan ngorad ni ngara dugliyed boch ban’en. Maku bay e thin u Bible ni be dag e re n’ey.

‘Mu Dugliy e Piin ni Ngar Manged Piilal, Nrogon ni Ku Gog Ngom’

16. Mang fan ni ke pag Paul Titus u Krete, ma re n’ey e be dag e mang u murung’agen rogon ni ngan dugliy e piin ni ma ayuweg e ulung e chiney?

¹⁶ I yog Paul ngak Titus ni yow be maruwel u taabang ni gaar: “Gu pagem u Krete ni fan e ngam fal’eg rogon e tin ni ka bay ban’en ni ngan maruweliy, ma nge reb e binaw ma ga dugliy e piin ni ngar manged piilal ko galesiya riy. Dab mpag talin e tin ni ku gog ngom.” (Titus 1:5) Me weliy Paul boch e pi felngin nib fel’ ni nge yaliy Titus ni susun ni bay rok e pi pumoon ni yira dugliy ni ngar manged e piin ni piilal. Ma arfan, ni chiney, ma fare Governing Body e ma dugliy e pi walag ni pumoon u tochuch ni ir e ra dugliy e piin ngar manged piin ni piilal nge ministerial servants. Kan guy rogon ni piin ni kan tayrad ni ngar manged owchen fare Governing Body ma yad ma dugliy e piin ni ngar uned ko re maruwel n’ey e ri yad manang e thin u Bible ni be weliy murung’agen. Arfan, ni yima dugliy e piin ni kar ilalgad ko tirok Got ban’en ni ngara ayuweged e pi ulung ko Pi Mich rok Jehovah u ga’ngin yang u fayleng u daken e ayuw ko fare Governing Body.

17. Uw rogon ni ma ayuwegey e tochuch u nap’an ni yira mel’eg e piin ni ma ayuweg e ulung nge piin ministerial servant?

¹⁷ Nap’an ni kan pi’ e babyor ni kan yoloy ngay e piin ni kan mel’egrad ni ngar manged piin ni piilal nge piin ministerial servant nga reb e tochuch ko Watch Tower Society, ma pi pumoon ni ke yoor e n’en ni yad manang e ka ra torgad nga daken gelngin Got ni ra pow’iyrad i dugliy. Fapi pumoon e ke thamiy ni ke milfan ngorad urngin ban’en riy, ma yad manang ni thingar dabra gurgad ni ngar ted pa’rad nga daken be’, ya richey mar uned ko denen rok.​—1 Timothy 5:22.

18, 19. (a) Uw rogon ni nge nang e girdi’ murung’agen e piin ni kan dugliyrad? (b) Yima rin’ e re yaram ney ni ngan mel’eg min dugliy be’ ni nge yog ngak reb e maruwel u lan e ulung u daken e ayuw ko mang?

¹⁸ Yu ngiyal’ ma yima pi’ e babyor ni bay stamp riy ni yib ko gin ni yima yog legal entity ngay. Ma re babyor ney e yima fanay ni fan ni ngan ni dugliy e girdi’ ni boor ko taareb ni ngara ayuweged e ulung.

¹⁹ Ngani dugliy ban’en nrogon nib Theocratic e yib rok Jehovah u daken Fak ngu daken e n’en ni ma fanay Jehovah u roy u fayleng, ni aram “fare tapigpig nib yul’yul’ mab gonop” nge fare Governing Body rorad. (Matthew 24:45-47) Fare yaram nrogon ni ngan mel’eg min dugliy ni ra ayuweg e ulung e aram e kan ni thothup e be pow’iyey riy. Aram rogon ya bochan ni pi felngin ni susun ni nge yog ngak fa cha’ e bay e mich riy ni bay ko Thin rok Got, ni kan thagthagnag ko kan ni thothup, ma fa cha’ ni kan dugliy e ma dag e pi wom’ngin e kan ni thothup ko ngongol rok. Ma arfan, ni susun ni ngani lemnag ni kan ni thothup e ir e ke dugliyrad. Taab rogon ko piin ni piilal nge piin ministerial servant ko fa bin som’mon e chibog ni kan dugliyrad nrogon nib theocratic, ma ri aram rogon ko ngiyal’ ney.

Ba Falfalan’ Ya Jehovah e Ma Pow’iyey

20. Mang fan ni taab rogon e lem rodad ko n’en i yog David ko Psalm 133:1?

²⁰ Ngiyal’ ney ni tirok Got ban’en e be mon’nog i yan ma ke gel fare maruwel i wereg e thin ko Gil’ilungun Got, ma ngada pininged e magar ku Jehovah ya bochan fare yaram ni ngan dugliy e piin ni ngar manged piin ni piilal nge ministerial servant e yib rok. Re yaram ney nib puluw ko thin u Bible e be ayuweg ni Pi Mich rok Jehovah e yad ra par ni yad be tay fan e motochiyel rok Got ni ba mat’aw. Maku, ngongol nge maruwel ni ma tay e pi cha’ nem e ra ayuweg ni nge yog e gapas ma ra taareban’dad ni gadad e pi tapigpig rok Jehovah. Taab rogon ku David ni psalmist, ma kan k’aringdad ni nga dogned ni gaar: “Am sap! Nga feni fel’ nge feni gel e falfalan’ ko pi walag ni yad be par u taabang ni ba taareb lanin’rad!”​—Psalm 133:1.

21. Uw rogon ni ke lebug e thin ni bay ko Isaiah 60:17 e chiney?

²¹ Ri gad ba falfalan’ ya be pow’iydad Jehovah u daken e Thin rok nge kan ni thothup! Ma ri bay fan fapi thin ni bay ko Isaiah 60:17 ni gaar: “Bay gu fek e gol i yib ngom ma gathi bronze, ma silber e bay yan nga luwan e wasey, ma bronze e bay yan nga luwan e ren; bay yog e wasey ngom ma gathi malang. Pi pilung rom e dab kur gafgowniged gur; bay gu tayeg ngorad nguur gagiyeggad u fithik’ e yal’uw nge gapas.” Bochan ni Pi Mich rok Jehovah e be mon’og i yan nrogon ni yad ma fol ko yaram nib theocratic, ma arfan ni gad be par e chiney u lan e ulung rok Got u fayleng ni kan taw’athnagdad.

22. Gad ba falfalan’ nbochan e mang, ma ri gad baadag ni ngada rin’ed e mang?

²² Ri gad ba falfalan’ ni kan ta’ reb e yaram ni theocratic u fithik’dad. Ma ri ba ga’ fan u wan’dad e maruwel nib gel ni ke ta’ e piin ni piilal nge piin ministerial servant ni kan dugliyrad nrogon nib theocratic. Ri gad be pining e sorok ngak e Chitamangidad u tharmiy ni ir Got ni tarunguyey, ya ir e ke ayuwegdad ma aram e kada mon’ogad i yan ko tirok ban’en ma ke flaabnagdad nrib gel. (Proverbs 10:22) Ere, ngada maruweliyed ni nge mudugil lanin’dad ni ngada folgad ko ulung rok Jehovah. Ka bay reb nrib ga’ fan, ni aram e ngada ululgad ni ngad pigpiggad u taabang ni fan e ngani tay fan, ma ngani pining e sorok ngak Jehovah ni fithingan e ba gilbuguwan mab thothup.

Uw Rogon ni Ngam Pi’ e Fulweg?

• Mang fan ni rayog ni nga dogned ni kan dugliy e piin ni nge mang piilal nge ministerial servants nrogon nib theocratic, ma gathi democratic?

• Uw rogon ni ke dugliy fare kan ni thothup e piin ni pumoon ni kar ilalgad ko tirok Got ban’en?

• Uw rogon ni fare Governing Body e ba l’ag ngay u nap’an ni yira dugliy e piin ni ngara manged piin piilal nge piin ministerial servant?

• Mang fan ni thingarda pininged e magar ku Jehovah u murung’agen rogon ni yima dugliy be’ nra ayuweg e ulung nrogon nib theocratic?

[Pictures on page 11]

Kan dugliy nrogon nib theocratic ni piin ni piilal nge piin ni ministerial servant ni ngara pigpiggad