Fare Thin Nib Fel’ ko Gil’ilungun Be Mang e Re N’en Nem?

Fa binem e duw u lan 235 e nam nib liyeg e fayleng ma 6,035,564 e girdi’, ni fel’ yangaren nge piilal e ra fanayed, 1,171,270,425 e awa ni ura weliyed murung’agen e re n’en nem ngak boch e girdi’. Maku yad be non u l’igin’rad ko girdi’, maku ra tayed nga lan pa’ e girdi’ ni yoor e babyor ni kan yoloy ni boor ko 700 milyon ken ni ku yibe garareg ma be weliy murung’agen ere n’en nem. Maku ku ra wereged boor e biyu’ e audiocassettes ni yima motoyil ngay nge videocassettes ni kachido ni nga ki wereg boch murung’agen ere n’en nem. Mang ere n’en “nem”?

“FARE” thin nib fel’ ni murung’agen fare Gagiyeg Rok Got. Rriyul’, ni dariy ba ngiyal’ u nap’an chepin e girdi’ ni kan machibnag ere “thin nib fel’ ney ni murung’agen ere gil’ilungun nem” ngeni musmus nga rogon ni bod ni kad guyed e chiney.​—Matthew 24:14.

Pi cha’ ni yad be maruweliy ere n’en ney ni yad be machib ma yad be fil ere machib ney ko girdi’ u ga’ngin yang e fayleng e yad gubin ni kar ognaged yad ko re maruwel ney ni dariy puluwrad ni yibe pi’. Ra changar e girdi’ nu fayleng ngorad, ma sana rabi m’ug ni yad bogi girdi’ ni dabra bunggad ko binem e maruwel. Ere, mang, e ke pi’ gelngirad me yog rorad? Gelngin fare thin nib fel’ ko re Gil’ilungun nem, e reb e n’en ni rib ga’ fan, ni bochan ni ba thin nib biech ni murung’agen e taw’ath ni ra yib ngak urngin e girdi’. Ireray e pi n’en ni be yim’ e girdi’ ni bochan ni aram e​—falfalan’, nge ngan chuw ko magawon ko par nge gafgow, am nib manigil, gapas nge pagan’ nge kub ban’en ni oren e girdi’ e der lemnag ni aram e—​yafas ni manemus! Re n’en ney e rriyul’ ni ba thin nib fel’ ngak e piin ni yad be gaweg ko mang fan ma mang e ra rin’ e yafas ko girdi’. Arrogon, urngin e pi taw’ath ney nge ku boch ban’en e rayog ngom ni faan ga ra fol ma ga rin’ nib puluw nga rogon ni be yog fare thin nib fel’ ko fare Gil’ilungun.

Mang fare Gil’ilungun?

Ere, be mang fare Gil’ilungun ni yibe weliy murung’agen nib fel’? Ireram fare Gil’ilungun ni kan fil ngak bokum milyon e girdi’ ni nga ura yibiliyed ni bod rogon ni baaray: “Chitamangimad ni ga bay u tharmiy, ngan ta’ fan fithingam. Me yib gil’ilungum, min rin’ e ti nib m’agan’um ngay u tharmiy, maku arrogon u roy u but’.”​—Matthew 6:9, 10, New World Translation.

Ireram fare Gil’ilungun ni weliy faram fare profet nu Hebrew ni Daniel ni gonapan 25 miriay e duw ni ke yan ni faani yoloy ni gaar: “Ngiyal’ ni bay i gagiyeg e pi pilung nem, e aram e bayi sunumeg Got nu tharmiy reb e gagiyeg ndariy e rofen nra mus. Ma binem e gagiyeg e dariy be’ nra gel ngay biid, machane e bayi thirif u but’ urngin e pi pilung nem nge gagiyeg ni yad be tay me mang fa birok e gagiyeg e i par ni ndariy numngin nap’an.”​—Daniel 2:44.

Ere aray rogon, fare thin nib fel’ u murung’agen fare Gil’ilungun aram fare am ku Got ni ra chuweg urngin e kireb ma aram me gagiyeg u ga’ngin yang e fayleng u fithik’ e gapas. Ma aram e ba yib i dag e bin riyul’’ i fan u wan’ fare Tasunmiy ni sunumiy e girdi’ nge fayleng.​—Genesis 1:28.

“Fare Gagiyeg nu Tharmiy e ke Chugur”

Ke chugur i gaman 2,000 e duw, ni ke yan ni aram e som’mon ni un wereg fare thin nib fel’ ni murung’agen fare Gagiyeg nge nang e girdi’ ni yoor ni i weliy be’ nib moon ni ta’ ni ereram e maruwel rok ma rarogon nge ngongolen e ni ngat ngay. Re moon nem e John ni ma Taufe, ni fak ba prist nu Jew ni Zechariah ma ppin rok, e Elizabeth. I John e chuw nga ba mad nni fal’eg ko bunen e kamel, ma ke m’ag nga lukngun bangi keru’ e gamanman, ni bod rarogon Elijah ni profet, ni ir e i ngongol ni be yip’ fan John. Machane n’en i yog e ir e k’aring boor e girdi’ ngar motoyilgad. “Mu pied keru’med ko kireb ni gimed be rin’,” aray rogon ni i weliy, “ya gagiyeg rok Got nu tharmiy e ke chugur.”​—Matthew 3:1-6.

Piin ura motoyilgad ku John e piyu Jew, ni yad ma yog ni yad e yad ma liyor ko bin riyul’ e Got, ni Jehovah. Ya yad fare nam, ni kan pi’ ngorad fare motochiyel ko m’ag nni pi’ ku Moses ni gonapan 1,500 e duw ni ke yan e ngiyal’ nem. Ka ba’ nib suwon fare tempel nu Jerusalem ni rib manigil, ni aram e gin ni yima pi’ e maligach riy ni bod rogon ni ba’ ko motochiyel. Girdi’ nu Jew e ngiyal’ nem e ri yad be lemnag ni rogon e liyor ni yad be ta’ e rib fel’ u p’owchen Got.

Ere uni motoyil ku John, ma aram e fini nang, boch e girdi’ ni teliw rorad e gathi bod rogon ni ur lemniged. Yalen nge llowan’ nu Greek e ke bi maathuk ko teliw rok yu Jew nge machib riy. Fare motochiyel ni yib rok Got me pi’ Moses ko girdi’ e ke war ma kan puthuy boch ngay, maku ke m’ay fan ni bochan e pi n’en ni ke michan’iy ngay ni girdi’ e sum rok nge yalen ko girdi’. (Matthew 15:6) De puluw rogon i pow’iyrad rok e pi tayugang ko teliw rorad, ni bogi ni’ der ma runguyed ma der kireban’rad ko girdi’ ma aram e boor i yad e daki i liyor ni bod rogon nib magan’ Got ngay. (James 1:27) Ere ba t’uf rorad ni ngar kalgadngan’rad ko denen rorad nib togopuluw ku Got nge fare m’ag ko motochiyel.

Re ngiyal’ i n’en nem, ma boor piyu Jew ni yad be finey ni ba yib i m’ug fare Messiah, ara Kristus, ni faan kan micheg, ma bochi yad e be maruwar John u wan’ ni be lungurad: “Gur ireray ere moon ni Kristus?” Machane, me siyeg John nge yog ni gathi ir, ma aram me pow’iyrad ngak yugu be’, ni weliy ni gaar: “I mada’ nga togfan e sus rok ni dab gubung ni ngu gu [his] pithig.” (Luke 3:15, 16) I yib John i yog Jesus ngak pi chongin, ni gaar: “Baaram fare fak e saf rok Got ni ir e nge chuweg e denen rok e girdi’ nu fayleng!”​—John 1:29.

Re n’en nem e ri ba mudugil ni ba thin nib fel’, ya n’en be rin’ John, e be dag ngak urngin e girdi’ fare kanawo’ ko yafas nge falfalan’​—ni aram Jesus, ni ir e cha’ ni ra “chuweg e denen ko fayleng.” Bochan nnib rok Adam nge Efa, ma aram e urngin e girdi’ e kan gargelegrad nga tan gelngin e kireb ko denen nge yam’. Roma 5:19 e be weliy ni be gaar: “Ma rogon ni boor e girdi’ ni yan i par ni yad e tadenen ni bochan e taareb e girdi’ [Adam] nde fol, e ku aram rogon ni boor e girdi’ ni bay i mat’awnagrad Got ngak ni bochan taabe’ [Jesus] ni ke fol.” Jesus e taareb rogon nga ba fak e saf ni maligach, ya nge ‘chuweg e denen’ me thiliyeg fa ngiyal ni ba aram nib gafgow ma ba kireban’ e par ko girdi’. “Ya denen e ma pi’ puluwoy ni yam’,” me weliy e Bible ni gaar, “machane taw’ath rok Got ni pi’ e yafas ni manemus u daken Jesus Kristus ni Somol rodad.”​—Roma 6:23, NW.

Be’ nib moon nib flont​—ni riyul’ ni karimus e taare e pumoon, nib th’abi gilbuguwan ni ke sum—​ma aram me tabab Jesus i machibnag fare thin nib fel’. Be yog e Bible ko Mark 1:14, 15 ni be gaar ngodad: “Nga tomren ni ka nin’ John nga kalbus, me yan Jesus nga Galilee nge machibnag ngak e girdi’ e thin nib fel’ ni yib rok Got, ni be gaar: ‘Ke taw nga nap’an nnog, ma gagiyeg rok Got e ke chugur. Mpied keru’med ko denen ni gimed be rin’ nge mich u wan’med e thin nib fel’ ni yib rok Got.’ ”

Piin ra motoyilgad ko pi n’en ni yog Jesus’ ma ra maruweliyed e michan’ rorad nga daken e re thin nib fel’ nem e ni taw’athnagrad nib gel. John 1:12 e be gaar: “Machane boch i yad e ra adaged ni ke yib ngorad me mich u wan’rad ko ir mini’ [Jesus], ma aram me pi’ mat’awrad ni kar manged pi fak Got, ni bochan ni yad be maruweliy e michan’ rorad nga fithingan.” Bochan ni kar manged pi fak ma aram e ke bung rogorad ni ngar uned ko fare taw’ath ko yafas ni manemus.​—1 John 2:25.

Ma kanawoen me yog ere taw’ath ko re Gil’ilungun nem e gathi kemus ni yi goo girdi’ ko bin m’on e chibog e rayog ngorad. Ya bod ni ka nog faram, ni fare thin nib fel’ ni murung’agen Gil’ilungun Got e kan wereg goo kan nang ma kan fil ko girdi’ u ga’ngin yang e fayleng e chiney. Mang e thingar mu rin’ me yog boch ngom e re taw’ath nem? Bin migid e thin e ra weliy rogon ngodad.