Rayog Ngom Pi Taw’ath ko Gil’ilungun

APOSTAL Paul ni fare Kristiano e boor mit e thin ni baga’ ni yima yog ko ngiyal’ nem nib salap riy. Tolangin e skul rok e bod tolngin e university e chiney. I par u tan fel’ngin nge mat’awun nib be’ nu Roma. (Acts 21:37-40; 22:3, 28) Par ni aray rogon e rayog ni nge ayuweg nge yoor ban’en rok me gilbuguwan. Machane, me gaar: “Machane urngin e pi n’em nsusun e gu ra matheeg ngay ni win rog e kug matheeg ngay e chiney ni ke yan i aw ni lus rog ni bochan Kristus . . . ni gathi kemus ni pi n’em, ya urngin ban’en ma kug matheeg ngay ni kari yan i aw ni lus ni bochan e bin ka baga’ fan e nggu nang Kristus.” (Filippi 3:7, 8) Mang fan ni yog Paul ban’en ni aram rogon?

Som’mon e yi manang ni Saul nu Tarsus e be’ ni ma togopuluw ngak e piin yad be “un ko Fare Kanawo’,” I Paul e mang reb e girdi’ ni ke michan’ u tomren ni kan piliyeg e changar rok ke gu’ Jesus ni kan faseg ko yam’ ke gilbuguwan. (Acts 9:1-19) Ma rogon ngak Paul, re n’en ney ni buch rok u kanawo’ nga Damascus e ri micheg nge mudugil u wan’ ni dakuriy boch i maruwar riy ni Jesus e ir fare Messiah, ara Kristus, ni faan kan micheg ni ir e ra mang pilung ko fare Gil’ilungun ni kan micheg ni bayib. Maku ir e ra thiliyeg e yafas ku Paul, ni bod rogon ni be m’ug ko thin rok nib mudugil ni faan ke yog buchuw kafram. Maku reb e, bochan ni be’ nib yul’yul’ ma kub yul’yul’ gum’ercha’en ma aram mi ri kal Paul ngan’ ko denen rok nge pi’ keru’ ko kireb ni be rin’.​—Galatia 1:13-16.

U lan e Bible, ma fare bugithin ni “kalngan’ ” e baga’ ni yima piliyeg u ba bugithin ni Greek ni fan ere bugithin nem e “tomuren ni kan nang,” ni aram e ba togopuluw ko bug ni baaray ni “kannang.” Arfan, ni kalngan’ e ba muun ngay e thil ni nge thil e lem ku be’, nge pangin, ara tapgin ni nge pag be’ e n’en i rin’ ko som’mon ni bochan ni dakir fel’ u wan’. (Acts 3:19; Revelation 2:5) Ma n’en ni rin’ Paul, e yugu de pag e n’en ni buch rok u daken e kanawo’ nga Damascus ni yugu ban’en ni gathi ri ba uw rogon, kemus ni tafnay rok ara ban’en ni yug yima yog ni ku yugu ma buch ko tirok Got ban’en. Ir rok e lemnag nib tamilangan’ ni tay nga rogon e yafas rok ko som’mon, ni de nang Kristus, e mm’ay fan. Miki yan i naab ngay, ni ku arrogon, ni faanra ngeb angin ngak e bin biech e tamilangan’ ni ka fini pirieg u murung’agen Kristus, ma thingari rin’ ban’en ni nge yal’uweg kanawoen e yafas rok.​—Roma 2:4; Efesus 4:24.

Ni Thiliyeg Meb e Taw’ath

Som’mon, ma tamilangan’ rok Paul u murung’agen Got e baga’ ni yib ko teliw ko pi Pharisees, ni aram e bin ir reb i girdien. Pi nen ma mich u wan’rad e baga’ nib muun ngay e llowan’ ko girdi’ ni ir e be michan’rad ngay nge yalen ko girdi’. Ma bochan e yo’yoor thin nge maluagthin ko yuraba’ i teliw ma aram e maruwel ni i tay nib gel e ni pow’iy nga orel ko bin riyul’ e kanawo’. Rogon ni i lemnag e be pigpig ku Got, ma nen ni be rin’ e be cham nib togopuluw ngak.​—Filippi 3:5, 6.

Tomren ni ke yog e bin riyul’ e tamilangan’ ngak u murung’agen Kristus nge maruwel rok ko pi n’en ni ke lemnag Got, me ni nang Paul ni aram e bay ban’en ni ngari dugliy: Reb e nga ki par ni ir reb e Farise nga kii par ko liw rok nib baga’ buguan, fa thingari thiliyeg kanawoen e yafas rok nge tabab i rin’ e n’en nib t’uf ni nge rin’ me yog ni falan’ Got ngak? Rib gel e falfalan’ riy, ye Paul e mel’eg e bin nib mat’aw ni nge rin’, ye gaar: “Dagur tamra’ ko re thin ney nib fel’ni murung’agen Jesus, ya ir gelngin Got ni nge thapeg e girdi’ ngak, ni urngin e piin ni ke mich u wan’rad e re thin ney, ni som’mon e pi’ ngak piyu Israel, mu kun pi’ ngak e pi nam ni gathi yad piyu Israel.” (Roma 1:16) Me mang Paul reb e tamachib ko fare thin nib fel’ ni murung’agen Kristus nge fare Gil’ilungun.

Ke yoor e duw nga tomuren, me yog Paul ko tin yad e Kristiano ni gaar: “Pi walageg, ri dagur finey ni kug taw nga; machane re n’en ni kug rin’ e kug pagtalin e n’en ni bay nga keruug, ma gu be athamgil ni nggu taw ko n’en ni ir e ba’ nga m’on rog. Ere gu be mil nib k’iy kanawoeg i yan ko n’en ni gu be nameg ni bochan e nge yog puluwon ngog, ni aram e pong ni ke ta’ Got ngodad u daken Kristus ni nga darod ko yafas n bay u tharmiy.” (Filippi 3:13, 14) I yib angin ku Paul fare thin nib fel’ ni bochan e adag ni nge digey e pi n’en ni ki i palognag rok Got me tabab ko maruwel ni be nameg e pi nen nib puluw ko n’en nib magan’ Got ngay.

Mang e Ga Ra Rin’?

Sana kafin yu gum rung’ag fare thin nib fel’ ni murung’agen fare Gil’ilungun. Fare athap ko par ni manemus u ba paradis ni dariy kirebun, ga baadag fa? Ba fel’ ni ngan adag, ya gadad gubin ni da sumgad ni bay ban’en u fithik’dad ni ri gadad baadag ni nga udi pired nga udi falfalan’gad ko yafas rodad u fithik’ e gapas nge pagan’. Be yog e Bible ni ke ta’ Got e “manemus” nga lan i gum’ercha’dad. (Eklesiastes 3:11) Ere arfan ni kab mecham ngodad ni nga udi athapegned ba ngiyal’ ni rayog ni par e girdi’ ni dariy n’umngin nap’an u fithik’ e gapas nge falfalan’. Ma aram e n’en ni be ognag fare thin nib fel’ ko fare Gil’ilungun.

Faanra ngada riyul’ niged ere athap nem, ma aram e, ba t’uf ni ngam gaweg ngam pirieg ko mang murung’agen fare thin nib fel’. Apostal Paul e fonownagey ni gaar: “Mu micheged [ngomed] e pi n’en nib fel’ nib m’agan’ Got ngay nge fel’ngin e pi n’en nib m’agan’ ngay.” (Roma 12:2, NW) Ere, ngan bod Paul, tomuren ni ke yog e tamilangan’ ngom ma kam nang fan, ma aram e thingar mu turguy e n’en ngam rin’.

Maku reb e, sana ba’ boch ban’en ni ke michan’um ngay ni fan ngom gabul nge langleth. Ma dab mu pagtalin ni Saul e ki immoy e tin ki i lemnag u murung’agen e tin nib m’agan’ Got ngay u m’on ni mang apostal Paul. Machane, mang ni nga udi pired nga udi sonniged ba maangang ni nge dag Got, ma dabda changargad ko n’en ni be buch? Amu deeriyem: ‘Gur kari gu nang e n’en nib m’agan’ Got ngay u rogon e girdi’ nge fayleng? Mang e mich ni ba’ rog ni rayog ni gu dag fa gog nge micheg e michan’ rog? Ma re mich rog nem rayog ni m’ug nib gagiyel ni faanra ngan skengnag nga lan e tamilang ko thin rok Got, ni fare Bible?’ Dariy ban’en ni ra buch rom ni faan ga ra skengnag ni aray rogon e pi n’en ni ke michan’um ko baarom e teliw. Ma rogon riy, e thingar mu adag ni ngam mu rin’ ni aray rogon ya be ta’ e Bible chilen ngodad ni gaar: “Um skengnaged urngin ban’en mi gimed fanay e tin nib fel’ riy.” (1 Thessalonika 5:21) Demtrug rogon, ma gathi n’en nib m’ag u wan’ Got e aram e bin baga’ fan?​—John 17:3; 1 Timothy 2:3, 4.

Pi tayugang ko teliw e rayog ni ngar michegned ngodad e par ni manemus gabul nge langleth. Ma faanra de yib ko n’en ni be fil e Bible, ma dabiyog ni nge ayuwegdad ni nge yog ngodad e pi taw’ath ko Gil’ilungun Got. U nap’an fare machib ni tay u daken e burey, mi ri tay Jesus chilen ni gaar: “Gathi gubin e girdi’ ni ma piningeg ni ma lungurad, ‘Somol, Somol,’ e yad ra yan nga suwon Got u tharmiy, ya kemus ni piin ni yad ma rin’ e n’en ni baadag e chitamag nu tharmiy ni ngar rin’ed e yad ra yan ngay.”​—Matthew 7:21.

Mu guy ni rib elmerin i yog rok Jesus ni ngan rin’ e n’en nib m’agan’ e chitamangin ngay ma aram e fin rayog ni nge yog fare taw’ath ko Gil’ilungun Got. Ni aram e, n’en ni ma yib i m’ug ngan guy nib mat’aw ara ba thothup e gathi gubin ngiyal’ nib fel’ u wan’ Got. Riyul, ya ki gaar Jesus: “Ma ra yan i taw ko chirofen nem ma boor e girdi’ e ra gaar ngog, ‘Somol, Somol, u daken fithingam e ug weliyed e thin rok Got riy ngak e girdi’, ma fithingam e ug tulufed boor e moonyan’ ngay, ma fithingam e ug ngongliyed boor e maang’ang ngay?’ Ma aram e bay lungug ngorad: Ri da gu nangmed! Mu chuwgad rog, gimed e piin ni gimed ma rin’ e kireb.” (Matthew 7:22, 23) Rib tamilang, ni n’en th’abi ga’ fan e thingari mich u wan’dad ni ngada nanged fan nib fel’ rogon ko ri be mang fare thin nib fel’ ko fare Gil’ilumgun ma aram ma gadad ngongol nib puluw ngay.​—Matthew 7:24, 25.

Bay E Ayuw

Nap’an ni ke pag 100 e duw, ni ke machibnag e Pi Mich rok Jehovah fare thin nib fel’ ni murung’agen Gil’ilungu Got. Ni aram e yad be pi’ e babyor ni bay e thin riy, ma yad be non u ligin’rad, ma yad be ayuweg e girdi’ u ga’ngin yang e fayleng ni nge yog ngorad e bin riyul’ e tamilangan’ ko ri be mang fare Gil’ilungun ma mang e pi taw’ath ni ra yibnag, nge mang e thingari rin’ be’ me yog boch e pi taw’ath nem ngak.

Gamad be pi’ e athamgil nga lanin’med ni nga mu tayedan’med mi gimed rin’ e n’en ni be machibnag e Pi Mich rok Jehovah. Ni aram e ngam folgad riy ma ga ngongol nga daken ere thin nib fel’ nem, ma aram e rayog ngom e taw’ath nib ga’ ni gathi goo chiney ya ku arrogon gabul nge langleth u nap’an ni bayi gagiyegnag fare Gil’ilungun Got e fayleng ni pilo’.​—1 Timothy 4:8.

Mu rin e chiney, ya pi taw’ath ko Gil’ilungun Got e ke taw!

[Pictures on page 7]

Bochan e pi babyor ni kan yoloy nge thin u ligin’ey, ma Pi Mich rok Jehovah e kar machibnaged fare thin nib fel’ ko Gil’ilungun Got