Be Gel Iyan E Tin Riyul’ E Kristiano!
Ereray kanawoen mi i wer e thin rok Somol ni be gel i yan.”—ACTS 19:20.
1. Ngam mu weliy ko uw rogon ni ke mon’og e ulung ni Kristiano u nap’an e bin som’mon e chibog.
KAN ni thothup e i gelnag e piin Kristiano kakrom, ma kara wereged e thin rok Got u fithik’ e pasig ndabiyog ni ngan taleg rad. Reb e historian e ke yoloy ni gaar: “Ke wer e ulung ni Kristiano ni rib pay ko binaw ni ma par piyu Roma riy. Fa bin 100 e duw e sana urngin e binaw ni bay u mathil ko Mediterranean me immoy e ulung ni Kristiano riy.”
2. Uw rogon ni ke guy Satan rogon ni nge taleg fare thin nib fel’, ma uw rogon ni kan yiiynag e re n’ey?
2 Dabiyog rok Satan ni fare Moonyan’ ni nge th’ab gulungan e piin Kristiano kakrom. Ma aram, e i togopuluw ko fare thin nib fel’ u daken yugu reb e kanawo’—ni aram e apostasy. I weliy Jesus reb e fanathin ko fare wheat nge fare pan ni be dag nra buch ban’en ni aram rogon. (Matthew 13:24-30, 36-43) Maku i ginangey Peter ni apostal nra m’ug e pi tamachib ni googsur u lan e ulung, ni be fek e ulung nra kirebnagey i yib. (2 Peter 2:1-3) Taab rogon ku Paul ni apostal ya i ginangey nib tamilang nra sum e piin ni ma togopuluw ku Got ara apostate u m’on ko fare rran rok Jehovah.—2 Thessalonika 2:1-3.
3. Mang e ke buch u tomren ni ke yim’ fapi apostal?
3 Tomren ni ke yim’ fapi apostal, ma fapi machib ni ma ta’ e piin ni pagan nge boch e machib ni ma ta’ e piin nib llowan’ e ke warnag e thin nib fel’. Ba puluw ko thin ni kan yiiynag, ma piin ni tamachib ni googsur e kar tunguyed fan e thin nib riyul’ ngar weliyed ma kar uneged e thin nde riyul’ ngay. Munmun ma tin riyul’ e Kristiano e daki m’ug ni bochan e sasalap ko piin Christendom. Me yib e pi tayugang ko teliw me athamgiliy ndabni wereg e Bible u pa’ e yug girdi’. Yugu aram rogon ni ke yoor e girdi’ ni yima yog ni yad e Kristiano, ma be par e liyor rorad nde machalbog. Ke garer fare Christendom ko pi binaw ni boor me mang reb e ulung nib gel ma ke ga’ lungun u ken ngabchey, machane de fal’eg Got waathan ma de pi’ gelngin ngak.
4. Mang fan ni lem rok Satan ni nge taleg e tin nib m’agan’ Got ngay e de fel’ rogon riy?
4 Machane, fare lem rok Satan ni nge taleg Jehovah ko tin ni baadag ni nge rin’ e de yib angin. Nap’an ni ke gel e ta lumor ya kari yoor e apostasy, ma ka be par boch e girdi’ ni ka ma fol ko machib ko Kristiano nib riyul’. Piin ni ma fal’eg e Bible e kar athamgilgad ni ngar yoloyed e thin nrib puluw. Arfan, ni fare Bible e ka be par nib puluw e thin riy, nyugu aram rogon ni boch e girdi’ ni ma yog ni bay mat’awrad ni ngar machibgad e kar weliyed e thin riy nib oloboch. Kab kakrom i yib ma fapi cha’ nib llowan’ ni bod Jerome nge Tyndale e kar piliyegew e thin riy min wereg ni dar rusgow. Bokum milyon e girdi’ e ri yad ma nang fare Bible nge ba mit e ulung ni yima yog e Kristiano ngay, nyugu aram rogon nde riyul’.
5. Mang yiiy ni i tay Daniel ni profet u murung’agen e “llowan’ nib riyul’ ”?
5 Munmun, ma ke yan i puluw nrogon ko yiiy ni bay ko fare babyor rok Daniel ni, ‘bay i ga’ e llowan’ i yan.’ Ke buch e re n’ey ko “tin tomren e rran”—ni aram e tayim ni gad be par riy e chiney. (Daniel 12:4) Fare kan ni thothup e ir e be pow’iy e girdi’ u gubin yang u fayleng ni baadag e thin riyul’ ni nge yog ngorad e tamilangan’ u murung’agen Got nib riyul’ nge tin nib m’agan’ ngay. Mus nga tomren boor e chibog ni ke yan ni yibe wereg e machib ni googsur, ma thin rok Got e ke be gel yan! Chiney, ma kan wereg fare thin nib fel’ nga gubin yang, ni be pow’iy e girdi’ ko fare athap rorad nga reb e fayleng nib biech ni bay e falfalan’ riy. (Psalm 37:11) Ngada yaliyed e chiney rogon ni be mon’og e thin rok Got ko ngiyal’ ney.
Rogon ni Be Mon’og fare Thin e Chiney
6. Mang e tin nib riyul’ ni ke nang fapi Bible Students u nap’an e duw 1914?
6 Nap’an ni ke chuchugur ni nge m’ay fa bin 19 e chibog, ma thin riyul’ u Bible e ke gelnag fare ulung nib achichig ni ka nog e Bible Students ngorad, ni chiney e yibe pining e Pi Mich rok Jehovah ngorad. Duw ni 1914 me ke fas fare Bible u wan’rad. Ke tamilang u wan’rad e thin nriyul’ u murung’agen e tin nib m’agan’ Got ngay. Bochan e t’ufeg ni ke dag Jehovah ma arfan ni l’og Fak nga fayleng min bing e kanawo’ ko yafas ni manemus e ir e ke k’aring e pi cha’ nem. Maku keb e tamilangan’ ngorad mi yad tay fan fithingan Got nge fel’ngin. Maku, kar nanged ni “fare ngiyal’ ni fan ko piin ni gathi yad piyu Israel” e kemus, ni aram e pow ni ke chuchugur fare Gil’ilungun Got ni aram e am nra yibnag e flaab ni fan ko girdi’. (Luke 21:24, King James Version) Rib gel feni fel’ e re thin nib fel’ ney! Pi thin nriyul’ ney ni bay gelngin e ngan wereg ngak urngin e girdi’, u gubin yang. Yafas ko girdi’—e ke yoyowol!
7. Uw rogon ni thin riyul’ u Bible e ke gel i yan ko ngiyal’ ney?
7 I fal’eg Jehovah waathan e piin Kristiano ni kan dugliyrad ni yad buchuw. Ngiyal’ ney, ma girdi’ ni kar uned ko ulung ni Kristiano ni riyul’ e ke pag nel i milyon urngin. Maku ke yoor e binaw ni thin rok Got e kan wereg ngay, ya bochan e Pi Mich rok Jehovah ni bay ko fa 235 e nam. Maku, thin riyul’ u Bible e ke pi’ gelngin, me gel ko urngin e magawon, ndemtrug ko aram e magawon ni yib u yugu boch e teliw ara dangay. Fare maruwel ni ngan wereg e machib nga gubin yang u fayleng e kari micheg ni ba’ Jesus u Gil’ilungun ni ba gel gelngin.—Matthew 24:3, 14.
8. Mang e ke yog boch e girdi’ u murung’agen rogon ni be mon’og e Pi Mich rok Jehovah?
8 Taab rogon ko fapi cha’ ni ta yol ni kar weliyed ni kari yoor e piin Kristiano ko fa bin som’mon e chibog, ma boor e piin ni scholar e ka rogned murung’agen e mon’og ni be ta’ e girdi’ rok Jehovah ko ngiyal’ ney. U United States, ma immoy l’agruw e scholar ni kara yoloyew u taabang ni gaar: “U lan 75 e duw ni ke yan ma kari yoor e Pi Mich rok Jehovah . . . ma aram e n’en ni be buch u ga’ngin yang u fayleng.” Reb e babyor u East Africa e be weliy murung’agen e Pi Mich ni “reb e teliw u fayleng ni be yoor i yan nrib pay ma ri yibe tay fan ma ri manang e girdi’ nu fayleng ni yad ma fol ko machib ni kan fek u Bible.” Ma reb e babyor ni Catholic, ni kan fal’eg u Europe, e be weliy murung’agen e “Pi Mich rok Jehovah ni kari yoor e girdi’ ni ma un ngay.” Mang e n’en ni ke ayuweg me yoor e girdi’?
Be Maruwel fare Kan ni Thothup e Ngiyal’ Ney
9. (a) Mang tapgin ni bin som’mon ni thin rok Got e be gel i yan e chiney? (b) Mang e ma rin’ Jehovah nra chuchugur e girdi’ ngak?
9 Bin som’mon i tapgin ni thin rok Got e be gel i yan e ngiyal’ n’ey ya bochan gelngin rok Jehovah e be maruwel nib elmerin, ntaabrogon ko fa bin som’mon e chibog. I yog Jesus ni gaar: “Dariy be’ nrayog ni nge yib ngog ni faanra gathi en ni Chitamangiy e pow’iy nge yib ngog, ni ir e ke l’ugeg ku gub.” (John 6:44) Pi thin n’ey e be dag ni be ayuweg Got e girdi’ nib fel’ e thin riyul’ u wan’rad u fithik’ e gol, ma baadag gum’ircha’rad. U daken e maruwel ni ma ta’ e Pi Mich ni ngan wereg e machib, ma be girngiy Jehovah e girdi’ riy ni ngar pigpiggad ngak ni yad e “tin nib fel’ ni ra bad ko pi pi nam”—nib sobut’ lanin’rad, ni yad bod e saf u fayleng.—Haggai 2:6, 7, New World Translation.
10. Mit i mang e girdi’ e kara adaged e thin rok God?
10 Fare kan ni thothup rok Got e gathi kemus ni ke gelnag e girdi’ rok ni ngar wereged e thin rok ko pi nam u fayleng nth’abi palog; ya ir e ke k’aring e girdi’ ni yad ba thil thil ni ngar adaged e thin nib fel’. Riyul’ ni, piin ni yad be fol ko thin rok Got e kar bad u “urngin e ganong, nge thin, nge gubin mit e girdi, nge nam.” (Revelation 5:9; 7:9, 10) Rayog ni ngan guyrad u fithik’ e piin nib fel’ rogon nge piin nib gafgow, nge piin nib tolang e skul rorad nge piin ndar uned ko skul. Boch i yad e kara adaged fare thin u nap’an e mahl nge nap’an ni bay e togopuluw ni rib gel, ma boch i yad e kara uned ngay u nap’an be aw e gapas ngorad nge ngiyal’ ni yad ba flaab. U tan urngin mit e am, nge urngin mit e yalen, nge piin ni bay u concentration camps nge piin ni bay u palace, ma piin ni pumoon nge piin ppin e kara adaged e thin nib fel’.
11. Uw rogon ni be maruwel fare kan ni thothup ko yafas ko pi girdi’ rok, ma mang e n’en nib thil nrayog ni ngan guy riy?
11 Yugu aram rogon ni girdien Got e ba thil thil rarogorad, ma yad be par ni ba taareban’rad. (Psalm 133:1-3) Ereray reb e mich riy ni ka be maruwel fare kan ni thothup u daken e piin ni yad be pigpig ku Got. Kan rok e ba’ gelngin nib gel ni nge ayuweg me fel’ boch ban’en ma ma ayuweg e pi tapigpig rok ni ngar daged t’ufeg, nge falfalan’, nge gapas laniyan’, nge gum’an’, nge gol, nge yugu boch e felngin nrib fel’. (Galatia 5:22, 23) Chiney, rayog ni ngada guyed e n’en ni i yiiynag Malaki ni profet nth’abi kakrom ni gaar: “Girdi’ rog e bay kur . . . guyed e n’en nib thil u thilin e piin ni yad mmat’aw nge piin ni yad be ngongliy e kireb, ngu thilin e en ni be pigpig ngog nge en nder pigpig ngog.”—Malaki 3:18.
Thin ku Got e Be Gel i Yan u Daken e Pi Tamaruwel nib Pasig
12. Uw rogon e maruwel ni ngan wereg e machib u wan’ e Pi Mich rok Jehovah, ma mang e yad be lemnag nra rin’ e girdi’ u nap’an ni yad be un ko maruwel ni ngan wereg e machib?
12 Pi Mich rok Jehovah e gathi kemus ni yad ma un ko muulung rorad. Ya yad ma un ko maruwel ni ngan wereg e machib u fithik’ e pasig. Taareb rogorad ko fapi Kristiano kakrom, kara pied yad ni ke m’agan’rad ngay ni ngar rin’ed e tin nib m’agan’ Got ngay, ma yad be athamgil ni ngar ayuweged yugu boch e girdi’ ni ngara nanged e tin ni ke micheg Jehovah u tan Gil’ilungun. Yad be maruwel Got u taabang, nrogon nib puluw ko kan ni thothup rok, e yad be ulunguy yugu boch e girdi’ ni ngar pigpiggad ku Jehovah. Bochan e n’en ni yad be rin’, e yad be dag e runguy nge t’ufeg rok Jehovah ngak e piin ni dawori michan’rad. Ma yad ma rin’ e re n’ey nyugu aram rogon ni bay boch e girdi’ ni dariy fan e machib u wan’rad, nge girdi’ ni ma moningnagrad, nge girdi’ ni ma togopuluw. I yog Jesus ban’en ngak pi gachalpen ni ngar nanged nib thil thil e lem ko girdi’ u murung’agen e tin nib fel’. I yog ni gaar: “Dariy reb e sib ni baga’ ngak e masta rok. Faanra kar gafgownaged gag, ma bay kur gafgowniged gimed; ma faanra kar folgad ko thin rog, ma bay kur folgad ko thin romed.”—John 15:20.
13. Mang e n’en ni dariy ko piin ni yima yog e Kristiano ngorad ni aram e n’en ni boor ko Pi Mich rok Jehovah?
13 Ri gad ba falfalan’ ya bochan ba taareb rogon e Pi Mich rok Jehovah e chiney nge tin riyul’ e Kristiano ko fa bin som’mon e chibog. Maku kan guy ni de taab rogon e Pi Mich rok Jehovah ko piin ni yima yog e Kristiano ngorad e chiney. Tomren ni ke yoloy reb e scholar murung’agen e piin Kristiano kakrom ni yad ma machib u fithik’ e pasig, me yog u fithik’ e kireban’ ni gaar: “Faanra dabi thiliyeg fare motochiyel u galesiya e chiney nra ayuweg e girdi’ ni nge guy ni fare maruwel ni ngan wereg e machib e ba mil fan ngak urngin e Kristiano ni kan taufenagrad, ma ngan dag e yafas ni kab fel’ ko piin ni de michan’rad, ri dabiyog ni ngada mon’oggad i yan.” Boch ban’en ndariy ko piin ni yima yog e Kristiano ngorad ma aram e n’en ni ba’ ko Pi Mich rok Jehovah ni boor! Bay e michan’ rorad ni ba fas, ni aram e michan’ nib riyul’, ma aram e michan’ nib puluw ko thin riyul’ u Bible ni be k’aringrad ni ngara wereged e re n’ey ngak urngin e girdi’ ni yad ra motoyil.—1 Timothy 2:3, 4.
14. Uw rogon e pigpig ni i tay Jesus u wan’, ma mang ngongol e be dag e pi gachalpen e ngiyal’ ney?
14 I un Jesus ko machib u fithik’ e yul’yul’, ni aram e n’en nib m’on ko yafas rok. Me yog ngak Pilate ni gaar: “Ni gargelnageg ngaray nga fayleng ni bochan e nggu weliy murung’agen e tin riyul’.” (John 18:37) Girdien Got e yad ma thamiy ban’en ni bod rogon Jesus. Bochan ni kan suguy gum’ercha’rad ko thin riyul’ u Bible, ma aram e yad be athamgil ni ngar pirieged e kanawo’ ni ngar wereged ngak e girdi’ ni yoor nrogon ni rayog rorad. Boch e kanawo’ ni yad ma rin’ riy e be micheg ni yad ba cheg i wereg e machib.
15. Uw rogon ni be dag boch e girdi’ e salap rorad u nap’an ni yad be wereg e thin nib fel’?
15 Pi Mich u reb e nam u South America, e yad ma th’ab e lul’ ni yan nga Amazon River ni fan ni ngara wereged e thin riyul’ ngak e girdi’ u rom. Machane, faani tababnag e mahl u rom ko duw ni 1995, ma piin ni gathi yad e salthaw e dabkiyog ni nga ranod u rom. Bochan ni ri yad baadag ni ngara wereged e pi babyor ni yib u Bible ngak e girdi’ ni baadag e machib, me duguliy e Pi Mich ni nga nin’ nga lan e lul’ fare thin nge pes iyan. Kar yoloyed boch e babyor min ta’ nga lan e melor ni plastic ni ba muun ngay boch e babyor ni The Watchtower nge Awake! Ngemu’ ma ron’ed e pi melor nem nga lan fare lul’. Kar ululgad i rin’ e n’en ni aram rogon u lan aningeg nge baley e duw ke mada’ ko ngiyal’ ni ke mab e kanawo’ ko piin ni gathi yad e salthaw e ku rayog ni nga ranod ko re gin nem biyay. Piin ni ma par u tooben fare lul’, e kara pininged e magar ngak e Pi Mich nbochan e pi babyor nem. Reb e ppin ni ma un ko fol Bible faram e ke gumuchmuch ngorad ni be yib e lu’ u owchen me yog ni gaar: “Kug lemnag ni dabkiyog ni nggu guymed biyay. Machane, faani tabab ni nge yib ngog e babyor ni kan ta’ nga lan e melor, ma aram kug nang ndawor mu paged talineg!” Yugu boch e girdi’ ni yad ma par u tooben fare lul’ e ka rogned ni kara bieged fapi magazines ni pire’ yay. Boor e binaw ni bay boch e “post office” riy—ni aram fare ran ni be chel chel ni ma kunuy boch ban’en riy ni be pes nib ngoch nap’an. Ma aram e gin ni ri ma yan e piin ni baadag e machib ngay nga ur yaliyed ko bay e “babyor” riy ni ma yib u p’ebgul e lul’.
16. Ra ngada ted gadad ko re maruwel ney ma uw rogon ni ra mab e kanawo’ yu ngiyal’ ni ngan ayuweg be’ ni nge mang gachalpen?
16 Jehovah Got nge pi engel rok e yad ma pow’iy ma yad ma ayuweg fare maruwel ni ngan wereg fare thin nib fel’. (Revelation 14:6) Ra ngada ted gadad ko re maruwel n’ey, ma ra mab e kanawo’ ndan lemnag nge yog ni ngan ayuweg be’ ni nge mang gachalpen. U Nairobi, Kenya, bay l’agruw e ppin ni Kristiano ni kar unew ko machib u mit e tabinaw i yan ma kara mu’gow i machibnag urngin e naun ni kan ta’ ni yow ra yan ngay. Reb e rugod e ke yib ngorow nib tomgin me yog ni gaar: “Gu ma meybil ni nggu madeg be’ ni bod gimew.” Me wenig ngak e gali Mich nem ni ngar bow nga naun rok ni ngar weliyed boch ban’en, ma kar tababnaged e fol Bible ko re rran nem. Mang fan ni ke yib fare ppin ngak e gali Kristiano nem nib pay? Ya sogonapan l’agruw e wik ni ke yan ni ke yim’ e bitir rok. Ere nap’an ni ke guy reb e pagal ni be fek fare tract ni “Mang Athap Rodad ni Fan ko Piin Ni Kar M’ad ni Yad Ba t’uf Rodad?” e ri baadag ni nge yog ngak e re n’em me ning ngak fare pagal ni nge pi’ ngak. De pi’ ngak, machane ke weliy murung’agen e Pi Mich ni kar pied ngak fare tract. Ma munmun me mon’og fare ppin ko tirok Got ma ke yog rok ni nge k’adan’ ko kireban’ nbochan ke yim’ e bitir rok.
Thingari Gel e T’ufeg rok Got
17-19. Mang t’ufeg ni dag Jehovah ngak e girdi’ u daken fare biyul?
17 Rogon ni be mon’og i yan e thin rok Got u fayleng ni polo’ e ri ba l’ag ko fare biyul ni i pi’ Jesus Kristus. Fare maruwel ni ngan wereg e machib e taab rogon ko fare biyul ni be micheg nib t’uf e girdi’ rok Jehovah ni yug demtrug e gin’en ni ma par riy. Kan thagthagnag ngak John ni nge yoloy ni gaar: “Yi Got e rib t’uf e [girdi’] nu fayleng rok, ma aram me pi’ Fak ni kari maagirag rok nge yib ni fan e nge urngin e piin ni michan’rad ngak e aram e dab kur m’ad, ya ke yog e yafas ni manemus ngorad.”—John 3:16.
18 Mu lemnag e t’ufeg ni i dag Jehovah u nap’an ni kan pi’ fare biyul. Kakrom ni kakrom, e kari falfalan’ Got ya i par fak ni kari maagirag rok ni ba chuchugur ngak, ni ir “e tabolngin urngin ban’en ni sunumeg Got.” (Revelation 3:14) Rib t’uf e Chitamangin Jesus rok, ma kub t’uf Fak Jehovah rok u m’on ni “dawori sunumeg e fayleng.” (John 14:31; 17:24) I pag Jehovah Fak ni rib t’uf rok ni nge yim’ ma aram e rayog ni nge yog ngak e girdi’ e yafas ndariy n’umngin nap’an. Rib fel’ rogon ni kan dag e t’ufeg ngak e girdi’.
19 John 3:17 e be gaar: “Yi Got e de pi’ Fak nge yib ngaray nga fayleng ni nge turguy e gechig ko girdi’, machane ir e nge thapeg e girdi’ ngak Got.” Ere, i l’og Jehovah Fak me ke pi’ reb e maruwel ngak ni nge ayuweg e girdi’ u fithik e t’ufeg ni ngar thapgad ngak Got, ma de yib ni nge pufthinnagrad. Ma ba puluw e re n’ey ko thin rok Peter ni gaar: “Dabun [Jehovah] ni nge n’ag be’, ya baadag ni nge urngin e girdi’ mi yad pi’ keru’rad ko urngin e denen ni yad be rin’.”—2 Peter 3:9, NW.
20. Mang kanawo’ ni ngan thap ngak Got e ba peth ko fare maruwel ni ngan machibnag fare thin nib fel’?
20 Bochan ni ke pi’ Jehovah fare def ni nge thap e girdi’ ngak Got riy nib puluw ko motochiyel mab tolang puluwon, ma aram e baadag ni boor e girdi’ ni ngara uned ngay. I yoloy Paul ni apostal ni gaar: “ ‘En nra pining fithingan Jehovah e ra thap ngak.’ Machane, ra diin mi yad non ngak ni faanra dawori michan’rad ngak? Ma ra diin me michan’rad ni faanra dawor rrung’aged e thin rok? Ma ra diin mi yad rung’ag e thin rok ni faanra dab nol’og e piin ni ngar machibnaged e thin rok nga ranod ngar machibgad?”—Roma 10:13, 14.
21. Susun uw rogon u wan’dad nra mab e kanawo’ ni nrayog ni ngada uned ko fare maruwel ni ngan wereg e machib?
21 Ngani un ko maruwel ni ngan wereg e machib ma ngan fil ban’en ngak be’ e yibe rin’ u fayleng ni polo’ e ri bay fan! Ereray e maruwel ni de mom, machane feni falfalan’ Jehovah faani guy e girdi’ rok ni be fol ko thin riyul’ u fithik’ e yul’yul’ ma be wereg fare thin nib fel’ ngak yugu boch e girdi’! Ere demtrug ko uw ra rogomed, mu pag ni kan rok Got nge fare t’ufeg ni bay u gum’ercha’em e nge k’aringem ni ngam un ko re maruwel n’ey. Ma dab mu pagtalin ni pi n’en ni gad be guy ni yibe rin’ u fayleng e aram mich riy nib gel nra lebuguy Jehovah Got e tin ni i micheg nra yib e “bin nib biech e lan e lang nge bin nib biech e fayleng” ni aram e “tin nib mat’aw e ngongol e bay i par riy.”—2 Peter 3:13.
Ka Ga Manang?
• Mang fan ni fare apostasy e dabiyog ni nge th’ab gulungan e pi tamachib ko fare thin nib fel’?
• Uw rogon ni ke gel i yan e thin rok Got ko ngiyal’ ney?
• Mang boch e kanawo’ ni be maruwel e kan thothup rok Got riy ko ngiyal’ ney?
• Uw rogon ni fare biyul e ba peth ko maruwel ni ngan wereg fare thin nib fel’?
[Graph/Picture on page 26]
(For fully formatted text, see publication)
Rogon ni ke yoor e pi tamachib ko Gil’ilungun ko fa bin 20 e chibog
Average ko Piin Tamachib (kan theeg ko milyon)
6.0
5.5
5.0
4.5
4.0
3.5
3.0
2.5
2.0
1.5
1.0
0.5
1900 1910 1920 1930 1940 1950 1960 1970 1980 1990 2000
[Pictures on page 25]
JEROME
TYNDALE
GUTENBERG
HUS
[Credit Line]
Gutenberg nge Hus: Bay ko fare babyor ni The Story of Liberty, 1878
[Picture on page 25]
Piin ni Bible Students ni yad be machibnag fare thin nib fel ko pi duw 1920
[Pictures on page 26, 27]
Ma fol e girdi’ ko fare thin nib fel’ u fayleng ni polo’
[Picture on page 28]
Fare maruwel ni ngan wereg e machib e ba taab rogon ko fare maligach ni pi’ Jesus Kristus ni be ga’nag e t’ufeg rok Got