“Thin Rok Jehovah E Be Ilal I Yan”

“Be l’og e thin rok nga fayleng; be yan e thin rok nib machreg.”​—PSALM 147:15, New World Translation.

1, 2. Mang maruwel e i pi’ Jesus ngak pi gachalpen, ma mang e ba l’ag ngay?

REB e yiiy u lan e Bible ni kan gin ngay e bay ko Acts 1:8. Dawori n’uw nap’an u m’on ni ke yan Jesus nga tharmiy, me yog ngak pi gachalpen nib yul’yul’ ni gaar: “Machane bay yib gelngimed ko ngiyal’ ni bay yib fare Kan ni Thothup riy nga dakenmed, ma aram mi gimed weliy murung’ageg . . . nge yan i mada’ ko yungi n’en ni yan i mus e fayleng ngay.” Ereray e maruwel ni rib ga’!

² Gowa mo’maw’ fare maruwel ni kan pi’ ngak pi gachalpen ni yad buchuw ni ngara wereged e Thin rok Got nga gubin yang u fayleng. Amu lemnag e tin nib l’ag ngay. Thingara ayuweged e girdi’ ni nge tamilang u wan’rad fare thin nib fel’ u murung’agen Gil’ilungun Got. (Matthew 24:14) Ra ngan weliy murung’agen Jesus ma ku ba t’uf ni ngan wereg e thin ni i fil ngak yugu boch e girdi’ maku yira weliy murung’agen e maruwel rok nrogon e tin nib m’agan’ Jehovah ngay. Maku, ba muun ngay fare maruwel ni ngan pingeg e girdi’ ni ngar manged pi gachalpen ma ngan taufenagrad. Ma ngan rin’ e re maruwel n’em u fayleng ni polo’!​—Matthew 28:19, 20.

3. Mang e n’en ni ke micheg Jesus ngak pi gachalpen, ma uw rogon fare maruwel ni ke pi’ ngorad u wan’rad?

³ Machane, i micheg Jesus ngak pi gachalpen nra un fare kan ni thothup ngorad ko re maruwel ney ni ke pi’ ngorad. Arfan, ni yugu aram rogon ni kaygi gel fare maruwel ma piin ni ta togopuluw e ri yad ma athamgil ni ngar taleged, ma pi gachalpen Jesus e kar rin’ed e tin ni ke yog ngorad ke yib angin. Aram e thin ni kan yoloy ni ba riyul’ ni dabni dariyfannag.

4. Uw rogon ni kan dag e t’ufeg rok Got ko maruwel ni ngani machibnag e thin rok min fil ban’en ngak yugu boch e girdi’?

⁴ Fare maruwel ni ngan machib ma ngan fil e thin nib fel’ ngak e girdi’ ni baadag e machib e be dag e runguy rok Got ngak’ e piin ni dawora nanged murung’agen. Re n’ey e be pi’ ngorad e kanawo’ ni ngar chuchugurgad ngak Jehovah ma yira n’agfan e denen rorad. (Acts 26:18) Fare maruwel ni ngan machib ma ngan fil ban’en ngak e girdi’ e ku be dag ni ba t’uf e piin ni be fek fare machib iyan ngak e girdi’, ya bochan ni re maruwel ney e be ayuwegrad ni ngar daged ni yad ba yul’yul’ ko pigpig rorad ngak Jehovah ma rayog ni ngar daged ni ba t’uf yugu boch e girdi’ rorad. (Matthew 22:37-39) Pigpig ni ma ta’ e Kristiano e ri baga’ fan u wan’ Paul ni apostal ma arfan ni ke taareb rogonnag nga fel’ngin e “machaf.”​—2 Korinth 4:7.

5. (a) U uw e rayog ni ngada pirieged riy chepin e tin ni riyul’ u murung’agen e Kristiano kakrom, ma mang e mon’og ni be weliy u roy? (b) Mang fan ni baga’ fan fare babyor ni Acts ko pi tapigpig rok Got e ngiyal’ ney?

⁵ Chepin e tin som’mon e Kristiano nge machib ni ur ted e yira pirieg ni bay ko Acts ni aram e babyor ni kan thagthagnag, ni Luke e i yoloy ni ir reb e gachalpen. Re n’ey e be weliy feni pay ni ke yoor e girdi’ ni yibe ngat ngay. Bochan ni ke gel e tamilangan’ ko thin rok Got ma ra yib ngan’dad e thin ni bay ko Psalm 147:15, ni be gaar: “Be l’og [Jehovah] e thin rok nga fayleng; ma papay ni be wer e thin rok.” Thin ni be weliy murung’agen e piin Kristiano kakrom, ni kan ni thothup e ke gelnagrad, e ma k’aring e falfalan’ ma ri bay fan ngodad e chiney. Ma un e Pi Mich rok Jehovah ko re maruwel n’ey ni ngan machib ma ngan pingeg e girdi’ ni ngar manged pi gachalpen, ma ka baga’ e re n’ey ko maruwel ni kan ta’ kakrom. Maku ma yib ngodad e magawon ntaab rogon ko magawon ni ke yib ngak e pi Kristiano ko fa bin som’mon e chibog. Nap’an ni gad ra weliy rogon ni ke fal’eg Jehovah waathan e pi Kristiano kakrom me gelnagrad, ma ra gel e michan’ rodad ya kada nanged nra ayuwegdad.

Ke Yoor e Pi Gachalpen

6. Mang fare bugithin nib m’ag ko mon’og ni kan ta’ nga babyor ni Acts, ma re n’ey e ba sor fan ko mang?

⁶ Reb e kanawo’ ni ngani yaliy rogon ni ke lebug e thin ni bay ko Acts 1:8 e aram ngani weliy fare bugithin ni “mi i wer e thin rok Got i yan,” aram boch e thin ni kan yoloy, ni bay ban’en riy nib thil nib achichig, ma kemus ni dalip yay u lan e Bible ma pi nem ni urngin e go’ bay ko fare babyor ni Acts. (Acts 6:7; 12:24; 19:20) “Fare thin rok Jehovah,” ara “fare thin rok Got,” ni bay ko pi verse ney e be yip fan e thin nib fel’​—ni aram e thin riyul’ ni yib rok Got nra pug e tafinay ko girdi’, ma ba fas, nge thin ni bay gelngin nra thiliyeg e yafas ko piin ni ke adag me fol ko re machib ney.​—Hebrews 4:12.

7. Uw rogon ni ke wer e thin rok Got nrogon ni yog ko Acts 6:7, ma mang e ke buch ko fare rran ni Pentekost 33 C.E.?

⁷ Bin som’mon e thin ni be weliy u rogon ni i wer e thin rok Got i yan e bay ko Acts 6:7. U rom ma rayog ni ngada bieged ni gaar: “Ma aram mi i wer e thin rok Got i yan. Ma be yoor pi gachalpen Jesus i yan, ma boor e prist ni pig lanin’dad nge mich Jesus u wun’rad.” U roy, e be weliy ni keb angin ngorad ya bochan e ke yoor i yan e pi gachalpen. U m’on riy, u nap’an fare rran ni Pentekost 33 C.E., ma kan puog fare kan ni thothup rok Got nga daken sogonapan 120 e gachalpen ni yad be muulung ko reb e singgil u thal nlang. Ere Peter ni apostal e i pi’ e welthin nra pug e tafinay rok e girdi’, ma piin ni rung’ag, e sogonapan 3,000 riy e ke michan’rad ko re rran nem. Sana ke wagagay e girdi’ ko ngiyal’ nem ya bokum biyu’ e girdi’ e ka ranod nga lipath ara fapi lipath u lan Jerusalem ara u tooben ni ngan taufenagrad u fithingan Jesus, fa en ni kan richibiy ni bod e girdi’ nib kireb ni sogonapan 50 e rran ni ke yan!​—Acts 2:41.

8. Uw rogon ni ke yoor e pi gachalpen ko duw ni 33 C.E. u tomren ni ke m’ay fare Pentekost?

⁸ Riyul’, ni kemus ni aram e tabolngin. De yog rok e pi tayugang ko teliw ni yad piyu Jew ni ngar talegned e maruwel ni ngan wereg e machib. Ma ke kireban’ e pi tayugang nem ya, “i ulul Jehovah ngay ni be puthuy ko [pi gachalpen] u gubin e rran e piin ni yibe ayuwegrad.” (Acts 2:47) De n’uw nap’an nga m’on, “me yan e pi girdi’ nem nge yan i mada’ ko lal i biyu’.” Ma tomur riy, “i yoor e girdi’ ni i mun ko re ulung nem- ni yu ulung i pumoon nge ppin ni piin ni ke mich Somol u wun’rad.” (Acts 4:4; 5:14) Tomur riy, ma ngada bieged e thin u murung’agen ni gaar: “Ma aram mfini pirieg girdien e galesiya e gapas u lan yu Judea ni ga’ngin ngu Galile ngu Samaria. Me ayuweg fare Kan ni Thothup girdien fare galesiya nge yib gelngirad ma yad be yoor i yan mu ur pired ni yad be rin’ e tin nib m’agan’ Somol ngay ma yad be ta’ fan.” (Acts 9:31) Me yan boch e duw nga tomren, ni sana duw ni 58 C.E., ma kan weliy murung’agen “boor e girdi’ ni ke michan’rad.” (Acts 21:20) Ngiyal’ nem, ma immoy boor e girdi’ ni gathi yad piyu Israel ni ke michan’rad.

9. Uw rogon ni ngam weliy murung’agen e Kristiano kakrom?

⁹ I yoor e pi gachalpen ma baga’ nbochan e girdi’ nib biech ni ke un ngorad. Kab biech e binem e teliw​—machane ri yad ba pasig. Pi gachalpen e gathi girdien e galesiya nib malmal, ya yad ba yul’yul’ ku Jehovah nge Thin rok, yu ngiyal’ e kara filed e thin riyul’ ko piin ni kan togopuluw ngorad nib gel. (Acts 16:23, 26-33) Piin ni kara uned ko ulung ni Kristiano e kar dugliyed ni aram rogon nbochan e n’en ni ke tamilang u wan’rad, nge bochan e n’en ni ke yog lanin’rad ngorad. (Roma 12:1) Kan skulnagrad ko tirok Got e kanawo’; ke taw ko lem rorad nge gum’ercha’rad e thin riyul’. (Hebrews 8:10, 11) Ke m’agan’rad ngay ni ngar m’ad ni fan ko tin ni ke mich u wan’rad.​—Acts 7:51-60.

10. Mang maruwel e ke mil fan ko piin Kristiano kakrom, ma mang e kad pirieged e ngiyal’ ney ni taareb rogon ngay?

¹⁰ Piin ni kar folgad ko machib ni ma wereg e piin Kristiano e kar nanged ni ba mil fan ngorad ni ngar weliyed e thin riyul’ ngak yugu boch e girdi’. Ma ke ayuwegrad e re n’ey ni yad be yoor i yan. Me yog reb e Bible scholar ni gaar: “Dan lemnag ni kemus ni piin ni kaygi pasig ara piin ni ke dugliyrad e galesiya ni ngar machibgad e ra weliy e michan’ rorad ngak e girdi’. Ngan wereg e machib e ir e maruwel ni thingari rin’ urngin e girdi’ u Galesiya. . . . Ngan yan ngan gu’ e girdi’ nga binaw rorad e ke gelnagey ko n’en ni yima rin’ ni ka nap’an e tabolngin.” Me ulul ngay ni gaar: “Ngan wereg e machib e ir e ma pi’ gelngin e Kristiano kakrom.” Ku aram rogon e tin riyul’ e Kristiano ko ngiyal’ ney.

Ke Yoor Binawen e Machib

11. Mang e mit i mon’og ni yibe weliy ko Acts 12:24, ma uw rogon ni ke buch e re n’ey?

¹¹ Bin l’agruw e thin ni be weliy u rogon ni ke wer i yan e Thin rok Got e bay ko Acts 12:24 ni gaar: “Ma aram mi i wer e thin rok Got i yan.” Uroy ma fapi thin ni kan ta’ e ba sor fan ko binaw ni ke yoor. Yugu aram rogon ni ma togopuluw e am ko re maruwel nem, machane ka be wer iyan. Som’mon e kan puog fare kan ni thothup nga Jerusalem, ma ka ngiyal’ nem min wereg fare thin nib papey. Bochan e togopuluw ni keb nga Jerusalem ma aram me wer i yan e pi gachalpen nga Judea nge nga Samaria. Ma angin ni yib riy? “Ma fapi cha’ nni weregrad e ranod nga gubin yang ni yad be machibnag ngak e girdi’ e thin nib fel’ ko fare thin.” (Acts 8:1, 4) Ka nog ngak Philip ni nge machibnag ngak reb e pumoon, ma tomren ni kan taufenag, me fek fare machib iyan nga Ethiopia. (Acts 8:26-28, 38, 39) Min wereg e machib nib papey u Lydda, ngu Tagpas nu Sharon, nge Joppa. (Acts 9:35, 42) Tomur riy, me un Paul ko milekag me yan ko pi binaw ni bokum biyu’ e mile palgin u maday ngo arow’, ni be tababnag e pi ulung ko pi nam ni boor ni bay u Mediterranean. Mi yan Peter ni apostal nga Babylon. (1 Peter 5:13) U lan 30 e duw u tomren ni kan puog fare kan ni thothup u nap’an e Pentekost, me yoloy Paul murung’agen fare thin nib fel’ ni “kan machibnag ngak urngin e girdi’ u fayleng,” ni sana be weliy murung’agen e pi binaw ni kan nang ni aram e fayleng ko ngiyal’ nem.​—Kolose 1:23.

12. Mang e ke yog e piin tatogopuluw ko ulung ni Kristiano ni be dag ni ke yoor e binaw ni kan wereg e thin rok Got riy?

¹² Mus ko piin ni tatogopuluw ko ulung ni Kristiano e ka rogned ni thin rok Got e kan wereg ko fapi binaw ni bang ko am nu Roma. Ni bod ni, thin ni ko Acts 17:6 e be weliy ni piin ni tatogopuluw u Thessalonika, nge northern Greece, e kar tolulgad ni gaar: “Pi girdi’ ney e kar k’aringed e wagey u gubin yang! Ma chiney e kar bad ko binaw rodad.” Maku, nap’an ni kefin ni tabab fa bin l’agruw e chibog, me yoloy Pliny the Younger ngak Trajan ni Pilung nu Roma u Bithynia murung’agen e ulung ni Kristiano. I gun’gun’ ni gaar: “Gathi kemus ni lan e pi mach e rayog ni ngan [guy] riy, ya ke wer e adaw riy ko pi binaw nge pi nam nib chuchugur.”

13. Bochan ni ke yoor e binaw ni kan wereg e machib riy ma uw rogon ni e be dag nib t’uf e girdi’ rok Got?

¹³ Bochan ni kan wereg e machib nga boor e binaw ma aram e kan dag e t’ufeg rok Jehovah nib gel ngak e girdi’ ni bay rogon ni ngan biyuliyrad. Nap’an ni ke guy Peter fare kan ni thothup ni be maruwel u daken Kornelius ni gathi ir be’ nu Israel, me yog ni gaar: “Ka fin gu nang e chiney nriyul’ ni gubin e girdi’ ma taareb rogorad u wan’ Got. En ni ba’ madgun Got u wan’ ma be rin’ e tin nib mat’aw e ra i par nib fel’ u wan’ Got ndemtrug ko be’ u kun nam.” (Acts 10:34, 35) Arrogon, fare thin nib fel’ e ir e thin ni fan ko urngin e girdi’ kakrom nge chiney, ma bochan ni ke yoor e binaw ni kan wereg e thin rok ngay ma aram kan bing e kanawo’ ngak e girdi’ ndemtrug e binaw ni ma par riy ni nge dag ko ffel’ e t’ufeg ni dag Got u wan’ fa danga’. Chiney ni gad bay ko fa bin 21 e chibog, ma riyul’ ni kari wer e thin rok Got nga gubin yang u fayleng.

Ke Wer ni Be Gel Iyan

14. Miti mang e mon’og ni yibe weliy ko Acts 19:20, ma mang e ke gel e thin rok Got ngay?

¹⁴ Bin dalip e thin ni be weliy u rogon ni kan wereg e thin rok Got e bay ko Acts 19:20 ni gaar: “Ereray kanawoen mi i wer e thin rok Somol ni be gel i yan.” Fare thin ni Greek ni kan piliyeg ni “be gel iyan” e be yip fan e “kan ta’ gelngin.” Ma pi verse u m’on riy e be weliy ni boor e girdi’ nu Efesus ni ke michan’rad, ma boor ko piin ma pig e kara urfiyed e pi babyor rorad u fithik’ e yoor. Arfan, ni ke gel iyan e thin rok Got ko machib ni googsur ni ma ta’ yugu boch e teliw. Maku ke gel e thin nib fel’ ko yugu boch e magawon, ni bod e togopuluw ni yima ta’. Dariy ban’en nrayog ni nge taleg e re n’em. Ere biyay e rayog ni ngada guyed ban’en ntaab rogon ko ulung ni Kristiano ni riyul’ ko ngiyal’ ney.

15. (a) Mang e ke yoloy be’ u chepin e Bible ni murung’agen fapi Kristiano kakrom? (b) I pining fapi gachalpen e sorok ngak mini’ nbochan ni ke fel’ rogorad?

¹⁵ Fapi apostal nge yugu boch e Kristiano kakrom e kara wereged e thin rok Got ni yad ba pasig. Reb e Bible historian e ke yog u murung’agrad ni gaar: “Faanra baadag e girdi’ ni ngar weliyed murung’agen e Somol rorad, ma yad ma rin’ e re n’ey u boor e kanawo’ ndabi yoyowol. Riyul’, ni feni gel e pasig ni be dag e pi pumoon nge pi ppin nem e ke magay u lanin’dad nga rogon e n’en ni yad ma rin’.” Machane, piin ni Kristiano kakrom e yad manang ni ra nge yib angin ngorad e machib ni yad be wereg ma gathi kemus ni ma tor nga daken e maruwel ni kar rin’ed. Ya Got e ke pi’ e maruwel ngorad ni ngara rin’ed, ma Got e ra ayuwegrad ni ngara lebguyed e re n’em. Mon’og ko tirok Got e ma yib rok Got. Paul ni apostal e ke nang ni riyul’ u nap’an ni ke yoloy e babyor ni fan ko fare ulung nu Korinth. I yol ni gaar: “I gag e gu yung e awoch me tugul, mi Apollos e i puog e ran ngay, machane Got e be pi’ gelngin be ga’. Ya gamow nga bayang ni gamow be maruwel rok Got u taabang.”​—1 Korinth 3:6, 9.

Be Maruwel fare Kan ni Thothup

16. Mang e be dag ni fare kan ni thothup e ir e ke gelnag fapi gachalpen ni ngar machibgad ndar rusgad?

¹⁶ Dab mu pagtalin ni i micheg Jesus ngak pi gachalpen ni ra ayuweg fare kan ni thothup ni nge wer e thin rok Got ma kan ni thothup e ra gelnag e pi gachalpen ko maruwel rorad i wereg e machib. (Acts 1:8) Uw rogon ni i buch e re n’em? De n’uw nap’an u tomren ni kan puog fare gelngin nga daken fapi gachalpen ko Pentekost, ma kan pining Peter nge John nga ranow ko gin ni ka nog Jewish Sanhedrin ngay ni ngar welthingow u rom, ni aram fare tafen e tapuf oloboch nth’abi ga’ ko re binaw nem, nu rom e turguy e pi tapuf oloboch riy ni ngan thang e fan ku Jesus Kristus. Ke dada’ ko marus fa gali apostal u p’owchen e pi girdi’ nem ni ngongol rorad e ma k’aring e marus ma yad e piin ni tadamumuw? Ri danga’! Kan ni thothup e ir e ke gelnag Peter nge John ni ngar machibgow ndar rusgow ma arfan ni ke ngat e toogor rorad, mi “yad nang ni yow l’agruw ni’ ni ur unew ngak Jesus.” (Acts 4:8, 13) Maku kan ni thothup e ke ayuweg Stephen ni nge weliy e thin ni de rus ngak girdien e Sanhedrin. (Acts 6:12; 7:55, 56) U m’on riy, fare kan ni thothup e ke k’aring e pi gachalpen ni ngar machibgad ni dar rusgad. Be gaar Luke: “Ma faan ra mu’gad ko meybil, me rur fa gin’en ni kar muulunggad ngay. Ma yad gubin ni yib i suguyrad fare Kan ni Thothup mi yad tabab i weliy e thin rok Got ngak e girdi’ ndaki yib e marus ngorad.”​—Acts 4:31.

17. Mang yugu boch e kanawo’ ni ke ayuweg fare kan ni thothup e pi gachalpen ko machib ni kar ted?

¹⁷ U daken e kan ni thothup rok Jehovah nib gel gelngin, nge Jesus ni kan faseg ko yam’, e ke ayuweg fare maruwel ko machib. (John 14:28; 15:26) Nap’an ni kan puog fare kan nga daken Kornelius, nge girdien e tabinaw rok, nge boch e fager rok, me nang Peter ni apostal ni piin ni gathi yad piyu Israel ni dan maadadnagrad e ku rayog ni ngan taufenagrad nga fithingan Jesus Kristus. (Acts 10:24, 44-48) Tomur riy, ma fare kan e ir e ke dugliy ni Barnabas nge Saul (fare Paul ni apostal) e ngar unew ko maruwel ni missionary me yog ngorow e gin ni nga ranow ngay nge gin ni thingar dabranow ngay. (Acts 13:2, 4; 16:6, 7) Ir e be pow’iy e pi apostal nge piin ni piilal ni ngar dugliyed ban’en nge tin ni ngan rin’ u Jerusalem. (Acts 15:23, 28, 29) Maku kan ni thothup e ke pow’iyrad u nap’an ni ngara dugliyed e piin nra ayuweg e ulung ni Kristiano.​—Acts 20:28.

18. Uw rogon ni Kristiano kakrom ni kar daged e t’ufeg?

¹⁸ Maku reb, rayog ni ngan guy fare kan ni thothup ko piin Kristiano, ni be dag e pi fel’ngin Got, ni bod e t’ufeg. (Galatia 5:22, 23) T’ufeg e ir e ma k’aring e pi gachalpen ni ngara ayuweged yad. Ni bod ni, tomren e Pentekost ko 33 C.E., ma immoy boch e salpiy ni kan kunuy ni fan ni ngan pi’ e tin nib t’uf ko pi gachalpen u Jerusalem. Thin u Bible e be gaar: “Me yan i par e re ulung rorad nem ndakuriy be’ ri’ ni be gafgow u ban’en. Piin ni bay e binaw ntaferad ara naun e bay n’en mi yad pi’ ni chuway’, ma ra feked e salpiy riy i yib ngar pied ngak fapi apostel; ma aram min f’oth e re salpiy nem ko girdi’ nra be’ ma be yan u rogon e tin ndabi siy ni nge yog ngak.” (Acts 4:34, 35) Re t’ufeg ney e kan dag ni gathi kemus ni fan ko piin ni walag u lan e ulung ya ku kan dag ngak yugu boch e girdi’, u daken e thin nib fel’ ni yibe wereg ngorad ngu boch ban’en ni kan pi’ ngorad u fithik’ e gol. (Acts 28:8, 9) I yog Jesus ni fare t’ufeg nib riyul’ e ir e pow ko pi gachalpen. (John 13:34, 35) Rriyul’ ni felngin e t’ufeg e aram e n’en ni be chuchugurnag e girdi’ ngak Got ma be ayuweg ni nge yoor girdien Got ko fa bin som’mon e chibog ni bod rogon e chiney.​—Matthew 5:14, 16.

19. (a) Mang dalip e kanawo’ ni ke garer e thin rok Jehovah riy ko fa bin som’mon e chibog? (b) Mang e gad ra yaliy ko bin migid e article?

¹⁹ Fare bugithin ni “kan ni thothup” e kan ta’ ni 41 yay u lan fare babyor ni Acts. Ba tamilang, ni i yoor mi i gel i yan e tin riyul’ e Kristiano ko bin som’mon e chibog nbochan gelngin nge ayuw ko kan ni thothup. Ke yoor e pi gachalpen, ma kan wereg e thin rok Got ko pi binaw ni boor, me gel ngak pi teliw nge ku boch e machib ni sum ko llowan’ ko girdi’ e ngiyal’ n’ey. Rogon ni i gel ma be yoor girdien Jehovah ko fa bin som’mon e chibog e ba taab rogon ko maruwel ni ma ta’ e Pi Mich rok Jehovah e ngiyal’ ney. Gad ra yaliy rogon ni ke gel e thin rok Got ko ngiyal’ ney ni ma ngat e girdi’ ngay ma taab rogon ko kakrom ma bay ko bin migid e article.

Ka Ga Manang?

• Uw rogon ni ke yoor fapi gachalpen kakrom?

• Uw rogon ni kan wereg e thin rok Got ko pi binaw iyan?

• Uw rogon ni ke gel e thin rok Got ko fa bin som’mon e chibog?

• Uw rogon ni ke maruwel fare kan ni thothup ma ke mon’og e thin rok Got i yan?

[Picture on page 22]

I machib Philip ngak be’ nu Ethiopia, me wer e thin nib fel’ ko pi binaw i yan

[Picture on page 23]

I pow’iy e kan ni thothup e pi apostal nge piin ni piilal u Jerusalem

[Picture Credit Line on page 20]

Baani mat’aw e tabthung u lang: Sasing ko fare Mach nu Jerusalem u nap’an fa bin L’agruw e Tempel - ni kan ta’ nga gin ba chuchugur ko fare Holyland Hotel, Jerusalem