Rogon Ni Ma Pow’iyey Got Ko Ngiyal’ Ni Ngan Mel’eg E Ani Mabgol
“Bay gu fil ngom e kanawo’ ni ir e ngam man riy; bay gog ngom e tin ni ngam rin’ ma bay gu fonownagem.”—PSALM 32:8.
1. Mang boch ban’en nib t’uf ko mabgol ma ra yib angin?
BE’ ni ka nog e aerialist ngak ni ma gosgos u daken nifeng u lan e lang ni ma fana’ yuyil i tal nga i afaf riy ni be yon’ ir maku ma ogog nib tolang ni ku ma chelchel u lan e lang ere cha’ ne’ e i afaf ko yuyil i tal ni be yon’ ir u lang iyan me pithig pa’ ko tal nga i chelchel u fithik’ e nifeng u lang ma nap’an ni tal ko chelchel me k’iyag pa’ me malle’ nga bal’ fapi tal nib sap nga but’ u bar ba’ rok’. Ma l’agruw ni’ ni yow ma sirgig u daken e ice ni yow be sirgig ni rib sumunguy e yow be yan u taabang u lan bangi n’en ni bay e ice riy ni yima sirgig u daken. Mab tomgin, ni yigi chibiy fare pumoon fare pin ni yow mi yin’ nga lang me chelchel fare pin u lang me bi aw nga daken reb e pi n’en ni baaram ni yima sirgig riy u daken e ice ni rib sumunguy rogon ni bi aw ma aram mukuura chelchelgow u daken e ice. L’agruw e gal n’en ney ni ba dake gathi ri ban’en ni un maruweliy nib gel. Machane mini’ e cha’ ni ra lemnag ni nge rin’ reb ko gali ney ni faanra dabi fil rogon, nge be’ nib salap ni manang e n’en be rin’ nge en ngar mangew, nge n’en ni rib ga’ fan ko bin nib mat’aw e fonow fa rogon ni ngan rin’ fare n’em. Ere ku bod rogon e mabgol nib fel’ ni ram’ug ni gowa yigi buch ni aram rogon. Machane, ku arrogon ni ku be yan u rogon be’ ni ba manigil ni nga um taarebnagew e tin ni nguum rin’ew ma ri ga’fan e fonow u fithik’ e gonop. Ere rib mudugil e fonow u fithik’ e gonop. Ere rib mudugil e fonow nib puluw e rib ga’ fan.
2. (a) Mini’ i e tababnag me yarmiy e mabgol, ma fan ko mang? (b) Uw rogon ni kan yarmiy boch e mabgol?
2 Baga’ ni reb e pagal ara rugod ni dawori un ko mabgol e nge lemnag murung’agen be’ ni nge mang ani mabgol rok—ni be’ ni yow ra par u taabang u nap’an e yafas. Ka nap’an e ngiyal’ ni tababnag Jehovah Got e re n’ey, ni nge un e pumoon nge ppin ko mabgol ma ke mang ban’en ni ma rin’ e girdi’. Machane, Adam, ni ir fa bin som’mon e pumoon, e de mel’eg leengin. Bochan e runguy rok Jehovah ngak ma ke pi’ leengin. (Genesis 2:18-24) Ba m’agan’ Got ngay ni ngar diyengow nge yoor pi fakrow iyan min suguy e fayleng ko girdi’. Tomren ni kan ngongliy e bin som’mon e mabgol, ma baga’ ni gallabthir ko fare pin nge fare pumoon e yow ra m’ag e mabgol, yu ngiyal’ u tomren ni ke puluw nga lanin’row e n’en ni yow ra rin’. (Genesis 21:21; 24:2-4, 58; 38:6; Joshua 15:16, 17) Yugu aram rogon ni fare mabgol ni gallabthir e ma yarmiy e ka yima ngongliy u boch e nam nge yalen, boor yang e chiney ni yad e yad ra mel’eg e en nge mang ani mabgol rorad.
3. Uw rogon ni ngan mel’eg e ani ra mang mabgol?
3 Uw rogon ni susun ngan mel’eg e ani mabgol? Boch e girdi’ e kar mel’eged nbochan yaan be’—ni aram e be’ ni yad be lemnag nib fel’ yaan ma boor e girdi’ ni baadag. Boch e girdi’ e ma sap ko chugum ku be’ ni ra ayuwegrad ma ra pi’ ngorad e tin nib t’uf rorad nge tin yad baadag. Machane bay taareb ko pi n’en ney nra pow’iy ba wu’ i mabgol nra falfalan’nagrow? Proverbs 31:30 e be gaar, “Feni pidorang be’ ni ppin e ma bannigey, ma pidorang e ma m’ay,” me ulul ngay ni gaar, “machane be’ ni ppin ni be par ni ba’ madgun Somol u wan’ e susun e nga nog e sorok ngak.” Ma ma tor nga daken e tin ni baga’fan: Mu lemnag Jehovah ko ngiyal’ ni ga ra mel’eg e ani mabgol rom.
Ayuw nib Fel’ ni Yib Rok Got
4. Mang ayuw ni ke pi’ Got ni fan ni ngan mel’eg e ani mabgol?
4 Jehovah, ni Chitamangidad u tharmiy ni ta runguyey, e ke pi’ e Thin rok ni kan yoloy ni nge pow’iydad ko urngin ban’en. Be yog ni gaar: “I gag Jehovah ni Got rom, e Gu be fil ngom ban’en nra yib angin ngom, ma gag e En ni be ayuwegem ni ngam man ko kanawo’ ni thingar mman riy.” (Isaiah 48:17, New World Translation) Ere dabni gin ngay, nrayog ni ngan pirieg u Bible e kanawo’ nge rogon ni ngan mel’eg e ani mabgol nra yib angin. Baadag Jehovah ni mabgol rodad e ra par nib mudugil ma ba falfalan’. Arfan, ni ke pi’ e ayuw ni fan ngodad ni ngad nanged fan ma rayog ni ngada folgad riy. Gathi aram e n’en ni gad be lemnag ni nge rin’ e en ni Sunmiydad ni tarunguyey?—Psalm 19:8.
5. Mang e n’en ni baga’fan ni fan ni ngi i par ni bay e falfalan’ ko mabgol?
5 Nap’an ni ke tababnag Jehovah e yaram ko mabgol, ma m’agan ngay ni ra par e mabgol ndariy n’umngin nap’an. (Mark 10:6-12; 1 Korinth 7:10, 11) Arfan ni “ke dubuy e mabgol ni nge wer,” ke mus ni goo “ngongol ni darngal” e bay rogon ni nge wereg. (Malaki 2:13-16; Matthew 19:9) Arfan, ngan mel’eg e ani mabgol e aram e n’en ni thingarda lemnaged nib gel u m’on ni ngada dugliyed ban’en ma dabda ted nga lanin’dad ni aram e n’en ni gathi rib ga’ fan. De yoor e n’en nrayog ni ngan duguliy ni ngani rin’ ni ra yib e falfalan’ ara kireban’ riy. Machane ra ngan mel’eg e ani mabgol nib fel’ rogon ma ra sug ko flaab e yafas ku be’ ma ra falfalan’, ra ke oloboch rogon ni ke mel’eg be’ e ani mabgol rok ma ri dabi m’ay e kireban’ rok. (Proverbs 21:19; 26:21) Thingar ni mel’eg e ani mabgol u fithik’ e gonop ma aram e rayog ni nge par ni bay e falfalan’, ya i tabab Got ni nge yarmiy nra ba wu’ e mabgol ma ngar maruwel u taabang ma ra yib angin ngorow.—Matthew 19:6.
6. Mang fan ni piin ni ka yad ba pagal ni pumoon nge ppin e thingara ayuwgad u nap’an ni ngara mel’eged e ani mabgol rorad, ma uw rogon ma rayog rorad ni ngara dugliyed ban’en u fithik’ e gonop?
6 Piin ni fel’ yangaren ni pumoon nge ppin e rib t’uf ni ngar ayuwgad ni dabi gel ngorad e arar ni fan ni ri yad baadag yaan be’ u nap’an ni ngara mel’eged e en nra mang mabgol rorad. Riyul’, ni piin ni kar uned ko mabgol ni kemus ni bochan e arar rorad e rib papey ni yad ra dariyfannag ara ni fanenikan. (2 Samuel 13:15) N’en nib math keru’ riy, e aram fare t’ufeg nib mudugil e rayog ni ngan maruweliy me gel iyan u nap’an ni kad nanged pangin e en mabgol rodad maku kad nanged nib fel’ rogon rarogodad. Maku ba t’uf ni nge tamilang u wan’dad ni n’en nrib fel’ ngodad e sana gathi ireray e n’en ni baadag gum’ircha’dad. (Jeremiah 17:9) Arfan ni thin rok Got ni ma pow’iyey ni bay u Bible e rib ga’ fan. Ra ayuwegdad ni ngad nanged rogon ni ngad dugliyed ban’en nib m’ag ko yafas rodad u fithik’ e gonop. I yog Jehovah boch e thin u daken fare psalmist ni gaar: “Bay gu fil ngom e kanawo’ ni ir e ngam man riy; bay gog ngom e tin ni ngam rin’ ma bay gu fonownigem.” (Psalm 32:8; Hebrews 4:12) Yugu aram rogon ni ngani un ko mabgol ma ra ayuwegdad ko n’en nib t’uf rodad ni aram e t’ufeg nge tin ni baaray nib t’uf rodad ni ngad chaggad ngak be’, maku ra yib boch e magawon nib t’uf riy e lem ni ke ilal nge gonop.
7. Mang fan ni boch e girdi’ e dubrad ni ngara folgad ko fonow nni fek u Bible u murung’agen rogon ni ngan mel’eg e ani mabgol, machane re kanawo’ ney era pow’iyey ko mang?
7 Ireray e kanawo’ nib gonop ni ngan fol ko mang e be yog e eni Tabolnginnag e mabgol nge rogon ni ngan mel’eg e ani mabgol. Machane, sana dubdad ni ngad folgad nfaanra gallabthir ara piin ni piilal e ke pi’ ngodad e fonow ni kan fek u Bible. Sana gadra lemnag ni gathi rib tamilang e magawon rodad u wan’rad, ma lem rodad nib gel e ir e ke k’aringdad ni ngad folgad ko tin ni baadag gum’ircha’dad. Machane ra munmun, ma sana gad ra kalngan’ ni dada folgad ko fonow nib gonop ni kan pi’ ngodad ni ra fel’ rogodad riy. (Proverbs 23:19; 28:26) Sana gadra pirieg ni gad be un ko mabgol ndariy e t’ufeg riy, ma sana kad gafgowgad i ayuweg e pi bitir rodad ma dabiy siy ni ani mabgol rodad e de michan’. Uw feni gel e kireban’ riy nfaanra fare yaram ni susun ni ngeb e falfalan’ riy ngodad nib gel e ke mang tabolngin e gafgow!
Pigpig Ku Got—Ban’en nib Ga’ Fan
8. Uw rogon ni yul’yul’ ku Got e ra ayuweg ni nge par e mabgol ni be athamgil ma ra yibnag e falfalan’?
8 Riyul’, ni ba wu’ i mabgol nra bagayow ma baadag bagayow e ra ayuweg e re n’ey ni ngari fel’ thilrow. Machane fapi kenggin e motochiyel nib mich u wan’row e kab ga’ fan ngorow ni fan ni rayog ni nguur athamgilgow ni taareban’row ma ra yibnag e falfalan’. Pigpig ku Jehovah Got nra tay e re wu’ i mabgol nem e ra gelnag e mabgol rorow ma ra taareban’row u reb e kanawo’ ni dariy ban’en ntaabrogon ngay’. (Eklesiastes 4:12) Ba wu’ i mabgol ni Kristiano ni ri yow ma tiyan’row ko pigpig nib riyul’ ni fan ku Jehovah, e kar taarebgow ko tirok Got ban’en, nge lem, nge gafarig. Yow ma fil e Thin rok Got u taabang. Yow ma meybil u taabang, ma aram e n’en nra taarebnag gum’ircha’row. Yow ma un ko muulung u taabang ma yow ma un ko machib u taabang. Urngin e pi n’en ney e ra ayuwegrow ngar mon’og ko tirok Got ma ra gelnag e fel’ u thilrow. Ma n’en nrib ga’ fan, ra taw’athnagrow Jehovah riy.
9. Mang e ke rin’ Abraham ni fan ni ngan gay e en ni nge mang leengin Isak, ma mang angin?
9 Bochan e yul’yul ni ta’ Abraham ni ka nog e patriarch ngak, ma ke athamgil ni nge falfalan’nag Got u nap’an ni yira mel’eg e ppin ni nge mang leengin Isaac ni fak. I yog Abraham ngak e tapigpig rok ni rima pagan’ ngak ni gaar: “Gub adag ni nga rim micheg ngog u p’eowchen Jehovah, ni ir e Got nu tharmiy ngu but’, ndab mu fek be’ u roy u Kanaan, ko gin ni gu be par riy ni nge leay fakag, machane ngam mu sul ko nam rog ngam fek reb e ppin u rom nge leay Isak ni fakag. . . . Bayi pi’ [Jehovah] e engel rok nge m’on rom nge yog ni mfek be’ ni ppin u rom nge leay fakag.” I dag Rebekah ni rriyul’ ni ir leengiy ni rib fel’, ma rib t’uf rok Isak.—Genesis 24:3, 4, 7, 14-21, 67, NW.
10. Mang e thin nu Bible ni kan ta’ chilen ngak e piin ni figirngiy nge leengiy ni ngar par riy?
10 Faan manga gadad e Kristiano ndaworda uned ko mabgol, ma yul’yul’ ku Got e ra ayuwegdad ni nge yog boch fapi felngin Got nra ayuwegdad nge yog ni ngada folgad ko fonow ni bay u Bible ni fan ko mabgol. Boch ban’en ni thingari rin’ e piin ni pumoon nge ppin e ba muun ngay e tin ni ke yog Paul ni apostal ni gaar: “Nge par e piin leengiy ni nguur folgad ko piin figingirad nrogon nib puluw nga laniyan’ Somol . . . Piin ni figirngiy, nga ri t’uf pi leengimed romed, ni bod rogon Kristus ni rib t’uf e galesiya rok me pi’ e yafas rok ni fan ngorad . . . Piin ni figirngiy e ba t’uf ni nge t’uf leengirad rorad ni bod rogon dowrad. . . . Ra bigimed ma nge t’ufeg leengin ni bod rogon downgin; maku, fa en leengiy e thingari gelnag i tayfan figirngin.” (Efesus 5:22-33) Rogon e n’en ni gad be guy, ko thin rok Paul ni kan thagthagnag e be dag ni ri baga’ fan ni ngan dag e t’ufeg nge tayfan. Ngan fol ko re fonow ney ni ba muun ngay “madgun” Jehovah. Mab t’uf ni ngan micheg u polo’ i gum’ircha’ey ni ngan yul’yul’ ni yug ndemtrug ko mo’maw e par fa mmom. Piin Kristiano ni yad be lemnag ni ngar uned ko mabgol e susun rayog rorad ni ngara rin’ed e re n’en ney.
Ngan Dugliy ko Wuin e Ngan Mabgol
11. (a) Mang fonow ni murung’agen e mabgol ni bay u Bible ko wuin e ffel’ ni ngan mabgol? (b) Mang e n’en ni be dag ni ngan fol ko fonow ni bay u Bible ko 1 Korinth 7:36 ya ir e kanawo’ ko gonop?
11 Ngan nang ko wuin e ra ffel’ mab t’uf ni ngada uned ko mabgol. Ya bochan ni ba thil thil rarogon be’ nge be’, ma de yog e Bible nib tamilang u murung’agen yangarey. Machane, be dag nib fel’ ni ngan sonnag ba ngiyal’ ni kad “thumurgad ko fel’ yangaren,” ni aram e ngiyal’ ni arar rodad ko par ko pumoon nge ppin e bagel ni ma chefeg nga bang rogon nib fel’ ni ngan turguy ban’en. (1 Korinth 7:36) Ke yog Michelle ni gaar, “Nap’an ni kug guy e pi fager rog ni yad be un i ta’ e yar ma yad be un ko mabgol, ni baga’ ni ka nap’an ni ka yad ba’ ko fel’yangaren, ma yu ngiyal’ e rib mo’maw’ ni ngan fol ko re fonow ney”. Me ulul ngay ni gaar, “machane keb ngan’ug ni aram fare fonow ni yib rok Jehovah, ma ri ma yog ngodad e pi n’en nra fel’ rogodad riy. Nap’an ni gu be sonnag ba ngiyal’ ni nggu un ko mabgol, ma ke yog rog ni nggu lemnag thilmow Jehovah ma ke yoor boch e tin ni kug nang u murung’agen e yafas, ni aram e n’en ndabiyog ni nge yog ngom u nap’an ni ka ba fel’yangarem. Boch e duw nga tomren, ma ke yoor boch e tin ni kug nang u rogon ni nggu fal’eg rogog ni nggu rin’ e maruwel nib mil fan ngog nge boch e magawon ni ma yib nga lan e mabgol.”
12. Mang fan nib fel’ ni dabni gurgur ni ngani un ko mabgol u nap’an ni dawor ni ilal?
12 Piin ni yad be gurgur ni ngara uned ko mabgol u nap’an ni ka yad ba pagal e baga’ ni kara pirieged ni tin nib t’uf rorad nge tin ni yad baadag e ke thil u nap’an ni kar ilalgad. Munmun ma kar guyed ni pi n’en ni ri yad baadag kafram e daki ga’ fan. Reb e Kristiano ni kab rugod e kari adag ni nge un ko mabgol u nap’an ni ke 16 e duw rok. Titaw rok e ke un ko mabgol u nap’an ni aram rogon e duw rok, ku arrogon e chitingin. Ma ngiyal’ nem ma fare pumoon ni ir fa cha’ ni baadag ni ngar mabgolgow e ke yog ni dubun ni nge mabgol ko re ngiyal’ nem, me mel’eg yugu reb ni baadag. Machane, nap’an ni ke ilal boch ma kari kalngan’ ko n’en ni ke dugliy kafram nib papey.
13. Piin ni ngara mabgolgad nib papey e baga’ ni mang e dawori yog ngorad?
13 Nap’an ni yibe lemnag ni ngan un ko mabgol, ma baga’fan ni ngari tamilang u wan’uy urngin ban’en nib l’ag ngay. Ngan mabgol nib papey e ra yibnag boor e magawon ko fa wu’ i mabgol ni dawor ra ilalgow ma dabiyog rorow ni ngara pithigew e pi magawon ney. Sana de gaman e tin ni kar filew ma dawora ilalgow ni aram e n’en nib t’uf u nap’an ni ra yib e magawon ko mabgol nge fare n’en ni ngan ayuweg e bitir. Susun ngada uned ko mabgol ni ke mus nfaanra ke taw ko ngiyal’ ni kad ilalgad, nge lem rodad, ma kada ilalgad ko tirok Got nrayog rodad ni nguud pared e ani mabgol rodad ndariy n’umngin nap’an.
14. Mang e ba t’uf ni fan ni ngan pithig e pi magawon ko mabgol?
14 I yol Paul ngak e piin ni kar mabgolgad nra “yib e gafgow nib ga’ ngorad.” (1 Korinth 7:28) Ma ra sum e magawon ni bochan bay l’agruw e wok nib thilthil, mab ga’ ni ma thilthil e lem rorow ko n’en ngar turguy. Bochan ni daworda flontgad, ma sana arfan ni mo’maw’ ni ngada lebguyed e maruwel rodad nrogon nib puluw ko yaram ko mabgol u lan e Bible. (1 Korinth 11:3; Kolose 3:18, 19; Titus 2:4, 5; 1 Peter 3:1, 2, 7) Ba t’uf ni ngani ilal boch min ilal ko tirok Got ban’en ni ngani fal’eg i gay e fonow rok Got min fol riy ma aram e rayog ni ngan pithig e magawon u fithik’ e t’ufeg.
15. Mang e maruwel ko gallabthir ni fan e ngara ayuweged e pi bitir rorad ngar fal’eged rogorad ni fan ni ngara uned ko mabgol? Ngam weliy.
15 Pi gallabthir e rayog ni ngar fal’eged rogon pi fakrad ni fan ko mabgol ni ngar nanged feni ga’ fan ni ngar folgad ko fonow ni yib rok Got. Ngan salap i fanay e Thin nu Bible nge pi babyor ni kan ngongliy ni fan ko Kristiano, ma rayog rok e pi gallabthir ni ngar ayuweged e pi bitir rorad nge piin ni ra mang ani mabgol rorad ni faanra kefel’ rogorad ni ngara uned ko mabgol.a Blossom ni 18 e duw rok e ke adag reb e pagal u lan e ulung rok. Reb e pioneer e re pagal nem, ma yow baadag ni ngar mabgolgow. Machane ke ning e gallabthir rok ngak ni nge son taareb e duw, ya yow be lemnag ni kaygub bitir e re rugod nem. Ma tomur riy me yoloy Blossom ni gaar: “Ri gu be falfalan’ ni kug fol ko re fonow nem. U lan taareb e duw, ma kug ilal ma ku guy ni re pagal ney e dariy rok e pi felngin nra ayuweg me mang ani mabgol nib fel’. Ma tomur riy me chuw ko ulung, ma aram ke yog rog ni gu palog ko gafgow ni susun ni ngeb ko yafas rog. Uw feni fel’ ni bay e gallabthir nib gonop ni yima pagan’uy ngorad ko ngiyal’ yad ra dugliy ban’en!”
‘Ngan Mabgol Nrogon e Mabgol ni Ma Tay Girdien Somol’
16. (a) Uw rogon ni ma yib e skeng ngak e Kristiano ni kar ‘mabgolgad nrogon e mabgol ni ma tay girdien Somol’? (b) Nap’an ni ngan wawliy ni ngan mabgol ko en de michan’, ma fapi Kristiano e susun ni ngar fal’eged i lemnag e mang?
16 Thin rok Jehovah ni fan ko piin Kristiano e ba tamilang ni gaar: ‘Ngan mabgol ni kemus nrogon e mabgol ni ma tay girdien Somol.’ (1 Korinth 7:39) Rayog ni ngeb e skeng ngak e piin gallabthir ni Kristiano nge fapi bitir rorad riy. Uw rogon? Piin nib fel’ yangaren e sana yad baadag ni ngara uned ko mabgol, machane dabiyog ni ngara pirieged be’ ni nge mang ani mabgol rorad u lan e ulung. Be m’ug ni gowa aram rogon. Sana ri buchuw e pagal ko ppin u reb e binaw, ara dariy be’ nib fel’ ni ngan mabgol ngak u lan fare binaw. Reb e pumoon ni kab pagal ni gathi girdien e ulung e sana ra dag ni baadag reb e ppin ni kab fel’ yangaren u lan e ulung (ara fare pumoon e ir reb e Kristiano ma fare pin e danga’), ma yira k’aring lanin’uy ni ngan dariyfannag e motochiyel rok Jehovah ni ke ta’. Utan fare magawon ni aram rogon, ma ba fel’ ni ngan fal’eg i lemnag fare n’en ni ke rin’ Abraham. Reb e kanawo’ ni ke ayuweg ni nge par nib fel’ thilrow Got e aram i maruweliy ban’en ni nge mudugil ni Isak ni fak e ra leengiy be’ ni riyul’ ni ir e tapigpig rok Jehovah. Maku aram e n’en ni ke rin’ Isak ngak Jakob ni fak. Yad urngin nib l’ag ngay ma susun ni ngara maruwelgad nib elmerin, machane ke falfalan’ Got ngay ma ke taw’athnagrad.—Genesis 28:1-4.
17. Mang fan ni yira mabgol ko en ni de michan’ ma baga’ ni ma yib e magawon riy, ma ri mang fan ni ‘ngan mabgol nrogon e mabgol ni yima tay ni go’ girdien Somol’?
17 Yu ngiyal’, ma en ni de michan’ e ke mang Kristiano u tomren. Machane, baga’ ni ran leay e piin ni de michan’rad ma ra yibnag e gafgow nib gel. Piin ni kan taab’ mat’ ngorad ni de thabthabel e dabi taareb e michan’ rorad, nge kenggin e motochiyel, ara ban’en ni yi ra nameg. (2 Korinth 6:14) Ma ra yib wenegen ma ra kirebnag e numon nge falfalan’ ko mabgol. Ni bod ni, reb e ppin ni Kristiano e kari kireban’ ya bochan tomren ni ke un ko muulung ni ke pi’ e athamgil nga laniyan’ e girdi’, ma nap’an ni ke sul nga tabinaw rok ma dabiyog ni nge weliy e tirok Got ban’en ngak e ani mabgol rok ni de michan’. Ma riyul’ ni tin kab ga’ fan, e aram e ‘ngan mabgol nrogon e mabgol ni ma ta’ girdien Somol’ e ra m’ug e yul’yul’ ngak Jehovah riy. Ra ngada folgad ko Thin rok Got, ma dabi magawonnagdad gum’ircha’dad, ya bochan ni gad be rin’ e tin nib “m’agan’ ngay.”—1 John 3:21, 22.
18. Nap’an ni yibe tafinaynag e mabgol, mang e pi n’en nib ga’ fan ni susun ni ngan tiyan’uy ngay, ma mang fan?
18 Nap’an ni yibe lemnag e mabgol, ma felngin nge feni ke ilal ko tirok Got e aram e bin som’mon ni ngan tiyan’uy ngay. Wok rok reb e Kristiano, nib muun ngay e t’ufeg ni fan ku Got nge pigpig ku Got u polo’ i yafas rok, e kab tolang puluwon ndabi chuchugur ko fel’ yaan. Piin ni kara rin’ed e maruwel rorad ngar manged ani mabgol nib gel ko tirok Got e ke falfalan’ Got ngorad. Ma rayog ni ngari gel e mabgol rorad nfaan yad ra pigpig ngak e En Tasunmiy ma yad ra fol ko motochiyel rok u polo’ i lanin’rad. Ma yira pining e sorok ngak Jehovah riy, ma ra tabab e mabgol u daken e def nib spiritual nib gel nra ayuweg me par ni ke taareb.
[Footnotes]
a Mu guy e The Watchtower ni February 15, 1999, ko page 4-8.
Uwrogon ni Ngam Pi’ e Fulweg?
• Mang fan nib t’uf e fonow rok Got u rogon ni ngan mel’eg e ani mabgol?
• Uw rogon ni yul’yul’ ku Got e ra gelnag e m’ag ko mabgol?
• Uw rogon ni nge fleg e pi gallabthir rogon pi fakrad ni fan ni ngar uned ko mabgol?
• Mang fan ni baga’ fan ni ‘ngan mabgol nrogon e mabgol ni kemus ni go’ girdien Somol’?
[Pictures on page 11]
Ngan fol ko fonow rok Got u rogon ni ngan mel’eg e ani mabgol ma ra yib e falfalan’ riy nib gel
[Pictures on page 12]
‘Ran mabgol nrogon e mabgol ni go’ girdien Somol’ ma ma yib e taw’ath riy nib gel