Dab Mu Pag e Maruwan’ Nge Gothey e Michan’ Rom

Rebo rran e ga be lemnag nib fel’fel’ rogom. Ma bin migid e rran ma ga be thamiy ni gab m’ar. Mab tomgin, ni ke m’ay gelngim ma kam war. Be amith lolugem ma ke gafgow dowam ko amith. Mang e ke buch? Ke yan e bayking nib kireb nga fithik’ i dowam ke warnag fa mit nem ni nge taleg e bayking ma ke yan ko yungin baga’ fan u dowam. Faan yira pag ni dabni falaynag, ma pi bayking ney ni keb ngom e rayog ni kirebnag fithik’ i dowam​—ni dabki fel’ ara li’em nga mum’.

BA MUDUGIL, ni faanra de fel’ ara ba war fithik’ i dowam, ma ra yib e m’ar ma ba mom ni nge af ngom. Ni bod rogon, ni faan manga, ba war fithik’ i dowam ni bochan ni de gaman felngin e ggan ni ga be kay, ma aram “gelngin dowam ni nge cham ko bayking e rib war ma yugu ra yib bochi m’ar ngom ma ga magawon,” aray rogon ni yog Peter Wingate ni be’ ni ma yoloy murung’agen e falay nge m’ar.

Ere faanra aram rogon, ma mini’ e ra mel’eg ni nge par u fithik’ e uyungol? Dabisiy, ni ga ma rin’ ni rogon ni rayog rom ni ngam ko’ e tinib fel’ ma ba gaman ni ngam par nib fel’fel’ rogom. Maku sana ga ma guy rogon ni rayog rom ni nge dab mu chugur ara mman ko gini bay e m’ar ara bayking riy. Ere ga ma rin’, ara ga ma kol ayuw ngom, ni ku aray rogon ni bochan ni nga um par nib gel ma ba “fel e michan’ rom”? (Titus 2:2) Ga ma par, ni ga be tiyan’um, ma ga be kol ayuwngin ko pi n’en ni bay e riya’ riy ni ma yibnag e maruwaran’? Pi n’en ney e rib mom ni nge gel nge gagiyegnag lanin’um nge gum’ercha’em nge kirebnag e michan’ rom, nge tha’ u thilmew Jehovah. Boch e girdi’ e bayi nen mar paged talin ere magawon ney. Kar paged yad ke mom ni nge kolrad e maruwaran’ ni bochan ni kar paged yad kar uyungolgad ko tirok Got ban’en. Ere sana ku rayog ni ngam yodorom fa?

Maruwaran’​—Gubin Ngiyal’ Ma Ba Kireb?

Danga’, gathi gubin e maruwaran’ ma ba kireb. Yu ngiyal’, ma ba t’uf ni nge dabke e mich u wan’um ban’en nge mada’ ko ngiyal’ ni ka mich u wan’um nib riyul’. Teliw ni ma yog ni thingari mich u wan’um ma dabi maruwaran’um nga ban’en e bay e riya’ riy ma ra olobochiyem. Riyul’, ni yog fare Bible ni t’ufeg e “ba mich u wan’ urngin ban’en.” (1 Korinth 13:7) Reb e Kristiano ni ma t’ufegey e ba mudugil ni ra mich u wan’ e piin ni kar micheged ni yad ba yul’yul’ ni rayog i pagan’uy ngorad. Machane thin ku Got e ku be ta’ chilen ni ‘dabni pagan’uy nga urngin bugithin.’ (Proverbs 14:15) Yu ngiyal’ ma n’en ki i rin’ be’ nsom’mon e rayog ni aram fan ma dabni pagan’uy ngak.

John ni apostal e ki ning chilen ni yugu dabni pagan’uy nga ban’en ni dan nang fan. Gaar, “Dabi mich u wan’med urngin e n’en ni kan thagthagnag ka nog,” me yoloy ni gaar. Ya, ngam “skengnaged e pi n’en ni kan thagthagnag ngam guyed ko sum rok Got fa dangay.” (1 John 4:1, New World Translation) Ban’en “ni ka nog,” ban’en ni yibe fil ara lem ku be’, e rayog ni nge bi m’ug ni yib rok Got. Machane rriyul’ ni yib rok fa? Ra maruwaran’uy ni aray rogon ma ra ayuwegey ya, bod ni yog apostal John ni gaar, “boor e piin ni yad be bannag e girdi’ ni kar wergad u fayleng.”​—2 John 7.

Maruwaran’ ni Dariy Kenggin nib Riyul’

Arrogon, ngan yul’yul’, min tayan’uy i gay e tin nib mich ni ra yibnag e tin riyul’ e rib t’uf. Re n’ey, e de taareb rogon, ko baaray ni ngad paged e maruwaran’, ni dariy rogon nge sum u lanin’dad nge gum’ercha’dad​—maruwaran’ ni rayog ni kirebnag e michan’ rodad ni ke gel nge tha’ u thildad. Re maruwaran’ ney e kan weliy fan ni aram e “dakir pagan’um ko fare michan’ fa lem ni baaray ni be magawonnag i turguy-ban’en.” Kaga manang rogon ni ta’ Satan e maruwaran’ nga laniyan’ Efa u murung’agen Jehovah? Ni faani fith fith ni gaar, “Rriyul’ ni yog Got ngomew ni dabmu koyew wom’engin urngin e gek’iy ni ba’ ko gi woldug ney?” (Genesis 3:1) Fare samarwar ni yib ko fare deer ni ba deer nib dake ba manigil e ir e magawonnag e lem rok Efa nge magawon rogon ni nge dugliy laniyan’. Aram rogon ngongolen Satan. Rib salap i rin’ ban’en nib ley e ba riyul’ ma baley e malulfith. Satan e ke gothey bokum e tha’ nib riyul’ ni rayog i pagan’uy ngay ko gelngin e maruwel rok ni yugu be yung e maruwaran’ nga laniyan’ e girdi’ ni aram rogon.​—Galatia 5:7-9.

I James ni gachalpen Jesus e nang fan nib tamilang gelngin nra kirebnagey e mit ney e maruwaran’. Maruwaran’ ko tha’ u thildad Got, e ta James chilen ni gaar, ma taydad ni gad “bod baley i n’ew u maday nnifeng e be mithmitheg ma be yannag.” Gadad ra bod “be’ ni der ma mudugil laniyan’ ma der ma mudugil rogon urngin kanawoen’.”​—James 1:6, 8, NW.

Um Par nib Fel’ Rogom Ko Tirok Got Ban’en

Ere, uw rogon, ni ngad ayuweged gadad ko maruwaran’ ni ra kirebnigey? Fare fulweg riy e rib mom: nga rin’ dugliy ni ngan siyeg e sabanban ku Satan ma ngada folgad ko nen ke duguliy Got ni nga un rin’ nge ta’dad nib “mudugil e michan’ rodad.”​—1 Peter 5:8-10.

N’en ni rib tha’bi ga’ fan e nge fel’ rogon e darwo’ ko tirok Got ban’en. Ya faanra dariy, ma michan rodad, e ra bod ba dowef ni kan tel e ggan rok, ni aram e bayi kireb i yan me munmun me yim’. I tay Jesus Kristus chilen e re n’ey ni faani gaar: “Girdi’ e dabiyog ni yigoo flowa e ra i kay mi i par nib fas, machane urngin bug e thin ni be yog Got e ir e ra i tay e girdi’ nib fas ni dabi yim’.”​—Matthew 4:4.

Mu lemnag e re n’em. Uw rogon ni ngada ubunged e michan’ rodad ko som’mon? N’en be yog e ngiyal’ ni da ubunged e michan’ rodad nge pagan’ rodad ngak Jehovah, nge pi n’en ni ke micheg, nge ulung rok ni bochan ni kan duruwiydad ko tirok Got. Arrogon, gathi nga yugu u darod nib mol lanin’dad me mich urngin e tin kad rung’aged u wan’dad. Gadad ‘ma fal’eg i bieg e thin ku Got ni gubin e rran ngad guyed ko ri aram rogon fa danga’.’ (Acts 17:11) Kad ‘micheged ngodad e pi n’en nib fel’ ma ba m’agan’ Got’ ngay ni dariy thibngin ma ke mich u wan’dad ni pi n’en kad rung’aged e ba riyul’.​—Roma 12:2; 1 Thessalonika 5:21.

Ngan Palog ko Uyungol ko Tirok Got Ban’en

Ere chiney e magawon ni bay e nge par e michan’ rodad nib fel’ rogon ma ngad paged urngin e maruwaran’ ko michan’ ni rayog ni nge warnag e pagan’ rodad ngak Jehovah nge ulung rok. Ra ngan rin’ e re n’ey ma thingari dabda talgad i bieg e thin rok Got ni gubin e rran. Paul ni apostal e ta’ chilen ni gaar, “ra boch nga ram ma boch e [girdi’ nib dake ke gel e michan’ rorad] e bay ra n’aged e michan’ rorad, mi yad fol ko pi n’en ni ka nog ni yira oloboch riy nge skul ko pi moonyan.” (1 Timothy 4:1, NW) Pi n’en baaray ni yima yog ma yibe fil ni ma chefeg e girdi’ nga bang e ir e be sunmiy e maruwaran’ u laniyan’ boch e girdi’ ma be kirebnag thildad Got. Ere mang e n’en ni ra ayuwegdad? Nga uda ululgad i “duruwiydad ko fapi thin ko fare michan’ nge tin kad filed nib fel’ ni ir e [gad] be lek.”​—1 Timothy 4:6, NW.

Bay e kireban’ riy, ya yugu aram rogon, ma bay boch e girdi’ e chiney ni kar mel’eged ni dabkun “duruwiyrad ko thin ko fare michan’ ”​—ni yugu aram rogon ni ba’ e re ggan nem ni dariy puluwon. Ni bod rogon ni yog reb e girdi’ ni yoloy bang ko fare Proverbs ni gaar, rayog ni nge liyegey e tin nib fel’ e ggan, ni aram e thin rok Got ni fare mur ko tirok Got ban’en, ma dabni kay ngan nang fan.​—Proverbs 19:24; 26:15.

Aram e n’en ni buch rok boch e Kristiano ko tin som’mon e ulung. Aram rogon, kar digeyed e fol Bible ni goo yad, ma aram mar meewargad ko tirok Got ban’en. (Hebrews 5:12) I weliy apostal Paul rogon e riya’ ni faan yira rin’ ni aray rogon u nap’an ni yol ngak e pi Kristiano nu Hebrew ni gaar: “Baga’ fan ni ngad motoyilgad nge pag rogon ko pi n’en ni kad rung’aged, ni bochan ni nge dabda man’gad nga orel.” Manang feni mom ni yira man’ nga orel nga ni yan nga fithik’ e ngongol ni kireb ni faan gad ra “digey e re ayuw ni tha’bi ga’ nem.”​—Hebrews 2:1, 3, NW.

Nen nib ga’ fan, e ani be gafgow ya der gaman e yobung ko ggan u fithik’ i dow e gathi gubin ngiyal’ ni ma m’ug ni ke yaan m’ar ara ke sileklek. Ere ku arrogon, ni ku rayog ni nge dabi gagiyel nib papey ni ke war be’ ya ke k’iy ko tirok Got ban’en. Rayog ni nga um m’ug nib fel’fel’ rogom ko tirok Got ban’en ni yugu-aram rogon ni danir duruwiyem nib fel’ rogon​—machane dabi n’uw nap’an! Ma aram ma ga war i yan ko tirok Got ban’en, ma ke mom ni ngeb fare maruwaran’ ngom ni dariy tapgin nib riyul’, ma dabki yog ni ngam cham nib gel ni fan ko michan’ rom. (Jude 3) I gur e ga manang​—ni yugu ra dariy be’ nim nang me gur e ga manang e gin riyul’—​ni kam taw ngay u rogon e darwo’ rom ko tirok Got ban’en.

Erfan, ni nguumu fil ban’en ni goo gur. Nga u mu gelnigem nga um cham ko maruwaran’. Ngam chuweg u wan’um e maruwaran’ ya maruwaran’ ni ma yib e rayog ni nge wageynag lanin’um ma ra yib angin nib kireb. (2 Korinth 11:3) ‘Riyul’ ni gad be par ko tin tomuren e rran? Rayog ni nge mich u wan’um urngin ban’en ni be yog e Bible? Re ulung ney rriyul’ ni ulung rok Jehovah?’ Satan e ri baadag ni nge ta’ e maruwaran’ ni aray rogon nga lanin’um. Dab mu pag e ngongol ni ngan m’aynag fan e darwo’ ko tirok Got ban’en nge mom nigem ni ngam yog ko sasalap rok. (Kolosse 2:4-7) Mu lek e fonow nni pi’ ngak Timothy. Mu nang be’ nib fel’ nib tafil e “pi nen nib thothup ni kan yoloy” ya aram e nga u mu “ulul i yan ko pi nen kam fil ma kan ta’ chilen ngom ni nge mich u wan’um.”​—2 Timothy 3:13-15.

Mu Par “Nib Fel’fel’ Rogom u Fithik’ e Michan’ ”

Be’ ni ke digey ni dakir fil e Bible e rayog nib t’uf e ayuw rok nib gel ma ngan pi’ e athamgil ngak ni nga ki sul nge fel’ rogon e abich rok ko tirok Got ban’en. Faanra aram e gin kam taw ngay, ma ngan gay e ayuw ma ngam falfalan’ ko ayuw ni yira fek i yib ngom ni nga ki fulweg gelngim me ki fal’eg rogom ko tirok Got ban’en.​—James 5:14, 15.

Mu fal’eg i lemnag nib fel’ rogon e riya’ ko maruwaran’. Faan ga ra pag ni dab kuumu koy e ggan nib fel’ ni thin rok Got ni aram e nga um fil e Bible ma ga be un ko pi muulung ko Kristiano, ma aram e kam pagem ke mom rogon Satan ni nge bit ngom. Ngam fanay e pi n’en ni be yib nib fel’ ngal’an’ ni be pi’ e ggan ni fan ko tirok Got ban’en ni be pi’ “fare tapigpig nib yul’yul’ ma ba gonop.” (Matthew 24:45) Nga um par “ni ba m’ag u wan’um e thin” ni ba’ angin nib fel’ ” ma ga par “nib fel’fel’ rogom u fithik’ e michan’.” (1 Timothy 6:3; Titus 2:2) Dabmu pag e maruwaran’ nge kirebnag e michan’ rom.

[Pictures on page 20]

Uw feni fel’ ni ga ma duruwiyem ko tirok Got ban’en?